إذا جرحت نفسك بـaiguille ولا Pisturi فيه دم تاع مريض ومهما كان طول وعمق الجرح وكمية النزيف لازم أول حاجة ديرها هي nettoyage كيما أي جرح (Sérum salé + Bitadine + L'eau oxygénée) وديرلو pansements.

بعدها تتجه مع المريض لي ڤست روحك بالدم تاعو وتروحو لمصلحة الأمراض المعدية باه يديرولو التعيارات ويشوفو كشما عندو.. وإذا زرب خرج ولا هربلك (راهم يهربو عسوهم 🤣) تقدر تروح وحدك.
بصح كون يجي معاك خير باه يعيرولو هو برك ويشوفو إذا كان ما عندو والو معناها صاي راك تهنيت سي نن إذا كشما لڤاو عندو ولا مقدرتش تجيبو معاك رايح تولي تعيش أكبر وأطول جرية في حياتك ✨🙂.

نفترضو مثلا أنك رحت لمصلحة الأمراض المعدية بلا ما تجيب المريض معاك.

الأمراض المحتملة لي تقدر تنتقل عبر الدم هي:
-L'hépatite B.
-L'hépatite C.
-VIH.

عندكم الـL'hépatite A ما تنتقلش بالدم بالنسبة لشخص تجرح بدم تاع مريض آخر بصح ينتقل عن طريق الغذاء والماء الملوث يعني ديما الشخص لازم يغسل يديه ويعقمهم وفقط.

المهم نتا كشخص فالمجال الطبي كي تتڤاس بدم تاع مريض آخر كاين هذ الاحتمالات الثلاث لي ينتقلو بالدم الباقي ميهموش.

نهدرو على l'hépatite B:

كامل درنا لقاح تاعها عند الولادة يعني بإذن الله نسبة تاع 80% من الطلبة رانا محصنين ضدها حتى إذا افترضنا بلي انتقل الفيروس تاعها عبر الدم عندنا.. الأجسام المضادة لي خدمهم الجسم تاعنا ضدها بعدما تلقينا اللقاح تاعها رايحة تكون كفيلة باه تقضي عليها وما تصراش إصابة.

أما نسبة 20% للأسف ما راحش تكون عندهم مناعة ضدها خطركش مع العمر رايحة تنقص كمية الأجسام المضادة (الصغير فينا عمرو 20 سنة هكذاك وهذي مدة ينقصو فيها الأجسام المضادة تاع L'hépatite B عند فئة معتبرة من الناس سيرتو لي عندهم التوتر والقلق المزمن) وكاين حالات حتى إذا درنالهم لقاح في الولادة بصح ما راحش يكون فعال للأسف تسما ما يخدمش خدمتو بشكل كلي وبالتالي ينتج أجسام مضادة قليلة لي ما تكفيش باه تتصدى للفيروس هذا كي يدخل للجسم تاعك كي تتجرح.

أما L'hépatite C للأسف ما عندهاش لقاح لحد الآن بصح إذا صرات إصابة بها رايح يكون علاج مضمون وأغلب الحالات لي كانو مصابين بهذا الفيروس راهم تلقاو العلاج تاعهم وتعالجو منها بنسبة 100%.
هذا العلاج رايح يكون بعد الإصابة.. يعني المرض هذا مكانش لقاح للوقاية منو بصح عندو علاج.


أما الـVIH ما عندو ني علاج ني لقاح 🙂💔..
بصح لا داعي للقلق لأنو كاين مجموعة دوائية اسمها المختصر "PEP" رايح تتناولها فور الحادث مباشرة باه تمنع هذا الفيروس إذا دخل للدم من أنو ينتشر وتصرا الإصابة بيه.

يعني طبيب الأمراض المعدية كي تروح عندو رايح يعطيك PEP لي هو عبارة عن أقراص ويوصفلك جرعات محددة تتناولها في أوقات محددة باه تتصدى للـVIH إذا كان كاين.
في غالب الحالات شفتهم يمدو زوج أنواع من الـPEP النوع الأول يكون للجرعة الصباحية والنوع الثاني للجرعة الليلية.
ولازم عليك تبقى تتناول هذا الدواء لمدة شهر كامل باه تتصدى للفيروس إذا كانت كاينة عدوى.

أما l'hépatite C فما عندهم ما يديرولك من غير أنك تبقى تحت المراقبة تاعهم لمدة سنة كاملة باه إذا ظهرت أعراض المرض ومهما كانت خفيفة يزربو يعطيوك العلاج تاعو قبل ما يبدا يتنشر كثر.

ضكا تبقى l'hépatite B بما أنو دفعتنا أغلبيتنا زايدين في 2006 بالرغم من أننا تلقينا اللقاح تاعها عند الولادة لكن كيما ڤلتلكم كاينة نسبة معتبرة ما راحش يكون عندها مناعة كافية ضدها.. لي زايدين في 2003 وهبط دارولهم جرعة إضافية من اللقاح كي طلعو للجامعة منعرف لاه حنا نساونا 🙂..

المهم أي شخص زايد في 2004 وطلع معندوش هذي الجرعة الإضافية دونك الطبيب رايح يعطيك وصفة طبية باه دير les analyses تاع Les AC HBs على برة باه يشوف إذا عندك عدد كافي من الأجسام المضادة ضد هذ الفيروس ولا لالا.

ومن جهة رايح يطلب منك دير sérologie ثاني على برة باه يشوفو إذا نتا عندك هذ الفيروسات في ثلاثة من قبل الإصابة ولا لالا.

(تڤولولي بصح هذ التعيارات يكونو بعد الإصابة بالجرح نڤوللهم إيه بصح إذا كان كاين فيروس لي دخل عبر الدم بعد الإصابة رايح يدي مدة تاع أشهر إلى سنة أو أكثر باه يبان فالـSérologie.. يعني إذا نتا درتها بعد يوم ولا يومين من الإصابة بالجرح معناها راك تكشف على الفيروس لي كان عندك قبل الإصابة ميش بعدها).

هذا مثال عالوصفة..

AC anti HBs:
رايح دير تعيارات باه تكشف على كمية الأجسام المضادة لي عندك ضد l'hépatite B.

Sérologie HIV/ HBC/ HVC:
رايح تكشف على ما إذا كان عندك إصابة مسبقة قبل الحادثة بهذ الفيروسات الثلاث.

عندكم La sérologie فالعادة حتكون ديما négatif.

يبقى الإشكال كامل فـLes anti HBs:
إذا كانو نتائج التحاليل تاعهم 10 فما فوق معناها راك محصن ضدها ومكانش خوف.. إذا دخل الفيروس فاللحظة لي تجرحت فيها جسمك رايح يتصدى ليه ويقضي عليه.

أما إذا كانت تحت 10 هنا رايح تروح لمصلحة طب العمل باه يمدولك جرعة إضافية من اللقاح (ما تنساش تدي معاك الدفتر الصحي باه يعرفو الجرعة لي ديتها فالولادة ومن خلالها يعرفو الجرعة الإضافية ڤداه يمدولك) زفي بعض الحالات يقدرو يبعثوك ديراكت لمصلحة الطب الوقائي باه دير اللقاح تاعك عندهم.

بعدما تدي اللقاح تاعك رايح تبقى تشرب الـPEP من اليوم لي تعرضت فيه للجرح حتان يعڤب شهر.
ومن جهة راك تبقى تحت المراقبة تاع l'hépatite C.

بعد شهر كي تخلص الـPEP رايح تولي لمصلحة الأمراض المعدية مرة أخرى يعطيوك وصفة تحاليل ديرهم باه يشوفو إذا الـPEP تصدى لأي إصابة محتملة ضد الـHIV وباه يشوفو إذا كاين إصابة بالـHépatite C..

بعد مرور 3 أشهر من هذ التحاليل بالذات رايح تعاود دير تحاليل أخرى ليهم باه يتأكدو بلي مكان حتى إصابة.

وبعد مرور 6 أشهر من التحاليل هذو رايح تزيد تحاليل نهائية لي تتأكد فيهم 100% بلي ما عندك والو.

يعني يا عزيزي الطالب إذا افترضنا بلي صرا الحادث في أوت 2026 هذا يعني أنك رايح تبقى تتمرمد من التعيارات واللقاحات وبين مصلحة طب العمل والأمراض المعدية حتان جوان 2027 باه تتهنى وتتحرر من العذاب ✨🤌🏻.

أهم حاجة أغلبيتنا يغفلو عليها هي الـPEP يا جماعة مهما يصرا ومهما يكون ما تراطيو حتى جرعة ما تراطيو حتى نهار أبقاو ملتزمين بالجرعات طيلة الشهر الأول كون تراطي جرعة وحدة برك راك تعرض لنفسك خطر كبير بزاااااف.

الـPEP عندو أعراض جانبية كيما الغثيان والإسهال والصداع يعني إذا جاوكم هذ الأعراض متخافوش منهم راهي حاجة طبيعية.
المهم أبقاو ملتازمين بيهم وما تراطيو حتى جرعة مهما يصرا.

وما تستهزاوش بخصوص اللقاح تاع l'hépatite B إذا خرجو التحاليل بلي معندكومش مناعة كافية ضدو متطولوش بزاف وروحو تلقاو جرعة إضافية منو.

إذا جاتكم أي أعراض تاع l'hépatite C روحو طول للأمراض المعدية ما تستهزاوش.

الـHIV يا جماعة إذا ڤعد فالهوا لبضع دقائق رايح يموت ديراكت يعني إذا مثلا ڤست روحك بآداة حادة لشخص يحتمل أنو عندو هذ الفيروس بحيث قبل ما تڤيس روحك كانت هذ الآداة معرضة للهواء لمدة راهي احتمالية انتقال العدوى 0% حرفيا بصح يفضل دير التحاليل ديما.
ومادامك راك ملتزم بالـPEP بالطريقة الصحيحة ما راح يصرالك والو بإذن الله.

الـHépatite B عندها لقاح وفي حالة ما إذا ما كانتش عندك حصانة وما درتش لقاح جديد راهو عندها علاج.
نفس الشي بالنسبة للـHépatite C راهو عندها علاج فعال.

الموسيقى الحزينة فالخلفية باه تكون هدرتي مؤثرة (معلاباليش منين جات).

المهم ما تراطيو حتى إجراء جي فالتعب والجري والتعيارات ومجيش في صحتكم وكونو حذرين المرة الجاية وما تتعاملوش مع عباد مشبوهين وما تسمعوش لهذوك لي يڤولولككم ما راح يصرا والو هذي هي وخلصنا ✨🩵.

https://t.me/dr_douaah
كاينة هذي دعاء نتبعها من بروميار😭🫶🏻 نورمالمو تقرا في باتنة اذا منيش غالطة
وكاين قناة ايناس تقرا في ألجي
قناة فريدة تقرا في سطيف طالعة كاطريام كما انا🥹
https://t.me/bacmed
و قناة الخريطة تعجبني محتوى لي تحطو بزاااف
https://t.me/NotlostImJustQuestioningTheMap
للعلم ما نعرف حتا وحدة فيهم😭😭 but نحب بزاف المحتوى نتاعهم
#arteria

برومو Adrénaline وهوما زادمين على الخريطة حاليا:

16 August.

المهم هيا نهدرو على Les prélèvements تاع La gazomètrie 🩵✨.

• نديرو تذكير بسيط ✨:

الدم عند الإنسان رايح يكون ديما فالحالة الطبيعية عندو pH محصور بين:
[7.35 - 7.45]

-هذا يعني أنو الجسم تاعنا رايح يبقى ديما محافظ على هذا المجال الطبيعي للـpH سي نن إذا كانت عندنا قيمة خارج هذا المجال:
•أكبر من 7.45= معناها عندنا Alcalose.
•أصغر من 7.35= معناها عندنا Acidose.

الجسم عندو Des fonctions لي من خلالهم يقدر يحافظ على المجال الطبيعي للـpH تاع الدم ولي هوما:
-La respiration:
يتحكم في كمية الـCO² داخل الدم هذا الأخير يولي عبارة عن شاردية حمضية لي هي حمض الكربونيك.
في حالة الشهيق رايحة تنقص كمية الـCO² وبالتالي ينقص حمض الكربونيك H²CO3 يعني الـpH يولي قريب للـAlcalose.
إذا كانت La fréquence respiratoire قليلة رايح ينقص الـCO² الداخل وبالتالي تولي عندنا Acidose.

-La fonction rénale:
كامل علابالنا بلي الكلى الوظيفة تاعهم هي تصفية الدم من الفضلات والفائض تاع المواد..
كاينة شاردة اسمها البيكاربونات -HCO³ هذي رايحة تصفيها الكلية..
إذا كانت كاينة بكمية كبيرة في الدم رايحة تديرلنا Alcalose دونك الكلية رايحة تطرحها مع البول.
إذا كانت كاينة بكمية صغيرة رايحة ديرلنا Acidose هنا الكلية رايحة توقف الطرح تاعها.

وهكذا هذ les deux 02 fonctions رايحين يتعاونو مع بعض باه يحافظو على المجال الطبيعي للـpH..

تسما كي نجيو نديرو prélèvements باه نشوفو la gazomètrie تاع المريض هنا معناها رايحين نشوفو أسكو عندو مشكلة في La respiration ولا La fonction rénale.

نهدرو على البروتوكول:

-الوسائل لي تحتاجوهم:
Des gants stériles.
Des compress stériles.
Seringue.
Bétadine.
Anti-coagulant (L'héparine).

-أول حاجة لازم كامل نعرفوها هي أنو Le prélèvement يكون artérielle يعني نسحبو عينة الدم من artère ميش من veine.
↓
هذا معناه بلي لازم نحوسو على artère superficielle باه نقدرو نديرو التحاليل:
كاين زوج حالات:
-L'artère radiale.
-L'artère fémorale.

(في غالب الحالات شفتهم يديرو بـL'artère fémorale سيرتو مع كبار السن).

باه تعرفو وراهي l'artère لازم تكونو تعرفو l'anatomie تاع هذو الزوج بعدها ديرو Palpation ووين ما تسمعو النبض معناها راكم في Artère (عكس les veines كي ديرو palpation مكمش رايحين تسمعو نبض بصح تحسو بـStructure canalaire عند اللمس).

كي تحدو البلاصة إكزاكت لي ديرو فيها الـprélèvement يجي وقت الصح ✨:

-هزو Seringue لي عندكم عمروها بالـHéparine مباعد سيحوه فالهواء.. هكذا يولي الـHéparine متواجد في حواف la seringue وداخل الـAiguille تاعها وهذي كمية كافية باه يمنع تخثر العينة.

-بعدها أمسحو على المنطقة تاع l'artère بـCompress stérile فيه الـBétadine باه تتعقم.


-بعدها بيكيو المريض في المنطقة لي حددتو فيها l'artère رايحين تلاحظو Retoure artèrielle لي يكون على شكل دفعات (ميش كيما الـRetour veineux لي رايح يكون مستمر) ويكون لون الدم أحمر فاتح لأنو كيما علابالكم بلي الدم الشرياني ديما يكون غني بالأكسجين.

يعني يا عزيزي الطالب إذا درتها ولڤيت الروتور على شكل دفعات معناها راك في l'artère وراك جبدت العينة بطريقة الصحيحة.