فقدنا قائداً عظيم الشأن وجلسنا في مأتمه قائداً كان فريد عصره في طهارة الروح وقوة الإيمان وحسن التدبير والشجاعة
مضى شهيداً على دين آبائهِ وأجداده

▪️▪️▪️▪️▪️
يدمعي ابحرگتك سيل او تفجّر
عله الهامته ابفرض الفجر تنطر
▪️▪️▪️▪️▪️
لا تنشف او هِل يا مدمع العين
عله الراسه ابصلاته انشطر نصّين
يا دمعه التجازي جرح ابو حسين
أشد من الدموع امصاب حيدر
▪️▪️▪️▪️▪️
هذا الشايل الكون اعله ظهره
والگاع او سماها ابطاعة امره
ابسيفه الرجس تاليها يطبره
أمير الكون مدمي اعله الارض خر
▪️▪️▪️▪️▪️
كل الكون ناح ابحزن واضح
كأن من السمه عامود طايح
حتّه امن الحجر بانت نوايح
المصابه كلشي يتنفّس تغيّر
▪️▪️▪️▪️▪️
نعي جبريل فاطر صم الگلُوب
ركن الهده ابهذا الحزن مصيوب
الرفع راس الاسلام ابراسه مضروب
والمصحف عله المصحف تحسّر
▪️▪️▪️▪️▪️
سِره ابجسم البخت سَم المصيبه
او بُگه ممدود بالشيبه الخضيبه
او صفت من طاح هالدنيه غريبه
او لجله كل ملك گلبه تفطّر
▪️▪️▪️▪️▪️
عله افراش المنيّه الحيد ممدود
الصرع فقّاره وين الچانوا احيود
الجبل يومه گرب والحيل مهدود
عله حامي الحمه شنهو ايتصبّر
▪️▪️▪️▪️▪️
مصيبه تعجز اتوصّفها چلمات
او ما نشتم هوه خلّتنه حسرات
ابو الأيتام غمّض ناظره او مات
وگف نبض البخت الله أكبر
▪️▪️▪️▪️▪️
ابو الحسن الوائلي

▪️▪️▪️▪️▪️
ناح الوجود ابحرگِته بالحزن والويل
مطبور راس المرتضى حمّاي لدخيل
▪️▪️▪️▪️▪️
انهدمت اركان الدين كلها ابهذا الِمصاب
شيبة الكرار اصبحت بيها الدمه اخضاب
ناح الوجود او دم تسيل آيات الِكتاب
يا دمعه هاي الكافيه لمصيبته اتسيل
▪️▪️▪️▪️▪️
للمسجد اولاده اعتنت والگلُب مذعور
المنّه يخاف الموت شافوا راسه مطبور
سِيف الردي اتعدّه او خُضبها شِيبة النور
شافوا على وجهه طريح الزلمه لِثگيل
▪️▪️▪️▪️▪️
صاح الحسن والصوت منّه ابحزن ينذاع
يا حيدر المثلك صعب طيحِته اعله الگاع
مو هينه اشوفك منصرع يا مُردي لِسباع
عزّت عليّه امن اسمعِت ينعاك جبريل
▪️▪️▪️▪️▪️
هذا علي سوح الحروب اليمنِته اشهود
او وين الشجاع الجابِله ينصرع ممدود
يرجع عله چتف الحسن واحسين مسنود
اليحتمي الكون ابظهره اصبح بالمشي ايميل
▪️▪️▪️▪️▪️
ناده علي نزلوني اريد امشي عالاجدام
خوفي اعله زينب تنلچم من تنظر الهام
ماريد اختكم خايفه او بوجودي تنضام
كافي عليها تنسبي او تركب مهازيل
▪️▪️▪️▪️▪️
گلبه وگف حامي الحمه بالهم والاحزان
تبچي الاملاك او نزلت اتشيّع القرآن
مو عادي حمّاي الحميّه فوگ الاذهان
كون السمه كلها نعش حيدر علي اتشيل
▪️▪️▪️▪️▪️
ابو الحسن الوائلي

▪️▪️▪️▪️▪️
تهدمت ولله أركان الهُدىٰ
▪️▪️▪️▪️▪️
راس المرتضى الملعون صابه
شيب البخت صار الدم خضابه
انفصمت عروةُ الوثقه ابمصابه
او بالعالم بده كلشي اكتئابه

يوم الذي جبريل نادىٰ بالنِدا
▪️▪️▪️▪️▪️
طبر سيف الردي تاج الإمامه
او فجعها ابفعلته اگلوب اليتامه
ابنعي جبريل كلشي اختل نظامه
الجماد ايحس بعد ماكو سلامه

بالحالِ بعد الصوت مرعوباً غدىٰ
▪️▪️▪️▪️▪️
علي المصحف الناطق غدراً انصاب
او عله امصابه بچت آيات الْكتاب
علي المنّ عنده وين السبع ينهاب
ابدم راسه صبح ناگع المحراب

من حقّها الدمعات تنعىٰ السيّدا
▪️▪️▪️▪️▪️
عليك اللعنه تنزل يبن مُلجِِم
غدر تطبُر علي والسيف بي سِم
الفعل هذا الجنيته اعلينه مؤلِم
فگد حيدر ابيوت احبابه يهجِم

تطبِرُ يا ملعون شخصاً يُفتدىٰ
▪️▪️▪️▪️▪️
ابو الحسن الوائلي

متت مجروح گلبك والدهر حانيك
چان هواي يا حامي الحمه ماذيك
من غمّضت عينك كلشي حيله انهار
السمه والگاع ناحت يالأمير اعليك
▪️▪️▪️▪️▪️
أعظم الله أجر صاحب الزمان وأجوركم بإستشهاد جدّه أمير المؤمنين علي بن أبي طالب عليهِ السلام سائلين الله أن يوفّقنا لخدمته ولزيارته في الدنيا ويرزُقنا شفاعته في الآخره

ولا تنسَ الإمامَ العطشانَ الشهيد عليه السلام
الذي استغاث في آخر رمقٍ لـ(قطرة) من الماء فحزّوا رأسه في هذه الإستغاثة :
▪️▪️▪️▪️▪️
يصايم لو چنت للماي تتلهّف
تذكّر چبدة العطشان برض الطف
چانت حالته هيهات تتوصّف
خبشه اشفايفه ما ضايگه الگطره

▪️▪️▪️▪️▪️
إنقضى شهرُ العِباده والى الآن بعيد
ولظىٰ نارُ الغِياب في الصدورِ لا تهيد
سيّدي العِيدُ أتانا وأسى البُعد يزيد
فسِواك يبن طه سيّدي لسنا نُريد
ننظر الأيّامُ تمضي ولنا أمرٌ وحيد
يومَ نلقاكَ رجِعت هو يا مولاي عيد
▪️▪️▪️▪️▪️
الفرحه اللي تمر وانته بهالغياب
تزيد ابشوگنه يا أغلى الاحباب
يمته انشوف نورك يبن الاطياب
وينشف كل دمعنه الضال سچّاب
مو تدري ابگلبنه امن الصبر ذاب
بس انته التعالج جرح المْصاب
أفز كلما تدگ اچفوف عالباب
أگولن بلچي رد السافر وغاب
وارجع سيّدي وضنّي لون خاب
سلام ابعث إلك ويّه الهوه الهاب
▪️▪️▪️▪️▪️
اللهُم عجّل لوليّك الفرج والنصر

▪️▪️▪️▪️▪️
انهض يحماي الحمه من الغري گوم
چم گبر بالغرقد غده مولاي مهدوم
▪️▪️▪️▪️▪️
گوم اعتني الطيبه يبو الحمله يكرار
ادري ولا يحتاج اخبرك عندك اخبار
ساووا قبور اولادك اويه الگاع الاشرار
هالعَمله منها كل موالي گلبه مالوم
▪️▪️▪️▪️▪️
مرتين هدموها الگُبب هالناصبيّه
او منعوا الزوّار التجي ولد الرديّه
كل هذا بغضاً بيك يا حامي الحميّه
بصدورهم يغلي الحقد باقي لهاليوم
▪️▪️▪️▪️▪️
هذا الامر تدريهْ بينه ايهيج الاحزان
جنّة الغرقد سيّدي اتحوّلت تربان
ما خلّوا لهاي القبور اعداك نيشان
والدمع حگّه يا علي لو يهمل ادموم
▪️▪️▪️▪️▪️
ماكو موالي ابراحته يا سيّدي ايزور
داير عله أهل البخت يا حيدر السور
يا علي ايمنعون اللي يتبرّك بالگبور
كسرة ظهر محتاجه يا مولاي هالگوم
▪️▪️▪️▪️▪️
لهاي المصيبه يا علي حشّم الموعود
بِعنانه خل يگصِد مهو للشِدّه مريود
بالسيف يذبحهم نريده كل بني اسعود
ياخذ ابحگّه ابلايه شك لازم المظلوم
▪️▪️▪️▪️▪️
ابو الحسن الوائلي

▪️▪️▪️▪️▪️
يمته يراعي الثار تطلع
تحكم الگاع او يوم ترجع
اسياج البقيع انريد تشلع
واترابه يصبح گُبب تلمع
چف الهِدمهن راسه تگطع
او ثارك يرد منهم امربّع
▪️▪️▪️▪️▪️
العتبة الكاظمية المقدسة
▪️▪️▪️▪️▪️
أعظم الله أجر صاحب الزمان وأجوركم بذكرى فاجعة هدم قبور أئمّة النور والهُدى في بقيع الغرقد سائلين الله أن يعجّل فرج وليّهِ الإمام المهديّ المُنتظر جعلنا وإيّاكم من الطالبين بثأرهِ بحق محمّد وآلِ محمّد

▪️▪️▪️▪️▪️
ابنهاية حياته  ابدمعته التسيل
يسلم اعله جدّه  الحُسين القتيل
مصابين  چنهن مصيبه
▪️▪️▪️▪️▪️
ابنفس الشاكله امصايب
ابو الهادي وابو الاكبر
التشابُه والفرِق بيهن
راح ايبيّن او أكثر
الجواد ابمقتله اتسمّم
بچفوف الكفُر والشر
واحسين انچتل عطشان
او منّه گطعوا المنحر

غده بي تشابُه  هضُم وي هضُم
المآسي اللي عدهم  ولا تنهضُم
جراحات  كُبره او رهيبه
▪️▪️▪️▪️▪️
أبو الهادي انتقل لله
ابفعِل اُم الفضِل مسموم
او بعد ما قِتلِته ندمت
لاچنّه اشيِفيد اللوم
او غده بالطف ابو السجّاد
من ماي العذب محروم
ضامي او يابِسه اشفافه
او متهيئه الذبِحته الگوم

عله هالمصايب  يطول النحيب
يويلي عليهم  غريب ابغريب
ولدموع  اعليهم سكيبه
▪️▪️▪️▪️▪️
بقه فوگ السطح جسمه
الجواد او عالأرض شمروه
رفضوا واحد ايشيله
او تحت حرّ الشمس خلّوه
بس ويلي اعله حال احسين
ذبحوه والهدِم سِلبوه
امن ايده گطعوا الخنصر
او بالخيل الجسم رضّوه

بحيث العقيله  ابقهرها تگول
اسمعِت عظم اخويه  تِكسره الخيول
عله الگاع  جثته سليبه
▪️▪️▪️▪️▪️
إمامي او سيّدي الهادي
تعنّه الوالِده شيّع
مراسيم الدفن كملت
ابسلامه اندفن بالمضجع
يعين الله علي السجّاد
ينظر والده امگطّع
امطشّر جسمه عالغبره
ابحصيره اوصاله ضل يجمع

يدفنه ابدموعه  او دليله الوجيع
عگب جسمه خلّه  اعله صدره الرضيع
بچه اهواي  إبنه حبيبه
▪️▪️▪️▪️▪️
الجواد اعله الترب من طاح
ما ضربوا إله نسوان
ولا عنده نسه واطفال
ابخيمهن شعلوا النيران
ولا بسياط ضربوهن
ولا سلبوهن العدوان
ولا ويّه الغرب راحن
سبايا يمشن بأحزان

ولا گيّدوهن  نساءه ابحِبال
ولا صعّدوهن  سبي عالجِمال
يويلاه  اشحال الغريبه
▪️▪️▪️▪️▪️
ابو الحسن الوائلي

▪️المصيبة: لمّا بلغت روح الإمام الجواد ع التراقي صعد سطح الدار ورمق السماء بطرفه وتشهّد الشهادتين وغمّض عينيه وأسبل يديه ورجليه وعرق جبينه وسكن أنينه وفارقت روحه الدنيا.. وبقي جسد الإمام ثلاثة أيّام على سطح الدار..
▪️▪️▪️▪️▪️
من السَم تعاني اهواي ضلّيت
مُرد گلبك لحد ما بي توفّيت
حالك حال جدّك سيّدي ابگيت
بلا مدفن اثلث أيّام بالحر
▪️▪️▪️▪️▪️
اعله حزنك كون تزداد النوايح
يالدمعك دمه امن العين سايح
من ضلّيت فوگ الگاع طايح
ما جاك الشمِر يگطع المنحر
▪️▪️▪️▪️▪️
ضل عالگاع جسمك يبن الاطياب
بس اعداك ما سلبولك اثياب
يمصاب الأبد ما مثله امصاب
مصاب احسين حتّه الحجر فسّر
▪️▪️▪️▪️▪️
ما عندك اخو عالماي مطروح
ولا عندك رضيع ابسهم مذبوح
ولا خَيتك غريبه اميسّره اتروح
ضعنها اويه العده لبعيد گوطر
▪️▪️▪️▪️▪️

▪️▪️▪️▪️▪️
اختارني زوجه الك ربنه الجليل
علي واختارك الي الباري بعد

من گلِت مَهري الدرع قصدي عليك
إنته درعي يا علي وانته السند
▪️▪️▪️▪️▪️
مُتباركين زواج النورين

بسم الله الرحمن الرحيم
بعد التوكّل على الله تعالى تم إكمال جزء كبير من منهاج محرم الحرام لعام ١٤٤٨هـ
وإن شاء الله سيتم نشره بشكل يومي في هذه القناة
وسائلين الله تعالى التوفيق والثبات لخدمة محمد وآل محمد الطاهرين

▪️▪️▪️▪️▪️
إجه شهر اللطم والنوح والآهات والحسره
شهر البي يضل ضامي احسين او ينگطع نحره
▪️▪️▪️▪️▪️
بيّن بالسمه اهلاله شهر امصاب ابو السجّاد
البي راسه يگطعونه او يرفعونه عله الميّاد
والجسمه بُگه غارج بدمومه عله الأوهاد

آفاق الحزن لاحت كل فرحة گلُب راحت
الزهره اُم الحسن ناحت بيديها قميص احسين الليله بالسمه اتنشره
▪️▪️▪️▪️▪️
شهر البي گلُب زينب يضل مالوم متعذِّب
الصبر يجزع اذا ينظر صبرها او يبقه متعجِّب
من امصيبة العاشر گلبها او راسها امشيِّب

من گد ما بچت بونين حمره صارت العينين
اذّاها مصاب احسين حگها الكل عزيز الها
ذبيح امگطّع اتنظره
▪️▪️▪️▪️▪️
المهدي بهالليالي اينوح او دمعاته تطيح ادموم
او يلطم حاسر اعله الراس من لوعة هذاك اليوم
يذكر جدّه ضل اوحيد واندارت عليه الگوم

ضل وحده بدون اعوان يشوف امذبّحه الخوّان
واعليه دارت العدوان كلها الذبحِته گصدت
من شافوه خِله ظهره
▪️▪️▪️▪️▪️
ويلاه يا شهر عاشور لا ما يندمِل جرحه
لياليّه هضُم واجروح وآلام او حزن صبحه
هالمنظر يهد الحيل او يحير الرايد ايشرحه

فوگ الگاع ابو الأكبر ينظر حاوطه العسكر
الشمِر عن ساعِده شمّر ينازع عالتراب احسين
واهو جالس عله صدره
▪️▪️▪️▪️▪️
المصاب اچبير ما يوفي حگّه النوح والدمعه
او زينب حگها من اتگول ابعيني ضاگت الوسعه
لنها راس اخوها اتشوف شمِر من الگفه ايگطعه

گلبها منچوي او موجوع او شمِر ميهزّه سيل ادموع
يضحك والعقيله اتلوع گلها لا مفر تلگين
من اسياطنه الحمره
▪️▪️▪️▪️▪️
من عگب الذبح لنها العده ركضت عله الخيمات
او زينب والنسه احتارت او ضلّن يجرن الدمعات
للشام او أرض كوفان بيهن مشوا مسبيّات

عگب الرايه والكفّال يسحبوهن وسف بِحبال
سبايه يمشن اويه انذال من انذبح يم الماي اخوهن وانخسف بدره
▪️▪️▪️▪️▪️
ابو الحسن الوائلي

▪️▪️▪️▪️▪️
وحده كلمِتي خادِمك للموت ابقه يا ابا عبد الله
▪️▪️▪️▪️▪️
گاضيه الدنيه اكيده ابلا جدل
واليموت او منها للحفره رحل
ياخذ اوياه فقط چِفنه والعمل
بلكت ايشِفعن اله بذاك المحل

وآنه خدمِتي بيها اتنومس ابدفني يا أبا عبد الله
▪️▪️▪️▪️▪️
الخدمه بيها اربيت أحسن تربِيه
اشرايد آخذ من حياتي الگاضِيه
روحي يحسين ابقسِمتك راضِيه
حاشه ما أگطع دموعي الجارِيه

تجري دمعتِي لحد ما تنعمي عيني يا أبا عبد الله
▪️▪️▪️▪️▪️
كلشي بالدنيه چذب وانته الصدگ
او يهنيالي اعليك گلبي محترگ
يبو اليمّه اشلون صدري ما ادگ
وانته يا مولاي صدرك منسحگ

هذي لطمتِي امرافگتني بالمجالس يا أبا عبد الله
▪️▪️▪️▪️▪️
رايد ابقه ابخيمِتك يبن الأمير
ولله قابل حتّه لو كنّاس اصير
الشرف هذا سيّدي كلّش چبير
يابو الاكبر عنّي وجهك لا تدير

جازي وگفتي واحضر ابدفني اليّه يا أبا عبد الله
▪️▪️▪️▪️▪️
ماتخيّل روحي عن دربك بعيد
والله غيرك يابو الاكبر ما أريد
ونتي حد الموت لمصابك تزيد
وابد عن هاي المجالس ما أحِيد

ابگلبي جمرِتي للحشر مولاي تلهب يا أبا عبد الله
▪️▪️▪️▪️▪️
ابو الحسن الوائلي

▪️▪️▪️▪️▪️
منّ الگماط الحفرتي
ملتزم ابقه ابخدمتي
يا أبا عبد الله
▪️▪️▪️▪️▪️
من مهدي منطي چلمه
أگضي العمر بالخدمه
هيهات اعوف النعمه يحسيني
يابو الأئمّه التسعه
انته نعم والبضعه
هيبه او جلاله او رِفعه منطيني

الك يا مولاي روحي سلّمتها من صباي
وانذرتلك كل سنيني يمن مرضاتك رجاي
انته گدّامي لگيتك سيّدي او كلشي وراي
اسمك ايضل ابلساني حتّه لو گطعوا هواي

أحمِد الباري النعِمتي
ملتزم ابقه ابخدمتي
يا أبا عبد الله
▪️▪️▪️▪️▪️
ابدونك حياتي اشبيها
ظلمه او طعم ما بيها
انته الذي امحلّيها يالغالي
روحي دربها اندلّت
مهيوبه يمّك ضلّت
لمّن خِدمتك عِدلت احوالي

سيّدي او مولاي حبّك ويّ شراييني يصب
ما مشيت ابغير دربك آنه احِب هذا الدرب
يا بعد عيني الخدِمتك وقف خلّيته الگلُب
ذچرك ابروحي ايتجدّد ويّه كل نسمه تطب

أشكرك علّيته بختي
ملتزم ابقه ابخدمتي
يا أبا عبد الله
▪️▪️▪️▪️▪️
يابو علي وعيونك
آنه عدم من دونك
يا سيّدي ممنونك اهوايه
خادم لأن قابلني
وابخيمتك جايبني
رايد رضاتك عنّي بس هايه

انته من ترضه عليّه يرضه هم رب السمه
ابدفتر الخدمه تسجّل اسمي امّك فاطمه
كلشي بالدنيه خساره بس رضاك الغانمه
رافس النعمه اليعوفك كل حياته مظلمه

يالذي حبّك نعمتِي
ملتزم ابقه ابخدمتي
يا أبا عبد الله
▪️▪️▪️▪️▪️
عنّك ابد ما اكدر
اتخلّه يابو الأكبر
ياهو الذي للجوهر ايعوفه
آنه ابثيابك لازم
ويّ خدمِتك متوالم
وانته التضُم الخادم اچفوفه

هالمجالس رحمة الله او بيها إحياء الأمُر
واحنه نحييها نضل للموت واندگ الصدر
حاشه ما يبرد عليك ابروحنه يبقه الجمر
نلتزم والله ابخدمتك سيّدي طول العمر

تبقه بالمجلس وگفتي
ملتزم ابقه ابخدمتي
يا أبا عبد الله
▪️▪️▪️▪️▪️
عهدي ابدِماي اموقّع
للموت اضل اتلوّع
مولاي ابد ما أقنع ابغيرك
اسمك يهيّج نوحي
واسمك ضماد اجروحي
مليانه صارت روحي من خيرك

اهوايه متفضّل عليّه چي جبتني للعزاء
الله لا يحرمني منك هذا يحسين الرجاء
فلس ما تسوه حياتي ابلا لطم وابلا بكاء
تطلع الروح او تضل ابگلبي جمرة كربلاء

والله ما اگطعها ونتي
ملتزم ابقه ابخدمتي
يا أبا عبد الله
▪️▪️▪️▪️▪️
ابو الحسن الوائلي

▪️▪️▪️▪️▪️
نداء نداء
ابصوت يا أهل الشِيم
الشهيد يريد
دوم تبقوله خدم
خِدمة المگطوع نحره
خَلها عِشره موش عَشره
▪️▪️▪️▪️▪️
هذا شهر ابن الزچيّه يالتخِدمه يالوفي
ليش خِدّامه بعضها ابعشره الاوله تكتفي
جمرة الحب ابدليلك انته بالك تنطفي

ادعي الله وأبو اليمّه
اعليك ايديمها النعمه
ماكو مثل هالخدمه
بهاي الدنيه كلها

حُسين حُسين
حيل يفرح من يصد
معاه معاه
خادِمه ما يبتعد
ابتدي من هذا شَهره
خَلها عِشره موش عَشره
▪️▪️▪️▪️▪️
هواي يردونك تعوفه او تبتعد عن مأتمه
وانته چلّب بالمجالس واسي اُمّه فاطمه
غير هاي الخدمه والله الدنيه كلها مظلمه

ليهزّك حچي اللايم
صيح او سمّع الوادم
خادم آنه اضل خادم
عند ابن الزچيّه

تضيع تضيع
لو عفتها خدمِته
تفوز تفوز
من تضل ابخيمِته
والهدف بالك تغيره
خَلها عِشره موش عَشره
▪️▪️▪️▪️▪️
حسين ضحّالك وريده او لليسر راحوا هله
حتّه راسك يبقه عالي او تبقه صاحب منزله
بالوجود ايموت كلشي او تِحيه فكرة كربله

الضحّالك ابدم طفله
ابد تضيحته مو سهله
لا تنساه ابد فضله
تخسر من تعوفه

ذبيح ذبيح
حتّه قدرك ينرفع
نجاة نجاة
طيع ابو اليمّه التسِع
طاعة المسحوگ صدره
خَلها عِشره موش عَشره
▪️▪️▪️▪️▪️
ما يفيدك غير هاي الخدمه باچر من تموت
عالنعي بهاي المجالس لا تضن يتعلّه صوت
احسين لو حانت منيتك للگبر قبلك يفوت

من تتوسّد ابگبرك
احسين اتعاينه ايحضرك
هوّه اليوگف ابظهرك
بالمحشر تشوفه

تفوت تفوت
للجنان ابصايِته
مُحال مُحال
چلمه توصف نعمِته
هاي نعمه او هاي ثمره
خَلها عِشره موش عَشره
▪️▪️▪️▪️▪️
ابو الحسن الوائلي

▪️▪️▪️▪️▪️
هالشهر من ايحين
انحضّر ادموع العين
نعمة الله يحسين مجلسك
▪️▪️▪️▪️▪️
رجعتلنه ايّامك
اتحزّمت خِدّامك
او عله العاده جينه نحييها المآتم
نفترگ تلگانه
او سوه انرِد اهنانه
خادم ابعاشور يلزم ايد خادم
ما نروح لغيرك
مكتفين ابخيرك
يا حُسين انته الحقيقه او كلشي واهم

ما نروح اويه الغير
سيّدي شلون يصير
والله يحسين الخير مجلِسك
▪️▪️▪️▪️▪️
شهرك الرد لينه
من سنه امتانينه
نشكر الباري لأن بينه العمر مد
حتّه نحيي امصابك
يالسليبه اثيابك
يموت كلشي او ذكرك ايضل ايتجدد
للعدو مَنبالي
مجلِسك يالغالي
انقيمه ما دام النفس ينزل او يصعد

انته اعز حيل هواي
امن الهوه او حتّه الماي
ما نتركه مولاي مجلِسك
▪️▪️▪️▪️▪️
جينه يا محبوبنه
انطهّر احنه اذنوبنه
بالبكاء او باللطم يبن الزچيّه
ابحسرته واحدنه
ايگول يا قائدنه
اخذ بيدي والگلُب يابو رقيّه
انته دربك نعمه
الما مشه بي أعمه
واليضل اوياك توگفله تچيّه

امحرّمك من ينعاد
بينه حبّك يزداد
خيمه يابو السجّاد مجلِسك
▪️▪️▪️▪️▪️
ابو الحسن الوائلي

▪️▪️▪️▪️▪️
يحسين التعب لجلك يسوه الدنيه والبيها
او لوَن روحي هِوت غيرك الله لا يخلّيها
▪️▪️▪️▪️▪️
عله فطرتنه حبيناك او شِفنه العافيه ابدربك
واحنه اهوايه مبخوتين لان يا سيّدي انحبّك
ولا شفنه ابد بالكون ابنقاوة روحك او گلبك

نعوفك سيّدي زحمه يعني نرفِس النعمه
بعد متلوحنه الرحمه والله الما يچلّب بيك
الجنّه ما يطب ليها
▪️▪️▪️▪️▪️
تمسّكنه ابطرف ثوبك او عرفنه الخالفك يخسر
او عشگناك ابهدف واحد او ما عاش اللي يتغيّر
كتبنه عالگلُب والروح وقف لحسين ابو الاكبر

ما غيرك شخص يسوه اله ايروح العمر فدوه
أبونه انته والقدوه مولاي او نعيش انموت
الك مرجِعنه تاليها
▪️▪️▪️▪️▪️
عشِگنه مو عشگ فتره يخلص سيّدي وايروح
عشِگنه سرمدي او باقي لحد الموت يالمذبوح
الما مچوي دلِيله اعليك حگّه ايلومني عالنوح

ابلطمنه والبچي إحنه او صوت الآه والونّه
نواسي فاطمه هَمنه تنسَر هيّه من اتشوف
چم خادم يواسِيها
▪️▪️▪️▪️▪️
لحد ما نندفن مولاي نحيي امصيبتك وامرك
ننسه الرايح اويه الجاي بس ما ينّسي ذكرك
أهم من كلشي يالمذبوح وحگّك نعتبر شهرك

شهرك عدنه يا مولاي أغله امن الهوه والماي
نتفاخر نحبّه اهواي بدونه مدري وين انروح
الخدم ياهو يلفّيها
▪️▪️▪️▪️▪️
ولا تنشف دموع العين تضل اعليك سچابه
كلشي ينتهي او تبقه الآه يحسين وامصابه
او ما نهتمله لليطلب دمعنه اليجري بطلابه

كون الحاربك ينظُر ياهو حارب ايفكُّر
تراه ابيا وجه باچُر يوگف بالحشر جدّام
الزهره او ينظر اعليها
▪️▪️▪️▪️▪️
ابو الحسن الوائلي

▪️▪️▪️▪️▪️
تضل يحسين دموع العين لمصابك بالطف نجريها
▪️▪️▪️▪️▪️
تمر ادهور واسنين البشر تِكبر
جمره بالضمير اتضل الك تسعر
قليل اشما الك يحسين نتحسّر
عالشفته وسط عينك يالموذّر

جراحاتك او معاناتك يابو الأكبر نبچي اعليها
▪️▪️▪️▪️▪️
حنين او گلبك ابطف كربله اتلوّع
او لاحبابك اعيونك تذرف المدمع
او روحك من قبل ما بالذبح تطلع
متت ساعة لگيت اوليدك امگطّع

شگول اكثر علي الأكبر مذبوح او جثته اموذريها
▪️▪️▪️▪️▪️
قبل ما خيل اميّه اتكسّره الصدرك
عله العباس من طاح انكسر ظهرك
يشوفونك وحيد او حسّوا ابكسرك
او كل اعيونهم دارت على نحرك

بواترهم او حوافرهم حضروها ايسحگونك بيها
▪️▪️▪️▪️▪️
قبل ما بالمُثلّث گلبك اتصوّب
انمُرد گلبك يبو اليمّه عله زينب
تحتار ابيتامه ابنص خيم تلهب
او بعد ذبحك سبيّه عالهزل تركب

يچتفوها يتعبوها للكوفه او شام اميسريها
▪️▪️▪️▪️▪️
قبل ما ثوبك ايسلبونه من عندك
تفرهد حيلك اعله اخوانك او ولدك
الإجه ايذبحك عله التربان من صدّك
شاف اعله الثره المرمي النبي جدّك

يجي الحاقد ابگلُب بارد واعيون الزهره ايبچّيها
▪️▪️▪️▪️▪️
عشت بالطف الهم واللوعه والأحزان
او فاگد كلشي صحبان او ولد واخوان
والعبد الله من ذبحوه صرت دفان
وانته اثلث ليالي ابلا دفن عريان

فلا تنشال تضل اوصال بيده السجّاد ايواريها
▪️▪️▪️▪️▪️
ابو الحسن الوائلي

▪️▪️▪️▪️▪️
ايعينك الله يا إمامي الباقر
عايش ابّالك مصاب العاشر
▪️▪️▪️▪️▪️
اربع اسنين او شفت ذاك الكسُر
واركضت مثل العقيله عالجمُر
اتنوح للطف خلّصت كل العمُر
چم جرح منّه الدلِيلك فاطر
▪️▪️▪️▪️▪️
ازغير بس شلون منظر تنظره
احسين عالتربان حزّوا منحره
واسمعتها الخيل عظمه اتكسّره
ايروح وايرد اعله جسمه الحافر
▪️▪️▪️▪️▪️
اجروح ابد ما خلّت اعيونك تنام
شيّبت من ذبحوا احسين الإمام
عله النسوان احرگوا ذيچ الخيام
والدخان ابوسط ريتك داير
▪️▪️▪️▪️▪️
حگّه جرحك سيّدي ما يندمل
عايش امصاب الأبد ما ينحمل
ويّه زينب چتّفوك اعله الهزل
او باليسر ويّه الضعينه امسافر
▪️▪️▪️▪️▪️
قبل لا چبدك السمّ ايگطّعه
متت مولاي ابطفوف الفاجعه
عله التربان الجثث متوزّعه
اتعاينه چم وذره جدّك صاير
▪️▪️▪️▪️▪️
گضت روحك سيّدي المتعلعله
اتصيح بالحسرات والهم والبله
كربله يا كربله يا كربله
للمصاب البيها دمعك ماطر
▪️▪️▪️▪️▪️
ابو الحسن الوائلي