سن فرقلی قادینسان، هامیدان فرقلی.
سنی آنلاماق دا آسان ایش دئییل.
گاه خوشبخت اولورسان، گاه دا کی دردلی،
بو سنین روحون‌دور، بو وردیش دئییل.
.
چتیندن چتینسن، غلیظدن غلیظ،
بیر اۆزون گولنده، بیری آغلاییر.
کیمینه دلیسن، کیمینه دردسیز،
درین باخیشلارین اورک داغلاییر.

قاپ‌قارا گؤزلرین، شیرین سؤزلرین،
آدامی ساحیلدن ساحیله چیرپیر.
سنسن سو پریسی بو دنیزلرین،
نوروندان بولودلار گؤزونو قیرپیر.

گل منی قیناما، اینجیمه مندن!
سنی ایسته‌مه‌مک، سئومه‌مک اولمور.
من سنین اۆزونو گؤردویوم گوندن،
سحر یئدیگیم ده یادیمدا قالمیر.

اینجه اللرینین، تیترک سسینین،
اۆرکک باخیشینین خسته‌سی اولدوم.
من سنه یازدیغیم سئوگی شعیری،
سن همین شعیرین بسته‌سی اولدون.

#نوصرت_کسمنلی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

مکتوبلار جاوابسیز، یولو دؤننده
کلمه‌لر ساغ گئدیب اؤلو دؤننده
آغلادیم سنین چون بویون، دوننده
گؤزومون یاشیندان دوشدون یئره سن.

داغیلدی اوستومه ساراییم، اینان
سینمده کسیلدی هاراییم اینان
تیکه تیکسینه باشیمدا سینان
فلکین داشیندان دوشدون یئره سن.

سونونجو آددیملار کوچه‌دن کئچدی
بیلمه‌دیم گؤزلریم یوخونو ایچدی
آرزی قوشو گلیب یوخومدان اوچدو
او قوشون دیشیندن، دوشدون یئره سن.

داها بو سئوگیدن دونوب ال چکدیم.
باشقا اورک‌لره منسه یول چکدیم
داها نه قیزین ساچینا ال چکدیم
او قیزین ساچیندان دوشدون یئره سن...

#مهدی_سهندی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

تانریم ان گؤزل گون‌لری حیاتینا
ان گؤزل سئوینج‌لری گؤزلرینه
ان گؤزل سئوگینی اوره‌یینه
و ان گؤزل گولوشو دوداقلارینا بخش ائتسین قارداشیم🩵
قلمین یازار🩵

#مهدی_سهندی - poemistic

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سئوینجدنمی، کدردنمی نم‌لنیب،
گؤزلر او گؤزلردی، یاش او یاش دئییل.
جمع گؤزل‌لیک جمالیندا جمع‌لنیب
باخیش او باخیش‌دیر، قاش او قاش دئییل!

باغچامیزدا گول- چیچه‌یه باخاردین،
قولتوغوما قیسیلاردین- یاتاردین
هئی دالیمجا سؤز صفانی آتاردین
دیل‌لر او دیل‌لردیر، داش او داش دئییل.

گنج‌لیگین اوستونو آلدی دومان- چن
سنی ده، منی ده قوجالتدی ائرکن
او قارا تئل‌لره مین سیغال چکن
ال‌لر او ال‌لردی، ساچ او ساچ دئییل

دونیامیزی یولا سالدیق بیر تهر
بوغولدو آرزولار، بوغولدو‌ قَهَر
یولومو گؤزله‌ین هر آخشام- سحر
«موراد» او موراددیر، یاش او یاش دئییل

#مراد_نیازلی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

عشق الین‌دن دیوانه یم - دلی‌یم
عاشیق‌لرین گؤزدن آخان سئلی‌یم
کرمی‌نی چالان سازین تئلی‌یم
گولوم!یئنه هاردان دوشدون یادا سن!

بو سئودادا تک دِییلم ، یوزو  وار
آیریلیغین یامان اوزو-ڱؤزو  وار
آرامیزدا هیجران اودو-کؤزو وار
یانمالی‌ییق،یا من یانیم،یادا سن!

ووردون یِئره چوخ اومیدی - گومانی
سِئون قلبه  سن وئرمه دین  آمانی
زَر،زیبایا ساتیلمایان "بوتانی"
نییه ساتدین اغیارا سن،یادا سن؟!

#سعادت_بوتا

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

دوداغین حیله‌دیر، سؤزلرین تله،
گؤزون جيبلريمين پاراسیندادیر.
عشقین ناغیل‌لارین عمّه‌نه سؤیله!
فیکریم اؤز دردیمین چاراسیندادیر

زولئیخادان دئییب گئتمه کنعانا!
سن کی اینانمیرسان دینه، قرآنا.
بهتان آتیب لعنت دئمه شیطانا!
ایبلیس، گؤزلرینین قاراسیندادیر.

بوراخ چیخیم گئدیم، قاندیرما منی!
«سئور-سئور» دئییب آندیرما منی!
سئوگیدن سؤز آچیب یاندیرما منی!
سئوگی رومان‌لارین آراسیندادیر...

#سئور_شهابی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

اولان اولوب، کئچن کئچیب بلکه ده
ایندی داها کؤورلمه‌یین یئری یوخ
عؤمور بویو بئله گلیب منیم کی
اولین‌دن بیری واردی بیری یوخ

اوزاق‌دایدی من ایسته‌ین اوجاق‌لار
اوره‌ییم‌دن گلیب کئچدی سازاق‌لار
آتالییدی، آنالییدی اوشاق لار
بیزیم ائوده بیری واردی، بیری یوخ

گؤزلریمده دولدورموشام یاغیشی
بیر کؤینکده چیخارمیشام من قیشی
شالوار-پئنجه‌ک گئیینیردی تای-توشوم
منده ایسه بیری واردی، بیری یوخ

اوزوم گولدو، طلبه‌یم دئیه‌نده
سیخیلیردیم دوست پئنجه‌یی گئینده
معلیمله دیل تاپا بیلمه‌ینده
قیمتیمین بیری واردی، بیری یوخ

قلبیم یاندی ایلک سئوگیم‌دن، عشقیم‌دن
دارا دوشدوم، اَل اوممادیم هئچ کیمدن
مجلیس‌لرده جان دئییب جان ائشیدن
دوستلاریمدان بیر واردی، بیری یوخ...

من اوردویا نه‌لر گؤروب گئتمیشدیم
اوره‌ک آلیب، اوره‌ک وئریب گئتمیشدیم
ایکی قیزا کؤنول وئریب گئتمیشدیم
قاییداندا بیری واردی، بیری یوخ

اوزاق گَزدی عمی، دایی، بی‌بی‌لر
سؤز آراسی منه ائولن دئدیلر
نیشان اوچون ایکی شئی ایسته‌دیلر
من‌ده ایسه بیری واردی بیری یوخ

واخت گله‌جک بو گونو گؤره‌جکسن
چوخ سئوالا گؤزونو دؤیه‌جکسن
واخت گله‌جک سن اؤزون دئیه‌جکسن
دئیه‌جکسن: "بیری واردی، بیری یوخ!"


#نصرت_کسمنلی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سورمایین نئچه یاشیم وار؛
یاشادیق‌لاریمدان بللی ایدی ذاتن، اوشاق اولدوغوم...

و بو گون منیم دوغوم گونوم!


#آردا_خانی

04/08/28 🧡🩵
.

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بو گون یولوم دوشدو قَبریستانلیغا
سئیر ائتدیم موختلیف مَزار داشلارین
نئچه‌سی حَیاتدا خوش گون گؤرمه‌‌ییب
یالاندان چَکیبلر خوش باخیشلارین

بیر قادین گؤردوم کی، او ساغلیغیندا
بیر چیچک آلماییب اؤز یولداشیندان
ایندی مَزارینین اوستو گول ،چیچک
اؤزو گولوب باخیر، مَزار داشیندان

بیری عؤمور بویو یامانلیق ائدیب
داشینا جَننتی عَکس ائتدیریبلر
بیریسی او قَدَر خئیریخاه ایدی
یازیغا داشی دا، آرتیق گؤروبلر

بیری اؤولادیندان خئییر گؤرمه‌ییب
باخیمسیز قالماقلا کؤچوب دونیادان
آمما مَزارینا باخان سؤيله‌یر
دونیانین خوشبختی اولوب بو اینسان

داشلارا باخیرسان یاریش مئیدانی
ائله بیل سَرگییه چیخیب قَبیرلر
آخی کیم بیلیر کی، او داش آلتیندا
اونلار نئجه‌دیرلر، نه گون گؤرورلر؟!

#ضییا_فدایی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

من عؤمور سوروردوم حیات یولوندا،
ال ائدیب ساخلادین گلدیییم یئردن.
قضانین گوناهی منده‌دی؛ کاش کی-
دؤنه‌یدیم همیشه دؤندویوم یئردن.

نه یولون سونودو، نه ده اورتاسی،
یولون قیریشیندا قالمیشام دئمه.
آدامدان آداما کئچیب گئدیبسن،
پیاده کئچیدی اولموشام دئمه.

زامان آیریلیغا درمان اولمادی،
چاره‌میز دونیانین هاراسیندادی؟
دردلره بیر دامجی ملهم ایسته‌دیم،
دئدیلر دونیانین یاراسیندادی.

هره‌ده بیر یئره، هره‌ده بیر جور-
آچیلیر بو عؤمرون باغلی یوللاری.
دئیه‌سن هامییا یاشیل گؤستریر،
بیر منم گؤزله‌ین ایشیق‌فورلاری...

#ائلوین_پاشا

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

توتولموش کؤنلومو، جام ایله شادان ائیله‌مک اولماز،
ال ایله پوسته‌نین آغزینی خندان ائیله‌مک اولماز.

نه سؤزدور بو کی، اول صاحب نظر زُهّاد،
قارا تورپاغی هرگز آب حیوان ائیله‌مک اولماز؟

بولود قیلان کیمی جولان، وورار دا ایلدیریم تیغی،
کؤنول پرده‌لرینده عشقی پنهان ائیله‌مک اولماز.

قیلیج گر ایچسه عالم قانینی، سیرابلیق بیلمز،
سنی عشّاق قتلیندن پشیمان ائیله‌مک اولماز.

منیم گؤز یاشیمی، چیخ‌گیل، فلکلردن تماشا قیل!
حبابِ قصرلر ایچینده توفان ائیله‌مک اولماز.

منِ مجنونی عاقیل ائیله‌مک مومکون دئییل، ناصح!
سؤز ایله مُشکِ نابی قان کی، بیر قان ائیله‌مک اولماز!

ختادان کئچدی جیران قانینی مُشک ائیله‌دی «صائب».
دئمه: عصیانی طاعت، کُفرو ایمان ائیله‌مک اولماز!...

#صائب_تبریزی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

حکومت ائوی‌نین قارشی‌سینداکی
"توتا" سؤیکه‌نمیشدی بیر علیل عسگر.
صدقه اومانا باخمیردی باکی،
سایمازجا کئچیردی یولدان اؤتن‌لر...

آخشامدان کوکره‌ییب اَسن کولک‌ده
چکمیشدی ایچینه دلی سسی‌نی.
علیل یانا-یانا قارغی توتک‌ده،
چالیردی "قاراباغ شکسته‌سی‌نی"

اَلیمی شست ایله جیبیمه سالدیم،
دیکسیندی بارماغیم، تیتره‌دی قولوم.
حیرصیمدن قورویوب، یئریمده قالدیم،
اوستومده دئییلدی اؤینه‌لیک پولوم.

آغزیمدا آلیشیب یاندی دیل-دوداق،
"توت" یاخدی اَلیمین اوتانماغینا.
گؤی‌دن یارپاق آتدی بیر ساری یارپاق
بیزدن پای اومانین بوش پاپاغینا


#شاهمار_اکبرزاده

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بیزیم گؤروش یئری خسته‌خانایدی
یاتێردی، سوْروشدوم، یوْخ ایدی کئفی
داها من آتایدیم، او دا آنایدی
منیم اؤز عایله‌م، اونون اؤز ائوی

گؤروشوب اَیلَشدیک بوردا اوز-اوزه،
صُحبت ائله‌مه‌یه سؤز آختاریردیق
دوزو، مات قالمیشدیق بیر- بیریمیزه
اوجاغی سؤندوروب کؤز آختاریردیق

ایندی اؤز بختیمیز، اؤز طالعیمیـز
بو گؤروش ایلک عشقه سوْن حُرمت ایدی
اوْتاقدا یاناشێ اَیلَشمه‌ییمیز
حیاتدا آیرێلێق علامتی‌یدی

دۆنیادا سئوگی‌ده، محبت ده وار
آما، اوّلجه‌دن سؤز دئمک اوْلمور
دۆنیادا ائله بیل بیر قیسمت ده وار
ائه، بلکه، قیسمت‌دن چوخ یئمک اولمور

قولاق آس ائفیردن گلن بیر سسه
"سعادت هر کسین اؤز الینده‌دیر"
سعادت هر کسین اؤز الینده‌سه،
بیزیم چکدیییمیز اضطراب ندیر؟

دئییرلر، داغ چاپار انسان ایسته‌سه
دۆنیانین ازلی قانونو بودور
بیز کی، ایسته‌ییریک، آما نه ایسه
دونیادا یئنه‌ده بیز دئین اوْلمور

او باخیر اۆزۆمه گؤزونده حسرت،
تۇتۇلۇب بولودلو بیر سحر کیمی
یاشاییر دونیادا بیر ایلک محبت،
آتالی - آنالی یئتیم‌لر کیمی...

#نریمان_حسن‌زاده

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

#عزت_طهماسبی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سندن نه گیزله‌دیم، قیسقانجام یامان.
سن منی سئوسن ده دونيالار قدر،
يانيمدا گؤرمه‌سم سنی بيرجه آن،
گؤزومون يوخوسو چکیلیب گئدر.

دئميرم بؤيوكدور بو طبيعتيم،
بلكه ده، بلكه ده بو بير آزاردير.
قلبینه دَيمه‌سین سؤزوم-صؤحبتيم،
سنده محبّت ده، ناموس دا واردیر.

سنین وفانا دا اینانیرام من،
آنجاق نه اولسون کی بؤیوکدور شهر،
اؤزون ده حدّيندن آرتيق گؤزلسن،
ديديب پارچالاییر منی شوبهه‌لر.

#صمد_وورغون

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سوکوتا بورونوب یوللارلا آنلار
گؤیلرده ساللاییب قاشین قاباغین
گئتمک ایسته ییرسن آددیمین گلمیر
گؤزومه باغلی دیر سنین آیاغین

اوخلانیب گؤزومه گؤزلرین سنین
باخیشین جالاییر کؤنلومه سازاق
آیریلیق ناغیلین اوخویورام من
هر کیپریک چالاندا دؤنور بیر واراق

جومورام کؤنلونه آی دنیز گؤزلوم
کؤنلون دالغالانیب چاغلاییر منی
آدیمی سیلیرسن بو گون بختیندن
گؤزلر داملا-داملا آغلاییر منی

بو گون سن گئدیرسن کدرلی‌یم من
دونوبدور آغزیمدا فریادیم سؤزوم
یوخ،یوخ! آغلاماییر دالینجا سنین
اوغور اولسون دئیه سو سپیر گؤزوم

نه واختسیز کؤچورسن سونقور باخیشلیم
هاچان یازدا کؤچور گؤللرین قازی
آی ایپک قانادلیم سن کی بیر داها
قاییتمایاجاقسان نئلیرم یازی

داشلاردا آغلاییر ویداع مارشینا
یوللاردا دوشونوب سون نییتینی
آیاقلا آرزیمی خوش گونه قوووش
ایسته رم دونیادا سعادتینی

دئمیشدیم آنانا:"سئودیییم گؤزل
سیزین قیزینیزدیر،منیم اولاجاق"
بیلمزدیم ساچین تک باخدیم قارادی
آرزی چیچکلریم بیر گون سولاجاق

منیمسه بختیمدن بئله گلیبدیر
هئچ آلوو بئله جه منی یاخمادی
اوچدو آرزیلاردان تیکدیییم بینا
ییخیلمیش تاواندان توز دا قالخمادی

گئتدین بخت ائوینه یولون اوغورلو
ظن ائتمه اؤز الیم،اؤز باشیم اولدو
گئتدین می حیاتین اوغوللو،قیزلی
منیمسه سیرداشیم گؤز یاشیم اولدو

گؤز یاشیم جواهیر،گؤز یاشیم اینجی
دایان،گئتمه دایان دردینی آلیم
آغارمیش ساچیمین ساپینا دوزوب
بو سون یادگاری بوینونا سالیم

آتالار دئییبلر:"حیاتین یولو،
یاری قیسمت اولسا یاری همت دیر"
اولدوقجا چالیشدیم چاتمادیم سنه
خوشبخت اول گؤزلیم،بودا قیسمت‌دیر

الویداع دئییرم تیترک دوداقلا
لاکین آرزیم،عشقیم دومانا دؤنور
سؤزلریم آسانجا قوپور دیلیمدن
آنجاق گؤروشوموز گومانا دؤنور

کؤکسومده قیزیلدان بیر سارای سالدیم
یاشارسان عؤمورلوک دیله ییمده سن
گؤزومدن گئتسنده اوزاق دئییلسن
رویالاریمداسان،اوره ییمده سن

#حسن_اومود_اوغلو

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

پاییزلا قیش آراسیندا بیر فصیل وار
آدینی " آغلاماق فصیلی" قویورام.
او فصیلده:
کؤنول کئچمیش‌لردن داها چوخ
ماوی‌یه یاخین‌دیر...

#نزار_قبانی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

اذن وئر کؤنلۆنون بیربوجاغیْندا
سیْغینیم دینجه‌لیم بیرقوْناق کیمی
یا دا آل کؤنلۆنون باش کؤشه‌سینه
اَیله‌نیم ارکؤیۆن بیر اوُشاق کیمی

اذن وئر یاش اوْلوُم دوْلوم گؤزۆنه
سۆزولوم گؤزۆندن دۆشوم اۆزونه
سۆرونوم اۆزومو قوْیوُم ایزینه
یولوندا یورولموش بیر آیاق کیمی

اذن وئر اوْووُجوندا سالیم یوُوامی
گیزلی درمان ائدیم گیزلی یارامی
سؤیکه‌نیم سئوگینه تاپیم چارامی
سازاقدان اَییلن بیر بوداق کیمی

اذن وئر یازیلیم آلین یازیندا
دالیم خیالینا قالیم یادیندا
قیزاریم نارکیمین عشقین اوْدوُندا
حسرتدن تیتره‌ین بیر دوْداق کیمی
  
کؤنۆلم بۆرونم پاییز دونونا
وورا خزان یئلی گلم اوْیوُنا
یوْروُلام اوْیوُندان دۆشم یوْلوُنا
بوداقدان قیریلان بیریارپاق کیمی

#کؤنول_عبدی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بو دونیادان دویماق اولمور، ایلاهی،
آمان آللاه، دونیا نئجه شیریندی
فصیل گؤزل، هفته گؤزل، آی گؤزل،
آمان آللاه، دونیا نئجه شیریندی.

کیم بختیندن، طالعیندن یاریدی،
کیمین بختی آخیراجان ساریدی.
دونیا چیچک، اینسان اوغلو آریدی،
آمان آللاه، دونیا نئجه شیریندی.

گؤیلره باخ، گؤیو گونلو یاغیشلی،
یئرلره باخ، یئری گوللو، ناخیشلی.
گؤزللری تولک طرلان باخیشلی،
آمان آللاه، دونیا نئجه شیریندی.

باخماق اوچون بره سی وار، بندی وار،
گزمک اوچون شهری وار، کندی وار.
شکری وار، پته یی وار، قندی وار،
آمان آللاه، دونیا نئجه شیریندی.

سسلی گلن سس سیز اؤلمک ایسته میر،
هئچ بیر جانلی اؤلوب ایتمک ایسته میر.
هاممی گلیر، گلن گئتمک ایسته میر،
آمان آللاه، دونیا نئجه شیریندی.

#زلیمخان_یعقوب

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

دولدور اوره‌یینی سئوینج‌له دولدور،
بو حیات ائنیشلی-یوخوشلو یولدور
حیات دا،  سئوینج ده-کَدَر ده بولدور
هانسینی گؤتورسن، اؤز قیسمتین‌دیر

سئوینج آختاریرسان، آل ، یاساق دئییل
درد چکن اورک‌دن ، درد قاچاق دئییل
دونیا ایکی رنگ دیر، تکجه آغ دئییل
بیرینی گؤتورسن جهالتین‌دیر!

"بختیار"بیلدین‌می سن کیمسن- نه‌سن؟!
دئ هانسی روزگاردیر باشیندان اَسَن؟!
دونیانین یاسینا  قَح_قَح  چَکمه‌‌سن
دونیانین  تویو  دا  موصیبتین دیر!

#بختیار_واهاب‌زاده

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

درده سالدین، یوخ سؤزوم، ائی شوخ، درمانین هانی؟!
وئردیگین آلدین الیمدن، باشقا احسانین هانی؟

وعده وئردین: یاز گلر بیر گون تالانمیش باغلارا،
بولبولو یاسدان چیخاردان شانلی مهمانین هانی؟

قار-بوران، سروین یاشیل قانین توتوبدور شیشه‌یه،
دیوی تختیندن سالان جانا، سلیمانین هانی؟!

من ده «صابر»‌تک، مسلمان هاردا گؤرسم قورخورام،
فکری قان-قان اولمایان -یارب!- مسلمانین هانی؟!

من او مجنونم، خیالیمدان بیابانلیق کئچیر،
گؤز گؤزو گؤرمور قارانلیقدان، بیابانین هانی؟

جان وئرن چوخ، قان آلان توخ، بیر سوران یوخ: عاصما!-
بو داماردا سئیر ائدن، جانان وئرن، قانین هانی؟...

#عاصم_اردبیلی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯