إجابات أسئلة الشورت نوت ال10 اللي جن في الدور الثاني السنة اللي فاتت ☝🏻☝🏻☝🏻☝🏻☝🏻☝🏻

فيه معلومة لعلّ وعسى تستفيدوا نبي نقولها لكم يا دكاترة :
تذكروا لما قلنا أن تحديد الStage متاع السرطان يتم بأخذ 3 عوامل في الحسبان ؟
حجم السرطان = T (يكون يا إما Tis-T1-T2-T3-T4)
و هل انتشر للمف نودز و لا لا = N0-N1-N2-N3
وهل انتشر للدم أو لا (M0-M1)

توا السرطان في البداية لما يكون عبارة عن (Carcinoma in Situ) و ما زال فوق (Basement membrane) هنا ، نقولوا أنه حجم السرطان = Tis

ولما يخترق البايسمينت ممبراين و يطلع من ال(muscoa) إلى (submucosa) هنا نقولوا أنه (T1)
ولما ينتشر من ال(submucosa) إلى Musculosa هنا نقولوا أنه (T2)
ولما ينتشر من المسكيولوزا إلى آخر طبقة في العضو من برا (Adventitia or Serosa) هن نقولوا أنه (T3)
ولما الكانسر حجمه يوصل لعند يخترق العضو بالكامل و يطلع برا منه هنا نقولوا أنه (T4)

يعني بكل بساطة ، مع كل طبقة جديدة يخترقها السرطان ، قيمة حجمه تزيد بمقدار 1

مهما كان الوضع متأزم ومهما كان الوضع صعب ، رد باله حد فيكم يستسلم يا دكاترة

شدوا حيلكم هانت خلاص ، واستمروا راجعوا ثبتوا مرة واثنين وثلاثة لعند اخرا لحظة قبل الامتحان 💪💪💚

وفي النهاية ، وأيا كانت النتيجة، خلوكم كلكم فخورين بأنفسكم وبما قدمتموه السنة هذي

لأنكم وصلتوا للمرحلة هذي وصمدتوا رغم التعطيل ورغم الضغط النفسي والدراسي وضغط المعامل وزرة الوقت، رغم هذا كله، صمدتوا وما استسلمتوش ، هذا بروحه انجاز يستحق كل حد فيكم أنه يفتخر بيه 💚💪

وفي النهاية ما عندي ما نقول إلا :

إن شاء الله يا دفعة نكونوا ما قصرنا معاكم، و والله ما نتمنى من الله إلا أنه نكونوا سهلنا عليكم وأفدناكم ولو بمثقال ذرة، وسامحونا على أي تقصير أو سوء فهم بدر منا تجاهكم

ربي يسهل ويفتح عليكم جميعا ، وإن شاء الله ما تطلعوا من هالسنة إلا راضيين و ربي يجبر بخاطركم كلكم فيها 🤲🤲🤲❤

ونسأل الله أن يوفقنا وإياكم لكل خير، ونكونوا كلنا حاجة كبيرة يوما ما نخدموا بيها البلاد والعباد

والسلام عليكم ورحمة الله يا دفعة
زملاءكم من الدفعة 45
#محمد_العمامي ❤
#أسماء_الجازوي ❤

يا دكاترة
بعد إذنكم بالله
نبحثوا على توكة صيدلية في بنغازي ، في رمضان توكة صبح

لو أي حد فيكم يعرف ، يا ريت يدلنا بعد إذنكم
وبارك الله فيكم جميعا مسبقا 💙🙏

@Alomami97 حسابي لأي حد يبي يتواصل معي

كل عام وأنتم بألف خير و عافية
وينعاد عليكم إنتم وكل أهاليكم وأحبابكم بالخير والصحة والرخاء يا رب 💙💙🤲

نرحب بِكم جميعا ونشرفوا بيكم في قناتنا 🙏🏻💙
الرسالة هذي حتساعدكم كثيرا في اختصار الطريق عليكم لإيجاد كل ما يتعلق بمادة علم التشريح (الأناتومي) في هذه القناة من شيتات أو محاضرات .

هذه الرسالة بعون الله حتكون (updated) لتشمل كل جديد يُضاف إلى القناة
دمتم في أمان الله ❤️🙏🏻

عن أي كورس تبحث ؟

☝🏻☝🏻 هذي قناتي الخاصة بيا شارح فيها (ما تيسّر) من بعض كورسات الأناتومي ، في فيديوات متوفرات للتحميل من التيلي و حتى على اليوتيوب

يا ريت لو تشاركوا رابط القناة مع زملاءكم و أصدقاءكم بيش الفائدة تعم الجميع ❤️❤️🙌🏻
رابط القناة : (t.me/anatomy_alamami) ❤️🙌🏻

و رمضانكم مبارك جميعا يا رب 💙🙏

غدا الموافق 03/مايو/2021

سيكون امتحان الفاينال في مادة #المايكرو للدفعة 46 في #بنغازي

وأيضا امتحان الفاينال في مادة #الباثو لطلبة مدينة #المرج

نسأل الله لكم التوفيق جميعا
وربي يسهل عليكم وما تروحوا بكره إلا وكلكم طايرين من الفرحة 🤲🤲❤

بإذن الله عزّ وجلّ بعد فترة عيد الفطر المبارك (أعاد الله علينا و عليكم بالخير) حنكون متفرغ
فإذا كان فيه أي طالب (ما دخلش على امتحان الدور الأول #باثو) و يحتاج خصوصي في أي كورس من كورسات الباثو ، يتواصل معايا و بإذن الله ما نقصروا t.me/Alomami97

و كل عام و أنتم بألف خير يا رب
زميلكم #محمد_العمامي ❤️🙏

تقبّل الله منّا ومنكم الصيام والقيام وصالح الأعمال 💛🤲🤲

وكلّ عام وأنتم والأحباب والأهل و الأصحاب بألف خير وعافية ❤❤🌺

#عيدكم_مُبارك
زميلكم : #محمد_العمامي 🙏💙

قناة ممتازة جدا جدا جدا جدا لكل من هو مقبل على العمل داخل #الصيدليات فيها تجميع ومجهود جبار حتستفيدوا منها كلكم ❤️🙏https://t.me/pharma97am

سلام عليكم يا دفعة ❤

ألف ألف ألف ترليون مبروك لكل من وفقه الله و سخرله النجاح والعبور من هالسنة الصعبة ، وعقبال ما نشوفوكم من الناجحين النافعين للعالمين يا رب 💛🤲🤲

وعندي كلام حبيت نوجهه لكل من لم يحالفه الحظ في الدور الأول

مش حنقعد نكتبلكم شوية كلمات متاع التنمية البشرية اللي أكيدة شبعتوا منهن طول هالسنة ، لكن أنا نبي نذكركم بحقيقة نبيكم تحطوها صوب عيونكم

اللي خشوا عالدور الأول وما حالفهمش الحظ، عندهم فرصة أكبر أنهم يصفوا من الدور الثاني وبدرجة وتقدير أفضل حتى من اللي نجحوا في الدور الأول

ليش ؟
لأنهم ببساطة قارين المنهج مسبقا و توا حتكون مجرد مراجعة و تثبيت لهم ، هذي أولا

ثانيا ، لأن طلبة الفرصة الثانية عندهم خبرة توا ، خشوا عالجزئي الأول و الثاني و الفاينال و عرفوا طبع كل قسم و كيف يسأل و شن مواضيع التركيز و شن اللي مش لازم تضيع وقتك فيه


هذينا كلهن يصبن في مصلحة طالب الفرصة الثانية بحيث أنه يصفي أفضل حتى من اللي صفى من الفرصة الأولى


من توا، حطوا خططكم ونظموا أموركم وتوكلوا على الله واجتهدوا وجدوا و ربي مش حيضيع تعب أي حد فيكم 💛🙏

بالنسبة للطلبة اللي خاشين عالباثو في الدور الثاني
نصيحتي لكم بيش تضمنوا النجاح بأسهل و أيسر طريقة أنكم اديروا كالتالي :-

أولا : المعمل ثم المعمل ثم المعمل
حيكون عليه 90 درجة ، و المعمل ما فيهش أي فكرة ومش محتاج منك تفهم ولا محتاج حد يشرحه لك ، مجرد أحفظ الشريحة اللي قدامك و كلامها واحفظ الجار اللي قدامك و كلامه ، اينعم هو سامط وأسمط من النظري ، لكن نظام أسئلته مباشرة ما فيهش لعب زي ما يصير في النظري

فبالله ابتداء من بكره عندكم شهر كامل لعند يوم امتحان الباثو ، ثبتوا كم جار و كم سلايد كل يوم ، بحيث ما يجي امتحان المعمل إلا و أنتم حافظين الجارات و السلايدات حفظ صم

نقولوا أن الهدف 80 من 90 في امتحان المعمل ، يقعد يبيلكم 100 درجة بيش تنجحوا ، 100 درجة من أصل 210 درجات على امتحان البيبر النظري
شفتوا كيف الموضوع سهل وبسيط ؟ لما تضمنوا المعمل يقعد يبيلكم أنكم تجيبوا أقل من نص درجة البيبر فقط لا غير

باهي شن أسرع و أسهل طريقة تضمنوا بيها البيبر ؟
الجواب : تثبيت الشورت نوت المحتمل

الشورت نوت حيكون عليه في الدور الثاني فوق من 60 أو 70 درجة ، و الشورت نوت أغلبه مضمون ومعروف ، يعني 50 درجة هذينا مفروض يكونن مضمونات من الشورت نوت

و50 درجة أخرى تجيبوهن بالراحة بكل من الام سي كيوز والصح والخطأ

هذي احسن خطة تعبوا عليها في الباثو في الدور الثاني
وأنا ابتداء من بكره بإذن الله ، حنقعد نزللكم شوية ملاحظات وتركيزات على كل كورس في الباثو من بدايتها لنهايتها ، و حنحاول بقدر الإمكان أني نساعدكم لعند يوم الامتحان كان سخر الله 🙌🏻❤️

#محمد_العمامي

نهاركم مُبارك ويومكم طيب يا دكاترة ❤️🙏

نسأل الله أن يسهل ويفتح عليكم ويوفقكم جميعا 💪💪💚

نبي نذكركم أنه شغلنا كله قاعد في 🔴 مصوراتي سليمان 🔴 لمن يحتاجه

✅ ملخصاتنا لمنهج الباثو كاملا
✅ MCQs منهج الباثو كاملا
✅ الشورت نوت المتوقع للمنهج كاملا
✅ مكثفاتي الخاصة بيا في الجزئي الأول والثاني
✅ محاضراتي اللي عطيتهن في مركز ليبيا من الجي أي تي لنهاية المنهج


أي شيء تبوه منهن ، توكلوا على الله بعد الامتحان للمصوراتي وتحصلوه

ربي يسهل عليكم ويفرحكم
#نسأل_الله_التوفيق_لنا_ولكم
#محمد_العمامي

حنبدا نحكيلكم عن أول 4 كورسات في مادة الباثو 💚
cell injury part 1 + part 2
Adapatation + Accumulation

🔴 أولا :- من وين تقراهن ؟
يا أما من شيت الجامعة (رغم أني لا أنصح بيهن لأنهن دج و مش مرتبات) ، أو من ملخصاتي لهن (6 صفحات لكل كورس منهن ، بإذن الله مغطيات كل شيء)

🔴 ثانيا :- من وين تسمع شرحهن ؟
حنحطلكم تسجيل نص ساعة على كل واحد فيهن ، و التسجيل يلملكم الموضوع و يفهمه لك بالكامل من بدايته لنهايته

🔴 ثالثا :- شنو الشورت نوت المحتمل فيهن ؟
برضو حتلقوني لوطا مجمعلكم الشورت نوت المحتمل في كل واحد من الكورسات الأربعة هذينا ، و للعلم أي شورت نوت جا في الجزئي الأول أو الفاينال من الكورسات هذينا ، كنت أنا مسبقا متوقعه لكم ضمن التجميعة ، يعني ك شورت نوت أقرا تجميعتي و إنت مغمض عيونك ، و باقي الكلام فيهن اقراه قراية MCQs

#نصيحتي_لكم_فيهن :-
ما تتعمقوش واجد في دراسة السل انجري ، لأنه (الدكتورة مي) مرة مرة تحط في أسئلة يدوخن الطالب شويا في الكورس هذا ، لكن على عكسها بالضبط (الدكتورة وردة) ديما أسئلتها في كورس الأدابتايشن و الأكميولايشن مباشرات و ساهلات جدا جدا جدا .

فثبتوا اللي أسئلته ساهلة و مباشرة ، و ما تتعمقوش واجد في السل انجري ، بالإضافة إلى أنكم لااااااازم تثبتوا أي حاجة محتملة كشورت نوت فيهن

الملخصات و التسجيلات و تجميعة الشورت نوت تلقوهن بالأسفل 👇🏻👇🏻

ملخصاتهن 👇🏻👇🏻
متوفرات ك نسخة ورقية في مصوراتي سليمان