راهو ولالي الشغف نتعشا ونجي 🚶🏻‍♀.

هذي الصورة تعاونكم تعرفو طبقات الجلد.

نهدرو ضكا على العلاج تاع كل degrés فـLes urgences ✨.

Le 1er degré:

تكون سطحية وتڤيس l'épiderme بسبب أشعة الشمس مثلا ولا بسبب تلامس سريع مع سطح ساخن..

أول خطوة نديروها هي التبريد (Réfroidissment) نستعملو ماء بارد ولا فاتر ونتفاداو الجليد لأنو يسبب تهيج.
فالعادة يكون المصاب دار هذي الخطوة فور حدوث الحادث تسما ميش ديما رايحين نديروها فقاعة العلاج.

بعدها جي مرحلة nettoyage رايحين نستخدمو زوج محاليل لا أكثر:
Le sérum salé:
نحطوه في compress يكون stérile ونبداو نمسحوه على الجلد بشكل متقطع ميش مستمر (يعني بالطبطبة على منطقة الحرق باه ما تتخربش الأنسجة).

بعدها يجي أهم محلول لي هو Le sérum Bétadiné ولي هو عبارة عن bétadine لي يكون مخفف بـsérum sallé لأنو كيما ڤلتلكم من قبل أنو البيتادين منديروهش في حالة الحروق باه نتفاداو toxication بالـI² بصح في حالة الحروق السطحية من الدرجة الأولى نقدرو نديرو بيه بصح بشرط أنو يكون مخفف بالسيروم.

هذا هو le sérum Bétadiné تهز كمية من البيتادين وتكبها في serum sallé حتان يمتزجو..

تولهو لأنو لازم ديرو بـcompress stérile وتكونو لابسين des gants stérile ميش كيما في les sutures ديرو بـdes compress نورمال.
تمسح بيه على الحرق حتان يتعقم باه جي الخطوة الموالية لي هي Le traitement.

فمرحلة الـTraitement رايحين نستخدمو مرهم تاع حروق أكثر واحد شفتهم يديرو بيه هو Mebo نديرو منو طبقة سميكة ونغطيوها بالـTull gras باه تترطب المنطقة ونوفرولها وسط ملائم باه تتجدد.

بعدها يجي le pansement يكون بـBande à gaze (ديما كي ديرو بالـTull gras زيدو معاها Bande à gaze ميش compress).

عندكم الحروق من الدرجة الثانية رايحين نتابعو نفس البروتوكل ما عدا في نقطة مهمة جدا وهي les phlyctènes (عبارة عن فقاعات تظهر فالجلد عند الإصابة بحروق ويكون فيها الماء نورمالمو فالدارجة عندنا نسميوها الكشكاشة):


-هوما عبارة عن استجابة طبيعية من الجسم للحرق بهدف ترطيب المنطقة تسما ميش لازم نطرطڨوهم خطركش عندهم دور في الشفاء من الحرق إلا إذا كان فيهم تقيح هنا لازم نتخلصو منهم طبعا.

باقي البروتوكل من nettoyage وpansement وtraitement رايح يكون بنفس الطريقة تاع الحروق من الدرجة الأولى.

أما الحروق من الدرجة الثالثة والرابعة هذو يروحو لغرفة العمليات ديراكت:

الدرجة الثالثة يديرو عملية زراعة جلد جديد لأنو جميع طبقات الجلد احترقت سوا من عند متبرع ولا من عند الشخص نفسو.

الدرجة الرابعة رايح يكون الحرق دمر الجلد بطبقاته الثلاث ووصل حتى للعظم والعضلات هنا مكانش علاج من غير استئصال العضو المصاب.

خلصنا ✨.

ثمَّ الصَّــــــــلاةُ على المُخــــتارِ سيِّدِنَا
المُصطفَى المجتَبى المَبعوثِ من مُضَرِ

والآلِ والصَّــــحبِ ثمَّ التَّابِعِيـــنَ لــــهُ
ما هبَّ ريحٌ وهلَّ السُّحبُ بالمطَـــــــرِ..

أنا وجهي تاع حشمة؟ سيريو؟

على حساب الشوفة رانا كامل ڤاسنا الدم تاع المرضى فالسطاج هذا 🥲🤌🏻.

مام كي سقسيت الطبة وأي شخص يخدم فالمجال الطبي (حتى عمال النظافة تاع المستشفى) ڤالولي كامل بلي تڤسنا ميش خطرة ميش زوج يعني أي واحد مزال متڤاسش لحد الساعة كونك متأكد 100% بلي رايح تتڤاس وبشكل حتمي مهما كنت حذر 🙂✨.

إذا كنت تتعامل مع مريض وساح الدم تاعو على جلدك يكفي فقط أنك تغسل المنطقة بالصابون ولا جال معقم لا أكثر

إذا ساح على لابلوز هنا مكانش انتقال للعدوى بصح الواحد يحافظ على نظافتو وباه مينقلش العدوى لغيرو سو يغسلها بالماء الأكسجيني هنا مكان.

(البنات تولهو للماء الأكسجيني متڤيسوش بيه قشكم سيرتو الملابس الملونة لأنو يحرڤ القش كيما الجافي ويخربلكم الأوتفيت كي حالتي 💔).

إذا جرحت نفسك بـaiguille ولا Pisturi فيه دم تاع مريض ومهما كان طول وعمق الجرح وكمية النزيف لازم أول حاجة ديرها هي nettoyage كيما أي جرح (Sérum salé + Bitadine + L'eau oxygénée) وديرلو pansements.

بعدها تتجه مع المريض لي ڤست روحك بالدم تاعو وتروحو لمصلحة الأمراض المعدية باه يديرولو التعيارات ويشوفو كشما عندو.. وإذا زرب خرج ولا هربلك (راهم يهربو عسوهم 🤣) تقدر تروح وحدك.
بصح كون يجي معاك خير باه يعيرولو هو برك ويشوفو إذا كان ما عندو والو معناها صاي راك تهنيت سي نن إذا كشما لڤاو عندو ولا مقدرتش تجيبو معاك رايح تولي تعيش أكبر وأطول جرية في حياتك ✨🙂.

نفترضو مثلا أنك رحت لمصلحة الأمراض المعدية بلا ما تجيب المريض معاك.

الأمراض المحتملة لي تقدر تنتقل عبر الدم هي:
-L'hépatite B.
-L'hépatite C.
-VIH.

عندكم الـL'hépatite A ما تنتقلش بالدم بالنسبة لشخص تجرح بدم تاع مريض آخر بصح ينتقل عن طريق الغذاء والماء الملوث يعني ديما الشخص لازم يغسل يديه ويعقمهم وفقط.

المهم نتا كشخص فالمجال الطبي كي تتڤاس بدم تاع مريض آخر كاين هذ الاحتمالات الثلاث لي ينتقلو بالدم الباقي ميهموش.