پریشان اوزانام کؤهنه ساز وئرین
مین هاوا یارادیم یارین خطرینه!
شاختالی عؤمرومه وارسا یاز وئرین
ساچلارا اله‌نن قارین خطرینه!

تئلیندن آسیلیب پرده‌سیز سازیم
سوسوبدو گرایلیم، باتیب آوازیم
سیزیلدار بایاتیم، شوروم، شاهنازیم
کامانین خطرینه، تارین خطرینه!

لاله‌لی داغلاردان ایلهاملار آلیم
ساری تارلالاردا، دویغویا دالیم
چیچکلی باغلاردا سرگیلر سالیم
آلمانین – هئیوانین، نارین خطرینه!

سوس دئدین:”قوجا”یا، هله سوسماییب
چتین سیناقلاردا دیزی اسمه‌ییب
نه سندن اینجیییب، نه‌ده کوسمه‌ییب
سنده اولان دوز ایلقارین خطرینه

#حسین_جاوان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سؤزدن باش تاپمایان، نغمه اوخویان!
هر سؤزون، اؤزونون اؤز آهنگی وار
خالی توخومایان، ایلمَک چالمایان!
خالی‌نین اؤزونون مین‌بیر رنگی وار

سؤز وارکی دئینده دوداق بوزولر
سؤز وارکی اورکدن گلر سوزولر
سؤز وارکی تسبئح تک ساپا دوزولر
سؤز وارکی اؤزونون اؤز فرهنگی وار  

صنعتی یاد گؤرَن اوستاد اولار می؟
اوستادسیز صنعتکار عِلمه دولار می؟
اسلان‌سیز، پلنگ‌سیز مئشه اولار می؟
مئشه‌نین شیری وار، اؤز پلنگی وار

سن خالقی آراییب گزه بیلمزسن
ائلین دانلاغینا دؤزه بیلمزسن
غوّاصلیق ائیله‌ییب، اوزه بیلمزسن
هونر دریاسینین مین نهنگی وار

شاعیر سؤز آختارار، کیتاب باغلایار
دونیا تاریخینی هئی واراقلایار 
«جاوان حسین» سئچیب سؤزون ساخلایار
چونکو اورگینده، ساز محنگی وار...

#حسین_جاوان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

دردیندن دویمورام دویمورام آخی!
دردین آنلاریمین ،سیغینجاغی دیر
بوتون گونلریمین هر آخشام چاغی
باش-باشا آغلاشان ییغینجاغی دیر

دردین نفسیم دیر،دردین آهیم دیر
اونو یاشاییرام،اونو چکیرم
دردین باغیشلانماز بیر گوناهیم دی
اونا اییلیرم ،من دیز چوکورم

گؤر نئجه گونوم وار !نئجه گؤرمه‌لی
دردیندن دولویام ...اؤزوندن بوشام
آهیندان یوغرولان ،حسرت هئیکلی
دردیندن گؤیرن،یانمیش بیر قوشام

کرمم دردینه، اصلی سوگیلیم
یانیرام هر گئجه آلوولانیرام
سحر ققنوسلاشیب بیتیب کولومدن
یئنی دن یانماغا محکوملانیرام

دردیندن دویمورام، دویمورام آخی...


#محمد_گل_محمدی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اوره‌ییم قوش اولوب ، قوندو قاپینا
آچمادین اللریم ،کسیلی قالدی
پنجره-پنجره،کوچه به کوچه
گؤزلریم قاپینا آسیلی قالدی

هارداسان آی منیم قوناجاق یئریم
شئعیر سیغینجاغیم ،یاناجاق یئریم
سندن بوداق-بوداق دوناجاق یئریم
بیرده قوش اوره‌ییم ، کوسولو قالدی

قاییت ! گؤزلریمده، بیتسین بو قوربت
یوللاردا دینجه‌لسین ،منی ده دینجه‌لت
سندن بیر دویوملوق پاییزلی حسرت
عؤمورلوک اوستومه اسیلی قالدی

#محمد_گل_محمدی


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

گؤزلریم سولانیر ایچدیکجه سنی
اؤزومدن چیخیرام،من دلی کیمی
یئنه قاییدیرام سن گئده‌ن یولا
باسیرام باغریما تسللی کیمی

باخیشیم کولله‌ییر یاماجی،یالی
اوره‌ییم هویکورور اوره‌ییم دولور
گئجه‌نین قاریسی ،گون باتان چاغی
آغاران گؤزو مو یوللاردان یولور

یئنه داریخیرام،یئنه سن سیزم
سن بویدا حسرتی نئجه اووودوم
بیاق یول اوستونده ،هئچ کیم بیلمه دی
گیزلین باخیشیمی یاغیشا یودووم


#محمد_گل_محمدی


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیلسن، گؤزلیم! سن نه قدر سئوگیلی جانسان،
ظولم ائیله‌مه، قوی سؤیله‌مه‌سینلر «جان آلانسان»

سولدورما او گول چؤهره‌نی، آلدانما رقیبه،
اؤز قدرینی بیل کی، نه قدر ایندی جاوانسان.

اغیاره اینانما، گؤزلیم! قورخورام اوندان،
چوخ ساده‌سن، هر سؤز کی دئییرلر اینانانسان.

گولدن ده، چیچکدن ده، گونشدن ده گؤزلسن،
سن باغ ملاحت یئتیرن سرو روانسان.

گؤردوم یئنه مین نازیله بیگانه‌یه باخدین،
چوخ شوبهه‌یه سالدین منی، بیلدیم نیگارانسان.

گؤر بیر نه گؤزللیکده یئتیرمیش سنی طالع!
حسرت چکیر عالم سنه، مشهور جهانسان.

«واحید!» بو قدر سنده کی وار عشق و محبّت-
دونیا قوجالیب گئتسه، چتین سن قوجالانسان...

#علی‌آغا_واحید

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

طالع منه یار اولماسا، من نئيله‌یه بيللم؟
ذؤوقومجه نيگار اولماسا، من نئيله‌يه بيللم؟

بير آهو باخيشلى گؤز‌له چوخدان اسیرم
آهێملا شیکار اولماسا، من نئيله‌يه بيللم؟

مئيخانه ده  همدم منه مئى جامى الينده
بير لاله عوذار اولماسا، من نئيله‌يه بيللم؟

مردليكله، صداقتله گؤزل دوست يولوندا
بير جان كى، نثار اولماسا، من نئيله‌يه بيللم؟

يوز ايل ياشاييب، بيرجه گون عؤمرومده فلكدن
كاميمجا مودار اولماسا، من نئيله‌يه بيللم؟

من بير گول اوچون یالواریرام خاره همیشه
گولدن او کنار اولماسا، من نئيله‌يه بيللم؟

مهپاره‌لرین جؤورونو چکمکلیگه "واحید"
کؤنلومده قرار اولماسا، من نئيله‌يه بيللم؟....

#علی‌آغا_واحید

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اوخشا ساچلاریمی، سَپیل روحوما
سنه یاخین اولوم، دنیادان اوزاق
قالدیر دابانینی ساریل بوینوما
قوی سکوت دانیشسین، ایکیمیز سوساق

بئله‌جه سئوینیم قوللارین اۆسته
اؤزون اویات منی، سیلکه‌له منی
اَیلندیر بو آخشام خوش اۆز له منی
طالع عزیزله‌سین قوی هله منی

دؤزوموم آزالیر هردن ائله بیل
دۆشوب اَریییرم تزه قار کیمی
سنین نوازشین معناسیز دگیل
او چاتیر دادیما خلاصکار کیمی

بعضاً بیر حیاسیز گیریر آرایا
اؤزو گۆنده گزیر، مَکری کؤلگه‌ده
نه سسیم نه اۆنوم یئتیر هارایا
بیر حیات ایشیغی سنسن بلکه‌ ده

ال‌لری شفا دیر مَلحَمی ایله
نه دئییم اووسون وار بلکه جانیندا
دنیانین اَن بؤیوک لُقمانی بئله
معالجه ائتسه هئچدی یانیندا

کیمسه دوداق بۆزوب هارداسا سسـسیز
دئمه‌سین آی هارای، بوردا دا غم وار
نه قَدَر گۆلونج‌دور نظریّه‌نیز
من دنیا گؤرموشم اؤز تجربه‌م وار

دؤیوش میدانی‌دیر قدیمدن حیات
بعضاً یارالاییر، من ده انسانام
طبیبسیز-درمانسیز سن منی ساغالت
اَیلندیر خوش اۆزله منی بو آخشام

سنه یاخین اولوم، دنیادان اوزاق
قوی سکوت دانیشسین، ایکیمیز سوساق


#نریمان_حسن‌زاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ائله ایسته‌ییرم قاییدام هردن
گاه قهر، گاه غورور دیدیر باغریمی
سنسیز دولو وورموش چینار کیمی‌یم
حیرصیم قوپوب-دوشن یارپاقلاریمدی

سؤز وار: "آغلایاندا اورک بوشالار"
سنینچون هؤنکورمک، آغلاماق آسان
سنین هئچ اولماسا تسکینلییین وار
یاخشی کی، سن منه اوخشامامیسان

ترسلیییم باشیما بیر بلا اولوب
تپه‌دن-دیرناغا گوناهام ،شرم
ائح... بو غورور دا بیر بهانه اولوب
من کی ،کؤرپه‌لیکدن دیمه‌دوشرم...


#واحید_عزیز


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ائله دایانیرسان، ائله باخیرسان
ائله بیل قارشیندا قورو بیر داشام
ایپک ساچلارینی بیر واخت اوخشایان
ائله بیل هارداسا من اولمامیشام.


سنی دوستلاریملا، تانیشلاریملا
من تانیش ائدردیم نه واختسا بیر- بیر
ایندی  اؤزگه لری   یاد   احتراملا
دئییرلر تانیش اول نه غریبه سن؟!

یوخودا گؤرردین نه واختسا هر دم
یولومو گؤزلردین یوللاردان اوزاق
من سنین یوخوندان چیخیب گلمیشم
بودا بیر یوخودور گَل تانیش اولاق.

قولونا  گیرَردیم  بو  یادیندادیر؟
گئدردیک یولوموز ، آرزوموز شریک
قولوم قوللارینین لاپ یانیندادیر
توخونسا، بیز ایندی عوذر ایستئیه ریک

هایاندا اولدومسا سحر یا آخشام
آرادین سن منی ، گؤردون سن منی
ایندی  گؤزلرینین   قاباغیندایام
هایاندا دوروم کی گؤرسن منی ؟!.

#نریمان_حسن_زاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بو دونیا نردیوان‌دی
بو دونیا نردیوان‌دی
قالخاندا مهریباندی
ائننده نه یاماندی!

گؤروشدوک پیلله‌لرده
یولون یاریسیندا بیز
او قالخیردی بو دم‌ده
من ائنیردیم خبرسیز

اونو آرزولارینا
قالدیریردی نردیوان
منی خاطیره‌لره
ائندیریردی بو زامان
بیریمیز گون‌چیخانا
بیریمیز گون‌باتانا

قالخا بیلمزدیم داها
نه او گوج،نه او طاقت
او دا ائنه بیلمزدی
حاقلی،حاقسیز وئرمیشدی
اؤز حؤکمونو طبیعت

گرک یا دوشمه‌یه‌یدی
بو گؤروش هئچ آرایا
یا او اوّل گله‌یدی
یا من سونرا دونیایا...

#نریمان_حسن‌زاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اَلیمی اوزاتدیم سئوینجه ساری
گؤردوم یوخ، آرادا کَدَر دایانیب

آتامی سَسله‌دیم کؤمه‌یه گَلسین
گؤردوم یوخ، آرادا قَبیر دایانیب

اوز توتوب گئدیردیم آللاها طَرَف
گؤردوم یوخ، آرادا عؤمور دایانیب...


#واقیف_صمداوغلو

سس: #آیتاج_ولی‌بی‌لی


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

من بیر گون اوفوق اولموشدوم،
دومان چؤکدو دنیزه‌،
گؤرونمه‌دیم.

من بیر گون جیغیر اولموشدوم،
گئدیب- گلن اولمادی،
اوت باسدی اوستومو،
گؤرونمه‌دیم...!


#واقیف_صمداوغلو


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سنی گؤزله‌یه‌جه‌یم،
یالقیز جا بیر آدا کیمی...
کی یئنی دن منی گؤروب؛
من‌ده یاشایاسان.
او زامانا دک،
پنجره‌لریم آغری چکه‌جک‌لر...

#پابلو_نئرودا

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

گئدیشین گتیردی غمی، غصه نی
قلبیم سئوه بیلمز داها کیمسه نی
هر گئجه رویامدا گؤرورم سنی
یوخومو آپارا بیلمه یه جک سن

گئتدییین یوللارا حسرتله باخدیم
دنیز تک کوکره ییب، چای کیمی آخدیم
منیمله قالاجاق بو قارا بختیم
بختیمی آپارا بیلمه یه جک سن

گوناهین قارشینا چیخاجاق سنین
تنهالیق قلبینی سیخاجاق سنین
آهیم یاندیراجاق یاخاجاق سنی
آهیمی آپارا بیلمه یه جک سن

گؤزومون یاشینی سیلسم ده بئله
سن سیز دردلی-دردلی گولسم ده بئله
من سنین دردیندن اؤلسمده بئله
روحومو آپارا بیلمه یه جک سن...

#نوصرت_کسمنلی


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ایناندیم سیزلره قلبیمی وئردیم
دوغرو آختاریردیم، مین یالان گؤردوم
سیزه آرخالاندیم، چوخالدی دردیم
یالانچی دوستلاریم، نه دئییم سیزه!؟

شام کیمی یاندینیز، پروانه اولدوم
قیش تک سویوندونوز، گول کیمی سولدوم
سیزی دردلی گؤروب دیوانه اولدوم
یالانچی دوستلاریم، نه دئییم سیزه!؟

گودازا نه قدر مردی وئردینیز!
سئوینج ایسته‌ییردیم، دردی وئردینیز
منه درد چکیلمیش سرگی وئردینیز
یالانچی دوستلاریم، نه دئییم سیزه!؟

ملَک گؤرکمینده نادان اولدونوز
«قادان آلیم» دئدیم، قادام اولدونوز
من ائله بیلیردیم آدام اولدونوز
یالانچی دوستلاریم، نه دئییم سیزه!؟

بیر مئیوه وئرمه‌دی بار آغاجینیز
یاغدیردی اوستومه قار، آغاجینیز
منیمچون حاضیرمیش دار آغاجینیز
یالانچی دوستلاریم، نه دئییم سیزه!؟

#نوصرت_کسمنلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

آدیمی قلبيندن آتا بيلرسن،
اوزاق آرزولارا چاتا بيلرسن،
مندن گؤزلينی تاپا بيلرسن
منيم تک سئوه‌نين اولمایاجاقدیر.

عؤمرونه بيرسئوگی گلر، بيليرم.
سنينله آغلایيب ، گولر بيليرم،
کيمسه سئوینجينی بؤلر بيليرم،
دردیندن اؤله‌نين اولمایاجاقدیر.

بيرگون سؤنه‌جک‌دیر، بو اود، بو اوجاق،
کدر یوواسيدیر بوش قالان قوجاق
دیزینه باش قویوب یاتان اولاجاق،
باشينا دؤنه‌نين اولمایاجاقدیر.

سئوگی عذابيندان اوزاقسان هله،
بير گون اریيه‌رسن سن گيله - گيله،
یاناغيندان اؤپن تاپيلسا بئله،
گؤز یاشی سيله‌نين اولمایاجاقدیر.

#نوصرت_کسمنلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

نه قاپیم‌دان، نه باجام‌دان آی گؤزَل
نه ائویمدن، ساراییم‌دان کئچیرسن!
گلیشینی، گئدیشینی سای گؤزَل
مین آهیم‌دان، هاراییم‌دان کئچیرسن!

نه اوتومدان، نه سویوم‌دان ایچمه‌دین
نه اوبامدان، نه کؤیوم‌دن اوچما‌دین
بیر یول گلیب کوچه‌میزدن کئچمه‌دین
هر گون گلیب اوره‌ییم‌دن کئچیرسن!

قیشی بوش وئر، هئچ یازیم دا کئچمه‌ییر
دومانیم دا،  آیازیم دا  کئچمه‌ییر
چؤرَک قالیر بوغازیم‌دا کئچمه‌ییر
بوغازیم‌دا، چؤره‌ییم‌دن کئچیرسن!
بوغازیم‌دا،چؤره‌ییم‌دن کئچیرسن!..

#ووقار_نعمت

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

صاباح گله‌جه‌یم دئدین
نه صاباح گلدی، نه سن
صاباح گلمه‌سه ده اولار!
یئتر کی سن گله‌سن...

#ووقار_نعمت

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ایستی‌یدی آنامین ال‌چؤره‌یی تک،
یاپ یاپا بیلیرسن، یاپ او گونلری‌!
کئچدی می، بیر داها ال یئتمه‌یه‌جک،
تاپسان، سالام یئتیر، اؤپ او گونلری!

او گون‌لر عؤمرومو سوپوردو، گئتدی،
کؤنلومو یئریندن قوپاردی، گئتدی،
آغاج آتیمی دا آپاردی، گئتدی،
دی چاپ‌ کی چاپاسان، چاپ او گونلری!

تاختا قیلینجیمی او گونه آسدیم،
دردیمی، سئوگیمی او گونه سوسدوم.
او گونو گؤرمه‌یه اوره‌ییم اسدی،
گتیر قوجاغیما، هوپ او گونلری!

سئویشدیک، گؤز دویدو، کؤنول دویمادی،
اوچدوق آیاغیمیز یئره دَیمه‌دی.
ائه، یئنه بورنومون اوجو گؤینه‌دی،
آل، یارالاریما سپ او گونلری!

او گون‌لر گون دئییل، بیرَر ایگیتدی،
داش آتلاریمیزین بئلینده گئتدی،
«گول»وموز‌ «پوچ» اولدو، الینده گئتدی،
ایندی گل اوغولسان، تاپ او گونلری!...

#ووقار_نعمت

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

کؤنلومو گؤینه‌دن خاطیره‌لردن
گؤزومو کیمینله آچیم، هارداسان؟
نه قَدَر هؤنکوروم شئعیر دیلییله
نه قدر سنینچون آجیم، هارداسان؟

دیلیم هئجا-هئجا آدیندا چاشیر
منی سینه‌مده‌کی بو داغدان آشیر
گؤز یاشیم گؤزومده کۆر کیمی داشیر
باش آلیب هایانا قاچیم، هارداسان؟

بو سئودا تک اَل‌له آغلایا بیلمز
قلم بو مکتوبو باغلایا بیلمز
منی سَنین کیمی آغلایا بیلمز
بلکه ده هئچ آنام، باجیم، هارداسان؟

گونشلی-بولودلو بیر خیال قوروم
جانیمدا نَفَسیم، گؤزومده نوروم
گَلیم، هانسی سؤزله سجده‌نه دوروم
سولطانیم، کیرالیم، راجیم، هارداسان؟

کؤنول دفترینده بیر اَیری خططم
بیر ییغین سومویم، بیر اوووج اَتم
داغیلیب-تالانمیش بیر مملکتم
تاختیم هایانداسان، تاجیم، هارداسان؟


سؤز: #آیاز_آراباچی
سس: #جلال_ممدوو

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯