▪️▪️▪️▪️▪️
اتمنّيت ويّاك روحي ابكربله تطلع
اتمنّيت قبلك يخويه جسمي يتگطّع
جسمي بالطف ايتوذّر
مثل ابو فاضل والاكبر اتمنّيت
▪️▪️▪️▪️▪️
يا خويه
طلعت روحي ريت ابكربله يمّك
يا خويه
أنه دم منحري يجري قبل دمّك
يا خويه
او ترض الخيل جسمي من قبل جسمك

لو اطيح عليك اسلّم بآخر انفاسي
لو اطيح بسيوف اميّه ينگطع راسي
واستغيث او يمّي تحضر
مثل ابو فاضل والاكبر اتمنّيت
▪️▪️▪️▪️▪️
بدموعي
اتوادع ويّه ولدي والدمع يجري
بدموعي
أحضنهم قبل ما ينگطع نحري
بدموعي
أمشي امن الخِيام او بالممات أدري

يحسين بالطف انه موتي چنت رايد
يحسين يم راسي اشوفك بالأجل گاعد
اعليّه تبچي ابدمع أحمر
مثل ابو فاضل والاكبر اتمنّيت
▪️▪️▪️▪️▪️
يحسيني
ابمماتي ريته صار البيّه ما صاير
يحسيني
انگطع راسي لچن ما داسني الحافر
يحسيني
كلامي ازغير يم امصيبة العاشر

بالكون ماكو مثلها لوعِتك لوعه
بالكون ياهو انذبح وانطحنت اضلوعه
بالبُگيت اثلاثه بالحر
مثل ابو فاضل والاكبر اتمنّيت
▪️▪️▪️▪️▪️
يا جرحي
متت بالكوفه وحدي والخلگ غربه
يا جرحي
او وكت الموت جسمي محّد ابگربه
يا جرحي
غربتي اَكثر عليّه امن الأجل صعبه

آلام الغربه ثگيله او زيّدت كسري
آلام ما يمّي واحد يوگف ابظهري
انگطع راسي ابقبضة الشر
مثل ابو فاضل والاكبر اتمنّيت
▪️▪️▪️▪️▪️
ابو الحسن الوائلي

▪️▪️▪️▪️▪️
زلم المنايه  يا حُسين
انضل للنهايه  يا حُسين
يا أبا عبد الله
▪️▪️▪️▪️▪️
يبو السجاد اسمع صوت الانصار
نضل للموت يمّك يبن الاطهار
قسم لا ما تضل يحسين محتار
فقط أشّر او تسمع كلمة الصار

ياهو اليمرّك  يا حُسين
واحنه لبظهرك  يا حُسين
يا أبا عبد الله
▪️▪️▪️▪️▪️
اذا سوح الحرايب تطلب ادموم
نضحّي او ما نبالي بالذي ايلوم
نسُر گلبك يضنوة فاطمه اليوم
درع شدّينه لگلوب اعله لهدوم

اوياك المنيّه  يا حُسين
تصبح هنيّه  يا حُسين
يا أبا عبد الله
▪️▪️▪️▪️▪️
نضحّي الروح لجلك مستعدّين
مثيلك نلگه يبن المرتضى وين
أكيده من ننصرك ننصُر الدين
لون عفناك شنگل لله يحسين

الحق نشوفك  يا حُسين
لا ما نعوفك  يا حُسين
يا أبا عبد الله
▪️▪️▪️▪️▪️
يموت الينوي يگرب جايب آلام
إمامي او هاي يمّك كل الازلام
نصير ادروع الك نتلگّه لسهام
عله اضلال المخيّم نوگف اخيام

اليگرب ننظره  يا حُسين
نگطعله نحره  يا حُسين
يا أبا عبد الله
▪️▪️▪️▪️▪️
نحيد اشلون عنّك يبن الاطياب
فضِل سمّيت ربعك أفضل اصحاب
اعله گلبك حاشه واحد يدفع الباب
نخلّي ما يمر بيك الهوه الهاب

جرّبنه كلنه  يا حُسين
عد عينك احنه  يا حُسين
يا أبا عبد الله
▪️▪️▪️▪️▪️
يبو الأكبر فعِلنه ابناظرِك شوف
نعجّب كلشي بينه ابگاع لطفوف
اللسن تسكت لونها تحچي لسيوف
وحگك والعده انعيّشهم ابخوف

الوفّايه يمكم  يا حُسين
محّد يصلكم  يا حُسين
يا أبا عبد الله
▪️▪️▪️▪️▪️
ابو الحسن الوائلي

▪️▪️▪️▪️▪️
يچفوف الكفاله الأصيله
من طحتن سبوها العقيله
ضلّت حايره  ضلّت حايره
▪️▪️▪️▪️▪️
ابعث سلامي يا چفوف الكفّال
ابّالي إجيتن والدمع بالخد سال
لا ولله هيهات الوفه راح او زال
متلازم لهذا الوكت بيچن ضال

بارض الطف بقيتن علامه
للغيره لحد القيامه
حد الآخره  حد الآخره 
▪️▪️▪️▪️▪️
تبقه عليچن جاريه ادموع العين
ياللي وفيتن بالعهد ويّه احسين
ضلّيتن ابطف كربله لهذا الحين
نلتن قدر عالي او شرف يا چفّين

حصّلتن مكانه رفيعه
ذلّيتي العده والشريعه
ابزود او مقدِره  ابزود او مقدِره
▪️▪️▪️▪️▪️
صد الگمر لاطفاله عطشانه اهواي
صاحوا يعم انريد شِربه امن الماي
گال الّه أملي الجود وآنه السگاي
لو أعرف اتطيح اليمين او يسراي

بالرايه تعنّه او جربته
الشاطي ايجيبه الهم رغِبته
راعي المفخره  راعي المفخره
▪️▪️▪️▪️▪️
هيهات اكو كلمه التوصّف هيهات
ياللي الخدر زينب حرس مذخورات
امن المرتضى اتوصّيتن ابيوم المات
ضعن الستر تحمنّه كل الأوقات

حيدر وصّه عگبه ابمكانه
زينب عند اخوها أمانه
تبقه امقدّره  تبقه امقّدره
▪️▪️▪️▪️▪️
من طحتي يچفوف الشرف عالتربان
زينب عليها اهناكَه هجمت عدوان
او حرگوها عالنسوه الخيم بالنيران
شافت حزن بچّه الحجر والوجدان

صاحت وين اخويه او چفوفه
ريت ابعينه حالي يشوفه
وحدي حايره  وحدي حايره
▪️▪️▪️▪️▪️
يوم القيامه فاطمه بين الناس
توگف او بيديها چفوف العباس
بالمحشر اتنادي ابدمع وبأحساس
يارب اخذ ثار ابني من الأرجاس

ما تذكر مصيبة ضلعها
تطلب بالچفوف او گطِعها
اهناك الطاهره  اهناك الطاهره
▪️▪️▪️▪️▪️
ابو الحسن الوائلي

▪️▪️▪️▪️▪️
يا سيّد الماي
بفراگك هواي
لچمتني دنياي يعباس
▪️▪️▪️▪️▪️
اسمعت صوتك صحت أدركني يحسيني
و اجاني الشيب واستوله عله اسنيني
اشبعدها المشرعه صارت وسط عيني
وحگ ضلع امّي فگدك خويه ماذيني

ما تحمل الروح
تنظرلك اتروح
كل حيلي مذبوح يعباس
▪️▪️▪️▪️▪️
اجيت ابلهفه ليك او منشده بالي
احس من القلق مات النفس مالي
اذا انته متت يعني اشتضِن حالي
ابغربتي خويه يفرح حيل چتّالي

هالناس شمّات
اتگلّي الگمر مات
وابگلبي ونّات يعباس
▪️▪️▪️▪️▪️
عله احسينك صفه هذا الهوه حسره
او قبل لتطيح اخيّك مات چم مرّه
شلتها اچفوفك الطاحت عله الغبره
اشبگتهن شبگة الكسروا باخوه ظهره

مگطوع چفّين
والسهم بالعين
اشسوّيت بحسين يعباس
▪️▪️▪️▪️▪️
ابصوتك چانت اُمنيتي استمِع إسمي
سمعته مرّه وحده من طحت مرمي
انه او شيباتي اجيتك اركض ابهمّي
طحت بجروحي يمّك والدمع يهمي

يا شايل الجود
ماضنّك اتعود
لعضيدك اردود يعباس
▪️▪️▪️▪️▪️
الك محتاج توگف يمي مو تدري
ابد ما عندي غيرك يا بعد عمري
من روحك شفتها طلعت ابحجري
صحت عباس آلان انكسر ظهري

ارد امشي ويّاك
شيحمله فرگاك
من حگّي أنعاك يعباس
▪️▪️▪️▪️▪️
الحرم من ارجعلها الساني شيگلها
او يعين الله العقيله ابموت كافلها
هاي الماكو واحد عاين الضِلها
الغربه ابطيحتك عباس توصلها

عگبك عله النوگ
ابزينب عِده اتسوگ
ايوگفوها بالسوگ يعباس
▪️▪️▪️▪️▪️
ابو الحسن الوائلي

▪️▪️▪️▪️▪️
عمي يحسين يمن كلشي تسوه
يا ضوه العين الك روحي فدوه
هلا ابموتي لو وصل
الموت أحله امن العسل عمّي يحسين
▪️▪️▪️▪️▪️
القاسم ابن الحسن آنه سيّدي يبن الطهر
الهذا يومك يا إمامي والدي ضمني ذخُر

لزم ذرعاني
ابقهر وصّاني
الي حاچاني يگول
يفرحة امّك
تضل ويّ عمّك
تضحّي ابدمّك يگول

صيح عالموت هلا بإبتسامه
يبني ماريد تضل ابسلامه
ابسيف سطّرها الجُمل
الموت أحله امن العسل عمّي يحسين
▪️▪️▪️▪️▪️
مجْد ابويه الحسن بالطف راح اكرّر من اطُب
او كون اگُر عينك او عينه لمّن ادخلها الحرُب

انه تربيته
انفْذ اوصيته
وعد كل صِيته أعيد
منو اليدنالي
ابد ما بالي
ثبات الغالي أعيد

راح اكرّر يعم الملاحم
والعده اتصيح منو هذا هاجم
الحسن لو خير العمل
الموت أحله امن العسل عمّي يحسين
▪️▪️▪️▪️▪️
عمّي بالطف راح اخلّي تركع السيفي النصول
راح اصول او كون اذكرك بالحسن لمّن يصول

ابوجه بتّاري
تشوف اصراري
اضوّگ ناري العِده
عليّ ما تگدر
تضل تتحذّر
تصدني حيدر العِده

عمّي خلّه اعتمادك عليّه
راح اذلّ العده ابچف اديّه
ابراحه هيّه ما تضل
الموت أحله امن العسل عمّي يحسين
▪️▪️▪️▪️▪️
ما أمِد للذِلّه ايدي او لجل هالدين انچتل
اگُص رجله اليدنه يمّك وآنه يا عمّي عدل

اجرّد سيفي
يحل تكليفي
يصير ابكيفي القرار
او عليّه القابل
يحسني الكافل
الي بالحاصل القرار

بالتساوي مثل جدّي اشطر
مثل ابويه ابجثثهم اطشّر
وآنه عندي ابلا جدل
الموت أحله امن العسل عمّي يحسين
▪️▪️▪️▪️▪️
ما يهمني لجل عينك لون بالحومه اطيح
الشاغلتلي بالي امّي شلون ارد ليها ذبيح

اصيح ابونّي
يعمّ ادركني
تجي تشبگني تنوح
يعم يا محله
المنيّه سهله
الصعب من رمله تنوح

شايِليني تصد ابهضمها
امگطّعينه تعاين حلِمها
هاي أقسه امن الأجل
الموت أحله امن العسل عمّي يحسين
▪️▪️▪️▪️▪️
ابو الحسن الوائلي

▪️▪️▪️▪️▪️
فگدك صار چتّالي يبني يغالي
من شوفِتك حرموني وابذبحِتك فجعوني
يالفرگاك شَل حالي يبني يغالي
▪️▪️▪️▪️▪️
جسّام يغله امن الهوه يا ثمر تعب اسنيني
كلها العشِتها
يبني سند ردتك الي ابحگ الرِبه اتوافيني
هاي الردتها
ما حسّبت بيك انفجع وانعاك يا ضيّ عيني
روحي اهضمتها

راح اوياك كل حيلي يا گمر ليلي
اشحال امّك ابلوعتها ما تنوصف كسرتها
بس النوح يحلالي يبني يغالي
▪️▪️▪️▪️▪️
يا ورده چنت ابكل وكت أنتعش من اشتمّك
واتردلي روحي
ابعيني عساني لا شفت بالطف يغسلك دمّك
هيّجت نوحي
گد ما جروح ابجثّتك حارت اديّه اتضمّك
ابحزني او جروحي

دمع العين ضل هامي او زادت آلامي
اعيونك اباوع ليها سيل الدمه امغطّيها
او دمع العين ضل هالي يبني يغالي
▪️▪️▪️▪️▪️
عرّيس اشوفك حسّبت وابفرحك اتفرّحني
ازفافك احضره
او چف ايدك ابحنّة فرح مو بالدمه متحنّي
اتمنّيت انظره
فد يوم ابد ما حسّبت مذبوح اشوفك يبني
او گلبي تفُطره

ما أرتاح خلّاني آ يا زماني
راد انفجع يوليدي جار او خذاك امن ايدي
او خيّب بيك آمالي يبني يغالي
▪️▪️▪️▪️▪️
تتحمّل الأُم كل وجع بس فگد ابنها ايفتها
ايزيّد ابونها
الله يعين الفاجِده شنهو اليصف لوعتها
المذبوح ابنها
واعله الولد لآخر نِفس ما تنجبُر كسرتها
او تُبگه ابحزنها

اشتسوه الروح من دونك ابغيبة اعيونك
شفت الدموم اخضابك آ يالولد و اصوابك
مارِد صار دلّالي يبني يغالي
▪️▪️▪️▪️▪️
چانت ابّالي لو متت جسمي بديك اتشيعه
يبني الحفرتي
تنعه اعله گبري ابحسرِتك واتهلها دم الدمعه
ابليلة وحشتي
بس الوكت دار او گمت آنه اعله جثتك أنعه
آ يا كسرتي

يالهدّيت كل عزمي او بدّلت رسمي
اضلوعي غدت محنيّه بس النِفس ضل بيّه
أبچي اعليك للتالي يبني يغالي
▪️▪️▪️▪️▪️
ابو الحسن الوائلي

▪️▪️▪️▪️▪️
الحگلي بويه حيدر امگطّع اوليدي الاكبر
أكبر اولادي شفته أوصال صارت جثته
امگطّع اوليدي الاكبر
▪️▪️▪️▪️▪️
خُلقاً وأخلاقاً علي يشبه محمّد انظُر
حين الإجيت المصرعه شفته وذر متوذّر
عالثره اوياه اتمدّدت حگّي أوِن ما أصبُر
والدمع لفراگه غِده مثل السحايب يمطر

صرت اندب ابنحيبي يوليدي يا حبيبي
گوّه گدرت اضُمّه هوايه جروح ابجسمه
امگطّع اوليدي الاكبر
▪️▪️▪️▪️▪️
ناداني أدركني أبي امن الخيم فازع جيته
وابحسرتي ابذاك الركض يتماسك اتمنّيته
يتناثر اغبار او دمه او شفت العِده والِيته
والفاجعه من اوصلت متگطّع ابني الگيته

گوّه عرفته ابني والمنظر اللچمني
طوله الحلو أناظر من حصّة البواتر
امگطّع اوليدي الاكبر
▪️▪️▪️▪️▪️
گلبي انمُرد من اگعدت يم جثّته المطروحه
هالغالي من طاح اِمتلت دم او تراب اجروحه
ناديته يبني يا علي صِد اعله ابوك او نوحه
ويّاه أحچي او ما يرد ثاري ابني طلعت روحه

اِلمسته قبل أوانه خشبه الولد لسانه
يا حيدر الشديده ضامي انذبح وريده
امگطّع اوليدي الاكبر
▪️▪️▪️▪️▪️
گد ما أحبّ ابني علي سمّيته مثلك إسمه
اليشبه نبي الرحمه شفت متگطّع ابلا رحمه
گد ما امگطعينه الجسد عجزت اديّه اتلمّه
او حين الأرد بي للخيم حيره شگول الأُمّه

شِيگطعه ليله ونها مثلوا ابجسْم ابنها
وذره تشيل اديّه او نصها يگع رميّه
امگطّع اوليدي الاكبر
▪️▪️▪️▪️▪️
گتله عله الدنيه العفه بعدك يالاكبر يبني
شُلّت ايمينه يا علي بيك الذي فاجعني
قبل الذي ايحز النحر صار القهر ذابحني
مثلك يوذروني بعد والخيل راح اترضني

جسمي يضل مصيره متجِمعه بس حصيره
مذبوح الاگي ربّي والأصعب اعله گلبي
امگطّع اوليدي الاكبر
▪️▪️▪️▪️▪️
ابو الحسن الوائلي

▪️▪️▪️▪️▪️
ارجال او نساء ابطاعِتك
نحيه او نموت ابخدمِتك
▪️▪️▪️▪️▪️
ويّاك نبقه اشما حِصل
تبشر يبن خير العمل
نرضاها نتگطّع وصل
او ما نتّخذ ليلك جمل

يا خطر يوصل خيمِتك
نحيه او نموت ابخدمِتك
▪️▪️▪️▪️▪️
موقف مُحال انغيّره
دونك نطيح اعله الثره
زحمه تضل عدنه مره
او زينب تروح اميسّره

يرحن سبي ويّ عيلِتك
نحيه او نموت ابخدمِتك
▪️▪️▪️▪️▪️
يا صدِگ والباقي وهَم
من دونك الدنيه عدَم
التاريخ يكتبها ابقلَم
للموت نبقالك خدَم

احنه واهلنه اوداعِتك
نحيه او نموت ابخدمِتك
▪️▪️▪️▪️▪️
تشهد علينه كربله
باچر الكون انزلزله
اليوصل لهاي العايله
نگطعهن اجدامه اله

نكسر اخشوم العادِتك
نحيه او نموت ابخدمِتك
▪️▪️▪️▪️▪️
يا رحمة الله الواسِعه
بالدم عهدنه انوقّعه
ابچلمه اليمسّك نِسمعه
راسه او لسانه نِگطعه

فدوه الرگاب الرگبِتك
نحيه او نموت ابخدمِتك
▪️▪️▪️▪️▪️
لو الف مرّه ننچتِل
هيهات خطوتنه تزِل
نقسِم ابعبد الله الطفِل
بس انته يحسين الأصِل

مرفوعه تبقه رايِتك
نحيه او نموت ابخدمِتك
▪️▪️▪️▪️▪️
ابو الحسن الوائلي

▪️▪️▪️▪️▪️
چنّه متفقين دوم انضل سوه
ابلا افراگ اثنينه ريّه او هوه
تالي يا خويه صدگ راح باچر نفترگ
▪️▪️▪️▪️▪️
يحسين ما چانت على بالي
نتفارگ آنه اوياك يالوالي
اتعاهدنه نبقه غالي يم غالي
بس تالي اجتنه كربله تالي

باچر امن العين ما ينشف دمع
اگبال عيني راح راسك ينگطع
ابونّي روحي تحترگ راح باچر نفترگ
▪️▪️▪️▪️▪️
من هسّه أشعر بالگلُب حِرگه
او من المودّع بالله مختنگه
احنه التحِب اگلوبنه الملگه
بس الدهر عازم عله الفرگه

لو تفارگنه يخيّ خل نفترض
يا گلُب يگدر يعيش ابلا نبض
گلبي عگبك ما يدگ راح باچر نفترگ
▪️▪️▪️▪️▪️
مدري يخويه شلون اودعنّك
باچر غريب ابحيره اشوفنّك
الظالم يذبحك وانحرم منّك
متعثره اطلع خويه ادورنّك

عله التل اصعد ابدمعاتي الحمُر
والرجال اتصيح هاي ام الخدر
چلمه تخنگني خنگ راح باچر نفترگ
▪️▪️▪️▪️▪️
هالگاع باچر تلچم احساسك
تنذبح بيها اخوانك او ناسك
سيف الشمر يگطعها أنفاسك
او عالرمح انظر ينرفع راسك

شمر يضحك واني دمعاتي تهل
ونتي احبسها يخي ما أحتمل
ابچفي فوگ الراس ادگ راح باچر نفترگ
▪️▪️▪️▪️▪️
المصباح لا ما يطلع امنيتي
ادري ابوداعك ينهدم بيتي
ينگلُب دخّان الهوه ابريتي
من الخيول اتدوس عافيتي

مثل خيماتي الگلب يلهب جمُر
واسمع اعظامك يخويه تنكسُر
ابچي دم من تنسحگ راح باچر نفترگ
▪️▪️▪️▪️▪️
يبن امّي باچر من يچتفوني
فوگ الهزل اركب يجبروني
ابطيحة كفيلي غربه يسبوني
واعله مصارعكم يجيبوني

امن الهزل انظرلك ابعين الألم
ماخذ امچاني اعاين چم سهم
والصدر ما ينشبگ راح باچر نفترگ
▪️▪️▪️▪️▪️
ابو الحسن الوائلي
العتبة الحسينية المقدسة

▪️▪️▪️▪️▪️
يعين الله گلُب زينب من يلفي ظهُر باچر
بالله شلون تتحمّل الركض والذبح والحافر
▪️▪️▪️▪️▪️
يتحمّل گلبها شلون تشوف احسين عالغبره
وابكل حقده ابن جوشن متربّع على صدره
ابقهرها تلطم اعله الراس لمّن يگطع ابنحره

الدمعها يضحك الذبّاح واتنادي ابقهر وانياح
يبو فاضل عضيدك راح گوم الحگله يا عبّاس
گطعله منحره الفاجر
▪️▪️▪️▪️▪️
التكفّلها العمُر كلّه ذبيح اعله النهر يوگع
او ما بين الزلم والخيل زينب راكِضه تطلع
الوادم بيها تتشمّت واشكال الحچي تسمع

عمُرها عابر الخمسين تدوّر ماكو يمها امعين
واهل الغيره مذبوحين چم واحد نذل تنظر
عله ضعن الشرف داير
▪️▪️▪️▪️▪️
اليخجل منها جبرائيل وليها من يفارگها
بين الغربه والعدوان تضل امحيّره حگها
لو ما طيحة العبّاس ياهو يعتدي ايطگها

بيها اصغارها ايلوذون او تشگف سوط ليضربون
الزينب ما تضل امتون يا ما تنضرب واتطيح
ابسوط او للظهر كاسر
▪️▪️▪️▪️▪️
خيمها ابطيحة العباس عليها النار تتوجّر
او يگلهن فُرّن السجّاد يا عمّاتي وسط البر
من ايركضن ايسمعن وليهن عظمه يتكسّر

ضلوعه الخيل تسحگهِن او ما يسلم ضلع منهِن
وصل للخيمه تاخذهِن والحافر يكون احمر
لونه امن السحگ صاير
▪️▪️▪️▪️▪️
المخيّم تطفه نيرانه او گلُب زينب يضل محروگ
عگب هودج النور اتروح مسبيّه او هزيله النوگ
الدواوين الردايه اتفوت او فرجه اتصير للمخلوگ

ابجفِن يتهامل ادموعه او منها الروح مفجوعه
تشوف الروس مگطوعه مرفوعات فوگ ارماح
وابخدها الدمع ماطر
▪️▪️▪️▪️▪️
ابو الحسن الوائلي
العتبة الكاظميّة المقدّسة

▪️▪️▪️▪️▪️
واگفه ابّاب الخيام اشحالها
يم اخوها احسين شارد بالها
▪️▪️▪️▪️▪️
تجري دمعة عينها او تنطر خبر
خايفه اعله احسينها من الخطر
اتعاين الميدان بت فارس مضر
لن تُراب الحومه عج اگبالها
▪️▪️▪️▪️▪️
شافت الميمون بت حامي الحمه
للخيم جاي او عله اكتاره الدمه
او عالخيام اجناب صارت هاجمه
او دوّرت ما شافت اليبرالها
▪️▪️▪️▪️▪️
ابنارها العدوان هجمت عالخيم
اسياطهم نزلت عله امتون الحرم
عافها او من عافها او راعي العلم
زينب امسَت هيّه تحمي اعيالها
▪️▪️▪️▪️▪️
طلعت ابّين الغرب متعثّره
والدمع بخدودها أحمر جره
گصدت التل ابحزنها حايره
بلچي صاحب نخوه يتعنّالها
▪️▪️▪️▪️▪️
صعدت اعله التل تدوّر عالحسين
واگع ابن امها الولي ما تدري وين
او لاح وسْط انفاسها عطر الحنين
تبعِته او تلگاه عدل آمالها
▪️▪️▪️▪️▪️
وصلته اعله العطر ما بين الاجناب
لگت كل عِشرة عمُرها اعله التراب
الرمل والدم صار لابن امها خِضاب
شافت احسين او تغيّر حالها
▪️▪️▪️▪️▪️
رادت اتشبگه او مِنعها چم سهم
ابكتره زينب هِوت والحيل انهِدم
اتداوي يا جرح او تخفّف يا ألم
ابجسمه لموسّد بُگه اعله ارمالها
▪️▪️▪️▪️▪️
ما بُگه امن اعزازها واحد عدِل
او راح بايتام او أرامل تكتفِل
عگب حرگ اخيامها فوگ الهزِل
تنسبي العنها بعيده ارجالها
▪️▪️▪️▪️▪️
ابو الحسن الوائلي

▪️▪️▪️▪️▪️
يا خويه عالتل الغرب شافوني
بعيوني ادورنّك يبعد اعيوني
▪️▪️▪️▪️▪️
حمره السمه او عيني عليها اتباوع
او للخيم وحده شفته مهرك راجع
مگلوب سرجه او ظهره بالدم ناگع
واهنانه خابت بيك كل اضنوني
▪️▪️▪️▪️▪️
صِعدت التل اعداك شافوا إختك
او بين الجسوم الطايحه دوّرتك
عطرك يخويه جابني يم جثتك
نومتك فوگ الرمل خطفت لوني
▪️▪️▪️▪️▪️
شفت الشمِر يمّك يذبحك رايد
ما عنده رحمه گلبه كلّش حاقد
محترگ گلبي واليذبحك بارد
هضموني حيل ابذبحِتك هضموني
▪️▪️▪️▪️▪️
امثنّي ركُبته الشمر شفته ابصدرك
يضحك عله دمعي او يحِز ابنحرك
عباس وينك صحت الحگ ذخرك
رادوا الگوم ابچتلك ايفجعوني
▪️▪️▪️▪️▪️
مرفوع راسك عالرمح بالبيده
مگطوع وايگطّر دموم اوريده
جدّامي هز الشمر راسك بيده
هوّه واصحابه اگبالك ايضربوني
▪️▪️▪️▪️▪️
المن ادير الوجه وآني ابوحدي
غير العليل اوياي محّد عندي
من الضرب عالعظم طابع جلدي
وليه ولوني وابد ما رحموني
▪️▪️▪️▪️▪️
مصباح باچر محّد ايواسيني
منظر ذبِحتك راح يبقه ابعيني
باچر يخي چتّالك ايماشيني
وامچتّفه فوگ الهزل يسبوني
▪️▪️▪️▪️▪️
من هالمصايب گلبي بالهم محروگ
محتاره وانظر ليها مكشوفه النوگ
او كلها تنادي راح نسبيچ ابسوگ
او راح ابدواوين الردي ايدخلوني
▪️▪️▪️▪️▪️
ابو الحسن الوائلي

▪️▪️▪️▪️▪️
اوّل سنه اتمُر عالذبح
بعده ولا طاب الجرح
ينزف دمه من يوم عاشور
▪️▪️▪️▪️▪️
عاشور اجاني اشحالي لگاني
ابچي الهذاك اليوم او ذيچ الرزيّه
واذكر كسرتي او عالتل وگفتي
جِيتك يخويه احسين ابدمعه جريّه
فوگ المصيبه الشيبه خضيبه
متروسه دم واتراب وانته رميّه
شمْر اعله صدرك وايگطعه نحرك
او عگب الذبح تنداس بالأعوجيّه

شرد انسه واذكر يا ألم
التسليب لو حرگ الخيم
من هالمصايب گلبي مذعور
ينزف دمه من يوم عاشور
▪️▪️▪️▪️▪️
ابگلبي طفوفك يوميّه اشوفك
راجعلي من الماي بس محني ظهرك
اتوگّعها بيدك خيمة عضيدك
من طيحة العبّاس مكسور انظرك
اتودّعني اصدلك او بدموعي اگلّك
لو يمّك العبّاس شيگطعه نحرك
يا ريته حاضر شاف الحوافر
فوگ السحگ يحسين گامت تطشرك

عبّاس يم المشرعه
طاحت چفوفه امگطّعه
ما يدري صدر الدافي مكسور
ينزف دمه من يوم عاشور
▪️▪️▪️▪️▪️
ليلة ذبحتك تذكرها اختك
وابراسي ذاك الليل او لوعة غربتي
زادوا هضمنه حرگوا خيمنه
ارماد الخيم فوگاه صارت گعدتي
ما فوگي رايه تحمي العبايه
وامگطّعه الچفّين التمسح دمعتي
او لليوم انظره عايفلي ذكره
وانطبعت اعله البال بالطف ركضتي

اركض ابهمّي حايره
بين الرجال امعثّره
نهرين دمعي ابخدي محفور
ينزف دمه من يوم عاشور
▪️▪️▪️▪️▪️
الهضمه الچبيره أمشي أسيره
مكشوفه كل النوگ او جابوها عرجه
ابسوگ السبونه من وگّفونه
للوادم الشمّات خلّونه فرجه
اطبول او هلاهل ما عدنه كافل
يا خويه والنظرات الجرحي تهيجه
واشگفها منهُم الضربه او شتمهُم
يهضمنه چان الجيش يا خويه نهجه

جمْر السبي لا ما بُرد
ما أنسه لچماته أبد
احجار او شتِم فوگانه مشمور
ينزف دمه من يوم عاشور
▪️▪️▪️▪️▪️
ابو الحسن الوائلي

▪️▪️▪️▪️▪️
عمّه زينب جاوبيني شنهو صاير
عمّه زينب طمّنيني گلبي حاير
عمّه زينب
▪️▪️▪️▪️▪️
عمّه زينب گلبي خايف طمّني منّي الگلُب
انظر احروگ ابعباتچ بعد يحبيبه او ترب
ليش اباوع ماكو اهلنا هالزلم كلهم غرب
والنسه مثل الثواكل منهن المدمع يصب

هالمسيّه هواي متغيره الفواطم
هالمسيّه ليش ماكو بني هاشم
عمّه زينب
▪️▪️▪️▪️▪️
حالنه اتغيّر واعاين هالمسه مو مثْل اَمِس
گلبي خايف يالعقيله فاجعه صارت يحس
يفز گلبچ من چفوفي وي چفوفچ تنلمس
ليش مو عمّي حرسنه من اجانب ننحرس

ماكو رايه او لا گمر عيني تشوفه
ماكو رايه حايره وابروحي خوفه
عمّه زينب
▪️▪️▪️▪️▪️
وين عبد الله ارد اشبگه الروح ملهوفه اله
والرباب اشبيها تبچي او منهو هذا حرمله
ليش ليله اتهل دمعها او رمله مثل الثاكله
ليش كلها اتصيح آنه امنين اجتني كربله

الارض هايه مختلف حتّه هواها
الارض هايه والدمه ترست ثراها
عمّه زينب
▪️▪️▪️▪️▪️
وين ابو فاضل وابويه گلبي رايد يطمئِن
ماكو واحد من اهلنه والدمع حدر الجفن
ليش خيمه امّزّگيها او بيها هالنسوه تون
عله وجهچ من اعاين اقره بعيونچ حزن

حمره عينچ اشگد اشوف آلام بيها
حمره عينچ من بچي لو ساطريها
عمّه زينب
▪️▪️▪️▪️▪️
الگاع دم وارماد كلها خوف بيها ابكل كتر
چان ابو فاضل ضوانه هسه ما عدنه بدر
ظلمه والصحره چبيره وآني شاغلني أمر
العصر تكسيره اسمعتها شنو چان الينكسر

اذني سمعت اعظام تنداس ابحوافر
اذني سمعت الصوت ضل ابراسي داير
عمّه زينب
▪️▪️▪️▪️▪️
عمّتي الليله ابحنانچ صرتي بينه اتجمّعين
بيچ هيبة كل زلمنه او بيچ صرنه امأمّنين
خيمه للخدّر صفيتي مثل والدنه الحُسين
خيمه مهمومه ابحزنها صار تارسها الونين

صرتي خيمه او بيچ هيبة كل اهلنه
صرتي خيمه ابروح ملچومه تلمنه
عمّه زينب
▪️▪️▪️▪️▪️
ابو الحسن الوائلي

▪️▪️▪️▪️▪️
يابو فاضل يسبع الگنطره
ترضه خويه اروح اميسّره
▪️▪️▪️▪️▪️
ياخو زينب دمعي عيني يهل
تدري حضرَوا يعباس الهزل
عايف اختك وحدها يالنفل
عگب چفّك يكض ايدي الحبل

راح اعوفك طريح اعله الثره
ترضه خويه اروح اميسّره
▪️▪️▪️▪️▪️
إختلف حالي يغالي ابطيحِتك
عيني تدري اشكثر مشتاگِتك
خدي سطروه ابگطعة يمنِتك
ترضه هايه عليك ابشيمِتك

والدمع دم يبو فاضل جره
ترضه خويه اروح اميسّره
▪️▪️▪️▪️▪️
اليرتعش چان اذا رفلك جفن
ابسوطه يابو الفضل طگ المتن
حرمه واركب عله الناگه او أوِن
لا اخو الضل معاي او لا إبن

بهاي الايتام بُگيت امحيّره
ترضه خويه اروح اميسّره
▪️▪️▪️▪️▪️
هودج النور تره ماضي صفه
ابّين اجانب أخيتك واگِفه
ليش ضعنك ينشمي عايِفه
لليغض من يشوفك طارِفه

رغم الجروح اضل متصبّره
ترضه خويه اروح اميسّره
▪️▪️▪️▪️▪️
خويه عباس رغم ضيم السبي
إطمئن ما تذل بنت النبي
إطمئن ما يلمسون العبي
راح جبريل يعدّل مركبي

أذِل هيهات واضل امخدّره
ترضه خويه اروح اميسّره
▪️▪️▪️▪️▪️
ابو الحسن الوائلي

▪️▪️▪️▪️▪️
آنا الوالده والگلُب لهفان
ابني احسين فوگ الرمل عريان
▪️▪️▪️▪️▪️
آنا الوالده التجري الدمع سيل
ما أگطعها ونتي انهاري والليل
وآنا الفوگ ابنها داست الخيل
او لعبت عله جسمه الخيل ميدان
▪️▪️▪️▪️▪️
وصل قبلي الشمِر حِين الحضرته
او گعد فوگ المچان المنّه بسته
اگبال اعيوني ضل يگطع رگبته
مات او ريجه يابس حيل عطشان
▪️▪️▪️▪️▪️
توّه الشمِر خلّص ذبِح منّه
واجنّه الخيل رادن يسحگنّه
كل جسمه الحوافر رضرضنّه
صوت الكسُر زاد ابگلبي الاحزان
▪️▪️▪️▪️▪️
صاحوا عالخيم من گطعوا الراس
هجموا اعله النسه ما هوّه عبّاس
ركض طلعن بناتي بين الارجاس
واعله اخيامهن جابوا النيران
▪️▪️▪️▪️▪️
للطف جيت بضلوعي الكسيره
شفت زينب وحيده ابلا عشيره
او مثلها ابكربله احتاريت حيره
ألِم بحسين لو أجمع النسوان
▪️▪️▪️▪️▪️
بنات ابني او بناتي راحن اضياع
او هجّن بالصحاري ابدون فزّاع
واموزّع احسين اوليدي عالگاع
تراب الطف الجسمه صاير اچفان
▪️▪️▪️▪️▪️
ابو الحسن الوائلي

▪️▪️▪️▪️▪️
واويلي على العطشَان
▪️▪️▪️▪️▪️
يتلوه بقه ابمهره
طاح ابدمه عالغبره
مطبور اثنعش طبره
گطعوا من گفاه نحره 
او داست خيلهم صدره 
▪️▪️▪️▪️▪️
طاح او طيحه مو سهله 
او رد مهره يخبر اهله 
اجروحه غيرت شِكله 
من راسه لحد رجله 
احسين ابجسمه چم نبله 
▪️▪️▪️▪️▪️
طاح او ماكو اليسنده 
واتراب الارض لحده 
لا أخ لا إبن عنده 
صعبه اهوايه هالشِدّه 
للماي انفطر چبده 
▪️▪️▪️▪️▪️
طاح ابكثرة اجروحه 
يهمس بس طلع نوحه 
لخته عينه مشبوحه 
ضلت عينه مفتوحه 
صعدت للسمه روحه 
▪️▪️▪️▪️▪️
طاح او چم جرح صابه 
الظالم يرفس اصوابه 
گاموا سلبوا اثيابه 
تبقه الدمعه سچابه 
اه يحسين وامصابه 
▪️▪️▪️▪️▪️
ابو الحسن الوائلي

▪️▪️▪️▪️▪️
هالله هالله احسين وينه بالسيوف امگطعينه
▪️▪️▪️▪️▪️
طلعت الحوراء زينب حايره او تجري المدامع
شافت الميمون ملوي السرج والنسوه تباوع
يا مهر نادت انشدك گلي وين احسين واگع
يا مهر جاوب تنادي ابيا كتر طايح ولينه
▪️▪️▪️▪️▪️
مضطرب حال ابو اليمه والتعب بعيونه واضح
العطش ياوسفه تعده او بدل ابوجهه الملامح
سهم صابه ابوسط گلبه من وراه عالغبره طايح
عالارض من مهره هاوي والحجر صوب جبينه
▪️▪️▪️▪️▪️
طاح فوگ الگاع بارد هوه بس الگاع جمره
ابعيني شفته اشلون شفته يابسه واتريد گطره
اگبال عين اخته العقيله الشمر متعمد ينحره
هوه جالس فوگ اخوهه امن الگفه يگطع وتينه
▪️▪️▪️▪️▪️
هذا ابو السجاد مرمي عالتراب او دامي نحره
والخيول الاعوجيه طحنت ابعظمه او تكسره
وصل من جسمه ابرجلها عالارض صار تنثره
احسين هذا الخير هذا ليش عظمه امهشمينه
▪️▪️▪️▪️▪️
يبچي ابو الوجدان لجله والجماد او كلشي ينعه
عالوگع ناگع ابدمه او سيف چم ظالم يگطعه
ما كفاهم كل عملهم رجعوا او گطعوا اصبعه
ضاع خنصر والاصابع تسعه موجوده بادينه
▪️▪️▪️▪️▪️
انگطع راس احسين واعله گطعته كلشي تألم
والجسد عالگاع مرمي والصدر منه تهشم
بالافق دم ابو الاكبر والسماء اتحولت دم
جامد الدم ابلحيته ابرمح راسه رافعينه
▪️▪️▪️▪️▪️
احسين اه احسين مرمي والعده سلبوا ثيابه
يا صبر واحسين جسمه منطرح فوگ الترابه
كلشي ذاك اليوم يبچي عله ابو اليمه او مصابه
انگطع راسه او ونه باقي وابد ما يگطع ونينه
▪️▪️▪️▪️▪️
ابو الحسن الوائلي

أعظم الله أجر صاحب الزمان وأجوركم بذكرى استشهاد سيدنا ومولانا ابي عبد الله الحسين العطشان جعلنا الله وإياكم من الطابين بثأرهِ مع إمامٍ ظاهرٍ مهدي من أهل بيت محمّد ولا جعله الله آخر العهد مِنّا لخدمتهِ وللبُكاءِ عليهِ

▪️رسالة من العقيلة
▪️▪️▪️▪️▪️
وين الغيور اليرگه الْسبوگ
البدربه ابد ما واحد ايعوگ
ماريده يوگف يطرگ اطروگ
ايطر المدينه وجه الْشروگ
ايعلّي الصريخ ابثوب مفتوگ
وايصيح حيهم أهل الْحگوگ
للطف تِعنّوا او لحّگوا الحوگ
زحمه جِفنكم يبگه مطبوگ
شيخ العشيره صدره مسحوگ
او نسوانكم متيسره عالنوگ
ادري چلمتي اثگيله متلوگ
بس الغرب بضعونها اتسوگ
▪️▪️▪️▪️▪️
ابو الحسن الوائلي

▪️▪️▪️▪️▪️
خويه يعبّاس سبوني الارجاس
وانته عله الماي وانته عله الماي
▪️▪️▪️▪️▪️
خويه مشّوني عگب عزّي أسيره
وانته ما تفزعلي يا بدر العشيره
صار ماضي يالگمر اسم الأميره
ناگتي يحديها گام الماله غِيره

بيّه الوكت دار او چتّالك الصار
بضعوني حدّاي وانته عله الماي
▪️▪️▪️▪️▪️
امچتّفه خويه رحت والناگه هِزله
والدرب مجبوره ويّه اعداك اكمله
يسمعوني حچي روحي ما تحمله
اعليّه چلمة يا غريبه ماهي سهله

ابچلمات الانذال اندب يكفّال
شتجاوب ابهاي وانته عله الماي
▪️▪️▪️▪️▪️
گلبي چم لوعه يبو فاضل يصدها
سهم عينك يالگمر روحي مُردها
يا بعد زينب عفت زينب وحدها
بين عدوان او شماته كلها ضدها

ما بين الاجناب ما عندي أحباب
يا جرحي وادواي وانته عله الماي
▪️▪️▪️▪️▪️
أسمع اصوات العده وابگلبي ونّه
هايه اخته الما رحم بالطف زلمنه
ابيوم عاشر بالحرب عبّاس ذلنه
ابهضم اخته اليوم خل ننتقم منّه

بيّه يضربون خويه او يشتمون
ما ترحم اعداي وانته عله الماي
▪️▪️▪️▪️▪️
لو گضه هضم السبي ميهيد حزني
او بعد ضيم الشام هوّه الينتظرني
عگب ما وين ابو الغِيره الراح منّي
ابفرح واطبول العده تتلگّه ضعني

ابسوگ او دواوين ندخل نساوين
ما عدنه حمّاي وانته عله الماي
▪️▪️▪️▪️▪️
ابو الحسن الوائلي