داریخما جالانیر دامارلاریما
اؤزوم اؤز الیمده توتساق اولموشام
فیرتینا قاوزانیر، گؤز ببه‌ییمده
یئللر یاریشیندا، توپراق اولموشام

داریخیر گؤزلریم، داریخیر دیلیم
بئینیمده سورک‌لی، ساواش مارشی وار
گؤزلریمدن یاغیر، قورشون خار ها خار
اولدوزلار ائدیرلر، بیر_ بیر اینتیحار

کؤكسومده نفسیم، داریخیر داها
سانکی قفس ایچره بیر قوش چابالیر
اؤزله‌ییر گؤيلرین دورو هاواسین
گؤرورسن بیر گونده یوز ایل قوجالیر

بیر آغاج هر گئجه منی سسله‌ییر
یوخوما قان دامیر، بوداقلاریندان
کپنکلر قونور، قول_ بوداغینا
قان آخیر گوللرین، دوداقلاریندان

یوخومو؟ کابوس‌مو؟، ندیر گؤردویوم؟
باشیمی پامبیقلا، بیریسی یاریر
قانیما جالانان، داریخمالاری
دورنالار گؤیلره، قوناق آپاریر!

#میرحسین_دلداربناب

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

گل بیر بئله آچما آرا،
ایتیررسن بیردن منی.
من دئمیرم هرگون آرا،
یوخلا گولوم هردن منی.

سنسیز، یانیب یاخیلیرام،
گونو گوندن، یوخ اولورام،
دوروب یئنه  ییخیلیرام،
گل ییغیشدیر یئردن منی.

سن گله‌نه ، چتین قالیم،
حسرتیندن پوزقون حالیم،
یوبانما چوخ آغرین آلیم،
بلکه سون کز، گؤردون منی!

بو سئوگینین ، پایی , ایزی،
سول دؤشومده سانجان سیزی،
بئله گئتسه گئجی - تئزی،
اؤلدوره‌جک دردین منی.

#اصغر_کمالی_یانار

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سئومه‌ییردین منی ، بونو،
بیله بیله ، سئودیم سنی
هئچ نه ، سندن گؤزله مه دن
ائله ، بئله سئودیم سنی

بو سئودا دان ، قازانجیم غم
بیلمیرم ، دلی یم ، نه‌یم
هم  آغلایا آغلایا ، هم،
گوله گوله ، سئودیم سنی

سئویلمه‌دیم ، من سئوه‌رک
یالقیز قالدی ، یازیق اورک
گونده ،یوز یول ، جان وئره‌رک
اؤله اؤله ، سئودیم سنی...

#اصغر_کمالی_یانار

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیلمیرم نه سن کی، اونودولمورسان
اورکده هربیرآن ، دویغون اویاقدی.
بلکه ده قان کیمی ، داماریمداسان ،
کؤکسومده اولماغین قلبه دایاقدی .

هرگون آخشام اوستو، گونش باتاندا
خیالین سینمده ، مین های - کوی سالیر،
ایستیرم اونودوم ، آنجاق یاتاندا،
حسرتین منیمله ، یئرین بوش قالیر.

دئییرم سئوگیلیم ، حسرتینده کاش
بوشالسین سینمدن ،اؤز یئرین کیمی.
گزدیریم سنین تک ، بوزکیمی بیرداش،
اوره‌ییم یئرینه ، اوره یین کیمی .

گؤیلره سووورور ،عؤمرومو ایندی،
سنینله اولدوغوم، هرآنین یادی
باشیما ایللرین ، قاری الندی
اوره‌ییم هله ده ، قارانلیقدادی

اونوتدون سئوگیمی ، چوخ راحاتجا سن ،
ایللردیر آتیبسان ، دانیبسان منی .
من بونا حسرتم ، بیلمیرم ندن ،
اونودا بیلمیرم ،بیرجه آن سنی

#اصغر_کمالی_یانار

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

شوکورلر اولسون
بیر بئله " سنسیز"لیین  ایچینده...
بیر " سن " وار سان هله!!!

#اصغر_کمالی_یانار

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

دویمادین، گؤزلریم هر گون آغلادی
بیلمه‌دین، داشیدیم اؤلمز بیر آدی
اوره‌ییم گؤیلره آغاج دایادی
اوچماسین باشیما، گلرسن دئیه!...

آتیشدیم، چاتیشدیم زامانلا آز-چوخ
سنین‌کی، بیر کیپریک اولموشدو بیر اوخ
سؤیله، من‌سیزلییه اؤیره‌ندین یا یوخ؟!
من هئچ اؤیره‌نمه‌دیم، گولرسن دئیه!...

چایلارین سویونا گؤز یاشی قاتدیم
سنین‌له اویاندیم، اؤزومسوز یاتدیم
گؤزلرینده دوغوب، قاشیندا باتدیم
گونلرین بیرینده بیلرسن دئیه!...

#چیچک_آغ_بولوت

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

گئجه‌نین گؤزلرینه گؤیده توتولموش آی‌سان
وطنین دوزلرینه،  ماوی ده‌نیزسن  چای‌سان

یاغیشین حسرتینی گؤزلَمه،  تئز گَل گولسون
عؤمورون آل چیچه‌یی چونکو باهارسان یای‌سان

گولوشو  بوغما بوغازلاردا،  چتین‌دیر اؤلمک
سنه سایسیزدیر اینانجیم، یارالانماز های‌سان

یارامازلار سایاجاقلار، سایی‌لار سونسوزدور
سن منیم فیکریمه دولموش بئله سونسوز سای‌سان.

وطنین ایستی قوجاغی، آچیلان بیر قولدور
دوش اونون قوللارینا، بیر ده اوسانیب قایسان!...

#چیچک_آغ_بولوت

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیر اووج توپراق اول سَپیل گؤزومه
گؤرمک ایسته‌میرم قارا گونلری
منی ائشه‌له‌ییب، کؤنلومه گیرمه
کؤنلومده ایتمه‌ییب سئودانین یئری

بیر سحر، دان کیمی سَپیل دونیاما
سحر اولدوزومو اونودوب گئتمه!
قوجویوب یاتارام گئجه‌نی اؤزوم
سن منیم گئجه‌می سحرسیز ائتمه!

سوی باخیش‌لارینی، گؤزوم قاپانسین
بو قده‌ر باخیشا ده‌یمز دونیامیز
اَییلسه ده، هوندور داغلار بیر به بیر
هله دیک باشلی‌دیر، اَیمز دونیامیز

ایشیغا دؤن بیرآز، قارا باسماسین
ذاتن قارانلیغین قاراسی‌ییق بیز
هله اوخونمامیش اَسکی کیتابین
خلفه‌چین قویولموش آراسی‌ییق بیز

بیر اوووج توپراق اول، سَپیل گؤزومه
دئسینلر گؤزونه کول ده، توپراق دا
یا دا بیر "چیچک" اول، آسیل دالیمدان
بیر یئرده یاشاسین دال دا، یاپراق دا...

#چیچک_آغ_بولوت

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ایسلانیر گؤزلریم باخیشلاریندان
سینه‌مده یئرله‌شیر حسرت وطنی
گؤزلریم یاغماغا بهانه‌سیزدیر
دولما گؤزلریمه آغلارام سنی

داملا سئودیجه‌ییم دنیزلر قیزی
باغریمدا کؤکله‌نیر علسگر سازی
سنی یارپیزلارین شئه‌لی نامازی
آخما وارلیغیما چاغلارام سنی

باهار دامازلیغیم ،یازلیم آ جئیران
سس‌سیزجه گؤزومدن شعره یاغیرسان
یانیقلی آه چکیب نه‌یه باخیرسان؟
سوکوت قوشماسیلا باغلارام سنی

منی، سن یاشادین یاشاما یئتر
ایچیمده بیر بایقوش دورمادان اؤتر
اؤلوم قورخوسو وار منده بو گونلر
چکیل اوره‌ییمدن دیغلارام سنی!

#آتیلا_کیشی‌زاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

بیر لزگی دؤیونور ایچیمده منیم
بیر یانیق کرمی سنین سسینده
قوردنان قیامته قالاجاغام من
کؤپک‌لر هۆروشور یاش نَفَسینده

بیر قیلینج گؤیه‌ریر الیمده منیم
آغ بایراق بیچیلیب سنین بویونا
قانلی اللریمی یوماق ایسته‌سم
گلیب چیرپاجاغام سنین سویونا

یوواسی داغیلان کؤرپه لاچینی
ساوالان داغینا حسرت ائیله‌دین
سویوق بولاقلارین آندی تک دورو
ایچدییین قانلاری بیلیم نئیله‌دین

دَریلمک ایسته‌ییر منیم الیمله
گنجه چؤللرینده نانا لَهله‌ییر
"شوشانین داغلاری باشی دوماندی"
ایچیمده بیر سورگون اوزان سؤیله‌ییر

آغلاما، یئنیلمه، دوشمانلار باخیر
قوی گیریم دالغانا سنله چاغلاییم
گؤزونون یاشینی کؤکسونه هوپدور
آغلاما آرازیم، دور من آغلاییم

سندن گئچه‌جه‌یم بیر گون بیلیرم
دیلیمده قورقودون قاچاق تورکوسو
بایقوش جسدیندن کئچه‌جه‌‌یم من
آیاغیم آلتیندا تابوت کؤرپوسو!..

#آتیلا_کیشی‌زاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سنین گؤروشونه تئز گله‌جکدیم
آلمام قیلینجیمی یوباتماسایدی
اسکی قبیرلرله یاشید یومروغوم
غزل داخماسیندا یاس توتماسایدی

سنین گؤروشونه تئز گله‌جکدیم
پاییز یارپاقلاری منی یوباتدی
کؤهنه بیر نیسگیلین آه دامازلیغی
سنی آیاغیمین آلتینا آتدی

سنین گؤروشونه تئز گله‌جکدیم
کسمه شیکسته‌لر منه دولمادان
ایچیمده بوغدوغوم اینجه‌لیک پایی
شئعیر دفتریمه حسرت اولمادان

سنین گؤروشونه تئز گله‌جکدیم
داغلاردا تیتره‌ین نانا قویمادی
دیشیمی قیسیب دا کئچه بیلردیم
اوغلونا قییمایان آنا قویمادی

خزه‌ردن ده کئچدیم خزه‌ر...الویداع
خزه‌ر ال ائیله‌دی دالغالاری‌یلا
من ده ساغوللاشدیم أسن ساچیم‌لا
اونون خزری‌سی‌یله گیلاواری‌یلا

آلنیمدا سرین‌لیک ایچیمده حسرت
گلیردیم خزه‌رین ساحیلینده من
دوشوندوم کی سنی الدن وئرمه‌ییم
جئیران قوراقلیغی ایت ایلینده من

هله‌م یادیمدادیر ایلکین باخیشین
آشیق ماهنیسی تک جانیما سیندی
سئو دئمک ایسته‌دیم آمما غوروروم
یاساق سازلار کیمی سیناندا دیندی

بیر سارسینتی ایچره چالیخلاییرام
سنی تانیدیغیم او گوندن بری
نئجه باغیشلاییم نئجه بیلمیرم
بویروندن سایمازجا اؤتوشن‌لری

بوتون کوچه‌لره دان چیله‌یه‌جم
سنی یایا بیلسم اؤزومو بؤلسم
سنی سایمازلار دا یولا گله‌جک
بیر آز گؤزلرینی بؤیوده بیلسم

سنین گؤروشونه تئز گله‌جکدیم
بیر زینه یولدایدی سن ایسه دنیز
هارادان یول آلدی بو قودوز پلنگ
قوی یاریمچیق قالسین شئعیرلشمه‌میز

بیزه گل-گل دئییر قانلار ایچره‌کن
بو مارال بو جویور بو چؤل بو باییر
اینجه اللرینده قانلی بیر قیلینج
یاریمچیق شئعریمین سون میصراسی‌دیر.


#آتیلا_کیشی‌زاده

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

صبريميز سؤز قونوسو مين هيجان قوينوندا
گل ده آچ قار چيچه‌ييم شاختا_بوران قوينوندا

آرپا چای‌سيز و آرازسيز من او ايتگين سارا كی
ياشاديردين منی سن هر گون او خان قوينوندا

حسرتيندن حزين حال‌سيز و حايات‌سيز جانيمی
وئره‌رم بيرده گه‌زم ياز تك آچان قوينوندا

لال آشيق‌لار ساياغی غوربتی كؤک‌لندی سازيم
سؤزومون مين آوازی سيندی كامان قوينوندا

سارماشيق تک فيكيريم قارما-قاريش‌دير دولاشير
منی او درده سالان دويمه، ياخان قوينوندا...

آتاميز سورگونه گئتديكده آنام بويلويدو
دونيايا آلما يئريک‌ليردی، تاوان قوينوندا

جايديرير فيكريمی بيردن اوچورام قارتال تک
خطری باشدان آشان مين طيران قوينوندا

جانلانيردی گؤز اؤنومده گؤزو قانلی-قادالی
تنی، تبريزلی‌ييمين باغری دومان قوينوندا

دؤشو او شانلی شاخان بايراغيمين مسكنی‌دير
سرحدی سئوگی، آی-اولدوز گؤزو قان قوينوندا

يوز سينيرسيز اؤپوشون يوردو، پريشان قوجاغی!
سؤزو قاچ‌دير ، گؤزو بير عمر دايان قوينوندا!..


#آیسو_مختاری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

سسینده اینله‌ییر بیر پاییز خزل
بیر چیلپاق گرایلی، بیر عوصیان غزل
سسین اوره‌ییمه اؤیله کی اؤزل
سسیندن بیر قوجاق پای گؤندر گولوم...

هارایا دؤنورم، هایا دؤنورم
کؤنول آسمانیندا آیا دؤنورم
دنیزه چئوریلیب، چایا دؤنورم
سسیندن بیر قوجاق پای گؤندر گولوم...

سسینله کؤنوله باسیلان سازام
نه قَدر چوخالسام یئنه‌ده آزام
اشهدی، حمدی یوخ، سینیق نامازام
سسیندن بیر قوجاق پای گؤندر گولوم ...

سسینده صوفی‌ام، دؤننم، اوجاللام
گؤی لرین اولدوزون سنه باج آللام
سسینی چوخ گؤرسن اینان قوجاللام
سسیندن بیر قوجاق پای گؤندر گولوم ...

سسین غوربتیم دیر، سسین تبریزیم
سسین بولاق باشیم ، سسین کهریزیم
دئ آخی او سس سیز من نئجه دؤزوم
سسیندن بیر قوجاق پای گؤندر گولوم ...

سسینده نبی وار، سسینده هجر
وطن قیزلاری وار، گؤز سوزر کئچر
سسین بایاتیم دیر! دَرین، مختصر
سسیندن بیر قوجاق پای گؤندر گولوم ...

سسین ایلدیریم دیر ، آل شاخار کئچر
کؤنلومه درد اوخون یان تاخار کئچر
بیر گئدر ٬ بیر دؤنر ٬ بیر باخار کئچر
سسیندن بیر قوجاق پای گؤندر گولوم...

#آیسو_مختاری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

باخیشلاریندا غزل وار ، تئلینده نیلوفر
قوپوز الینده اسیردیر ، دیلینده نیلوفر

باهار - باهار بو دیاردا بنؤوشه ، تر نرگیز
فصیل - فصیل آچاجاقدیر الینده نیلوفر

کؤنولده اؤزلم اولا، گؤزلرینده یاغمور اگر
تانینمایان اولار اولسان ائلینده نیلوفر

سارای صداقتی سنده ، گؤنش گؤرنده سنی
آچار! بو گولشن آچار سن گولنده نیلوفر

بیر ائل قالیب منه آرزی، تامارزیام سنه من
مزاریم اوسته گتیر من اؤلنده نیلوفر ....

#آیسو_مختاری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

شعریمده یاشایان بیر دلی قیزدان
اؤزومو سوراندا دوداغی قاچدی
دئدیم اینجیمه رم گؤزونه قوربان
ال آتیب آستاجا اوره یین آچدی

دونان آرزیلاری یاز فصیلینده
کؤکسونو یارمیشدی دیل یاراسیندان
باغلی پنجه ره لر اونون دیلینده
قارا بورونموشدو گولون یاسیندان

دوداغی آجیدان گولومسه نیردی
سئویرم گزیردی ایکی دویمه سی
من سئوه ن دلی قیز آی دان ائنیردی
توشوردو یوللارا شعریمین سسی

بیر گئجه  ساچینی سویا دوغرادی
خزری اوخشادی ساحیلی سوزدو
نیسگیله بویاندی بو قیزین آدی
دردی سیرا -سیرا  شعرینه دوزدو

#دومان_بختیاری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اوره‌یینده مین بیر یارا اولسا دا،
اللرینی وئر الیمه، دور گئدک!
درد الیندن سئوینجیمیز سولسا دا،
اللرینی وئر الیمه، دور گئدک!

قوشالاشاق، چیخاق قارلی داغلارا
پای آپاراق باغچالارا، باغلارا
گل قاییداق بنؤوشه لی چاغلارا!
اللرینی وئر الیمه، دور گئدک!

سوزگون باخیب اوره‌ییمی داغلاما!
غم_غوصصه دن بولود کیمی چاغلاما
گؤزلرینه قوربان اولوم، آغلاما!
اللرینی وئر الیمه، دور گئدک!

بیزی سسلیر اوتایدا کی قالان سس
بو دورومدا یوبانماغین نه دیر بس؟!
بیر آه کیمی سیغ ایچیمده، دور، تلس
اللرینی وئر الیمه، دور گئدک!

بئش آددیم دیر آیریلیغین آراسی
بئله سوسما، اوره ییمین پاراسی!
گئدیشده دیر دردیمیزین چاراسی
اللرینی وئر الیمه، دور گئدک...!

#دومان_بختیاری

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

اوره‌ییمده قالان بوم بوش یئرینی
رهنه‌ده وئرمیرم ساتیرام ایندی
داریسقال چاغلاردا داریخان آندا
داها آغلامیرام یاتیرام ایندی

نه گئجه گونوم اول نه گوندوز آییم
سویله مه دونیادا یوخ منیم تاییم
بلکه او گؤزلرده  یوخ ایمیش پاییم
حسرتی گیله مه قاتیرام ایندی

بو دوداغلار پئچیلدامیر آدینی
اوندوبدور شیرین دیلین دادینی
اؤیرنمه دیم سئودالیق ساوادینی
عشقین باتلاغینا باتیرام ایندی

کؤرپه یئتیم کیمی چاغلامیرام من
سنی خاطیرلاییب آغلامیرام من
بختیمین قاپیسین باغلامیرام من
سؤکوب چرچیوه سین آتیرام ایندی

قاییدیب اوبایا سازاغی آلما
بیرده آرامیزا آراچی سالما
وئردیيین چؤره یی باشیما چالما
اؤزوم بیشیریرم شاتیرام ایندی

#سازاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

من سنی سئونده دوشونمه‌دیم هئچ
قیریلار اوره‌ییم دوشر اوره‌ییم
سئوگي آلووونا دوشندن بري
بیلمه‌دیم اوشویر؟ بیشر اوره‌ییم!

بیر یارا ووروبدور خنجر گؤزلرین
بئینیمده حک اولوب سئوگی سؤزلرین
مین ایلده بیتیشمز یارا اوزلرین
بیتیشسه بیلیرم دئشر اوره‌ییم

بوکورسن زامانا قات با قات منی
مرهمدی گلیشین گل ساغات منی
يا ديريت يا اؤلدور گورا آت منی
اؤلورسم قبریمی ائشر اوره‌ییم

سازاغام كئچمه‌يير گونلريم چن‌سيز
بير گولم سولورام باغسيز، چمنسيز
دونياني ايسته‌مم بير آن دا سنسيز
نه خئيير آنلايار نه شر اوره‌ييم

#سازاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

هئچ نه یین قیمتی یئرینده دئییل
هئچ نه یی ساتماغا راضیلانمیرام
بیر عؤمور چکدییم آجی گونلری
بیرآن !شیرین دئییب  شیرین آنمیرام

عؤمرومو ساتمیرام ،اؤلچو قابی یوخ
سئوگینی یوخ !یوخ ! سئوگی ساتیلماز
کسیلر ات اؤزدن کسیلر دیرناق
سئون اورک هئچ واخت! هئچ واخت آتیلماز

ساتماغا بیر ماتاه ، بیر عیار داشی
گتیر آللاه، گتیر ،گتیر میدانا
بیرآبیر بازاردا ساتیب آلینماز
بیرده ساتیلمایان آتادیر، آنا

ائولادی ساتانلار ،آلانلار اولور
چون کی زامان زامان ائولاددا ساتیر
نئجه کی بوغازا یئغیلسا جانی
آتادا ،آنادا ، ائولاددا آتیر

  منی سه عاییله م جان تک بسله ییب
منده ائولادیمی بسله مکده یم
ساتمییب !ساتمارام !ساتمییاجاقدی
اؤلوم !ساتقینلیغا سسله مکده یم

چوخ سؤزدن گل ساویش اسیملی سازاق
یاشامین دبلری  چوخدو اؤتندی
آتا تک ،آنا تک، سئوگیلی جان تک
تورکه ساتیلمایان دیلدی،  وطندی...


#سازاق

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

ایچیمده باغیریر سسیزلیک‌لریم
اوره‌ییم آستاجا گؤزومدن سوزور
اوخشایا اوخشایا یاناق‌لاریمی
اومودلار لشینی اوزومه دوزور

گئییرم اینیمه یانلیزلیغیمی
دونلری بئینیمه سیخیب گئدیرم
ایچیمه گؤمدویوم دیله‌کلر سوچون
طالعین بوینونا یخیب گئدیرم

بولودلار یولوما جانین چیله‌ییر
بلکه‌ده باشیما غریب‌لیک یاغیر
بلکه‌لر بئینیمده تپینیب دورور
بلکه‌ده تانری‌دیر گؤزلرین ساغیر

بارماغیم‌لا ماشا اؤپوشمه‌میشدن
دوغولدو حسرتلی شعریم قان‌آدلی
سونسوزلوق یولجوسو اولدوم حئیف کی
اؤزوم آیاق‌یالین دویغوم قانادلی

#فرزین‌_نقی‌یان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯

یوخلوغون اوشوتمه سالیب جانیما
ایسینمیر اوره‌ییم تیر-تیر تیتره‌ییر
قندیل‌لر ساللانیب دویقولاریمدان
گئت-گئده سؤزلریم دنگه‌سیزله‌ییر

گئچمیشلر صایفاسین واراق‌لادیق‌جا
طیلیسیم لنیرم غم قوخوسونا
ایستک‌سیز بیر یوخو دولور گؤزومه
ائله‌بیل گئدیرم قیش یوخوسونا

بیر باخیش تیکیلیب کیرپیک‌لریمه
سیم سیجاق ایکی ال ساچیمدا گزیر
گؤزلریم اینانمیر گؤردوکلرینه
جانیمی بو آنا دئمیشدیم نذیر

دیلیمین گوجو یوخ بیر کلمه دئسین
دییه‌سن طیلیسیم اؤز ایشین گؤروب
ایختیارسیزلادیم گؤزومو آچ‌جاق
گؤزلرین سئحیرین اوستومه هؤروب

بیلمیرم رویادیر گرچک‌دیر ندیر
هرنه‌سه نفسی بوغازدا بوغور
اوستومدن تونلارجا آغیرلیق دوشور
هر آندا ایچیمده مین اومود دوغور

اؤزومه سیللی‌لر وورارام دییه
گوجومو ییغمیشام بیلک‌لریمه
گرچک‌سه گؤردویوم یوخو دئیل‌سه
اوندادیر چاتیرام دیلک‌لریمه

بیرآندا دونیالار چؤکور باشیما
قاپاز تک ماسایا دیدییم اوآن
یئنیلدیم یئنه‌ده خیال‌لاریما
آخی کیم دئیردی یوخودان اویان

یئنه‌ده اوشومک یئنه سنسیزلیک
یئنه‌ده گؤزلریم دؤشنیب یولا
ندن‌سه هئچ نه‌یه گلمیر گومانیم
یالنیزجا بیر خیشاب تیرامادولا

#فرزین_نقی‌یان

╭━━━ ◉ ✦ ◉ ━━━╮ 
│      @poemistic   🌱  │ 
╰━━━ ◉ ✦ ◉ ━━━╯