Army Run အရက်စက်ရုံကို ရန်ကုန်တိုင်း ပကဖ တိုက်ခိုက်
…………………..
ရန်ကုန်တိုင်း၊ ရွှေပြည်သာမြို့နယ်မှာရှိတဲ့ MEC ပိုင် Army Run အရက်စက်ရုံကို ရန်ကုန်တိုင်း ပကဖ အဖွဲ့က တိုက်ခိုက်ခဲ့ပါတယ်။

ပြည်သူ့အာဏာကို အကြမ်းဖက် သိမ်းယူမှု (၄) နှစ်ပြည့် အကြွေးတောင်းယူမှု အနေနဲ့ အရက်စက်ရုံကို ဇန်နဝါရီလ (၃၁) ရက်နေ့ ည (၁၀) နာရီ ဝန်းကျင် အချိန်မှာ ရန်ကုန်တိုင်း ပကဖ အဖွဲ့ ဦးဆောင်မှု နဲ့ အနောက်ပိုင်းခရိုင် ပကဖ တိုက်ခိုက်ရေး အဖွဲ့က ၇၉ လောင်ချာ အသုံးပြု ပစ်ခတ်ခဲ့တာဖြစ်ပါတယ်။

အာမီရမ်ဟာ အကြမ်းဖက် တပ်သားတွေ၊ အရာရှိတွေ သောက်သုံးလေ့ရှိတဲ့ အရက်ဖြစ်ပြီး ရန်သူ့ရိက္ခာ ထုတ်လုပ်ရေး နေရာတွေကိုပါ ပကဖ အဖွဲ့တွေ တိုက်ခိုက်နိုင်လာတာ ပြသပါတယ်။ စစ်တပ်အနေနဲ့ လေတပ်စခန်း၊ တိုင်းစစ်ဌာနချုပ်၊ လက်နက်စက်ရုံတွေသာမက အရက်စက်ရုံကိုပါ လုံခြုံအောင် ကာကွယ်နိုင်ခြင်းမရှိဘူးဆိုတာ လက်ရှိတိုက်ခိုက်မှုက ညွှန်ပြလျက်ရှိပါတယ်။

ပကဖ အဖွဲ့တွေ အနေနဲ့ ပြည်သူကြားမှာနေထိုင်ပြီး သတင်းထောက်လှမ်းကာ ရန်သူ့ စစ်ရေး ပစ်မှတ်တွေကို မဟာဗျူဟာမြောက် တိုက်ခိုက်နိုင်လာတယ်ဆိုတာ အာမီရမ် စက်ရုံ တိုက်ခိုက်မှုက ပြသပါတယ်။
ရန်ကုန်တိုင်း ပကဖ အဖွဲ့က ရန်ကုန်ဆိပ်ကမ်း နားမှာ ရပ်ထားတဲ့ လေယာဉ်ဆီတင်သင်္ဘော၊ ရန်ကုန်တိုင်း စစ်ဌာနချုပ်တို့ကို အောင်အောင်မြင်မြင် တိုက်ခိုက်နိုင်တဲ့ ပကဖအဖွဲ့တဖွဲ့ ဖြစ်ပါတယ်။

လက်ရှိစစ်ရေးအခြေအနေကို ခြုံငုံနားလည်နိုင်ဖို့ PDF Insight ကို ဖတ်ရှုပါ။

#PDFInsight

တွေဝေယိမ်းယိုင်စရာမရှိတဲ့ တော်လှန်ရေးလမ်းကြောင်း

ကမ္ဘာ့သတင်းမီဒီယာတွေထဲက မြန်မာဆိုတဲ့ VOA အစီအစဥ်မှာ တရုတ်နှင့်မြန်မာပြည်ကစစ်ပွဲများ ဆိုတဲ့ ဘာတေးလ်လစ်တနာရဲ့ ဆောင်းပါးကို ကောက်နှုတ်ဖော်ပြသွားတာတွေ့ရတယ်။ ဒီဆောင်းပါးကို အခြေခံပြီး ပြောစရာတချို့ရှိလာပါတယ်။ အဲဒါကတော့ သူ့အမြင်နဲ့ကောက်ချက်တွေက လွန်ခဲ့တဲ့ ဆယ်နှစ်လောက်ကအမြင်ကနေ တိုးတက်လာတာမတွေ့ရဘူး ဆိုတာပါပဲ။ စစ်အုပ်စုက လက်နက်ကိုင်တွေကို အပြတ်မရှင်းနိုင်သလို လက်နက်ကိုင်တွေ အောင်ပွဲခံဖို့က မရေရာဘူး။ တိုင်းရင်းသားက သူတို့နယ်မြေ သူတို့ရရေး ဦးစားပေးလုပ်နေပြီး တပြည်လုံးကိစ္စ စိတ်ဝင်စားပုံမရဘူး။ အဲဒါကြောင့် မြန်မာ့နွေဦးရဲ့နောက်တဆင့် ဘယ်လိုဖြစ်မယ်ဆိုတာက တရုတ်က ဘယ်လိုဆုံးဖြတ်လုပ်ကိုင်လာမလဲ ဆိုတဲ့အပေါ်မူ တည်နေတယ် လို့ရေးထားတာပါ။ သူကိုးကားတာက ကိုးကန့်နဲ့စကစကြား အပစ်ရပ် သဘောတူညီမှုရသွားတာ၊ TNLA ဘက်မှာ စစ်ရှိန်ကျလာတာ၊ ရခိုင်က ဆွေးနွေးဖို့ အသင့်ရှိကြောင်း ကြေညာလာတာ အစရှိတဲ့ အရာတွေပါပဲ။ သူကထည့်မပြောပေမယ့် အဲဒီကနေဆက်ပြီးစဥ်းစားမယ်ဆိုရင်တော့ မူမပါတဲ့ ငြိမ်းချမ်းရေးတို့ အပစ်ရပ်ရေးတို့ အားလုံးပါတဲ့ဆွေးနွေးပွဲတို့ ဆိုတာတွေဘက်ရောက်သွားမှာဖြစ်တယ်။ နောက်ဆုံးအဲဒါတွေအတည်ဖြစ်ဖို့ အားလုံးပါတဲ့ ရွေးကောက်ပွဲဆိုတာအထိ ရောက်သွားလိမ့်မယ်။ ဒါကအင်အားကြီးနိုင်ငံတွေက ဂါဇာအရေး ၊ယူကရိန်းအရေး၊ တောင်တရုတ်ပင်လယ်အရေး၊ အမေရိကန်ပထမနဲ့ တရုတ်ပြန်လည်နိုးထရေးဆိုတဲ့ တရုတ်ရဲ့ ၂၀၄၉ အထိရေးဆွဲထားတဲ့ မဟာဗျူဟာကြားအားပြိုင်မှု စတဲ့ ကိစ္စကြီးတွေနဲ့ ရင်ဆိုင်နေရချိန်မှာ အရေးမပါတဲ့ နိုင်ငံလေးတခုက ပြည်တွင်းရေးပြသနာတွေအပေါ်ထားတဲ့အမြင်တွေကနေ ဆင်းသက်လာတာပါပဲ။ တိုက်ကြီးတာကြီးတွေကြား ရန်စောင်နေကြချိန်မှာ ကြားက တဲစုတ်က လူတွေက ထပြီးရန်ဖြစ်ကြတော့ ရဝတခေါ်ပြီး အမြန်ဖြေရှင်းလိုက်စမ်းကွာ ဆိုတဲ့သဘောပါပဲ။ ပထမကုလသမဂ္ဂကဝင်ပြော နောက်တော့ အာဆီယံကိုတာဝန်ပေး။ အဲတော့ ဘယ်သူမှားတာမှန်တာ၊ ဘယ်သူသာတာနာတာ အရေးမကြီး မြန်မြန်ပြေငြိမ်းသွားရေးကသာ အရေးကြီးတယ်ဆိုတဲ့ သဘောထားတွေက ဆင်းသက်လာတာပါ။

ပြောမယ်ဆိုရင်တော့ ဘာတေးလ်လစ်တနာကို မြန်မာပြည်အရေး အတော်သိတယ်လို့သတ်မှတ်ကြတာပါ။ သူဟာ အိန္ဒိယနယ်စပ်ကစလို့ ကေအိုင်အေ၊ ဗကပ စတဲ့ နယ်စပ် တနံတလျား စောစွာကတည်းက ရောက်ဖူးခဲ့သူပါ။ ဒါပေမယ့်သူသိသွားတဲ့အရာတွေက မြင်းစီးပြီးပန်းခင်း ကြည့်သွားသလိုပဲဖြစ်ကာ နက်ရှိုင်းတဲ့ ဆင်ခြင်နိုင်တဲ့ အသိမျိုးရသွားပုံမရပါဘူး။ မြန်မာပြည်လက်နက်ကိုင်တော်လှန်ရေးအဆင့်ဆင့်နဲ့ တိုင်းရင်းသား လက်နက်ကိုင်များရဲ့ အတွင်းသဘော အမြင်တွေအထိ သိရှိမသွားခဲ့ပါဘူး။ သူဟာ ဂျာနယ်လစ်တယောက်သာဖြစ်လို့ ဒီလိုအမြင်မရှိတာကလဲ အံ့သြစရာတော့ မဟုတ်ပါဘူး။ တဘက်ကပြောရင် လွတ်လပ်ရေးကြိုးပမ်းမှုကာလလောက်ကတည်းကစလို့ စစ်တပ်ခေါင်းဆောင်ဖြစ်လာမယ့်သူတွေရဲ့ ပါဝင်ခဲ့တဲ့ အခန်းကဏ္ဍတွေ၊ နိုင်ငံရေးမှာ ပါဝင်စွက်ဖက်ဖို့ အခွင့်အလမ်းတွေ ဘယ်လို ဖန်တီးယူခဲ့ကြသလဲဆိုတာတွေအပေါ် လေးနက်ပုံမရပါဘူး။ မြန်မာဟာ Demography အရ တိုင်းရင်းသားလူမျိုးများစွာရဲ့ နိုင်ငံရေးနိုးကြားမှု တပြေးညီ မဖြစ်ခဲ့ကြတာကိုလဲ ထည့်တွက်ပုံမရပါဘူး။ ဒီအချက်ဟာ အလွန်အရေးကြီးတဲ့အချက်ဖြစ်ပါတယ်။

အခုအချိန်ကတော့ ဗမာလူမျိုးကြီးအပါ ကျန်တိုင်းရင်းသားအားလုံးရဲ့ နိုင်ငံရေးနိုးကြားမှုဟာ တပြေးညီဖြစ်ပြီး အထက်သန်ဆုံးဆိုတဲ့ ကာလကို ရောက်နေတာ နားလည်ဖို့လိုပါတယ်။ အဲဒါကတော့ မြန်မာတနိုင်ငံလုံး ခေတ်နောက်ကျရုံမက ခေတ်နောက်ပြန်ဆွဲတဲ့အထိရောက်နေတာ၊စကစရဲ့အနေအထားက အာဏာသာ တည်မြဲမယ်ဆိုရင် တွေ့သမျှလူ အဖေခေါ်မယ့်အဆင့်ရောက်နေတာ၊ တိုင်းပြည်ရဲ့အချုပ်အခြာအာဏာဟာ လက်တွေ့မှာ တစစဆုံးရှုံးလာနေတာ စတာတွေကိုထည့်တွက်ဖို့လိုတာပါ။ တဘက်မှာတော့ တိုင်းရင်းသားလက်နက်ကိုင်တွေက သူတို့ရဲ့နယ်မြေအများစုကို ထိမ်းချုပ်လာနိုင်တာ ၊ စကစဟာ တိုင်းပြည်ရဲ့ ၂၀ ရာခိုင်နှုန်း လောက်ကိုပဲထိမ်းချုပ်နိုင်တော့တာနဲ့ နွေဦးစကတည်းက အဓိကကျတဲ့ တိုင်းရင်းသားများနဲ့ NUGကြား သဘောတူညီချက်တွေ အနီးကပ်ပူးပေါင်းဆောင်ရွက်မှုတွေ ရှိထားတာ၊ NUGလက်အောက်က PDF တွေရဲ့ တိုက်စွမ်းရည်က သိသိသာသာမြင့်တက်လာတာ တွေထည့်တွက်ရမှာပါ။ အရေးကြီးဆုံး အချက်က ခုခံစစ်ဟာ တပြည်လုံးအနှံ့မှာရှိနေတဲ့အတွက် စကစဟာ အရင်က တိုင်းရင်းသားတွေနဲ့ ဖြစ်ခဲ့ကြတုန်းကလို တပ်တွေဆွဲထုတ်ပြီး တကွက်ချင်းရှင်းတဲ့ ဗျူဟာ ကျင့်သုံးလို့မရတော့တာပါ။ ဒါသာမက သူကိုယ်တိုင် တကွက်ခြင်း အရှင်းခံလာနေတာ အထင်အရှား ဖြစ်လာနေတာပါ။

စကစဟာ ၈လေးလုံး တန်ပြန်မဟာဗျူဟာအရ စစ်တပ်တွေကို မြို့တိုင်းလောက်မှာ လိုတာထက်ပိုပြီး ချထားခဲ့တာပါ။ အဲဒါကြောင့်တနိုင်ငံလုံး စစ်စခန်း ၅၀၀၀ ကျော်ရှိတယ်လို့ဆိုကြတာပါ။ ဒါကြောင့်ပဲ သူဟာ အာဆတ်လို အလျင်အမြန် ပြုတ်ကျ သွားဖို့မဖြစ်နိုင်ပဲ တပ်စခန်းအတော်များများကို လိုက်ရှင်းမှ ရမှာပါ။ မအလဟာ အာဆတ်လို မိသားစုအာဏာရှင်မဟုတ်ပါဘူး။ အုပ်စုလိုက် သူ့နောက်မှာ တန်းစီနေသူတွေကို ရာထူးအာဏာ ငမ်းဖမ်းနေအောင် လုပ်ထားတဲ့ စနစ်ဖြစ်တယ်။ နောက်တခုက သူတို့ရဲ့စနစ်က စစ်ပဒေသရာဇ်ပုံစံဖြစ်တော့ ထိပ်ဆုံးလူမဆင်းမချင်း အပြောင်းအလဲမဖြစ်နိုင်သလို ဆင်းသွားလို့နောက်လူတက်ရင်လဲ ဒီအတိုင်းပဲဆက်သွားရမယ့် စနစ်မျိုးဖြစ်တယ်။ ဒါကို သူတို့နဲ့ နှစ်၇၀လောက် စစ်တိုက်လာတဲ့ တိုင်းရင်းသား လက်နက်ကိုင်များ ကောင်းစွာသိထားကြပြီးသားပါ။ ဒါကြောင့်မို့ ပန်းတိုင်ရောက်ခါနီးတက်မထောင်ဖို့၊ သံပူတုန်း နာနာထုဖို့ဆိုတာတွေက သင်ပေးစရာမလိုတဲ့ကိစ္စတွေပါ။ ကိုယ့်ဝမ်းနာကိုယ်သာသိပါတယ်။ တရုတ်သိတာကလည်း သူ့အကျိုးစီးပွားအခြေခံပေါ်က သိတာပါ။ မြန်မာပြည်သူတွေ အကျိုးစီးပွားနဲ့ လိုလားချက်တွေအပေါ် အခြေခံပြီး စဥ်းစားထားတာ မဟုတ်ပါဘူး။ တရုတ်အမြင်နဲ့ ဆုံးဖြတ်ချက်တွေက မြန်မာ့အရေးအဆုံးအဖြတ်အဆင့်ဖြစ်မယ်ဆိုတာက လက်တွေ့မကျတဲ့အမြင်ပါ။ အပြင်က လူတွေရဲ့ အပေါ်ယံသိတွေက အလုပ်ဖြစ်မှာမဟုတ်ပါဘူး။ မည်သို့ဆိုစေ မြန်မာ့အရေးစိတ်ဝင်စားတာတော့ကောင်းပါရဲ့။ ဒါပေမယ့် မပြီးခင် ကမ္ဘာမမြင်စေနဲ့ဆိုတဲ့ စကားကိုပဲ သတိရမိစရာ ဖြစ်လာနေပါတယ်။ လမ်းကြောင်းတွေက ရှင်းနေပြီးသားပါ။ ဒီလမ်းကြောင်းအတိုင်းဆက်လျောက်ဖို့ သံဓိဌာန်ကလဲ ခိုင်မာကြပြီးသားပါ။ ဒါကြောင့် တွေဝေစရာမရှိ ယိမ်းယိုင်စရာမရှိ ချမှတ်ထာပြီးသားလမ်းကြောင်းတွေအတိုင်း ဆက်လျောက်ကြရမှာ ဖြစ်ကြောင်းပါ။

လက်ရှိစစ်ရေးအခြေအနေကို ခြုံငုံသုံးသပ်နိုင်ဖို့ PDF Insight ကို ဖတ်ရှုပါ။

#PDFInsight

အာဏာသိမ်းအကြမ်းဖက် စစ်အုပ်စုသည် မြန်မာနိုင်ငံပြိုကွဲမည့် အခြေအနေသို့ တွန်းပို့ဖန်တီးနေသည့် အဓိကတရားခံဖြစ်သည့်အပြင် မင်းအောင်လှိုင်နှင့်အပေါင်းအပါတို့သည် လူသားမျိုးနွယ်အပေါ် ကျူးလွန်သည့် ရာဇဝတ်မှုများအတွက် မဖြစ်မနေတာဝန်ခံရမည်ဖြစ်သည်။ ထို့ကြောင့် တပ်မတော်သားအားလုံးအနေဖြင့် အာဏာသိမ်းအကြမ်းဖက် စစ်တပ်မှစွန့်ခွာ၍ ပြည်သူလူထုလိုလားသော ဂုဏ်သိက္ခာ ရှိသည့် တပ်မတော်တရပ်အဖြစ် ပေါ်ထွန်းလာရေးအတွက် ပူးပေါင်းကြရန် ဖိတ်ခေါ်အပ်ပါသည်။

CB၊ CRPH၊ NLD၊ NUCC၊ NUG
၂၀၂၅၊ ဖေဖော်ဝါရီ (၃) ရက် ပူးတွဲထုတ်ပြန်ချက်

မြို့ပြဒေသကို ထိုးဖောက်လာတဲ့ PDF
…………………………
ကျေးလက်အခြေခံ မြို့ဝိုင်းမဟာဗျူဟာ ချမှတ်ထားတဲ့အတိုင်း ကျေးလက်ဒေသ နယ်မြေအများစုကို အမျိုးသားညီညွတ်ရေးအစိုးရ၊ ပြည်သူ့ကာကွယ်ရေးတပ်မတော်၊ ပကဖတွေ စိုးမိုးထားနိုင်ပြီးတဲ့နောက်မှာ မြို့ပြ ဒေသကို ထိုးဖောက်တိုက်ခိုက်မှုတွေ ပိုမိုပေါ်ထွက်လာပါတယ်။

၂၀၂၅ ခုနစ်၊ ဇန်နဝါရီ ၁၃ ရက်နေ့မှာ တောင်သာမြို့ပေါ်က စစ်ကောင်စီတပ်စွဲထားတဲ့ နေရာ ၃ နေရာထက်မနည်းမှာ ကို ပြည်သူ့ကာကွယ်ရေးတပ်မတော်၊ မြင်းခြံခရိုင် အမှတ် (၃) တပ်ရင်းက ဝင်ရောက် တိုက်ခိုက်ခဲ့ပါတယ်။ တောင်သာမြို့ထဲက အမှတ် (၁) အထက်တန်း‌ကျောင်းမှာ တပ်စွဲထားတဲ့ အင်အား ၂၀ ဝန်းကျင်ရှိတဲ့ စစ်ကောင်စီတပ်ကို တိုက်ခိုက်ခဲ့ပြီး ကျောင်းသား၊ ကျောင်းသူတွေ ဘေးလွှတ်ရာကိုရွှေ့ပြောင်းပေးခဲ့တယ်လို့ အဆိုပါ မြင်းခြံတပ်ရင်းက ပြောပါတယ်။

၂၀၂၄ ခုနစ်၊ နိုဝင်ဘာလ ၂၅ ရက်နေ့မှ ဒီဇင်ဘာလ ၆ ရက်နေ့ အတွင်းမှာလည်း အုတ်တွင်းမြို့ပေါ်က စစ်ကောင်စီတပ် တပ်စွဲထားတဲ့ မြို့နယ်ရဲစခန်း၊ ထွေအုပ်ရုံး၊ စီးပွားရေးဘဏ်နှင့် မြို့‌တောင်ဘက်အထွက်ရှိ စစ်ဆေးရေးဂိတ် တို့ကို ပြည်သူ့ကာကွယ်ရေးတပ်မတော် နဲ့ ပကဖတွေ ဝင်ရောက် စီးနင်းတိုက်ခိုက်ခဲ့ကြပါတယ်။

မကွေးတိုင်း၊ စလင်းမြို့အနီးကို တော်လှန်ရေး အင်အားစုတွေ ရောက်ရှိလာပြီးတဲ့နောက်မှာလည်း စလင်းမြို့ပေါ်က စစ်ကောင်စီ ရုံးအားလုံးကို ပိတ်သိမ်းလိုက်ပါတယ်။ ပဲခူးတိုင်း၊ သာယာဝတီခရိုင် တွင်းမှာလဲ မြို့သိမ်းတိုက်ပွဲတွေ ပေါ်ပေါက်လာနိုင်တဲ့ အတွက် ပြည်သူတွေ ကြိုတင်ပြင်ဆင်ထားဖို့ သာယာဝတီခရိုင် PDF က အသိပေးပြောကြားထားပါတယ်။

မြန်မာနိုင်ငံရဲ့ အကြီးမားဆုံး မြို့ကြီးဖြစ်ပြီး ရန်သူ့လုံခြုံရေး တင်းကြပ်ထားတဲ့ ရန်ကုန်မြို့၊ မရမ်းကုန်းမြို့နယ် Apollo Hotel မင်္ဂလာပွဲ တက်လာတဲ့ စရဖ ဗိုလ်မှူး တဦးကို ၂၀၂၄ ခုနစ်၊ ဒီဇင်ဘာလ အတွင်းမှာ ရန်ကုန်မြို့ပြပြောက်ကျားအဖွဲ့ဖြစ်တဲ့ Yangon Phoenix နဲ့ Together Urban Force တို့က ပစ်ခတ်ခဲ့ပါတယ်။

တနင်္သာရီတိုင်း မြို့တော်ထားဝယ်မှာလည်း စစ်တပ် ကင်းအဖွဲ့ကို ၂၀၂၄ ခုနစ်၊ နိုဝင်ဘာလ (၁၈) ရက်နေ့က အိမ်ရှေ့ပြင်ရပ်ကွက် နဲ့ ဆင်ဆိပ်ရပ်ကွက်ကြားမှာ ရေဖြူမြို့နယ် ပြည်သူ့ကာကွယ်ရေးတပ်ဖွဲ့ နဲ့ ထားဝယ်အမျိုးသားလွတ်မြောက်ရေးတပ်တော်တို့က တိုက်ခိုက်ရာ စစ်သား (၅) ဦး သေဆုံးပြီး လက်နက် (၅) လက် သိမ်းဆည်းရရှိခဲ့ပါတယ်။

၂၀၂၄ ခုနစ် ဩဂုတ်လမှ ဒီဇင်ဘာလအထိ (၅) လ တာ အတွင်း မြို့ပြ ဒေသမှာရှိတဲ့ ရန်သူ့ တပ်ဖွဲ့ဝင်တွေကို PDF၊ ပကဖ နဲ့ တော်လှန်ရေး အဖွဲ့အသီးသီးက ပစ်ခတ်တိုက်ခိုက်မှု ဖြစ်စဉ် (၇၁) ခု ထက် မနည်း ရှိခဲ့ပါတယ်။ အထက်ပါ ဖြစ်စဉ်တွေကိုကြည့်ရင် မြို့တွင်းတိုက်ခိုက်မှုတွေဟာ စစ်ကိုင်းအထက်ပိုင်း မြို့တွေသာမက မကွေးတိုင်း၊ ပဲခူးတိုင်း၊ တနင်္ဿာရီတိုင်း၊ ရန်ကုန်တိုင်း မြို့ပြ ဒေသတွေထိပါ ပျံ့နှံ့ရောက်ရှိနေပြီဆိုသာ သိနိုင်ပါတယ်။ မြို့ပြဒေသတွေမှာပါ စစ်ရေးအရ အထိနာလာတာနဲ့အတူ စစ်တပ်အုပ်ချုပ်ရေး ယန္တရားတွေဟာ ယိုင်နဲ့ ပျက်စီးလာနေတာတွေကို တွေ့ရပါတယ်။

လက်ရှိစစ်ရေးအခြေအနေကို ခြုံငုံသုံးသပ်နိုင်ဖို့ PDF Insight ကို ဖတ်ရှုပါ။

#PDFInsight

အဓမ္မစစ်သားစုဆောင်းခံရသော လူငယ်များ လုပ်ဆောင်ရန် အချက်များ
.......................................

အကြမ်းဖက်စစ်တပ်အနေနဲ့ လူအင်အား မလုံလောက်မှုကို လူငယ်၊ လူရွယ်များကို အတင်းအကြပ် ဖမ်းဆီးပြီး တပ်သားသစ်စု‌ဆောင်းကာ ဖြေရှင်းဖို့ ကြိုးပမ်းလာတာကို တွေ့ရပါတယ်။ အဲဒီလို အတင်းအကြပ် စုဆောင်းခံရတဲ့ တပ်သားသစ်တွေနဲ့ စစ်တိုက်လို့မရဘဲ၊ ပြည်သူ့ကာကွယ်ရေးတပ်မတော်၊ ပကဖ နဲ့ တိုင်းရင်းသား တော်လှန်ရေးအဖွဲ့တွေ အတွက် လက်နက်ရေသောက်မြစ်၊ တပ်သားသစ် ရေသောက်မြစ်သာ ဖြစ်လာတာကိုတွေ့ရပါတယ်။ တပ်သားသစ်တွေ အနေနဲ့လည်း တိုင်းရင်းသားဒေသမှာသာမက မြန်မာနိုင်ငံ အတွင်းပိုင်း၊ အလယ်ပိုင်း မြို့ရွာ အသီးသီးကနေ ထွက်ပြေးနေသလို စစ်သင်တန်းကျောင်းတွေကပါ ထွက်ပြေးလျက်ရှိပါတယ်။

အဲ့ဒီလို အဓမ္မလူသစ်စုဆောင်းမှု ခံလိုက်ရတဲ့ လူငယ်၊ လူရွယ်တွေ လိုက်နာသင့်တဲ့ အချက်တွေကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက ထုတ်ပြန်ထားပါတယ်။

၁) PDF တပ်ရင်း၊ ပကဖအဖွဲ့တွေ ရဲ့ လူမှုကွန်ယက်စာမျက်နှာတွေ၊ ပြည်သူ့ရင်ခွင် တယ်လီဂရမ် @Myanmar People ကို (ကြိုတင်) ချိတ်ဆက်ထားဖို့
၂) စစ်သင်တန်းတွင်း၊ သင်တန်းပြီး ကာလမှာ PDF, ပကဖ၊ ပအဖ၊ ပလဖ နဲ့ တိုင်းရင်းသားအဖွဲ့တွေနဲ့ ချိတ်ဆက် အမြန်ဆုံး ဘက်ပြောင်းဖို့
၃) ဘက်ပြောင်းလာသူတွေကို လုံခြုံရေး တာဝန်ယူသလို လက်နက်ပါလာပါက ဆုကြေးငွေ ချီးမြှင့်မယ်လို့ ပါရှိပါတယ်။

လတ်တလော ဘက်ပြောင်းမှု ဖြစ်စဉ်တွေကို ကြည့်ရင်ကို စစ်တပ်ဟာ ပြိုလဲနေပြီ အဓမ္မလူသစ် စုဆောင်းခံရသူတွေဟာ အခြေအနေပေးတာနဲ့ နည်းလမ်းမျိုးစုံသုံး ထွက်ပြေးနေပြီ ဆိုတာ သိသာပါတယ်။
- ယခုနှစ်ဆန်းက စတင်ပြီး လောင်းလုံ ပကဖ ထံ ခလရ (၂၅) က တပ်သားသစ် စုဆောင်းခံရသူ (၅) ဦး ခိုလှုံခဲ့ပါတယ်။
- တနင်္သာရီတိုင်း၊ ဘုတ်ပြင်းမြို့နယ်မှာလည်း စစ်မှုထမ်း သင်တန်းအပတ်စဉ် (၆) ဆင်း တပ်သားသစ် (၃) ဦး ဘက်ပြောင်းခဲ့ပါတယ်။
- နေပြည်တော်ဒေသမှာလည်း တပ်သားသစ် (၇) ဦး ကို နေပြည်တော် ပကဖ က ကယ်ထုတ်စဉ် လူသစ်စုဆောင်းခံခဲ့ရတဲ့ တပ်သားသစ် (၃) ဦး ကျဆုံးပြီး ကျန်တပ်သားတွေကို လုံခြုံရာကို ရွေ့ပေးနိုင်ခဲ့ပါတယ်။
- မုံရွာမြို့တော်ခန်းမမှာ လုံခြုံရေး တာဝန်ချခံထားရတဲ့ အပတ်စဉ် (၅) ဆင်း တပ်သားသစ် တဦးဟာ မုံရွာ ခရိုင် တပ်ရင်း (၂၂) နဲ့ ချိတ်ဆက်ပြီး ဘက်ပြောင်းလာခဲ့ပါတယ်။
- စစ်ကိုင်းမြို့နယ်မှာပဲ အပတ်စဉ် (၅) ဆင်း တပ်သားသစ် တဦးဟာ မုံရွာခရိုင် အမှတ် (၂၅) တပ်ရင်း နဲ့ ချိတ်ဆက်ဘက်ပြောင်းခဲ့ပါတယ်။
- မုံရွာ အနောက်မြောက်တိုင်း စစ်ဌာနချုပ် မှာ တာဝန်ကျနေတဲ့ တပ်သားသစ် (၅) ဦး ဟာ လက်နက်အပြည့်အစုံ နဲ့ အတူ Union Liberation Front နဲ့ မဟာမိတ်တွေဆီ ဘက်ပြောင်းခဲ့ပါတယ်။
- အုတ်ဖိုမြို့နယ် ခမရ (၆) တပ်ရင်းက တပ်သားသစ် (၇) ဦးဟာ လက်နက်နဲ့ အတူ ထွက်ပြေးခဲ့ပါတယ်။
- ပခုက္ကူမြို့နယ်မှာလည်း တပ်မ (၁၀၁) မှာ အဓမ္မ လူသစ်စုခံထားရတဲ့ တပ်သားသစ် (၂) ဦးဟာ ပခုက္ကူမြို့နယ် ပကဖ နဲ့ ချိတ်ဆက် ဘက်ပြောင်းခဲ့ပါတယ်။
- ပုသိမ်မြို့နယ်၊ ရွှေမြင်တင်ရွာမှာရှိတဲ့ အမှတ် (၆) စစ်အခြေခံ လေ့ကျင့်ရေးတပ်က သင်တန်းသား (၄၀) ဦး ထွက်ပြေးရာမှာ (၂၄) ဦး လွတ်မြောက်ခဲ့ပါတယ်။
- ကရင်နီ ဒေသမှာလည်း တပ်သားသစ် ရာနဲ့ချီပြီး ဘက်ပြောင်းလျက်ရှိတယ်လို့ KNDF က ပြောကြားသွားပါတယ်။
- ကျောက်ကြီးမြို့နယ် ခလရ (၂၈၈) က သင်တန်းဆင်း တပ်သားသစ် (၂) ဦး ဟာလည်း KNLA ထံ လက်နက် နဲ့ အတူ ဘက်ပြောင်းခဲ့ပါတယ်။

လက်ရှိစစ်ရေးအခြေအနေကို ခြုံငုံသုံးသပ်နိုင်ဖို့ PDF Insight ကို ဖတ်ရှုပါ။

#PDFInsight

လုံလောက်တဲ့ အင်အားရှိ​နေပြီဖြစ်တဲ့ နွေဦးတော်လှန်​ရေး

အ​မေရိကန်မှာ ဒေါ်နယ်ထရမ့်သမ္မတဖြစ်လာတာနဲ့ လှုပ်ခတ်မှု​တွေဖြစ်လာသလို မြန်မာ့အ​ရေးကလည်း အ​ပြောင်းအလဲတခုအတွက် တာဆူ​နေတာဖြစ်ပါတယ်။ အ​မေရိကန်ရဲ့ မြန်မာအ​ပေါ်သ​ဘောထားက ပြောင်းလဲ​ကောင်း​ပြောင်းလဲနိုင်တယ် သို့မဟုတ် သမ္မတဘိုင်ဒင် လက်ထက်ကလိုပဲ မတင်မကျအ​ခြေနေမျိုးပဲ ဖြစ်မလားဆိုတာ စောင့်ကြည့်ရမှာဖြစ်ပါတယ်။ လော်ဘီလုပ်ရာမှာ​တော့ ဘာသာ​ရေးလွတ်လပ်ခွင့်အ​ပေါ်ဦးစား​ပေး လုပ်သင့်တယ်လို့ ပြောဆို​နေကြတာ​ဖြစ်တယ်။ ဒါက​တော့ ကွန်ဆာ​ဗေးတစ်​တွေရဲ့ ဘာသာ​ရေးအ​လေးထားမှုကို အကျိုးရှိ​အောင် အခွင့်​ကောင်းယူတာပဲဖြစ်တယ်။ ဒါ​ပေမယ့် ယာယီသမ္မတ ဒူဝါလရှီးလ​က ၂၀၂၄ နိုဝင်ဘာလအတွင်းက ပြောကြားခဲ့တဲ့ နိုင်ငံတကာမှာ မြန်မာ့အ​ရေး​ဆောင်ရွက်မှု​တွေဟာ အချိန်ယူသင့်သ​လောက်ယူပြီးပြီလို့လည်း​ပြောနိုင်သလို အချိန်​ပေးသင့်တာထက်လည်း ပိုပြီး​ပေးခဲ့ပြီလို့ ပြောနိုင်​ကြောင်း ဆိုတာကိုလည်းအမှတ်ရကြရမှာဖြစ်ပါတယ်။

မြန်မာ့အ​ရေးမှာ​တော့ တရုတ်နိုင်ငံရဲ့ပါဝင်ပတ်သက်မှု​တွေက ဆက်လက်​တွေ့မြင်ရမယ့်သ​ဘောရှိပါတယ်။ ပြီးခဲ့တဲ့လအတွင်း ကိုးကန့်နဲ့ စကစကြား သ​ဘောတူညီချက်ရရှိခဲ့​ကြောင်း တရုတ်ဘက်​ကြေညာခဲ့​ပေမယ့် ကာယကံရှင်​တွေဘက်က နှုတ်ဆိတ်​နေတာဖြစ်တယ်။ ယခုလအတွင်းမှာပဲ တရုတ်က TNLA , AA တို့နဲ့ပါ စကစနဲ့ တွေ့ဆုံ​ပေးဖို့ရှိ​ကြောင်းသိရတာဖြစ်တယ်။ ဒီ​တွေ့ဆုံမှု​တွေက​နေ မည်သို့​သော ထုတ်ပြန်ချက်​တွေ ထွက်လာသည်ဖြစ်​စေ အကဲဖြတ်ချက်​တွေ မ​စောကြဖို့လိုပါတယ်။ တရုတ်ရဲ့​ပေါ်လစီ​တွေက အိမ်နီးချင်းနိုင်ငံ​တွေ တည်ငြိမ်မှ သူ့အတွက် အကျိုးဖြစ်ထွန်းနိုင်မှာနဲ့ အိမ်နီးချင်း​တွေ US နဲ့ နီးကပ်မသွား​ရေးက ဦးစား​ပေးပါပဲ။ ဒီတရုတ်​ပေါ်လစီ​တွေနဲ့ တော်လှန်​ရေး​အောင်မြင်ဖို့အ​ရေးကြားမှာ ပါးနပ်စွာ ထိန်းညှိ​ဆောင်ရွက်​ရေးက နွေဦး​တော်လှန်​ရေးအတွက် အကြီးမားဆုံး စိန်​ခေါ်မှုပါပဲ။ အခုချိန်မှာ တိုင်းရင်းသားများရဲ့ လက်နက်ကိုင်​တောင်းဆိုမှုနဲ့တိုက်ပွဲဝင်​နေမှု​တွေဟာ NUG ဦး​ဆောင်တဲ့ မြေပြန့် PDF များရဲ့ ဦးတည်ချက်နဲ့ တထပ်ထဲဖြစ်တယ်ဆိုတာလည်း မ​မေ့ကြဖို့လိုတာဖြစ်တယ်။

တဘက်မှာ​တော့ တော်လှန်​ရေး အရှိန်အဟုန်က ဆက်ပြီး တိုးတက်ဖြစ်ထွန်းနေတာဖြစ်တယ်။ ရခိုင်ပြည်နယ်မှာ AA က စစ်​တွေကိုစပြီး ထိုးစစ်ဆင်​နေပါပြီ။ AA နဲ့ PDF ပူး​ပေါင်းတပ်​တွေက မ​ကွေး ပဲခူးနဲ့ ဧရာဝတီတိုင်းအစပ်က နယ်​မြေ​တွေကို ထိုး​ဖောက်ဝင်​ရောက်လာ​နေပြီဖြစ်တယ်။ကရင်ပြည်နယ်မှာ​တော့ ဖြေး​ဖြေးနဲ့မှန်မှန် အ​ရေးပါတဲ့စခန်း​တွေ တခုပြီးတခုသိမ်းပိုက်လာ​​နေတာပါ။ စစ်​ကြောင်းမှူး ဗိုလ်ဒါ​ဘောရဲ့ အင်တာဗျူးမှာ သူတို့ဟာ နယ်​မြေ​တွေကို တ​ဖြေး​ဖြေးသိမ်းပိုက်အနိုင်ယူခြင်းအားဖြင့် နောက်ဆုံးမှာ အ​ရေးပါတဲ့မြို့တွေက အလိုအ​လျောက်ကျသွားအောင် လုပ်​နေတာဖြစ်တယ်လို့​ပြောသွားတာ​တွေ့ရပါတယ်။ ဒါက မဟာဗျူဟာအမြင်တခုဖြစ်လို့ သတိပြုစရာဖြစ်ပါတယ်။ ကရင်မှာရှိတဲ့ နောက်ပြသနာကြီးက BGF နဲ့ ကျားဖြန့်ကိစ္စပါပဲ။ ဒီကိစ္စဟာ ဒေသတွင်းသာမက ကမ္ဘာ့အင်အားကြီးနိုင်ငံ​တွေရဲ့ လုံခြုံ​ရေးကိုပါ ခြိမ်း​ခြောက်ထိခိုက်​စေတာပါ။တ​နေ့ကပဲ အ​မေရိကန်သမ္မတ လက်မှတ်​ရေးထိုးလိုက်တဲ့ မြန်မာဟာ အ​မေရိကန်အကျိုးစီးပွားနဲ့ လုံခြုံ​ရေးကို အဓိက ခြိမ်း​ခြောက်​နေတဲ့အတွက် အ​ရေး​ပေါ် ဥပ​ဒေပြဌာန်းမှုကို တနှစ်သက်တမ်းတိုးလိုက်တယ်ဆိုတဲ့ထဲမှာ ဒီကိစ္စ​တွေလည်းပါနိုင်တာဖြစ်တယ်။ တရုတ်က ကျားဖြန့်နှိမ်နင်း​ရေးမှာ ထဲထဲဝင်ဝင် ဖိအား​ပေး​နေလို့ ထိုင်းဘက်က မီးဖြတ်ရ ဆီဖြတ်ရ လုပ်လာတယ်။ BGF ရော DKBA တို့ပါ ကျားဖြန့်ကိစ္စ ပူး​ပေါင်း​ဆောင်ရွက်ပါမယ်ဆိုပြီး အသီးသီး နှုတ်ထွက်ဖို့ကြိုးပမ်းလာကြ​ပေမယ့် အဓိက ပူးတွဲတရားခံဖြစ်တဲ့ စကစပါ အမှုတွဲ​ပေးနိုင်ဖို့ မိမိဘက်ကြိုးပမ်းကြရမှာပါ။

နွေဦး​တော်လှန်​ရေး ဘယ်နည်းဘယ်ပုံ အောင်ပွဲခံသွားနိုင်မလဲဆိုတာအ​ပေါ် လတ်တ​လောမြင်​တွေ့​နေရတဲ့ အ​ခြေအ​နေများအရသုံးသပ်မယ်ဆိုရင် မြန်မာအ​​နောက်​​ကြော ချင်း​တောင်ပိုင်းနဲ့ AA အင်အားများ ၊ မြန်မာအလယ်​ကြော စစ်ကိုင်းမ​ကွေး PDF များနဲ့ TNLAအင်အားများ ၊ မြန်မာ​အ​ရှေ့​တောင်ခြမ်း ကရင်နီနဲ့ KNLAအင်အားများ+ PDF များက အဆုံးအဖြတ် ဖြစ်နိုင်ပါတယ်။ဒီ​နေရာမှာ ဧရာဝတီအ​နောက်ခြမ်းက လက်နက်စက်ရုံများထဲက ပိုပြီး အခရာကျတဲ့စက်ရုံများကို ဦးတည်တိုက်ခိုက်ဖို့က ရှေ့ကို​ရောက်လာနိုင်ပါတယ်။ ဒီစက်ရုံအချို့ကို သိမ်းပိုက်တာ သို့မဟုတ် ဖျက်ဆီးတာ လုပ်နိုင်ရင်​တောင် မင်း​အောင်လှိုင်တပ် ဒူး​ထောက်ရတဲ့ ဘဝ​ရောက်သွားနိုင်ပါတယ်။ ဗိုလ်ဒါ​ဘော​ ပြောတဲ့ လမ်း​ကြောင်းဟာ ကိုးကန့်သားတို့ လောက်ကိုင်ကို သေနတ်တချက်မ​ဖောက်ရပဲ သိမ်းပိုက်ရရှိခဲ့တဲ့ လမ်း​ကြောင်းမျိုးပါပဲ။ ဒါဟာ ဆွန်ဇူးရဲ့ စစ်ဆင်​ရေးမှာ အ​ပြောင်​မြောက်ဆုံးလို့ ချီးကျူးရတဲ့ အမြင့်ဆုံး နည်းပရိယာယ် သို့မဟုတ် နည်းဗျူဟာတခုပါပဲ။ ဒုတိယကမ္ဘာစစ်တုန်းက ရခိုင်ဘက်က​နေထိုး​ဖောက်ဝင်​ရောက်ပြီး ဗမာပြည်ကို သိမ်းပိုက်မယ့် အစီအစဥ်က မ​အောင်မြင်ခဲ့လို့ မဟာမိတ်တပ်​တွေဟာ မြောက်ပိုင်းက​နေ မြန်မာအလယ်​ကြောအတိုင်းထိုးဆင်းပြီး ရန်ကုန်အထိ ချီတက်သိမ်းပိုက်ခဲ့ရတာဖြစ်တယ်။ အခု​တော့ ဂျပန်လက်ကျ မအလရဲ့ဖက်ဆစ်တပ်ဟာ ရခိုင်မှာ AAကို အရှုံးကြီးရှုံးထားပြီဖြစ်လို့ ဧရာဝတီအ​​နောက်ခြမ်းတိုက်ပွဲ​တွေဟာ နေပြည်တော်သိမ်းပိုက်​ရေးအတွက် အနီးဆုံးလမ်း​ကြောင်း ဖြစ်လာပါလိမ့်မယ်။ AAခေါင်း​ဆောင် ဗိုလ်ချုပ်ထွန်းမြတ်နိုင်​ပြောခဲ့သလို တိုင်းရင်းသား​တွေရဲ့ ကိုယ့်လူမျိုးတမျိုးထဲ လွတ်​မြောက်​ရေးဟာ မ​အောင်မြင်နိုင်ဘူးဆိုတာ နှစ် ၇၀ သမိုင်းက လက်​တွေပြခဲ့ပြီးပါပြီ။ ဒါ​ကြောင့် ဒီအကြိမ်မှာ​တော့ တရုတ်နယ်စပ် အင်အားတချို့မှအပ ကျန်အင်အားအားလုံးစု​ပေါင်းခြင်းဟာ မအလတပ်ကို အပြုတ်ဖြုတ်ဖို့ လုံ​လောက်တဲ့ အင်အားစုဖွဲ့မှုဖြစ်​ကြောင်း သက်​သေပြရ​တော့မှာ ဖြစ်ပါတယ် ။

လက်ရှိစစ်ရေးအခြေအနေကို ခြုံငုံသုံးသပ်နိုင်ဖို့ PDF Insight ကို ဖတ်ရှုပါ။

#PDFInsight