من هنا تستطيعون الوصول لكل الام سي كيوز و الشورت نوت الخاص بكورسات السستمك باثولوجي بالكامل 💐💐💙💙💙💫💫

الحمد لله
الحمد لله
الحمد لله
الحمد لله حمدا كثيرا طيبا ، حتى يبلغ الحمد منتهاه ❤️💐💐
بالقائمة هذي دكاترتنا نقدر نقول أني رسميا وصلت لنهاية مشواري معاكم اللي بدأ من شهر 12 اللي فات


✅ المعمل ، بفضل الله لأول مرة في تاريخي التدريسي شرحته و نظمته لكم على قناته بالكامل
✅ الجينيرال ، شرحناه كله على قناته ، و نظمناه في قائمة خاصة بيه ، محاضراته و الشورت نوت متاعه ، و الام سي كيوز مع الشرح كذلك ❤️🙌🏻

✅ و كذلك السستمك بكل كورساته منظم على قنواته ، و الشورت نوت الخاص بكل كورس و الام سي كيوز تلقوهن عالقناة العامة من خلال القائمة اللي فوق الرسالة هذي 🙏🏻💚

حرفيّا عطيت كل ما نملك و الله 😂🙌🏻🤍🤍
حاولت أني ما نبخل عليكم بأي شيء نمتلكه
كانت رحلة جميلة ((الحق نعم متعبة)) لكن جميلة ، و تشرفت فيها بأقدع دفعة عرفتها في حياتي 😂🤍💫💫

و نعاودوا و نقولوا...
إن أحسنّا فهو بفضل الله و توفيقه
وإن أخطأنا فهو تقصير منّأ

سامحوني لو أني قصرت مع أي حد فيكم ، أو بدر منّي أي تصرف ضايق أو زعّل أي حد فيكم ، نسأل الله العليّ العظيم أنه يحميكم و يحفظكم جميعا و نشوفوكم دكاترة أدّ الدنيا كلكم 💙💙💐

ودمتم في حفظ الرحمن 🙏🏻💛

السقوط الحر 😆✌
اسمعوا الفويس حتفهموا مقصدي 🤣🤍💫

النصيحة اللي ديما نكرر فيها
يا شباب امتحان بكره مش قضية حياة أو موت
مش قضية تحديد مصير
ولا عمره حيكون بأي شكل من الأشكال عائق أمامك في بناء مستقبلك

هو مجرد ورقة تبي تاخذ عليها درجة فقط لا غير
ما تهولوش الموضوع على أنفسكم
ولا تكبروا من قيمة الامتحان
ماهوش نهاية الدنيا أبدا ، سواء حليت كويس فيه أو لا ، نجحت فيه أو لا ، ما زال الحياة ياما فيها من فرص وتجارب قادمة خاطي امتحان بكره

فما تكبروش من شأنه في قلوبكم
بيش ما يسيطرش عليكم التوتر

وإن شاء ربّي يجبر بخواطركم جميعا كيف ما كلكم حرفيا جاهدتوا في هالظروف الصعبة القاسية خلال الأسبوعين اللي فاتن

و بعون الله ما تطلعوا بكره إلا وكلكم مرسومة الفرحة على وجوهكم ❤️❤️💐💐🙏🏻

السلام عليكم حبايبنا 🤍🙏

أصحاب القلوب الضعيفة ما تسمعوش التسجيل

رسالة ختامية 💙🤲💫

عليك بالتأني وأعــط دون مــــنّ
وسِر نحو الثريــــا بسَيْـر مطمئِنّ

لا لن تنال فـــوزا وعزّا بالتمنّـــي
فلا تكن كسولا ولا تقل لو أنّي

❤️💐

ما زلتوا اديروا في قلوب مكسورة
و أنا مالي يا لمبي ؟ 😂

فكّر فيها تلقاها منطقية
سنة ثالثة من يومها معروف عن مستوى التحدي اللي فيها

لكن بالله عليكم
إنتم الدفعة كم ؟
الدفعة 48 😎✌🔥

يعني كم فيه دفعة قبلكم خشت لثالثة ؟!
سبع وأربعون دفعة
دفعة تنطح دفعة

هل عمركم سمعتم بدفعة استكت في ثالثة و حصلت فيها ؟
أبداااااا

كلهم قدروها وطلعوا منها
ومنهم اللي قاعد توا دكتور أد الدنيا ( عقبالكم ❤🙏) و منهم اللي قريب يقعد جد و منهم و منهم و منهم

ف مربط الفرس هنا
غيرك ستة مليون واحد قدرها
ليش انت ما تقدرهاش ؟

بجد والله فكر فيها
هل غيرك اللي قبلك مريخيين مثلا ؟!
جايين من الفضاء مثلا ؟!
عيال اينشتاين مثلا ؟!

كيفهم كيفك
و كيف ما هما نجحوا
حتى انت حتنجح

بالطول بالعرض بالارتفاع
حتنجح و تقدرها

المهم خوذ بالأسباب و ما تخممش
اعقلها وتوكل
وما خاب من على الله توكل ✌🔥🔥❤💫💫

شوفوا يا شباب
كلنا بشر ، و كلنا نغلطوا
لا عيب في ذلك
ما حد معصوم ، و ما حد فينا جا على هالدنيا فاهم كل شيء

العبد لله بروحه ياما داير من فلايط ربي شاهد عليهن 🤣

باهي وين المعيار اللي تبان منه إنسان صالح أو لا ؟
✅ الاعتراف بالخطأ
✅ المبادرة لإصلاحه

رد بالك ثم رد بالك ثم رد بالك تقعد من المكابرين اللي يرفع خشمه و يقولك أنا ما نغلطش ، أو تقعد عناد و خلاص ما تبيش تصحح خطأءك لما تكون مقتنع فعلا أنه خطأ

الخطأ نفسه مش عيب
التكبر عن الاعتراف بيه و إصلاحه هو العيب و هو كل العيب

و بالعكس و الله الاعتراف بالخطأ و إصلاحه و الله ما يزيدك إلا رفعة و محبة ، أولا عند الله عزّ وجل ، ثانيا في قلوب الناس

هدانا الله و إياكم 🤍💐

بشائر نجاح زملائكم في الدفعتين 49/50 معبيّات التايم في السوشيال ميديا

عقبالكم ما نقروا بشائر نجاحكم كلكم يا رب العالمين
❤️❤️❤️❤️🤲🏻🤲🏻

تعريف الطهقة
أنك توصل لمرحلة تشرح كيف يتم تحميل الفيديوات من اليويتيوب

من أرشيف أيام الكورونا لما فجرتها و خشيت عالأناتومي و شرحت "اللاور" و "الثوراكس" ولقيتها بحرررررر و وخرت 😂🤣