صبريميز سؤز قونوسو مين هيجان قوينوندا
گل ده آچ قار چيچه‌ييم شاختا_بوران قوينوندا

آرپا چای‌سيز و آرازسيز من او ايتگين سارا كی
ياشاديردين منی سن هر گون او خان قوينوندا

حسرتيندن حزين حال‌سيز و حايات‌سيز جانيمی
وئره‌رم بيرده گه‌زم ياز تك آچان قوينوندا

لال آشيق‌لار ساياغی غوربتی كؤک‌لندی سازيم
سؤزومون مين آوازی سيندی كامان قوينوندا

سارماشيق تک فيكيريم قارما-قاريش‌دير دولاشير
منی او درده سالان دويمه، ياخان قوينوندا...

آتاميز سورگونه گئتديكده آنام بويلويدو
دونيايا آلما يئريک‌ليردی، تاوان قوينوندا

جايديرير فيكريمی بيردن اوچورام قارتال تک
خطری باشدان آشان مين طيران قوينوندا

جانلانيردی گؤز اؤنومده گؤزو قانلی-قادالی
تنی، تبريزلی‌ييمين باغری دومان قوينوندا

دؤشو او شانلی شاخان بايراغيمين مسكنی‌دير
سرحدی سئوگی، آی-اولدوز گؤزو قان قوينوندا

يوز سينيرسيز اؤپوشون يوردو، پريشان قوجاغی!
سؤزو قاچ‌دير ، گؤزو بير عمر دايان قوينوندا!..


#آیسو_مختاری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سسینده اینله‌ییر بیر پاییز خزل
بیر چیلپاق گرایلی، بیر عوصیان غزل
سسین اوره‌ییمه اؤیله کی اؤزل
سسیندن بیر قوجاق پای گؤندر گولوم...

هارایا دؤنورم، هایا دؤنورم
کؤنول آسمانیندا آیا دؤنورم
دنیزه چئوریلیب، چایا دؤنورم
سسیندن بیر قوجاق پای گؤندر گولوم...

سسینله کؤنوله باسیلان سازام
نه قَدر چوخالسام یئنه‌ده آزام
اشهدی، حمدی یوخ، سینیق نامازام
سسیندن بیر قوجاق پای گؤندر گولوم ...

سسینده صوفی‌ام، دؤننم، اوجاللام
گؤی لرین اولدوزون سنه باج آللام
سسینی چوخ گؤرسن اینان قوجاللام
سسیندن بیر قوجاق پای گؤندر گولوم ...

سسین غوربتیم دیر، سسین تبریزیم
سسین بولاق باشیم ، سسین کهریزیم
دئ آخی او سس سیز من نئجه دؤزوم
سسیندن بیر قوجاق پای گؤندر گولوم ...

سسینده نبی وار، سسینده هجر
وطن قیزلاری وار، گؤز سوزر کئچر
سسین بایاتیم دیر! دَرین، مختصر
سسیندن بیر قوجاق پای گؤندر گولوم ...

سسین ایلدیریم دیر ، آل شاخار کئچر
کؤنلومه درد اوخون یان تاخار کئچر
بیر گئدر ٬ بیر دؤنر ٬ بیر باخار کئچر
سسیندن بیر قوجاق پای گؤندر گولوم...

#آیسو_مختاری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

باخیشلاریندا غزل وار ، تئلینده نیلوفر
قوپوز الینده اسیردیر ، دیلینده نیلوفر

باهار - باهار بو دیاردا بنؤوشه ، تر نرگیز
فصیل - فصیل آچاجاقدیر الینده نیلوفر

کؤنولده اؤزلم اولا، گؤزلرینده یاغمور اگر
تانینمایان اولار اولسان ائلینده نیلوفر

سارای صداقتی سنده ، گؤنش گؤرنده سنی
آچار! بو گولشن آچار سن گولنده نیلوفر

بیر ائل قالیب منه آرزی، تامارزیام سنه من
مزاریم اوسته گتیر من اؤلنده نیلوفر ....

#آیسو_مختاری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

شعریمده یاشایان بیر دلی قیزدان
اؤزومو سوراندا دوداغی قاچدی
دئدیم اینجیمه رم گؤزونه قوربان
ال آتیب آستاجا اوره یین آچدی

دونان آرزیلاری یاز فصیلینده
کؤکسونو یارمیشدی دیل یاراسیندان
باغلی پنجه ره لر اونون دیلینده
قارا بورونموشدو گولون یاسیندان

دوداغی آجیدان گولومسه نیردی
سئویرم گزیردی ایکی دویمه سی
من سئوه ن دلی قیز آی دان ائنیردی
توشوردو یوللارا شعریمین سسی

بیر گئجه  ساچینی سویا دوغرادی
خزری اوخشادی ساحیلی سوزدو
نیسگیله بویاندی بو قیزین آدی
دردی سیرا -سیرا  شعرینه دوزدو

#دومان_بختیاری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اوره‌یینده مین بیر یارا اولسا دا،
اللرینی وئر الیمه، دور گئدک!
درد الیندن سئوینجیمیز سولسا دا،
اللرینی وئر الیمه، دور گئدک!

قوشالاشاق، چیخاق قارلی داغلارا
پای آپاراق باغچالارا، باغلارا
گل قاییداق بنؤوشه لی چاغلارا!
اللرینی وئر الیمه، دور گئدک!

سوزگون باخیب اوره‌ییمی داغلاما!
غم_غوصصه دن بولود کیمی چاغلاما
گؤزلرینه قوربان اولوم، آغلاما!
اللرینی وئر الیمه، دور گئدک!

بیزی سسلیر اوتایدا کی قالان سس
بو دورومدا یوبانماغین نه دیر بس؟!
بیر آه کیمی سیغ ایچیمده، دور، تلس
اللرینی وئر الیمه، دور گئدک!

بئش آددیم دیر آیریلیغین آراسی
بئله سوسما، اوره ییمین پاراسی!
گئدیشده دیر دردیمیزین چاراسی
اللرینی وئر الیمه، دور گئدک...!

#دومان_بختیاری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اوره‌ییمده قالان بوم بوش یئرینی
رهنه‌ده وئرمیرم ساتیرام ایندی
داریسقال چاغلاردا داریخان آندا
داها آغلامیرام یاتیرام ایندی

نه گئجه گونوم اول نه گوندوز آییم
سویله مه دونیادا یوخ منیم تاییم
بلکه او گؤزلرده  یوخ ایمیش پاییم
حسرتی گیله مه قاتیرام ایندی

بو دوداغلار پئچیلدامیر آدینی
اوندوبدور شیرین دیلین دادینی
اؤیرنمه دیم سئودالیق ساوادینی
عشقین باتلاغینا باتیرام ایندی

کؤرپه یئتیم کیمی چاغلامیرام من
سنی خاطیرلاییب آغلامیرام من
بختیمین قاپیسین باغلامیرام من
سؤکوب چرچیوه سین آتیرام ایندی

قاییدیب اوبایا سازاغی آلما
بیرده آرامیزا آراچی سالما
وئردیيین چؤره یی باشیما چالما
اؤزوم بیشیریرم شاتیرام ایندی

#سازاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

من سنی سئونده دوشونمه‌دیم هئچ
قیریلار اوره‌ییم دوشر اوره‌ییم
سئوگي آلووونا دوشندن بري
بیلمه‌دیم اوشویر؟ بیشر اوره‌ییم!

بیر یارا ووروبدور خنجر گؤزلرین
بئینیمده حک اولوب سئوگی سؤزلرین
مین ایلده بیتیشمز یارا اوزلرین
بیتیشسه بیلیرم دئشر اوره‌ییم

بوکورسن زامانا قات با قات منی
مرهمدی گلیشین گل ساغات منی
يا ديريت يا اؤلدور گورا آت منی
اؤلورسم قبریمی ائشر اوره‌ییم

سازاغام كئچمه‌يير گونلريم چن‌سيز
بير گولم سولورام باغسيز، چمنسيز
دونياني ايسته‌مم بير آن دا سنسيز
نه خئيير آنلايار نه شر اوره‌ييم

#سازاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

هئچ نه یین قیمتی یئرینده دئییل
هئچ نه یی ساتماغا راضیلانمیرام
بیر عؤمور چکدییم آجی گونلری
بیرآن !شیرین دئییب  شیرین آنمیرام

عؤمرومو ساتمیرام ،اؤلچو قابی یوخ
سئوگینی یوخ !یوخ ! سئوگی ساتیلماز
کسیلر ات اؤزدن کسیلر دیرناق
سئون اورک هئچ واخت! هئچ واخت آتیلماز

ساتماغا بیر ماتاه ، بیر عیار داشی
گتیر آللاه، گتیر ،گتیر میدانا
بیرآبیر بازاردا ساتیب آلینماز
بیرده ساتیلمایان آتادیر، آنا

ائولادی ساتانلار ،آلانلار اولور
چون کی زامان زامان ائولاددا ساتیر
نئجه کی بوغازا یئغیلسا جانی
آتادا ،آنادا ، ائولاددا آتیر

  منی سه عاییله م جان تک بسله ییب
منده ائولادیمی بسله مکده یم
ساتمییب !ساتمارام !ساتمییاجاقدی
اؤلوم !ساتقینلیغا سسله مکده یم

چوخ سؤزدن گل ساویش اسیملی سازاق
یاشامین دبلری  چوخدو اؤتندی
آتا تک ،آنا تک، سئوگیلی جان تک
تورکه ساتیلمایان دیلدی،  وطندی...


#سازاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ایچیمده باغیریر سسیزلیک‌لریم
اوره‌ییم آستاجا گؤزومدن سوزور
اوخشایا اوخشایا یاناق‌لاریمی
اومودلار لشینی اوزومه دوزور

گئییرم اینیمه یانلیزلیغیمی
دونلری بئینیمه سیخیب گئدیرم
ایچیمه گؤمدویوم دیله‌کلر سوچون
طالعین بوینونا یخیب گئدیرم

بولودلار یولوما جانین چیله‌ییر
بلکه‌ده باشیما غریب‌لیک یاغیر
بلکه‌لر بئینیمده تپینیب دورور
بلکه‌ده تانری‌دیر گؤزلرین ساغیر

بارماغیم‌لا ماشا اؤپوشمه‌میشدن
دوغولدو حسرتلی شعریم قان‌آدلی
سونسوزلوق یولجوسو اولدوم حئیف کی
اؤزوم آیاق‌یالین دویغوم قانادلی

#فرزین‌_نقی‌یان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یوخلوغون اوشوتمه سالیب جانیما
ایسینمیر اوره‌ییم تیر-تیر تیتره‌ییر
قندیل‌لر ساللانیب دویقولاریمدان
گئت-گئده سؤزلریم دنگه‌سیزله‌ییر

گئچمیشلر صایفاسین واراق‌لادیق‌جا
طیلیسیم لنیرم غم قوخوسونا
ایستک‌سیز بیر یوخو دولور گؤزومه
ائله‌بیل گئدیرم قیش یوخوسونا

بیر باخیش تیکیلیب کیرپیک‌لریمه
سیم سیجاق ایکی ال ساچیمدا گزیر
گؤزلریم اینانمیر گؤردوکلرینه
جانیمی بو آنا دئمیشدیم نذیر

دیلیمین گوجو یوخ بیر کلمه دئسین
دییه‌سن طیلیسیم اؤز ایشین گؤروب
ایختیارسیزلادیم گؤزومو آچ‌جاق
گؤزلرین سئحیرین اوستومه هؤروب

بیلمیرم رویادیر گرچک‌دیر ندیر
هرنه‌سه نفسی بوغازدا بوغور
اوستومدن تونلارجا آغیرلیق دوشور
هر آندا ایچیمده مین اومود دوغور

اؤزومه سیللی‌لر وورارام دییه
گوجومو ییغمیشام بیلک‌لریمه
گرچک‌سه گؤردویوم یوخو دئیل‌سه
اوندادیر چاتیرام دیلک‌لریمه

بیرآندا دونیالار چؤکور باشیما
قاپاز تک ماسایا دیدییم اوآن
یئنیلدیم یئنه‌ده خیال‌لاریما
آخی کیم دئیردی یوخودان اویان

یئنه‌ده اوشومک یئنه سنسیزلیک
یئنه‌ده گؤزلریم دؤشنیب یولا
ندن‌سه هئچ نه‌یه گلمیر گومانیم
یالنیزجا بیر خیشاب تیرامادولا

#فرزین_نقی‌یان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یوخلوغون گئجه‌مه داراشان گوندن
اوتورور جانیما بو سویوق تب‌لر
گومانیم هئچ نه‌یه گلمیرسه ناچار
تسکین‌لیک وئریرلر یوخلادان حب‌لر

کؤنلومون زیروه سین دومان قار آلیر
اوره‌ییم هئی گئدیر قیش یوخوسانا
سنسیزلیک باشیمدا لای-لای دئینده
بویانیر دوشلریم غم قوخوسونا

اومودوم ایچیمده یاری جان اولور
کئییمیش طالعیم یوخلویان زامان
یاسدیغیم داریخیر یوخوم ایسلانیر
یوخلوغون یوخومو یوخلایان زامان

ساچلارین قاپ قارا گؤی قورشاغی تک
اوزانیر رویامدان کابوس لاریما
اوخشاماق ایسترکن دیسکینیرم هئی
یوخودا گؤروشمک گلمیر کاریما

وارلیغین خیالدیر یوخلوغون گرچک
خلسه‌ده اؤتوشور گئجه گوندوزوم
دولاشیق دوشوبدور یوخوم گئرچه‌ییم
بیلمیرم هانکیسین هارایا دوزوم


#فرزین_نقی‌یان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

منیم سندن اوزاقلاردا ،
یاماندی حالیم، نئجه سن؟!
اؤزگه سینه قیسمت اولان_
جاه و جلالیم نئجه سن؟!

یالانا دوندو گئرچه ییم
آی گؤزلیم_آی گؤيچه ییم
چمنیم، چؤلوم، چیچه ییم_
پته ییم_بالیم نئجه سن؟!

داشام یولون اوسته بیتن
نه سیرردی !  آنلاماز یئتن
گؤزو _کؤنلو ، دیل_دیل اؤتن
دیل لری لالیم نئجه سن ؟!

زر _زیبام، لعلیم_گؤوهریم
یاقوت_یمن، سیم و زریم
بارماقلاری بخته وریم _
باشی بلالیم نئجه سن ؟!

اوزون دؤنمز منه ساری
یاری ، اؤز بختین دن یاری
"ابراهیمین"  سیتم کاری
نئجه سن ظالیم نئجه سن؟!

#ابراهیم_ایلیاسلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

او سئودالی چاغلار یادیندادیمی؟!
بیر من ایگیدیدیم، بیرده سن گؤزل.
دونیادا منه تای دلی یوخویدو،
یوخویدو دونیادا سنه تن گؤزل!.

به هئچ دئمیرسن می هاردادی گؤرن؟!
ایپک تئللرینه نرگیزلر هؤرن،
سن ایدین  اونلارا یاراشیق وئرن،
نه چیچک گؤزلدی _ نه چمن گؤزل!

سئوگی بیر یول گلر آداما حاخدان،
سنین دیوانه نم ائله او واخدان،
گؤزومه آغ گلیب یولا باخماقدان
قلبه خال دوشوبدو، ساچا دن گؤزل.

من عؤمور سورمه دیم، واخدی اوزاتدیم
ائله سنسیزلیگ نن باشیمی قاتدیم،
گؤینییه - گؤینییه  اَللی یه  چاتدیم،
گوله - گوله اُؤللم، اؤل دئسن گؤزل.

گؤر من نه سایمیشام فلک نه ساییب،
دؤنوب سنه باخماق بس آیلار عاییب
آرادان قیرخ ایگید عؤمور آدداییب،
من همان دلی یم ، سن همن گؤزل.

#ابراهیم_ایلیاسلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سن گؤزل اولمایا بیلمزسن خانیم،
سؤزلرین دن چمن ، چؤل عطری گلیر!
بیرجه یول تئل ووروب سسینی دویدوم
بیر ایلدی اووجومدان گول عطری گلیر!

او منم آدینا  دوشکون _ هاوالی،
قییقاجی باخیشین دیندیرر  لالی،
سنین حسرتینه اورجاح  اولالی_
گؤزلریم دن مارال _ گول  عطری گلیر!

خیالیمدا أسمر بنیزین دورور،
اونوتمام چالینا ایسرافیل سورو،
بو قارا سئودادان گؤزومون نورو،
"ابراهیم" قوخویان کول عطری گلیر!

#ابراهیم_ایلیاسلی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سنه چاتاسی‌دیر اولان-اولمازیم،
آتادان نه قالسا، سون‌بئشیگین‌دیر.
بختینه آغ گونو نه تهر یازیم؟
اؤزوم ده بیلمیرم نئیله‌ییم ایندی‌.
قیسمت میراث قالمیر آتادان، اوغلوم!
قیسمتدن پای اولماز، قوربانین اولوم!

هر شئیی پای وئرمک مومکون‌مو بیَم؟
حئییف ان قیمتلی وار-دؤولتیمی-
گؤیلری دیندیرن محبّتیمی-
سنه باغیشلایا بیلمه‌یه‌جه‌یم.
سئوگی میراث قالمیر آتادان، اوغلوم!
اولفَتدن پای اولماز، قوربانین اولوم!

حئیرتسیز یاشاماق، یاشاماق دئییل.
حئیرت ائت، یوردونو تن بؤلن چایا!
قوینوندا گزدیگین تورپاغی بوت بیل!
«حئیرت، ائی بوت!» دئییب بابان دونیایا.
سنه قالمایاجاق حئیرتیم، اوغلوم!
حئیرتدن پای اولماز، قوربانین اولوم!

داشین، کسه‌یین ده باشینا هرلَن!
کسک ده وطن‌دیر، داش دا وطن‌دیر.
دونیادان عؤمورلوک آیریلاندا من،
گؤزومدن سوزولن یاش دا وطن‌دیر.
بونو حسرتلی‌لر آنلایار، اوغلوم!
حسرتدن پای اولماز، قوربانین اولوم!

یوردونون شرَفی، شانی آتش‌دیر.
بو یورد امانتی، اود امانتی،
باشینین اوستونده یانان گونش‌دیر،
«نسیمی» دؤزومو، «بابک» جورأتی.
جورأت دامارلاردا یارانار، اوغلوم!
جورأتدن پای اولماز، قوربانین اولوم!

سنه قالاسی‌دیر آنامیز وطن،
وطن ناموسونا اولو چلنگ‌دیر.
اونون شرفینی قورویا بیلن،
پاپاق گزدیرن یوخ، غئیرت گرک‌دیر.
غئیرت باغیشلانمیر وار کیمی، اوغلوم!
غئیرتدن پای اولماز، قوربانین اولوم!

#شاهمار_اکبرزاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیر گون قاباغیمی کسه‌جک اؤلوم
ذره‌جه عینیمه گلمیر اؤلمه‌ییم
ائله اوتانیرام گله‌سن گولوم
سنین آیاغینا دورا بیلمه‌یم

نامرددیر اؤلومدن اوشه‌نیب قورخان
بیر شربت نه دیر کی ایچه بیلمه‌یم؟
ائله اوتانیرام عادی یاغیشدان
سنین گؤز یاشینی سئچه بیلمه‌یم

ائله اوتانیرام گلیب -گئده‌سن
سنین گلیشینی دویا بیلمه‌یم
اوستومه سپدیگین چیچکلری من
گؤزومون اوستونه قویا بیلمه‌یم

ائله اوتانیرام اوتانیرام من
آییلام کؤنلونو آلا بیلمه‌یم
دردیم تزه‌لنه خجالتیمدن
اؤلمک ایسته‌یم من، اؤله بیلمه‌یم...

#شاهمار_اکبرزاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

حکومت ائوینین قارشیسینداکی،
توتا سؤیکنمیشدی بیر علیل عسگر.
صدقه اومانا باخمیردی باکی،
سایمازجا کئچیردی یولدان اؤتنلر.

آخشامدان کوکره‌ییب اسن کولک‌ده،
چکمیشدی ایچینه دلی سسینی.
علیل، یانا-یانا قارغی توتَکده-
چالیردی قاراباغ شکسته‌سینی.

الیمی شست ایله جیبیمه سالدیم،
دیکسیندی بارماغیم، تیتره‌دی قولوم.
حیرصیمدن قورویوب یئریمده قالدیم،
اوستومده دئییلدی ائونه‌لیک پولوم.

آغزیمدا آلیشیب یاندی دیل-دوداق،
توت باخدی الیمین اوتانماغینا.
گؤیدن یارپاق آتدی، بیر ساری یارپاق-
بیزدن پای اومانین بوش پاپاغینا...

#شاهمار_اکبرزاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

هاوام گونشلی‌دیر هاوام بولوتلو    
دوداغیم شیکایت بوغازیم‌دا نئی
گؤزلریم آیدین‌دیر، گؤزلریم آغلار   
بیر اوزوم قوزئی‌دیر، بیر اؤزوم گونئی

خیال‌لار زَهَردیر، خیال‌لار شیرین            
بیلمیرم بو آخشام آغلاییم، گولوم
بیلمیرم بیر ایللیک کؤرپه طالعین       
آلنیندا نه یازدی، نه پؤزدو اؤلوم

بو آذر اوزون‌دور، بو آذر گوده             
گونوم بیر ساعاتدیر، بیر ایل‌دیر آییم
ائله دورومدایام یوزا بیلمیرم             
اووجومدا توی توتوم، یاس قوجاقلاییم 

پارکین قیراغیندا او پخله ساتان     
سسله‌ییر «سویوندان وئریم بیرینده»؟
او دئییر بیلمیرم موتلویام موتسوز    
دوغولدوم آذرین اییرمی بیرینده

بیر آذر آخشامی یالنیزلیق یاغیش    
خزل‌لر روحومو اوخشاییر خیش-خیش
بوداق‌لار اوستونده قارلار آلتیندا        
فیدان‌لار بویلانیر مین یاشیل باخیش...

#آیدین_باخیش

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یولا دوشدو بیر آرخدان،  بیر کیچیک قارا بالیق       
او آرخین درین‌لییی، اونا وئرمیردی قانیق

گئتدی چاتدی دنیزه، درینلیک سوراغیندا             
معللیمین سؤزلری، سیرقا تک قولاغیندا          

دایاز اولدو دنیزده، درینلییی گؤرمه‌دی                
بوز باغلادی دونیاسی، سرین‌لییی گؤرمه‌دی

دؤندو همن یوللاری، ایسته‌دی گؤیه اوچسون      
یانی نئجه اوچماغی، معللیم‌دن سوروشسون

قاییتدی شاهید اولدو، معللیمین یاسینا               
ائله بیل گمی دیدی، ساحیلین قایاسینا

بو نئجه ایشدیر تانری، دور یوخودان آییل‌دی          
سن یاتیبسان دونیادا، آرازدا عزراییل‌دی

ایندی قوجالیب بالیق، قالیب کیچیک بیر آرخدا    
او اوچماق هوسینده، او صمد آختارماقدا

#آیدین_باخیش

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ائله طوفانلی باخیرسان سینیرام بوز داغی تک
سپیلیرسن یارامین آغریسینا دوز داغی تک

دلی تک بختیمی گاه آغلاییرام گاه گولورم
داغیلاندا گؤزومه هر گئجه اولدوز داغی تک

یایلوغوندان یازین عطری جالاناندا نفسه
جانیم اووجومدا اسیر دالغالی یارپیز داغی تک

منی باش سیز دولانان داغدا کولک دن خبر آل
حیرتیمدن کول اولوب سوورولورام کؤز داغی تک

پولاد اولسایدی دؤزوم سنده اریردی سو کیمین
ائل گؤزوندن اوتانان بیر گلینین اوز داغی تک

آلیر آرام و قراری بو گؤزللیک گؤزه سی
یول سالاندا اوره یه سئوگی لی نرگیز داغی تک

اونودولماز یارالاردیر بورونوب ماهی لارا
سیملره اود قالاییر یار یاراسی ایز داغی تک

#علی_لطفی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اولدوز اولدوز سوزه‌رم یوللارا سنسیزلیییمی
آسیرام هی بوغازیمدان دارا سنسیزلیییمی

گؤزو دار پنجره لردن یولونو گؤزله ییرم
باغلاییب هر گئجه گوندوز تارا سنسیزلیییمی

کاش بلا تیرینه سانجاندا سینیق قلبیمی سن
قارا تئللرلن ائدیدین چارا سنسیزلیییمی

خیالیمدان، اوره ییمدن، نفسیمدن، قوپاریب
بیلمیرم من آپاریم هئچ هارا سنسیزلیییمی

سازاغین قمچی سینه قیشدا دؤزن بیر آغاجام
سیزلارام گاه سازاغا گاه قارا سنسیزلیییمی

حسرتین دالغاسی دولدوقجا بوشالدیقجا گؤزه
سؤیله رم منده سینان ایلقارا سنسیزلیییمی

بیلمیرم آتدی همایون جانینی کیم بو اودا
یانماغیمدا چارا ائتمیر یارا سنسیزلیییمی

#علی_لطفی

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯