أهلا 👋🏻 …


كنت مخطط يكون شهر رمضان بدون شرح لكن بعضكم ما يبي وطلبو مني أشرح الحين
وبصراحة أنا ما أعرف اقول لا 🤣

فقررت أعتمد على تصويتكم كلكم
هل نبدأ بشرح الموديول الثالث الحين
ولا بعد رمضان ؟


تفاعل على هذي الرسالة

تفاعل ب 👍🏻 لو تبي الشرح الحين

تفاعل ب 👎🏻 لو تبي الشرح بعد رمضان


.

أهلا بالحلوين 👋🏻 …



بنبدأ رحلة جديدة في شرح الموديول الثالث من المنهج
وكالعادة راح نبدع ونتألق في الشرح مع ملاحظاتكم وانتقاداتكم عشان نقدم أجمل وأبسط صورة للمنهج 🤍

بتكون رحلة جميلة بإذن الله وفيها معلومات جدا مهمة وتفيدكم طول مشواركم ك PCT 👍🏻😁

.

بسم الله نبدأ الرحلة 🏃🏻‍♂️

النقاط الأساسية للمنهج 📚 …


القسم الأول 1️⃣ …

- راح نعرف ست أهداف عالمية لسلامة المريض

- راح نعرف قواعد عامة للسلامة وعددها مره كثير لكن كالعاده لم نترجمها ونرتبها مافي شي صعب


القسم الثاني 2️⃣ …

- مكافحة العدوى 🦠

هذا يعتبر أهم قسم في هذا المنهج حتى كلمة مهم قليلة بحقه
وقت الشرح راح نتكلم عنه لحاله عشان نعطيه حقه


القسم الثالث 3️⃣ …

- منع الإصابات

راح نعرف كيف نمنع الإصابات عن أنفسنا وأيضا عن المريض ، أيضا راح نعرف وضعيات المريض على السرير و وش الفرق بينها وليش نستخدمها أصلا


القسم الرابع 4️⃣ …

التعامل مع الحرائق 🔥

راح نعرف بعض اجراءات السلامة من الحرائق
وأيضا التعامل معها اذا حصلت لا قدر الله



وهذا هو موديول 3 👍🏻😁

نبدأ بالقسم الأول …


خلونا نعرف الأهداف العالمية لسلامة المريض

.

.
International Patient Safety goals
واختصارها ( IPSG )
وهي أهداف عالمية لسلامة المريض
وعبارة عن ٦ أهداف راح نعرفها بالتفصيل


1️⃣ الهدف الأول ( IPSG 1 )

التعرف على المريض بشكل صحيح
identify patient correctly

- هذي القاعده هدفها إنه لازم نتعرف على المريض على الأقل بطريقتين ( اسم ثلاثي - رقم طبي )
عشان ما تصير لخبطه بين المرضى لأن الخطة العلاجية تختلف من مريض لمريض

❌ مثل ما نبهنا سابقا لا تستعمل أرقام الغرف كوسيلة للتعرف على المريض
✅بعد ما تعرف اسمه الثلاثي ورقمه الطبي وقتها ما يمنع تستخدم رقم الغرفه للتوضيح

متى لازم نتعرف على المريض ⁉️
دائما وأبدا لازم نتعرف على المريض قبل أي إجراء نسويه لازم نعرف إنه هذا فعلا المريض اللي حنا نبغاه


2️⃣ الهدف الثاني ( IPSG 2 )

تحسين التواصل
improve effective communication

يقصد فيه التواصل بين أعضاء الكادر الطبي بخصوص مريض معين لأن كثير من الأخطاء الطبية تحدث بسبب إهمال إيصال معلومة مهمة تخص مريض معين لزملاء الفريق الطبي

أيضاء تسليم المعلومات في نهاية الشفت للي راح يستلم بعدك جدا ضرورية عشام ما تصير لخبطة وهذي تسمى
hand over communication

وأيضا شرحنا قبل خطة التواصل ISBAR بين أعضاء الفريق لو حاب ترجع لها اضغط هنا



3️⃣ الهدف الثالث ( IPSG 3 )

السلامة من الأدوية الخطيرة
improve the safety of high alert
medication

يهمك هنا تعرف إنه فيه أنواع من الأدوية لازم تؤخذ بوصفة طبية وجرعات معينه ، لو أخذتها بكيفك ممكن تسبب لك مضاعفات خطيرة عشان كذا صنفنا هذي الأدوية كأدوية خطيرة

دورنا ك PCT في هذي النقطة يكون الترجمة للمريض أحيانا اللي يواجه صعوبة في التعرف على الأدوية ونعلمه إنه هذا دواء يسبب أضرار لو ما مشيت عليه حسب الوصفه المكتوبه لك

أيضا يهمك تعرف إن الأدوية الخطيرة لها مكان خاص في رفوف الصيدلية وعليها علامة تميزها كأدوية خطيرة

أيضا فيه قاعدة اسمها LASA
وهي اختصار Look alike sound alike
يعني دوائين ممكن يتشابهون في طريقة الكتابة أو في النطق لكن لكل واحد منهم غرض معين

على سبيل المثال :
دوبامين ( يستخدم غالبا لانخفاض ضغط الدم الحاد )
دوبوتامين ( يستخدم لقصور القلب وضعف ضخ الدم )

الدوائين يتشابهون كثيرا في النطق والكتابة فقاعدة LASA خلتنا نصنف الأدوية المتشابهة عشان ما نجيب العيد 👍🏻😁


4️⃣ الهدف الرابع ( IPSG 4 )

ضمان المكان الصحيح ، والإجراء الصحيح ، والعملية الصحيحة للمريض
ensure correct site , correct procedure
correct patient surgery

يعني لو جانا مريض عنده عملية في ركبته اليمنى
لازم نعرف ان العملية في الركبة اليمين ويجي الجرّاح بنفسه يحط علامه على الركبة اليمنى عشان كل الفريق الطبي يعرف
ويتحدد هذا الشي في ملفه بالتفصيل
وأهم شي المريض بنفسه يعرف ان عمليته في الركبه اليمنى 🤣
وبكذا نمنع أي خطأ طبي يصير 👍🏻


5️⃣ الهدف الخامس ( IPSG 5 )

تقليل مخاطر العدوى في الرعاية الصحية
reduce the risk of Healthcare
associated infections

طبعا مكافحة العدوى لها قسم خاص في هذا المنهج فراح نتكلم بتفصيل أكثر في هذاك القسم
لكن مبدئيا يهمك تعرف هنا انه حرصك على مكافحة العدوى بكل صورها تمنع أي حالة إصابة أو مضاعفات للمريض داخل المستشفى بإذن الله


6️⃣ الهدف السادس ( IPSG 6 )

تقليل مخاطر سقوط المريض
reduce the risk of patient harm
resulting from falls

المريض المعرض لخطر السقوط لازم يميز بعلامه معينه عشان الكل يعرف ان هذا المريض ممكن يطيح لأي سبب ممكن كبر سن أو بسبب تأثير البنج أو بسبب إصابة معينة عنده
عشان نحرص عليه أكثر ونكون منتبهين 👍🏻

.

صورة تجمع الأهداف السته بشكل بسيط

لو حاب تزيد معلوماتك في الأدوية عالية الخطورة بحط ملف فيه معلومات حلوة
مب مهمة في منهجنا ك PCT
لكن زيادة معرفه وعشان تهايط على اللي معك وتسوي فاهم 👍🏻🤣

تساؤل ⁉️

حنا دايما نشوف قواعد عالمية للاحتراف
وقواعد عالمية للتواصل الفعال
وأهداف عالمية للسلامة
وأشياء كثير زي كذا

ما سألت نفسك من اللي يحط هذي القواعد؟

بشرح فويسات بعض الأشياء المهمة لازم تكون عندك فكرة عنها 👍🏻😁

نكتفي اليوم كذا

ونكمل بكره بإذن الله 👍🏻😁

أهلا بالحلوين 👋🏻 …


بنستكمل شرحنا في موديول ٣
واليوم بنخصصه في الحديث عن مكافحة العدوى وراح نبدع ونتألق في الشرح 👍🏻😁

هذا جزء جدا مهم ويعتبر في صميم عملنا ك PCT فأعطوه حقه من المذاكره قد ما تقدرون 🤍


يالله نبدأ 🏃🏻‍♂️

.

بداية …

لازم تعرف جسمنا كيف يقاوم العدوى والجهاز المسؤول عن المقاومة ومسببات الأمراض
فلو نسيت هذي المعلومات أحب أقولك ارجع ذاكر و يكفي إهمال😡

امزح 😁 طبيعي تنسى وكل اللي عليك تذّكر نفسك بس و تضغط هنا



مكافحة العدوى 🦠 …


هي طريقة لمنع الإصابة بالمايكروبات المسببة للأمراض


كيف تتم العدوى 🦠⁉️ …

فيه دورة أو سلسلة من الأحداث لازم تصير عشان تتم حالة العدوى
خلونا نعرف هذي السلسلة 🔄 مع بعض 👇🏻

.

دورة العدوى 🦠🔄 …


مسببات الأمراض موجودة بشكل طبيعي في الحياة من فيروسات أو بكتيريا أو فطريات أو طفيليات هذي المسببات لمّ تتواجد في جسم كائن حي سواء كان إنسان أو حيوان ، أو لمّ تتواجد على سطح شي معين مثل طاولة أو مقبض باب كذا تكون بدأت هذي السلسلة


1- الخزّان Reservoir 👦🏻

ممكن يكون كائن حي ، وممكن يكون على سطح شي معين مثل الطاولة وممكن في الماء أو الهواء



2- بوّابة الخروج Portal of exit 🚪⬆️

مسبب المرض بعد ما أعدى الخزّان يحاول يدور طريقة للخروج عشان ينتشر و يعدي كائن ثاني
ممكن يهرب لم نعطس أو نكح أو لم نتلامس مع شخص ثاني ونصافحه وممكن عن طريق سوائل الجسم كلها أو الفضلات



3- طريقة الإنتشار mode of transmission 💦

لمّ نعطس اللعاب المتطاير في الهواء هو إحدى طرق الانتشار للمايكروبات والإنتشار عن طريق السوائل ممكن يكون لعاب أو دم أو سوائل الجسم بشكل عام

وممكن ينتقل عن طريق الهواء الخارج من الرئتين لم نتنفس أو نكح

وومكن ينتقل عن طريق التلامس والاحتكاك المباشر



4- بوّابة الدخول Portal of entry 🚪⬇️

بعد ما يجد مسبب المرض كائن حي آخر يحاول يدخل عن طريق الفم أو العين أو الجروح المفتوحة



5- المضيف الحسّاس susceptible host 👦🏻🦠

هو كائن حي مناعته ضعيفة لسبب ما وهو هدف المايكروب من بداية هذي السلسلة ولم يدخل المايكروب فيه يحاول مع الوقت يجعله خزّان وعائل له وتستمر الدورة والسلسة من جديد




هذي تسمى دورة العدوى 🦠🔄
The Chain of Infection

.