شِنْهِي أطيَب من أذيتك؟
عندي زهرة؛ صغيرة كِلّش؛
بين شتلات الورد
ترضىٰ اَحطها بـ مَزهريتك؟

عندي بَذرة؛ واركضت مثل الصدگ؛
طشيتها بواسع محبتك.
ضحكوا؛ الگضوا عمرهم بالبذر،
گالولي: "كِلّش علىٰ نيتك!"

عندي سَكتة عُمْر، واترجاك تسمعها…
اريدن افتهم -مِنّك- سكتّي.
وتفتهم -مِنّي- سكتّك.

غلطتي: تعلميت الغلط منك.
حتىٰ لو صوچك، اگول الصوچ صوچي.

چَنّي ألتذّ بأذيتك…
شِنْهِي أطيَب من أذيتك؟

لاچن الليلة -بطرگ حزني- اجيتك.
أرجىٰ چلمة عَدِل منك.

عَدِل، مثل الميل بالساعة مشيت وياك،
ليش اعوَجِتْ؟
لو 'عوجة طبع' چنها مشيتك؟
الله يستر من مشيتك.

حائِرًا، يَمضي عَلىٰ وَجَلِ.
أَتُراهُ الحُبُّ عَذَّبَهُ؟

شلون الماي يگدر ينكر جروفه؟
شلون العين تگدر شوفها تعوفه؟
واَبو چفوف الحنينة شلون
يرضىٰ تبيعنا چفوفه؟

وبلا 'چلمة التنگال'
كل ذاك الفرح ينشال.