ရမ်းဗြဲ နှင့် ရသေ့တောင်မြို့ AA၏ ထိုးစစ်ကို စစ်ကောင်စီက ကြည်း၊ရေ၊လေပူးပေါင်းခုခံ​ပြီးတိုက်ပွဲပြင်းထန်​နေ

▪︎ဘူးသီးတောင်၊မောင်တော မြို့များရှိ နယ်ခြားစောင့်စခန်းများ၊ရမ်းဗြဲမြို့နှင့် အခြားမြို့ အချို့မှ ရဲစခန်းအချို့အား သိမ်းပိုက်ရရှိထားဟု AA ထုတ်ပြန်

ရှိုင်း/People’s Spring

ရက္ခိုင်ပြည်နယ် မင်းပြား၊ ကျောက်တော်၊ မြောက်ဦးနှင့် ပေါက်တောမြို့များရှိ စစ်ကောင်စီ၏တပ်စခန်းများကို ရက္ခိုင့်တပ်တော်(AA)မှ တစ်ခုမကျန်သိမ်းပိုက်ပြီးနောက်တွင် စစ်ကောင်စီသည် ရသေ့တောင်မြို့ပတ်ဝန်းကျင်သို့ ကြည်း၊ ရေ၊ လေ ပူးပေါင်းကာ ခုခံစစ်အား စတင်လျက်ရှိကြောင်း ညီနောင်မဟာမိတ် ၃ဖွဲ့က ထုတ်ပြန်သည်။

၁၀၂၇ စစ်ဆင်ရေးဖေဖော်ဝါရီ ၁၄ရက်စစ်ရေး အခြေအနေ ထုတ်ပြန်ရာ၌ ထိုသို့အသိပေးထားခြင်းဖြစ်သည်။ ညီနောင်မဟာမိတ် (၃) ဖွဲ့ထဲမှ ရက္ခိုင့်တပ်တော်၏ ရက္ခိုင်ဒေသအတွင်းတိုက်ပွဲများမှာ စစ်ဆင်ရေးစတင်သည့်နေ့မှ တစ်ရက်မှရပ်နားခြင်းမရှိဘဲ တိုက်ပွဲများဆက်လက်ဖြစ်ပွားလျက်ရှိသည်ဟု ဖော်ပြသည်။

ရခိုင်ပြည်နယ်ရှိ မြို့ကြီး ၄မြို့ကို သိမ်းပိုက်ထားသကဲ့သို့ ဘူးသီးတောင်နှင့် မောင်တောမြို့များရှိ နယ်ခြားစောင့်တပ်စခန်းပေါင်းမြောက်မြားစွာတို့ကိုသာမက ရမ်းဗြဲမြို့ နှင့် အခြားသောမြို့အချို့မှ ရဲစခန်းတချို့အားလည်း သိမ်းပိုက်ရရှိထားကြောင်း AAက အသိ​ပေးသည်။

လက်နက်ချအညံ့မခံသောစစ်​ကောင်စီတပ်စခန်းအချို့ကိုလည်း ရက္ခိုင့်တပ်တော်မှ ဆက်လက်ထိုးစစ်ဆင်တိုက်ခိုက်လျက်ရှိ သည်ဟုလည်း သိရသည်။

ယမန်နေ့ (ဖေဖော်ဝါရီ ၁၄ရက်)တွင် ရမ်းဗြဲမြို့နှင့် အနီပတ်
ဝန်းကျင်နေရာများသို့ စစ်ကောင်စီ၏ ဂျက်ဖိုက်တာသည် လေကြောင်းမှ (၁၀) ကြိမ်တိုင်တိုင် ဗုံးကြဲတိုက်ခိုက်ခဲ့ပြီး Mi – 35 ရဟတ်ယာဉ်မှလည်း လက်နက်ငယ်များဖြင့် အဆက်
မပြတ်ပစ်ခတ်တိုက်ခိုက်ခဲ့သည်ဟု ဖော်ပြထားသည်။

ထိုသို့တိုက်ခိုက်ခဲ့၍ ရမ်းဗြဲမြို့၊ ကိုယ်ရံ‌တောင်ဘုရား အနီးဝန်းကျင်နှင့် အမှတ် (၅) လောင်းချောင်းရပ်ကွက်၊ တောင်ဥက္ကလာဘက်သို့ လက်နက်ကြီးကျည်များကျရောက်ပေါက်ကွဲခဲ့ပြီး အမှတ် (၄) ရပ်ကွက်၊ ကင်းတဲနှင့် အောင်စေတီရှိ လူနေအိမ်အချို့မှာ မီးလောင်ပျက်စီးခဲ့ရသည်ဟုဆိုသည်။

ထို့အပြင်နေ့လည်ပိုင်း၌ စစ်ကောင်စီ၏ Y12 ထောက်ပို့လေယာဉ်သည် ရိက္ခာဖြည့်တင်းမှု (၅) ကြိမ်ထက်မနည်း ပြုလုပ်ခဲ့ကြောင်းဖော်ပြသည်။

ရမ်းဗြဲမြို့၊ သိမ်တောင်ဘုရားကုန်းထက်တွင် အခြေချတပ်စွဲထားသည့် စစ်ကောင်စီတပ်စခန်းမှ လက်နက်ကြီးများဖြင့် (၁၀) ကြိမ်ပစ်ခတ်တိုက်ခိုက်ခဲ့ပြီး စစ်ကောင်စီ၏ ကမ်းထိုးဇက်နေဗီနှင့် အမှတ် (၄၁) တိုက်ခိုက်ရေးနေဗီတို့မှလည်း လက်နက်ကြီးပစ်ခတ်မှုများဆက်လက်လုပ်ဆောင်ခဲ့သည်ဟု ဆိုသည်။

ရသေ့တောင်မြို့ပတ်ဝန်းကျင်ရှိ ကျေးရွာများဖြစ်ကြသော ပြားချောင်းကြီး၊ ခနောင်းကြီး၊ သောင်းဒရား၊ ရွာသစ်ကေ၊ ကျောက်ဆုံ၊ ဇရပ်လှ၊ နွားတင်းကုတ်၊ လမုန်းတိုင်နှင့် လိုင်ဂွင်ကျေးရွာများ၏ အနီးပတ်ဝန်းကျင်များသို့ စစ်ကောင်စီက ဂျက်တိုက်လေယာဉ်များဖြင့် တိုက်ခိုက်ခဲ့ဟုအသိပေးသည်။

စစ်ကောင်စီသည် အတွဲလိုက်ဒုံးများဖြင့် ဘူးသီးတောင်ဘက်မှလည်းကောင်း၊ စစ်တွေ အမြင့်ကျွန်း ပါဒလိတ် ဘက်မှ လက်နက်ကြီးများဖြင့်လည်းကောင်း၊ စစ်တွေမြို့ပတ်
ဝန်းကျင်ရှိ သင်္ဘောများပေါ်မှလည်းကောင်း လက်နက်ကြီး များဖြင့် ပစ်ခတ်တိုက်ခိုက်မှုများကို ယမန်နေ့ညပိုင်းမှ စတင်ကာ မရပ်မနားပြုလုပ်ပြီး ရသေ့တောင်မြို့ရှိ ၎င်းတို့၏စခန်း
များအား အသည်းအသန်ခုခံကာကွယ်လျက်ရှိသည်ဟု ထုတ်ပြန်သည်။

ထို့ပြင် တောင်ကုတ်မြို့နယ်၊ လမုတိုက်နယ်ရှိ ကျောက်ဖြူချောင်းအနီးဝန်းကျင် နေရာများသို့ စစ်ကောင်စီသည် ဂျက်တိုက်လေယာဉ်ဖြင့် လာရောက်ဗုံးကြဲတိုက်ခိုက်မှုများ ပြုလုပ်ခဲ့သည်ဟု ဆိုသည်။

ကျောက်ဖြူမြို့နယ် အခြေစိုက် “ခမရ (၅၄၂) ဗျူဟာကုန်း” နှင့် “အမှတ် (၃၂) ရဲတပ်ရင်း” တို့ကလည်း ကျောက်ဖြူမြို့နယ်၊ ဂုံးချွိန်တိုက်နယ်၊ ငှက်ပျောချောင်းကျေးရွာနှင့် အနီးပတ်ဝန်းကျင်နေရာများသို့ လက်နက်ကြီးများဖြင့် အကြိမ်ပေါင်း (၆၀) ထက်မနည်း ပစ်ခတ်တိုက်ခိုက်ခဲ့ရာ လူနေအိမ်အချို့ ထိခိုက်ပျက်စီးခဲ့ရသည်ဟု ဖော်ပြသည်။

မောင်တောမြို့နယ်၊ ညောင်ချောင်းကျေးရွာမှ အသက် (၁၅) နှစ် အရွယ် မွတ်ဆလင်အမျိုးသားငယ်တစ်ဦးသည် ညောင်ချောင်းကျေးရွာမြောက်ဘက်ရှိ စစ်ကောင်စီ၏ မြို့သူကြီးအခြေစိုက် နခခ (၅) ခြံစည်းရိုးအနီး၌ စစ်ကောင်စီထောင်ထားသည့် မြေမြှုပ်မိုင်းအား တက်နင်းမိခဲ့ရာမှ
ညာဘက်ခြေထောက်၏ ဒူးဆစ်အောက်ပိုင်းပြတ်ထွက်ကာ   ဘယ်ဘက်ခြေ‌ထောက်နှင့် ကိုယ်ခန္ဓာအောက်ပိုင်းတစ်ခုလုံးမှာလည်း အပြင်းအထန်ထိခိုက်ဒဏ်ရာရရှိခဲ့ရသည်ဟုအသိပေးသည်။

ရက္ခိုင့်တပ်​တော်-AA ကကျောက်​တော်မြို့ကိုသိမ်းပိုက်ထိန်းချုပ်ပြီး​နောက် အ​နောက်ပိုင်းတိုင်းစစ်ဌာနချုပ်
(နပခ)လက်​အောက်ရှိ ​ကျောက်​တော်တပ်နယ် ​ရှေ့တွင် ရက္ခိုင့်တပ်​တော် အလံလွှင့်ထူပြီး AAတပ်ဖွဲ့ဝင်များကို​တွေ့ရစဥ်။ ဓါတ်ပုံ-AA Info Desk

ပုလဲမြို့နယ် ပျူစောထီးရွာမှ မိခင်နှစ်ဦး ကလေးများခေါ်ဆောင်ကာ ထွက်ပြေးလာ

အောင်ဇေယျ/People's Spring

စစ်ကိုင်းတိုင်း၊ ပုလဲမြို့နယ်၊ ဇီးဖြူကုန်းပျူစောထီးကျေးရွာနေ မိခင်နှစ်ဦးသည် ၎င်းတို့၏ ကလေးငယ်များခေါ်ဆောင်ကာ ထွက်ပြေးလွတ်မြောက်လာပြီး ပုလဲပြည်သူ့အုပ်ချုပ်ရေးအဖွဲ့ထံ ခိုလှုံလာကြောင်း ပုလဲ(ပအဖ)အဖွဲ့၏ လူသားစာနာတာဝန်ခံက ပြောသည်။

ယမန်နေ့ (ဖေဖော်ဝါရီ ၁၄ရက်)က ပုလဲမြို့နယ်၊ ဇီးဖြူကုန်း‌ပျူစောထီးကျေးရွာနေ မိသားစုနှစ်စုမှ ခြောက်ဦးသည် ပုလဲမြို့နယ်ပြည်သူ့အုပ်ချုပ်ရေးအဖွဲ့ထံ အလင်းဝင်ခိုလှုံခွင့်တောင်းခံလာ၍ လိုအပ်သော စစ်ဆေးမေးမြန်းမှုများပြုလုပ်ကာ လက်ခံပေးခဲ့ကြောင်း ပုလဲ(ပအဖ)အဖွဲ့၏ လူသားစာနာတာဝန်ခံက ပြောသည်။

မိခင်နှစ်ဦးနှင့်အတူ ၎င်းတို့၏ ကလေးငယ်များဖြစ်သော (၃)နှစ်၊ (၆)နှစ်၊ (၁၂)နှစ်နှင့် (၁၅)နှစ် အရွယ် ကလေးငယ် လေးဦး လွတ်မြောက်လာခဲ့ခြင်းဖြစ်သည်။

"သူတို့က နွားကျောင်းရင်းနဲ့ ထွက်ပြေးလာကြတာ။ ဟိုထဲမှာ ဟင်းချိုမှုန့်တို့ ဆီတို့ ဟင်းချက်စရာထဲမှာခပ်မစားရတာကြာပြီတဲ့။ လုံးဝကိုစားရေးသောက်ရေးခက်ခဲနေတာ။ သူတို့လည်းထွက်ချင်နေတာကြာပြီ။ ဒါပေမယ့်ဒီဘက်မှာ အန္တရာယ်ရှိတယ်ဘာညာကြားတော့ ထွက်ရတာချိန်ဆနေရတာပေါ့။ ခုတော့အရင်ထွက်တဲ့သူတွေနဲ့ချိတ်ဆက်မိပြီးတော့ ဒီဘက်မှာအန္တရာယ်မရှိဘူး။ ဘယ်သူကမှဘာမှမလုပ်ဘူးဆိုလို့ သူတို့ထွက်လာကြတာ။"ဟု ပုလဲ(ပအဖ)အဖွဲ့ခေါင်းဆောင် ဦးဇော်ထက်က ပြောသည်။

ထွက်ပြေးလာသူများအား ပျူစောထီးနှင့် စစ်ကောင်စီများထံ ဆက်သွယ်ခြင်း၊သတင်းအချက်အလက်ပေးပို့ခြင်း၊ တော်လှန်ရေးအင်အားစုများကို ထိခိုက်နစ်နာစေ‌သော အပြုအမှုများနှင့် သူလျှိုဒလန်ပြုလုပ်ခြင်းများ လုံးဝမပြုလုပ်ရန်နှင့် ပြုလုပ်မိပါက ထိရောက်စွာအရေးယူအပြစ်ပေးခံရမည်ဖြစ်ကြောင်း ဝန်ခံကတိ လက်မှတ်ရေးထိုးစေခဲ့သည်ဟု ပုလဲ(ပအဖ)အဖွဲ့က ပြောသည်။

ထို့နောက် လွတ်မြောက်လာသူ ခြောက်ဦးအား ကျပ် ၁၂၀,၀၀၀ ၊မိုးကာ(၂)ချပ်၊ အမျိုးသမီး၊အမျိုးသားဝတ် လုံခြည်များကူညီထောက်ပံ့ပေးခဲ့ကြောင်း သိရသည်။

အာဏာသိမ်းကာလအတွင်း ပုလဲမြို့နယ်တွင် ပျူစောထီးအားကောင်းရာ အင်မထီးရွာနှင့် ဇီးဖြူကုန်းကျေးရွာတို့မှ ရွာသူ၊ရွာသား ၅၀ ကျော် ပုလဲမြို့နယ် ပြည်သူ့အုပ်ချုပ်ရေးအဖွဲ့ထံ အလင်းဝင်ခဲ့ကြောင်း သတင်းရရှိသည်။

)

ဇီးဖြူကုန်းပျူရွာမှ ထွက်ပြေးလွတ်မြောက်လာသူ ၆ ဦးအား ပုလဲပအဖအဖွဲ့က ထောက်ပံ့နေစဥ်။ ဓာတ်ပုံ - ပုလဲ(ပအဖ)

မြောက်ခင်ရန်းရွာမှစစ်ကောင်စီ၊ပျူ ပူးပေါင်းစစ်ကြောင်းက​ဒေသခံပြည်သူ ၁၀ ဦးကို သတ်ဖြတ်၊၁၃ ဦးကို ဖမ်းဆီးထား

ဇော်ရမ်း/People's Spring

ဂန့်‌ဂေါမြို့၊ မြောက်ခင်ရန်းရွာမှထွက်လာသည့် စစ်ကောင်စီတပ်နှင့် ပျူစောထီးပူးပေါင်းစစ်ကြောင်းက ဘေးပတ်ဝန်းကျင် ကျေးရွာသုံးရွာမှ​ဒေသခံပြည်သူဆယ်ဦးကို ဖမ်းဆီးသတ်ဖြတ်ခဲ့ပြီး အမျိုးသမီးအချို့အပါအဝင် ၁၃ ဦးကို ဖမ်းဆီးသွားကြောင်း ​​​ဒေသခံအချို့က​ပြောသည်။

​ဒေသခံပြည်သူအမျိုးသားဆယ်ဦးအား အစုလိုက်အပြုံလိုက်ထပ်မံသတ်ဖြတ်မှုကို ယမန်နေ့(ဖေဖော်ဝါရီလ ၁၄ရက်) နံနက်က ဖြစ်ပွားခဲ့ခြင်းဖြစ်သည်။

"မြောက်ခင်ရန်းထဲကနေ အင်အား ၂၅၀ လောက်ထွက်လာတာကို ရဲဘော်တွေက တိုက်တာမှာ သူတို့ဘက် အသေအဆုံးများတယ်။ အဲ့ဒါနဲ့ ရွာတွေထဲ ဝင်ပြီး အရပ်သားတွေကို ဖမ်းတယ်။ ဘုရားကုန်းမှာ သတ်သွားတာ" ဟု ဂန့်ဂေါမြို့ ပြည်သူ့အုပ်ချုပ်ရေးအဖွဲ့မှတာဝန်ရှိသူတစ်ဦးကပြောသည်။

စစ်ကောင်စီစစ်ကြောင်းသည် မြောက်ခင်ရမ်းရွာအနီး သင်တောရွာမှခုနစ်ဦး၊ရွှေဘိုရွာမှနှစ်ဦး၊ ရေသာရွာမှတစ်ဦးကို ဦးခေါင်းအားသေနတ်ဖြင့်ပစ်ခတ်၍ သတ်ဖြတ်သွားခြင်းဟုသိရသည်။

အသတ်ခံရသူများမှာ သင်တောရွာမှဦးမောင်ပု၊ဦးပြူးသာ၊ဦးဌေးအောင်၊ဦးမောင်နိုင်၊ ဦးဖိုးသေးနောင်၊ဦးသက်လွင်၊ဦးဘိုသန်း၊ ရွှေဘိုရွာမှဦးတိုးလွင်၊ ဦးမျိုးသန့်၊ ရေသာရွာမှဦးဇော်လင်းမောင် တို့ဖြစ်​ကြောင်း​​ဒေသခံအချို့က​ပြောသည်။

ဖမ်းဆီးသွားသူ၁၃ဦးရှိပြီး အမျိုးသမီးအချို့ပါဝင်ကြောင်း ဒေသခံများကပြောသည်။ ဖမ်းဆီးခံထားရသူများနှင့်ပတ်သတ်၍ နောက်ဆက်တွဲအခြေအနေကိုမသိရှိရသေးပေ။

ယခုတကြိမ် မြောက်ခင်ရမ်းရွာမှထွက်ခွာလာသောစစ်ကောင်စီစစ်ကြောင်းတွင် ဒရုန်းများလည်း ပါဝင်လာပြီး မြေပြင်တိုက်ပွဲအပြင်းအထန်ဖြစ်ခဲ့​ကြောင်း​ဒေသခံ ကာကွယ်ရေးတပ်ဖွဲ့ဝင်တဦးကပြောသည်။

မြောက်ခင်ရန်းရွာသည် စစ်တပ်အရာရှိဟောင်း ဘူးလက်လှဆွေ နေသည့် ရွာဖြစ်သည်။ ဘူးလက်လှဆွေသည် မြောက်ခင်ရန်းရွာကို ပျူစောထီးရွာအဖြစ်ဦး​ဆောင်ဖွဲ့စည်း​ပေးခဲ့သူဖြစ်သည်။

ပြီးခဲ့သည့် ၂၀၂၃ နိူဝင်ဘာလ ၇ရက်က မြောက်ခင်ရန်းရွာတိုက်ပွဲအတွင်း ဖမ်းမိသွားသည့် ယောကာကွယ်ရေးတပ်မှ ရဲဘော် ဖိုးတေနှင့်သားထောင်ကိုစစ်ကောင်စီနှင့်ပျုစောထီးများက အများပြည်သူမြင်ကွင်းတွင် အရှင်လတ်လတ်မီးရှို့သတ်ဖြတ်ခဲ့သည်။ ယခုအခါ ဘူးလက်လှဆွေဦးဆောင်သည့် ပျူစောထီးများနှင့် စစ်ကောင်စီတပ်က အရပ်သားများအား အစုလိုက်အပြုံလိုက်သတ်ဖြတ်မှု ထပ်မံကျူးလွန်ခြင်းဟု ပြည်သူ့ကာကွယ်ရေးရဲဘော်များကပြောသည်။

မြောက်ခင်ရမ်းရွာအဝင်တစ်​နေရာ။ဓါတ်ပုံ-CJ

မံစီမြို့နယ်ရှိ တံတားတစ်စင်း စစ်ကောင်စီ လေကြောင်း တိုက်ခိုက်ဖျက်ဆီး

ဆန်အောင်/People’s Spring

ကချင်ပြည်နယ် မံစီမြို့နယ် ဂျယ်အိုးကျေးရွာအနီးရှိ တံတားတစ်စင်းကို စစ်ကောင်စီက လေကြောင်း တိုက်ခိုက်မှု ပြုလုပ်ကာ ဖျက်ဆီးလိုက်သည်ဟု စစ်ရေးသတင်းရင်းမြစ်က ပြောပြသည်။

ယနေ့ (ဖေဖော်ဝါရီ ၁၅ရက်) နံနက် ၁နာရီနှင့် ၂နာရီ အကြားတွင် တိုက်ခိုက်ဖျက်ဆီးသည်ဟု ဆိုသည်။

"ဂျယ်အိုးရွာအဝင်ရှိ အများပြည်သူသွားလာနေသောတံတားကိုစကစ စစ်တပ် ဂျက်ဖက်တာ ၃စီး လာရောက် ဗုံးကြဲဖျက်ဆီးလိုက်ပါတယ်။ တိုက်ပွဲဖြစ်ပွားခြင်းမရှိပါ"ဟု စစ်ရေးသတင်းရင်းမြစ်က ပြောသည်။

မံစီမြို့နယ်တွင် လတ်တလောတိုက်ပွဲဖြစ်ပွားမှု မရှိသော်လည်း ဇန်နဝါရီအတွင်းက စစ်ကောင်စီ၏ မံဝိန်းကြီးနှင့် ကိုက်ထိပ် တပ်စခန်းများအပါအဝင် မံစီမြို့နယ်အတွင်းရှိ စစ်စခန်းများကို ကချင်လွတ်လပ်ရေးတပ်မတော်(KIA)က စခန်းသိမ်းတိုက်ခိုက်မှုများ ပြုလုပ်ခဲ့ရာ အချိန်တိုအတွင်း စစ်ကောင်စီတပ်စခန်းများကို သိမ်းနိုင်ခဲ့သည်။

ယနေ့နံနက်တွင် စစ်ကောင်စီတပ်က တံတား တစ်စင်း ဖောက်ခွဲဖျက်ဆီးမှုနှင့် ပတ်သက်ပြီး အမျိုးသားညီညွတ်ရေးအစိုးရ ပြည်ထောင်စုဝန်ကြီး ဒေါက်တာတူးခေါင်ကလည်း ၎င်း၏ လူမှုကွန်ရက်တွင် ရေးသားအသိပေးထားသည်။

"အရင်တုန်းကတော့ တိုင်းရင်းသား တော်လှန်ရေးအဖွဲ့များရှိရာ ဒေသသို့ စစ်ကြောင်းထိုးလာရင် လုပ်လေ့လုပ်ထရှိတဲ့ အလေ့အထ ပေါ့။ စစ်ကြောင်းလာရာလမ်းတလျှောက် တံတား အကုန်ဖေါက်ခွဲပစ်တာမျိုး။ မြန်မာ့အလင်းမှာတော့ သောင်းကျန်းသူများ ပြည်သူသွားရာလမ်းတံတား ဖေါက်ခွဲဖျက်စီး ဆိုတဲ့ ခေါင်းစီးမျိုး ပလူပျံ ပေါ့။ အခုတော့ ပြောင်းပြန်ဖြစ်နေပြီ"ဟု ဒေါက်တာ တူးခေါင်က ရေးသားထားသည်။

KIAအနေဖြင့် ကချင်နှင့်ရှမ်းမြောက်ရှိ စစ် ကောင်စီတပ်စခန်းများအား တိုက်ခိုက် သိမ်းပိုက် မှုများကို ၂၀၂၃ နှစ်ကုန်ပိုင်းကတည်းက မကြာခဏပြုလုပ်လျက်ရှိရာ ယခုနှစ်ဆန်းတွင် အရှိန်မြှင့် ဆောင်ရွက်လျက်ရှိသည်။

ဒေသအသီးသီး၌ စစ်ရေးအရ အထိနာနေသည့် စစ်ကောင်စီတပ်သည် တံတားများကို မိုင်းခွဲဖျက်ဆီးမှုများ၊ လမ်းများကို စက်ယန္တရား အသုံးပြု ဖျက်ဆီးခြင်းများ ပြုလုပ်ခဲ့သည်။

(ဂျယ်အိုးကျေးရွာအနီးရှိ တံတားအား တွေ့ရစဉ်။ ဓာတ်ပုံ - Myu Tsaw Kasa)

ပြည်သူလူထုနှင့် လူငယ်များအား အကာအကွယ်ပေးနိုင်ရန် လိုအပ်သည့်လုပ်ငန်းစဉ်နှင့် အစီအမံများ အမြန်ဆုံး ဖော်ဆောင်သွားမည်ဟု NUCC ထုတ်ပြန်

▪︎တော်လှန်ရေးအင်အားစုများကလက်ရှိအ​ခြေအ​နေကိုလုံခြုံရေးစည်းမကျိုးပေါက်​စေဘဲ​ကိုင်တွယ်​ဖြေရှင်း​ပေး​ရေးပြင်ဆင်ထားရန်နှင့်လူငယ်များတော်လှန်​ရေးတွင်ပြတ်ပြတ်သားသားပါဝင်ကြရန်တိုက်တွန်း

သော်မွန်/People’s Spring

ပြည်သူလူထုနှင့် လူငယ်များအား အကာအကွယ်ပေးနိုင်ရန် လိုအပ်သည့်လုပ်ငန်းစဉ်နှင့် အစီအမံများအား အမြန်ဆုံး ဖော်ဆောင်သွားမည်ဖြစ်ကြောင်း အမျိုးသားညီညွတ်ရေးအတိုင်ပင်ခံကောင်စီ(NUCC)က ယနေ့(ဖေဖော်ဝါရီ ၁၅ရက်)ထုတ်ပြန်သည်။

စစ်အုပ်စုက ပြဌာန်းခဲ့သော ပြည်သူ့စစ်မှုထမ်းဥပဒေနှင့်ပတ်သက်၍ ထုတ်ပြန်ခဲ့ခြင်းဖြစ်ပြီး NUCC အနေဖြင့် အမျိုးသားညီညွတ်ရေးအစိုးရ NUG၊ တိုင်းရင်းသားလက်နက်ကိုင်တော်လှန်ရေးအင်အားစုများအပါအဝင် တော်လှန်ရေးအင်အားစုများနှင့် ပူးပေါင်း၍ ပြည်သူလူထုနှင့် လူငယ်များအတွက် လိုအပ်သည့်လုပ်ငန်းစဥ်နှင့် အစီအမံများကို အမြန်ဆုံးဖော်ဆောင်သွားမည်ဟု ဖော်ပြသည်။

“ဒါနဲ့ပတ်သက်လို့ NUCC မှာ သီးခြားလုပ်ငန်းကော်မတီဖွဲ့ပြီး ဆောင်ရွက်ဖို့ဆိုပြီး လုပ်ငန်းကော်မတီဖွဲ့တာရှိတယ်။ ပြီးရင် အဲဒီ NUCC လုပ်ငန်းကော်မတီနဲ့ NUG နဲ့ ညှိနှိုင်းပြီးတော့ NUCC နဲ့ NUG ဒီကိစ္စအပေါ်မှာ တုန့်ပြန်ဆောင်ရွက်ဖို့ အတွက် လုပ်ငန်းစဥ်တွေ၊​အစီအမံတွေဆောာင်ရွက်ဖို့အတွက် Joint Working Committee ဆိုပြီး NUG နဲ့ NUCC ပေါင်းစပ်ဖွဲ့ပြီးတော့ ဆက်လက်ပြီး တုန့်ပြန်ဆောင်ရွက်မှုတွေကို အချိန်နဲ့ တပြေးညီလုပ်သွားဖို့ ရှိပါတယ်” ဟု NUCC အဖွဲ့ဝင် ဦးတိုးကျော်လှိုင်က ပြောသည်။

ထို့အပြင် တိုင်းရင်းသားတော်လှန်ရေးအင်အားစုများ၊ အခြားသောတော်လှန်ရေးအင်အားစုများနှင့် အထက်ပါ Joint Working Committee ကို ချိတ်ဆက်ကာ လူငယ်များ၊ ပြည်သူလူထုကို အကာအကွယ်ပေးနိုင်ရေး ထိရောက်စွာ ဆောင်ရွက်ရန် အလေးထားဆုံးဖြတ်ထားကြောင်း ၎င်းက ဆက်ပြောသည်။

ပြည်သူ့စစ်မှုထမ်းဥပဒေအားအသက်သွင်းခြင်းသည် တိုင်းပြည်၏အနာဂတ်ဖြစ်သော ကျောင်းသား၊လူငယ်များအား စစ်မြေပြင်သို့ အတင်းအကျပ် တွန်းပို့ခြင်း၊ လူသားဒိုင်းအဖြစ် အသုံးပြုရန် ကြံစည်ခြင်းဖြစ်ပြီး စစ်ရာဇဝတ်မှုကို ဗြောင်ကျကျ ကျူးလွန်ခြင်းဖြစ်ကြောင်း NUCC က တော်လှန်ရေးအင်အားစုများ၊ ပြည်သူလူထုနှင့် နိုင်ငံတကာသို့ တိုက်တွန်းနှိုးဆော်ချက် ကြေညာချက်၌ ဖော်ပြသည်။

ထို့အပြင်စစ်အုပ်စုကကျူးလွန်သော ရာဇဝတ်မှုများအား နိုင်ငံတကာကထိရောက်စွာ ဟန့်တား အရေးယူနိုင်ခြင်းမရှိသောကြောင့် ယခုကဲ့သို့ပိုမိုပြင်းထန်သောရာဇဝတ်မှုများကို ဆက်လက်ကျူးလွန် လာခြင်းဖြစ်ကြောင်း NUCC ကဆိုသည်။

အကြမ်းဖက်စစ်အုပ်စုကြောင့်ဖြစ်သော ဒေသတွင်း မတည်ငြိမ်မှုကို ပို၍ ပြင်းထန်ဆိုးရွားစေမည်ဖြစ်ရာ၊ အိမ်နီးချင်းနိုင်ငံများ၊ အာဆီယံနိုင်ငံများနှင့် ကမ္ဘာ့ ကုလသမဂ္ဂ အပါအဝင် နိုင်ငံတကာအစိုးရများအနေဖြင့် အလျင်အမြန်တုံ့ပြန်ရမည်ဖြစ်ပြီး ယင်းအတွက် အကြမ်းဖက်စစ်အုပ်စုအား ထိရောက်စွာ အရေးယူဆောင်ရွက်ရန်နှင့် ပြည်ပနိုင်ငံများသို့ ထွက်ပြေး တိမ်းရှောင်ရသည့် ပြည်သူများနှင့် လူငယ်များအား လူသားချင်းစာနာ ထောက်ထားမှုဖြင့် ကူညီကာကွယ်ပေးကြရန် NUCC ကတိုက်တွန်းသည်။

တော်လှန်ရေးအင်အားစုများ အနေဖြင့်လည်း မိမိတို့၏ လုံခြုံရေးစည်းကို မကျိုးပေါက်စေဘဲ ထိုအခြေအနေကို အကောင်းဆုံးကိုင်တွယ်ဖြေရှင်းနိုင်ရန် အသင့်ပြင်ဆင်ထားကြရမည်ဖြစ်ပြီး လူငယ် များ၊ ပြည်သူများအနေဖြင့် စစ်မှုထမ်းရန် အတင်းအဓမ္မစုဆောင်းမခံလိုလျှင် တော်
လှန်ရေးအင်အားစုများနှင့် ချိတ်ဆက်ပြီး လွတ်မြောက်နယ်မြေများသို့ လာရောက်ပူးပေါင်း၍ နွေဦးတော်လှန်ရေးတွင် ပြတ်ပြတ်သားသား ပါဝင်ကြရန် ဆက်လက်တိုက်တွန်းသည်။

စစ်မှုထမ်းဥပဒေပြဌာန်းအသက်သွင်းခြင်းသည် အကြမ်း
ဖက်စစ်အုပ်စု၏ ထိုသို့သွေးရူးသွေးတန်းလုပ်ဆောင်ချက်ဖြစ်ပြီး ပြိုကျပျက်စီးအဆုံးသတ်တော့မည့် ၎င်းတို့၏အခြေအနေကို မီးမောင်းထိုးပြလိုက်ခြင်းဖြစ်သည်ဟု NUCC က သုံးသပ်သည်။စစ်အုပ်စု ဖန်တီးထားသည့် အထွေထွေအကြပ်အတည်းများကြားတွင် ဒုက္ခပင်လယ်ဝေနေသည့် ပြည်သူလူထုတရပ်လုံးကို ပိုမိုပြင်း ထန်စွာဖိနှိပ်လိုက်ခြင်းဖြစ်ပြီး ပြည်သူလူထုအား အတင်းအဓမ္မအစ
ဖျောက်ရန် ကြိုတင် ပြင်ဆင်လာခြင်းဖြစ်သည်ဟု ဆိုသည်။

ပြည်ထောင်စုလမ်းမကြီး၌ စစ်တပ်က လေကြောင်းတိုက်ခိုက်၍ ကုန်ကားနှစ်စီးထက် မနည်းပျက်စီး၊ ပြည်သူအချို့ ဒဏ်ရာရ

အောင်ဇေယျ/People's Spring

စစ်ကိုင်းတိုင်း၊ တန့်ဆည်​ - ကလေးဝလမ်းပိုင်းရှိ ပြည်ထောင်စုလမ်းမကြီး၌ စစ်ကောင်စီတပ်က တိုက်ပွဲမရှိဘဲ လေကြောင်းမှ နှစ်ကြိမ်တိုက်ခိုက်ခဲ့၍ ကုန်ကား၂စီးထက်မနည်းပျက်စီးပြီး ယာဉ်မောင်းနှင့်ပြည်သူအချို့ ထိခိုက်ဒဏ်ရာရရှိခဲ့ကြောင်း သတင်းရရှိသည်။

ယမန်နေ့ (ဖေဖော်ဝါရီ၁၄ ရက်) နေ့လယ် ၁၂ နာရီနှင့် ၁ နာရီခန့်က တန့်ဆည်မြို့နယ်အနောက်ဘက်ခြမ်း၊ တန့်ဆည်-ကံထူးမ-ကလေးဝလမ်းပိုင်း ပြည်ထောင်စုလမ်းမကြီး (၃၈)မိုင်နှင့် (၃၉)မိုင်ကြားအား K-8 အမျိုးအစား ဖိုက်တာတစ်စီးဖြင့်တစ်ကြိမ်၊ A-5အမျိုးအစား ဖိုက်တာတစ်စီးဖြင့် တစ်ကြိမ် နှစ်ကြိမ်တိုင် လာရောက်ပြီး ပေါင် ၅၀ဝ ဗုံးရှစ်လုံးထက်မနည်း ကြဲချတိုက်ခိုက်သွားကြောင်း ရေဦးနယ်အခြေပြု People's Defense Comrade အဖွဲ့၏ ပြန်ကြားရေးတာဝန်ခံ ကိုထူးခန့်ဇော်(အမေ့သား)က ပြောကြားသည်။

ထိုတိုက်ခိုက်မှုကြောင့် ကားသမား၂ဦးနှင့် ပြည်သူအချို့ ထိခိုက်ဒဏ်ရာရရှိခဲ့သည်။ ထို့အပြင် ကုန်ကားကြီး၂စီး ပျက်စီးပြီး စပါးနှင့် သစ်ဝါးတင်လာသော ယာဉ်ကြီးနှစ်စီးလည်း ပျက်စီးမှုရှိကြောင်း ကိုထူးခန့်ဇော်က ပြောသည်။

"လေကြောင်းတိုက်ခိုက်ခဲ့တဲ့အချိန်ဟာ ထိုလမ်းမကြီးပေါ်မှာ အများပြည်သူသွားလာနေကြတဲ့အချိန်ဖြစ်တယ်။ ခရီးသွားကားတွေရောသွားလာနေကြတဲ့အချိန်ပဲ။ ကုန်ကားကြီး၂စီးကတော့ ဘာမှရစရာမရှိ ပျက်စီးသွားတယ်။ကားဆရာတွေနဲ့ ခရီးသွားပြည်သူတချို့လဲ ထိခိုက်ဒဏ်ရာတွေရရှိခဲ့ကြတယ်။အသက်အန္တရာယ်တော့မစိုးရိမ်ရဘူးလို့သိရတယ်။"ဟု ကိုထူးခန့်ဇော်က ပြောသည်။

လေကြောင်းတိုက်ခိုက်သည့်နေရာသည့် မည်သည့်တိုက်ပွဲမျှ ဖြစ်ပွားခြင်းမရှိဘဲ စစ်တပ်က အကြောင်းမဲ့ပစ်ခတ်သွားခြင်းဖြစ်ကြောင်း ဒေသခံများက ပြောသည်။

"အဲ့ဒီလမ်းမကြီးက တိုက်ပွဲဖြစ်ပွားထားတာ လုံးဝမရှိဘူး။ စစ်ကြောင်းထိုးနေခြင်းလည်းမရှိဘူး။
ဘယ်လိုသတင်းပေးမှားယွင်းမှုကြောင့် အခုလိုဖိုက်တာ၂စီးနဲ့သုံးပြီး ပြည်သူတွေသွားလာနေတဲ့အချိန် လာပစ်သွားတယ်ဆိုတာ စဥ်းစားလို့မရဘူး။ အခုကိစ္စက စစ်ရေးပစ်မှတ်မဟုတ်တဲ့ အများပြည်သူအသုံးပြုနေတဲ့ ပြည်ထောင်စုလမ်းမကြီးကို ဗုံးကြဲသွားတဲ့ဖြစ်ရပ်က ဘယ်ရှုဒေါင့်ကနေကြည့်ကြည့် တော်တော်လေးကိုအောက်တန်းကျယုတ်မာလွန်းပါတယ်။"ဟု People's Defense Comrade အဖွဲ့၏ ပြန်ကြားရေးတာဝန်ခံ ကိုထူးခန့်ဇော်(အမေ့သား)က ပြောသည်။

ထို့အပြင် ဒဏ်ရာရရှိခဲ့သည့် ပြည်သူများကို CAF Medic Team အဖွဲ့က ဆေးကုသမှုများ ပြုလုပ်ပေးခဲ့သည်။

ဖေဖော်ဝါရီ ၅ ရက် နံနက်ပိုင်းက ကရင်နီပြည်နယ်၊ ဒီးမော့ဆိုမြို့နယ်ရှိ စစ်ဘေးရှောင်ကလေးငယ်များ၏ စာသင်ကျောင်းကို စစ်တပ်က လေယာဉ်ဖြင့် ဗုံးကြဲတိုက်ခိုက်ရာ ကလေးငယ် လေးဦးသေဆုံးပြီး ၁၀ ဦးကျော်ဒဏ်ရာရရှိခဲ့သေးသည်။