▪️▪️▪️▪️▪️
عمّه زينب جاوبيني شنهو صاير
عمّه زينب طمّنيني گلبي حاير
عمّه زينب
▪️▪️▪️▪️▪️
عمّه زينب گلبي خايف طمّني منّي الگلُب
انظر احروگ ابعباتچ بعد يحبيبه او ترب
ليش اباوع ماكو اهلنا هالزلم كلهم غرب
والنسه مثل الثواكل منهن المدمع يصب

هالمسيّه هواي متغيره الفواطم
هالمسيّه ليش ماكو بني هاشم
عمّه زينب
▪️▪️▪️▪️▪️
حالنه اتغيّر واعاين هالمسه مو مثْل اَمِس
گلبي خايف يالعقيله فاجعه صارت يحس
يفز گلبچ من چفوفي وي چفوفچ تنلمس
ليش مو عمّي حرسنه من اجانب ننحرس

ماكو رايه او لا گمر عيني تشوفه
ماكو رايه حايره وابروحي خوفه
عمّه زينب
▪️▪️▪️▪️▪️
وين عبد الله ارد اشبگه الروح ملهوفه اله
والرباب اشبيها تبچي او منهو هذا حرمله
ليش ليله اتهل دمعها او رمله مثل الثاكله
ليش كلها اتصيح آنه امنين اجتني كربله

الارض هايه مختلف حتّه هواها
الارض هايه والدمه ترست ثراها
عمّه زينب
▪️▪️▪️▪️▪️
وين ابو فاضل وابويه گلبي رايد يطمئِن
ماكو واحد من اهلنه والدمع حدر الجفن
ليش خيمه امّزّگيها او بيها هالنسوه تون
عله وجهچ من اعاين اقره بعيونچ حزن

حمره عينچ اشگد اشوف آلام بيها
حمره عينچ من بچي لو ساطريها
عمّه زينب
▪️▪️▪️▪️▪️
الگاع دم وارماد كلها خوف بيها ابكل كتر
چان ابو فاضل ضوانه هسه ما عدنه بدر
ظلمه والصحره چبيره وآني شاغلني أمر
العصر تكسيره اسمعتها شنو چان الينكسر

اذني سمعت اعظام تنداس ابحوافر
اذني سمعت الصوت ضل ابراسي داير
عمّه زينب
▪️▪️▪️▪️▪️
عمّتي الليله ابحنانچ صرتي بينه اتجمّعين
بيچ هيبة كل زلمنه او بيچ صرنه امأمّنين
خيمه للخدّر صفيتي مثل والدنه الحُسين
خيمه مهمومه ابحزنها صار تارسها الونين

صرتي خيمه او بيچ هيبة كل اهلنه
صرتي خيمه ابروح ملچومه تلمنه
عمّه زينب
▪️▪️▪️▪️▪️
ابو الحسن الوائلي

▪️▪️▪️▪️▪️
يابو فاضل يسبع الگنطره
ترضه خويه اروح اميسّره
▪️▪️▪️▪️▪️
ياخو زينب دمعي عيني يهل
تدري حضرَوا يعباس الهزل
عايف اختك وحدها يالنفل
عگب چفّك يكض ايدي الحبل

راح اعوفك طريح اعله الثره
ترضه خويه اروح اميسّره
▪️▪️▪️▪️▪️
إختلف حالي يغالي ابطيحِتك
عيني تدري اشكثر مشتاگِتك
خدي سطروه ابگطعة يمنِتك
ترضه هايه عليك ابشيمِتك

والدمع دم يبو فاضل جره
ترضه خويه اروح اميسّره
▪️▪️▪️▪️▪️
اليرتعش چان اذا رفلك جفن
ابسوطه يابو الفضل طگ المتن
حرمه واركب عله الناگه او أوِن
لا اخو الضل معاي او لا إبن

بهاي الايتام بُگيت امحيّره
ترضه خويه اروح اميسّره
▪️▪️▪️▪️▪️
هودج النور تره ماضي صفه
ابّين اجانب أخيتك واگِفه
ليش ضعنك ينشمي عايِفه
لليغض من يشوفك طارِفه

رغم الجروح اضل متصبّره
ترضه خويه اروح اميسّره
▪️▪️▪️▪️▪️
خويه عباس رغم ضيم السبي
إطمئن ما تذل بنت النبي
إطمئن ما يلمسون العبي
راح جبريل يعدّل مركبي

أذِل هيهات واضل امخدّره
ترضه خويه اروح اميسّره
▪️▪️▪️▪️▪️
ابو الحسن الوائلي

▪️▪️▪️▪️▪️
آنا الوالده والگلُب لهفان
ابني احسين فوگ الرمل عريان
▪️▪️▪️▪️▪️
آنا الوالده التجري الدمع سيل
ما أگطعها ونتي انهاري والليل
وآنا الفوگ ابنها داست الخيل
او لعبت عله جسمه الخيل ميدان
▪️▪️▪️▪️▪️
وصل قبلي الشمِر حِين الحضرته
او گعد فوگ المچان المنّه بسته
اگبال اعيوني ضل يگطع رگبته
مات او ريجه يابس حيل عطشان
▪️▪️▪️▪️▪️
توّه الشمِر خلّص ذبِح منّه
واجنّه الخيل رادن يسحگنّه
كل جسمه الحوافر رضرضنّه
صوت الكسُر زاد ابگلبي الاحزان
▪️▪️▪️▪️▪️
صاحوا عالخيم من گطعوا الراس
هجموا اعله النسه ما هوّه عبّاس
ركض طلعن بناتي بين الارجاس
واعله اخيامهن جابوا النيران
▪️▪️▪️▪️▪️
للطف جيت بضلوعي الكسيره
شفت زينب وحيده ابلا عشيره
او مثلها ابكربله احتاريت حيره
ألِم بحسين لو أجمع النسوان
▪️▪️▪️▪️▪️
بنات ابني او بناتي راحن اضياع
او هجّن بالصحاري ابدون فزّاع
واموزّع احسين اوليدي عالگاع
تراب الطف الجسمه صاير اچفان
▪️▪️▪️▪️▪️
ابو الحسن الوائلي

▪️▪️▪️▪️▪️
واويلي على العطشَان
▪️▪️▪️▪️▪️
يتلوه بقه ابمهره
طاح ابدمه عالغبره
مطبور اثنعش طبره
گطعوا من گفاه نحره 
او داست خيلهم صدره 
▪️▪️▪️▪️▪️
طاح او طيحه مو سهله 
او رد مهره يخبر اهله 
اجروحه غيرت شِكله 
من راسه لحد رجله 
احسين ابجسمه چم نبله 
▪️▪️▪️▪️▪️
طاح او ماكو اليسنده 
واتراب الارض لحده 
لا أخ لا إبن عنده 
صعبه اهوايه هالشِدّه 
للماي انفطر چبده 
▪️▪️▪️▪️▪️
طاح ابكثرة اجروحه 
يهمس بس طلع نوحه 
لخته عينه مشبوحه 
ضلت عينه مفتوحه 
صعدت للسمه روحه 
▪️▪️▪️▪️▪️
طاح او چم جرح صابه 
الظالم يرفس اصوابه 
گاموا سلبوا اثيابه 
تبقه الدمعه سچابه 
اه يحسين وامصابه 
▪️▪️▪️▪️▪️
ابو الحسن الوائلي

▪️▪️▪️▪️▪️
هالله هالله احسين وينه بالسيوف امگطعينه
▪️▪️▪️▪️▪️
طلعت الحوراء زينب حايره او تجري المدامع
شافت الميمون ملوي السرج والنسوه تباوع
يا مهر نادت انشدك گلي وين احسين واگع
يا مهر جاوب تنادي ابيا كتر طايح ولينه
▪️▪️▪️▪️▪️
مضطرب حال ابو اليمه والتعب بعيونه واضح
العطش ياوسفه تعده او بدل ابوجهه الملامح
سهم صابه ابوسط گلبه من وراه عالغبره طايح
عالارض من مهره هاوي والحجر صوب جبينه
▪️▪️▪️▪️▪️
طاح فوگ الگاع بارد هوه بس الگاع جمره
ابعيني شفته اشلون شفته يابسه واتريد گطره
اگبال عين اخته العقيله الشمر متعمد ينحره
هوه جالس فوگ اخوهه امن الگفه يگطع وتينه
▪️▪️▪️▪️▪️
هذا ابو السجاد مرمي عالتراب او دامي نحره
والخيول الاعوجيه طحنت ابعظمه او تكسره
وصل من جسمه ابرجلها عالارض صار تنثره
احسين هذا الخير هذا ليش عظمه امهشمينه
▪️▪️▪️▪️▪️
يبچي ابو الوجدان لجله والجماد او كلشي ينعه
عالوگع ناگع ابدمه او سيف چم ظالم يگطعه
ما كفاهم كل عملهم رجعوا او گطعوا اصبعه
ضاع خنصر والاصابع تسعه موجوده بادينه
▪️▪️▪️▪️▪️
انگطع راس احسين واعله گطعته كلشي تألم
والجسد عالگاع مرمي والصدر منه تهشم
بالافق دم ابو الاكبر والسماء اتحولت دم
جامد الدم ابلحيته ابرمح راسه رافعينه
▪️▪️▪️▪️▪️
احسين اه احسين مرمي والعده سلبوا ثيابه
يا صبر واحسين جسمه منطرح فوگ الترابه
كلشي ذاك اليوم يبچي عله ابو اليمه او مصابه
انگطع راسه او ونه باقي وابد ما يگطع ونينه
▪️▪️▪️▪️▪️
ابو الحسن الوائلي

أعظم الله أجر صاحب الزمان وأجوركم بذكرى استشهاد سيدنا ومولانا ابي عبد الله الحسين العطشان جعلنا الله وإياكم من الطابين بثأرهِ مع إمامٍ ظاهرٍ مهدي من أهل بيت محمّد ولا جعله الله آخر العهد مِنّا لخدمتهِ وللبُكاءِ عليهِ

▪️رسالة من العقيلة
▪️▪️▪️▪️▪️
وين الغيور اليرگه الْسبوگ
البدربه ابد ما واحد ايعوگ
ماريده يوگف يطرگ اطروگ
ايطر المدينه وجه الْشروگ
ايعلّي الصريخ ابثوب مفتوگ
وايصيح حيهم أهل الْحگوگ
للطف تِعنّوا او لحّگوا الحوگ
زحمه جِفنكم يبگه مطبوگ
شيخ العشيره صدره مسحوگ
او نسوانكم متيسره عالنوگ
ادري چلمتي اثگيله متلوگ
بس الغرب بضعونها اتسوگ
▪️▪️▪️▪️▪️
ابو الحسن الوائلي

▪️▪️▪️▪️▪️
خويه يعبّاس سبوني الارجاس
وانته عله الماي وانته عله الماي
▪️▪️▪️▪️▪️
خويه مشّوني عگب عزّي أسيره
وانته ما تفزعلي يا بدر العشيره
صار ماضي يالگمر اسم الأميره
ناگتي يحديها گام الماله غِيره

بيّه الوكت دار او چتّالك الصار
بضعوني حدّاي وانته عله الماي
▪️▪️▪️▪️▪️
امچتّفه خويه رحت والناگه هِزله
والدرب مجبوره ويّه اعداك اكمله
يسمعوني حچي روحي ما تحمله
اعليّه چلمة يا غريبه ماهي سهله

ابچلمات الانذال اندب يكفّال
شتجاوب ابهاي وانته عله الماي
▪️▪️▪️▪️▪️
گلبي چم لوعه يبو فاضل يصدها
سهم عينك يالگمر روحي مُردها
يا بعد زينب عفت زينب وحدها
بين عدوان او شماته كلها ضدها

ما بين الاجناب ما عندي أحباب
يا جرحي وادواي وانته عله الماي
▪️▪️▪️▪️▪️
أسمع اصوات العده وابگلبي ونّه
هايه اخته الما رحم بالطف زلمنه
ابيوم عاشر بالحرب عبّاس ذلنه
ابهضم اخته اليوم خل ننتقم منّه

بيّه يضربون خويه او يشتمون
ما ترحم اعداي وانته عله الماي
▪️▪️▪️▪️▪️
لو گضه هضم السبي ميهيد حزني
او بعد ضيم الشام هوّه الينتظرني
عگب ما وين ابو الغِيره الراح منّي
ابفرح واطبول العده تتلگّه ضعني

ابسوگ او دواوين ندخل نساوين
ما عدنه حمّاي وانته عله الماي
▪️▪️▪️▪️▪️
ابو الحسن الوائلي

▪️▪️▪️▪️▪️
تعال الحگ عله زينب يعبّاس
محتاره او سبيّه بين الارجاس
ما ترحم غريبه تدري بالناس
▪️▪️▪️▪️▪️
يعباس الأخوها انته عجيب الغربه يسبوها
او يگود النذل ناگتها او بلا هودج يخلّوها
حلفوا كِلهم ايهضمون گلبها او ما يرحموها
يضربوها عِناداً بيك او يم رمحك يشتموها

أسمعهم يغالي او دمعي همّال
وينه الگال زينب آنه كفّال
ما يفزع أخوچ الكلّه نوماس
▪️▪️▪️▪️▪️
عليّه ايأشّر او يرجع عله راسك يصد اردود
هذا البي كسرنه احسين من صبناه بالعامود
فلا يكفي سهم عينه او ولا كفّانه گطع ازنود
هذا الما رحم بِينه ابترويع اخته حگنه ايعود

عبّاس الخطف بالطف الارواح
اخته اويانه لتخلّوها ترتاح
تشتموها أريده يسمع الراس
▪️▪️▪️▪️▪️
انه الهاضمني يا عبّاس القبِل واحدهم اتخلسه
تشفّوا بيّه من ذبحوك او زلم صاروا عليّ هسّه
المنّك چان وجهه اصفر يبو فاضل رجع نفسه
يبره الضعني انته اللي چنت بچفوفك اتحرسه

عگبك بيّه وكتي يالأخو اندار
او چتّالك اليحدي بالضعن صار
هضمي اشكيلك او مخنوگه الانفاس
▪️▪️▪️▪️▪️
توجع چلمة الحدّاي اسمعتها او بيها قِهروني
آنا اختك يبو فاضل هديّه الگوم يردوني
حِچوها وآني من هضمي اباوعلك يشوفوني
عليّه انظرهم ايضحكون لمّن يجرن اعيوني

يا عبّاس هاي الوادم اتريد
خواتك يا نفل يهدوها ليزيد
بنت الشرف يم اللازم الكاس
▪️▪️▪️▪️▪️
هبّت كل عشيره ابزود اطلبت نسوانها ترجع
شرف نسوانهم عدهم او فِشل لو وحده تتلوّع
الما عدهن عشيره اشلون اگول الهن منو يفزع
عشيرتنه اعله راس ارماح واحدهم غِده امگطّع

تدري احچاية الشامت چبيره
بنات المرتضى ابلايه عشيره
حچيهم يصعب او يجرح بالاحساس
▪️▪️▪️▪️▪️             
اصد اعداك واحدهم الشتيمه والضرب نهجه
او مِن الفاگد الناموس غير الهضمه شترجّه
سبي من كربله اخذونه وانياگ الهزل عرجه
او بنات الزهره والكرار صارن للخلگ فرجه

كل نظره ابدليلي تترك اجراح
الما عدها زلم هيهات ترتاح
وابهذا الحزن يا حزن ينقاس
▪️▪️▪️▪️▪️
ابو الحسن الوائلي

▪️▪️▪️▪️▪️
زينب حچت حچيْ الثگيل
چنها علي حامي الدخيل
هاي اخت الگمر
▪️▪️▪️▪️▪️
قصرهم دخلِته
او صنمهم ذلّته
هوه الله منعِته ما يجرّه ابريته
يزيد اعليها صد
نسه روحه بعد
او تحيّر وارتعد ساكت امخلّيته
أَمام اخت الگمر
بلع ريجه ابحذر
گرب شاف الخطر راح تهجم بيته

محّد گدر بيها يعيل
چنها علي حامي الدخيل
هاي اخت الگمر
▪️▪️▪️▪️▪️
توقّع هالنذل
گِدر زينب يذل
لچن بنت الأصِل هانِته بافعالها
عليهْ ضاگ الفضه
حسبها المرتضى
آوانه وانگضه بُگه ابحيره اگبالها
عقيلة حيدره
مره مو أي مره
وقوره امخدّره سوّت اليحلالها

گام القصر بيهم يميل
چنها علي حامي الدخيل
هاي اخت الگمر
▪️▪️▪️▪️▪️
خِطاب اُم الخدر
رعب كل القصر
ابد ما تنگدر روح حيدر هايه
عله بنت الفحل
لگوه لاح الزعل
عگب چف الكِفل چفها شال الرايه
اُميّه اتلوّعت
اُميّه اتگبّعت
اُميّه اتضعضعت والعقيله اهوايه

عدها عزم ماله مثيل
چنها علي حامي الدخيل
هاي اخت الگمر
▪️▪️▪️▪️▪️
گطع درب السبي
الوقار الزينبي
أميره عالعبي بت علي ابممشاها
جمِع بيها انصدم
حقيقه مو وهم
عله الناگه علم الله هيبه انطاها
مشت من كربله
كأنها الزلزله
تقود القافله والاملاك اوياها

اگبال العقيله الكل ذليل
چنها علي حامي الدخيل
هاي اخت الگمر
▪️▪️▪️▪️▪️
ابو الحسن الوائلي

▪️▪️▪️▪️▪️
يا عباس يابو الفضل
يمشي وياي صار النذل
يحديني اليسوونه هلي
واعيونك مشبوحه الي
يا عبّاس يا عبّاس
▪️▪️▪️▪️▪️
يا گمر روحي الحبيب يا ضوايه
طحت بس حارس بقيت للسبايه
والله ما انذل محال ابعيده هايه
عالرمح راسك معاي يمشي رايه

ميّت بس بعدك كافلي
واعيونك مشبوحه الي
يا عبّاس يا عبّاس
▪️▪️▪️▪️▪️
للضعن عگبك يخوي آنه كافل
ما يمس واحد رذيل هالمحامل
عالضعن واحد يعيل ياهو گايل
كلها تخلس من اصيح يابو فاضل

بهالكلمه اعدانه تنولي
واعيونك مشبوحه الي
يا عبّاس يا عبّاس
▪️▪️▪️▪️▪️
آنه صح خويه انسبيت وادري تصعب
او عالهزل عگبك يحيف وحدي اركب
صعبه انگاد ابحِبال او تبقه الاصعب
اويه الغرب وابلا كفيل تمشي زينب

ايرافگني الظالم وابتلي
واعيونك مشبوحه الي
يا عبّاس يا عبّاس
▪️▪️▪️▪️▪️
يسهل الحر والطريق والمسيره
من احس تعبانه ليك راسي اديره
يبو الغيره الصعبه حيل والچبيره
يحمل الراس الثگيل الماله غيره

وامگابل راسك محملي
واعيونك مشبوحه الي
يا عبّاس يا عبّاس
▪️▪️▪️▪️▪️
زينبك يخسه اليگول انداس حدها
ابعزمي ذلّيت الجموع ابكل عددها
ادخل اقصور الطغاة او آنه گدها
السيف ابوها ذو الفِقار مِن يردها

لبوه آني بت حيدر علي
واعيونك مشبوحه الي
يا عبّاس يا عبّاس
▪️▪️▪️▪️▪️
ابو الحسن الوائلي

▪️▪️▪️▪️▪️
البارحه عفتچ أميره
اليوم عالناگه أسيره
يالحبيبه يالحبيبه
▪️▪️▪️▪️▪️
يا زينب
متت وآخر لحظه انتي ابّالي
يا زينب
مستحي والخجل منّي ايلالي
يا زينب
مختلف حالچ يبعد احوالي
يا زينب
حارسچ بالدرب راسي العالي

طول هالرحله الطويله
اوياچ راسي يالعقيله
يالحبيبه يالحبيبه
▪️▪️▪️▪️▪️
عذريني
رايد اجروحي الچ احچيها
عذريني
عيني يحبيبه السهم عاميها
عذريني
بعد ما خلّوني اشوفچ بيها
عذريني
الچنت اشبگچ بيهن امگطعيها

اسهام اميّه رشگه نزلت
عله صدري امچانچ اخذت
يالحبيبه يالحبيبه
▪️▪️▪️▪️▪️
يحبيبه
يوم امس چان الخدر بحمايه
يحبيبه
مختلف حالچ اليوم اهوايه
يحبيبه
لون ما طاحت امن ايدي الرايه
يحبيبه
ويّ غرب تمشين ماضِن هايه

لون ما طاحت اديّه
يا ردي ايگودچ سبيّه
يالحبيبه يالحبيبه
▪️▪️▪️▪️▪️
بوداعچ
عفت روحي بالخيم موجوعه
بوداعچ
ناظري ما گِطع مجره ادموعه
بوداعچ
غِدت چلمات الدمع مسموعه
بوداعچ
ابّالي ضلّت صورتچ مطبوعه

بيد ابو اليمّه اعتذاري
أرسلت وابگلبي ناري
يالحبيبه يالحبيبه
▪️▪️▪️▪️▪️
ابكل لحظه
چنت آنه كافلِچ يالحرّه
ابكل لحظه
هسه انتي الكافله بالمسره
ابكل لحظه
دمعتچ يا خيتي هلّت حمره
ابكل لحظه
اعليّه واعله المنّه گطعوا نحره

الجفن ما يگطع دموعه
عله الطحنوها ضلوعه
يالحبيبه يالحبيبه
▪️▪️▪️▪️▪️
تلگيني
طول ما هالرحله تبقه اطويله
تلگيني
راسي من الرمح يحمي العيله
تلگيني
عيني عالنسوه تضل كل ليله
تلگيني
يعتدي اعليكم شخص يا ويله

يلگه بس الموت مهرب
الراد من علويّه يگرب
يالحبيبه يالحبيبه
▪️▪️▪️▪️▪️
ابو الحسن الوائلي

▪️ورد في بعض الأخبار أنّ المغسّلة عندما كانت تغسّل جسد السيّدة رقيّة عليها السلام ، تركت التغسيل فجأة وتساءلت قائلة : من هو كبير هؤلاء الأسرى؟ فأجابتها السيّدة زينب وقالت : ماذا تريدين؟ قالت المغسّلة : ماذا كان مرض هذه الطفلة حتّى أصبح جسدها هكذا؟ فأجابتها العقيلة عليها السلام : إنّ الطفلة لم تكن مريضة أنّها آثار السياط ، وطعنات كعب الرماح

▪️نعي:

ماهِي مريضَه الطفله لنها
من الضرب ازرگ متنها
ابسوطه الشمِر ورّم بدنها
ايروح او يرد ايطگ جفِنها
كل رحمه روحه ماكو منها
يضحك واهي تبچي ابحزنها

وفي خبر أن المُغسِّلة أول ما رأت العقيلة عليها السلام سألتها :أليس لهذه الطفلة أبْ !؟
أجابَت زينب ع

لو يمها والِدها اْو حضرها
محّد دناهه او لا سطرها
فارگها واِزغيره اِبعمُرها
او زيّد عله اِبنيته قهرها

راح الابُو منها تنظره
او مِن غيبِته الهسّه تنطره
ما تدرِي ابوها اِنگطع نحره
والخيل داست فوگ صدره
▪️▪️▪️▪️▪️

▪️▪️▪️▪️▪️
دخيلك يمولاي دخيلك يمولاي
▪️▪️▪️▪️▪️
يالحسن لو بالطفوف چنت متواجد
واعله هاشم والانصار تصير القائد
ويّه عباس والحسين نشوفك واحد
ضربة السيف يمولاي تطيْح الشارد

لمّن اتدخلوها الملحمه اتگلبوها
وابد متأخروها بالعجل تنهوها
دخيلك يمولاي دخيلك يمولاي
▪️▪️▪️▪️▪️
جيشك ابزود يمهيوب بديك اتوزعه
وكت الزماط اذا صار يلاگي الفزعه
مرتهي ايفوت بالآلاف يضَيگ الوسعه
اشمال وايمين اله اتصير بهيّه الطلعه

جيشك امحامينك طايع الچفّينك
الرايه تنظر عينك ترف بيد احسينك
دخيلك يمولاي دخيلك يمولاي
▪️▪️▪️▪️▪️
تنطي إيعاز للاخوان تفض الكُربه
چف الابطال والاسباع يحل الصعبه
يطب عباس والحسين بديهم جربه
خاطر الماي يجيبوه العيال اتشربه

العلگمي ايدخلونه سهله وايملكونه
غصباً ايجيبونه الزينب المصيونه
دخيلك يمولاي دخيلك يمولاي
▪️▪️▪️▪️▪️
ابعينك اتشوف بالطفوف هجوم القاسم
بيده لو فات عله الجيش يلوح الصارم
يدخل ابزود علي اهناك عليهم هاجم
اليوصله ايموت وعد راح ميبقه سالم

القاسم ابّتاره ايسوّي بالطف غاره
ايشبهم ابإصراره اعليهم اتهب ناره
دخيلك يمولاي دخيلك يمولاي
▪️▪️▪️▪️▪️
ابو الحسن الوائلي

▪️▪️▪️▪️▪️
يا مولاي دخيلك يا مولاي
▪️▪️▪️▪️▪️
يالحسن يا ثاني أصحاب الكسه
العندي اغله امن الهوه الأتنفّسه
يم حضرتك مركب افكاري رسه
بلچي تحسبني الك خادم عسه

كل رجواي رضاتك كل رجواي
يا مولاي دخيلك يا مولاي
▪️▪️▪️▪️▪️
سيّدي ويّاك أحچي ابمستحاي
وردي ذابل فدوتك تسگيه ماي
حضرِتك عِلّة وجود الدنيه هاي
آنه گدّامك عدم وانته لـ اهواي

اچبير اهواي إمامي اچبير اهواي
يا مولاي دخيلك يا مولاي
▪️▪️▪️▪️▪️
انته يا سيّد مضيف الله الچبير
اوياك لو قسته تره العالم زغير
حگي يا مولاي باوصافك أحير
يا إمامي ابعيني اباوعلك ضمير

انته افياي اليّه انته افياي
يا مولاي دخيلك يا مولاي
▪️▪️▪️▪️▪️
امن العلي لهاي البشر رحمه انهديت
او مثل حيدر خيمه للفقره صفيت
عنّك اشما تعّبت فكري او حچيت
اگبال بختك ما يعادل شطر بيت

كل الراي أعرفك كل الراي
يا مولاي دخيلك يا مولاي
▪️▪️▪️▪️▪️
ابطبگ اجفانك يبن خير الوره
أصبح الإسلام شمسه امكوّره
كلشي يتنفّس دمع عينه جره
او رادت ابواهس تصير الآخره

الدنيه هاي اكسرتها الدنيه هاي
يا مولاي دخيلك يا مولاي
▪️▪️▪️▪️▪️
ابو الحسن الوائلي

▪️ثمّ قام الإمام الحسين عليه السلام بتغسيله وتكفينه كما أوصاه الإمام الحسن عليه السلام , وصلّى عليه, وحملوه على سرير متّجهين
به إلى مثواه الأخير قرب جدّه رسول الله صلى الله عليه وآله وسلم , لكنّ القوم وفيهم مروان بن الحكم وبنو أميّة, حملوا السلاح وتجمّعوا ومنعوا الإمام من أن يدفن إلى جوار جدّه..
ثمّ، عظّم الله لكم الأجر، رُميتْ جنازة الإمام بالنبال, قال الراوي: حتّى سُلَّ منها سبعون سهماً..
وكادت الفتنة أن تقع بين بني هاشم وبني أميّة, فقال الحسين عليه السلام: والله لولا عهد الحسن إليّ بحقن الدماء, وأن لا أريق في أمره محجمة دم, لعلمتم كيف تأخذُ سيوفُ الله منكم مأخذها!
فمضوا بالجنازة إلى البقيع ودفنوه بجوار قبر جدّته فاطمة بنت أسد رضوان الله عليها.

▪️نعي:

من مات الحسن يم جدّه شالوه
وام الجمل عرضت لليشيعوه
عليها اللعنه انطت أمُر نفذوه
يم جدّه الحسن لا ما يدفنوه
گلبها ما تشفّه او حين ردّوه
جسمه بالسهام آمرت يرموه
▪️▪️▪️▪️▪️

▪️▪️▪️▪️▪️
اجيت ابلوعة آلامي
سبيّه والتقي ابضامي
يخويه احسين
▪️▪️▪️▪️▪️
اجيتك والنسه يحسين اجت ويّاي
التعب تارسنه والهضمه چبيره هواي
گمت ماشوف من گد ما بچت عيناي
انه عطشانه روحي وانته گبرك ماي

ابكثُر ما روحي مشتاگه
اشمرت روحي مِنْ الناگه
يخويه احسين
▪️▪️▪️▪️▪️
اجيت اموحدبه واشكبره بيّه الشوگ
او لهسّه گلبي من يوم الذبح محروگ
خذوني اميسّره وامچتّفه اعله النوگ
او بِينه الناس كلها اتشمّتت بالسوگ

اليجي او رايح يباوعني
واحس كل نظره تذبحني
يخويه احسين
▪️▪️▪️▪️▪️
متعوبه وصلتك طاقتي امخلصه
او شسولفك عله يا هضمه يا غصّه
خلص حيلي او بعد ما خلصت القصّه
ابفگد ولياني شافوها انهضم فرصه

ابحچيهم روحي مجروحه
السبيّه اخوتها مذبوحه
يخويه احسين
▪️▪️▪️▪️▪️
عله امصابك يهل ما ينشف المدمع
يخويه او گلبي مثلك صاير امگطّع
اريد اشبع بچي يم گبرك او أجزع
لحد ما روحي يمّك بالحزن تطلع

شسوّي ابروحي وابعيني
او دفنوا عِشرة اسنيني
يخويه احسين
▪️▪️▪️▪️▪️
الدارك راح ارد وانعاك واتذكرك
والموتي اضل ابچي الگطع نحرك
واريد آخذ الي اترابات من گبرك
بيهن بدل ماشوفك أشِم عطرك

لحد آخر نفس بيّه
انوحك وانعه يوميّه
يخويه احسين
▪️▪️▪️▪️▪️
ابو الحسن الوائلي

▪️▪️▪️▪️▪️
صلاة الوحشه عالمختار گومي انصلّي يالزهره
▪️▪️▪️▪️▪️
گومي يالبتول اوياي الليله الدمعه نجريها
او صلاة الوحشه عالمختار يا فاطم نصلّيها
هسّه امن الدفن رديت روحي الفاجعه بيها
وسّدته عزيز الروح المسموم انختم عمره
▪️▪️▪️▪️▪️
طول العِشره ما فد يوم زعّلني بفرِد كلمه
چانت خوّتِي ويّاه ليل او عشرِته ابنجمه
صعبه من اگول الله يرحمك يا نبي الرحمه
ربعه بالقتل جازوه ركضوا كلهم الغدره
▪️▪️▪️▪️▪️
كلشي منفجع بالگاع او حزنانه السمه هاليوم
من سمعوا رسول الدين ميّت منغدر مسموم
لفراگه جريح الكون او دمعاته تسيل ادموم
واعاين عله الريح الهاب وگف چي خنگته العبره
▪️▪️▪️▪️▪️
طمّيت الوفه والطيب والحنيّه بالتربان
عرش الباري متحسّر وابموت النبي حزنان
اي يالزهره آنه اوياچ فارگنه اعز انسان
بغيابه المصايب راح تتلگّيهن ابكثره
▪️▪️▪️▪️▪️
يم گبره انرسم صدّيت يا فاطم هجوم الباب
وانظر هامتِي ابرمضان ينزف دمها بالمحراب
واوليدي الحسن مسموم چبده اتصوّريته او ذاب
او شفت ابعيني ذبح احسين يالزهره او سبي الحرّه
▪️▪️▪️▪️▪️
ابو الحسن الوائلي

▪️▪️▪️▪️▪️
شكراً الك  انحچت بعد المنيّه
انرَد الفضِل  ابكسُر ضلع الزچيّه
اي يا محمد  جزائك انرد  ابكسُر ضلع الزچيّه
▪️▪️▪️▪️▪️
من غمض جفنك يبو الزهره يطه
الصحبه يالمختار باعت مستحاها
جثّتك محد وصل ليها او اجاها
يالنبي چان الحكم كل مبتغاها

كلهم جهل  بشر بلايه غيره
ضدك صفوا  يسيّدي چبيره
والشفته منهم  ناتج غدرهم  ابكسُر ضلع الزچيّه
▪️▪️▪️▪️▪️
بعده بالمغتسل جسمك يا وسافه
وانّكر فضلك يبو الزهره ابصلافه
اتجمّعوا جوّه السقيفه ابلا مخافه
الغايه چانت واضحه هيّه الخلافه

لا مو مهم  الجنازه ايشيّعوها
عدهم أهم الخلافه ياخِذوها
جثتك غريبه  اي والمصيبه  ابكسُر ضلع الزچيّه
▪️▪️▪️▪️▪️
من اخيّك وسّدك وابگلبه ضيمه
وحده ربعك عافِته ابهاي الهضيمه
حاكم اختاروا عله الامّه البهيمه
روحه واحدهم امن الغيره عديمه

كلّه بغض  الجِمعهم بالسقيفه
زرع حقد  عله العتره الشريفه
ما مثله حاقد  انجازه واحد  ابكسُر ضلع الزچيّه
▪️▪️▪️▪️▪️
ربعك اعله الدار اجت يالهادي كِلها
او عله الزهره دفعوا الباب ابثگلها
خلفه عصروها او سگط منها حمِلها
وابحبل صبره بُگه امگيّد بعلها

ابرجله النذل  رفس بطن الوديعه
واتألّمت  عگب هاي الفجيعه
للزهره جرحوا  واهوايه فرحوا  ابكسُر ضلع الزچيّه
▪️▪️▪️▪️▪️
الگال تهجر روحه متروسه حقاره
وإن عالزهره حچاها ابكل جساره
ما رِعه البيت او هِتك حرمة وقاره
او عله الباب ابلا تردّد وجهه ناره

يا سيّدي  وصيتك خالِفوها
ذاك الجمِع  حرمتك ما رعوها
اذّوها روحك  زادوا جروحك  ابكسُر ضلع الزچيّه
▪️▪️▪️▪️▪️
من متت نكروا كتاب الله ابقناعه
رجعوا ايعبودن الاصنام الجماعه
نِكر واحدهم او ماي الگصّه باعه
صعبه تتعدل تره العوجه طباعه

جبت العمر  تريد الهم هِدايه
بس البعض  تريد الكرسي غايه
يالهادي فضلك  كلّه رجعلك  ابكسُر ضلع الزچيّه
▪️▪️▪️▪️▪️
ابو الحسن الوائلي

▪️▪️▪️▪️▪️
حاضره الليله الزهراء  او تحديداً ابسامرّه 
عاشر ولد وا ويلاه  مات او اجتّي اتحضره
▪️▪️▪️▪️▪️
الزچيّه فاطمه بهاليوم
السامرّه اعتنت بهموم
ابنها اللي گضه مسموم  حاضرته

اجت بضلوع محنيّه
الليله عدها تعزيّه
غده عاشر ابن هيّه  فاگدته

كون احنه بدموع العين  انشارِك عزاء الزهره
عاشر ولد وا ويلاه  مات او اجتّي اتحضره
▪️▪️▪️▪️▪️
يجمر الزهره ما يبرد
گلبها اعله الأسه اتعوّد
مصاب العسكري زيّد  لوعتها

اجتّه وابحزن ناحت
المصيبه ابعينها لاحت
آ يبني ابقهر صاحت  ابصرختها

وام الحسن ما تنلام  لنها غدت متغيره
عاشر ولد وا ويلاه  مات او اجتّي اتحضره
▪️▪️▪️▪️▪️
انحِنت يَمّه تنادي ابصوت
وسف يوليدي يالمبخوت
ابشبابك واعتناك الموت  بآلامه

النوايح هيّه من علّت
الملائك باچيه نزلت
عله ونها تون ضلّت  محتامه

أرض او سمه مفجوعات  حُزناً ابهاي الذكره
عاشر ولد وا ويلاه  مات او اجتّي اتحضره
▪️▪️▪️▪️▪️
البتول الله يساعدها
هالدنيه صفت ضدها
من افراگ والدها  مجروحه

شافت چم حزن واصواب
الضلع منها انكسر بالباب
گلبها بهالمصايب ذاب  من نوحه

صُبّت عليها الآلام  خلّت حزنها اشكبره
عاشر ولد وا ويلاه  مات او اجتّي اتحضره
▪️▪️▪️▪️▪️
المواجع كلها عاشتها
ابولِدها الدنيه فجعتها
ابد ما تخفه حسرتها  والمِحنه

من هام الذي اتصوّب
لحّد العسكري تنحب
غده منها الدمع ينصب  عالوجنه

عاشت مصايب واحزان  تچويها مثل الجمره
عاشر ولد وا ويلاه  مات او اجتّي اتحضره
▪️▪️▪️▪️▪️
تضل الزهره مهمومه
مشت من ليلها انجومه
تتاني ابن الحسن يومه  من يبدي

اويه اُمّه فاطمه انگلّه
تراها الغيبه مو سهله
يمته رايِتك تعله  يا مهدي

ليل الفرج صار اطويل  چا يمته يطلع فجره
عاشر ولد وا ويلاه  مات او اجتّي اتحضره
▪️▪️▪️▪️▪️
ابو الحسن الوائلي

▪️▪️▪️▪️▪️
ثارات جاهليّه
بچفوف ناصبيّه
تنرد بالزچيّه
بالزچيّه
▪️▪️▪️▪️▪️
ما ناشِف اتراب النبي
او جمّع زمُرته الناصبي او أُمرها
ايگصدون يم دار الوحي
راد الديانه تنمحي واثرها
رادوه عالزهره يحِن
ما هَمّه گاللهُم وإن او عصرها
كسّر ضلوع الطاهره
او طيّح المحسن عالثره او سطرها

مكتول طاح ابنها
ملعون طگ متنها
مسموع باقي ونها
كل مسيّه
▪️▪️▪️▪️▪️
غزوة بدر يابو الحسن
طبّيتها او روس الفتن دسِتها
اليوگف اگبالك مرتهي
ابضربة يمينك ينتهي اثبتتها
منّك بدر متراجِفه
او مِن طاري اسمك خايفه اتركتها
من رِجعت ابهذا الوضع
متعجّبه ابكسْر الضلع شفتها

ايهجمون عالصميده
ليفور دم وريده
ما شال سيفه بيده
امن الوصيّه
▪️▪️▪️▪️▪️
ابوقعة أُحد يالمُرتضه
ادموم العِده متفايضه عله البر
موش الجبل لا يا نفِل
انته جِبلها بالأصِل يحيدر
والمصطفه اشگد يالولي
أدركني ناده يا علي منْ الشّر
يابو الحموله والصعب
خدها زوجتك ينضرب غده احمر

يا حيف الزهره تنطگ
واتبات ابمتن ازرگ
نسمات گوّه تشهگ
امن الاذيّه
▪️▪️▪️▪️▪️
ابحرب الاحزاب اتقدّمت
انته او كفُرهم دمّرت سحگته
عمرو ابن وِد ابكل فخر
اتعادل عبادة كل بشر قَتِلته
اهناك الذي شفته خِتل
يم بابك اتحوّل بطل ابوگفته
ياللي دست راس الكفُر
ينولد ابنك منعصر ابوگعته

معذور عالي ونّك
معصور ميّت ابنك
لله تشكي حزنك
بهالرزيّه
▪️▪️▪️▪️▪️
ابخيبر الك صيت انحسب
يا علي او هيهات انكتب مثيله
حارث او مرحب ساحِگه
والروس كلها امدنّگه ذليله
ها يالشلت باب الحصن
تعجز نعشها اعله المتن تشيله
وسفه يحمّاي الحمه
بالرغم ماتت فاطمه نحيله

مهدوم من شلتها
ابلا روح شيّعتها
التهواك وسّدتها
بالوطيّه
▪️▪️▪️▪️▪️
ابخُم النبي الهادي اجتمع
شال ايدك او صوته ارتفع رساله
گلهم علي بعدي الولي
هذا الأمُر من العلي تعاله
بيّن حقدهم وانكشف
قِتلوا نبيهم للأسف حثاله
او زهرِتك گطعوها اجوا
المحسن رضيع او قرّروا اغتياله

لعنات عالسقيفه
لَم ناس مو شريفه
ارواح مو نظيفه
هيّه هيّه
▪️▪️▪️▪️▪️
ابو الحسن الوائلي