ثاني طريقة للمكافحة 2️⃣🔨🦠 …


غسل اليدين بالماء والصابون
وتسمى hand wash


متى أعرف إني لازم أغسل يدي ⁉️

- لم تكون فيه وصاخة في يدي أشوفها بعيني وقتها لازم أغسل يدي بماء وصابون وأيضا هذا يشمل الدم إذا جاء عن طريق الخطأ على يدك

- قبل وبعد الأكل

- بعد استخدام دورة المياه

- بعد فترة طويلة من مسك أشياء كثيرة مثلا نهاية الدوام


كم مدة غسل اليد بالماء والصابون ⁉️

من 40 إلى 60 ثانية ⏱

ثالث طريقة للمكافحة 3️⃣🔨🦠 …


ارتداء معدات الوقاية الشخصية
وتسمى personal protective equipment
واختصارها ( PPE )


وهي عبارة عن :

- القفازات 🧤
- الكمّامه 😷
- الثوب 🥼
- قناع الوجه 👩🏻‍🚀
- النظارات 🥽


ال PPE هي أشياء نلبسها عشان نمنع حالة العدوى تصيبنا أو نمنع انتقالها بين المرضى



- القفازات 🧤 gloves
هي شي أساسي نستخدمه في كل وقت ولمرة واحدة فقط لكل مريض ونرميها

وهي نوعين :

- قفازات غير معقمة non sterile gloves
وهي القفازات العادية اللي نستخدمها دايما

- قفازات معقمة sterile gloves
تستخدم وقت العمليات غالبا


- الكمّامه 😷 mask
كلنا نعرفها ولازم حنا كممارسين صحيين على طول نكون لابسينها ، ما يمنع نستخدمها لأكثر من مريض لكن يفضل نغيرها باستمرار وما نخليها معنا طول اليوم

وهي أيضا نوعين :

- كمامات عادية اللي نعرفها ، هذا النوع ما يمنع كل المايكروبات

- كمام N95 وهذا يكون شكله دائري يمنع كمية أكبر من المايكروبات وكان يستخدم في التعامل مع حالات كورونا


- الثوب 🥼 Gown

نلبسه فوق ملابسنا عشان نمنع التلامس مع المريض أو تطاير سوائل على ملابسنا عشان ما نكون مصدر عدوى لغيرنا


- قناع الوجه أو درع الوجه 👩🏻‍🚀 face shield

يستخدم لمنع الأشياء المتطايره انها تجي على الوجه يستخدم في بعض العمليات وأكثر من يستخدمونه هم أطباء الأسنان


- النظارات الواقية 🥽
تسمى goggles أو protective eyewear

بما إن العين مدخل للعدوى فبعضهم يكتفي بارتداء النظارات بدون ما يلبس درع الوجه


وهذي هي ال PPE 👍🏻😁

خلونا نتعلم طريقة لبس وخلع الـ PPE

ترتيب اللبس DONNING ارفع يدينك فوق واللبس يكون من أسفل لأعلى :

1- Gown 🥼
2- Mask 😷
3- Protective eyewear 🥽
4- Gloves 🧤


ترتيب الخلع DOFFING يكون من أعلى لأسفل :

1- Gloves 🧤
2- Protective eyewear 🥽
3- Gown 🥼
4- Mask 😷



🛑 لازم نتذكر :

- قبل ما نلبس لازم نعقم اليدين

- بعد ما نخلع لازم نعقم اليدين

- ال PPE نلبسها قبل ندخل على المريض

- ال PPE نخلعها وحنا في غرفة المريض باسثناء الكمامه نشيلها اذا طلعنا برا الغرفه

- الكمامه لم نستخدمها مع مريض عنده مرض معدي لازم نغيرها أما لو كان المريض ما عنده مرض معدي ما يمنع نخليها لفترة بسيطة بس ماهو اليوم كله 👍🏻😁

- لو افترضنا انه في زائر لهذا المريض اللي عنده مرض معدي ، لازم الزائر يلبس PPE مثلنا عشان نسمح له يدخل عليه

- لم ننقل مريض اما لقسم أشعة أو عملية لازم يكون لابس كمامه حتى لو ما عنده مرض معدي 👍🏻

.

ممكن تمشي في قسم التنويم في يوم من الأيام وتلاقي وحده من الصور اللي بحطها في الملفات تحت

كل صورة ترمز لعدوى معينة

عدوى رذاذية 💦
- عدوى عن طريق الهواء 🌬
- عدوى بالتلامس 🙌🏻


- الصور هذي يحطونها على غرفة المريض عشان الكادر الطبي ما يدرعم بدون PPE 🤣
وأيضا عشان الزوار

- الصور هذي تعلمنا وش نلبس قبل ندخل


🦠 المميز بينهم هي عدوى الهواء تحتاج كمام N95 ويكون تكييف غرفة المريض ضغط سلبي يعني التكييف يمتص الهواء من الغرفه

قواعد عامة للأدوات والأماكن المعقمة …


🦠 أي شي يطيح على الأرض أو يكون مفتوح من فترة يصبح غير معقم


🦠 عشان نستخدم مثل القفازات المعقمه لازم نعقم أيدينا ونفتح الكيس بطريقة معينة ونلبس القفاز بطريقة معينة عشان ما نلمس بأيدينا كل شي لأن اليد تعتبر غير معقمه بشكل كامل فالقاعده هنا تقول الأدوات المعقمه نستخدم معها أدوات معقمه عشان ما تتلوث 👍🏻


🦠 أي شي فوق مستوى الخصر لابد يكون معقم وقت ما نحاول نسوي أي بروسيجر


🦠 المناطق المعقمه مثل غرفة العمليات ما ينفع ندخلها بملابسنا لازم نلبس PPE كامل عشان المنطقه ما تتلوث


🦠 مصطلح Asepsis يعني عدم وجود عدوى فتكون إجراءات مكافحة العدوى خفيفة شوي وليست مثل إجراءات حالة وجودة عدوى


🦠 الأدوات مهما كانت بسيطة لازم تتعقم قبل وبعد أي بروسيجر

رابع طريقة للمكافحة 4️⃣🔨🦠 …


النفايات الله يكرمكم تعتبر وحده من مصادر العدوى فلازم نتعلم كيف نتخلص منها
طبعا في المستشفى بتلاحظون فيه حاويات بألوان مختلفه


حاوية باللون الأسود ⚫️

تكون نفايات عامة ونقدر نرمي فيها معدات ال PPE بشرط تكون مافيها أي سوائل من المريض مثل دم أو شي ثاني وأيضا بشرط ما يكون المريض اللي تعاملنا معاه عنده مرض معدي


حاوية باللون الأصفر 🟡

هذي نرمي فيها أشياء ممكن تكون خطيرة مثل ال PPE اذا كان عليها سوائل أو وصاخة أو نرمي فيها ال PPE بعد ما نتعامل مع مريض عنده مرض معدي
وأيضا نرمي فيها أي شي فيه من سوائل المريض مثلا قطن أو شاش


حاوية باللون الأحمر 🔴
هذي غالبا تكون في غرف العمليات وفقط تكون مخصصة لأجزاء من جسم الإنسان يحطونها فيها


حاوية الأشياء الحادة 💉
هذي نرمي فيها كل شي حاد مثل الابر أو الكانيولا
والحاوية هذي لازم تكون في مكان مرتفع عشان ما تؤذي أحد


معلومة إضافية …

في شنطة تكون في كل قسم في المستشفى اسمها Spill kit هذي شنطة يتسخدمونها إذا انسكب شي خطير ومعدي على الأرض

🛑 ملاحظة …

نظام التخلص من النفايات يتحدث كل فترة فاعرف المستشفى اللي تعمل فيه على أي نظام يمشي 👍🏻

.

وأخيييييرا
كذا نكون خلصنا كل شي يخص مكافحة العدوى 🦠
ان شاء الله ما نسيت شي

وسامحوني طولت عليكم 😁🙏🏻

أهلا يا حلوين 👋🏻 …


بنكمل شرحنا في موديول 3
بنعرف كيف نمنع الإصابات عن نفسنا وعن المريض 👍🏻😁


يالله نبدأ 🏃🏻‍♂️

كيف تمنع إصاباتك أنت ك PCT ⁉️


حركات جسم الإنسان يسمونها
ميكانيكا الجسم
Body mechanics

لمّ يكون فيه ضغط كبير على منطقه معينة في جسمك هنا تزيد احتمالية إصابتك


فكيف نخفف الضغط ونوزعه على كل جسمنا بدل ما يكون الضغط في نقطة وحده بس ⁉️

أول شي …

دائما احرص ان ظهرك يكون مستقيم عشان تضمن التوازن وتوزيع الضغط ، كل ما حنيت ظهرك أكثر صار الظهر يتحمل كل الضغط وهذا غلط

ثاني شي …

لم تشيل شي أو تسحب شي احرص انك تخلي وحده من رجولك قدام شوي وخلي ركبتيك مثنيه شوي
( وضعية كاراتيه 👍🏻🤣 )
حاول تتعود على هذي الوضعية لم تشيل شي معين أو حتى تحاول تسحب المريض لأنها جدا صحية وتحمي جسمك

ثالث شي …

الشي اللي تبي تشيله أو تسحبه خليه قريب منك يعني ما ينفع تسحب المريض وتعدل وضعيته والسرير مره نازل ، ارفع السرير لمستوى يناسب طولك بعدها عدل وضعية المريض بكيفك


رابع شي …

دايما لا تسوي نفسك قوي وتسوي كل شي لحالك دائما اطلب مساعدة في الحالات الصعبة( أنا شخصيا كنت أتعامل مع كل شي لحالي لدرجة أنقل المرضى وأغير وضعياتهم وأوزانهم فوق الميه كيلو لحالي لكن مع الوقت بديت أحس بألم في ظهري والحمدلله اختفى فعقلت وقررت ما أصير سوبر مان 🤣)

.

كيف نمنع الإصابات عن المريض ⁉️


تذكير بمواضيع سابقة …

أهداف سلامة المرضى العالمية تعتبر أول وأهم شي في هذا الموضوع
لو حاب ترجع لها اضغط هنا


لازم نعرف مستوى المساعدة اللي يحتاجها المريض …

📍 مريض يعتمد على نفسه
Independent

يعني يقدر يسوي كل شي بنفسه وما يمنع نتطمن عليه بين فتره وفتره


📍 مريض يعتمد على نفسه لكن تحت إشراف
Standby supervision

يعني لم المريض يمشي في الممرات أو يحاول يسوي النشاطات اليومية حقته لازم نكون موجودين ونناظر فيه تحسبا لأي شي يصير


📍مريض يحتاج إلى مساعدة بسيطة
Minimal assist

هنا المريض يساعد نفسه بنسبه كبيره ولكن يحتاج أحيانا إلى مساعدة بسيطة منا
لو بنتعامل بنسبة مئوية يقدر يساعد نفسه بنسبة 75%

📍مريض يحتاج إلى مساعدة متوسطة
Moderate assist

يقدر يساعد نفسه بنسبة 50%


📍مريض يحتاج مساعدة كبيرة
Maximum assist

يقدر يساعد نفسه بنسبة 25%
فيكون الشغل أغلبه علينا



فيه قاعدة عامة ذكرناها قبل كذا تقول :

يفضل إن المريض يسوي كل شي بنفسه حتى لمّ نساعده نحاول نخليه يعتمد على نفسه قدر الإمكان لأن هذا في مصلحته 👍🏻

.

في أدوات تخلينا نساعد المريض بشكل أفضل يسمونها Assistive devices

خلونا نعرفها …


🩼 المشّايه Wallker
من اسمها تساعد على المشي ممكن تكون مثل العصا الفردي وممكن تكون ثنائية مثل حقت كبار السن


👨🏻‍🦯 العصا Cane
تساعد على المشي والحفاظ على التوازن


🥋الحزام Gait belt
هذا الحزام يستخدم إذا كنا نخاف على المريض يطيح وقت المشي فنلف هذا الحزام على خصره من فوق الملابس عشان نقدر نسنده وندعمه وقت المشي
أيضا يستخدم لتثبيت المريض على الكرسي المتحرك إذا كنا نخاف يطيح


👨🏻‍🦽الكرسي المتحرك Wheel chair
نستخدمه لنقل المريض إذا كان ما يقدر يمشي


🛹 لوح النقل
Slider board أو Transfer board
هذا اللوح يستخدم للنقل المباشر للمريض مثلا من سرير العملية لسرير المريض في الغرفة ويكون هذا اللوح ناعم عشان يقدر المريض يتزحلق عليه وينتقل بسهوله

.

أيضا من الأشياء اللي نمنع فيها الإصابة للمريض هي وضعيات المريض على السرير بشرحها وبحط ملف جمعت فيه أهم صور الوضعيات ان شاء الله يفيدكم 👍🏻😁


يالله خلونا نعرف الوضعيات 🏃🏻‍♂️

وضعيات المريض على السرير 🛏 …


🛏 وضعية النوم على الظهر
Supine position

هي الوضعية الاعتيادية لأغلب الحالات بحيث ينام المريض على ظهره

✅ فائدة الوضعية :
تستخدم بشكل أساسي مع حالات إصابة الحبل الشوكي وبعد التخدير النصفي

✅ ملاحظة حلوة :
ينصح الأطباء أحيانا للمريض اللي تلقى بنج نصفي إنه ينام بهذي الوضعية بشكل مستقيم بدون استخدام المخدّه عشان يضمن استقامة جسم المريض بشكل كامل ، وبعض الأطباء يشوفونها مبالغة فالقرار في الأخير بيد الدكتور اللي مستلم الحالة 👍🏻😁


🛏 وضعية النوم على البطن
Prone position

ينام المريض في هذي الوضعية على بطنه

✅ فائدة الوضعية :
يتم استخدام هذي الوضعية إذا تم أخذ عينة من الحبل الشوكي ، أو إذا كانت فيه عملية جراحية في المؤخره مثل البواسير


🛏 وضعية فاولر
Fowler position

هذي الوضعية تتعلق بالجزء الرأسي من السرير لم نرفعه بدرجة معينه ولها ثلاث أنواع بحسب درجة الزاوية :

1️⃣ ممكن نرفع رأس السرير ونخليه بزاوية 45 درجة وهذي وضعية فاولر العادية


2️⃣ وممكن نرفع رأس السرير بشكل مستقيم بزاوية 90 درجة وهذي تسمي وضعية فاولر المرتفعة
high fowler position

3️⃣ وممكن نرفعه شي بسيط بزاوية 30 درجة
وتسمى وضعية فاولر المنخفضه
Low fowler position

✅ فائدة الوضعية :
يهمنا نعرف إنها تفيد وقت الأكل والشرب تجنبا لأي حالة اختناق ، وأيضا تعتبر وضعية ممتازة للي عندهم مشاكل في التنفس ، وأيضا مع حالات إصابات الرأس


🛏 وضعية النوم على البطن الجانبية
Sim’s position

نلاحظ في هذي الوضعية إن المريض نايم على بطنه ولكن بشكل مائل شوي ويقوم بثني رجله اليسرى ويبعدها عن جسمه

✅ فائدة الوضعية :
تستخدم وقت الفحوصات الشرجية أو وقت إعطاء المريض حقنة شرجية


🛏 وضعية النوم على الجانب
Lateral position
وممكن تسمى Side lying position

وضعية ينام فيها المريض على جانبه الأيمن أو الأيسر


✅ فائدة الوضعية :

تستخدم في كل وقت طالما مافيها خطورة ولكن الاستخدام الفعلي يكون مع الإفاقة بعد الإغماء حتى إنهم يسمون هذي الوضعية وضعية الإفاقة 👍🏻😁


🛏 وضعية الإنحناء الرأسي
Trendelenburg position

السرير وهو مستقيم نقوم بإخفاضه من جهة رأس المريض

✅ فائدة الوضعية :

جدا مفيده في حالات الإغماء بسبب انقطاع الدم عن الدماغ بهذي الوضعية راح يوصل الدم للدماغ
أيضا تساعد مع حالات انخفاض الضغط بحيث تزيد من معدل ضغط الدم تدريجيا


🛏 وضعية الإرتفاع الرأسي
Reverse Trendelenburg Position

السرير وهو مستقيم نقوم برفعه من جهة الرأس


✅ فائدة الوضعية :

مفيده للمرضى اللي يعانون من ارتجاع ( استفراغ ) معوي ومشاكل في الجهاز الهضمي وأيضا مفيدة لحالات ارتفاع ضغط الدم


.

طبعا وضعيات المريض على السرير مره كثير
لكن من وجهة نظري اللي يهمنا ك PCT شرحته 👍🏻😁


ملاحظات الوضعيات …

🛏 المريض هو اللي يختار الوضعية اللي تريحه طالما مافيها خطر عليه يعني انتبهو تغصبونه على شي ما يبيه


🛏 وضعية المريض لازم تتغير كل ساعتين أو كل ثلاث ساعات حسب سياسة المستشفى اللي تعمل فيه والسبب هو تجنبا للتقرحات السريرية واللي تحدث بسبب استمرار الضغط على منطقه معينة بالجسم لفترات طويلة


🛏 وضع المخدات بين رجول المريض أو بين يدينه أو خلف ظهره إذا كان نايم على جنبه يعطيه راحه أكبر وأيضا تخفف الضغط على مناطق جسمه

جبت لكم هذي الجدّه الحلوه اللي بتتطوع عشان نفهم كيف ننقل المريض بسلام وسلاسة👍🏻😁 …



👨🏻‍🦯 مشي المريض :

لو المريض يحتاج مساعدة ما ننسى نستخدم الحزام اللي شرحناه عشان نضمن ما يطيح


👨🏻‍🦽 نقل المريض من السرير للكرسي المتحرك :

- لازم نستأذن من المريض أول شي

- نخلي المريض ينتظر شوي على طرف السرير تجنبا لأي دوخه بسبب الوقوف المفاجئ

- نخلي الكرسي المتحرك مقابل السرير عشان المريض على طول يجلس على الكرسي بسرعه

- نتأكد إن كفرات الكرسي المتحرك مغلقه

- لو خفنا المريض يطيح وحنا ندفه بالكرسي نستعمل الحزام عشان نربطه كويس 👍🏻🤣

- لو جيت عند نزله لف الكرسي المتحرك وابدأ اسحب المريض ، يعني لا تدف المريض على نزله وتجيب العيد 👍🏻

.

التعامل مع الحرائق 😱🔥 …


خطة الإخلاء وأماكن نقاط التجمع واستخدام طفايات الحريق أو بطانية الحريق راح يدربونكم عليها في المستشفى 👍🏻😁


لكن اللي أحب أذكره هنا هو …

فيه قاعدة وقت الحرائق باسم RACE كل حرف منها يرمز لشي فخلونا نعرفهم :

حرف R جاي من Rescue
وتعني الإنقاذ ، لازم نفكر ننقذ المرضى وقت الحرائق قد ما نقدر ولو كان الموضوع صعب لا تغامر أبدا

حرف A جاي من ALARM
وتعني إنذار ، لو ما اشتغل جهاز الإنذار في المستشفى شغله أنت بنفسك عشان الكل ينتبه

حرف C جاي من Contain
وتعني إحتواء ، لازم نحتوي النار ونسيطر عليها فلو كانت في غرفة معينه نقفل الباب عشان ما تنتشر

حرف E جاي من Extinguish
وتعني إخماد النار ، باستخدام طفاية الحريق اللي تدربت عليها حاول تخمد النار بقدر استطاعتك ولكن دون مغامره أو تهور

.

وبكذا نكون انتيهنا من شرح موديول 3 🥳

اللي جاب لي شد عضلي في أصابعي 🥹
لكن الحلوين اللي مثلكم يستاهلون دايما 🤍


ان شاء الله ما اكون نسيت شي
قريب ان شاء الله بحط اختبارات المراكز لهذا الموديول
انشروا القناة عند الناس اللي تحبونهم في هذا البرنامج أو المهتمين فيه عشان الكل يستفيد


بالتوفيق لكم يا رب 🤍