سنده، سندن اؤزگه بیر سن واریمیش،
گؤره بیلمه‌میشم سنده‌کی سنی.
من ائله بیلیردیم سنی سئویرم،
دئمه سئویرمیشم منده کی سنی!

بیر اؤزونده دوشون خئییرمی شرمی؟
بو یولدا قسمتیم زیبیل‌می، زَرمی؟
قادین دا بو قدر ایکی‌لَشَرمی؟!
کیم، کیمده تاپاجاق کیمده کی سنی؟!

ایندی سن ده اؤزگه، من ده اؤزگه‌یم
نه سنه ایلک اومود، نه سون گیلئیَم.
بلکه ایتمک اوچون ایتیره‌جه‌یم
هر گون آختاردیغیم گونده کی سنی!

بیر «ایوب» یازمیشدیم سینَنده قالدی
بیر لاله اکمیشدیم چمنده قالدی
بیر سن تانیییردیم دوننده قالدی
آللاه گؤرستمه‌سین بو گونکی سنی!!

#ایوب_کلبجرلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

قارلی داغلاریما ائله یاغدین کی
گلیب گئدن‌لرین ایزی قالمادی
بو سوسقون کؤهولده ائله سئودیم کی
سومویوم چورودو بئزی قالمادی

او قَدَر سن ایله عصیرلر اؤنجه
بو کؤهول آغزیندا دوداقلاشمیشام
او قدر قوخونا بورونموشم کی
اؤزوم اؤز هاوامدان اوزاقلاشمیشام

قورخورام آغزیمی آچاندا بیر آن
دوداغیمدان دوشوب گله‌سن دیله
قورخورام داغلارا سس دوشه، بو قیز!
قایادان قایایا سورونور هله


دئییرلر: «من سنی چوخ پیس سئویرم»
زامان بو سئومه‌یین زامانی دئییل!
بوراخ بو پئشه‌کار سئومه‌یی بوراخ
اَییل! اونوتقانلیق اؤنونده اَییل!
سن منیم شاهانه سربست‌لیییم سن
ساچیمی یولوندا وئرمیشم یئله
من سنه یازدیغیم ان بایاغی شعر
باخسانا؛ بنؤوشه قوخویور هله...

#ائلناز_اسلاموند

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

جانیمی آلسا اجل، دیل-دوداغیم دینجه‌له‌جک
شرَریم سؤنسه، کول اولموش اوجاغیم دینجه‌له‌جک

بو قاناد چالمالاریمدان کی اؤلوملوک تؤکولور
حیاتین باتسا سسی، گؤز-قولاغیم دینجه‌له‌جک

اوز باغیندا، گولوشون بولبولو چوخداندی سوسوب
نه بیلیم هاردا منیم قاش-قاباغیم دینجه‌له‌جک

یار گئدندن، یاسا باتمیش قاپیمی یوخدور آچان
قالاجاق باغلی، قارانلیق اوتاغیم دینجه‌له‌جک

بیر عؤمور یوکله‌میشم چیینیمه نیسگیل شله‌سین
قارا تورپاقلارین آلتدا، جیناغیم دینجه‌له‌جک

قاراداشیم آغلایاجاق، اوستومه تورپاق تؤکه‌جک
دوشه‌جک قبریمین اوسته، قوجاغیم دینجه‌له‌جک

دوشموشم بیر یولا سرمنزل مقصوده چاتام
یارا چاتسام، یارالانمیش آیاغیم دینجه‌له‌جک

بیلمیرم بیر-بیریمیزدن بیزی کیم آیری سالیب
بالتا خصلت‌لر الیندن، بوداغیم دینجه‌له‌جک

یاری جان قوش کیمی، شهپر چالیرام؛ جان وئریرم
اوزومو تورپاغا قویسام، یاناغیم دینجه‌له‌جک

گؤزلریمدن تؤکولن گؤز یاشی، جان جوهری دیر
قوی تؤکولسون، سارالان باغچا-باغیم  دینجه‌له‌جک!

قارداشیم دیل یاراسی وورسا دا، قارداشدی گئنه
دایاغیم وارسا دا، اؤلدورسه داغیم دینجه‌له‌جک

بو سؤزو قبریمین اوستونده یازین عبرت اوچون:
«کئفیم اولسون کی بو دهشتلی چاغیم دینجه‌له‌جک»

گؤره‌سن باغلایاجاق کیم نیگران گؤزلریمی؟
گئجه‌لر، ناله سسیندن بوجاغیم دینجه‌له‌جک

چوخ بلا چکمیشم، آهسته قویون قبره منی!
بیر عؤمور اوردا پیلَنمیش چیراغیم دینجه‌له‌جک...

#موسی_آقائی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سن یوخسان!
بو یاغیش بوش یئره یاغیر،
بیرلیکده ایسلانمایاجاییق کی...
بوشونا بو چای اؤزونو چیرپیر،
ساحیلینده اوتوروب گؤرمه‌یه‌جه‌ییک کی...
اوزون اوزون بوشونا یورولور یوللار،
بیرلیکده آددیم آتمایاجاییق کی...


حسرت‌لرده کی آیریلیق دا بوشونادیر،
ائله اوزاغیق،
بیرلیکده آغلامایاجاییق کی...
سنی ده بوشونا سئویرم،
بوشونا یاشاییرام،
حایاتی بؤلوشمه‌یه‌جه‌ییک کی...

#عزیز_نسین

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیر گون سَنی دوشونمه‌دن
یاتا بیلسم اونوداردیم
بوش باشیمی باشقاسییلا
قاتا بیلسم اونوداردیم

داریخماقدان بئزن کَسَم
مَن اؤزومه آنجاق بَسَم
یوللاریندا بودره‌مه‌سم
چاتا بیلسم اونوداردیم

نه داوامدی ،داوام کیمی
نه تامامدی، تامام کیمی
هئچ نه یوخ ها، آدام کیمی
آتا بیلسم، اونوداردیم...

سؤز: #صددام_لاچین
سس: #سامیر_جبراییلی - #ساحیل_ریضایئو

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

گئجز دینج 🧡🖤

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سنین‌له، قلبیمین سئوینجی گئتدی
عؤمرومدن، چوخ باها بیر اینجی گئتدی
آجیلی-شیرینلی بیر ناغیل بیتدی
آرا-بیر یادینا دوشه‌جه‌یم من.

باهار قیش اولاجاق اؤنونده سنین
قلبین داش اولاجاق سینه‌نده سنین
یقین یاخشی-یامان گونونده سنین-
آرا-بیر یادینا دوشه‌جه‌یم من.

گلدییین یوللارا هئی باخاجاقسان
اینتیظار کؤنلونو هئی سیخاجاقسان
هردن منیم اوچون داریخاجاقسان
آرا-بیر یادینا دوشه‌جه‌یم من.

سن، داها دون وورموش ظریف چیچک‌سن
بو بویدا دونیادا تنهاسان، تکسن
منی یوخولاردا چوخ گؤره‌جکسن
آرا-بیر یادینا دوشه‌جه‌یم من.

عؤموردن سایماییب هر اؤتن گونو،
گؤزلردن گیزله‌دیب آغلار گؤزونو،
کؤکسونه سیخاندا اؤزون-اؤزونو،
آرا-بیر یادینا دوشه‌جه‌یم من.

هله یان! بیر گونده سؤنه‌جه‌یین وار.
گؤیلردن یئرلره ائنه‌جه‌یین وار.
هله بو لیمانا دؤنه‌جه‌یین وار.
آرا-بیر یادینا دوشه‌جه‌یم من.

آیریلیق بیر بدن، ایکی جان ایدی
هله آغری وئرمیر، یارا ایستیدی
ائله کی اوره‌یین منی ایسته‌دی-
آرا-بیر یادینا دوشه‌جه‌یم من.

هارا آپاراجاق سنی بو یوللار؟!
بختینی آختاران، یوللاردا قالار
نه یاخشی دونیادا خاطیره‌لر وار
آرا-بیر یادینا دوشه‌جه‌یم من...

#بابا_وزیر‌اوغلو

╭━━━ ◉ ✦ ◉ ━━━╮
│      @poemistic   🌱  │ 
╰━━━ ◉ ✦ ◉ ━━━╯

گولوشوم دردیمی ایتیره بیلمیر
اؤزومو من هاردان اختاریم تاپیم
بارماقدا دئییل کی منیم بو دردیم
بیر بالتا گؤتوروب هامیسین چاپیم

اؤلنده نعشیمی آتین چؤل‌لره
منیم دردلریمی مزار گؤتورمز
اوره‌یین آتشین اوره‌یین اودون
بیر قاریش بویوندا مزار ایتیرمز

نه‌قدر اغلایام نه‌قدر یانام
داغ بویدا دردیمین توزو آزالماز
بو دونیا یاشاماق عونوانی دئییل
بو قدر دردایله یاشاماق اولماز

نه منده دؤزوم وار نه اوره‌ییمده
جیسمیم‌دن روحومو آییرین گئدیم
گؤیلرده الیندن توتوب روحومون
شولوخلوق شیلتاقلیق اوشاقلیق ائدیم

#سجاد_مددی

╭━━━ ◉ ✦ ◉ ━━━╮
│      @poemistic   🌱  │ 
╰━━━ ◉ ✦ ◉ ━━━╯

چوخ یاتدیق، چوخ مورگولَدیک،
قوجا میللت!
مورگولَدیک: قوشا- قوشا
داغ‌لاریمیز اوغورلاندی.
چای‌لاریمیز، گؤل‌لریمیز
اوغورلاندی.
اوغورلاتدیق!
ایندی سایساق سایا سیغماز،
داها نه‌لر اوغورلانیب.
یئر اوستونده خزینه‌لر،
یئر آلتیندا دفینه‌لر
اوغورلانیب.
قوجا میللت، هر آندیمیز
آمانیمیز،
اگر وارسا،
ذرّه قَدَر ایمانیمیز،
ایمانیمیز «وطن» دئسین.
هر یاخشیمیز یامانیمیز
«وطن» دئسین.

#ممد_آراز

╭━━━ ◉ ✦ ◉ ━━━╮
│      @poemistic   🌱  │ 
╰━━━ ◉ ✦ ◉ ━━━╯

تانری،
بعضی‌لری گؤزلریندن یاراتمیش.
اؤنجه، منیم گؤزلریمی یارادیب مثلا،
سونرا گؤز تیکیب گؤزببک‌لریمه،
«حوزون‌لره دالمیش بو ایکی یووارلاق گیله‌نین باشیندان ال چکمه‌سین دئیه،
یاغیشا بنزر بیر شئی یاراتمالی‌یام»
دئمیش اؤز-اؤزونه.

سونرا،
گؤزلریم اوچون،
بیر صیفت چکمیش،
ال،
آیاق،
اورک.
و بو، بیر قادین اولمالی! دئمیش.
گاه بیر داغین چیینینه،
گاه دا یالنیزلیغین درینلیگینه،
عؤمورلوک آغلامالی اولان
بولود قادین...

#رؤیا_شاه‌حسین‌زاده

╭━━━ ◉ ✦ ◉ ━━━╮
│      @poemistic   🌱  │ 
╰━━━ ◉ ✦ ◉ ━━━╯

قارشیمدا نازلانیب یئنه گولورسن،
بیلسن گولوشلرین نه‌یه بنزه‌ییر؟
من دئسم آرتیقدیر، اؤزون بیلیرسن،
لاله یارپاغیندا شئهه بنزه‌ییر.

سنین گولوشلرین بیر روزگار کیمی،
اسرکن آرزومون گولو آچیلیر.
گولسه دوداقلارین اولدوزلار کیمی،
روحوما بیر سرین ایشیق ساچیلیر.

سؤیله، گؤزل‌لرین دوداقلاریندان،
بو اویناق گولوشلر اومولموش‌مودور؟
سنین هر قهقهه‌ن آی کناریندان،
کئچن بولودمودور، اوچان قوش‌مودور؟

سنین گولوشلرین یاز سحریندن،
حیسّیمه، فیکریمه سانکی رنگ آلیر.
گول کی! شعیرلریم گولوشلریندن،
قیریلماق بیلمه‌ین بیر آهنگ آلیر.

سن گولدویون زامان بو شاد گونومده،
آچیلیر قارشیمدا، جانلانیر باهار.
بعضاً باش اوجومدا، بعضاً اؤنومده،
شیمشک‌لریم چاخار، سولاریم آخار.

جاهان کی سولمایان بیر باغچا-باغ‌دیر،
بوردا روامی‌دیر گولمه‌دن اؤلمک؟
یازیق او شخصه کی، قاراقاباق‌دیر،
نه قدر یاراشیر اینسانا گولمک!...

#میکائیل_موشفیق

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

دؤشه‌یین یارپاغی اولدوز یاراما،
قارا قانچیل گئجه‌نی کؤز ياراما!

بیر ایچیم قوش یوخوسوندان گؤتورون،
قویلایین کؤلگه‌لی گوندوز یاراما!

یارامی باغلاما، قالسین آوازا،
نه باجارساز قالایین دوز یاراما!

جسدیم، قوی سازاق اولسون آیازا!
بلکه قوزقون قونا گؤز-گؤز یاراما.

اوره‌ییمده، قارا بیر داغ چکیلیب،
ایکی بئش مین، ایکی بئش یوز یاراما.

گؤزلریمده کسین اوغلان باشینی،
آخیدین آل قانینی قیز یاراما!

گتیرین اوستومه قارغیش بولودو،
باسدیرین فریادی سس‌سیز یاراما!

آغلایین آه!... بو یئتیم تورپاغیمی،
باغلایین باغریمی تبریز یاراما!

نه گؤزل‌دیر بو ساغالماز دردیم!
نه کدر واردی، تؤکرسیز یاراما!

داوا یوخ، هرنه یارا وار، گتیرین،
سارییین قاپ‌قارا، بوم‌بوز یاراما!

#كاميل_قهرمان‌اوغلو

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بیر شیشه شراب‌دیر بیر آج ایستیکان
بیر آللاه، بیر غریب وطن بوردا وار
بیر درین گوناه وار بیر آجی آه وار
نه من بوردا وارام، نه سن بوردا وار

بیر یانیق موسیقی، بیر پارا واراق
شئعیرلر یازیلیر، یولوندا سنین
کؤزریر اوره‌ییم، آلیشیر جانیم
اوره‌یین اوزمزمیش سئوگی سئوه‌نین

من ساغلیق دئییرم؛ من ده ایچیرم!
مزه یوخ دویونجا کدر یئییرم
من دلی اولموشام، نه بیلیم بلکه
آغزیما گله‌نی سنه دئییرم

گؤینه‌ییر قلبیمین دامارلاری دا
یوخ بیری دئسین کی بسین‌دی بسین
بو گئجه دالغینام، بو گئجه خسته
بو گئجه دوشوب‌دور بئینیمه سسین

سس دئمه آللاهین نازلانان چاغی
اوخویان زامانی گولن زامانی
بو سسله بیر قوران اوخویاسان کاش
بیر دلی  شاعیرین اؤلن زامانی

#ميلاد_فطين‌حور
#دالغین

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

قار یاغیر، بیزیم ده چتیریمز یوخ،
گؤزلیم، دور گئدک گونشه ساری!
بیزیم سئوگیمیزه نه قار، نه یاغیش؟
 گئدک، بو کؤلگه‌لر قیزیشسین باری!

گؤزلیم، دور گئدک گونشه ساری!
گئدک اوفوق‌لره آیاق-آیاغا!
اوزانسین کؤلگه‌میز آغاجلار کیمی،
ایکی چینار اولسون بوداق-بوداغا!

قار یاغیر، سنین ده قیش پالتارین یوخ،
بیلمیرسن باشینا نه‌لر گله‌جک.
دور گئدک گؤزلیم، عیناد ائله‌مه!
گلمه‌سن، آخ ...سنه سویوق دیه‌جک!

دور گئدک سن آللاه، دور گئدک بوردان!
منی بو کولَکده یالقیز بوراخما!
من سنسیز بو قیشدان یازا چیخمارام،
باخ...من یانیندایام، دور گئدک، قورخما!

بیلیرسن سوکوتو سئومه‌رم، دانیش!
دانیش کی سسینه حسرت قالمیشام.
دانیش کی اوره‌ییم بیر سرینله‌سین!
او یاز نفسینه حسرت قالمیشام.

نه‌دن بو قاپینی آچمیرسان، گولوم!؟
قاپینین دالیندا نه وار کی آخی !؟
آچماسان، بو داشی سیندیراجاغام،
بو داشین آلتیندا نه وار کی آخی !؟

دئمه کی اؤلموسن، من اینانمارام.
کوسموسن، یئریندن دورموسان فقط.
سن اؤله بیلمزسن، یالان دانیشما!
اؤزونو اؤلومه وورموسان فقط.

قار یاغیر، بیزیم ده چتیریمیز یوخ،
بیزی دوندوراجاق قار-کولک، گولوم!
من سنسیز بو قیشدان یازا چیخمارام،
دور گئدک، اؤلسن ده دور گئدک، گولوم...🖤

#صالح_سجادی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سن بیزی آلداتدین ایللردن بری
من چرخ فلکدن درس گؤتورموشم
اؤزگه آناسیندان سود امنلری
اؤزگه قوللوغوندا دوران گؤرموشم

بسدیر دؤزدویوموز اؤلومدن بتر
کؤهنه بازارداکی او کؤهنه نیرخا
میللتی یوز یئره جالادین، یئتر
یوز آرخین سویونو قاتما بیر آرخا

اصلیمی-نسلیمی تانیییرام من
قاریشیق دئییلم اؤزومدن هورکم
سن کیمسن، سن نه‌سن اؤزون بیلرسن
من ایلک قایناغیمدان تورک اوغلو تورکم

ثبوتدور، دلیل‌دیر آغلین قیبله‌سی
دَییشه بیلرسن آدیمی آنجاق
جانیم چیخانا دک قلبیمین سسی
تورکم گئرچه‌یینی پیچیلدایاجاق...


#بختيار_واهاب‌زاده

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سنی اونوتماق راحات‌دیر؛
نئچه سطیر شئعیر ایسته‌ییر،
و نئچه یوز ایل عؤمور...

#افشین_صالحی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

منی شکیل-شکیل اؤلدورن آدام!
نئجه شکیللرین دلی‌قانلیدی!
سنین گؤزلریندن قان اییی گلیر،
سنین گؤزلرینین الی قانلیدی.

گؤزومو چیرپیرام آی ایشیغینا،
نه هؤروم ییخدیغین ائوه... بیلمیرم.
سنه اؤله-اؤله وورولورام من،
سنی دیری-دیری سئوه بیلمیرم.

منی شکیل-شکیل اؤلدورن آدام!
منی تانری-تانری دیریلتمه، نولار!
قوی ایتیم گئجه‌نین ائله ایچینده،
صاباحین قاپیسین کیلیدله‌، نولار!...

#ائمیل_راسیم‌اوغلو

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

گؤزوم نه گؤردو اونون گؤزلری‌‌ایله اولدو تانیش
سالیبدی گؤر نئجه درده منی سئحیرلی باخیش

شیرین‌دی سئوگی نه‌دن‌دیر یانار اورک اودونا
سوروشما یانمالیسان گئت کولون چیخینجا آلیش

هر آندا سانکی مین ایل دؤزموشم بو آیریلیغا
دئیر کی آزدی منی ایسته‌سن بیر آزدا چالیش

منی گؤرنده اوزون دؤندریر اویان بو یانا
دئین اونا نه اولار گل من ایله بیرده دانیش

یئریمده صوبحه قدر یاتمارام شعیر یاشارام
توتار دیله گئجه‌لر آغلاشار من ایله بالیش

او قدری آغلامیشام ‌گوزلریم بولود کیمی‌دیر
او قدری آغلامیشام کی آدیم اولوبدو یاغیش

بو سئوگی فرقیلی بیر سئوگی دیر منیم تانریم
بو سئوگینین سن الیندن محبت ائیله یاپیش...

#علی_حاج‌محمدی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

كيرپیگیمدن یئره داملا دوشنده
دیوارا سؤيكنميش قاشيم داريخير
يئددى جيزگی اوسته بیر خط چکنده
الیمده گؤينه‌ین داشیم داریخیر

یئمک اعتصابیم بیتمه‌ییب اینان
دئسه‌لر یئییرم، یالان‌دیر یالان
هؤرومجك پاییما تور آتان زامان
پاسلی یال‌قابیمدا آشیم داریخیر

تلفن‌چو داریخیر، اؤزوندن گؤز اول
كول‌لرین آلتیندا گیزلی بیر کؤز اول
حاكيمه ده دئنن: حكمو وئر تئز اول
هر بير شئی‌دن بتر باشیم داریخیر

#سئور_شهابى

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بیر کؤینه‌یین یاخاسی‌دیر بو وطن،
بیرلشسه کیم‌لرین بوینونو سیخار؟!
ائله ترلَمیشیک آراز بویونجا،
یاخادا اورمونون دوزون کیم ییغار؟

کؤینه‌ییم بوزوشوب،
آنام هارداسان؟

#رضا_طالبی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

دوشونوردوم: ایللر گئری دؤنه‌جک،
گنجلیک اولدوز کیمی گؤیدن ائنه‌جک،
نه آلوو سؤنه‌جک، نه اود سؤنه‌جک،
من ائله بیلیردیم قوجالمایاجام.

کؤنلومده بیر دلی عشقین هوَسی،
دیلیمده محبّت، سئوگی نغمه‌سی،
دئمه یول گئدیرمیش واختین دوه‌سی،
من ائله بیلیردیم قوجالمایاجام.

دوستلار اینجیییرلر، گؤروشمه‌ییرم،
یاخشینی، یامانی بؤلوشمه‌ییرم،
کؤنوللر اینجیدیب قلبه دَییرم،
من ائله بیلیردیم قوجالمایاجام.

غفیل هشَم اولدو سونبوللو زمین،
باشیمدان چکیلمیر کدریم، غمیم،
اوشاقلیق دوستلاریم، گنجلیک همدمیم
من ائله بیلیردیم قوجالمایاجام.

کؤچ ائتدی قارداشیم، کؤچ ائتدی باجیم،
بیر الدن توتانا قالیب علاجیم.
نه‌لر پیچیلدامیر آغاران ساچیم!
من ائله بیلیردیم قوجالمایاجام.

عؤمور بیر گیزلیجه پروریش ائتدی،
«طالع!» جاوانلیغی قاچیردین، گئتدی،
دؤوره‌نه ایشیقلار ساچیردین، گئتدی،
سن ائله بیلیردین قوجالمایاجان.

#طالع_حمید

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯