حکومت ائوینین قارشیسینداکی،
توتا سؤیکنمیشدی بیر علیل عسگر.
صدقه اومانا باخمیردی باکی،
سایمازجا کئچیردی یولدان اؤتنلر.

آخشامدان کوکره‌ییب اسن کولک‌ده،
چکمیشدی ایچینه دلی سسینی.
علیل، یانا-یانا قارغی توتَکده-
چالیردی قاراباغ شکسته‌سینی.

الیمی شست ایله جیبیمه سالدیم،
دیکسیندی بارماغیم، تیتره‌دی قولوم.
حیرصیمدن قورویوب یئریمده قالدیم،
اوستومده دئییلدی ائونه‌لیک پولوم.

آغزیمدا آلیشیب یاندی دیل-دوداق،
توت باخدی الیمین اوتانماغینا.
گؤیدن یارپاق آتدی، بیر ساری یارپاق-
بیزدن پای اومانین بوش پاپاغینا...

#شاهمار_اکبرزاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

هاوام گونشلی‌دیر هاوام بولوتلو    
دوداغیم شیکایت بوغازیم‌دا نئی
گؤزلریم آیدین‌دیر، گؤزلریم آغلار   
بیر اوزوم قوزئی‌دیر، بیر اؤزوم گونئی

خیال‌لار زَهَردیر، خیال‌لار شیرین            
بیلمیرم بو آخشام آغلاییم، گولوم
بیلمیرم بیر ایللیک کؤرپه طالعین       
آلنیندا نه یازدی، نه پؤزدو اؤلوم

بو آذر اوزون‌دور، بو آذر گوده             
گونوم بیر ساعاتدیر، بیر ایل‌دیر آییم
ائله دورومدایام یوزا بیلمیرم             
اووجومدا توی توتوم، یاس قوجاقلاییم 

پارکین قیراغیندا او پخله ساتان     
سسله‌ییر «سویوندان وئریم بیرینده»؟
او دئییر بیلمیرم موتلویام موتسوز    
دوغولدوم آذرین اییرمی بیرینده

بیر آذر آخشامی یالنیزلیق یاغیش    
خزل‌لر روحومو اوخشاییر خیش-خیش
بوداق‌لار اوستونده قارلار آلتیندا        
فیدان‌لار بویلانیر مین یاشیل باخیش...

#آیدین_باخیش

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یولا دوشدو بیر آرخدان،  بیر کیچیک قارا بالیق       
او آرخین درین‌لییی، اونا وئرمیردی قانیق

گئتدی چاتدی دنیزه، درینلیک سوراغیندا             
معللیمین سؤزلری، سیرقا تک قولاغیندا          

دایاز اولدو دنیزده، درینلییی گؤرمه‌دی                
بوز باغلادی دونیاسی، سرین‌لییی گؤرمه‌دی

دؤندو همن یوللاری، ایسته‌دی گؤیه اوچسون      
یانی نئجه اوچماغی، معللیم‌دن سوروشسون

قاییتدی شاهید اولدو، معللیمین یاسینا               
ائله بیل گمی دیدی، ساحیلین قایاسینا

بو نئجه ایشدیر تانری، دور یوخودان آییل‌دی          
سن یاتیبسان دونیادا، آرازدا عزراییل‌دی

ایندی قوجالیب بالیق، قالیب کیچیک بیر آرخدا    
او اوچماق هوسینده، او صمد آختارماقدا

#آیدین_باخیش

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ائله طوفانلی باخیرسان سینیرام بوز داغی تک
سپیلیرسن یارامین آغریسینا دوز داغی تک

دلی تک بختیمی گاه آغلاییرام گاه گولورم
داغیلاندا گؤزومه هر گئجه اولدوز داغی تک

یایلوغوندان یازین عطری جالاناندا نفسه
جانیم اووجومدا اسیر دالغالی یارپیز داغی تک

منی باش سیز دولانان داغدا کولک دن خبر آل
حیرتیمدن کول اولوب سوورولورام کؤز داغی تک

پولاد اولسایدی دؤزوم سنده اریردی سو کیمین
ائل گؤزوندن اوتانان بیر گلینین اوز داغی تک

آلیر آرام و قراری بو گؤزللیک گؤزه سی
یول سالاندا اوره یه سئوگی لی نرگیز داغی تک

اونودولماز یارالاردیر بورونوب ماهی لارا
سیملره اود قالاییر یار یاراسی ایز داغی تک

#علی_لطفی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اولدوز اولدوز سوزه‌رم یوللارا سنسیزلیییمی
آسیرام هی بوغازیمدان دارا سنسیزلیییمی

گؤزو دار پنجره لردن یولونو گؤزله ییرم
باغلاییب هر گئجه گوندوز تارا سنسیزلیییمی

کاش بلا تیرینه سانجاندا سینیق قلبیمی سن
قارا تئللرلن ائدیدین چارا سنسیزلیییمی

خیالیمدان، اوره ییمدن، نفسیمدن، قوپاریب
بیلمیرم من آپاریم هئچ هارا سنسیزلیییمی

سازاغین قمچی سینه قیشدا دؤزن بیر آغاجام
سیزلارام گاه سازاغا گاه قارا سنسیزلیییمی

حسرتین دالغاسی دولدوقجا بوشالدیقجا گؤزه
سؤیله رم منده سینان ایلقارا سنسیزلیییمی

بیلمیرم آتدی همایون جانینی کیم بو اودا
یانماغیمدا چارا ائتمیر یارا سنسیزلیییمی

#علی_لطفی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

چؤرک اییی وئریر قابار ال‌لری
قار اوخشاییر آددیم_آددیم توکونو
هاردان گوج آلیب‌دیر بو آریق کیشی
حسرتله داشی‌ییر یاشام یوکونو

آلنین‌دا باغیریر نیسگیل قیریشی
اونا قان اوددورور ایشین یییه‌سی
گونش قاباغیندا آخان قان تری
اولا بیلمه‌یه‌جک دردین دییه‌سی

الینده هئچ نه یوخ ائوینه دؤنه
آرزی‌سی گؤزونده اود توتوب یانیر
یاواشجا آددیمین ایره‌لی آتیر
کؤهنه باشماغیندان کوچه اوتانیر

سنه فصیل_فصیل گووه‌نیرم من
سنله آیدین اولار هر یانیم اؤنوم
اپریمیش الینی مین یول اؤپرم
دئیرم آی آتا باشینا دؤنوم

#وولکان
#علی_زنگانلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

قویون گئدیم، توتمایین قولومدان
سارسیلمیش بیر اورک قالیب سینه‌مده
ایسلاق گؤزلریم گونلری سایماقدا
آنلاییب قوزغون، اوتوروب چینه‌مده

#وولکان
#علی_زنگانلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سئومه‌دیم دونیادا قیزیل-گوموشو؛
دئدیم‌کی ووقاریم اعتیباریم‌دیر.
گؤز‌ل سئوگیلیمین شیرین گولوشو،
منیم دؤولتیم‌دیر، منیم واریم‌دیر.

سئومه‌دیم دونیادا شانی-شؤهرتی
اونلاری حیاتدا افسانه ساندیم
باخ...! همن دئدیییم واری-دؤولتی،
اؤز اورک قانیملا، اؤزوم قازاندیم.

آختاریب گزه‌رم کؤنول یاریمی
گزه‌رم عؤمرومون باهاری کیمی
ایسته‌سه سئوگیلیم، گؤز یاشلاریمی،
دوزه‌رم بوینونا میرواری کیمی.

نادان قولاق آسسین قوی یاخشی-یاخشی
سئوگی سئوینجیم‌دیر، سئوگی غمیم‌دیر
بیر آلا گؤزلونون اودلو باخیشی،
منیم جنّتیم‌دیر، جهنّمیم‌دیر

«نبی‌»یم، بیر داغام، باشی قارلی‌یام
دئمه: ذیروه‌مده‌کی او دومان نه‌دیر
بوتون وارلی‌لاردان داها وارلی‌یام
دؤولتیم محبّت، واریم سئوگی‌دیر...

#نبی_خزری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

دنیز اولماق ایسته‌ییرم، آی آنا!
اؤز سینه‌می گؤیلر اوچون آچارام
-یوخ، آی بالا آنان قوربان بویونا!
دنیز اولسان نئجه سنی قوجارام؟

-زیروه اولماق ایسته‌ییرم آی آنا!
اوجالاردا هر آن سنی آرارام.
-یوخ آی بالا آنان قوربان بویونا!
نئجه اوندا ساچ‌لارینی دارارام؟

-نغمه اولماق ایسته‌ییرم آی آنا!
من سسله‌نیم باتما درده غمه سن.
-اول آی بالا آنان قوربان بویونا!
سن اونسوزدا منه سونسوز نغمه سن.

-گونش اولماق ایسته‌ییرم آی آنا!
ایشیق آلسین مندن توپراق، آسیمان
-یوخ آی بالا آنان قوربان بویونا!
گونش اولسان سن اوزون ده یانارسان.

-بولاق اولماق ایسته‌ییرم آی آنا!
داغدان آخیم باغچایا من، باغا من.
-ائه آی بالا آنان قوربان بویونا!
اوزون داغسان، سیغارسانمی داغا سن؟!

#نبی_خزری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

Necəsən...🖤

#راسیم_کریملی
https://www.instagram.com/reel/DJml1abtSSw/?igsh=ejFxcjZ0cXprdGsz

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سندن باشقا هئچ کس گلمز عئینیمه،
ابدی‌لیک حک اولوبسان بئینیمه،
کؤوره‌لیبسن ،باشینی قوی چیینیمه،
دسمال وئریم، دویا-دویا آغلایاق.
                                             
هر نفسده منیمله‌دیر خیالین،
بیرآن گئتمز گؤز اؤنوندن، جمالین،
شیرین‌لیین دادمامیشیق ووصالین،
حسرتلری سایا-سایا آغلایاق،
دسمال وئریم، دویا دویا آغلایاق.
                                              
هرتئلیندن نیسگیل یاغان بو سازدان،
گؤز یاشیمیز سئل اولاجاق بیرآزدان،
گوله - گوله کئچمه‌میشیک آرازدان،
گل اوز توتاق بیز اوتایا آغلایاق،
دسمال وئریم، دویا دویا آغلایاق.
                                        
سایماغینان ، دئمه‌یینن توکنمز،
ویران قلبی،هیچ بیر کیمسه تیکنمز،
داغ دا، داش دا بو حسرتی چکنمز،
دردیمیزی دئیه‌ک سویا آغلایاق،
دستمال وئریم، دویا دویا آغلایاق.

#علی_اویاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

خیالیمدا بیر قوش اولوب ، سنه طرف گله‌جه‌یم

الیمده کی چیچک‌لری ، گولوم سنه وئره‌جه‌یم

بوگون سنین دوغوم گونون ، بئلنچی بیر شیرین‌گونو

بوتون ووجودوملا گؤزل ، سنه تبریک دئییه‌جه‌یم

دوغوم گونون قوتلو اولسون جان دوستوم💙💙
اوره‌یین همیشه سئوینج‌له دولو اولسون، دونیانین تامام گؤزللیک‌لری بوتون سنین اوچون اولسون قارداشیم💙
اؤپورم سنی❤️ @Bitigme1993

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

آغاج دا گول آچیر شاختالی قیش‌دا،
چیچک‌ده گؤیریر قایادا،داش‌دا،
قیرخی دا کئچیرم،هله بو یاش‌دا،
سنین اوره‌یینه یول تاپانمیرام.

گونشین ساپ ساری ساچین دا هؤرسه‌م،
گؤی‌دن قوجاق-قوجاق اولدوز دا درسه‌م،
چؤللره دوشسه‌م ده، داغی دا یارسام،
سنین اوریینه یول تاپانمیرام.

من یازیق،نه قدرحسرتین چکیم،
نه قدر گؤزومو یولونا تیکیم،
باشیما هارانین کولونو تؤکوم،
سنین اوریینه یول تاپانمیرام.

گئجه‌لری اویاق قالسام،یاخشیدی،
یا دا قاپینیزا گلسم یاخشیدی،
واللاه بئله گئتسه،اؤلسم یاخشیدی،
سنین اوریینه یول تاپانمیرام.

#علی_اویاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سن یئنه قاییتسان، یئنه سئوه‌رم
باشقاسین سئومه‌یه هوَسیم چاتمیر
مَن سَنده سئوگینی هاوا بیلمیشم
سن چیخیب گئدندن نَفَسیم چاتمیر...

#اورخان

https://www.instagram.com/reel/DJpUBIbtdmI/?igsh=MWplZGZ5NDk2Y2ZmbQ==

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بو آخشام یئنه ده اوزون گئجه دیر
قارانلیق قلبیمی اوزمه یه گلیر
بیر منم بیر اتاق بیر یانان چیراق
غصه لر سئوگیمی درمه یه گلیر

بیر خیشاب سیقاریم بیر لیوان چاییم
بیر جوت یولداشیم وار تک دئییلم من
کیم دئییر یالنیزام دوشونمور هله
مین خیال بئینیمده گزمه یه گلیر

خودکاریم الیمده یازیر دورولور
گوشیمین شارقیسی من سیز بوغولور
اوخویان ائله بیل اؤزو یورولور
غملرین منیمله بؤلمه یه گلیر

بو آخشام بیر منم بیر دلی اورک
ائویمین قارشیندان ماشینلار کئچیر
ساحات_تک دولانیب هارا گئدیللر
حایاتیم بو گئجه قاچماغا گلیر

#اکبر_عبادی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

رئال دوشونجه‌م اؤلوب، سوررئالدایام سنسیز
آپاردین عاغلیمی، تام اختلالدایام سنسیز

اوشاقلغیندا بازاردا آنان سنی ایتیریب؟؟
نه اضطرابلی اولور؟ دوز او حالدایام سنسیز

دالینجا جهل آجیسی قهوه‌مه دامان گۆندن
دوعاچی‌لار قاپیسین‌ دا زاوالدایام سنسیز

ایچیمده شعر، تلقین و سیگار اعتلافیندان
دوغولدو بیر مازوخیسم، انحلالدایام سنسیز

هر  آخشام، آرزیلاریم  قوردوغو تحصّن‌ده
منم کی دانلاق اوچون کارناوالدایام سنسیز

گؤزۆم، سن آیریلانی، آیری گؤزده شهره باخیر
آدام- آدام سوروشولماز  سوالدایام سنسیز

جیزیق چکیب، یاریشیر گؤزلرین داریخمام‌لا
عؤمورلوک ائو داغیدان فئستیوالدایام سنسیز

جیزیق دئدیم، بیر اویون وار، آدی قاییش قاپدی
سوروش دئیرلر، اوجور چال ها چالدایام سنسیز

اؤزونده، قارشی نئچه انقلابلی  ارگین‌ دن
شاه‌ 'ین  قاچان چاغییام، قالما- قالدایام سنسیز

#مهدی_حامد_سلطانی_ارگین

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

هله‌ ده چوخ قولاغین گونده اولور مشغله‌سی
بوردا مشروطه گؤرن قارقالارین هلهله‌سی

هله «نارین‌قالا»نین سویقیریمیندان بویانا
گلمه‌ییب اؤز یئرینه بیر سؤیودون حوصله‌سی

سؤن گئدیشده باباخان گؤزلرینین شاهدی‌دیر
«شاه باغلی‌»یلا «پیله‌سئیران» یولونون فاصله‌سی

هله‌ ده شعرین آتیر چای‌لارا «بیضا» باش آچیر
عارفی کفر آدینا سورگون ائدن مسئله‌سی

قیرخ اوچ ایلدن سورا دا آل- وئری واردیر، ساتیلیر
انقلابدا یازیلان گونده‌لییین باطله‌سی

هله مجنون‌لا یاریشماقدا قوجالدیقجا بوکور
«سورو»نون بوردا بئلین بیر آغیر عشقین  شله‌سی

چالدیران ایندی ده «شئهگاه» کوچه‌سیندن جان آلیر
اسماعیل شاهدان اوزاقلاشدیغیجاق عائله‌سی

انتحار فیکری قیزیل‌باشلارا سون وسوسه‌دیر
تؤره‌نیر کولگه‌ده دای شیخ صفی‌نین سلسله‌سی

یئدی گؤز کؤرپوسو قاجار دؤنمیندن یول آچیر
داشقا- داشقا داشییا نعش، وبا قافله‌سی

هله‌ ده آلتی بؤلور بوردا ایکی قارداش اؤزون
حیدری نعمتی‌نین بیتمه‌یه‌جک فئیصله‌سی

دار- دودوک بورما- بوروق تنگه‌لرینده «ارگین»
سیلینیب اردبیلین بلکه‌ ده چوخ- چوخ هله‌سی

یئددی شاه، یئددی پیرین فلسفه‌سی قوی قالسین
سینسیدیب نسلیمیزی کئچمیش‌ین هر مرحله‌سی

#مهدی_حامد_سلطانی_ارگین

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

تانیش گلیرسن منه
سانکی بکله‌دییمسن
سینیق گؤیول یوکلوسو...
سن کیمیم‌سن،نه‌ییمسن؟

گؤزون دالغالی دنیز
باخیشلارین اؤزله‌میم
یارا یئریشلرینده...
سینیر، سینسیمیش گَمیم

هانسی اودون آلووو،
هانسی کؤزون کولوسن؟
منیم تک آغلاییرسان،
ایچدن، اوزده گولورسن!

هاردا گؤرموشم، سنی
یادیما گلمیر، آنجاق
کؤنلون-کؤنلومه تای‌دیر
بوراخیلمیش اویونجاق...!

#مهدی_سربازی_علمداری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

مین اومود باغچاسینین پرپر اولان آل گولویم
سئوگی‌لر- سئودالیلار الده گزن، لال گولویم

منی یالقیزجا بیتن یاسلی‌جا کولدان خبر آل...
آریلار چانتاسینا بورگه‌له‌نن بال گولویم...

بیر عؤمور جانلا دوشندیم دان آیاق آلتلارینا
ساچا قیسمت دییلم قولداکی قاندال گولویم

کئفله‌نر هر لچه‌ییمدن یئره دوشدوک‌جه چمن
دول دوداقلاردا بیتن اود کیمی تونقال گولویم

گونشین خسته‌سی‌یم باسدیریب اوس کؤلگه منی
علاجیم سنده بولود یاغ! ایشیغین دال گولویم

ال- اله صف چکیلیب داغدان اوجالمیش داغیمیز
قافقازین پارچاسی‌یام ، کئفلیجه کامتال گولویم...

قارا داغدان جانا تک وصلی دوزولموش دامارام
دلی جئیران گؤزو اوستونده‌کی خال-خال گولویم

دولوخان هر بولوتون اؤپموشم حسرت گؤزونو
گؤزو یوللاردا قالان بویلولارین شال گولویم

آی‌ین اولدوزلارین آلدیم قاداسین یئتمه‌دی کی...
داشین اوستونده اوزولموش اومودون سال گولویم

#مهدی_سربازی_علمداری


╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیر قریب تانیشین سسینی دویدوم
چاغیردی گئجه‌نین گیزلی قاتیندا
هویوخدوم چکیندیم سوسدوم او یئنه
سس‌لندی بئینیمین یارا چاتیندا

دیلیم توتولاراق کیمسن سویله‌دیم
سویله‌دی بئینینده سیزلایان یارا
دئدیم آی اوتانماز ایتیل گؤزومدن
سن هارا بئینیمده  سیزلایان هارا

دئدی حقیقتی دانماق اولارمی؟
من ایللر بویودور سنده یاتانام!
گئجه گؤندوزونو الیندن آلان؛
هم جانینا درمان هم ساراطانام!

گؤزلریم دولارکن بَری گل دئدیم
ای اولان خاطیرین خیدده‌گیمده ایپ
سوردو نه‌قدر من عزیزمی‌یم اوی!!؟
دئدیم حسرت‌لرین ویصال گؤیله‌ییب

یاخینلاشدی آستا آچدیم باغریمی
دئدیم گل سینه‌مه داغ‌لار لالاسی
سورما بونه گوندور بونه دیری‌لیک
سورما نئجه اوچدو ووقار قالاسی

سورما نئجه سولدوم نئجه سارالدیم
سورما ندن گؤره بیلمیرم داها
سورما کیم آپاردی یوسیف‌لیگیمی
سورما نه‌دییه‌جم جاواب آللاها


#مهدی_سربازی_علمداری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یاناغین آلما بویاق شاختا قیزاردان جیران
سنی یول‌لار داریخار قارلی گوذاردان جیران

الینه آی سو تؤکن آن هوپار حسرت‌‌لریمه
و شافاق گؤیلره چیخماق‌دا پوزار دان جیران

گئجه‌نین قورشاغی‌نا قاپ-قارا بنزر ساچی‌نا
اولدوز آختاررام اؤزوم گون‌لو بازاردان جیران

سن کی گئتدین«او قیزین گؤیلونو گئد آل»دئمه‌یه
یوخوما قالخیب آنام گلدی،مازاردان جیران

آیریلیق خسته‌سی یم آه  آغی ، قان باغریم‌دا
گل ها گل ، گل منی قورتار بو آزاردان جیران !

#صابیر_باقیرزاده‌

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯