▪️▪️▪️▪️▪️
يا شيعتي  آنه الزچيّه
يا شيعتي  عندي وصّيه
اتنصروني كون انتوا تضلّون
خففوا احزاني او لا تزَيدون  يا شيعتي
▪️▪️▪️▪️▪️
بسم رب الرحمه والعزّ والجلاله
آنه فاطم رحمة الباري تعاله
لكُم يا شيعة علي عندي رساله
للوگف ضدّي او يأيّد بالضلاله

قطعاً تره  الما هزّه دمعي
قطعاً تره  ياذيلي ضلعي
فتحوا گلبكم گبْل لعيون
خففوا احزاني او لا تزَيدون  يا شيعتي
▪️▪️▪️▪️▪️
الديني ضحّيت العمُر كلّه او حياتي
اثمنطعش عمري او ذبح حلمي مماتي
اچبيره عند الله اتعرِف كِلها ابغلاتي
او رغم كلشي الطاغي زيّد نايباتي

لا ما حُفظ  حُرمة محمّد
لا ما حُفظ  واتجاوز الحد
ملعون گولوا الثاني ملعون
خففوا احزاني او لا تزَيدون  يا شيعتي
▪️▪️▪️▪️▪️
لجل ديني قدّمت ضلعي او جنيني
او لجل عيناكم يشيعه حمره عيني
اكسروا ضلعي بس ولا كسروا يقيني
ابقه اردّد علي اَميري او هوّه ديني

ما تنمحي  عندي عقيده
ما تنحمي  ديني الصميده
صيحوا معاي او ما تخسرون
خففوا احزاني او لا تزَيدون  يا شيعتي
▪️▪️▪️▪️▪️
الأشد من كسر الضلع والصار بيّه
ايدافعون البعض عالهجموا عليّه
العذُر مو كافي الدليل اعله القضيّه
هذا ويّه اللي هِجم يخلد سويّه

يوم الحشر  ميفيده يندم
يوم الحشر  يصفه ابجهنّم
اجهنّم ترحّب بالينكرون
خففوا احزاني او لا تزَيدون  يا شيعتي
▪️▪️▪️▪️▪️
عالدفع بابي او هِتك بچفوفه ستري
عنّه صار اكبر دليل اخفيته قبري
اجه نادم من فعِلته ايريد عذري
لچن ما سامحته ابداً والله يدري

يهل البخت  ناس السقيفه
يهل البخت  لا مو شريفه
وادم ردايه او هذا مضمون
خففوا احزاني او لا تزَيدون  يا شيعتي
▪️▪️▪️▪️▪️
باچر ابني المهدي كل حقّي يظهره
يبني گبري والبقيع ايجعله حضره
ينتقم وايصيح لبّيكِ يزهره
او يصلب الشيخين بيده عله شجره

ثار الضلع  لو ناده أسمع
ثار الضلع  بچفوفه يرجع
لابني أريدنكم تنصرون
خففوا احزاني او لا تزَيدون  يا شيعتي
▪️▪️▪️▪️▪️
ابو الحسن الوائلي
تمّت برعاية صاحب الزمان عج

▪️▪️▪️▪️▪️
اعذركم آني اتحلمون والذمّه ما أبريها
▪️▪️▪️▪️▪️
انته او رفيجك جيت تتعذّرلي
عذرينه يا فاطم سمعت اتگلّي
يا عذر هذا او انته كاتل طفلي
هذا العذر ما مقبول يالأوّل او ثانيها
▪️▪️▪️▪️▪️
اسأل الناس الساچنه المعموره
يابت نبي قبلي ابحقد معصوره
چفها احترگ واضلوعها مكسوره
يابت نبي لمّن مات هجموا اصحابه اعليها
▪️▪️▪️▪️▪️
جيتوني شنهو الفايده متندمين
وانتم كسرتم ضلع سيْد الكونين
ابقه عليكم ساخطه يالشيخين
اللعنه عليكم كل يوم وابكل فرض أحچيها
▪️▪️▪️▪️▪️
اذّت الرب اهواي هاي الصفعه
او إنتم سبب آلامي المتفرعه
يالمالكم وكْت الشِدايد فزعه
إنتم تضمّون الروس او حامي الحمه ينهيها
▪️▪️▪️▪️▪️
انتم كفو معروفه بس ابوحده
انتم كفو من عدنه بس بالشرده
والمرتضى يوگف ابوجه الشِدّه
محّد غلبكم هيهات والشرده فزتم بيها
▪️▪️▪️▪️▪️
يالتدّعون اصحاب ابويه الهادي
تاذوني عدكم هالعمل شي عادي
بالرفسه مات اصغر ولد باولادي
عدكم يظلّام اگلوب بس الحقد ماليها
▪️▪️▪️▪️▪️
الما عنده غِيره يستحي ما معقول
او منّي الشفاعه لا تضن راح اتنول
يوم القيامه احسابك اهناك ايطول
انته واليوگف ويّاك اجهنّم لكم تاليها
▪️▪️▪️▪️▪️
ابو الحسن الوائلي

▪️▪️▪️▪️▪️
انهدم صبري انكسر ظهري
يُمّه يا بعد عمري
▪️▪️▪️▪️▪️
يزهرة روحي آنه حسين يالفراگچ هدم حيلي
مشيتي او من عگب عيناچ ييمّه ما نمت ليلي
عليچ ابچي واون باقي واشعر كلشي يبچيلي
كلشي امن ايدي خل ايروح المهم انتي تردّيلي

صبح يُمّه العمُر ظلمه
او خلّاني أوِن دهري
يُمّه يا بعد عمري
▪️▪️▪️▪️▪️
من حگّي عله افراگچ أنوح او أذرف المدمع
او ترافة روحچ الحلوه وسافه نامت ابمضجع
مو هيّن جمر فگدچ واحس بي بالگلُب يلسع
صدگ كلّه جمالچ ذاك راح او ما بعد يرجع

جرحتيني كسرتيني
ابصف گبرچ ردت گبري
يُمّه يا بعد عمري
▪️▪️▪️▪️▪️
يالفراگچ صعب أمره او نابت بالگلُب سهمه
او هاي الفرگه لحسينچ اوّل فاجعه او لچمه
ابو اليمّه انكسر گلبه صفه إسمه أبو الهضمه
او بعد ما يعرف الراحه النامت بالتراب اُمّه

رحيل الأم أمُر يهضُم
الفارگ امّه بي يدري
يُمّه يا بعد عمري
▪️▪️▪️▪️▪️
الدهر بهمومه واجروحه من هسّه تولّاني
من زغري وگف ضدّي انوح ابحرگه خلّاني
يفاطم بابچ او ناره فِتح بوّابة احزاني
رسملي كربله او همها واللوعات راواني

الي وضّح سبي او مذبح
بيّن فاجعة كسري
يُمّه يا بعد عمري
▪️▪️▪️▪️▪️
نار الوجّت اعله الباب تلهب بالخيم باچر
يحبيبه او غربتچ هاي بيّه اتصير بالعاشر
أهلي او ربعي اباوعهم ذبايح والعدو فاجر
او زينب عينها تنظر دمّي او لحمي بالحافر

الخيم تلهب عله زينب
واتضل حايره ابخدري
يُمّه يا بعد عمري
▪️▪️▪️▪️▪️
بالطف يالزچيّه انخاچ يوم الموعِده يحضر
من اوگع عله التربان الي اتحضريني اتنطّر
تشوفين الشمِر گاعد ابصدري يگطع المنحر
جدّامچ ييمّه اهناك جسمي اعظامه تتكسّر

يسلبوني يوذروني
دمّي اعله الترب يجري
يُمّه يا بعد عمري
▪️▪️▪️▪️▪️
ابو الحسن الوائلي

ايكابر علي چيف او يباوع
ابخد فاطمه مطبوعه اصابع
بت نبي ابعمره ياهو سامع
اتموت او گلبها اهموم شابع
▪️▪️▪️▪️▪️
اعظم الله أجوركم وأجر بقية الله صاحب الزمان
عجّل الله فرجه
سائلين الله أن يرزقنا طلب ثأرِها مع إمامٍ منصور من أهلِ بيت محمّد

▪️▪️▪️▪️▪️
التقن ام البنين او فاطمه الزهره
سويّه اتشابگن بالدمعه والحسره
▪️▪️▪️▪️▪️
عگب ما ماتت ام الاربعه الطيبين
بالجنّه التقت بالزهره عين بعين
شكرتها عله موقفها ويّه احسين
لان ضحّتله لمّن رادها النصره
▪️▪️▪️▪️▪️
تحاچي ام البنين ابصوت بي ونّه
شرايچ لاچن اكثر من خوات احنه
وانتي ابلا غرابه وحده من عدنه
مقامچ عالي يم عباس واشكبره
▪️▪️▪️▪️▪️
احچاياتي قليله ابحگچ ادريهم
يالعندچ مواقف صعبه اجازيهم
مثل اولادچ اولادي اعتبرتيهم
الف شكراً الچ يا فاطمه الحرّه
▪️▪️▪️▪️▪️
جزاءً ليچ يالضحّيتي بالاطياب
للحاجات رب القدره شاءچ باب
ما خاب اليگصده لا ابد ما خاب
واتسهلين كل واحد نخاچ امره
▪️▪️▪️▪️▪️
أجابتها ابكلام ام الوفي الماجد
اليخدمكم بعد يا فاطمه اشرايد
اذا ذكره يضل طول العمر خالد
يا محلاها منكم لو أخذ أجره
▪️▪️▪️▪️▪️
يزهره انتي او علي اتمنّه تعذروني
لان سوط الشمر ما ضارب امتوني
ولا وي زينب ابكل قسوه چتفوني
ولا ويّاها آنه امشيت متيسره
▪️▪️▪️▪️▪️
تگلها الزهره يوم المحكمه الاصعب
گبل ضلعي التكسّر عندي هالمطلب
چفوف الغيره ليش اتگطّعت يا رب
انتقِم من الگِطعها او خاطري جُبره
▪️▪️▪️▪️▪️
ابو الحسن الوائلي
العتبة الحسينيّة المقدسة
١٤٤٦هـ

#ام_البنين
‌▪️⁩‌▪️⁩‌▪️⁩‌▪️⁩‌▪️
حرمه حتّه الغيره حارت بيها
امعدّله او كل الوفه ماليها
ابغيره هيّه امحزّمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
شحچي عنها الكامِله و امكمّله
البالوفه فوگاهه ما واحِد عله
أقل شي ينگال عنها امعدّله
اربع انهار انطت الطف كربله

امْن الحُسين او فاطمه خجلانه
مثْل ابنها ماتت او عطشانه
او ما شِكت مِن الضمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ما مثلها أي مره او هذا مُحال
حرمه بيها انجمعت اوصاف الكمال
تضحيتها ما تمُر اعله الخيال
للحُسين انطت فده اربع جبال

واليحب لازِم يضحّي ابغالي
او ضحّت العدها فده للوالي
اربعه للموزمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
لبوه ما منها او مثلها اتلاگِي وين
باعت الدنيْه او شِرت حُب الحُسين
هيّه ما بخلت نطت لجله البنين
او هم تضحّيهُم لوَن عدها اربعين

العندي كِلّه للحُسين انطيته
امقصره گالت واني ما جازيته
اشگد عظيمه فاطِمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
بيها مِن احچي كلامي اشگد قليل
ما أجازي ابشرحي موقفها الثگيل
امْن اختصر الگه اختصاري هم طويل
يا مره التنطي الولِد كلهُم سبيل

ضحّت ابكلشي العِيُون اِحسينها
اِحسين ابو السجّاد أصبح دِينها
تفرح امْن اتكلِّمَه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
اموقّره اشما أنظُر اعليها أشوف
كعبه هيّه والوفه اعليها يطوف
فوگ خدها آيات مدمعها ذروف
بالمدينه او عاشت اجروح الطفوف

ابلا ولي شافتها رِجعت زينب
والجمُر ضل بيها عايِش يلهب
چم سهم بيها انرمه
والوفه ما اعظمه
‌▪️⁩‌▪️⁩‌▪️⁩‌▪️⁩‌▪️
تبچي كل ليله او جفنها ضل ذبول
ابعينها ليل الحزن باقي يطول
رغم كل التضحيْه تبچي او تگول
اني خاف امقصّره ويّه البتول

ماتت او مات الوفه ويّاهه
ابكل مسه لمّن مشت ينعاهه
او ينتحِب عالعالِمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ابتضحيتها بيِّنَت معنى الولاء
ثلث كواكِب والگمر انطت فداء
يا عظمها چن نهر فايِض عطاء
حُب علي خلّاهه اعله امْن السماء

كلها غيره او ماكو منها اهوايه
عاليْه او مهيوبه هيبة رايه
رايه رفّت بالسمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
صفر ١٤٤٤ هـ

#ام_البنين
▪️▪️▪️▪️▪️
لو شفت نفسك حزين
نادي يا أم البنين
▪️▪️▪️▪️▪️
لو همومك طالِعه
او حتّه عينك دامِعه
نادي ام الاربعه

هايه ام گلْب الحنين
نادي يا ام البنين
▪️▪️▪️▪️▪️
انخاهه لو عندك جرِح
ما تعوفك منجرِح
اتشيله حمْل المنطرِح

ما يضل گلبك طعين
نادي يا ام البنين
▪️▪️▪️▪️▪️
اوياهه احچي مُطمئِن
خايِب اترِد لا تضِن
اتردّك ابلايه حزِن

اعليها اقسِم بالحُسين
نادي يا ام البنين
▪️▪️▪️▪️▪️
خلّي نيتَك صافِيْه
بس اشاره كافِيْه
عندك اترِد عافِيْه

سامِعي ابرفع الادين
نادي يا ام البنين
▪️▪️▪️▪️▪️
هالكلام انوثِّقه
هيّه عِنْد الله ثِقه
اعتبره هَمّك ما بُقه

والطلب مگضي او امين
نادي يا ام البنين
▪️▪️▪️▪️▪️
لو شفِت همّك كُبر
نادي يا ام الگمر
انخاهه ما يبقه قهر

اشكثُر ما عندك انين
نادي يا ام البنين
▪️▪️▪️▪️▪️
احچايِتْي بالخاتِمه
ارفع ايدك للسِمه
او گلّه ربّي ابفاطِمه

انتخي او بيها استعين
نادي يا ام البنين
▪️▪️▪️▪️▪️
ابو الحسن الوائلي
جمادي الاول ١٤٤٤هـ

▪️بين المولىٰ امير المؤمنين
والسيِّدَة أُم البنين عليهِما السلام
▪️▪️▪️▪️▪️
يالشَايِلَه هيبة سِمه
بالغيره ياللي امحزِّمه
صرتِيلِي سنَد ما مِثلِچ احَد
▪️▪️▪️▪️▪️
يَمْ الوِفه والعاطِفه
اني علي يا فاطِمه الحُرّه
عُگْب اُم حسَن صرتِي وطَن
لايتامي لمَّن راحت الزهره
لمَّن مِشت بيهُم بُقَت
كسره ابفگِدها اْو عاشَوا ابحسره
ابحضنِچ دِفوا واتأمِّنوا
عدهُم أحِس انجُبرَت الكسره

مثلِچ مره لا ما اجِد
اني نِدَه وانتِي ورِد
لجروحي ضُمَد ما مِثلِچ احَد
▪️▪️▪️▪️▪️
ابدفْن الطهُر يَمْ الگبُر
گلْت اشيِعوّض فاطِمه عِندِي
هَل يا تُره تُوجَد مره
وِحده ابصِفات اُم الحسَن تِبدِي
نفسِي اسألِت واتوقعِت
لَن راح اكمّل هالعمُر وحدِي
يَمْ الفخَر لَن القدَر
عوّضنِي بيچ اْو صرتِي اُم وِلدِي

مثلِچ بعَد ثاني منو
غيرچ الِي ما صَح كفو
والبيتي عمَد ما مِثلِچ احَد
▪️▪️▪️▪️▪️
عِشنَه سِوه ماي اْو هوه
ما نِفترِگ واهوايْه تعنيلِي
اِبعيني اصِد لَجْل للولِد
صرتِي امهُم اْو تكمِلتِي صرتيلِي
اِبتَعبِي القَوِي بِيچ ارتوِي
اْو مثْل الضوه صرتِي ابدُجَه ليلِي
زوجَة ولِي أَنظُر الِي
اربَع حيادِر اِنتِي جِبتيلِي

اربَع ولِد جِبتِي الِي
واحِدهُم ابهيبَة علِي
واحِدهُم اسَد ما مِثلِچ احَد
▪️▪️▪️▪️▪️
ابفضْل القدَر يَمْ الگمَر
اِحنَه سِوه ابهذا العمُر عِشنه
اِسنِين العمُر صارَت تمُر
اْو عالحِلوه والمُرَّه تِشارَكنَه
حَد ما وِصَل يُوم الاجَل
لَن اِبْنَ مُلجِم سِيفه فارگنَه
بَس اِتِّضَح إِنَ الاصَح
اِحنَه سِوه ابسِيف الغدُر مِتنَه

سِيْف ابْنَ مُلجِم مِن طُبَر
راسِي اْو بعَد گلبِچ فُطَر
والمُوت اِبوعَد ما مِثلِچ احَد
▪️▪️▪️▪️▪️
مَر الزمَن اِسنِينه اَركِضَن
اْو مات الحسَن مِتأثِّر ابسَمَّه
ابسَم الغدُر راح الطهُر
وابمُوته بحبابَه تِرَك لچمَه
اْو حان الاهَم يوم الالم
طف كربله والفاجِعه العُظمَه
جاب الوعَد يُوم العهَد
اْو ضحّيْتِي اولادِچ لبُو اليِمَّه

اِنطيتِي ولْد الاربعَه
كِلمَن مُهِمَّة مصرعه
بالطَف اِعتِمَد ما مِثلِچ احَد
▪️▪️▪️▪️▪️
وِلدِچ وِفوا واِتعلِّموا
واحِدهُم اِبعزمَه العهَد صانَه
ضَنوَة علِي عِنْد الولِي
خِدَّامَه صاروا هُمَّه واِخوانَه
صُوت الشرَف مِنِّچ هِتَف
امْر الوصيَّه هذا عُنوانَه
اِحسِيْن المُهِم مُو بالاسِم
نادوه يسَيِّدنَه اْو يمَولانَه

موقِف بطُولِي موقفِچ
ماكو كلام اِيْوَصُّفِچ
ذِكرِچ ما خُمَد ما مِثلِچ احَد
▪️▪️▪️▪️▪️
بهالفاجِعَه هالاربعَه
واحِدهُم اِبطَف كربلَه وفَّه
الغِيره اخذِتَه اْو مِن غِيرِته
ضَل الرعُب مِن عِندَه يِتخَفَّه
فوگ الثره طاحوا تره
اِثلاثَة كواكِب ماتوا اِبعِفَّه
اْو فُوگ النهَر عِندِچ گُمَر
شايِل سِمَه عالمشرعَه اِبچَفَّه

ربِّيْتِي وِلدِچ عالوِفَه
الهسَّه ذكرهُم ما طُفَه
كلشي اِلهُم شِهَد ما مِثلِچ احَد
▪️▪️▪️▪️▪️
ابو الحسن الوائلي
ذو القعدة ١٤٤٤هـ

▪️اُم البنين صلوات الله عليها
▪️▪️▪️▪️▪️
حرمه تحتار السوالف بيها
او يطمئن الخوف لو صد ليها
يا كلام اللي يفِي
اُم ابو الغيره الوفِي
▪️▪️▪️▪️▪️
كلشي يحتار ابوصُف اُم البنين
الكلشي بيها بالشدايِد يستعين
مره مختلفه او مثلها اتلاگي وين
فدوه ضحّت كل ولدها للحسين

صَح ولدها اربعَه تدريهُم
بس ابو اليمّه تعزّه اعليهُم
وابمحبته تكتفِي
اُم ابو الغيره الوفِي
▪️▪️▪️▪️▪️
ازغير يبقه اشما حِچه بيها الكلام
العفّه من تذكرها توگف إحترام
هالوفيّه ابتضحيَتها للإِمام
نالت اعلى مقدِره واعلى مقام

لجْل الحسين العمُر منطيته
باعَت الدنيَه او رضاه شاريته
الجرح بيها ينشفِي
اُم ابو الغيره الوفِي
▪️▪️▪️▪️▪️
هالعظيمه صارت اُم بيت السور
زوجِته يختارهه حيدر گِدر
سمه هيّه عالِيه تبقه ابفخر
ابلايه شك بس السمه اتخلّف گمر

محّد ايضاهيها اُم عبّاسها
شايِلتها الغيره تاج ابراسها
رمز صارت معرفِي
اُم ابو الغيره الوفِي
▪️▪️▪️▪️▪️
للحميّه او للوفه صارت وطن
او رايه للنخوه ترف ابكل زمن
بامتحان الباري ضامرها اطمئَن
ضحّت ابكلشي ابثواب اُم الحسن

رخصت الغالي التملكه احوالها
ترضه عنها الزهره كل آمالها
كلشي يمها ينّفِي
اُم ابو الغيره الوفِي
▪️▪️▪️▪️▪️
وضّحت موقفها لحسين الولي
ابيوم راد الطلعه ابن حيدر علي
گالت الهُم ولدي اسمعوا ما يلي:
ما اعتبره ابني اليرد سالم الي

گالت الهم لو يريد ادماكم
انطوه يستاهل تره مولاكم
يا گلبها العاطفِي
اُم ابو الغيره الوفِي
▪️▪️▪️▪️▪️
من اجت زينب واهِي ابأصعب وضِع
اتگلها ولدچ سبِع طايح يم سبِع
اتوجّهت للطف واهِي اتنادي ابدمِع
بيكم امغزّر حليبي المنرضِع

عفيه يا ولدي رفعتم راسي
بيكم افخر والأخص عبّاسي
ثبت بيكم موقفِي
اُم ابو الغيره الوفِي
▪️▪️▪️▪️▪️
ماتت او عدله بقت اُم العطاء
ابفضل موقفها البطولي بالفداء
باقِيه ما تنمحِي او تنضح نقاء
ترِف بآفاق السمه مثل اللواء

كلشي يمضي او كل وكِت نلگاهه
خالد اُم الاربعه ذكراهه
اثر لا ما تنخفِي
اُم ابو الغيره الوفِي
▪️▪️▪️▪️▪️
ابو الحسن الوائلي
النجف الاشرف
جـ الاوّل ١٤٤٥هـ

لسان حال ام البنين ع:
▪️▪️▪️▪️▪️
ابعالم النوم
شفت كل احباب گلبي يمي موجودين
ابعالم النوم
شفت عباس او اخوته والعزيز احسين
▪️▪️▪️▪️▪️
ابحلم كل الولد صدّيت يمي اعيوني شافتهم
هلا او ميّة هلا ناديت بالمِنتظره جيّتهم
روحي تطلع اتمنّيت من مرّتني فرگتهم
من يوم المشوا ضلّيت أحسِب يمته رجعتهم

من الفراگ
ادعيت من الله يجيني او يمُر بيّه الموت
من الفراگ
چنْت اناديهم تعالوا واليرِد الصوت
▪️▪️▪️▪️▪️
لا ما حسّبت فد يوم كل احبابي افارگها
او من صار البعُد محتوم صرت لازم اصدّگها
المثلي اشما دمعها ادموم لو يجري يضل حگها
گلبي منچوي او مالوم او روحي العبره تخنگها

فگْد الاحباب
غربه معروف او مثيله ما تصح غربه
فگْد الاحباب
هالمصيبه اهوايه حتماً مؤلمه او صعبه
▪️▪️▪️▪️▪️
گلبي منّه فاض احساس او ضل يتجاره دمْع العين
لمّن باوعت عبّاس بعيوني بلا چفين
او ضلّيت الطُم اعله الراس لمّن باوعِت لحسين
گتله يا اَعز الناس يبني الغالي راسك وين

ما ردت هيچ
ردِت أفرح من اشوفك مو تبچيني
ما ردت هيچ
او راسك الصدري اضُمّه يُمّه بيديني
▪️▪️▪️▪️▪️
احسين الخلّه دمعي ايسيل شاغَت روحي من شفته
سِلب من عندي كل الحيل والمدمع دمه سلته
من كل ذنّي الاصعب حيل مو ذبحه او ضِمه شفته
الحارِگ گلبي دوس الخيل صارت عظمه طاحنته

ويلي يالخيل
الداست احسين ابحقدها او رضرضت عظمه
ويلي يالخيل
امن السحگ ضل ابرجلها قطع من لحمه
▪️▪️▪️▪️▪️
فزّيت ابگلب مرعوب او رد الگلبي كل همّه
من حگها لونها اتذوب واتضَل روحي متألمه
الملگه احبابي روحي اتلوب بس احبابي ما هُمّه
لا عبّاسي من هالصوب لا يمّي ابو اليمّه

اتسائلِت وين
اليمّي چانوا وين راحوا صوتي ناداهُم
اتسائلِت وين
گمت من حلمي وادوّر بلكت الگاهُم
▪️▪️▪️▪️▪️
كل اُم اُمنيتها اتكون لو منها جريب الموت
كل اولادها ايحضرون خاطر يم ولدها اتموت
بجنازتها من يمشون يبچون ابنحيب او صوت
ابچفهم لمّن ايرفعون تحله رفعة التابوت

تخلص الروح
والولِد يمها سويّه من يودعوها
تخلص الروح
او تدري بجنازتها هُمّه اللي يشيعوها
▪️▪️▪️▪️▪️
ابو الحسن الوائلي
جـ الاوّل ١٤٤٥هـ

▪️▪️▪️▪️▪️
معناها  بي نضل بحيره
نلگاها  للوفه چن ديره
هاي اُم البنين  هاي اُم البنين
▪️▪️▪️▪️▪️
حرمه عظيمه والوصف لا ما يوصّفها
هيّه قصيده والفخر دوماً يسولفها
حتّه الكرم يخجل إذا ذكروه موقفها
من تدعي ربها حاشه لو خالي يرد چفها

قدّرها  ابنفسه ربنه الواعد
والسرها  ما يقرّب واحد
هاي اُم البنين  هاي اُم البنين
▪️▪️▪️▪️▪️
ديرة حميّه والحچي ابمعناهه يتحيّر
انطاهه الأله اربع زلم كلهم مثل حيدر
چفها بأمر ربنه نعم ضل لازم المحور
هيّه سمه او بس السمه اتخلّف گمر تگدر

مهيوبه  او محّد ايضاهيها
إعجوبه  بالصفات البيها
هاي اُم البنين  هاي اُم البنين
▪️▪️▪️▪️▪️
رايه ترفرف عاليه دوم ابسمه القُدره
نذرت للحسين الولد كلهم حزِم ظهره
ضامرها متطمّن بقه او ما بخلت الحرّه
عذريني صاحت قصّرت مولاتي يالزهره

ما عندي  بس أمر تدروني
ما عندي  خادمه اتقبلوني
هاي اُم البنين  هاي اُم البنين
▪️▪️▪️▪️▪️
اُم الگمر هيّه ابوكت بيهْ الگصص شحّت
موقفها لحسين الإبي هالطاهره وضحت
ضحّت ولدها الخِدمِته بيهم سوه ضحّت
وابهذا موقفها نعم أم للفخر صُبحت

ابموقفها  للحُسين الغالي
نعرفها  راسها ضل عالي
هاي اُم البنين  هاي اُم البنين
▪️▪️▪️▪️▪️
حين الذي رد الضعن واكتشفت الحاصل
ابزينب تناشد راحت او منها الدمع هامل
اولادي خو ما قصّروا همّه وابو فاضل
انطيت الولد دون الخيم واحدهم ايقاتل

يا عيني  ولدي فدوه ادماهم
بشريني  باللي صار اوياهم
هاي اُم البنين  هاي اُم البنين
▪️▪️▪️▪️▪️
لو قصّروا ولدي انه اعليهم فلا أقبل
طمنتها زينب جاوبت ولدچ وفاهم ضل
طاحوا سويّه اعله الثره امعدّل وره امعدّل
يشهد عليهم للحشر يبقه النهر والتل

وفّايه  قصّروا حاشاهم
للـ آيه  رخّصوها ادماهم
هاي اُم البنين  هاي اُم البنين
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
خجلانه منّچ حيل يالزهره
عذريني لو ويّاكم امقصره
▪️▪️▪️▪️▪️
ام البنين او دمعِتي ابعيني
اعليكم ولا شي اعِز تدريني
ضحّيت يم الحسن ببنيني
لو قصّرت مولاتي اعذريني

گلبي جريح او بي تره الكسره
عذريني لو ويّاكم امقصره
▪️▪️▪️▪️▪️
كلشي املِك انطيته فده الكم
هوّه آنه شسوه ابلايه خِدمتكم
عن نذري بس ترضون اناشدكم
ضلّت بعد انتوا او حميّتكم

لو ما رضاكم ابقه متحسره
عذريني لو ويّاكم امقصره
▪️▪️▪️▪️▪️
دمعي اليسولف قصتي اباوعله
عذريني خاف الاربعه قِلّه
ما عندي اكثر خار انذرله
لو الف ولدي هم فده لجله

راحوله كلهم فدوه فد مرّه
عذريني لو ويّاكم امقصره
▪️▪️▪️▪️▪️
هذا الامر من عنده اتعذّب
خلّه جمُرتي بالگلُب تلهب
محّد سباني وانسبت زينب
ذاكه خدرها الطاهر اتسلّب

آنه سليمه او هيّه متيسره
عذريني لو ويّاكم امقصره
▪️▪️▪️▪️▪️
اشگد چنت اتمنّاها يعيوني
دون الحراير آنه ضربوني
اتمنّيت ويّاهن يأسروني
او عالناگه مسبيّه يصعدوني

محّد عليّه اتمعّن ابنظره
عذريني لو ويّاكم امقصره
▪️▪️▪️▪️▪️
چنت ادعي يا زهراء واتوقّع
واتمنّه لو عندي بنات اربع
يم العقيله ابحين تتلوّع
بيهن سياط المو زلم تلسع

ما صارت آنه اهوايه متعذره
عذريني لو ويّاكم امقصره
▪️▪️▪️▪️▪️
ابو الحسن الوائلي
١٤٤٥هـ

لهفي لمولاتي اُم البنين عليها السلام في آخر لحظات عمرها:
▪️▪️▪️▪️▪️
وصل موتي او زيّد ابروحي اللهيب
او ما اجاني ابموتتي حسين الحبيب
وحدي بالغربه اون وابچي ابنحيب
او ماكو من احبابي اي واحد قريب
▪️▪️▪️▪️▪️
عينيْ اعله الباب مشبوحه تصد
بلچيْ فد واحد امن اولادي يرد
حته اگولن ما نِسوا ذكري الولِد
هذا غسّل ذاكه نزلني اللحد
▪️▪️▪️▪️▪️
وحشه والحسبات زيدتلي القهر
او عله الوجنات الدمع تارك أثر
الي شيجيبه الطريح اعله النهر
يا مصابه خاطرِي او گلبي كِسر
▪️▪️▪️▪️▪️
الاشد من امصاب مگطوع الإدين
يهد كل حيلي گطِع راس الحُسين
واسمعِت فوگه جِلس شمر اللعين
او گلها يا زينب بگيتي ابلا معين
▪️▪️▪️▪️▪️
براسي تركض خيل واتكسّر ضلوع
او منظر بعيني لطفل ضامي يلوع
حگها من عيني دمه تجري الدموع
او گلبي مالومه يون وايضل جزوع
▪️▪️▪️▪️▪️
راح اموت او مهجتِي متألّمه
بالجِنان اشلون اجابل فاطمه
متني من السوط ما نازف دمه
او لا اديّه امْن الحبال امورّمه
▪️▪️▪️▪️▪️
فاطمه اتمنّاها لو تعذرني حيل
مثل زينب ما سبوني عالهزيل
آنه محّد شافني او بيّه يعيل
هيّه ضل ايشوفها وين الذليل
▪️▪️▪️▪️▪️
عندي خمس اولاد بس المشكله
ابموتي ما جوني ولِد عقْد الوله
راح اغمْض عيوني وآنه امعلعله
شكثُر ردته ايكون گبري ابكربله
▪️▪️▪️▪️▪️

▪️▪️▪️▪️▪️
لمّن انعه احسين وانقل مصرعه
اشلون احاچي ام البنين الاربعه
من تناشد عن ولِدها ابدمعة العين
▪️▪️▪️▪️▪️
يبو الباقر آنه حاضر
ابطاعتي الأمرك
الگلُب ذايب يالمصايب
كربله اتقهرك
گتلي بالهمّ يبن حذلم
هالوصل دورك
اسبگني واِسعه احسين إنعه
تدخل انتظرك

حين تنعه هناك تحضرلك مره
ابهونك اخبرها تراها امحيّره
فاگده اربع ولد كِلهم ميامين
▪️▪️▪️▪️▪️
عله مهلك سولفلها
من تصد ليها
إحچي مُجمل لا تفصّل
من تحاچيها
فگْد الاربع ما يهمها
لا تهِم ليها
خبر واحد من صدمته
الراح يحنيها

إحذر اتفصل الجره وكت الذبح
امن الحزن لابد تون او تنجرح
يا بشِر ام الغياره اتموت بالحين
▪️▪️▪️▪️▪️
شلون ادخل للمدينه
وانعه ابو الاكبر
صعبه أسرد هالمصيبه
گلبي ما يگدر
شلون اگلهُم يهل يثرب
گطعوا المنحر
أبو اليمّه صار جسمه
وذر واتطشّر

شلون اگلهُم عله صدره المنسحگ
والسهام الطاحت ابجسمه رشگ
آه يا جسمه التوزّع عله الصوبين
▪️▪️▪️▪️▪️
اسلمت أمري بهالرزيّه
للعلي القهّار
ادخلت ناعي للمدينه
والدمع مدرار
لا مُقاماً بعد الكم
يعمر بهالدار
احسين دامي او راسه باقي
عالرمح يندار

ابلا رجال او لا علم رد الضعن
بس علي واوياه عمّاته إجن
امن الطفل مذبوحه كلها لحد الحسين
▪️▪️▪️▪️▪️
حرمه اجتني ابظهر محني
گرّبت منّي
هذي امّه لابو فاضل
صاحت اسمعني
عوف ولدي بشِر عنهم
لا تخبّرني
عن إمامي او تاج راسي
الآن جاوبني

صحت يم الاربعه ابطف نينوه
البگه براسچ ولدچ انذبحوا سوه
فدوه گالت كل بنيني لابن ياسين
▪️▪️▪️▪️▪️
يبن حذلم اسمعِت صاحت
والدمع ساجم
ولدي واهلي وآنه فدوه
لكل بني فاطم
ما يهمني وضع ولدي
هذا مو لازم
ابو اسكينه المهم راجع
بالضعن سالم

لا تنطرينه انگطع منّه النحر
إجت زينب إخته محنيّة ظهر
شاركيها بهالمصيبه يم البْنين
▪️▪️▪️▪️▪️
ابو الحسن الوائلي

▪️▪️▪️▪️▪️
يالعندك قضيّه او حِيرتك بيها
اقره الحمد لام عباس تگضيها
▪️▪️▪️▪️▪️
يالعندك أمر حاط ابدليلك خوف
دمعك منّه غادي عالوجه مذروف
اقره الفاتحه لام البنين او شوف
محلوله قضيتك راح تلگيها
▪️▪️▪️▪️▪️
اذا أمرك صعب همّك ابد لَيزيد
ام عباس إنخاها شوكت متريد
سخيّه حاجتك تنطيها الك بالإيد
ركعتين الها لمّن تنوي تهديها
▪️▪️▪️▪️▪️
نعم باب الله باب ام البنين ايكون
يعني اللي تريده ايصيرلك مضمون
تمِدلك لو ردت من عدها چف العون
گلبها اتعوفك ابحيره مينطيها
▪️▪️▪️▪️▪️
لون تقسم عليها ابداعة المذبوح
ثق واعتقد همّك كلّه راح ايروح
آلامك تزول او ما تضل مجروح
راح امن الهضم روحك تعافيها
▪️▪️▪️▪️▪️
تضل بالعالي مهما دارت الايّام
بِت احزام بالشدّه سند واحزام
زلم ربّت ولا الهم مثيل ازلام
نذرتهم خدم لحسين واليها
▪️▪️▪️▪️▪️
أهي يا مَرْت ابو بالدنيه ضاهتها
تضحّي اولادها فدوه لشريچتها
نعم بس هيّه هاي الحره سوّتها
او نالت مرتبه محّد يضاهيها
▪️▪️▪️▪️▪️
ابو الحسن الوائلي

▪️في مولد السيّدة الطاهرة فاطمة الزهراء عليها السلام
▪️▪️▪️▪️▪️
قَدْ فَرِحَتْ ارْضٌ وَسَمَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
شَعّتْ نُورًاً وَاضِحُ كَانْا
جُزْءٌ مِنْ نُورِ الرَّحْمَنَْا
فَهِيَ بِمَدَارِ الاَزْمَانْا
تُعْطِي نُورَاً لِلَاكْوَانْا

نُورَاً مَا مِثْلُهُ قَدْ جَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
لَمْ تُخْلَقْ مِنْ طِينٍ ، اكْبَر
خَلَقَ الْبَارِي فَاطِمُ جَوْهَر
قَالَ اللَّهُ وَطٰه اسْتَبْشَر
"إِنَّا أَعْطَيْنَاكَ الْكَوْثَرَ"

بِكِتَابِ الْبَارِي الِانْبَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
سُبْحَانَ مُصَوّر صُورَتِهَا
وَمُسَوّي هَذِي هَيْبَتِهَا
فَخَدِيجَةُ لَوْ لَا عَظَمَتِهَا
مَا صَارَتْ فَاطِمَةُ ابْنَتِهَا

مَا أَعْظَمَ امْ الِابْنَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
تُفَّاحَةُ انَزَلَهَا الْبَارِيِ
نُورًا تَضْوِي لِلَانْوَارِ
فَاطِمَهَا الرَّبُّ مِنَ النَّارِ
فَاطِمَةٌ امُّ الِاطهَارِ

لِمُحِبِّيهَا الْجَنَّةِ شَاءَ
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
فَاءٌ: فَاطِمَةُ انْسِيّة
الْفٌ: انْفَاسٌ قُدْسِيّة
طَاءٌ: طَاهِرَةٌ وَرَضِيّة
مِيمٌ: مَعْنَاهَا مَرْضِيّة

وَ"الْهَمْزَةُ" تَحْوِي آلَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
سُبْحَانَ الْعَالِي السِّوّاهَا
تَخَلُوْا مِنْ سُوءِ خُلّاهَا
لَا شَيْءَ يُفَسّرُ مَعْنَاهَا
اذْ يَرْضَا الْبَارِي لِرِضَاهَا

مِثْلُ الْبَارِي فِي الْآرَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
مَا أَعْظَمَ خَالِقِهَا الِادْرَا
قَدِ ابْدَعَ فِي خَلْقِ الزُّهْرَا
سوّاها عَالِيَةَ الْقَدَرَا
فَهِيَ الْكُبْرَى بِنْتُ الْكُبْرَى

وبِها اسِّرَارُ الِاسْمَاء
وِلِدَتْ فَاطِمَةُ الزَّهْرَاء
▪️▪️▪️▪️▪️‏️️️️️
ابو الحسن الوائلي

▪️▪️▪️▪️▪️
حيّاك الله  أهلاً حيدر
العالم كلّه  الليله اتنوّر
▪️▪️▪️▪️▪️
الليله مستبشره الدنيه بالولاده الحيدريّه
السمه ويّ الأرض صاحت بالفرح هاي المسيّه
يا هلا ابفيصل البرزخ يا هلا ابحامي الحميّه

صوت الضماير يعتلي يا رحمة الرب العلي
يا هلا او مرحب يا علي الثره نادت والثريّه

كلشي الليله  ابجيتك أزهر
العالم كلّه  الليله اتنوّر
▪️▪️▪️▪️▪️
صوّرك ربك تعاله يا علي او ما سوّه مثلك
او عالبشر كلها يحيدر چان يهواك او يجلّك
گلّك اشتحتاج أطلب منّي تلگاني انفّذلك

من اسمي گلّك يالشهم اشتقّيت الك هذا الإسم
وابساگ عرشي منرسم هالكرامه كلها لجلك

وابكرسيّه  إسمك صوّر
العالم كلّه  الليله اتنوّر
▪️▪️▪️▪️▪️
قبل مينزّلك ربّك سيّدي من سمه القدره
عالأرض شاهد رسوله ابلا أخو يمّه ينصره
گلّك الباري أريد اتصير إنته احزام ظهره

غيرك يبو الحمله منو يصلح لابو الزهره كفو
رادك إله عون او أخو هذا رب السمه أمره

ابجيتك طه  ميشوف الشر
العالم كلّه  الليله اتنوّر
▪️▪️▪️▪️▪️
بالمهد بعدك يحيدر لچن عالي او كلشي حدرك
الگاع قبلك ظلمه چانت واشرقت من نور بدرك
يا عقل يگدر يفسرك علي او سر الباري سرّك

لو أشّرت بيدك فقط كلشي يصير ابلا غلط
بيدك الرب العالي حط الكون كلّه تحِت أمرك

كل الدنيه  ابچفّك تفتر
العالم كلّه  الليله اتنوّر
▪️▪️▪️▪️▪️
انشگ جدار الكعبه لجلك حتّه تستقبلها جيتك
وآنه گلبي انشگ جداره يالعزيز او صار بيتك
لم يلِد لا ولم يولد ابّيته بس انته لگيتك

يا حاضر ابكل المحن يا وطن للماله وطن
وابكل فخر يابو الحسن من صغر سنّي هويتك

انته المُنجي  يوم المحشر
العالم كلّه  الليله اتنوّر
▪️▪️▪️▪️▪️
ابو الحسن الوائلي

▪️▪️▪️▪️▪️
يضل حزني عله امصابك يمچتول
وانوح اعليك من الحول للحول
جرحك دوم عن البال ميزول
يبو امصاب الفلا تنساه الْعقول
جسمك عالرمل والراس مفصول
يصدر العافيه الساحگته الْخيول

على العهد مولاي يا أبا عبد الله في كل عام وفي كل يوم نخدِمُك بما يوفّقنا اللهُ تعالى له لنواسي امّك الزهراء وابنك المُنتظر المهدي عجٍل الله فرجه الشريف
نسأل الله القبول والتوفيق الدائم لخِدمَتِك يا سيّدي

▪️▪️▪️▪️▪️
كل عام وانت بخير مولاي
بلكت نشوفك عامنه الجاي
يا كعبه واحنه گلبونه اتطوفك
فرحتنه تكمل لمّن انشوفك
▪️▪️▪️▪️▪️
اللهم عجّل لوليّك الفرج

▪️▪️▪️▪️▪️
وين اهلها تحضرلها
الزينب ايدفنوها
▪️▪️▪️▪️▪️
زينب ابگاع اليسُر
يم شماته تحتضُر
ايجون اهلها تنتظُر
عله احرّ امن الجمُر

ايجون لازم آل هاشم
بالعجل يلفوها
▪️▪️▪️▪️▪️
عدها سبع اخوه لچِن
ما إجوا لاُم الحزِن
او لا حضر ليها إبِن
حتّه يتولّه الدفِن

عين زينب جيّه ترقب
تأمل ايشيعوها
▪️▪️▪️▪️▪️
بت علي من الزغُر
جابِته اجروح العمُر
شافت الموت اشكثُر
جرعِته ابذاك الكسُر

من سبوها او چتّفوها
او للقصر دخلوها
▪️▪️▪️▪️▪️
يا گلبها او حسرِته
احسين شافت ذبحِته
الخيل سِحگت جثّته
او عله الرمضه طشرِته

الفرس داسه ابرمح راسه
عمداً ايراووها
▪️▪️▪️▪️▪️
ابعينها الضيم انرسم
وابگلبها چم سهم
تشم دخّان الخيم
والنواظر تبچي دم

الشام والطف اعليها يكلف
ابلا رحم هضموها
▪️▪️▪️▪️▪️
الحرّه ناعيها نِعه
والنعش بالفاجعه
اهل ماكو التِرفعه
من جهاته الأربعه

ما إجوها يدفنوها
الإخوه ما حضروها
▪️▪️▪️▪️▪️
ابو الحسن الوائلي

▪️▪️▪️▪️▪️
گاع اليسُر گاع الكسُر
البيها سبوني بيها ادفِنوني
▪️▪️▪️▪️▪️
فوگ الفاجعه والنوح الشفتها اهناك والآلام
بعد هضم السبي كلّه ارد اردود لارض الشام
لا فك لا رحم حالي او ولا خلّاها عيني اتنام
عگب كلشي أرد تالي وأموت ابديرة الظلّام

والله صعب گاع الغرب
ليها ارجِعوني بيها ادفِنوني
▪️▪️▪️▪️▪️
شلون ادخل أرض بيها انسبيت او فرجه سوّوني
أرض طبّيتها اعله النوگ ابفرح و اطبول لاگوني
شفت مصلوب راس احسين وانه جدّامه وگفوني
شفتها اجروحه الـ براسه او سالت دمعة اعيوني

او مرّه شفت راسه ابطشِت
اشگد اهضِموني بيها ادفِنوني
▪️▪️▪️▪️▪️
أرض بيها اِدخلت ديوان اميّه ابكسري وابهضمي
إسمي اخواني ميگولوه او ناداني الرجس باسمي
مواقف بي شفت توجع او خلّتلي الگلُب مدمي
نحلْت امن الهضم بالشام او بان امن الجلد عظمي

بالذاكره اجروحه تره
غيّرلي لوني بيها ادفِنوني
▪️▪️▪️▪️▪️
أرض بيها عليّ ضحكت أهلها او دمعِتي حمره
صاحوا هايه فوگ النوگ إخْت المنگطع نحره
أخوها ابكربله اذبحناه او داس الحافر ابصدره
او كافلها انذبح عالماي او بقه لا يمنه لا يسره

صاح العدو ما عدها اخو
اشگد شتّموني بيها ادفِنوني
▪️▪️▪️▪️▪️
بيها شلون گبري ايصير أرض طاريها يخنگني
وإسمها اشما يجي ابّالي أحسّن ينلچم متني
ردت بالطف اموت اهناك منو ليها اليوصلني
ابّين احسين والعباس انه يمهم ردت دفني

ردت اندفن ابطف الحزن
بس ما خذوني بيها ادفِنوني
▪️▪️▪️▪️▪️
ابو الحسن الوائلي