سندن باشقا هئچ کس گلمز عئینیمه،
ابدی‌لیک حک اولوبسان بئینیمه،
کؤوره‌لیبسن ،باشینی قوی چیینیمه،
دسمال وئریم، دویا-دویا آغلایاق.
                                             
هر نفسده منیمله‌دیر خیالین،
بیرآن گئتمز گؤز اؤنوندن، جمالین،
شیرین‌لیین دادمامیشیق ووصالین،
حسرتلری سایا-سایا آغلایاق،
دسمال وئریم، دویا دویا آغلایاق.
                                              
هرتئلیندن نیسگیل یاغان بو سازدان،
گؤز یاشیمیز سئل اولاجاق بیرآزدان،
گوله - گوله کئچمه‌میشیک آرازدان،
گل اوز توتاق بیز اوتایا آغلایاق،
دسمال وئریم، دویا دویا آغلایاق.
                                        
سایماغینان ، دئمه‌یینن توکنمز،
ویران قلبی،هیچ بیر کیمسه تیکنمز،
داغ دا، داش دا بو حسرتی چکنمز،
دردیمیزی دئیه‌ک سویا آغلایاق،
دستمال وئریم، دویا دویا آغلایاق.

#علی_اویاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

خیالیمدا بیر قوش اولوب ، سنه طرف گله‌جه‌یم

الیمده کی چیچک‌لری ، گولوم سنه وئره‌جه‌یم

بوگون سنین دوغوم گونون ، بئلنچی بیر شیرین‌گونو

بوتون ووجودوملا گؤزل ، سنه تبریک دئییه‌جه‌یم

دوغوم گونون قوتلو اولسون جان دوستوم💙💙
اوره‌یین همیشه سئوینج‌له دولو اولسون، دونیانین تامام گؤزللیک‌لری بوتون سنین اوچون اولسون قارداشیم💙
اؤپورم سنی❤️ @Bitigme1993

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

آغاج دا گول آچیر شاختالی قیش‌دا،
چیچک‌ده گؤیریر قایادا،داش‌دا،
قیرخی دا کئچیرم،هله بو یاش‌دا،
سنین اوره‌یینه یول تاپانمیرام.

گونشین ساپ ساری ساچین دا هؤرسه‌م،
گؤی‌دن قوجاق-قوجاق اولدوز دا درسه‌م،
چؤللره دوشسه‌م ده، داغی دا یارسام،
سنین اوریینه یول تاپانمیرام.

من یازیق،نه قدرحسرتین چکیم،
نه قدر گؤزومو یولونا تیکیم،
باشیما هارانین کولونو تؤکوم،
سنین اوریینه یول تاپانمیرام.

گئجه‌لری اویاق قالسام،یاخشیدی،
یا دا قاپینیزا گلسم یاخشیدی،
واللاه بئله گئتسه،اؤلسم یاخشیدی،
سنین اوریینه یول تاپانمیرام.

#علی_اویاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سن یئنه قاییتسان، یئنه سئوه‌رم
باشقاسین سئومه‌یه هوَسیم چاتمیر
مَن سَنده سئوگینی هاوا بیلمیشم
سن چیخیب گئدندن نَفَسیم چاتمیر...

#اورخان

https://www.instagram.com/reel/DJpUBIbtdmI/?igsh=MWplZGZ5NDk2Y2ZmbQ==

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بو آخشام یئنه ده اوزون گئجه دیر
قارانلیق قلبیمی اوزمه یه گلیر
بیر منم بیر اتاق بیر یانان چیراق
غصه لر سئوگیمی درمه یه گلیر

بیر خیشاب سیقاریم بیر لیوان چاییم
بیر جوت یولداشیم وار تک دئییلم من
کیم دئییر یالنیزام دوشونمور هله
مین خیال بئینیمده گزمه یه گلیر

خودکاریم الیمده یازیر دورولور
گوشیمین شارقیسی من سیز بوغولور
اوخویان ائله بیل اؤزو یورولور
غملرین منیمله بؤلمه یه گلیر

بو آخشام بیر منم بیر دلی اورک
ائویمین قارشیندان ماشینلار کئچیر
ساحات_تک دولانیب هارا گئدیللر
حایاتیم بو گئجه قاچماغا گلیر

#اکبر_عبادی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

رئال دوشونجه‌م اؤلوب، سوررئالدایام سنسیز
آپاردین عاغلیمی، تام اختلالدایام سنسیز

اوشاقلغیندا بازاردا آنان سنی ایتیریب؟؟
نه اضطرابلی اولور؟ دوز او حالدایام سنسیز

دالینجا جهل آجیسی قهوه‌مه دامان گۆندن
دوعاچی‌لار قاپیسین‌ دا زاوالدایام سنسیز

ایچیمده شعر، تلقین و سیگار اعتلافیندان
دوغولدو بیر مازوخیسم، انحلالدایام سنسیز

هر  آخشام، آرزیلاریم  قوردوغو تحصّن‌ده
منم کی دانلاق اوچون کارناوالدایام سنسیز

گؤزۆم، سن آیریلانی، آیری گؤزده شهره باخیر
آدام- آدام سوروشولماز  سوالدایام سنسیز

جیزیق چکیب، یاریشیر گؤزلرین داریخمام‌لا
عؤمورلوک ائو داغیدان فئستیوالدایام سنسیز

جیزیق دئدیم، بیر اویون وار، آدی قاییش قاپدی
سوروش دئیرلر، اوجور چال ها چالدایام سنسیز

اؤزونده، قارشی نئچه انقلابلی  ارگین‌ دن
شاه‌ 'ین  قاچان چاغییام، قالما- قالدایام سنسیز

#مهدی_حامد_سلطانی_ارگین

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

هله‌ ده چوخ قولاغین گونده اولور مشغله‌سی
بوردا مشروطه گؤرن قارقالارین هلهله‌سی

هله «نارین‌قالا»نین سویقیریمیندان بویانا
گلمه‌ییب اؤز یئرینه بیر سؤیودون حوصله‌سی

سؤن گئدیشده باباخان گؤزلرینین شاهدی‌دیر
«شاه باغلی‌»یلا «پیله‌سئیران» یولونون فاصله‌سی

هله‌ ده شعرین آتیر چای‌لارا «بیضا» باش آچیر
عارفی کفر آدینا سورگون ائدن مسئله‌سی

قیرخ اوچ ایلدن سورا دا آل- وئری واردیر، ساتیلیر
انقلابدا یازیلان گونده‌لییین باطله‌سی

هله مجنون‌لا یاریشماقدا قوجالدیقجا بوکور
«سورو»نون بوردا بئلین بیر آغیر عشقین  شله‌سی

چالدیران ایندی ده «شئهگاه» کوچه‌سیندن جان آلیر
اسماعیل شاهدان اوزاقلاشدیغیجاق عائله‌سی

انتحار فیکری قیزیل‌باشلارا سون وسوسه‌دیر
تؤره‌نیر کولگه‌ده دای شیخ صفی‌نین سلسله‌سی

یئدی گؤز کؤرپوسو قاجار دؤنمیندن یول آچیر
داشقا- داشقا داشییا نعش، وبا قافله‌سی

هله‌ ده آلتی بؤلور بوردا ایکی قارداش اؤزون
حیدری نعمتی‌نین بیتمه‌یه‌جک فئیصله‌سی

دار- دودوک بورما- بوروق تنگه‌لرینده «ارگین»
سیلینیب اردبیلین بلکه‌ ده چوخ- چوخ هله‌سی

یئددی شاه، یئددی پیرین فلسفه‌سی قوی قالسین
سینسیدیب نسلیمیزی کئچمیش‌ین هر مرحله‌سی

#مهدی_حامد_سلطانی_ارگین

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

تانیش گلیرسن منه
سانکی بکله‌دییمسن
سینیق گؤیول یوکلوسو...
سن کیمیم‌سن،نه‌ییمسن؟

گؤزون دالغالی دنیز
باخیشلارین اؤزله‌میم
یارا یئریشلرینده...
سینیر، سینسیمیش گَمیم

هانسی اودون آلووو،
هانسی کؤزون کولوسن؟
منیم تک آغلاییرسان،
ایچدن، اوزده گولورسن!

هاردا گؤرموشم، سنی
یادیما گلمیر، آنجاق
کؤنلون-کؤنلومه تای‌دیر
بوراخیلمیش اویونجاق...!

#مهدی_سربازی_علمداری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

مین اومود باغچاسینین پرپر اولان آل گولویم
سئوگی‌لر- سئودالیلار الده گزن، لال گولویم

منی یالقیزجا بیتن یاسلی‌جا کولدان خبر آل...
آریلار چانتاسینا بورگه‌له‌نن بال گولویم...

بیر عؤمور جانلا دوشندیم دان آیاق آلتلارینا
ساچا قیسمت دییلم قولداکی قاندال گولویم

کئفله‌نر هر لچه‌ییمدن یئره دوشدوک‌جه چمن
دول دوداقلاردا بیتن اود کیمی تونقال گولویم

گونشین خسته‌سی‌یم باسدیریب اوس کؤلگه منی
علاجیم سنده بولود یاغ! ایشیغین دال گولویم

ال- اله صف چکیلیب داغدان اوجالمیش داغیمیز
قافقازین پارچاسی‌یام ، کئفلیجه کامتال گولویم...

قارا داغدان جانا تک وصلی دوزولموش دامارام
دلی جئیران گؤزو اوستونده‌کی خال-خال گولویم

دولوخان هر بولوتون اؤپموشم حسرت گؤزونو
گؤزو یوللاردا قالان بویلولارین شال گولویم

آی‌ین اولدوزلارین آلدیم قاداسین یئتمه‌دی کی...
داشین اوستونده اوزولموش اومودون سال گولویم

#مهدی_سربازی_علمداری


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیر قریب تانیشین سسینی دویدوم
چاغیردی گئجه‌نین گیزلی قاتیندا
هویوخدوم چکیندیم سوسدوم او یئنه
سس‌لندی بئینیمین یارا چاتیندا

دیلیم توتولاراق کیمسن سویله‌دیم
سویله‌دی بئینینده سیزلایان یارا
دئدیم آی اوتانماز ایتیل گؤزومدن
سن هارا بئینیمده  سیزلایان هارا

دئدی حقیقتی دانماق اولارمی؟
من ایللر بویودور سنده یاتانام!
گئجه گؤندوزونو الیندن آلان؛
هم جانینا درمان هم ساراطانام!

گؤزلریم دولارکن بَری گل دئدیم
ای اولان خاطیرین خیدده‌گیمده ایپ
سوردو نه‌قدر من عزیزمی‌یم اوی!!؟
دئدیم حسرت‌لرین ویصال گؤیله‌ییب

یاخینلاشدی آستا آچدیم باغریمی
دئدیم گل سینه‌مه داغ‌لار لالاسی
سورما بونه گوندور بونه دیری‌لیک
سورما نئجه اوچدو ووقار قالاسی

سورما نئجه سولدوم نئجه سارالدیم
سورما ندن گؤره بیلمیرم داها
سورما کیم آپاردی یوسیف‌لیگیمی
سورما نه‌دییه‌جم جاواب آللاها


#مهدی_سربازی_علمداری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یاناغین آلما بویاق شاختا قیزاردان جیران
سنی یول‌لار داریخار قارلی گوذاردان جیران

الینه آی سو تؤکن آن هوپار حسرت‌‌لریمه
و شافاق گؤیلره چیخماق‌دا پوزار دان جیران

گئجه‌نین قورشاغی‌نا قاپ-قارا بنزر ساچی‌نا
اولدوز آختاررام اؤزوم گون‌لو بازاردان جیران

سن کی گئتدین«او قیزین گؤیلونو گئد آل»دئمه‌یه
یوخوما قالخیب آنام گلدی،مازاردان جیران

آیریلیق خسته‌سی یم آه  آغی ، قان باغریم‌دا
گل ها گل ، گل منی قورتار بو آزاردان جیران !

#صابیر_باقیرزاده‌

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سئوگیلیم! عالمه سنسیزجه یادام سانمیشدیم.
بیلمه‌دن، بال کیمی آغزیندا دادام سانمیشدیم.

جانیمی‌ باغلی دوشونموشدوم ازلدن جانینا
جیسمینه آرخا دوران قول-قانادام سانمیشدیم.

ال اؤزومدن اوزه‌لی، پامبیغا دؤنسم ده گولوم!
سنه، سؤیکَنمه اولان بیر پولادام سانمیشدیم.

سؤزوموزدن آجیشان شاختالی‌دویغومدا، کولک
سئوگیمیزدن آلیشان ایستی اودام سانمیشدیم.

‌داهی جان دئپرمه وئرمز اینانیردیم اوره‌‌یی
دئمه بس بیر ییخیلان دوستلوغا دام سانمیشدیم.

اؤز سوچومدور، چکیرم‌‌ایندی‌جزاسین‌ دا همن،
تانیمازدان سنی من، چون کی آدام سانمیشدیم...

#صابیر_باقیرزاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

دئمه گللم سنه باش چکمه‌یه ،گلمیرسن آخی
دئمه دردیمدن اؤلرسن منیم، اؤلمورسن آخی

آز جفا ائت منه، ظالیم قیزی ظالیم، یولا گل
سن محببت نه‌دی، سئودا نه‌دی بیلمیرسن آخی

سون سفردیر اؤلوم، اؤلدونسه دیریلمیرسن آخی
سنه قییمت وئره‌نین قدرینی بیلمیریسن آخی

من دئدیم، بلکه، گلر رحمه جفاکار اوره‌یین
یاش تؤکن گؤزلریمین یاشینی سیلمیرسن آخی

بیر عؤموردور ائله دونیا دوزه‌لیرکن دوزه‌لیر
سن ده دونیا کیمیسن ،منجه ،دوزلمیرسن آخی

هر نفس آتدیغین آددیم بیر عؤمور ثروتیدیر
سون سفردیر اؤلوم، اؤلدونسه دیریلمیرسن آخی

سنه روحوندا آچان گول دئدی ان قییمتلی
سنسه شاعیر ووقارین قدرینی بیلمیرسن آخی.

#ووقار_بیله‌جری


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سن گئدیب مندن آلاندان منی، قالدیم سنسیز
گلمه‌دین، گؤزلری یوللاردا قوجالدیم سنسیز

بیر غریب شام ایشیغی، بیر حزین هیجران اوتاغی
سنله بیرلیکده کئچن گونلره دالدیم سنسیز

عشق بازارینا گئتدیم، بئله سؤودا ائتدیم
فرحی، نشعه‌نی ساتدیم، کدر آلدیم سنسیز

گئتمیسن، باده‌ی هیجران ایچیرم، ائی داش‌اورک
وصل پئیمانه‌سینی داشلارا چالدیم سنسیز

هیجر دؤندردی کؤنول مولکونو غم وادیسینه
نئچه غمله دولو کاروان یولا سالدیم سنسیز

طالئعیم قاره، گونوم قاره‌دی، بختیم قاره
منی هر گون قارا باسدیقجا قارالدیم سنسیز

آیریلیق باغچالاریندان ساری گوللر دردیم
ساری گوللر کیمی حسرتده سارالدیم سنسیز

اینتیظاریندا نه‌لر چکدی ووقار بختی‌قارا
سنی هر غملی کولکدن، خبر آلدیم سنسیز.

#ووقار_بیله‌جری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

آپاردی بیر غریب خیال
یامان منی اوزاقلارا
یادیمدا ان شیرین قالان
او گونلره او چاغلارا

من اولماسام دا سنله‌دی
خیالیم هر قدم باشی
مزاریم اوسته گلمه‌دین
داریخدی سینه‌مین داشی
سنه اَمانت ائیله‌دیم
گؤزومدن هر دوشن یاشی
نوازیش ایله داوران او
یئتیم قالان اوشاقلارا

اسیر دام درد اولون
وفا یولوندا مرد اولون
سعادت آختارانلارین
بلا کسر ساغین-سولون
ایلاهی آیری سالماسین
سئونلرین عؤمور یولون
اوتورماسین کدر توزو
گولوش قونان دوداقلارا

غمین یانیمدا ساخلارام
بیر عؤمر یادیگار اولا
او سَندن ائعتیبارلی‌دیر
چتین بی‌ائعتیبار اولا
سَنه حئییف‌دی گؤز یاشیم
اَلیمده ایختییار اولا
سیخیب گؤزومده ساخلارام
داغیتمارام یاناقلارا

گول بئهیشته ناز ائدر
ساچیندان آلدیغیم عطیر
اوخونمامیش کیتاب کیمی
ماراقلیسان سطیر-سطیر
گولومسه روحومون گولو
گولوشلرینله یاز گتیر
گولوشلرین چیچکله‌سین
باهار گلنده باغلارا

#ووقار_بیله‌جری


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یاغدیردی سئوگیدن باشیما بیر دنیز یاغیش
بیر گول کی گؤزلریندن اؤپَر ایز به ایز یاغیش

کؤکسومده درد اودون گؤروبن باش آلیب گئده‌ر
اَیلَشسه منله بیر نئچه گون دیز به دیز یاغیش

آللاه بیلیر کی من ده دنیز طایفاسیندانام
فخر ائیله‌ییر گؤزومله اولوبدور ائکیز، یاغیش

دوستلار! یوبانمایین، سیزه داغلار دا باش اَیه‌ر
گؤز بایراغیندا سئوگی دئییب چکسه‌نیز یاغیش

نرگیز بَبَکلی بیر گولون عشقی‌ایله چاغلایین
کیم گؤزلرینده دایه گونش‌دیر، کنیز یاغیش

چوخ ساده‌دیر جاواب، سوروشولساز: یاغیش نه‌دیر؟
سیز کیمسینیز؟ دئیین کی یاغیش بیز و بیز یاغیش


#ایلقار_دوستی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

وَغَمله‌نیب باغیمیز، گولمه‌ییر چمنلیک‌لر
بنؤوشه بنده دوشوب، یاسدا سولدو شنلیک‌لر

داها گؤزه‌للیگین اؤلچوت داشی دئییل سئوگی
بورا بزه‌ک بازاری، گون- گون آرتیر اَنلیک‌لر

نیگارلی گون‌لرینه گئت گووه‌ن، کوراوغلو بابا!
داها نه سئوگی قالیبدیر نه ده اَرَنلیک‌لر

یئتَن یئییر بو یئتیم تورپاغین یئسیر پایینی
گؤزل گلیر جاناوار گؤیلونه بو چَنلیک‌لر

بیر آز دا هئی شیشیریک بیز، بیر آز دا هئی‌شیشیریک!
بیزی أَییب بو یالاندان دوزه‌لتمه منلیک‌لر

#ایلقار_دوستی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بورا قبریستان، اجل درنه‌یی‌دیر
هئچ یئره پیس دئمه، گل گؤر نه‌یی‌دیر!

یاخشی‌دیر سؤیله عدالت کندی!
هره‌نین اؤز بره‌سی، اؤز بندی!

هامی بیردیر، هره‌نین بیر دامی وار
داها من-سن سؤزو یوخدور، هامی وار

هره اؤز دردینه عالیم بوردا
داوا یوخدور، هامی سالیم بوردا

هره بیر گؤز دام آلیر، یات-یاتاسان
یات اوشاق! یات آناسان، یات آتاسان

آناسان، آنلایاسان آرزیلاری
داها آز دانلایاسان آرزیلاری

آتاسان دونیانی، آتماق یئری‌دیر
آیری بیر دونیا یاراتماق یئری‌دیر

بیر قورو آد یازیلیر باش‌داشینا
بو آدی آختارانین داش باشینا

بورا قبریستان، اجل درنه‌یی‌دیر
هئچ یئره پیس دئمه، گل گؤر نه‌یی‌دیر

کیمسه یوخدور، اؤزومم بیر ده اؤزوم!
کی قالیب سئوگیناز آردینجا گؤزوم!

#ایلقار_دوستی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سونرا،
گولوشون گلدی عاغلیما
و ایچیمدن دئدیم کی:
یئنه گلسن،
یئنه سئورم سنی...🖤

#جمال_ثریا

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اوزاقدان سئویرم سنی
قوخونو آلامادان
بوینونا ساریلامادان
اوزونه توخونامادان
ساده جه سئویرم

اؤیله اوزاقدان سئویرم سنی
الینی توتمادان
اوره یینه توخونمادان
گؤزلرینده دالیب_دالیب گئتمه دن
شو اوچ گونلوک سئودالارا عیناد
سرسریجه دئییل
آدام کیمی سئویرم...

اؤیله اوزاقدان سئویرم سنی
یاناقلارینا سیزان ایکی داملا یاشینی سیلمه دن
ان چیلقین قهقهه لرینه اورتاق اولمادان
ان سئودییین شارکینی برابر میریلدانمادان
اؤیله...

اؤیله اوزاقدان سئویرم سنی
قیرمادان
تؤکمه دن
پارچالامادان
اوزمه دن
آغلاتمادان

اوزاقدان سئویرم...

#جمال_ثریا

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سنه عایید اولان بوتون شئی‌لر عاقلیم دا
اونلارجا کیتاب
سنه عایید اولان شئی‌لر اوره‌ییم ده
یالنیز ایکی سؤز :

سئویرم سنی...!

#جمال_ثریا

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯