شيت المحاضرة الرابعة 👆🏻

مرحبا بكم جميعا في قناتنا الخاصة بعلم الأمراض (@Pathoo46) و نتشرف بكم جميعا 🙏🏻❤️
في هذه الرسالة سنوفر لكم مدخلا يسهل عليكم الوصول إلى كل ما يخص مادة علم الأمراض (Pathology) من :
🔶 فيديوات
🔶 شيتات
🔶 أسئلة MCQs و بعض أسئلة الShort Notes

ما عليكم سوى البحث أسفل القائمة عن رقم المحاضرة و اختيار ما تريدون ، يمكنكم الاستعانة بالجدول أعلاه لمعرفة رقم المحاضرة الخاصة بكل كورس

ملاحظة : (هذه الرسالة ستكون متجددة على الدوام ليُضاف إليها كل جديد في قناتنا)

السلام عليكم يا دفعة 46
إن شاء الله أموركم كلكم بصحّة و عافية يا رب 💚🙏🏻

فتحنا مجموعة من 4 طلبة نعطي فيهم #جنرال_باثولوجي في مركز #الإثراء ، و بديت معاهم من الصفر من السل انجري ، لعند كورس الانفكشوس

و يوم الاثنين بعون الله عزّ وجلّ حنبدا مع الطلبة الأربعة كورس : (Neoplasia and Carcinognesis)

وحنعطيه على 3 محاضرات

2 حيكونن قبل العيد : يوم الاثنين و يوم الأربعاء من الأسبوع هذا
و المحاضرة الثالثة حتكون بعد العيد بعون الله

فاللي حاب يحضر مع المجموعة هذي كورس النيوبلازيا، يقدر يراسلني و يسجل معاهم (@Alomami97) ، و القيمة رمزية بإذن الله، و المواعيد ما بين 4 و 6 العشية

ولو كان فيه إقبال كبير نفتحوا مجموعة جديدة عادي للكورس هذا 😁💙

ربّي يوفقكم جميعا لكل الخير ويفتح عليكم
وكل عام وإنتم بألف خير ❤️🙏🏻

السلام عليكم يا دفعة 46
طبعا كلكم عرفتوا أنه وأخيرا نزلوا خطتكم الدراسية، وبأمانة وكل صراحة الخطة جت في صالحكم وممتازة جدااا لكم، اللهم إلا فاينال الفارما، فلذلك اجروا عليها من بداية السنة أنه يخلولكم الفارما أول مادة في الفاينال .

الأيام الحالية أيام عيد وعبادة استمتعوا فيهن مع أهلكم وأقاربكم ورفهوا عن أنفسكم بيش تستجمعوا قواكم وتشحنوا همّتكم للقادم 💪💪❤

حنعطيكم شوية نصائح لعل وعسى تفيد أي حد فيكم عن كل مادة :-

في الفارما : دائما وأبدا الامتحان 90% من أسئلته مباشرة من الشيت، فحاول ديما تلم وتثبت معلومات الشيت

وحاولوا اديروا اوراق تلمو فيهن الدرقز في كل شيت، وتقارنو بينهن في الKinetics والDynamics زي Absorbtion و metabolism و sideeffects و غيرها ...

بالنسبة للمايكرو :-
كبداية بشكل عام، المايكرو اللي خذيتوه لعند توا بسيط وساهل، برضو ضروري تمشوا على شيتات الجامعة لأن الامتحان (عالأقل في الكورسات اللي خذيتوهن) حيكون مباشر من الشيتات خاصة كورسات الدكتور جمعة العرفي

بالنسبة للباثو وما أدراك ما الباثو 😂❤
شوفوا هي مادة الباثو دسمة صحيح، لكن لما تقعد عارف شن اللي تقراه و دقق عليه وشن اللي لا ولما تعرف أن نظامها فهم وربط المعلومات في بعضها (مش حفظ ورص كل حرف في راسك)، ساعتها حتكون مادة سهلة خفيفة عليكم، فالله الله في الفهم مش الحفظ والرص

الحاجة الأخرى في الباثو، ديما درجة الشورت نوت تمثل أقل شيء 35-45% من درجة الامتحان، فلازم تتدربوا على الكتابة والتعبير عن أفكاركم، بالإضافة أنكم وإنتوا تقروا ركزّوا على أي حاجة يبان عليها موضوع شورت نوت (في الغالب يا حاجة جدول مقارنة أو أي حاجة تكون في نقاط منظمة أو تعريف Definition)، و تقدروا تطلعوا على مجموعة الام سي كيوز والشورت نوت اللي دايرهن لكم عن كل شيت من الجنرال وقاعدات كلهن في القناة .

بالنسبة للبارا :-
نعطيكم اللي لاحظته أنا من وجهة نظري في سياسة القسم بعد الأحداث اللي صارت مع الجزئي الأول لدفعتنا ال45

القسم بدا يكثّر في أسئلة الشورت النوت ويخلوا عليهن الدرجة الأعلى، وديما سؤالهم يبي واحد قاري وفاهم ومركزّ مش واحد حافظها حفظ ولا قاريها قرية مكثف فقط

فلذلك أيّا كان مصدر قرايتكم للبارا، ركزوا على انكم تفهموا خطوات الParasite وشن يدير وكيف وأفهموا، وحتقدروا بإذن الله تحلوا أي سؤال شورت نوت يجيبوه لكم .

أما بالنسبة لاسئلة القسم True and False و MCQs و توصيل، فحتكون أسئلة بسيطة و ساهلة جدا، و تقدروا تتدربوا عليهن من أسئلة امتحانات سابقة .

حبيت نفيدكم بالكم كلمة هذينا
نسأل الله يوفقكم جميعا ويفتح عليكم ويسرلكم أموركم لكل الخير ❤🙏

تقبّل الله منا و منكم صالح الأعمال، وكل عام وأنتم بألف خير ❤️🌱
#أسماء_الجازوي
#محمد_العمامي

اليوم كانت اخر محاضرة في كورس الجنرال باثولوجي في #مركز_الإثراء

خذينا وشرحنا الجنرال باثولوجي بالكامل من السل انجري لعند النيوبلازيا، بعدد إجمالي 16 محاضرة

والحمد لله الذي بنعمته تتم الصالحات ❤
وإن شاء الله ربي يوفقنا في اللي جاي

ونسأل الله التوفيق لكم جميعا
#محمد_العمامي @Alomami97 🙏💚

الصدمة شي متوقع، لكن الخطأ أنك تقعد فيها واجد وتضيع وقتك الثمين لانه شعورك اتجاه الموضوع مش حيغير الحقيقة ، الحقيقة تبي شغل مش شعور ،نصيحة لكم يا دفعة 46 ، منهج الجزئي الأول مش واجد و الوقت يسدكم ، و إنتوا قاريينه ومطلعين عليه مش معلومات جديدة بالكامل ..
نظموا وقتكم كويس، و توكلوا على الله
وربي حيوفقكم ويسهل عليكم بإذنه 🙌🏻

الفترة الماضية بعض الطلبة سألوني عن باقي فيديوات GIT ووعدتهم نزلهن ف أقرب فرصة ، ف الظروف الحالية صعب التسجيل بسبب انقطاع الكهرباء وأصوات المولدات وبإذن الله بعد تحسن الوضع حنستمر ف التنزيل ، ربي يعينكم ويوفقكم ف ظل الظروف هذينا 🙌🏻💜

ربي يوفقكم ف امتحانكم ويفتح عليكم 🙌🏻 نصيحتي لكم ضروري لتثبيت المعلومات أنكم تاخذوا قسط من الراحة وعدد ساعات نوم كافي للتركيز والمراجعة ف الصبح قبل الامتحان ب ساعات بشكل سريع

السلام عليكم يا دفعة 46

هي الأولى ربي إن شاء الله يسهل عليكم البارا ، و تجيكم نزيكة وساهلة كيف امتحان المايكرو، وتطلعوا منها راضيين فرحانين كلكم 🙌🙌💛

الحاجة الأخرى اللي نبي نقولها لكم
هي بخوص #امتحان_الباثو الجزئي ✅✅

أكيد طبعا فيه منكم من الجنرال مكمله ومثبته 100% ومش خايف عليه أبدا، وفيه منكم من ما زال الجنرال باثولوجي مش ثابت معاه.

بعون الله حنساعدكم في أيام امتحان الباثو ونكون معاكم خطوة بخطوة، وحنزللكم خطة تنظموا بيها أموركم وتلموا بيها الجنرال بالكامل إن شاء الله، بالإضافة إلى بعض المساعدات الأخرى اللي حنقدمهن لكم إن شاء الله و حنعلمكن بيهن بعد كم يوم 🙏

مبدئيا فقط ما نبيش أي حد فيكم يشيل همها أبدا الباثو ، صحيح أنها دسمة شويا ، ولكن والله ممتعة والفهم فيها يلخصها عليكم بشكل كبير والله

ونبي نبهكم على نقطتين فيها :-

النقطة الأولى بناء على توزيع أسئلة امتحان الجزئي متاع الدفعة 45 (السنة اللي فاتت)، كانن عدد الMCQs + T/F تقريبا 56 سؤال ، موزعات كالتالي :-

- Cell injury part 1+2 (6 MCQ)
- Adaptation (1 MCQ)
- Accumulation (3 MCQ)
فهذينا لو تقراهن ك Bulk واحد كامل ، تضمن تحل 20% من الامتحان
⚪🔴⚪🔴⚪🔴⚪🔴⚪🔴⚪🔴⚪🔴

- Inflammation and Repair (10 MCQ)
لذلك لو تقنط كورس الانفلاميشن تضمن تحل 20% من الامتحان

⚪🔴⚪🔴⚪🔴⚪🔴⚪🔴⚪🔴⚪🔴
هيمودينامك بمختلف أجزاءه :-
- Edema/Hemorrhage/Congestion (3MCQ)
- Thrombosis (4 MCQ)
- Infarction (1 MCQ)
- Embolism (2 MCQ)
- Shock (2 MCC)

فالهيمودينامك لو تقروه و تقنطوه تضمنوا تحلوا 20% من الامتحان

⚪🔴⚪🔴⚪🔴⚪🔴⚪🔴⚪🔴⚪🔴

Immunity (9 MCQs)
Infectious (8 MCQs)
Gene (7 MCQs)

فلذلك لو تقروا الجين و النيوترشن و الاميونتي و الانفكشوس و تقنطوهن تضمنوا تحلوا 40% من الامتحان

الخلاصة :
رد باله أي حد فيكم يقول الكورس هذا مستحيل ما يجيش منه شيء ، الامتحان موزع شبه بالتساوي على كل الكورسات كيف ما ذكرتلكم

ويا حبذا لما واحد فيكم يقرا أي كورس ، يقراه ك Bulk كامل مع الكورسات الاخرى اللي ذكرتهن لكم في التقسيمة

يعني لو تبي تقرا EDEMA كمل جميلك واقرى باقي الهيمو كله

وفيه كورسات رد بالكم تسيبوهن مهما صار اللي هن :-
- Inflammation
- Hemodynamic
- Immunity
- infectious

أكيدة لاحظتوا أن عليهن النسبة الأكبر من الأسئلة

وبعون الله زي ما قلتلكم فيه مساعدات اخرى نبي نقدمهن لكم لكن لما نجهزهن حنقوللكم عليهن ، و ايام الباثو لو أي حد فيكم يبي مني أي مساعدة أو أي شيء يتفضل و يراسلني وبعون الله ربي يقدرني أني نساعدكم @Alomami97

وأخيرا نبي نقوللكم أن دايرلكم MCQs و T/F و Possible Short Note على كل كورس من كورسات الجنرال ، تلقوهن pdf هنا في القناة ، و حنحطهن لكم في مصوراتي قريب من الجامعة بيش يوم امتحان البارا اللي يبيهن ورق ياخذهن.

توا حبيت نعلمكم بالكلام هذا فقط بيش ما تاكلوش همها الباثو أبدا، خليكم توا مركزين في البارا وجدوا واجتهدوا فيها، و ربي يوفقكم ويسهل عليكم جميعا يا رب 🤲🤲💛

#محمد_العمامي
@Alomami97

السلام عليكم يا دفعة 46 💙
زي ما وعدتكم حنزللكم خطة تساعدكم تلموا بيها منهج الجنرال الباثو بالكامل بإذن الرحمن 💪💪💛

بالإضافة إلى أنني درتلكم #تسجيلات_صوتية_مكثفة 🔊🎧 و #جديدة لجميع مواضيع الجنرال باثو (من السل انجري لعند الجين و النيوترشن) شرحي أنا محمد العمامي بالكامل :
⚃ شرح من شيت الجامعة مباشرة
⚃ مع توضيح شن المهم و كيف ممكن يجيكم ك MCQs
⚃ و شن اللي ممكن برضو يجيكم Short Note
⚃ حتلقوهن على قناتنا : t.me/Pathoo46
⚃ واللي ما عنداش نت وما يقدرش يحملهن، يراسلني نجيبهن له بكره في الجامعة ❤🙏
⚃ ملاحظة : إجمالي مدة التسجيلات كلهن 12 ساعة بالكثير ، يعني تسمعوا ساعتين و نص كل يوم فقط ويلتم المنهج كله ✌💛

وكذلك دايرلكم على كل كورس من كورسات الجنرال مجموعة MCQs ، T/F و كذلك مجموعة شورت نوت، تلقوهن قاعدات في ملفات القناة ، و بكره بإذن الله بعد امتحان البارا تلقوهن متوفرات في مصوراتي مركز ليبيا وكان لقيتوه مسكر معناها تلقوهن في مصوراتي التدارك بعون الله 💙✌

نجوا توا للخطة اللي ننصحكم بيها 💚✌💪 :

أولا : نصيحتي لكم في أيام الباثو ، توفير الوقت ثم توفير الوقت ثم توفير الوقت ، الله الله في الوقت راعوه واستثمروه كويس ، وابتعدوا عن أي شيء يضيع وقتكم

ثانيا : بكرا لما تروحوا من البارا ، اللي يبي يبدا يقرا طول للباثو عادي لا بأس، لكن الأفضل أنكم تعطوا لأجسادكم و عقولكم فترة نقاهة شوية تاخذوا فيها نفس، وتشحنوا فيها أنفسكم من جديد، و اللي ما رقدش كويس يعوض نومه بعد ما يروح من امتحان البارا.

يوم الاثنين خلاص لازم تبدوا تقروا...

🔵 يوم الاثنين :

🔸️ساعتين و نص تسمع تسجيلات Cell injury part1+2+Adapatation+Accumulation
️ 🔸️8 ساعات تقرى الشيتات متاعهن، و تقنطهن، بعدما تكون استوعبت كل شيء، وأساسا التسجيلات ثبتن لك المعلومة
️ 🔸️3 ساعات مراجعة (#لابد_منها_كل_يوم)
🔸️️ 3 ساعات فطور وغداء وعشاء وراحة ديروا فيها أي حاجة تنفس عليكم
️ 🔸️8 ساعات نوم

نفس الخطة بالضبط تمشوا عليها باقي الأيام، مع تغيير الكورسات طبعا :

🔵 يوم الثلاثاء :
Inflammation and Repair
🔵 يوم الأربعاء :
Hemodynamic :
- Edema, Hemorrhage and Congesion
- Hemostasis and thrombosis
🔵 يوم الخميس :
Immune Diseases + Infarction + shock

🔵 يوم الجمعة :
Infectious + Embolism

🔵 يوم السبت :
ساعة للجين وساعة للنيوترشن ، كورسات بسيطات أغلب الدفعات اللي سبقتكم قروهن يوم قبل الامتحان 😂😂💛

وباقي اليوم تراجعوا وتثبتوا (مع العلم أنكم اوريدي حتكونوا تراجعوا كل يوم زي ما وضحتلكم في الخطة)

نصيحتي الأخيرة لكم
يأس لا
يأس لا
يأس لا
احباط لا
المنهج مارين عليه أكيدة كلكم ، والوقت واسع ويسدكم بالريح، الدفعة 45 اللي قبلكم عطوهم 4 أيام فقط السنة اللي فاتت، و قدروا عليها، معناها إنتوا تقدروا بالريح عليها بإذن الله 💪💪💙💙💙💙

ملاحظة أخيرة :
امتحان الدفعة 45 الجزئي الأول، سبق وأني نزلته لكم بالحلول وبتسجيل كامل شرحت كل سؤال فيه، و حنزله لكم مرة اخرى بعون الله 🙌🙌

إن شاء الله يا رب نكون نفعتكم وأفدتكم
وربي يوفقكم ويفتح عليكم جميعا يا دفعة
والسلام عليكم ورحمة الله 💚

@Alomami97