Bugun Gʻazalkentda bo‘lib o‘tgan Sea Breeze loyihasining jamoatchilik bilan ochiq muloqoti ushbu format tarixidagi eng xolis va muvaffaqiyatli tadbir sifatida e’tirof etilishga ulgurdi. O‘nlab faollar, ekspertlar, jurnalistlar, blogerlar va mahalliy aholi vakillari uch soatdan ortiq vaqt davomida nafaqat Sea Breeze rahbariga, balki viloyat, vazirlik va idoralar rahbariyatiga yuzdan ortiq savol va takliflar bilan yuzlanishdi. Noqulay ob-havo sharoitiga qaramay, zalda jami 200 dan ortiq kishi ishtirok etdi.

“Sea Breeze” – mintaqani rivojlantirishga qaratilgan uzoq muddatli loyiha. U minglab yangi ish o‘rinlarini yaratib, iqtisodiyot va turizm rivojiga turtki beradi, shuningdek, Chorvoqda ilgari mavjud bo‘lmagan zamonaviy muhandislik infratuzilmasini shakllantirishni ko‘zda tutadi. Biz boshidanoq ochiqlik tamoyiliga amal qilamiz va aholi, ommaviy axborot vositalari hamda ekspertlar bilan barcha masalalarni muhokama qilishga tayyormiz. Eng muhimi, loyihani amalga oshirish jarayoni ustidan Ekologiya vazirligi tomonidan doimiy nazorat olib borilishini boshidanoq o‘zimiz talab qilganmiz”,

— deb ta’kidladi Sea Breeze Uzbekistan bosh direktori Sardor Hamidov.

Muhokamalar jarayonida Chorvoqqa tutash aholi punktlarida yashovchi fuqarolarning minnatdorchilik bilan aytgan so‘zlari alohida hayajon uyg‘otdi. Jumladan, ushbu hududlarga so‘nggi oylarda ilk bor magistral suv va gaz ta’minoti kirib bormoqda. Ayrim ishtirokchilar o‘zlari va farzandlari uchun endilikda poytaxt yoki xorijga ketish zarurati qolmasdan, o‘z yashash hududlarida munosib ish bilan ta’minlanishiga umid bildirishdi.