یوخلوغون اوشوتمه سالیب جانیما
ایسینمیر اوره‌ییم تیر-تیر تیتره‌ییر
قندیل‌لر ساللانیب دویقولاریمدان
گئت-گئده سؤزلریم دنگه‌سیزله‌ییر

گئچمیشلر صایفاسین واراق‌لادیق‌جا
طیلیسیم لنیرم غم قوخوسونا
ایستک‌سیز بیر یوخو دولور گؤزومه
ائله‌بیل گئدیرم قیش یوخوسونا

بیر باخیش تیکیلیب کیرپیک‌لریمه
سیم سیجاق ایکی ال ساچیمدا گزیر
گؤزلریم اینانمیر گؤردوکلرینه
جانیمی بو آنا دئمیشدیم نذیر

دیلیمین گوجو یوخ بیر کلمه دئسین
دییه‌سن طیلیسیم اؤز ایشین گؤروب
ایختیارسیزلادیم گؤزومو آچ‌جاق
گؤزلرین سئحیرین اوستومه هؤروب

بیلمیرم رویادیر گرچک‌دیر ندیر
هرنه‌سه نفسی بوغازدا بوغور
اوستومدن تونلارجا آغیرلیق دوشور
هر آندا ایچیمده مین اومود دوغور

اؤزومه سیللی‌لر وورارام دییه
گوجومو ییغمیشام بیلک‌لریمه
گرچک‌سه گؤردویوم یوخو دئیل‌سه
اوندادیر چاتیرام دیلک‌لریمه

بیرآندا دونیالار چؤکور باشیما
قاپاز تک ماسایا دیدییم اوآن
یئنیلدیم یئنه‌ده خیال‌لاریما
آخی کیم دئیردی یوخودان اویان

یئنه‌ده اوشومک یئنه سنسیزلیک
یئنه‌ده گؤزلریم دؤشنیب یولا
ندن‌سه هئچ نه‌یه گلمیر گومانیم
یالنیزجا بیر خیشاب تیرامادولا

#فرزین_نقی‌یان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یوخلوغون گئجه‌مه داراشان گوندن
اوتورور جانیما بو سویوق تب‌لر
گومانیم هئچ نه‌یه گلمیرسه ناچار
تسکین‌لیک وئریرلر یوخلادان حب‌لر

کؤنلومون زیروه سین دومان قار آلیر
اوره‌ییم هئی گئدیر قیش یوخوسانا
سنسیزلیک باشیمدا لای-لای دئینده
بویانیر دوشلریم غم قوخوسونا

اومودوم ایچیمده یاری جان اولور
کئییمیش طالعیم یوخلویان زامان
یاسدیغیم داریخیر یوخوم ایسلانیر
یوخلوغون یوخومو یوخلایان زامان

ساچلارین قاپ قارا گؤی قورشاغی تک
اوزانیر رویامدان کابوس لاریما
اوخشاماق ایسترکن دیسکینیرم هئی
یوخودا گؤروشمک گلمیر کاریما

وارلیغین خیالدیر یوخلوغون گرچک
خلسه‌ده اؤتوشور گئجه گوندوزوم
دولاشیق دوشوبدور یوخوم گئرچه‌ییم
بیلمیرم هانکیسین هارایا دوزوم


#فرزین_نقی‌یان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

منیم سندن اوزاقلاردا ،
یاماندی حالیم، نئجه سن؟!
اؤزگه سینه قیسمت اولان_
جاه و جلالیم نئجه سن؟!

یالانا دوندو گئرچه ییم
آی گؤزلیم_آی گؤيچه ییم
چمنیم، چؤلوم، چیچه ییم_
پته ییم_بالیم نئجه سن؟!

داشام یولون اوسته بیتن
نه سیرردی !  آنلاماز یئتن
گؤزو _کؤنلو ، دیل_دیل اؤتن
دیل لری لالیم نئجه سن ؟!

زر _زیبام، لعلیم_گؤوهریم
یاقوت_یمن، سیم و زریم
بارماقلاری بخته وریم _
باشی بلالیم نئجه سن ؟!

اوزون دؤنمز منه ساری
یاری ، اؤز بختین دن یاری
"ابراهیمین"  سیتم کاری
نئجه سن ظالیم نئجه سن؟!

#ابراهیم_ایلیاسلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

او سئودالی چاغلار یادیندادیمی؟!
بیر من ایگیدیدیم، بیرده سن گؤزل.
دونیادا منه تای دلی یوخویدو،
یوخویدو دونیادا سنه تن گؤزل!.

به هئچ دئمیرسن می هاردادی گؤرن؟!
ایپک تئللرینه نرگیزلر هؤرن،
سن ایدین  اونلارا یاراشیق وئرن،
نه چیچک گؤزلدی _ نه چمن گؤزل!

سئوگی بیر یول گلر آداما حاخدان،
سنین دیوانه نم ائله او واخدان،
گؤزومه آغ گلیب یولا باخماقدان
قلبه خال دوشوبدو، ساچا دن گؤزل.

من عؤمور سورمه دیم، واخدی اوزاتدیم
ائله سنسیزلیگ نن باشیمی قاتدیم،
گؤینییه - گؤینییه  اَللی یه  چاتدیم،
گوله - گوله اُؤللم، اؤل دئسن گؤزل.

گؤر من نه سایمیشام فلک نه ساییب،
دؤنوب سنه باخماق بس آیلار عاییب
آرادان قیرخ ایگید عؤمور آدداییب،
من همان دلی یم ، سن همن گؤزل.

#ابراهیم_ایلیاسلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سن گؤزل اولمایا بیلمزسن خانیم،
سؤزلرین دن چمن ، چؤل عطری گلیر!
بیرجه یول تئل ووروب سسینی دویدوم
بیر ایلدی اووجومدان گول عطری گلیر!

او منم آدینا  دوشکون _ هاوالی،
قییقاجی باخیشین دیندیرر  لالی،
سنین حسرتینه اورجاح  اولالی_
گؤزلریم دن مارال _ گول  عطری گلیر!

خیالیمدا أسمر بنیزین دورور،
اونوتمام چالینا ایسرافیل سورو،
بو قارا سئودادان گؤزومون نورو،
"ابراهیم" قوخویان کول عطری گلیر!

#ابراهیم_ایلیاسلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سنه چاتاسی‌دیر اولان-اولمازیم،
آتادان نه قالسا، سون‌بئشیگین‌دیر.
بختینه آغ گونو نه تهر یازیم؟
اؤزوم ده بیلمیرم نئیله‌ییم ایندی‌.
قیسمت میراث قالمیر آتادان، اوغلوم!
قیسمتدن پای اولماز، قوربانین اولوم!

هر شئیی پای وئرمک مومکون‌مو بیَم؟
حئییف ان قیمتلی وار-دؤولتیمی-
گؤیلری دیندیرن محبّتیمی-
سنه باغیشلایا بیلمه‌یه‌جه‌یم.
سئوگی میراث قالمیر آتادان، اوغلوم!
اولفَتدن پای اولماز، قوربانین اولوم!

حئیرتسیز یاشاماق، یاشاماق دئییل.
حئیرت ائت، یوردونو تن بؤلن چایا!
قوینوندا گزدیگین تورپاغی بوت بیل!
«حئیرت، ائی بوت!» دئییب بابان دونیایا.
سنه قالمایاجاق حئیرتیم، اوغلوم!
حئیرتدن پای اولماز، قوربانین اولوم!

داشین، کسه‌یین ده باشینا هرلَن!
کسک ده وطن‌دیر، داش دا وطن‌دیر.
دونیادان عؤمورلوک آیریلاندا من،
گؤزومدن سوزولن یاش دا وطن‌دیر.
بونو حسرتلی‌لر آنلایار، اوغلوم!
حسرتدن پای اولماز، قوربانین اولوم!

یوردونون شرَفی، شانی آتش‌دیر.
بو یورد امانتی، اود امانتی،
باشینین اوستونده یانان گونش‌دیر،
«نسیمی» دؤزومو، «بابک» جورأتی.
جورأت دامارلاردا یارانار، اوغلوم!
جورأتدن پای اولماز، قوربانین اولوم!

سنه قالاسی‌دیر آنامیز وطن،
وطن ناموسونا اولو چلنگ‌دیر.
اونون شرفینی قورویا بیلن،
پاپاق گزدیرن یوخ، غئیرت گرک‌دیر.
غئیرت باغیشلانمیر وار کیمی، اوغلوم!
غئیرتدن پای اولماز، قوربانین اولوم!

#شاهمار_اکبرزاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیر گون قاباغیمی کسه‌جک اؤلوم
ذره‌جه عینیمه گلمیر اؤلمه‌ییم
ائله اوتانیرام گله‌سن گولوم
سنین آیاغینا دورا بیلمه‌یم

نامرددیر اؤلومدن اوشه‌نیب قورخان
بیر شربت نه دیر کی ایچه بیلمه‌یم؟
ائله اوتانیرام عادی یاغیشدان
سنین گؤز یاشینی سئچه بیلمه‌یم

ائله اوتانیرام گلیب -گئده‌سن
سنین گلیشینی دویا بیلمه‌یم
اوستومه سپدیگین چیچکلری من
گؤزومون اوستونه قویا بیلمه‌یم

ائله اوتانیرام اوتانیرام من
آییلام کؤنلونو آلا بیلمه‌یم
دردیم تزه‌لنه خجالتیمدن
اؤلمک ایسته‌یم من، اؤله بیلمه‌یم...

#شاهمار_اکبرزاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

حکومت ائوینین قارشیسینداکی،
توتا سؤیکنمیشدی بیر علیل عسگر.
صدقه اومانا باخمیردی باکی،
سایمازجا کئچیردی یولدان اؤتنلر.

آخشامدان کوکره‌ییب اسن کولک‌ده،
چکمیشدی ایچینه دلی سسینی.
علیل، یانا-یانا قارغی توتَکده-
چالیردی قاراباغ شکسته‌سینی.

الیمی شست ایله جیبیمه سالدیم،
دیکسیندی بارماغیم، تیتره‌دی قولوم.
حیرصیمدن قورویوب یئریمده قالدیم،
اوستومده دئییلدی ائونه‌لیک پولوم.

آغزیمدا آلیشیب یاندی دیل-دوداق،
توت باخدی الیمین اوتانماغینا.
گؤیدن یارپاق آتدی، بیر ساری یارپاق-
بیزدن پای اومانین بوش پاپاغینا...

#شاهمار_اکبرزاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

هاوام گونشلی‌دیر هاوام بولوتلو    
دوداغیم شیکایت بوغازیم‌دا نئی
گؤزلریم آیدین‌دیر، گؤزلریم آغلار   
بیر اوزوم قوزئی‌دیر، بیر اؤزوم گونئی

خیال‌لار زَهَردیر، خیال‌لار شیرین            
بیلمیرم بو آخشام آغلاییم، گولوم
بیلمیرم بیر ایللیک کؤرپه طالعین       
آلنیندا نه یازدی، نه پؤزدو اؤلوم

بو آذر اوزون‌دور، بو آذر گوده             
گونوم بیر ساعاتدیر، بیر ایل‌دیر آییم
ائله دورومدایام یوزا بیلمیرم             
اووجومدا توی توتوم، یاس قوجاقلاییم 

پارکین قیراغیندا او پخله ساتان     
سسله‌ییر «سویوندان وئریم بیرینده»؟
او دئییر بیلمیرم موتلویام موتسوز    
دوغولدوم آذرین اییرمی بیرینده

بیر آذر آخشامی یالنیزلیق یاغیش    
خزل‌لر روحومو اوخشاییر خیش-خیش
بوداق‌لار اوستونده قارلار آلتیندا        
فیدان‌لار بویلانیر مین یاشیل باخیش...

#آیدین_باخیش

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یولا دوشدو بیر آرخدان،  بیر کیچیک قارا بالیق       
او آرخین درین‌لییی، اونا وئرمیردی قانیق

گئتدی چاتدی دنیزه، درینلیک سوراغیندا             
معللیمین سؤزلری، سیرقا تک قولاغیندا          

دایاز اولدو دنیزده، درینلییی گؤرمه‌دی                
بوز باغلادی دونیاسی، سرین‌لییی گؤرمه‌دی

دؤندو همن یوللاری، ایسته‌دی گؤیه اوچسون      
یانی نئجه اوچماغی، معللیم‌دن سوروشسون

قاییتدی شاهید اولدو، معللیمین یاسینا               
ائله بیل گمی دیدی، ساحیلین قایاسینا

بو نئجه ایشدیر تانری، دور یوخودان آییل‌دی          
سن یاتیبسان دونیادا، آرازدا عزراییل‌دی

ایندی قوجالیب بالیق، قالیب کیچیک بیر آرخدا    
او اوچماق هوسینده، او صمد آختارماقدا

#آیدین_باخیش

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ائله طوفانلی باخیرسان سینیرام بوز داغی تک
سپیلیرسن یارامین آغریسینا دوز داغی تک

دلی تک بختیمی گاه آغلاییرام گاه گولورم
داغیلاندا گؤزومه هر گئجه اولدوز داغی تک

یایلوغوندان یازین عطری جالاناندا نفسه
جانیم اووجومدا اسیر دالغالی یارپیز داغی تک

منی باش سیز دولانان داغدا کولک دن خبر آل
حیرتیمدن کول اولوب سوورولورام کؤز داغی تک

پولاد اولسایدی دؤزوم سنده اریردی سو کیمین
ائل گؤزوندن اوتانان بیر گلینین اوز داغی تک

آلیر آرام و قراری بو گؤزللیک گؤزه سی
یول سالاندا اوره یه سئوگی لی نرگیز داغی تک

اونودولماز یارالاردیر بورونوب ماهی لارا
سیملره اود قالاییر یار یاراسی ایز داغی تک

#علی_لطفی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اولدوز اولدوز سوزه‌رم یوللارا سنسیزلیییمی
آسیرام هی بوغازیمدان دارا سنسیزلیییمی

گؤزو دار پنجره لردن یولونو گؤزله ییرم
باغلاییب هر گئجه گوندوز تارا سنسیزلیییمی

کاش بلا تیرینه سانجاندا سینیق قلبیمی سن
قارا تئللرلن ائدیدین چارا سنسیزلیییمی

خیالیمدان، اوره ییمدن، نفسیمدن، قوپاریب
بیلمیرم من آپاریم هئچ هارا سنسیزلیییمی

سازاغین قمچی سینه قیشدا دؤزن بیر آغاجام
سیزلارام گاه سازاغا گاه قارا سنسیزلیییمی

حسرتین دالغاسی دولدوقجا بوشالدیقجا گؤزه
سؤیله رم منده سینان ایلقارا سنسیزلیییمی

بیلمیرم آتدی همایون جانینی کیم بو اودا
یانماغیمدا چارا ائتمیر یارا سنسیزلیییمی

#علی_لطفی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

چؤرک اییی وئریر قابار ال‌لری
قار اوخشاییر آددیم_آددیم توکونو
هاردان گوج آلیب‌دیر بو آریق کیشی
حسرتله داشی‌ییر یاشام یوکونو

آلنین‌دا باغیریر نیسگیل قیریشی
اونا قان اوددورور ایشین یییه‌سی
گونش قاباغیندا آخان قان تری
اولا بیلمه‌یه‌جک دردین دییه‌سی

الینده هئچ نه یوخ ائوینه دؤنه
آرزی‌سی گؤزونده اود توتوب یانیر
یاواشجا آددیمین ایره‌لی آتیر
کؤهنه باشماغیندان کوچه اوتانیر

سنه فصیل_فصیل گووه‌نیرم من
سنله آیدین اولار هر یانیم اؤنوم
اپریمیش الینی مین یول اؤپرم
دئیرم آی آتا باشینا دؤنوم

#وولکان
#علی_زنگانلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

قویون گئدیم، توتمایین قولومدان
سارسیلمیش بیر اورک قالیب سینه‌مده
ایسلاق گؤزلریم گونلری سایماقدا
آنلاییب قوزغون، اوتوروب چینه‌مده

#وولکان
#علی_زنگانلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سئومه‌دیم دونیادا قیزیل-گوموشو؛
دئدیم‌کی ووقاریم اعتیباریم‌دیر.
گؤز‌ل سئوگیلیمین شیرین گولوشو،
منیم دؤولتیم‌دیر، منیم واریم‌دیر.

سئومه‌دیم دونیادا شانی-شؤهرتی
اونلاری حیاتدا افسانه ساندیم
باخ...! همن دئدیییم واری-دؤولتی،
اؤز اورک قانیملا، اؤزوم قازاندیم.

آختاریب گزه‌رم کؤنول یاریمی
گزه‌رم عؤمرومون باهاری کیمی
ایسته‌سه سئوگیلیم، گؤز یاشلاریمی،
دوزه‌رم بوینونا میرواری کیمی.

نادان قولاق آسسین قوی یاخشی-یاخشی
سئوگی سئوینجیم‌دیر، سئوگی غمیم‌دیر
بیر آلا گؤزلونون اودلو باخیشی،
منیم جنّتیم‌دیر، جهنّمیم‌دیر

«نبی‌»یم، بیر داغام، باشی قارلی‌یام
دئمه: ذیروه‌مده‌کی او دومان نه‌دیر
بوتون وارلی‌لاردان داها وارلی‌یام
دؤولتیم محبّت، واریم سئوگی‌دیر...

#نبی_خزری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

دنیز اولماق ایسته‌ییرم، آی آنا!
اؤز سینه‌می گؤیلر اوچون آچارام
-یوخ، آی بالا آنان قوربان بویونا!
دنیز اولسان نئجه سنی قوجارام؟

-زیروه اولماق ایسته‌ییرم آی آنا!
اوجالاردا هر آن سنی آرارام.
-یوخ آی بالا آنان قوربان بویونا!
نئجه اوندا ساچ‌لارینی دارارام؟

-نغمه اولماق ایسته‌ییرم آی آنا!
من سسله‌نیم باتما درده غمه سن.
-اول آی بالا آنان قوربان بویونا!
سن اونسوزدا منه سونسوز نغمه سن.

-گونش اولماق ایسته‌ییرم آی آنا!
ایشیق آلسین مندن توپراق، آسیمان
-یوخ آی بالا آنان قوربان بویونا!
گونش اولسان سن اوزون ده یانارسان.

-بولاق اولماق ایسته‌ییرم آی آنا!
داغدان آخیم باغچایا من، باغا من.
-ائه آی بالا آنان قوربان بویونا!
اوزون داغسان، سیغارسانمی داغا سن؟!

#نبی_خزری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

Necəsən...🖤

#راسیم_کریملی
https://www.instagram.com/reel/DJml1abtSSw/?igsh=ejFxcjZ0cXprdGsz

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سندن باشقا هئچ کس گلمز عئینیمه،
ابدی‌لیک حک اولوبسان بئینیمه،
کؤوره‌لیبسن ،باشینی قوی چیینیمه،
دسمال وئریم، دویا-دویا آغلایاق.
                                             
هر نفسده منیمله‌دیر خیالین،
بیرآن گئتمز گؤز اؤنوندن، جمالین،
شیرین‌لیین دادمامیشیق ووصالین،
حسرتلری سایا-سایا آغلایاق،
دسمال وئریم، دویا دویا آغلایاق.
                                              
هرتئلیندن نیسگیل یاغان بو سازدان،
گؤز یاشیمیز سئل اولاجاق بیرآزدان،
گوله - گوله کئچمه‌میشیک آرازدان،
گل اوز توتاق بیز اوتایا آغلایاق،
دسمال وئریم، دویا دویا آغلایاق.
                                        
سایماغینان ، دئمه‌یینن توکنمز،
ویران قلبی،هیچ بیر کیمسه تیکنمز،
داغ دا، داش دا بو حسرتی چکنمز،
دردیمیزی دئیه‌ک سویا آغلایاق،
دستمال وئریم، دویا دویا آغلایاق.

#علی_اویاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

خیالیمدا بیر قوش اولوب ، سنه طرف گله‌جه‌یم

الیمده کی چیچک‌لری ، گولوم سنه وئره‌جه‌یم

بوگون سنین دوغوم گونون ، بئلنچی بیر شیرین‌گونو

بوتون ووجودوملا گؤزل ، سنه تبریک دئییه‌جه‌یم

دوغوم گونون قوتلو اولسون جان دوستوم💙💙
اوره‌یین همیشه سئوینج‌له دولو اولسون، دونیانین تامام گؤزللیک‌لری بوتون سنین اوچون اولسون قارداشیم💙
اؤپورم سنی❤️ @Bitigme1993

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

آغاج دا گول آچیر شاختالی قیش‌دا،
چیچک‌ده گؤیریر قایادا،داش‌دا،
قیرخی دا کئچیرم،هله بو یاش‌دا،
سنین اوره‌یینه یول تاپانمیرام.

گونشین ساپ ساری ساچین دا هؤرسه‌م،
گؤی‌دن قوجاق-قوجاق اولدوز دا درسه‌م،
چؤللره دوشسه‌م ده، داغی دا یارسام،
سنین اوریینه یول تاپانمیرام.

من یازیق،نه قدرحسرتین چکیم،
نه قدر گؤزومو یولونا تیکیم،
باشیما هارانین کولونو تؤکوم،
سنین اوریینه یول تاپانمیرام.

گئجه‌لری اویاق قالسام،یاخشیدی،
یا دا قاپینیزا گلسم یاخشیدی،
واللاه بئله گئتسه،اؤلسم یاخشیدی،
سنین اوریینه یول تاپانمیرام.

#علی_اویاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سن یئنه قاییتسان، یئنه سئوه‌رم
باشقاسین سئومه‌یه هوَسیم چاتمیر
مَن سَنده سئوگینی هاوا بیلمیشم
سن چیخیب گئدندن نَفَسیم چاتمیر...

#اورخان

https://www.instagram.com/reel/DJpUBIbtdmI/?igsh=MWplZGZ5NDk2Y2ZmbQ==

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯