ربي يوفقكم ف امتحانكم ويفتح عليكم 🙌🏻 نصيحتي لكم ضروري لتثبيت المعلومات أنكم تاخذوا قسط من الراحة وعدد ساعات نوم كافي للتركيز والمراجعة ف الصبح قبل الامتحان ب ساعات بشكل سريع

السلام عليكم يا دفعة 46

هي الأولى ربي إن شاء الله يسهل عليكم البارا ، و تجيكم نزيكة وساهلة كيف امتحان المايكرو، وتطلعوا منها راضيين فرحانين كلكم 🙌🙌💛

الحاجة الأخرى اللي نبي نقولها لكم
هي بخوص #امتحان_الباثو الجزئي ✅✅

أكيد طبعا فيه منكم من الجنرال مكمله ومثبته 100% ومش خايف عليه أبدا، وفيه منكم من ما زال الجنرال باثولوجي مش ثابت معاه.

بعون الله حنساعدكم في أيام امتحان الباثو ونكون معاكم خطوة بخطوة، وحنزللكم خطة تنظموا بيها أموركم وتلموا بيها الجنرال بالكامل إن شاء الله، بالإضافة إلى بعض المساعدات الأخرى اللي حنقدمهن لكم إن شاء الله و حنعلمكن بيهن بعد كم يوم 🙏

مبدئيا فقط ما نبيش أي حد فيكم يشيل همها أبدا الباثو ، صحيح أنها دسمة شويا ، ولكن والله ممتعة والفهم فيها يلخصها عليكم بشكل كبير والله

ونبي نبهكم على نقطتين فيها :-

النقطة الأولى بناء على توزيع أسئلة امتحان الجزئي متاع الدفعة 45 (السنة اللي فاتت)، كانن عدد الMCQs + T/F تقريبا 56 سؤال ، موزعات كالتالي :-

- Cell injury part 1+2 (6 MCQ)
- Adaptation (1 MCQ)
- Accumulation (3 MCQ)
فهذينا لو تقراهن ك Bulk واحد كامل ، تضمن تحل 20% من الامتحان
⚪🔴⚪🔴⚪🔴⚪🔴⚪🔴⚪🔴⚪🔴

- Inflammation and Repair (10 MCQ)
لذلك لو تقنط كورس الانفلاميشن تضمن تحل 20% من الامتحان

⚪🔴⚪🔴⚪🔴⚪🔴⚪🔴⚪🔴⚪🔴
هيمودينامك بمختلف أجزاءه :-
- Edema/Hemorrhage/Congestion (3MCQ)
- Thrombosis (4 MCQ)
- Infarction (1 MCQ)
- Embolism (2 MCQ)
- Shock (2 MCC)

فالهيمودينامك لو تقروه و تقنطوه تضمنوا تحلوا 20% من الامتحان

⚪🔴⚪🔴⚪🔴⚪🔴⚪🔴⚪🔴⚪🔴

Immunity (9 MCQs)
Infectious (8 MCQs)
Gene (7 MCQs)

فلذلك لو تقروا الجين و النيوترشن و الاميونتي و الانفكشوس و تقنطوهن تضمنوا تحلوا 40% من الامتحان

الخلاصة :
رد باله أي حد فيكم يقول الكورس هذا مستحيل ما يجيش منه شيء ، الامتحان موزع شبه بالتساوي على كل الكورسات كيف ما ذكرتلكم

ويا حبذا لما واحد فيكم يقرا أي كورس ، يقراه ك Bulk كامل مع الكورسات الاخرى اللي ذكرتهن لكم في التقسيمة

يعني لو تبي تقرا EDEMA كمل جميلك واقرى باقي الهيمو كله

وفيه كورسات رد بالكم تسيبوهن مهما صار اللي هن :-
- Inflammation
- Hemodynamic
- Immunity
- infectious

أكيدة لاحظتوا أن عليهن النسبة الأكبر من الأسئلة

وبعون الله زي ما قلتلكم فيه مساعدات اخرى نبي نقدمهن لكم لكن لما نجهزهن حنقوللكم عليهن ، و ايام الباثو لو أي حد فيكم يبي مني أي مساعدة أو أي شيء يتفضل و يراسلني وبعون الله ربي يقدرني أني نساعدكم @Alomami97

وأخيرا نبي نقوللكم أن دايرلكم MCQs و T/F و Possible Short Note على كل كورس من كورسات الجنرال ، تلقوهن pdf هنا في القناة ، و حنحطهن لكم في مصوراتي قريب من الجامعة بيش يوم امتحان البارا اللي يبيهن ورق ياخذهن.

توا حبيت نعلمكم بالكلام هذا فقط بيش ما تاكلوش همها الباثو أبدا، خليكم توا مركزين في البارا وجدوا واجتهدوا فيها، و ربي يوفقكم ويسهل عليكم جميعا يا رب 🤲🤲💛

#محمد_العمامي
@Alomami97

السلام عليكم يا دفعة 46 💙
زي ما وعدتكم حنزللكم خطة تساعدكم تلموا بيها منهج الجنرال الباثو بالكامل بإذن الرحمن 💪💪💛

بالإضافة إلى أنني درتلكم #تسجيلات_صوتية_مكثفة 🔊🎧 و #جديدة لجميع مواضيع الجنرال باثو (من السل انجري لعند الجين و النيوترشن) شرحي أنا محمد العمامي بالكامل :
⚃ شرح من شيت الجامعة مباشرة
⚃ مع توضيح شن المهم و كيف ممكن يجيكم ك MCQs
⚃ و شن اللي ممكن برضو يجيكم Short Note
⚃ حتلقوهن على قناتنا : t.me/Pathoo46
⚃ واللي ما عنداش نت وما يقدرش يحملهن، يراسلني نجيبهن له بكره في الجامعة ❤🙏
⚃ ملاحظة : إجمالي مدة التسجيلات كلهن 12 ساعة بالكثير ، يعني تسمعوا ساعتين و نص كل يوم فقط ويلتم المنهج كله ✌💛

وكذلك دايرلكم على كل كورس من كورسات الجنرال مجموعة MCQs ، T/F و كذلك مجموعة شورت نوت، تلقوهن قاعدات في ملفات القناة ، و بكره بإذن الله بعد امتحان البارا تلقوهن متوفرات في مصوراتي مركز ليبيا وكان لقيتوه مسكر معناها تلقوهن في مصوراتي التدارك بعون الله 💙✌

نجوا توا للخطة اللي ننصحكم بيها 💚✌💪 :

أولا : نصيحتي لكم في أيام الباثو ، توفير الوقت ثم توفير الوقت ثم توفير الوقت ، الله الله في الوقت راعوه واستثمروه كويس ، وابتعدوا عن أي شيء يضيع وقتكم

ثانيا : بكرا لما تروحوا من البارا ، اللي يبي يبدا يقرا طول للباثو عادي لا بأس، لكن الأفضل أنكم تعطوا لأجسادكم و عقولكم فترة نقاهة شوية تاخذوا فيها نفس، وتشحنوا فيها أنفسكم من جديد، و اللي ما رقدش كويس يعوض نومه بعد ما يروح من امتحان البارا.

يوم الاثنين خلاص لازم تبدوا تقروا...

🔵 يوم الاثنين :

🔸️ساعتين و نص تسمع تسجيلات Cell injury part1+2+Adapatation+Accumulation
️ 🔸️8 ساعات تقرى الشيتات متاعهن، و تقنطهن، بعدما تكون استوعبت كل شيء، وأساسا التسجيلات ثبتن لك المعلومة
️ 🔸️3 ساعات مراجعة (#لابد_منها_كل_يوم)
🔸️️ 3 ساعات فطور وغداء وعشاء وراحة ديروا فيها أي حاجة تنفس عليكم
️ 🔸️8 ساعات نوم

نفس الخطة بالضبط تمشوا عليها باقي الأيام، مع تغيير الكورسات طبعا :

🔵 يوم الثلاثاء :
Inflammation and Repair
🔵 يوم الأربعاء :
Hemodynamic :
- Edema, Hemorrhage and Congesion
- Hemostasis and thrombosis
🔵 يوم الخميس :
Immune Diseases + Infarction + shock

🔵 يوم الجمعة :
Infectious + Embolism

🔵 يوم السبت :
ساعة للجين وساعة للنيوترشن ، كورسات بسيطات أغلب الدفعات اللي سبقتكم قروهن يوم قبل الامتحان 😂😂💛

وباقي اليوم تراجعوا وتثبتوا (مع العلم أنكم اوريدي حتكونوا تراجعوا كل يوم زي ما وضحتلكم في الخطة)

نصيحتي الأخيرة لكم
يأس لا
يأس لا
يأس لا
احباط لا
المنهج مارين عليه أكيدة كلكم ، والوقت واسع ويسدكم بالريح، الدفعة 45 اللي قبلكم عطوهم 4 أيام فقط السنة اللي فاتت، و قدروا عليها، معناها إنتوا تقدروا بالريح عليها بإذن الله 💪💪💙💙💙💙

ملاحظة أخيرة :
امتحان الدفعة 45 الجزئي الأول، سبق وأني نزلته لكم بالحلول وبتسجيل كامل شرحت كل سؤال فيه، و حنزله لكم مرة اخرى بعون الله 🙌🙌

إن شاء الله يا رب نكون نفعتكم وأفدتكم
وربي يوفقكم ويفتح عليكم جميعا يا دفعة
والسلام عليكم ورحمة الله 💚

@Alomami97

يومكم طيب و مبارك جميعا يا دفعة 46 💛

فيه طلبة لعند توا ما يعرفوش عدد وشن الشيتات اللي داخلة للامتحان الجزئي ، فلذلك هذينا هنا :-
1)- Cell injury part 1 (hypoxic,free radical,chemical injury)
2)- Cell injury part 2 (Necrosis and Apoptosis)
3)- Adaptation
4)- Accumulation
5)- Inflammation and Repair
6)- Hemodynamic (Edema ,Hemorrhage,Hyperemia and Congestion)
7)- Hemodynamic (Hemostasis and thrombosis)
8)- Hemodynamic (Embolism and Infarction)
9)- Hemodynamic (Shock)
10)- immune Diseases
11)- Infectious diseases (3 شيتات) (6 Disease : Actionmycosis+TB+Leprosy+Syphilis+Hydatid Cyst+Shistosomiasis)
12)- Genetic Diseases
13)- Nutritional Diseases

موفقين يا رب ❤️🙌🏻

#تنبيه :-
كلموني أكثر من طالب ، وقالولي أنهم يمشوا لمركز ليبيا يطلبوا في تسجيلات المكثف و الMCQs و ما يلقوش فيهن ، رغم أني أمس حطيتهن غادي شخصيا .

المهم توا كيف كنت في المركز ، لقيتهم مريحينهن وسط الأوراق وملفات اللابتوب ، وحطيتهن لهم بروحهن ، بيش معاش يريحن منهم .

فأي طالب ما زال يبيهن ، لو يمشي للمركز بإذن الله يلقاهن

بالتوفيق ❤

نصيحة مهمة جدا جدا جدا جدا جدا
تساعدكم ولابد تفطنولها في أي كيس case في امتحان الباثولوجي

ديما أسئلة الكيسس في امتحان الباثولوجي ، تلقى السؤال يحكيلك في قصة حياة المريض وكلام أطول من ليلة بلا عشاء ، و كله كلام مش مهم و مش حيساعدك في معرفة الجواب نهائيا

ديما تلقى كلمة كلمتين بالكثير هنا اللي يمثلن الkey و المفتاح اللي حيخليك تعرف جواب الكيس

رد بالكم تخافوا منهن ، راه و الله بسيطات و ساهلات جدا

ونضربلكم مثال من امتحان الدفعة 45 الجزئي :

نحنا عارفين في الانفلاميشن أن المواد الجاذبة لخلايا المناعة (chemotactants) أشهرهن (C5a + LTB4 + IL-8)

جانا سؤال كيس يقول : مرأة عمرها 31 سنة ، سكشوالي أكتف ، عانت آلام أثناء التبول ، ولقوا في عينات البول عندها خلايا نيوتروفيل ، (والكلام هذا كله لا علاقة له بالجواب نهائيا)

في النهاية بكل قالك شن زعما المادة اللي جذبت النيوتروفيل ؟ يعني شنو المادة اللي دارت كيموتاكسس فقط لا غير هذا هو السؤال .

فصدقوني و الله أسئلة الكيسس ساهلات بسيطات لكن تبيلك تقراهن بالمهل بيش تعرف وين الكلمة اللي فيها يكمن الجواب .

بالتوفيق يا رب 🙌🏻❤️

صورة مهمة جدا جدا تلخص مراحل و تبعيات مرض الدرن الرئوي TB 💛🙏

☝️ شرح الكيس 😁🙏💛 ، (لاحظوا : جواب الكيس يكمن في كلمة Acid Fast Bacilli)

☝️ شرح الكيس 😁🙏💛 (لاحظوا الاجابة تكمن في كلمتي Helminth Egga)

👆🏻 شرح الكيس 💚🙏🏻😁 (الإجابة تكمن في كلمة tooth extraction)

أغلبكم راقدين توا فحنكملوا كيسس بكره يا دكاترة 😂❤️🙌🏻 ، ليلتكم سعيدة جميعا