تنها کؤنلوم، تنهالاری سال یادا!
تک قوواق‌لار چیخیب یولا، تنهادی.
ائه، او قدر قوشالار وار دونیادا-
اؤزو قوشا اولا-اولا، تنهادی!

قوواق اولوب باشین اوسته اسنَم،
هئچ دئمه کی: «یوخدو دوستوم، کیمسه‌نه‌م»!
سن اوره‌یی نغمه دولو بیر صنم،
من دئمیرم اهلِ حال'ا «تنهادی».

یالقیزلارین مئهریبانی قوی اولسون،
تک جانینا یانان جانی قوی اولسون،
ائه، نه اولسون؟ گولوستانی قوی اولسون!
ائو دوستاغی یانی قالا، تنهادی.

تسلّیدن گول آچسا دا اوره‌یین،
هر یئتَنه نئجه یاتا اوره‌یین؟!
جوت قانادلا لاپ اوچسا دا اوره‌یین،
راست گلیبسه بیر ناققالا، تنهادی.

#موسی_یعقوب

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سیزه شعیر آچیرام لاپ ایندیجه قوتودان
قیسسا حیکایتیم وار قارغا ایله طوطو‌دان

یارانیشین پالچیغین الینده قاتمیش‌ایدی       
تانری هر ایکی‌سینده قارا یاراتمیش ایدی           

قارقا قبول ائیله‌دی راضی دوشدو طالعه
طوطو تانری یازدیغین ائتمه‌دی مطالیعه

رنگه بویاندی طوطو سئوینجه دولدو قات- قات
قارقا قالدی قاپ- قارا همی راضی همی شاد

بئله اولدو نهایت بیلیندی سوندا هرزاد
طوطی قفس ایچینده  قارقا یاشاییر آزاد!!

#آیدین_باخیش

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

چیچک کیمین بویلانیردی
هئی باخیردی گوله- گوله

الیم گلمیردی‌ هئچ درم
هئی باخیردیم گوله گوله

بولوت سردی گؤزلریمه
گؤزلرینی سوزه- سوزه

قالدیم آغلایا - آغلایا
گئتدی دئدی گوله- گوله


#آیدین_باخیش

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

دئدیم کی اولماسین گولوم بو حال‌لار،
هر شئی ماراغیندا گؤزل گؤرسه‌نیر.
مثلا:
      منیم اوره‌ییمه سالدیغین خال‌لار
      سنین، یاناغیندا گؤزل گؤرسه‌نیر...

وار ائله دوعالار سئوگیلیم یالنیز،
آرزولار باغیندا گؤزل گؤرسه‌نیر.
مثلا:
      منه خیالین دا آتا دئیه‌ن قیز-
      سنین قوجاغیندا گؤزل گؤرسه‌نیر...

#ایفرت_دونیامالیئو


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سس: پدرام رنجبر
سؤز: #واحد


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیراخ بو اينسانلارى سئوگيليم؛
اونلار،
سنى گؤرن داغلارين-
آچيق قالان آغيزلارينا
"كؤهول" دئييرلر...

#رحیم_اصغرزاده_تکین


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

#سامیر_جبراییللی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

آنلاييرام دئمه منه
آنلايا بيلرسنمي حيس ائتديكلريمي
باخا بيلرسنمي حياتا منيم گؤزلريمدن
سيغديرا بيلرسنمي اوتوز ايكي ايلي بئش دقيقه‌يه
چؤزه بيلرسنمي بئينيمين سيرريني
سيله بيلرسنمي اونوتماق ايسته‌ديكلريمي
سنين اوچون يانليش اولان ده‌ير يارغيلاريمي
ده‌ييشديره بيلرسنمي آنلاياجاغين شكيلده
بير گولوشون قيمتيني بئله بيلرسنمي
سئوگيليمين دوداق‌لارينداكي
روحومدا قوپان فيرتينا‌لاري
جانلانديرا بيلرسنمي خياليندا
ياشايا بيلرسنمي عئيني آجي و كدرلريمي
دليجه دوشلريمي سورغولايا بيلرسنمي ايچينده
بوشونا آنلاييرام دئمه منه
ايچ-ايچه ياشاديغيم بونجا ايله باخمايا‌راق
اؤزومو من بئله آنلايا بيلمه‌ديم داها

#یاشار_کمال

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

چتین بیر عالم دیر دونیانین سیرری،
بیلمه یَن بیری دیر ، بیلن بیری دیر
هئچ کیم بو دونیایا دئمه سین منیم
ترک ائدن بیری دیر، گلن بیری دیر

نئچه نؤکر اوغلو اولدو حوکمران،
نئچه شاهین اوغلو تؤره دی نادان
نیظاملا قورولوب ایکی نردیوان
اوجالان بیری دیر ، ائنن بیری دیر

کیمی سیغینیب دی قارغی دامینا
کیمی جوموب عیش و عیشرت جامینا
باخیلسا  زحمتین  دوز  حسابینا ،
قازانان بیری دیر ، ییه ن بیری دیر

تک آلیب دونیانی نفس ایله طاماح
بیر گونده اولونور نئچه مین گوناه
کیمی سه کئف چکیر ، کیمسه آمان ، آه
آغلادان بیری دیر ، گولن بیری دیر

غمکئش بو دؤورانا گل باغلاما کین
بو حسابین حللی دئییلدیر مومکون
مین بئشیک دوزلیر، مین تابوت هر گون
یارانان بیری دیر ، اُؤلن بیری دیر


#غمکئش_الله_وئردی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

کئشگه بیر بئله
اؤزونه اؤیرتمه‌یه‌یدین  منی،
سن اولمایاندا...
اؤزوم‌دن گئدیرم‌...
اؤزومه گلمک اوچون!
گونلر چکیر...
اؤزوم‌دن چیخیب,
اؤزومه قاییتماغیم!!!

#اصغر_کمالی_یانار

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

هله لیک کولک لی قیشدی آ دوستوم،
آچاندا یام یاشیل یاز،اویات منی.
بیر ائلین اوبانینین دردی غمینی،
شاعیر دردین آلیم یاز،اویات منی.

عهدیمه عشقیمه دوزدو ایلقاریم،
وطن وارلیغیدی کؤنلومده واریم،
قاداسین آلدیغیم آی نازلی یاریم،
توتاندا کؤنلونو ناز،اویات منی

نعمت دی یئرینه بوتون هرنه وار،
قیش گلیب گٸتمه سه یارانماز بهار،
قار-بوران یازاندا آ نازلی نیگار،
قوی یاتیم قوینوندا،آز اویات منی.

گونش گٸدیب سون منزیله باتاندا،
عؤمور آییم بولوت آلتدا یاتاندا،
ایکی سئوگی بیر-بیرینه چاتاندا،
اؤلسم ده قبریمی قاز،اویات منی.

بیر بولاق عشقینه،بیر سئل عشقینه،
بیر چیچک عشقینه،بیر گول عشقینه،
شاعیر گاللی موسی بیر ائل عشقینه،
اوخویوب چالاندا ساز،اویات منی.

#گاللی_موسی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

نه گولدن سئچیلیر، نه ده چیچکدن،
چیچکلر ایچینده، چیچکدیر بو قیز.
مارال باخیشینا حیران اولموشام،
بیر سئوگی دولوسو اورکدیر بو قیز.

آیریلماز گؤلوندن یاشیل باش سونا،
آللاه گؤزللیگی پای وئریب اونا،
انسان صورتینده گیریب بیر دونا،
سانکی گؤیدن ائنن ملکدیر بو قیز.

باشدا کالاغایی، اوزونده لَچَک،
حلالدیر او قیزا  وئردیگیم امک،
یاز واختی داغلاردا آچیلان چیچک،
قیشدا دا یارانان کولکدیر بو قیز.

قارا خال یاراشیر آل یاناغینا،
دوشور اینجه گولوش بال دوداغینا،
اوز توتوب یول گئدیر ائل بولاغینا،
هانکی بختَوره گرکدیر بو قیز؟

عنوان اولدو صحبتیمده، سؤزومده،
جیران کیمین گزیر داغلار دوزونده،
گاللی موسی منیم اورک گؤزومده،
بیر ترلان بالاسی تولکدیر بو قیز.

#گاللی_موسی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ایشلریندن باش چیخارا بیلمه دیم،
توتانمادیم  ته‌هه‌رینی  دونیانین!
اؤز ایچیمده بوغولموشام مین دفعه_
چوخ اودموشام  قهرینی  دونیانین!

آی لار  اؤتدو، ایل دایاندی قصدیمه،
ها یاندیمسا، ایسینمه دیم ایستیمه
اؤز توستومدن دومان چؤکدو اوستومه
ظولمت گؤردوم  سحرینی  دونیانین!

توپ آتیلسا بخت اویانماز یاتاندا ،
اوزه چیخماز دریالاردا باتاندا
ائله ألیم یویه نینه  چاتاندا _
قاچیرمیشام  کهرینی  دونیانین!

آج گؤزلویو، خیالیمدان سیلمیشم،
وئردیگینه شوکور دئییب، یئمیشم
هر ندیرسه، اؤز پاییمدی دئمیشم
بال بیلمیشم  زهرینی  دونیانین!

قوش دیلینی بیلسئیدیم قوش دیلینده،
اوخویاردیم وفاسی یوخ گولون  ده،
نه قیسمت دی "میرصییافین" الینده_
ایلان گؤردوم گؤوهرینی دونیانین!

#میر_صیاف_زامانلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

vətən♥️

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیز آزیق.
بیر تیکه تورپاق.
بیر قاریش دنیز
و آرابیر
یازدا چیخان چیچک‌لریک.
یاغیشیمیز دا اولور
گؤیلر ایسته‌یه‌نده.
گونشیمیز ده وار
او قارا بولودلارین
آرخاسیندا...

#واقیف_صمداوغلو

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ییخیلیر بئینیمه بو دام،
بو دووار؛
بو کوچه، خییاوان، شهرده نه وار.
ایلدیریم قایناییر سوموکلریمده؛
بیر دینله؛
اوتاق‌دا، اوسکورن‌می وار؟

#آتیلا_حاجیزاده
#پاراگراف

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

Hər yarə könül verməyə bağlanmağa dəyməz
Hər şəm ona pərvanə olub yanmağa dəyməz
Tərk et onu ondan ki vəfa görməyəcəksən
Dəryadə balıq yoxdusa islanmağa dəyməz...


هر یاره کؤنول وئرمه‌یه باغلانماغا دیمز
هر شم اونا پروانه الوب یانماغا دیمز
ترک ائت اونو اوندان کی وفا گؤرمه‌یه‌جکسن
دریادا بالیق یوخدوسا ایسلانماغا دیمز...

#رشاد_داغلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

خوش یئل‌ین حالینا
یاناق‌لارینی اؤپوب کئچیر
کیمسه ده سوروشماییر
کی اونون‌لا نه تانیشلیغین وار...
کاشکه منی یئل یاراداردیلار،
سنی ده یارپاق،
یئل له یارپاغین سئویشمه‌سینی گؤرموش‌مو سن؟
بیر-بیرینه دولاشیق و داها دا عاشق اولارلار...

#صادق_هدایت


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یئریمی قلبینده کیم آلدی گولوم؟
کیم منی گؤزون‌دن سالدی بئله‌جه؟
نه اولدو سئوگیمیز سارالدی گولوم،
اؤزومو آراییم هایاندان، نئجه؟

مات قالیب اوره‌ییم، مات قالیب الیم
خزانا تالانیر آچان گول‌لریم
سنسیز یاشاماغیم اؤلومدور، اؤلوم
توپراغی دوشونور سنسیز، ال‌لریم

گئدیرم اؤزومو اؤزومدن آسام
اوتوروب یارامی باغلایام گرک
بو دلی یول‌لاردا اونودولماسام،
داها آغ واراقدا آغلایام گرک...

#جانای

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ائله بؤیوتموشدوم گؤزوم‌ده سنی
یازدیغیم شعریم‌ده-سؤزوم‌ده سنی
بیر عؤمور ساخلادیم اؤزوم‌ده سنی
گئتدین آیریلیغین یولونو سئچدین.

یادین‌دا الینی اوشودن کولک
منه ایسیتمه‌یه وئریردی اورک!؟
دئییردیک اؤلسه‌ک ده بیرلیک‌ده اؤلک!
گئتدین آیریلیغین یولونو سئچدین

من سنی حیاتین واری بیلیردیم
بختیمین قیزارمیش ناری بیلیردیم
من سنی کؤنلومون یاری بیلیردیم
گئتدین آیریلیغین یولونو سئچدین.

ایندی‌لر گزیرم گؤروشن یئری
یئل‌لر هر بیر یاندان اسیر سرسری
آی‌لار-ایل‌لر اؤتدو دؤنمه‌دین گئری
گئتدین آیریلیغین یولونو سئچدین!...

#سعید_عریانتپه

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سئوگی قوش کیمی‌دیر منیم عزیزیم،
بوش توتسان الیندن چیخیب قاچاجاق.
برک توتسان الینده بوغولاجاقدیر،
نئینه‌سن سئوگی‌دیر، بیر گون اوچاجاق.

اوچاجاق دئییرم، هارا اوچاجاق؟!
اوچسا دا الینی اؤزله‌یه‌جکدیر.
سن اگر وفاسیز چیخماسان گولوم،
سنین یوللارینی گؤزله‌یه‌جکدیر.

اؤزگه‌لر الینده ساغلام قالماقدان،
سنین اللرینده اؤلمک گؤزلدیر.
اؤزگه‌لر باغیندا قان آغلاماقدان،
سنین قفسینده گولمک گؤزلدیر.

سئوگی‌لر قوش اولوب اوچماق ایسته‌سه،
گؤی اوزو توتولار، کؤلگه‌لر دوشر.
قاریشار سئوگی‌لر بیری-بیرینه،
گؤیدن یئره مین-مین بلگه‌لر دوشر.

آختار کی، تاپاسان سئوگی قوشونو،
مینلر قوش ایچینده ایتیب، باتارسان.
گؤررسن گؤیدن بیر اؤلو قوش دوشور،
ال آچیب اووجوندا اونو توتارسان.

گؤررسن سئوگیندیر قانادی سینمیش،
اوره‌یین چیرپینار، اللرین اَسَر.
ساخلایا بیلمه‌دین اونو الینده،
آخیردا قوش کیمی اولدو جان بَسَر.

سئوگی قوش کیمی‌دیر منیم عزیزیم،
بوش توتسان الیندن چیخیب قاچاجاق.
برک توتسان الینده بوغولاجاقدیر،
نئینه‌سن سئوگی‌دیر، بیر گون اوچاجاق…

#علی_چاغلا

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯