جيران الي هاد الي اسمو طيف
مالك : طيف ؟
زينة : اها
مالك : من وين بتعرفي اسمو ؟
زينة : من جــ ـ ..
سكتت شوي وحسيت رح اتسبب بمشاكل لجميله وفكرت بجواب تاني : التقيت فيه بالصدفه
سحب الكرسي وقرب لعندي : التقيتي فيه ؟ ايمت وكيف ؟
زينة : يعني مو .. مو من زمان هيك بالصدفه بس
مالك : _ _
زينة : في مشكلة ؟
مالك : اي في .. تجنبيه لطيف تماماً .. في مشاكل بيني وبينو وما برتاحلو ابداً
زينة : دايماً الجيران بيتخانقو ههههه
مالك : طيف بكون ابن عمي ..
تجلست انا ومستغربه : عنجد ؟ بيقربلك ؟ وليه في مشاكل بيناتكون ؟
مالك : مشاكل عائلية تطورت ليكبر الحقد والكره بيناتنا .. حبيت خبرك لتتجنبيه وين ما شفتيه .. وبتخبريني ازا تعرضلك تمام ؟
هزيت براسي انا وساكته ..
مالك : رح انزل احكي تليفون و خليهن يحضرولك العشا وارجع ..
حط ايدو على شعري : ارتاحي انتي
بس طلع من الغرفة قمت انا و وقفت على الشباك .. بقصر طيف الكبير كان في شباك واحد بس مضوي وبقية الغرف والحديقه كلو عتمه
وشي طبيعي انو انا بلشت حبو لهاد الي اسمو طيف حتى لو ما بعرف شكلو و كيف رح يكون !! ... ومن الطبيعي اكتر انو كنت مخططه عاند مالك بكل تعليماتو واعمل الي براسي ..
_______
_______
جهزت حالي لدوام الجامعه وفطرت مع مالك وطلعت ... قبل ما يشوفني السائق طلعت من البيت ومشيت باتجاه بيت طيف .. وقفت قدام الباب الخارجي و رنيت على الجرس اكتر من مره
بس ما حدا جاوبني .. بس جربت افتح الباب لقيتو مفتوح .. تطلعت حوالي لاتاكد انو ما في حدا وتشجعت وفتت لجوا
دقيت جرس الباب الداخلي اكتر من مره .. (( ما في حدا هون ؟؟ ))
تطلعت حوالي كانت الجنينة باهتة كتير الورد فيا ميت والشجر تعبان و العشب صاير لونو اصغر ويابس ..
فتلت حوالين البيت ولقيت باب خلفي بس عليه كتير غبره ومبين محدا مستخدمو من فترة طويله .. دقيت عليه بقوة محدا جاوب
بالمره التالته انا وعم اضربو بقوة .. انفتح الباب لحالو .. ارتعبت ورجعت لورا (( سيد طيف ؟؟ )) ما حدا جاوبني
احترت ازا صح فوت او لا بس كنت كتير مصره قابلو لهاد الشخص الي اسمو طيف ..
وقبل ما اخطي اول خطوة لفوت سمعت صوت زمور عالي من بيتنا وعرفت انو الشوفير عم يستناني وتأخرت ... مسكت الباب سكرتو ورجعت على البيت بسرعه بس كل الوقت بالجامعه كنت سرحانه وعم فكر
بهل بيت الغريب و كيف رح خلي طيف يساعدني لازعج مالك ..
بس رجعت على البيت كان مالك مو موجود .. تغديت وخبرت جميله انو بدي نام وما بدي حدا يزعجني .. طلعت لغرفتي و بعد ساعه نزلت لتحت والكل مشغولين بالمطبخ..طلعت من البيت ورجعت على بيت طيف
حاولت دق الباب الرئيسي اكتر من مره بس كمان محدا جاوبني .. واضطريت ارجع للباب الخلفي .. وافتح الباب وفوت لحالي

يتبع...

#قـــــصــــص_وروايــــات ✏

#الظلام✴




الجزء الرابع


فتت ولقيت حالي بالمطبخ ... وعلى الغاز في ابريق شاي عم يغلي والصفارة عم تطلع صوت ..
زينة : في حدا هون ؟ ..
وقفت على باب المطبخ وتطلعت بكل زوايا الصالة الواسعه .. كان تصميم البيت بيشبه بينتا تماماً حتى الوان الفرش والتحف كلها متشابهة
كنت خايفه وبنفس الوقت مو سائلة عن النتيجه بعد كل شي خسرتو وبعد ما انصدمت بالناس الي بحبهن صار كل همي ردلهن الأذى ويكون وجودي بحياتهن نقمة وشر عليهن
فتت لجوا و وقفت عند الدرج ، الغرفة الي فيها ضو فوق بالطابق التاني ، اكيد طيف فوق .. بس ما فيني اطلع على غرفتو انا لسه ما بعرف كيف رح يكون
ممكن يكون شخص مخيف ! .. وممكن يئذيني لاني بنت مالك ! .. بلشت اطلع الدرجات ورجلي عم يرجفو .. همست بصوت واطي (( سيد طيف انت هون ؟ ))
فجأة انطفت كل الأضوية الي بالبيت وما عاد شفت شي حوالي وما عم اسمع الا صوت صفارة ابريق الشاي .. كنت رح اوقع من على الدرج لان ما عاد شفت طريقي منيح
وحسيت اني تورطت بمصيبه ولازم اطلع بسرعه ..
انا وعم انزل شوي شوي بحذر وبدون صوت .. بلشت اسمع حركة بالبيت وصوت دعسات قريبه مني
كتمت انفاسي وحاولت استعجل وبس وصلت لآخر درجه مسكني حدا من ايدي بقوة .. بلشت اصرخ بصوت عالي وحط ايدو على تمي ..
___
___
طيف : تفضلي الشاي وهدي اعصابك
زينة : شكراً ، انا مو عرفانه كيف بدي اعتذر بس انت ما فتحت الباب وكان لازم شوفك
طيف : وهي شفتيني .. شو الموضوع المهم لهي الدرجه لتفوتي بيتي بهل طريقه ؟
زينة : خليني بالاول قلك شكراً لان بهداك اليوم ساعدتني اطلع من الغابه ، ما كنت متوقعه ابداً انو انت تكون السيد طيف !
طيف : ليش ؟ وين المشكلة انو انا كون طيف ؟
زينة : ما بعرف يعني توقعت طيف يكون ختيار كبير .. شعرو ابيض ومريض وبيمشي على عكازة ههه
ابتسملي كأنو عم يستسخف طريقة تفكيري .. بلش يشرب الشاي ويتطلع فيني لاحكي ..
زينة : انت بتعرف انا مين صح ؟
طيف : مو مهم
زينة : لا كتير مهم لانو هاد سبب جيتي لعندك
طيف : وضحي اكتر
زينة : انا بنتو لمالك .. بنتو الي تخلى عنها وتركها من 20 سنة .. ولما حس بالذنب وتأنيب الضمير اجا واخدني بكل بساطة كأنو كل هالسنين ما بتعني اي شي
طيف : قبل ما تكملي ، انا هاد الموضوع ابداً ما بيهمني
زينة : لا بعتقد انو بيهمك .. انت بتكرهو لمالك صح ؟
طيف : _ _
زينة : وانا بكرهو !!
تطلع فيني باستغراب ، سند ايديه على ركبتو وانحنى ضهرو لقدام .. حسيت انو بلش يهتم بحكيي ولو ما بدو يبين هاد الشي ..
زينة : امي تخلت عني ، هي تزوجت وتركتني وانا هلأ عايشه عندو .. بس مو مبسوطه ابداً وحاسه حالي بسجن
طيف : _ _
زينة : هو عم يحاول يكون منيح بس انا ما عم اقدر سامحو ابداً ... وما عم اقدر سامح امي .. حاسه في حقد كبير جواتي تجاهن عم تفهمني ؟
ضل ساكت وما جاوبني .. تطلعت حوالي وحطيت ايدي على رقبتي : فيك تخلي الانارة اقوى لانو انا بختنق من العتمه
قام من مكانو وشغل الضو ورجع قعد مكانو ..
زينة: حتى هو ما بيعرف انو انا بخاف من العتمه تخيل ؟ اكتر كابوس بحياتي هو الظلام وهو السبب بهاد الشي لاني دايماً بحس اني وحيده وخايفه
لهيك انا اضعف من انو واجه العتمه
طيف : وبعدين ؟
قمت من مكاني وقعدت جنبو : في بينك وبين مالك عداوة صح ؟
طيف : نوعاً ما ..
زينة : طيب ما بدك تنتقم منو ؟
طيف : طبعاً .. بس انسي الي ببالك لان مو من مخططاتي انتقم منو عن طريقك .. انتقامي رح يكون بنفس الطريقه الي أذاني فيها
زينة : بس انا رضيانه ! انا موافقه كون ورقة انتقام ... لشوف بعدها ازا رح يضل متمسك فيني ولا رح يرمني متل ما عملت امي !
طيف : انتي طفلة ..
قام واعطاني ضهرو كأنو خلص حديثو وبدو ياني امشي ..
زينة : انا مو طفلة ، انا اكبر من عمري بكتير وبعدين انت شو بدك فيني انا شو ؟ المهم تكسب !
طيف : كيف ؟
زينة : اسحبني لطرفك وهو هيك رح يحترق !
طيف : الواضح انو انت الي بدك تستخدميني ورقة انتقام ..
زينة : طبيعي نتعادل !! انت بتستفيد وانا بستفيد
طيف : لأ ..
زينة : بس ..
قبل ما كمل حكيي انفتح باب البيت و دخلت جميلة ، سكرت الباب بدون ما تطلع مين في بالصالة بعدين اتفتت وهي حاملة صينية اكل ومبتسمة
وانصدمت وقت شافتني واقفه قدامها ..
جميلة : زينة خانوم ؟ انتي هون !
تطلعت فيها وبطيف وابتسمت : بظن هلأ ما في داعي اترجاك .. انت مجبور تساعدني مشان حافظ على سرك انت وياها صح ؟
_________
_________
كنا قاعدين على العشا انا ومالك وجميلة عم تحط الأكل قدامنا وانا عم اتطلع فيها بنظرات شك ومالك عم يحكي ..
مالك : كيف كانت جامعتك ؟
زينة : ممم منيحه
مالك : وصحتك صارت احسن ؟
زينة : ايه كتير
مالك : امك حكيت معي و
رميت الملعقة من ايدي بعصبيه : ما في داعي تجيب سيرتها ..
مالك : ليش ما عم تردلي على اتصالاتها ؟
زينة : هي كمان ما كانت ترد على اتصالاتي ..
مالك : كان عندها ظروف
زينة : وانا هلأ عندي ظروف
مالك : صبري بلش يخلص يا

زينة

زينة : وانا هاد الي بدي ياه .. بدي شوف وشك الحقيقي بعيد عن التصنع .. بدي ياك تطلع من دور الأب الحنون وترجع لمالك الجبان الي ترك بنتو الصغيره وهرب
لانو خايف من ..
ما كنت عم استوعب انو مالك ضربني .. كان الكف سريع وقوي .. رن صوتو بأدني و هز كل كياني .. تطلعت فيه انا ومصدومة وكان هو مصدوم اكتر مني
وعم يتطلع فيني بخوف ..
زينة : ايه هاد الي بدي شوفو منك .. هي حقيقتك مالك بيك .. هي حقيقتك ..
طلعت على غرفتي بسرعه قفلت الباب وراي و بلشت ابكي بحرقة ، وقفت قدام المراية وصرت احكي حالي واتذكر امي .. اشتقتلها كتير
اشتقت لحنيتها ودفاها وحضنها .. اشتقت متل هالوقت كون عم اتعشا انا وياها وبعدين ارمي حالي بحضنها وتلعبلي بشعراتي وتحكيلي عن تجاربها بالحياة واديش بتحبني
واديش فخورة فيني .. تذكرت لحظات صعبه عشناها من جوع وبرد وخوف .. كيف كانت هي السند والقوة الي بكل مراحل حياتي
وكيف فجأة تخلت عني بكل بساطه
الساعه 12 فتحت باب غرفتي ونزلت من الباب الخلفي للمطبخ و رحت لبيت طيف ... فتت بنفس الطريقه الي فتت فيها اول مره ..
قعدت بالصالة و شغلت الضو .. تمددت على الكنبايه وضليت عم ابكي لوقت ما نمت من التعب ..
فتحت عيوني بعد ساعات وكان واقف قدامي متكتف وعم يتطلع فيني بانزعاج...

يتبع....

#قـــــصــــص_وروايــــات ✏

#الظلام✴

الجزء الخامس

قمت بسرعه وقفت انا وعم رتب تيابي ومتلبكة (( ليك خليني اشرحلك .. مالك ضربني وانا فكرت انو ما في مشكلة نام هون بس الليله وبعدين روح ))
حط ايدو على دقنو وتطلع فيني ببرود ..
زينة : ليش هيك عم تطلع ؟ وين بدي روح هلأ ؟ بعدين لا تنسى انا ما حكيت لمالك انو انت حاطت جميلة جاسوسه عندو ماشي ؟ الي عندك خدمة ..
اشرتلو على الكنبايه بخجل : انا بس كنت نايمة هون ما ازعجتك ابداً ..
طيف : بس شغلتي الضو .. والضو بيزعجني كتير
زينة : ما فيني نام بالعتمه..وكيف ازعجك وانت بغرفتك ؟ اسمعني هلأ بس يطلع الضو فوراً رح فل من هون
طيف : طيب ليكي ..
قرب لعندي خطوة خطوة وحط ايديه بجيبتو : جميلة مو جاسوسه .. هي صديقتي وعم تساعدني اخود حقي من ابوكي تمام ؟ وفيكي تروحي هلأ تحكيلو ما عندي مشكلة ، ابوكي ما بيخوف يا بنت
بلعت ريقي وضليت عم اتطلع فيه .. كمل حكيو بهدوء : بس انا فكرت بعرضك ولقيت انو انتي رح تختصريلي طريق طويل كتير وانا مو حابب ضيع وقت اكتر مع مالك لهيك انا موافق على طلبك
مد ايدو وابتسم نص ابتسامه كانت مو مريحه ابداً (( شركاء ؟ ))
هزيت راسي ومديت ايدي (( اي .. شركاء .. ))
قعدنا قدام البيت نشرب قهوة ونحكي بالتفاصيل ليحط كل واحد منا شروطو ولاعرف طيف شو بدو مني اعمل وقلو شو بدي منو ..
مسكت الفنجان بايدي التنتين وكنت عم ارجف شوي من برودة الليل : شو الخطة ؟
طيف : انتي بدك مالك يدفع الثمن لان تركك وانتي طفلة .. وبدك تتأكدي من شعورو بالندم وتنتقمي منو صح ؟
فتحت عيوني بحماس : ايه ايه تماماً لك هاد الي بدي ياه .. بدي وجهلو ضربة قوية وشوف بعدا اذا بيضل بيعتبرني بنتو ولا رح يتخلى عن الابوة عند اول اختبار ..
وبتعرف شو كمان ؟ بدي حسو ضعيف وهو بحاجتي .. ليك طيف بدي حس بشعور الشفقه وشعور الحنيه بنفس الوقت فهمتني ؟
طيف : هلأ بشرفك انتي فاهمة حالك ؟ انتي بدك تضلي معو ولا بدك تنتقمي وتتركيه ؟
صفنت شوي بعدين نزلت عيوني وتطلعت بفنجان القهوة .. تنهدت ورديت بصوت ضعيف : مابعرف .. انا عم اتبع الي بدو ياه قلبي .. وهلأ قلبي مليان حقد و وجع .. هن أذوني كتير وبدهن سامحهن
طيب ازا انا اذيتهن رح يسمحوني ؟ لازم نتعادل صح ؟
هز راسو بحركة خفيفه : صح .. بس المهم ما تتراجعي ابداً لانو انا ما بينلعب معي .. انا هون ما عم قدملك خدمة انسانية ..
انا بدي مصلحتي ، وبدي صفي حساباتي مع السيد الوالد
زينة : كيف يعني ؟ بعدين لحظة انا لهلأ ما فهمت شو مشكلتك مع مالك ؟
سكت شوي بعدين وقف وحكى هو وعم يتطلع لبعيد : مالك بكون ابن عمي .. نحنا من اكبر العائلات بالبلد وعندنا شركات ضخمة جداً
بس للاسف ابي دخل بصفقه مو قدها .. كان الو كتير اعداء قدرو يوقعوه بشباكهن وبعد عدة مكائد اعلن ابي افلاسو
طبعاً هو لجئ لأقرب شخص الو
اتطلع فيني .. وقفت و كملت حكي عنو : لاخوه ؟ يعني جدي صح ؟
طيف : تماماً .. بس جدك تخلى عنو لان خاف المشاكل توصلو وابي كان بحاجة لمبلغ كبير ليقدر يرجع يوقف على رجليه .. وستك وجدك تركو عيلتي تواجه مصيرها بدون اي مساعده ..
كنت انا واختي عم نتفرج على ابي هو وعم ينهار ، امي كانت كمان من عائلة ثرية وساعدت ابي بكل قدرتها بس بالنهاية انهزمو .. بعد سنتين .. اتدمرنا تماماً كان جدك متوفي ومشان
ابي ما يحصل على اي شي من الورق كان مزبط وصيتو ليصير كل شي باسم الوريث الوحيد .. السيد الوالد
زينة : واكيد ابي وقف جنبكون وقتا ؟
طيف : لا ابداً .. كان سيء متل ابوه تماماً وما قدر يوقف بوجه امو .. مع انها كانت مريضه وعاجزة بس كانت عم تبخ سمها ، ضلت لئيمة لآخر نفس تنفستو .. تعرض ابي لغيبوبة سكري وبعد فترة توفى
و اجا مالك على العزا مشان يعزيني .. وقدام الكل وعدتو انتقم منو وخليه يعيش الي عاشو ابي .. و باسرع وقت سعيت لطلع امي واختي على كندا ليكونو بعاد عن هالمحيط القذر هاد
وانا ضليت هون لصفي حسابي مع مالك
وقفت انا ومتلبكة كتير وحاسه القهر بعيون طيف .. : انا اسفه كتير اكيد الي عشتو صعب
طيف : ما في داعي تعتذري ، هاد الشخص قدر يئذي بنتو مو غريب عنو ابداً يئذي اي شخص تاني ..
زينة : بس انا ما تخيلت انو المشكلة بيناتكون كبيره هيك .. يعني ما توقعت !
طيف : بدك تتراجعي ؟
سكتت شوي وضغطت على الفنجان الي بايدي ..
طيف : ازا بدك تراجعي احكي هلأ مشان ما ضيع وقت اكتر معك ..
زينة : ما بعرف يعني انا
طيف : متل ما توقعت .. طفلة ما بتعرفي شو بدك .. كنت غلطان لما فكرت انك جديه .. تصبحي على خير
تركني ومشي ليفوت على البيت .. بعد توتر كبير ندهتلو : لحظة استنا ..
طيف : شو ؟
اتطلعت على الفنجان الي بايدو .. : امسك هاد خلص
اخد الفنجان من ايدي هو ومستغرب ، اخدت فنجانو منو وبلشت اشرب : القهوات طيبين كتير
طيف : شو بفهم ؟
زينة : افهم انو ما رح اتراجع ، خلص شركاء ..

ضحكت وتركتو ورجعت قعدت .. اجا قعد جنبي وبلش يحكيلي شو الخطة وشو رح نعمل .. وانا كنت عم اسمعو باهتمام لاقدر افهم ولاحسبه

ا من كل الجهات
وبعد ساعتين من الحكي صرنا نسمع صوت العصافير وعيوني بلشو يغمضو من النعس
زينة : بدي فنجان قهوة عاشر !
طيف : ههههه ما في داعي .. بتقدري تروحي تنامي .. خلصنا حكي
_________
_________
مالك : زينة .. زينة تأخر الوقت اصحي ..
فتحت عيوني وحطيت ايدي على راسي : خليني نام كمان شوي امانه
مالك : الساعه 4 العصر .. قومي غسلي بدنا نحكي
طلع من الغرفه وانا حاولت استوعب كل شي صار الليله الماضيه وراجعت كل حكيي واتفاقي مع طيف .. غسلت وغيرت تيابي ونزلت لعند مالك
زينة : صباح الخير
مالك : صباح النور بنتي .. كيفك اليوم ؟
زينة : بعد الكف تبع امبارح ؟ كتير منيحه ..
صار وشو احمر كتير وهرب بعيونو مني : انا ما بعرف كيف هيك عملت بعتذر
زينة :مو مشكلة ، هاد الكف ما بوجع كتير .. جربت وجع اكتر منو
قعدنا شوي ساكتين وقبل ما يفتح اي موضوع ممل حاولت انا افتح الموضوع الي اتفقت عليه انا و طيف ..
زينة : انا مليت من هي الحالة .. صار لازم نلاقي حل صح؟
مالك : ياريت ... لان انا كمان تعبت معك
زينة: تمام .. هلأ المشكلة الي بيناتنا مو بسيطه ابداً .. ولنقدر نحلها لازم اقدر سامحك وانا حالياً مو قادره سامحك ابداً
لازم حس انك ندمان فعلاً وما رح تتخلى عني مره تانيه .. لازم حس انك مستعد تضحي كرمالي بأي شي ..
مالك : انا جاهز زينة .. عم حاول اعمل هاد الشي بس ساعديني .. اعطيني فرصه..خليني اقدر افهمك .. كيف ممكن تحسي انو ندمان اشرحيلي
زينة : ممممم .. يعني مثلاً .. تخلى عن السبب الي تخليت عني مشانو
رفع حواجبو باستغراب : كيف ما فهمت ؟
زينة : رح اشرحلك .. هلا انت مو تخليت عني مشان ما تخسر املاك عيلتك ؟ هلا لازم تتخلى عن املاكك كرمال ما تخسرني ..
وقفت و حكيت بقوة و تحدي : يعني مثلاً .. تتنازل عن كل املاكك الي .. ويصير كل شي باسمي ..شو رأيك بابا مالك ؟

يتبع....

#قـــــصــــص_وروايــــات ✏

#الظلام✴


الجزء السادس

مالك : هههههههههههه هههههههههههه هه ... هههههههه
صار يضحك بصوت عالي .. تكتفت وتطلعت فيه باستخفاف : هه .. فعلاً شي كتير بضحك .. غياء اطلب منك هيك وانا بعرف انك مستحيل تعمل هيك
شو رح يتغير فيك بعد 20 سنه او حتى 400 سنه ؟ انت متل ما انت .. بس انا حبيت اعمل هيك مشان ما تضلك تقول تخليت عنا مشان تحميني
انت تخليت عنا مشان المصاري ، وهيك انتهينا .. لا تنتظر سامحك ..
احمرو عيوني و تركتو ومشيت .. كان صوت ضحكتو لسه عالي وعم يضرب على اعصابي .. خلص ضحك وصار يسعل وانا عم اطلع على الدرج وجسمي عم يرجف
مالك : ههههههههه لك تعالي .. هههههه .. ااااخ اديش ضحكت .. تعي تعي
التفتت عليه وبقيت ساكته .. وقف عند اول الدرج و اشرلي براسو بمعنى ( اي )
زينة : شو ما فهمت ؟
مالك :لك اي موافق..ما عندي مشكلة هههههههههه
زينة : عم تتمسخر ؟
مالك : ههههه لك لا بس ما توقعت هيك طلب .. يعني بالنهاية هي المصاري رح تضل الك ما عندي مشكله اعطيكي ياها وانا عايش
اختفت ضحكتو و لمعت بعيونو دمعه وبلش يطلع لعندي .. كنت جمدانه بمكاني ومشاعري مخربطه وما عم اقدر سدء انو وافق بهل بساطة
مالك : بنتي .. انا موافق ازا هاد الشي رح يخليني اكسب ثقتك .. انا موافق
سألتو بشك : ما رح تتراجع ؟ يعني ما بدك تفكر ؟
مالك : لا ابداً ، للأسف كل شي شايفتيه قدامك ما بيعنيلي شي ازا ما قدرت خليكي تسامحيني .. الأيام رح تعلمك انو في شغلات ما الها ثمن
اشر علي بايدو وحكى بصوت حنون : متلك انتي ..
تطلعنا ببعض وعيوني ما عم يرمشو من الصدمة .. بعد عشر دقايق اخدت نفس : طيب ماشي .. لكن اتفقنا
مالك : اتفقنا .. بتحبي اليوم نخلص كل شي ؟
زينة : لا لا .. لبكرا انا اليوم تعبانه
مالك : متل ما بدك
مشيت شوي بعدين رجعت سألتو : انت عم تحكي مع امي ؟ بدي اطمن عليها
مالك : ردي على اتصالاتها وتطمني
زينة : لا ما في داعي .. بدي اطمن عليها من بعيد بكفي
مالك : منيحه ..
زينة : تمام .. شكراً ..
طلعت على غرفتي و وقفت على الشباك عم اتطلع على بيت طيف واتذكر اتفاقنا ، بس يصير كل شي باسمي رح اتنازلو عن كل الأملاك
تصرف مجنون وما بعرف شو عواقبو .. بس محتاجه لتضحيه كبيره من مالك لاقدر سامحو ! تضحية بحجم التضحية الي انا رح قدمها لما اتقبلو كأب الي بعد كل شي صار ..
رميت حالي على التخت انا وعم اسأل حالي : يا ترى صح الشي الي عم اعملو ؟؟؟؟؟؟ رح اندم بعدين ؟ .. لا يازينة لا ... ما تفكري بشي لازم يتعذبو متل ما عذبوكي .. لازم ..
_______
_______
لما طلع مالك من البيت حاولت اتسحب على بيت طيف لان كان في بيناتنا موعد ..
فتت من باب المطبخ متل كل مره وندهتلو (( طيف .. يا طيف وينك ؟ ))
دورت عليه بعدين اضطريت اطلع لفوق ، دورت بين الغرف ولقيت غرفه مسكر بابها .. دقيت الباب مرتين بعدين فتحتو شوي شوي (( طيف انت هون ؟؟ ))
كان نايم وما عم يحس علي .. فتحت الباب وحاولت صحيه .. فتت شوي وقعدت على الكرسي الي جنب تختو
زينة : طيف لو سمحت اصحى بدي ارجع على البيت بسرعه ..
مسكت كاسة المي الي على طاولتو وصرت رش شوي شوي على وشو (( طيف .. يا طيف .. طيف قوم .. قوم يا طيف .. طيف ))
طيف : لك ايييييييييييي
نقزت و وقفت بسرعه : شبك رعبتني
فرك وشو وتجلس : يعني انا احسن شي اقفل باب هالمطبخ لاخلص من هالشغله ، لك كيف بتفوتي على غرفتي انتي شبك ؟؟
زينة : يعني كأنو كتير مبسوطة انا بفوتي لهون ما ؟
قمت فتحت الشبابيك انا وعم احكي : انا حكيت مع مالك و هو موافق .. بكرا رح يكتب كل شي بيملكو باسمي الموضوع صار بسرعه وكان لازم احكيلك لتفهمني شو بدنا نعمل بعد هيك
طيف : عم تحكي جد ؟
التفتت عليه وحطيت ايدي على خصري : شو بشوفك صحصحت ما ؟
طيف : هلأ عم تحكي جد ؟ كيف بهل سرعه ؟
فتلت وتطلعت من الشباك : بصراحه ما بعرف .. انا كمان تفاجئت ما تردد انو يوافق .. معقول لهل درجه ندمان ؟ انا حاسه انو ..
مسكني من ايدي لاتطلع فيه وحكى هو وعم يضغط اسنانو : شو حاسه ؟
رفع اصبعو كأنو عم يهددني : ما فيكي تتراجعي ابداً
حاولت اسحب ايدي منو : لا تحكي معي بهل طريقه انا بقرر شو بدي ..
ضغط على ايدي اكتر و قرب همس بادني : زينة في بيناتنا اتفاق لا تلعبي معي
زينة : طيب .. طيب اتروك ايدي ..
تركني ورجع خطوة لورا .. تطلعت فيه بخوف وبعدت شوي ..
سرح شعراتو باصابعو ومشى بالغرفه بتوتر ..
رحت قعدت على الكرسي انا وماسكه ايدي وعم اتطلع بالارض وبلشو دموعي ينزلو شوي شوي .. وبالتدريج صرت ابكي بصوت عالي من كل قلبي .
التفت علي هو ومتفاجئ : عم تبكي ؟ انا .. انا اسف .. اسف ..
اجا لعندي وقعد على ركبتو وتطلع فيني : ليكي انتي ما بتعرفي اهمية الموضوع ، انا وعدت امي جيب حقنا وهي واثقه بوعدي
ما بدي آذيكي بس نحنا ما عم نلعب ..
ضليت عم ابكي بدون ما اتطلع فيه ..
اعطاني كاسة المي : اشربي
اخدتها منو شربت انا وعم اشهق ورجعتها
طيف: عم توجعك ايدك ؟
زينة : لأ بس انا .. انا اشتقت لأم

نام .. بس كل ما كنت غمض عيوني كنت شوف عيون طيف .. كان الليل طويل كتير وما عم يمضى وما لقيت الا رجلي ماخديني لبيتو
وقفت قدام الباب مترددة كتير وعم اسأل حالي شو جايبني لهون وشو بدي قلو ..
حطيت ايدي على مقبض الباب .. هزيت راسي وضربت جبيني : خلص بلا جنان بكفي ..
درت ضهري مشان ارجع على البيت .. بس سمعت صوت الباب عم ينفتح
طيف : بست .. تعي وين رايحه ؟
التفتت عليه وصار وشي احمر من الخجل : انت صاحي ؟ انا كنت بدي اسالك سؤال بس خلص مو مهم .. مشان الاتفاق يعني
طيف : اها شكلو سؤال مهم .. شو كان سؤالك؟
زينة : اه ؟ .. انا كنت بدي .. يعني السؤال هو
طيف : ههه مو مشكلة .. تعي بدي ورجيكي شي ..
زينة : شو ؟
طيف : الحقيني ..
فات لجوا وانا ضليت واقفه لثواني عم فكر .. بعدين مشيت وراه ..

يتبع...

ي كتير

طيف : امك ؟
زينة : ايه .. ما كانت تسمح لحدا يضربني ابداً
طيف : بس انا ما ضربتك !!
حطيت ايدي على وشي وكملت بكي ..
طيف : زينة تطلعي فيني شوي و وقفي بكي ..
تجاهلت حكيو .. مسك ايدي و بعدهن عن وشي : وقفي بكي لنتفاهم
حاولت اهدى و وقف بكي .. كان مركز بعيوني وعم يحكي بهدوء : خلص روقي ؟ انا اسف ..
زينة : طيب ..
طيف : خلص ما بدك نكمل باتفاقنا انتي حره ما رح اجبرك .. انا فيني اوصل للي بدي ياه حتى بدون مساعدتك
زينة : انا ما بدي اتراجع ، هلأ صرت بحاجه كبيره لأبي .. قلك سر ؟
طيف : قولي ؟
زينة : بلشت حس بمشاعر غريبه تجاهو...بدي اتاكد انو بيستاهل هالمشاعر ..
طيف : عم تحسي بشعور انو يكون عندك اب ؟
زينة : ايه صح .. عم حسو كتير بيخاف علي .. نظراتو الي كلها حنيه .. يعني .. يعني ..
تطلعت بعيون طيف وابتسمت : يعني هيك متل النظرة الي بعيونك هيك نظرة غريبه فيها حنيه.. صحيح انت لون عيونك رمادي ؟
ضحك ضحكة خفيفه : هلا انا عيوني فيهن نظرة حنية ؟ غلطانه ؟
زينة : لا مو غلطانه ليكني عم شوفا ..
طيف : يمكن لانك عم تشوفي انعكاس صورتك بعيوني هلأ
زينة : ههه اي يمكن ..
ضليت عم اتطلع بعيونو لشوف انعكاسي الي عم يحكي عنو .. ولفسر لون عيونو الغريب .. لون رمادي ممزوج بلون بشرتو السمره كان مشهد غريب وحلو كتير
سمعنا صوت حدا عم يصفق .. التفتنا على الباب .. كانت جميله عم تطلع فينا وتصفق : مشهد حلوووووو كتييييييييييير .. ازعجتكون ؟
وقف طيف وانا مسحت بقايا دموعي و وقفت
طيف : اهلين جميلة
جميلة : لهيك طلبت مني ما عاد اجي لهون صح؟ مشان تاخدو راحتكون ؟
طيف : عفواً ما فهمت ؟
قربت لعندنا وتحولت ملامحها لعصبيه وصارت تحكي بشراسه : لك انا عم ضيع سنين من عمري وانا واقفه جنبك .. كل ما احكيلك عن مشاعري بتقلي انك مو فاضي لهل مواضيع
ومع هيك ما تخليت عنك ابداً وقلت رح يجي يوم وتقدر مشاعري تجاهك .. بس انو فجأة تشرف الخانوم وتاخدك مني ؟
زينة : شو عم تحكي انتي ؟ لا شكلك فهمتي غلط نحنا بس كنا
جميلة : كنتو دايبين ببعض .. والي ساعه واقفه هون ما لاحظتو وجودي ..
مسكتني من كتفي باطراف اصابعها : بنتي انتي بعدك صغيره .. صغيره كتير .. انا صحيح عم عيش دور الخادمه بس انا بفوقك بمراحل كتيره
محتاجه سنييييييييييييين طويله لتوصلي لشهاداتي وثقافتي ولشخصيتي .. حتى لجمالي ..
وقف طيف بيني وبينها ورجعها بايدو لورا لتبعد عني : هدي اعصابك ما في داعي لكل هالحكي .. انا و زينة في بيناتنا شغل وبس
جميلة : يعني بدك كذب عيوني ؟
طيف : جميلة ، انتي بنت ذكية ما تصغري عقلك .. زينة مجرد طفله ما رح فكر فيها بهيك طريقه والي شفتيه كان موقف عادي ما بدو هالعصبيه
والاهم نحنا ما في بيناتنا اي علاقة حب لتحاسبيني .. بس عم وضحلك لانك ضحيتي كتير كرمالي ولازم تكوني بالصورة
جميلة : اكيد ؟
طيف : اكيد
رجعت تطلعت فيني بشك وسألتني : اكيد ؟
تطلعت بطيف .. هزلي براسو مع ابتسامة دافيه .. همست بتردد : ايه .. اكيد ..
_________
__________
مالك : شبها بنتي الها وقت طويل قاعده على المرجوحه وصافنه ؟ في شي مزعلك ؟
زينة : ايمت جيت ؟ لا ما في شي بس الجو حلو وكنت حابه اقعد لحالي شوي ..
مالك : الي وقت منيح .. حسيت انك عم تفكري وما حبيت ازعجك .. او بالأصح خفت ازعجك ههههه
زينة : بدي اسالك سؤال
مالك : تفضلي
زينة : كيف حبيتا لماما ؟
تنهد كأنو هموم الدنيا كلها وقعت على كتافو .. تعكرت ملامحو ومشي قدامي باتجاه المسبح .. ومشيت وراه .. قعد على الكرسي وانا وقفت جنبو ناطرتو يحكي ..
مالك : ما بعرف ! عنجد ما بعرف ! .. محدا بيعرف .. ابي كان مراهن انو بعد ما امتلك ماجدة رح اتخلى عنها .. الكل حذرو امك مني .. محدا وثق فيني غيرها
كنت شب طايش كتير .. نسونجي كتير ههه .. بس امك ما كانت نزوة .. كانت حب
زينة : كيف عرفت انو حب ؟
مالك : لما خيرتني بين انو اتزوجها او اطلع من حياتها .. لقيت حالي ضعيف كتير ومستعد اعمللها اي شي مشان تضل جنبي
زينة : يعني بس حسيت حالك رح تخسرها عرفت انك عنجد بتحبا ؟
مالك : ايه صح .. و وقت حسيت انو امي وابي رح يئذوها ويحرموها من طفلتها واول فرحتها .. شفت انو مستعد ضحي بسعادتي كرمال هي ما تنجرح
زينة : بس انت جرحتا ؟
مالك : صج بس تركتلها ياكي هديه لتكوني جنبا
زينة : وهي تخلت عني ..
مالك : لا ابداً
زينة : امبلى .. راحت تزوجت وارتاحت مني .. كنت عم خطط ريحها وردلها كل شي عملتو كرماالي .. ما اعطتني فرصه قلها شكراً ..
قربني لعندو وحط ايدو على شعراتي : رح تكتشفي انك غلطانه كتير بنتي ..
بعدت عنو بانزعاج : طالعه على غرفتي .. تصبح على خير ..
تركتو و فتت على البيت .. طلعت جميلة بوشي تطلعنا ببعض بكره بعدين تركتني وراحت لعند ابي .. خفت كتير و وقفت على الباب لاعرف شو بدها تقلو ..
قالتلو انها رح تتزوج وبدها تترك الشغل من بكرا وابي ما اعترض وشكرها لمساعدتها وخدمتها كل هالوقت و صرفلها مكافئة ..
تركتن عم يحكو وطلعت لغرفتي انا و مخنوقه ..

حاولت

#قـــــصــــص_وروايــــات ✏

#الظلام✴

الجزء السابع

زينة : طيف استنا شوي ع مهلك ..
طلع لفوق وانا لاحقتو عم اركض لان البيت كلو عتمه ، فات على غرفه وفتت وراه لقيتو فاتح صندوق كبير عم يطلع منو البومات صور
قربت و وقفت جنبو : لك شو صايرلك شو في ؟
اعطاني البوم صور بدون ما يتطلع فيني : تفرجي على هدول الصور
اخدتو وقعدت جنب طيف وفتحتو لشوف شو فيه ..
طيف : عرفتي مين الي بالصور ؟
زينة : امي ؟ .. وانا ؟
طيف : ايه صح .. لقيت هدول الصور بالصدفه مع البوم صور العيله .. هاد الصندوق فيه كل الذكريات كيف هيك اول مره بنتبهلو
زينة : طيب كيف ؟ بعدين ليش كل الصور من بعيد ما عم افهم ؟ هههه ليك ليك طيف .. هي صورتي بأول يوم بالمدرسه
طيف : يا سلام ذاكرتك شو قوية .. شو عرفك يا جدبه ؟
زينة : لك امي مصورتني كتير بهاد اليوم ومحتفظة بهدول التياب لهيك بعرف انو هاد كان اول يوم الي بالمدرسه
طيف : ليكي هي الصورة انتي وامك بالشارع وعم تبكي
زينة : ياااخ هي اللعبه بكل صورة بايدي ما كنت اطلع بدونها كتير كنت حبها بس ضاعت
طيف : ههههه مو معقول هاد الالبوم بدو قعدة طويلة لتخلصي كل الصور الي فيه .. انا ما كنت رح اعرفك لولا اخر صورة ..
زينة : اي صورة ؟
اخد الالبوم مني و فتحو من الأخير واعطاني صورة :هي .. هون بنتهو الصور
زينة : هي صورتي لما نجحت بالمدرسه كان حفل تخرجنا
طيف : اي مو مبين ابداً انو حفل تخرجك ليش هيك مكتئبة ؟
سكتت شوي واخدت الصورة من ايدو .. تأملتها وتذكرت هديك اللحظة كأنو عم عيشها هلأ
زينة : كنت مخنوقه لان تمنيت ابي يحضر هل حدث المهم بحياتي ..
طيف : اي بس ليكو حضر ..
زينة : كيف ؟
كمل حكيو هو وعم يدور بين البومات الصور الكتيره الي بالصندوق الخشبي الكبير الي قدامنا : يعني برأيك مين الشخص الي ماخدلك كل هالصور ؟
زينة : _ _
طيف :الشخص الوحيد المفقود من كل الصور هو مالك ، يبدو كان عايش دور الجاسوس وعم يصورك من بعيد ..
زينة : بس كيف ! لا مستحيل ! .. طيب شو وصل الصور لهون !!
طيف: بظن ابوكي مخبيه هون ليكون بعيد عن عيون اهلو .. هاد البيت كان دايماً مفتوح للكل .. بعمرو ما كان مهجور هيك
بلشت قلب بالصور وحاسه تيار كهربا عم يمشي بجسمي .. مشاعر متداخله وغريبه .. كتير صور انا وعم شوفهن كنت متذكره احساسي فيهن
دائماً كنت اتمنى يكون الي اب .. ودايماً كنت ادعي يرجعلنا ابي ونعيش عيله وحده .. ليش هلأ عم عاقب حالي وعاقب الكل ..
طيف : ما رح تبطلي بكي ؟ ليش الدموع هلأ ؟
زينة : هو دايماً كان جنبي بس حرمني اعرف بوجودو
طيف : اها يبدو مالك عندو مشاعر على عكس ابوه ..
زينة : ههههههههه ليك ليك
طيف : شو في شبك عم تضحكي ؟
اشرتلو بايدي على البوم الصور الي بحضنو : لك شوف صورك بدون تياب بتضحك هههههههههه
طيف : كيف ؟
تطلع بصورو و حط ايدو عليهن بارتباك : لك هلأ انتي شو بدك بصوري التهي بصورك شوفي كيف طالعه
زينة : ههههههه خليني شوف امانه .. هات شوف صورك كتير بتضحك انت وصغير كنت دبدوب و بشع ههههههه
طيف : ايه وهلأ صرت حلو ؟
نزلت عيوني وحكيت بخجل وتردد : ايه هلأ حلو كتير ..
غيرت الموضوع بسرعه لاهرب من نظراتو الي متركزة علي ، وسحبت الصور منو : اعطيني لشوف
تركني اتفرج على الصور براحتي وبقي هو عم يتفرج علي ، كنت حاسه فيه .. ومنتبهة .. ومبسوطة كتير .. ومضيت ساعات طويله نحنا وعم نتفرج على الصورة
ويحكيلي حكاية كل صورة ويحكيلي عن ابوه .. وانا احكيلو عن حكاية كل صوره واحكيلو عن امي ..
_
_
الساعه 6 صباحاً ..
فتحت عيوني بتعب ، رفعت راسي وكانت رقبتي عم توجعني لاني نايمة على الكنباية .. تطلعت على الأرض لقيتها مفروشه بالصور
و اشعة الشمس فايته على نص الغرفه .. وفي غطا خفيف علي .. بس ركزت شوي قمت بسرعه انا ومرعوبة وصرت اركض .. نزلت على الدرج
وفتت على المطبخ متل البرق و ضربت بشي و وقعت حسيت صار في عصافير حوالين راسي... كان الشي الي ضربت فيه هو طيف ..
طيف : انتي منيحه ؟ شبك عم تركضي هيك ؟
زينة : اااخ يا راسي .. انت تطلع قدامك مره تانيه ..
قمت انا ومعصبه وعم افرك عيوني : بعد هيك لازم روح جهز حالي مشان اطلع على الدوام هلأ ابي رح يحس بغيابي
طيف : طيب اشربي قهوة جهزتها ؟
زينة : لك قهوة شو مو وقتا باي باي
فتحت باب المطبخ وبدي اطلع ..
طيف :زينة
زينة : اي ؟
طيف : اتفاقنا لسه قائم صح ؟
هزيت راسي بدون ما احكي شي .. وطلعت بسرعه ، بساعه كنت جاهزة وقاعده قبل مالك على طاولة الأكل مبتسمة وعم استناه ..خلصنا فطورنا
وقلي انو بعد دوامي روح لعندو على الشركة رح يكون المحامي موجود مشان نخلص اوراق الملكية ويتسجل كل شي باسمي
كنت كتير حابه اسألو عن الصور بس كان في شي عم يمنعني ..
بس خلصت دوامي رحت لعندو متل ما طلب .. قعدت مع المحامي وشرحلي كتير تفاصيل وبلش يعدلي الأملاك الي رح تصير باسمي
كانت ثروة خياليه ويعتبر جنان انو تتسلم لبنت بعمري !! .. كل شوي اتطلع بمالك وشوفو قاعد بهدوء وملامحو رايقه

جهز المحامي الأوراق

و وقعت انا و مالك عليهن ، باركلي ابي وباركلي المحامي وقلي انو ضل اجراءات بسيطة رح ينهيها اليوم وفيني اتصرف بحرية بكل الأملاك ..
طلع من المكتب وضليت انا و مالك ..
كنت مو مبسوطه ابداً ، كأنو في شي خانقني .. كأنو حاسه بالذنب .. او حاسه بكره تجاه حالي
مالك : اضحكي ؟ ليه هيك زعلانه ؟
زينة : انا كتير تعبانه وبدي روح للبيت ارتاح .. منحكي المسا
اخدت شنتايتي و مشيت بسرعه .. وقف مالك بوشي وما خلاني اطلع
مالك : زينة في شي ؟ مو قلتيلي هيك رح تسامحيني ؟
زينة : انا ما بعرف حاسه حالي مخنوئة
مالك : ليش !!!!!!!!
نزلو دموعي غصب عني وما قدرت احكي .. حضني ومسح على شعري : خلص بابا انا هلأ جنبك ..
زينة : بس ممكن تروح بأي لحظة
مالك : لا لا ابداً
زينة : شو بيثبتلي ؟
مالك : لك املاكي صارو باسمك ما عاد فيني اتركك
تطلعت فيه وضحكت .. مسحلي دموعي وشدني من خدي : ما رح اتركك انا جنبك دائماً
______
______
مرقو يومين ما شفت طيف ، ما رحت لعندو وما عم رد على مكالماتو .. طفيت موبايلي وقررت ما اسمحلو يوصلي لاني شلت من بالي فكرة انو اسمحلو ينتقم من مالك
بهل يومين كانت علاقتي بمالك علاقة اب ببنتو طبيعيه جداً .. او لا .. اكتر من طبيعيه .. كنا نحكي كتير ونضحك كتير
حكيتلو كتير شغلات عني وكتير ذكريات وعرفت شغلات حلوة عنو واكتشفت انو انا فعلاً بشبهو كتير ..
— انسة زينة عندك ضيوف تحت ..
نفخت بملل و رميت الكتاب من ايدي (( ضيوف الي انا ؟ غريبه .. ))
نزلت لصالة الاستقبال و كنت متوقعه يكون حدا من الضيوف الي تعودت شوفهن بالعاداة .. بس على أول درجه لمحت حدا بعرفو ..
وقفت شوي لأتأكد .. كانت معطيتني ضهرها وعم تتفرج على البيت ..
مع كل درجه كنت انزلها كانو دموعي ينزلو وامسحهن لان ما بدي ياها تشوفني ضعيفه ..
وقفت وراها وانا بكامل قوتي وهدوئي .. (( اهلا وسهلا مدام فيني ساعدك بشي ؟ ))
وقبل ما تطلع فيني همست بصوت مهزوز (( فيكي تساعديني بكل شي .. ))
التفتت علي ، شهقت وحطيت ايدي على تمي : امي شبك !!!!!!!!
كنت عرفانه انها امي بس وشها ابداً ما كان بيشبه وش ماجده الي كلو حياة و جمال ، ملامحها باهتة .. ما الها حواجب .. عيونا دبلانين
وشفايفها لونهن ازرق مايل للبياض ... كأنها شبح .. مسكتها بقوة وايدي عم يرجفو : امي ؟؟؟؟ انتي تعبانه ؟
ماجده : لا تخافي لا تخافي ما فيني شي
زينة : لك كيف ؟ كيف ما فيكي شي ليش هيك شو صايرلك ؟
حسيت بأيد انحطت على كتفي .. تطلعت شفت ابي عم يحاول يهديني ، سألتو بخوف : شبها امي .. شو صاير ؟
حطت ايدها على خدي بحنية وكان صوتها مهزوز وتعبان : ما فيني شي انا بس تعبانه شوي
زينة : لك شو عم يصيررررررر رح يوقف قلبي فهموني شو في .. بابا .. بابا احكيلي شو صاير ؟ لك مو على اساس انها تجوزت وبشهر العسل
انتو شو مخبين عني ؟

يتبع...

#قـــــصــــص_وروايــــات ✏

#الظلام✴


الجزء الثامن

كانت ملامح ابي واضحه جداً انو بكيان و مكسور .. ابتسملي بضعف وجاوبني : امك مريضة سرطان .. وبعدتك عنها مشان ما تشوفيا هي وعم تتعذب وتتعالج
هي حبت تتعافى وترجع تاخدك لتعيشو مع بعض ، بس .. بس
ماجدة : بس القدر كان عندو خطة تانيه ، وقررت اهزمو واسرق وقت لو قليل كون فيه جنبك .. ما بدي موت وانا بعيده عنك ..
تطلعت بملامحهن التنين وماعاد سمعت شي ، بس عم شوف شفايفهن بتتحرك وما عم اسمع صوت .. كأنو خنجر انغرز بنص صدري
عم اتطلع بعيون امي واتذكر ضحكاتها و حكياتها ، حبها وقوتها .. عم اتذكر كم مره مسحتلها دموعها ومسحتلي دموعي
الام والرفيقه والاب و الاخ والحبيب ... ضو حياتي عم ينطفي .. عم تنسرق مني !! ..
وقعت على الأرض انا وحاضنه حالي وعم ابكي وارجف .. وابي عم يحاول يهديني .. والذكريات عم تاكول جسمي متل ما السرطان اكل جسم امي .. متل ما اكل السعاده وتركنا بدون حياة
وبدون أمل ..
_____
_____
وهي حاطة راسها على رجلي وعم حرك اصابعي على وشها .. قربت وبستها من جبينها : كنت بعرف انك مستحيل تتخلي عني الا لسبب قوي كتير ، بس كان لازم تخليني اوقف جنبك
شو نسيتي انو نحنا فينا نهزم اي شي صعب بهل حياة ؟
مسكت ايدي وحسيت بدفا .. : يا بنتي احياناً بتكون الهزيمة ولادة جديده ... احياناً بتكون الهزيمة انتصار بحد ذاتها ..
زينة : بس كنت بستاهل مضي معك هاد الوقت كلو .. لسه ما بتعرفي بنتك اديش قوية وشجاعه .. شوفي هلأ كيف السرطان رح يخاف مني ويهرب
ماجده : لاني بعرف انك شجاعه وقوية قسيت عليكي ، كنت بعرف انك قد هالامتحان وما رح تنهزمي ..
زينة : بتعرفي اديش اشتقتلك ؟ غيابك كان اصعب شي علي .. ع فكرة بدي قلك سر .. بابا لسه بحبك .. دايماً بس نقعد نحكي بصير يحكيلي عنك
تخيلي كل هالسنين ما خلتو ينساكي ابداً !! امبارح بالليل كان يقلي انو مخطط يعملك مفاجئة كتير حلوه بس ما تخبريه انو انا حكيتلــ ــ
وقفت حكي لما لقيتها غفيانه .. حطيت راسها على المخده شوي شوي ، ونزلت لعند ابي ابكي بحضنو ليحمل هالوجع الكبير الي بقلبي ..
مضى الليل كلو بدون ما اقدر نام كنت بس عم اتأمل امي وابكي ، الصبح ع بكير نزلت اتمشى شوي وشم هوا نظيف ..
بس بعدت عن البيت كم متر رجعو دموعي ينزلو وصرت ابكي بصوت عالي من الوجع .. قعدت تحت شجرة و سندت راسي على رجلي وكفيت بكي ..
طيف : بتعرفي انو دموعك بتحل ازمة انقطاع المي بالوطن العربي كلو ؟ انتي لو بكندا كانو بستثمروكي
قمت ومشيت بسرعه لان ما كنت قادره احكي معو ابداً .. ضل يندهلي بعدين لحقني وشدني من ايدي
طيف : عم احكي معك شبك ؟
زينة : ليك انا تعبانه ومو جاهزة احكي معك ابداً فهمان ؟ وما في اي اتفاق بيناتنا والي بدك ياه اعملو
دفشتو ورجعت كملت طريقي ، رجع لحقتي و وقف قدامي وفتح ايديه : محدا جاب سيرة الاتفاق بعرف انك تراجعتي ، وقلتلك من البداية انا ما رح اعتمد عليكي وبعرف اوصل للي بدي ياه
رفعت اصبعي بوشو وصرت هددو : ازا بتفكر تزعج ابي او تئذيه ما رح اسكتلك
طيف : اووووووه .. الله يديم المحبه
زينة : طيف .. طيف انا كتير تعبانه مو وقت نحكي هلأ ..
طيف : انتي دايماً تعبانه ، دايماً معصبه وحاقده على الدنيا ومفكرة الكل ظالمك وحابه تعيشي دور البنت المسكينة و اليائسه
اصحي بقى وحاجتك ، بكفي دموع وحقد و احباط .. بتقولي انك بتخافي من العتمه .. بتعرفي انو العتمه ساكنه جواتك ؟ انتي بتخافي منها لانها بتذكرك بحالك
العتمه الي بداخلك ما في اي ضو قادر يمحيها .. ازا ما صحيتي لحالك رح تبلعك وتقضي عليكي
حسيت كل شي حوالي عم يتدمر و رجلي ما عاد حامليني .. قربت منو وسندت ايدي عليه واخدت نفس : طيف امي عم تموت ..
طيف : كيف ؟
مسكت فيه بضعف وبلش كل شي حوالي يصير عتمه .. وكنت عم اسمع صوتو هو وعم يندهلي وما عم اقدر جاوب ..
لما صحيت كنا ببيتنا .. ابي وامي وطيف قاعدين جنبي .. فكرت حالي عم احلم بس لما شفت امي بنفس الشكل والملامح استوعبت انو مو حلم ..
ماجده : جيبلك مي ؟
هزيت راسي بــ أي ..
تطلعت بطيف .. وقف فوراً واستأذن : انا بدي امشي ..
زينة : لا خليك
مالك : زينة
زينة : بابا لو سمحت ..
اعطتني امي مي وبعدين مسكت ايد بابا : تعال معي بدي احكي معك كلمتين
مالك : ماجده انتي مو فهمانه ..
ماجده : خلص تعال شوي خلينا نتفاهم
طلع معها بصعوبة .. قرب طيف وقعد جنب تختي ..
طيف : انا اسف على كل شي حكيتلك ياه ما كنت بقصد
زينة : ما تعتذر الي حكيتو صحيح
طيف : لا مو صحيح بس انا عصبت لان دايماً بشوفك عم تبكي
سندت حالي شوي وتجلست .. تطلعت من الشباك وابتسمت : وقت بلشت اوعى كنت اترجى امي تقول انو ابي ميت ، لان لما يسالوني رفقاتي كان يعصرني قلبي انا وعم قلهن انو ابي تركنا وراح
بس امي رفضت هالشي ، قالتلي (( يا بنتي اوعى تخبي شي بحياتك ، لما تكوني بالعتمه اي حدا بيقدر يئذيكي .. خليكي بالنور وكوني واثقه من حالك وما تخافي من شي ))

كان تفكيري ابسط من انو

افهم قصدها ، الي تعلمتو من حكيها هاد انو خاف من العتمه لان اكيد حدا رح يئذيني فيها ، بس القصد كان مختلف تماماً ..
لو قلت انو ابي ميت كان اي حدا بكرهني فيه ببساطه يعرف الحقيقه ويستغل هالشي ضدي ويدمرلي حياتي .. لهيك كان لازم كون اقوى من الكل وما خبي شي بالظلام .. لازم نواجه نقاط ضعفنا وما نسمع لحدا يستخدمهن ضدنا
تطلعت فيه و ركزت بعيونو : وانت طيف .. حاجتك تعيش بالعتمه .. امك واختك بحاجتك .. فيك تعيش معن حياة حلوة وبسيطه
الانتقام عتمه .. والكره عتمه .. ولما تكون بالعتمه ..
طيف : اي حدا بيقدر يئذيني
زينة : تماماً ..
انحنى لعندي و صار قريب كتير مني .. تسارعت دقات قلبي وغمضت عيوني وشميت ريحة عطرو .. همسلي بادني : انتي النور زينة ..
ابتسمت وبعد دقايق لما فتحت عيوني ما لقيتو بالغرفة ..
ما كان معي وقت افهم غياب طيف الي استمر لشهر كامل ، كنت مشغولة بالاهتمام بأمي الي كانت عم تحتضر قدام عيوني وما كان فيني اعمللها شي الا انو خليها مبسوطة بأيامها الأخيرة
حكيتلها كل شي عن طيف و وعدتني يضل هالحكي سر بيناتنا لان ازا عرف ابي رح ينجرح كتير انو كنت عم خطط ضدو
كانت تسمعني بصبر واهتمام .. بس مره شدت على ايدي وحكتني بلهجة تحذير وخوف (( ديري بالك تعشقي متل ما عشقت امك .. الحب نقمة ازا كان للشخص الخطأ ))
هربت بعيوني بخجل وسألتها (( انتي شايفه طيف شخص خطأ ؟ )) .. رفعت اكتافها بحيرة (( ما فيني احكم عليه .. بس هو هلأ مو جنبك .. ليش ؟ ))
سكتت وما جاوبت .. بس ازا هو عندو مشاعر تجاهي فعلاً وينو هلأ ؟
ضليت كم يوم مكركبة كتير ومحتارة .. بعدين تذكرت البوم الصور الي ببيت طيف .. قررت روح جيبو مشان فاجئ امي فيه
و بواجه طيف وبشوفو لان اشتقتلو كتير ..
خبرت امي عن الالبوم وانو رح روح جيبو وهي قالت رح تغطي غيابي قدام ابي الي ما عاد طلع من البيت ابداً وكان كل الوقت جنبنا ..
دقيت الباب الأمامي كتير ومحدا فتحلي ..
زينة : يعني لازم تجبرني فوت من باب المطبخ ؟ مممممممممم طيب ...
فتت على البيت وندهت لطيف بس ما جاوبني .. رحت على غرفتو لقيتها مرتبه و ما في حدا ولا في اي دليل انو طيف كان فيها..
فتت على الغرفة الي فيها صندوق الصور .. كانو الصور لسه مرمين بالأرض متل ما تركناهن اخر مره .. وقفت وصرت اضحك انا و اسمع صوت ضحكاتنا انا وياه بهداك النهار
والحكايا والاسرار الي حكيناهن لبعض ..
انتبهت انو البوم الصور تبعي محطوط على الكنبايه الي نمت عليها بهديك الليله .. وعليه ورده حمرا دبلانه ..رحت اخدتها وفتحت الالبوام ولقيت فيه رسالة ..
فتحتها وكانت من طيف ..
الرسالة (( أميرتي الصغيرة .. كنت واثق انك رح ترجعي لتاخدي صورك او يمكن مشان تطمني علي .. بهاد الوقت انا رح يكون بيناتنا بحور ومسافات كبيرة .. انتي بجنب امك لانها بحاجتك
وانا حالياً بجنب امي لانها بحاجتي .. اخدت كتير ذكريات معي ، الغطا الي كنتي متغطيه فيه .. وشوية من صورك .. و ريحة عطرك و ملامحك .. رح بلش حياتي من جديد وابني نفسي بنفسي
و حق والدي رح اتركو للايام تاخدلي ياه .. بعتقد رح يكون فخور فيني لما انجح و اعتني بأختي وامي .. كنت بتمنى كون جنبك بوقتك الصعب
بس انتي عندك قوة عظيمة ومو بحاجتي ، و واثق انك رح تتخطي كل شي .. حافظي على النور الي بداخلك .. وابداً ما تخافي من العتمه لاني دايماً رح كون جنبك .. كوني بخير .. بحبك ))
كنت عم اقرأ الرسالة بصوتو .. بحركاتو وبنظرات عيونو وبانفاسو .. عم اتطلع بكل زاوية بالبيت وعم شوفو فيها ..
اخدت الصور ورجعت لعند امي كنت شاردة و عم عيد الكلام براسي .. يعني خلص ما عاد رح شوفو .. كل شي انتهى هيك بلمح البصر ..
نكشتني امي وسألتني :شو صار ؟
تطلعت فيها وعيوني عم يلمعو بالدموع : طلع الشخص الخطأ .. طلع الشخص الخطأ امي ..
غمرت راسي بحضنها .. و حضنت الرساله لقلبي ..
_____
_____
الطبيب : دخلوها فوراً على العناية المشدده ..
زينة : دكتور شبها شو في .. شو عم يصير معا ..
الممرضة : لو سمحتي ارجعي لورا
صرخت ودفشتها : لك بعدي من خلقتي بدي افهم امي شو صرلها شو صار شووووووو صااااااار
مسكني ابي وشدني لورا :زينة .. اهدي .. اهدي
ضميتو بقوة وقلبي عم يتقطع من الخوف : ما بدي ياها تروح اعمل شي .. اعمل شي بترجاك انا بحاجتها ما لازم تروح ما بصير ما بصير
مالك : خلص بنتي...انا جنبك .. انا هون
مرت ربع ساعه .. وقت قصير بس حسيتو سنين طويله .. طلعو بعدها من العناية ليحكولنا (( العمر الكون )) .. حسيت ببرد مشي بكل اجزاء جسمي
كأنو تلج عم يغمرني وما عم حس بأطرافي .. انو عمر من بعدها ؟ شو هالعمر الي عم عيشو اصلاً !! ... العمر الي ؟ مين قال انو لسه بدي عمر .. شو بدي اعمل بالعمر .. شو !!!!

يتبع....

#قـــــصــــص_وروايــــات ✏

#الظلام✴


الجزء التاسع


فتت بحالة اكتئاب ، تركت جامعتي وما كملت الفصل الدراسي .. و صرت قضي وقتي عم اتفرج على صوري انا وامي .. واحضن تيابها وشم ريحتها
واقرأ رسالة طيف واشتقلو .. دق ابي الباب وفات هو وحامل الأكل ..
مالك : ممكن فوت ؟
نزلت الرسالة من ايدي : تفضل بابا
حط الأكل قدامي وقعد جنبي .. شدني لصدرو بحنيه : ما بدك تاكلي معي ؟
زينة : ما الـ ـ
مالك : ما الك نفس حفظتها ..
زينة : ايه
مالك : ما بصير تعملي بحالك هيك .. ازا مو مشانك مشاني ، انا كمان بحاجتك توقفي جنبي
زينة : بعرف بس بابا انا مكسورة .. من وقت كنت طفله لهلأ دايماً مكتوب علي اشتاق لحدا غالي على قلبي
كنت اشتقلك وبعدين اشتقت لامي وبعدين اشتقت لطيف وبعدين
سكتت وضغطت على شفافي بخوف : قصدي
مالك : ازا بتشربي كاسة الحليب هي ممكن اعتبر حالي ما سمعت
زينة : لا انا مو قصدي يعني كنت بدي قول
رفع كاسة الحليب وقربها من تمي : ايه اشربي وانتي ساكته وبعدين منتفاهم
شربت الحليب واكلنا نحنا وساكتين .. اخد الأكل وبدو يطلع من الغرفة حسيت لازم وضحلو الموضوع مشان ما اجرحو
زينة : بابا لحظة انا لازم احكيلك شي بخصوص طيف
وقف على الباب بدون ما يلتفت علي : بعرف .. بعرف كل شي
زينة : شو كل شي؟
مالك : جميلة حكتلي كل شي ، عن الاتفاق الي كان بينك وبين طيف
زينة : لا بابا انا كنت بالأول معصبه بس بعدين
التفت بدون ما يتطلع فيني : مو مشكلة .. المهم هلأ تكوني منيحه ومابهمني اي شي صار او بدو يصير .. وبأي لحظة بتحبي تكملي اتفاقك مع طيف كمليه
لان مهما كانت قيمة الاملاك الي رح اخسرها .. فأنا كسبت اغلى منها ..
زينة :بابا ..
فتح الباب وطلع .. ما كان بدو يحكي بالموضوع ، حسيت بخجل و غصه .. كانت الأيام عم تمر شبه بعضها .. ما في شي جديد وما في شي حلو
الحياة باهتة وما الها اي معنى بدون الناس الي منحبهن ..
كنت حب زور بيت طيف كل فترة وفترة .. بالذات بالليل .. اقعد بالجنينة برا واشرب قهوة بنفس الفنجان الي هو كان يشرب فيه بالليله الي قعدنا فيها بالجنينة وكنا عم نخطط لاتفاقنا ضد ابي ..
_______
_______
الساعه 10 الصبح رن موبايلي وكان رقم دولي .. شربت مي مشان صحصح ورديت
زينة : الو ؟
طيف : الو
انتفض قلبي وتخربطت انفاسي .. قمت من سريري انا وحاطه ايدي ع تمي ومو قدرانه احكي شي ..
طيف : كيفك زينة ؟
زينة : _ _ _
طيف : اول شي البقيه بحياتك
زينة : _ _ _
طيف : الأفضل فوت بالموضوع مباشرة ... بما انك حالياً انتي المالكة و كل شي باسمك فأنا عندي صفقة عمل ، حابب نعمل شغل شراكة وقلت بحكي معك مباشرة لنتفق
زينة : شغل ؟
طيف : اي
زينة : هه !! كتبتلي برسالتك انك شلت فكرة الانتقام من راسك بس شكلك كنت عم تكذب بكل حرف كتبتو برسالتك .. متصل فيني مشان شغل
للاسف رح خيب آمالك وقلك انو كل شي رجع قانونياً باسم ابي .. ما فيك تضحك علي .. اتصل فيه واعرض عليه مشروعك .. سلام
طيف : لحظة لحظة عم نحكي
زينة : شو بدنا نحكي انا هلأ ما بملك شي ؟
طيف : طيب يمكن معك حق بما انو ما رح استفيد منك شي معناها خليني اخود بقية حقوقي
زينة : حقوقك !!
طيف : الورده !
زينة : لك انو وردة ؟
ضربت جبيني وتذكرت : الوردة ؟
طيف : ايوووووه الوردة .. خلال يومين رح كون بالبلد و رح شوفك لاخدها ازا ممكن
زينة : انا رميتها
طيف : مستحيل ، بشوفك بعد يومين ..
سكر الخط وماتركلي مجال رد عليه .. طلعت دورت على ابي وحكيتلو الي صار ..
زينة : شو بابا ؟
مالك : ما بعرف انتي شو بدك ؟
زينة : كيف شو بدي ؟
مالك : يعني بدك تحتفظي بالوردة ولا بدك ترجعيها لصحابها ؟
زينة : اه ؟
مالك : القرار الك ..
تركني وقام وانا ضليت قاعده وصافنه ..
لبعد يومين رنلي طيف وطلب نلتقي بالمكان الي شفنا فيه بعض اول مره .. اخدت الوردة الي كنت مجففيتها بدفتر ومحتفظه فيها
واخدت رسالتو ورحت لهنيك .. لما وصلت ما لقيتو .. تأملت المكان حوالي ورجعت وقفت على حفة المنحدر .. كان الهوا قوي وبارد
اجا صوتو من بعيد : (( يا بنت شو عم تعملي هون ؟ ))
ابتسمت كأنو انسكب بقلبي راحة وسعاده .. التفتت عليه وشفتو عم يجي باتجاهي وكان متغير كتير .. حليان ومتغير
لابس بدلة سودا و دقنو طويله شوي
زينة : بدي انتحر ..
اجا وقف جنبي وتطلع فيني شوي .. اخد نفس و اشرلي لتحت : (( شوفي .. هلأ ازا انتي فعلا عم تفكري تنتحري فهاد المكان ابداً مو مناسب لان ازا بدنا نحسب الارتفاع ففرصة انك تموتي هي 50% وفرصة انك تعيشي مع اعاقة 25% ))
زينة : وال25% الي ضلت شو ؟
طيف : الــ 25% احتمال توقعي بحضني ..
قرب لعندي ولفني بأيديه ..
طيف : لسه بتخافي من العتمه ؟
زينة : لا .. صرت ما نام الا بالعتمه
طيف : ليش ؟
زينة : مو انت كتبتلي برسالتك انو دائماً رح تكون جنبي بالعتمه ؟
نكشلي شعراتي وضحك .. على صوت ضحكتو حسيت رجعت الحياة لقلبي الي مات بعد وفاة امي ..
_________
_________

بعد ما انتهت هالسنه الي كانت اصعب سنه بتمر علي بحياتي

وصار فيها تغيرات كبيرة .. سكرنا البيت الي عايشين فيه انا وابي
مشان ننتقل لبيتنا بالمدينه ليكون ابي اقرب لشغلو ولارجع انا لجامعتي .. ومشان يكون ابي قريب من بيتنا الجديد انا وطيف الي رح نعيش فيه ، من بعد خطبتنا رجع لكندا
بس كان شرطي انو نستقر هون جنب ابي لان ما بقيلي حدا غيرو .. لهيك عم يرتب حياتو و رح يرجع هو وامو ليستقر هون من جديد ونكمل حياتنا مع بعض .. و عم استناه لحظة بلحظة ليرجع
كنت عم امشي بالبيت واتفرج عليه .. خالي من الحياة و ما فيه صوت ولا حركة والاثاث كلو مغطى بالقماش الأبيض ..
لملمت بقايا الذكريات واللحظات الأخيرة الي عشتهن مع امي بهاد البيت .. سمعت ابي عم يندهلي برا مشان انزل لان لازم نمشي
نزلت و وقفت قدام باب البيت .. مسكتو بايدي التنتين وقبل ما سكرو .. تخيلت امي واقفه قدامي بس مو وهي مريضه
تخيلتها هي وبصحتها وبجمالها ..
واقفه متل الخيال ومبستمة .. لوحتلي بايدها وحكت بصوت حنون (( يا بنتي اوعى تخبي شي بحياتك ، لما تكوني بالعتمه اي حدا بيقدر يئذيكي .. خليكي بالنور وكوني واثقه من حالك وما تخافي من شي ))
لوحتلها بايدي ودمعتي عم تنزل : انا هلأ بالنور ماما .. ما تخافي علي
بلشت تختفي بالتدريج.. سكرت الباب شوي شوي ودموعي اختلطو بابتسامتي .. (( انا بحبك أمي .. بحبك .. ))

#الـــــــــنــــــــــهاية