╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

دوغولاندا آللاه بیزه دئییر کی،
سونراکی حالینا ایندیدن آغلا!
بو شیرین حیاتین سونو زهَردیر
غوغانا، قالینا ایندیدن آغلا!

سن اوشودون دومانا نه، چنه نه؟
سن اود توتدون اود اله‌ین گونه نه؟
قیفیللی دیلینه، داغلی سینه‌نه،
قانداللی قولونا ایندیدن آغلا!

باخما تانیشین دا، دوستون دا چوخدور!
کیمین نه وئجینه کیم سنی ییخدی؟
بودره‌سن، باخارسان بیرجه‌سی یوخدور،
ساغینا، سولونا ایندیدن آغلا!

عونوانین ایته‌جک، ایزین ایته‌جک،
اوجاغین ایته‌جک، اودون ایته‌جک،
یاخینین ایته‌جک، یادین ایته‌جک،
اوبانا، ائلینه ایندیدن آغلا!

دونیا دا گؤزل‌دیر، دئمیرم ال چک،
آنجاق عمل‌لرین قالاجاق بیر تک.
اودلاردان کئچه‌جک، داشدان کئچه‌جک-
یولونا، ایزینه ایندیدن آغلا!

#شوجاعت_کلبجرلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

طالئعین قیسمتی راست سالدی بیزی
یولوموز هارداسا قیریلاجاق‌سا
ایتیره‌جه‌ییک‌سه بیر-بیریمیزی
خاطیره‌م یادیندا قالمایاجاق‌سا
بو اَللر مَنیمکی اولمایاجاق‌سا
بو تئللر مَنیمکی اولمایاجاق‌سا
سَن آللاه، اؤزونه اؤیرتمه مَنی
هیجران قوخوسویلا گؤينتمه مَنی...
اَلیمی ساچینا اؤیرتمه بئله،
گؤزومو گؤزونه اؤیرتمه بئله؛
اوزومو اوزونه اؤیرتمه بئله...


مَن بیر آز باهارلی بوداق کیمییم
بیر آز دا ساده‌لؤوح اوشاق کیمییم
بالا آناسینا قوووشان کیمی
لئیلک یوواسینا یوووشان کیمی
آری گول-چیچه‌یه اویوشان کیمی
ائح، مَن ده آداما تئز یوووشانام
سئوگی آتشینده تئز آلیشانام
آمما کی، سؤنمه‌ییم چوخ چَتین اولور
سئوگیدن دؤنمه‌ییم چوخ چَتین اولور
اؤیرتمه اؤزونه، اؤیرتمه مَنی.

بَلکه گؤزله‌میردیک بو خوش گؤروشو
یامان غَریبه‌دیر دونیانین ایشی؛
هئچ واخت یوللاریندا دایانمادیغین،
هئچ هَندَوَرینده دولانمادیغین،
گَلیب بیردن سنه نه شیرین اولور!
عؤمرونون ایچینده عؤمور دوغولور.
بو شیرینیم آجی اولاجاق ایسه،
بیر قیسمت چیچه‌ییم سولاجاق ایسه،
اؤیرتمه اؤزونه، اؤیرتمه مَنی...

#موسی_یعقوب

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یئنه ده ايبهام لار باشلانیب منه
بوتون حایاتیمی بورویوب دومان
ایچیمده بیر ایستک دیل آچیب یئنه
سؤیله ییر: «یئنی دن سئوگییه اینان!»

«بیر یانیم جهنّم، بیر یانیم جنّت»
نیفرت له سئوگینین آراسیندایام
بونلارین بیرینه اینانسام، البت_
پوزغون حایاتیمدان گئده جک ايبهام

نفرته اینانسام، اینانا بیلسم_
اؤزوم تک دویغومدا بوغولاجاق دیر
سئوگيیه اینانسام – اینانا بیلسم_
قلمیمدن غزل دوغولاجاق دیر

ایندی بیلدیم هارا یوللاناجاغام
سئوگی مرکبینه تازا مین-میشم
نیفرتین نه یینه آللاناجاغام؟!
ازلدن سئوگییه دویون­له نمیشم!

خییالین یویوروب هنده ­وریمه
گؤزلرین سئوگییه چاغیریر منی
گؤزه ­لیم ! آند اولسون غزل­لریمه،
سئویرم سئویرم، سئویرم سنی

#اکبر_شفیعی_یاشار

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

دون گئجه یوخودا گؤرموشم سنی
سانیرام یوخومو، ائوین بیلمیشدین
سونونجو شئعریمی دینله­مک اوچون
دون گئجه یوخوما قوناق گلمیشدین

سن هارا؟ کابوسلو یوخولار هارا؟
دون گئجه دئیه سن یول ایتیرمیشدین
ظولمتی سؤندوره'ن چیراقلار کیمی
قارانلیق گئجه'مه نور گتیرمیشدین

سؤز آچدیم سئوگیدن سؤز آچدیم سنه
سئوگی زنجیرینده اسیرم دئدیم
دیلیم سؤزلریمی توتا-توتمایا
سسیم اسه-اسه، سئویرم دئدیم

اویاندیم، فیکیرلر بورودو منی
یوخومو عؤمرومون حسرتی ساندیم
سنینله برابر اولان یوخودان
اؤزومده بیلمیرم، نییه اویاندیم؟!

محبّت دونیادان کؤچمه ییب ایر
بس نییه سئوگیمیز یوخونو سئچیر؟!
بلکه گرچک یوخو حایاتیمیزدی !
بلکه گرچک حایات یوخودا گئچیر

ایندی سون شئعریمی اوخویوب سنه
یوخومو آلارام حایاتیمیزا
او شیرین یوخودان، شئعرین گوجویله
بیر کؤرپو سالارام حایاتیمیزا

دون گئجه، یوخوما گلمیشدین، دئمک
یوخودا گؤررمیش سئون-سئونی
سئوگیلیم، سؤزومو قوربته سالما
دون گئجه یوخودا سئومیشم سنی !

#اکبر_شفیعی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

تانری سنی ملک لردن پای وئریب
آی منیم ایستکلی گؤزل ناز قیزیم
بئله یازی  تانری سنه  یازماییب
حایاتدا ایقبالین اولسون آز قیزیم

حاصارلار آردیندا  آغاتما بیرچک
حاصاری سیندیران سن اوزونسن تک
معناسیز یازییا سن بیر قلم چک
یئنی دن  اؤزونه یازی یاز قیزیم

چالیش قویما اومودلارین توتا دون
قارانلیق گونلرده بیر گون تاپار سون
باجارسان بیر قوش اول ذیروه لره قون
آچیلسین اوزونه  بلکه یاز قیزیم

#روشن_اورنگ

قیزلار گونو قوتلو اولسون اولدوزلار ❤️

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

هر گون آد گونودو دونیادا بلکه
هر گون بو دونیادا ایل تامام اولور.
گوندوزدو قارانلیق ایچیندن کئچیر
یالاندی دئییرلر کی آخشام اولور.

گئجه کی یوخودا آخشام گؤرورسن،
سحر گوندوز اولور‌ یوخون چین چیخیر.
یاتیرسان آییلیب خوش گون گؤره‌سن
آییلیب گؤرورسن یئنه گون چیخیب.

باخدیم، نه قاپیسی، نه باجاسی وار،
باخدیم چؤل- باییری گؤرمه‌ین ائوه.
بس آخشام هارادان گیریر قارانلیق،
گوندوز گون ایشیغی گیرمه‌ین ائوه...؟

#سالام_ساروان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سنی آرزولاردان آلا بیلمه-دیم
سن ال چاتماز دویغو، سن چتین شئعیر
سن دیلک گؤیونده یئنیلمز اولدوز
سنی طالعیمه سالا بیلمه-دیم

یورولدو ماهنی لار گل-گل دئمک‌دن
آغلادی شئعریمه اومودسوز قلم
دینله‌دیم یالنیزلیق دؤیونتوسوندن
اومودسوز اومودوم آلدانیر هله‌م

آزدیقجا او توزلو خاطیره لرده
داها گؤرونمه‌دی سئوگی‌نین اوزو
دالدیقجا ایللرده زامان دویغوسو
نئیله‌ییم اؤزله‌مین یاتمادی گؤزو

آزادلیق آلمادی دوداقلاریندان
دوستاق حیاتینی یاشایان اؤپوش
آغاردی ساچیمدا اینتظار گؤزو
گیزلندی وعده-نده یالانچی گؤروش

#میرجمال_حسینی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

هامیدان، هر شئی دن ناراحات ایدیم
یئنه دیری-گؤزلو آچدیم سحری،
سنده بیراز یوخدون... نه یالان دئییم
دوروب قوجاقلادیم خاطیره لری.

داریخدیم، اؤزومه بیر چای دمله دیم
چاییم فینجانیمدا سویودو آتدیم
الیمی گئجه نین گؤزونه سوخوب
مینلرله داریخان اولدوز چیخارتدیم

آغلادیم، ائیواندا سیقارئت چکدیم
قاییتدیم یاتاغیم سویویوب یئنه
سیخدیم دیشلریمی، گؤزومو یومدوم
سونرا ساکیت-لشدیم، حاق وئردیم سنه

سن هاردان بیله-سن، بو گئجه لرده
سویوق دووارلارا دانیشماق نه-دیر؟
سن هاردان بیله-سن هامیدان قاچیب
عذابلی تک لیگه قوووشماق نه-دیر؟!
(بلکه ده هامیسی بوش بهانه دیر)

هامیدان، هر شئی دن ناراحات ایدیم
یئنه دیری-گؤزلو آچدیم سحری
سنده بیراز یوخدون... نه یالان دئییم
دوروب قوجاقلادیم خاطیره لری

#جلیل_جوانشیر

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

گل، منیم عؤمرومون شیرین دونیاسی،
محببت آدلانان پیرین دونیاسی،
فرهاد افسانه‌سی، شیرین دونیاسی،
قالا می اوچوروم، قایا می چاپیم؟
من سنین قلبینه نئجه یول تاپیم؟!

عؤمروم سنه ساری دوشن گوذاردی،
اَوولی بئشیک‌دی، سونو مزاردی.
آی آللاه، بو آزار نه خوش آزاردی!
اورک آغریلاریم، کؤنول عذابیم!
من سنین قلبینه نئجه یول تاپیم؟!

اورکدن -اوره‌یه دیل کؤرپوسو وار،
گؤروشدن گؤروشه گول کؤرپوسو وار،
گیزلی سئودالارین قیل کؤرپوسو وار.
چاتارمی کئچمه‌یه دؤزوموم، تابیم،
من سنین قلبینه نئجه یول تاپیم؟!

کئشیکچی آییقدی، گؤزَتچی متین،
ایزله‌مک قورخولو، بویلانماق چتین،
حاصاری هوندوردو بو عیمارتین،
طیلسیم‌لی پنجره‌م، قیفیللی قاپیم،
من سنین قلبینه نئجه یول تاپیم؟!

گئجه‌لر شمع کیمی اریتدین منی،
گوندوزلر یول اوسته قوروتدون منی،
گؤزله‌ده-گؤزله‌ده چوروتدون منی.
اؤرتولو دفتریم، باغلی کیتابیم!
من سنین قلبینه نئجه یول تاپیم؟!

#زلیمخان_یعقوب

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سندن خبرسیزجه منیم گؤزلریم،
سنی سیزه قده-ر اؤتوردو، گلدی.
سنی قاباقلاییب آیاق ایزلریم،
سیزدن گؤزلرینی گؤتوردو، گلدی.

دوشدو آرالیغا تعطیل آیریلیق،
دینامیت اوجوندا فیتیل آیریلیق
سس سیز تاپانچایلا قاتیل آیریلیق،
اومیدین ایشینی بیتیردی، گلدی

من جوان، جان وئرن اومیدیم قوجا
بیر دوست دان بیر اومید ایسته دیم بورجا
توتدوم آیریلیغی دؤیدوم یاخشیجا،
گئتدی بؤیوگونو گتیردی، گلدی...

#قیسمت_روستموو

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سوووروب باغینی، تؤکوب بارینی
داها شوخدان سالیب یارپاق‌لارینی
سولدوروب او چیراق یاناق‌لارینی
قیش اولوب، اوستومه نیه گلمیسن؟

سن آدلی او خانیم خاتینی منه
وئرمه‌دین اؤز شادلیق تاختینی منه
قییمادین گول- چیچک واختینی منه
قیش اولوب، اوستومه نیه گلمیسن؟

منی حسرت قویان ایلک بَهَرینه‌
ایندی گلیب منی یادا سالیب‌می؟
گؤزونون آلووو اؤزگه‌لرینه
ساچینین قیرووو منه قالیب‌می؟
قیش اولوب، اوستومه نیه گلمیسن؟!

آغلایان حیرصیمی سویوتماغامی؟
اینجیک اوره‌ییمی اویوتماغامی؟
تکبّرلو خانیم، آ نازلی خانیم،
قیش اولوب، اوستومه نیه گلمیسن؟

یوخ، یوخ، یالواریشی ساخلا سن آللاه.
بو یازیق باخیشی ساخلا سن آللاه.
دی یاخشی، بو دیلی، بو فَندی ساخلا،
دیلینین آلتیندا او قندی ساخلا.
گوجون وار کئچه‌نی قایتار، سوراقلا،
قیش اولوب، اوستومه نیه گلمیسن؟

#موسی_یعقوب

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یئنه خاطیرلادیم بو گون من سنی
آرزیلار دیل آچدی کؤهنه گئدیشه
من سنی سئودیییم زاماندان بری
سئوگینین دیبینه ووروردوم تئشه!

یادیمدا سون دؤنه گؤروشوموزده
نه سن او قیز ایدین، نه من او اوغلان
بیلمیردیم باخیشلا اوشومک اولار
اوشودوم گؤزونون سویوقلوغوندان

سیغمادیم بو قدر بؤیوک دونیایا
دئمک کی دونیاما گیرمیش ایدین سن!
من سنی ایتیردیم پاییز اولونجا
ایلک دؤنه اوتاندیم، شاعیرلیییم‌دن...

یئنه خاطیرلادیم بوگون من سنی
گئچمه دی یارامدان سنین هئچ سیزین
بو شئعیر دولودور حسرتله گولوم
ائله بو شئعیره، بنزه ییر قیزین...

#آرش_احمدی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

🎧🧡

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سنه داریخان یوخ سنی گزن یوخ
کیمه داریخیرسان کیمه اوره‌ییم
داریخما توستوسون گؤزونه آز سوخ
کیمه داریخیرسان کیمه اوره‌ییم

داریخما اولوملو، غرورلو، گردی 
ندنسه اللرین داریخما دردی؟!
اجل دن پیس اولور داریخما دردی
کیمه داریخیرسان کیمه اوره‌ییم

داریخدین اوزونه طالع گولمه‌دی
داریخدیغین کس‌لر سنی بیلمه‌دی
داریخان کس‌لرین یازی گلمه‌دی
کیمه داریخیرسان کیمه اوره‌ییم

داریخما دونونو گئییرسن یئنه
سئوگی‌یه بوینونو اَییرسن یئنه
یامان داریخیرام دئییرسن یئنه
کیمه داریخیرسان، کیمه اوره‌ییم؟

گونو قارا گَلن دیلَک اولورسان
آریسی اودلانمیش پَتک اولورسان
نییه گوندن- گونه کؤورک اولورسان؟!
کیمه داریخیرسان کیمه اوره‌ییم؟...

#علی_طالبی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یوز دفعه جفا گلسه بیزه سئوگیلیمیزدن
بیر دفعه شکایت سؤزو چیخماز دیلیمیزدن

قصد ائتسه حسدله بیزی محو ائتمه‌یه ظالیم
کئچمز بیزیم اربابی قلم قاتیلیمیزدن

طوفانی بلا گلسه ده، قورخان دئییلیک بیز
داغلار بئله سد اولسا قاچار ساحیلیمیزدن

باخما بیزه مین نازایله، صیادیلاریق بیز
یوز گؤزلری آهو قاچا بیلمز الیمیزدن

خاکی در مئیخانه‌ده دفن ائت بیزی ساقی
مین کوزه چیخار توپراغیمیزدان، گیلیمیزدن

واحید، بیز او نخلیک کی، بو گولزار جهاندا
اؤولادی وطن ذؤوق آلاجاق حاصیلیمیزدن

#علی_آقا_واحید

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

جانان ایسه مطلوب، طمع جاندان کس!
مطلوب ایسه جان، اومیدی جاناندان کس!
جان سئومک ایله میسّر اولماز جانان،
یا بوندان اومید، یا طمع اوندان کس!

#فضولی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سنده، سندن اؤزگه بیر سن واریمیش،
گؤره بیلمه‌میشم سنده‌کی سنی.
من ائله بیلیردیم سنی سئویرم،
دئمه سئویرمیشم منده کی سنی!

بیر اؤزونده دوشون خئییرمی شرمی؟
بو یولدا قسمتیم زیبیل‌می، زَرمی؟
قادین دا بو قدر ایکی‌لَشَرمی؟!
کیم، کیمده تاپاجاق کیمده کی سنی؟!

ایندی سن ده اؤزگه، من ده اؤزگه‌یم
نه سنه ایلک اومود، نه سون گیلئیَم.
بلکه ایتمک اوچون ایتیره‌جه‌یم
هر گون آختاردیغیم گونده کی سنی!

بیر «ایوب» یازمیشدیم سینَنده قالدی
بیر لاله اکمیشدیم چمنده قالدی
بیر سن تانیییردیم دوننده قالدی
آللاه گؤرستمه‌سین بو گونکی سنی!!

#ایوب_کلبجرلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

قارلی داغلاریما ائله یاغدین کی
گلیب گئدن‌لرین ایزی قالمادی
بو سوسقون کؤهولده ائله سئودیم کی
سومویوم چورودو بئزی قالمادی

او قَدَر سن ایله عصیرلر اؤنجه
بو کؤهول آغزیندا دوداقلاشمیشام
او قدر قوخونا بورونموشم کی
اؤزوم اؤز هاوامدان اوزاقلاشمیشام

قورخورام آغزیمی آچاندا بیر آن
دوداغیمدان دوشوب گله‌سن دیله
قورخورام داغلارا سس دوشه، بو قیز!
قایادان قایایا سورونور هله


دئییرلر: «من سنی چوخ پیس سئویرم»
زامان بو سئومه‌یین زامانی دئییل!
بوراخ بو پئشه‌کار سئومه‌یی بوراخ
اَییل! اونوتقانلیق اؤنونده اَییل!
سن منیم شاهانه سربست‌لیییم سن
ساچیمی یولوندا وئرمیشم یئله
من سنه یازدیغیم ان بایاغی شعر
باخسانا؛ بنؤوشه قوخویور هله...

#ائلناز_اسلاموند

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

جانیمی آلسا اجل، دیل-دوداغیم دینجه‌له‌جک
شرَریم سؤنسه، کول اولموش اوجاغیم دینجه‌له‌جک

بو قاناد چالمالاریمدان کی اؤلوملوک تؤکولور
حیاتین باتسا سسی، گؤز-قولاغیم دینجه‌له‌جک

اوز باغیندا، گولوشون بولبولو چوخداندی سوسوب
نه بیلیم هاردا منیم قاش-قاباغیم دینجه‌له‌جک

یار گئدندن، یاسا باتمیش قاپیمی یوخدور آچان
قالاجاق باغلی، قارانلیق اوتاغیم دینجه‌له‌جک

بیر عؤمور یوکله‌میشم چیینیمه نیسگیل شله‌سین
قارا تورپاقلارین آلتدا، جیناغیم دینجه‌له‌جک

قاراداشیم آغلایاجاق، اوستومه تورپاق تؤکه‌جک
دوشه‌جک قبریمین اوسته، قوجاغیم دینجه‌له‌جک

دوشموشم بیر یولا سرمنزل مقصوده چاتام
یارا چاتسام، یارالانمیش آیاغیم دینجه‌له‌جک

بیلمیرم بیر-بیریمیزدن بیزی کیم آیری سالیب
بالتا خصلت‌لر الیندن، بوداغیم دینجه‌له‌جک

یاری جان قوش کیمی، شهپر چالیرام؛ جان وئریرم
اوزومو تورپاغا قویسام، یاناغیم دینجه‌له‌جک

گؤزلریمدن تؤکولن گؤز یاشی، جان جوهری دیر
قوی تؤکولسون، سارالان باغچا-باغیم  دینجه‌له‌جک!

قارداشیم دیل یاراسی وورسا دا، قارداشدی گئنه
دایاغیم وارسا دا، اؤلدورسه داغیم دینجه‌له‌جک

بو سؤزو قبریمین اوستونده یازین عبرت اوچون:
«کئفیم اولسون کی بو دهشتلی چاغیم دینجه‌له‌جک»

گؤره‌سن باغلایاجاق کیم نیگران گؤزلریمی؟
گئجه‌لر، ناله سسیندن بوجاغیم دینجه‌له‌جک

چوخ بلا چکمیشم، آهسته قویون قبره منی!
بیر عؤمور اوردا پیلَنمیش چیراغیم دینجه‌له‌جک...

#موسی_آقائی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سن یوخسان!
بو یاغیش بوش یئره یاغیر،
بیرلیکده ایسلانمایاجاییق کی...
بوشونا بو چای اؤزونو چیرپیر،
ساحیلینده اوتوروب گؤرمه‌یه‌جه‌ییک کی...
اوزون اوزون بوشونا یورولور یوللار،
بیرلیکده آددیم آتمایاجاییق کی...


حسرت‌لرده کی آیریلیق دا بوشونادیر،
ائله اوزاغیق،
بیرلیکده آغلامایاجاییق کی...
سنی ده بوشونا سئویرم،
بوشونا یاشاییرام،
حایاتی بؤلوشمه‌یه‌جه‌ییک کی...

#عزیز_نسین

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯