سئوگیلیم! عالمه سنسیزجه یادام سانمیشدیم.
بیلمه‌دن، بال کیمی آغزیندا دادام سانمیشدیم.

جانیمی‌ باغلی دوشونموشدوم ازلدن جانینا
جیسمینه آرخا دوران قول-قانادام سانمیشدیم.

ال اؤزومدن اوزه‌لی، پامبیغا دؤنسم ده گولوم!
سنه، سؤیکَنمه اولان بیر پولادام سانمیشدیم.

سؤزوموزدن آجیشان شاختالی‌دویغومدا، کولک
سئوگیمیزدن آلیشان ایستی اودام سانمیشدیم.

‌داهی جان دئپرمه وئرمز اینانیردیم اوره‌‌یی
دئمه بس بیر ییخیلان دوستلوغا دام سانمیشدیم.

اؤز سوچومدور، چکیرم‌‌ایندی‌جزاسین‌ دا همن،
تانیمازدان سنی من، چون کی آدام سانمیشدیم...

#صابیر_باقیرزاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

دئمه گللم سنه باش چکمه‌یه ،گلمیرسن آخی
دئمه دردیمدن اؤلرسن منیم، اؤلمورسن آخی

آز جفا ائت منه، ظالیم قیزی ظالیم، یولا گل
سن محببت نه‌دی، سئودا نه‌دی بیلمیرسن آخی

سون سفردیر اؤلوم، اؤلدونسه دیریلمیرسن آخی
سنه قییمت وئره‌نین قدرینی بیلمیریسن آخی

من دئدیم، بلکه، گلر رحمه جفاکار اوره‌یین
یاش تؤکن گؤزلریمین یاشینی سیلمیرسن آخی

بیر عؤموردور ائله دونیا دوزه‌لیرکن دوزه‌لیر
سن ده دونیا کیمیسن ،منجه ،دوزلمیرسن آخی

هر نفس آتدیغین آددیم بیر عؤمور ثروتیدیر
سون سفردیر اؤلوم، اؤلدونسه دیریلمیرسن آخی

سنه روحوندا آچان گول دئدی ان قییمتلی
سنسه شاعیر ووقارین قدرینی بیلمیرسن آخی.

#ووقار_بیله‌جری


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سن گئدیب مندن آلاندان منی، قالدیم سنسیز
گلمه‌دین، گؤزلری یوللاردا قوجالدیم سنسیز

بیر غریب شام ایشیغی، بیر حزین هیجران اوتاغی
سنله بیرلیکده کئچن گونلره دالدیم سنسیز

عشق بازارینا گئتدیم، بئله سؤودا ائتدیم
فرحی، نشعه‌نی ساتدیم، کدر آلدیم سنسیز

گئتمیسن، باده‌ی هیجران ایچیرم، ائی داش‌اورک
وصل پئیمانه‌سینی داشلارا چالدیم سنسیز

هیجر دؤندردی کؤنول مولکونو غم وادیسینه
نئچه غمله دولو کاروان یولا سالدیم سنسیز

طالئعیم قاره، گونوم قاره‌دی، بختیم قاره
منی هر گون قارا باسدیقجا قارالدیم سنسیز

آیریلیق باغچالاریندان ساری گوللر دردیم
ساری گوللر کیمی حسرتده سارالدیم سنسیز

اینتیظاریندا نه‌لر چکدی ووقار بختی‌قارا
سنی هر غملی کولکدن، خبر آلدیم سنسیز.

#ووقار_بیله‌جری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

آپاردی بیر غریب خیال
یامان منی اوزاقلارا
یادیمدا ان شیرین قالان
او گونلره او چاغلارا

من اولماسام دا سنله‌دی
خیالیم هر قدم باشی
مزاریم اوسته گلمه‌دین
داریخدی سینه‌مین داشی
سنه اَمانت ائیله‌دیم
گؤزومدن هر دوشن یاشی
نوازیش ایله داوران او
یئتیم قالان اوشاقلارا

اسیر دام درد اولون
وفا یولوندا مرد اولون
سعادت آختارانلارین
بلا کسر ساغین-سولون
ایلاهی آیری سالماسین
سئونلرین عؤمور یولون
اوتورماسین کدر توزو
گولوش قونان دوداقلارا

غمین یانیمدا ساخلارام
بیر عؤمر یادیگار اولا
او سَندن ائعتیبارلی‌دیر
چتین بی‌ائعتیبار اولا
سَنه حئییف‌دی گؤز یاشیم
اَلیمده ایختییار اولا
سیخیب گؤزومده ساخلارام
داغیتمارام یاناقلارا

گول بئهیشته ناز ائدر
ساچیندان آلدیغیم عطیر
اوخونمامیش کیتاب کیمی
ماراقلیسان سطیر-سطیر
گولومسه روحومون گولو
گولوشلرینله یاز گتیر
گولوشلرین چیچکله‌سین
باهار گلنده باغلارا

#ووقار_بیله‌جری


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یاغدیردی سئوگیدن باشیما بیر دنیز یاغیش
بیر گول کی گؤزلریندن اؤپَر ایز به ایز یاغیش

کؤکسومده درد اودون گؤروبن باش آلیب گئده‌ر
اَیلَشسه منله بیر نئچه گون دیز به دیز یاغیش

آللاه بیلیر کی من ده دنیز طایفاسیندانام
فخر ائیله‌ییر گؤزومله اولوبدور ائکیز، یاغیش

دوستلار! یوبانمایین، سیزه داغلار دا باش اَیه‌ر
گؤز بایراغیندا سئوگی دئییب چکسه‌نیز یاغیش

نرگیز بَبَکلی بیر گولون عشقی‌ایله چاغلایین
کیم گؤزلرینده دایه گونش‌دیر، کنیز یاغیش

چوخ ساده‌دیر جاواب، سوروشولساز: یاغیش نه‌دیر؟
سیز کیمسینیز؟ دئیین کی یاغیش بیز و بیز یاغیش


#ایلقار_دوستی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

وَغَمله‌نیب باغیمیز، گولمه‌ییر چمنلیک‌لر
بنؤوشه بنده دوشوب، یاسدا سولدو شنلیک‌لر

داها گؤزه‌للیگین اؤلچوت داشی دئییل سئوگی
بورا بزه‌ک بازاری، گون- گون آرتیر اَنلیک‌لر

نیگارلی گون‌لرینه گئت گووه‌ن، کوراوغلو بابا!
داها نه سئوگی قالیبدیر نه ده اَرَنلیک‌لر

یئتَن یئییر بو یئتیم تورپاغین یئسیر پایینی
گؤزل گلیر جاناوار گؤیلونه بو چَنلیک‌لر

بیر آز دا هئی شیشیریک بیز، بیر آز دا هئی‌شیشیریک!
بیزی أَییب بو یالاندان دوزه‌لتمه منلیک‌لر

#ایلقار_دوستی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بورا قبریستان، اجل درنه‌یی‌دیر
هئچ یئره پیس دئمه، گل گؤر نه‌یی‌دیر!

یاخشی‌دیر سؤیله عدالت کندی!
هره‌نین اؤز بره‌سی، اؤز بندی!

هامی بیردیر، هره‌نین بیر دامی وار
داها من-سن سؤزو یوخدور، هامی وار

هره اؤز دردینه عالیم بوردا
داوا یوخدور، هامی سالیم بوردا

هره بیر گؤز دام آلیر، یات-یاتاسان
یات اوشاق! یات آناسان، یات آتاسان

آناسان، آنلایاسان آرزیلاری
داها آز دانلایاسان آرزیلاری

آتاسان دونیانی، آتماق یئری‌دیر
آیری بیر دونیا یاراتماق یئری‌دیر

بیر قورو آد یازیلیر باش‌داشینا
بو آدی آختارانین داش باشینا

بورا قبریستان، اجل درنه‌یی‌دیر
هئچ یئره پیس دئمه، گل گؤر نه‌یی‌دیر

کیمسه یوخدور، اؤزومم بیر ده اؤزوم!
کی قالیب سئوگیناز آردینجا گؤزوم!

#ایلقار_دوستی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سونرا،
گولوشون گلدی عاغلیما
و ایچیمدن دئدیم کی:
یئنه گلسن،
یئنه سئورم سنی...🖤

#جمال_ثریا

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اوزاقدان سئویرم سنی
قوخونو آلامادان
بوینونا ساریلامادان
اوزونه توخونامادان
ساده جه سئویرم

اؤیله اوزاقدان سئویرم سنی
الینی توتمادان
اوره یینه توخونمادان
گؤزلرینده دالیب_دالیب گئتمه دن
شو اوچ گونلوک سئودالارا عیناد
سرسریجه دئییل
آدام کیمی سئویرم...

اؤیله اوزاقدان سئویرم سنی
یاناقلارینا سیزان ایکی داملا یاشینی سیلمه دن
ان چیلقین قهقهه لرینه اورتاق اولمادان
ان سئودییین شارکینی برابر میریلدانمادان
اؤیله...

اؤیله اوزاقدان سئویرم سنی
قیرمادان
تؤکمه دن
پارچالامادان
اوزمه دن
آغلاتمادان

اوزاقدان سئویرم...

#جمال_ثریا

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سنه عایید اولان بوتون شئی‌لر عاقلیم دا
اونلارجا کیتاب
سنه عایید اولان شئی‌لر اوره‌ییم ده
یالنیز ایکی سؤز :

سئویرم سنی...!

#جمال_ثریا

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

زامان لازم ساده‌جه،
اونوداجاقسان.
نئجه اونوتدون‌سا اوشاق‌لیغینی،
قیریلان اویونجاق‌لارینی-
قیریلان قلبینی‌ ده اؤیله اونوداجاقسان...

#جمال_ثریا

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

پریشان اوزانام کؤهنه ساز وئرین
مین هاوا یارادیم یارین خطرینه!
شاختالی عؤمرومه وارسا یاز وئرین
ساچلارا اله‌نن قارین خطرینه!

تئلیندن آسیلیب پرده‌سیز سازیم
سوسوبدو گرایلیم، باتیب آوازیم
سیزیلدار بایاتیم، شوروم، شاهنازیم
کامانین خطرینه، تارین خطرینه!

لاله‌لی داغلاردان ایلهاملار آلیم
ساری تارلالاردا، دویغویا دالیم
چیچکلی باغلاردا سرگیلر سالیم
آلمانین – هئیوانین، نارین خطرینه!

سوس دئدین:”قوجا”یا، هله سوسماییب
چتین سیناقلاردا دیزی اسمه‌ییب
نه سندن اینجیییب، نه‌ده کوسمه‌ییب
سنده اولان دوز ایلقارین خطرینه

#حسین_جاوان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سؤزدن باش تاپمایان، نغمه اوخویان!
هر سؤزون، اؤزونون اؤز آهنگی وار
خالی توخومایان، ایلمَک چالمایان!
خالی‌نین اؤزونون مین‌بیر رنگی وار

سؤز وارکی دئینده دوداق بوزولر
سؤز وارکی اورکدن گلر سوزولر
سؤز وارکی تسبئح تک ساپا دوزولر
سؤز وارکی اؤزونون اؤز فرهنگی وار  

صنعتی یاد گؤرَن اوستاد اولار می؟
اوستادسیز صنعتکار عِلمه دولار می؟
اسلان‌سیز، پلنگ‌سیز مئشه اولار می؟
مئشه‌نین شیری وار، اؤز پلنگی وار

سن خالقی آراییب گزه بیلمزسن
ائلین دانلاغینا دؤزه بیلمزسن
غوّاصلیق ائیله‌ییب، اوزه بیلمزسن
هونر دریاسینین مین نهنگی وار

شاعیر سؤز آختارار، کیتاب باغلایار
دونیا تاریخینی هئی واراقلایار 
«جاوان حسین» سئچیب سؤزون ساخلایار
چونکو اورگینده، ساز محنگی وار...

#حسین_جاوان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

دردیندن دویمورام دویمورام آخی!
دردین آنلاریمین ،سیغینجاغی دیر
بوتون گونلریمین هر آخشام چاغی
باش-باشا آغلاشان ییغینجاغی دیر

دردین نفسیم دیر،دردین آهیم دیر
اونو یاشاییرام،اونو چکیرم
دردین باغیشلانماز بیر گوناهیم دی
اونا اییلیرم ،من دیز چوکورم

گؤر نئجه گونوم وار !نئجه گؤرمه‌لی
دردیندن دولویام ...اؤزوندن بوشام
آهیندان یوغرولان ،حسرت هئیکلی
دردیندن گؤیرن،یانمیش بیر قوشام

کرمم دردینه، اصلی سوگیلیم
یانیرام هر گئجه آلوولانیرام
سحر ققنوسلاشیب بیتیب کولومدن
یئنی دن یانماغا محکوملانیرام

دردیندن دویمورام، دویمورام آخی...


#محمد_گل_محمدی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اوره‌ییم قوش اولوب ، قوندو قاپینا
آچمادین اللریم ،کسیلی قالدی
پنجره-پنجره،کوچه به کوچه
گؤزلریم قاپینا آسیلی قالدی

هارداسان آی منیم قوناجاق یئریم
شئعیر سیغینجاغیم ،یاناجاق یئریم
سندن بوداق-بوداق دوناجاق یئریم
بیرده قوش اوره‌ییم ، کوسولو قالدی

قاییت ! گؤزلریمده، بیتسین بو قوربت
یوللاردا دینجه‌لسین ،منی ده دینجه‌لت
سندن بیر دویوملوق پاییزلی حسرت
عؤمورلوک اوستومه اسیلی قالدی

#محمد_گل_محمدی


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

گؤزلریم سولانیر ایچدیکجه سنی
اؤزومدن چیخیرام،من دلی کیمی
یئنه قاییدیرام سن گئده‌ن یولا
باسیرام باغریما تسللی کیمی

باخیشیم کولله‌ییر یاماجی،یالی
اوره‌ییم هویکورور اوره‌ییم دولور
گئجه‌نین قاریسی ،گون باتان چاغی
آغاران گؤزو مو یوللاردان یولور

یئنه داریخیرام،یئنه سن سیزم
سن بویدا حسرتی نئجه اووودوم
بیاق یول اوستونده ،هئچ کیم بیلمه دی
گیزلین باخیشیمی یاغیشا یودووم


#محمد_گل_محمدی


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیلسن، گؤزلیم! سن نه قدر سئوگیلی جانسان،
ظولم ائیله‌مه، قوی سؤیله‌مه‌سینلر «جان آلانسان»

سولدورما او گول چؤهره‌نی، آلدانما رقیبه،
اؤز قدرینی بیل کی، نه قدر ایندی جاوانسان.

اغیاره اینانما، گؤزلیم! قورخورام اوندان،
چوخ ساده‌سن، هر سؤز کی دئییرلر اینانانسان.

گولدن ده، چیچکدن ده، گونشدن ده گؤزلسن،
سن باغ ملاحت یئتیرن سرو روانسان.

گؤردوم یئنه مین نازیله بیگانه‌یه باخدین،
چوخ شوبهه‌یه سالدین منی، بیلدیم نیگارانسان.

گؤر بیر نه گؤزللیکده یئتیرمیش سنی طالع!
حسرت چکیر عالم سنه، مشهور جهانسان.

«واحید!» بو قدر سنده کی وار عشق و محبّت-
دونیا قوجالیب گئتسه، چتین سن قوجالانسان...

#علی‌آغا_واحید

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

طالع منه یار اولماسا، من نئيله‌یه بيللم؟
ذؤوقومجه نيگار اولماسا، من نئيله‌يه بيللم؟

بير آهو باخيشلى گؤز‌له چوخدان اسیرم
آهێملا شیکار اولماسا، من نئيله‌يه بيللم؟

مئيخانه ده  همدم منه مئى جامى الينده
بير لاله عوذار اولماسا، من نئيله‌يه بيللم؟

مردليكله، صداقتله گؤزل دوست يولوندا
بير جان كى، نثار اولماسا، من نئيله‌يه بيللم؟

يوز ايل ياشاييب، بيرجه گون عؤمرومده فلكدن
كاميمجا مودار اولماسا، من نئيله‌يه بيللم؟

من بير گول اوچون یالواریرام خاره همیشه
گولدن او کنار اولماسا، من نئيله‌يه بيللم؟

مهپاره‌لرین جؤورونو چکمکلیگه "واحید"
کؤنلومده قرار اولماسا، من نئيله‌يه بيللم؟....

#علی‌آغا_واحید

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اوخشا ساچلاریمی، سَپیل روحوما
سنه یاخین اولوم، دنیادان اوزاق
قالدیر دابانینی ساریل بوینوما
قوی سکوت دانیشسین، ایکیمیز سوساق

بئله‌جه سئوینیم قوللارین اۆسته
اؤزون اویات منی، سیلکه‌له منی
اَیلندیر بو آخشام خوش اۆز له منی
طالع عزیزله‌سین قوی هله منی

دؤزوموم آزالیر هردن ائله بیل
دۆشوب اَریییرم تزه قار کیمی
سنین نوازشین معناسیز دگیل
او چاتیر دادیما خلاصکار کیمی

بعضاً بیر حیاسیز گیریر آرایا
اؤزو گۆنده گزیر، مَکری کؤلگه‌ده
نه سسیم نه اۆنوم یئتیر هارایا
بیر حیات ایشیغی سنسن بلکه‌ ده

ال‌لری شفا دیر مَلحَمی ایله
نه دئییم اووسون وار بلکه جانیندا
دنیانین اَن بؤیوک لُقمانی بئله
معالجه ائتسه هئچدی یانیندا

کیمسه دوداق بۆزوب هارداسا سسـسیز
دئمه‌سین آی هارای، بوردا دا غم وار
نه قَدَر گۆلونج‌دور نظریّه‌نیز
من دنیا گؤرموشم اؤز تجربه‌م وار

دؤیوش میدانی‌دیر قدیمدن حیات
بعضاً یارالاییر، من ده انسانام
طبیبسیز-درمانسیز سن منی ساغالت
اَیلندیر خوش اۆزله منی بو آخشام

سنه یاخین اولوم، دنیادان اوزاق
قوی سکوت دانیشسین، ایکیمیز سوساق


#نریمان_حسن‌زاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ائله ایسته‌ییرم قاییدام هردن
گاه قهر، گاه غورور دیدیر باغریمی
سنسیز دولو وورموش چینار کیمی‌یم
حیرصیم قوپوب-دوشن یارپاقلاریمدی

سؤز وار: "آغلایاندا اورک بوشالار"
سنینچون هؤنکورمک، آغلاماق آسان
سنین هئچ اولماسا تسکینلییین وار
یاخشی کی، سن منه اوخشامامیسان

ترسلیییم باشیما بیر بلا اولوب
تپه‌دن-دیرناغا گوناهام ،شرم
ائح... بو غورور دا بیر بهانه اولوب
من کی ،کؤرپه‌لیکدن دیمه‌دوشرم...


#واحید_عزیز


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ائله دایانیرسان، ائله باخیرسان
ائله بیل قارشیندا قورو بیر داشام
ایپک ساچلارینی بیر واخت اوخشایان
ائله بیل هارداسا من اولمامیشام.


سنی دوستلاریملا، تانیشلاریملا
من تانیش ائدردیم نه واختسا بیر- بیر
ایندی  اؤزگه لری   یاد   احتراملا
دئییرلر تانیش اول نه غریبه سن؟!

یوخودا گؤرردین نه واختسا هر دم
یولومو گؤزلردین یوللاردان اوزاق
من سنین یوخوندان چیخیب گلمیشم
بودا بیر یوخودور گَل تانیش اولاق.

قولونا  گیرَردیم  بو  یادیندادیر؟
گئدردیک یولوموز ، آرزوموز شریک
قولوم قوللارینین لاپ یانیندادیر
توخونسا، بیز ایندی عوذر ایستئیه ریک

هایاندا اولدومسا سحر یا آخشام
آرادین سن منی ، گؤردون سن منی
ایندی  گؤزلرینین   قاباغیندایام
هایاندا دوروم کی گؤرسن منی ؟!.

#نریمان_حسن_زاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯