▪️▪️▪️▪️▪️
يا زهراء  خدمكم يزهراء
▪️▪️▪️▪️▪️
فاطمه يا رحمة الله وانتي سرّه
اليوم منّچ هالخدم محتاجه نظره
گلوبنه تدريها عدها اوياچ عِشره
كلنه فدوه نروح لعيونچ يزهره

حبيناچ  او يولّون الاعداء
يا زهراء  خدمكم يزهراء
▪️▪️▪️▪️▪️
احنه لو ما خدمِتچ ما النه قيمه
الله لا يحرمنه هالنعمه العظيمه
او هايه متأكدين منها يالكريمه
حاضره مجلس عزاچ اللي نقيمه

واتسجلين  يمولاتي الاسماء
يا زهراء  خدمكم يزهراء
▪️▪️▪️▪️▪️
انتي يا فاطم شرفنه او بيچ نفخر
يالبتول احنه عطاشه وانتي كوثر
دون خدمه انعيش لا هيهات نگدر
الله خالقنه خدم من عالم الذر

محجوزين  الچ قبل الانشاء
يا زهراء  خدمكم يزهراء
▪️▪️▪️▪️▪️
العايش او يرجه رضاتچ هذا فاهم
الصدگ انتي فاطمه والباقي واهم
يحضر ابوحده لعزائچ ماكو خادم
ابدعوه منچ هوّه يحضرله يفاطم

انتي الأُم  نعم واحنه ابناء
يا زهراء  خدمكم يزهراء
▪️▪️▪️▪️▪️
لو يمرنه فد أمر يصعب نصدله
من نكلفچ يم حسن چفّچ يحلّه
الباري من ابفاطمه نحلفك نگلّه
الأمور الصعبه كلها تصير سهله

وابطاريچ  تجي اجمل انباء
يا زهراء  خدمكم يزهراء
▪️▪️▪️▪️▪️
يالبتول انحلفچ ابوالد سُكينه
ابغيرنه ايخدموچ ابد لتبدلينه
خيرچ انريده يضل دايم علينه
من رحمتچ فاطمه لا تحرمينه

نترجاچ  يـ أغله الأعزاء
يا زهراء  خدمكم يزهراء
▪️▪️▪️▪️▪️
ابو الحسن الوائلي

ماتت فاطمه الزهره الزچيّه
الله يعين أهلها بهالرزيّه
كل البيت ظلمه بعينهم صار
طفت وي موتها انواره الزهيّه

أعظم الله أجر صاحب الزمان  وأجوركم باستشهاد مولاتنا الزهراء عليها السلام

▪️▪️▪️▪️▪️
الزهره اول بت نبي ايعصرونها
او بالقتل يا حسرتي ايجازونها
▪️▪️▪️▪️▪️
حرمه مهضومه ابوها منچتل
هجموا اعليها ثلثمية نذل
ابّابها النيران قبلوا تشتعل
ابدال ميحضرون وايواسونها
▪️▪️▪️▪️▪️
ابدال ميجبرون خاطرها الربع
بابها اعليها ابحقدهم يندفع
من عصرها الطاغيه طگ الضلع
والسياط انهالت اعله امتونها
▪️▪️▪️▪️▪️
شافت ابموت الابو كل الظلم
اثمنطعش عمره گلبها المنهضم
ينسطر خد الترافه ابيا جرم
صارت امن السطره حمره اعيونها
▪️▪️▪️▪️▪️
من سطرها ابعينها مات الضوه
او گوّه من الكسر تشهگ بالهوه
صار بس الموت للزهره الدوه
ابكل صلافه اتعمدوا ايچتلونها
▪️▪️▪️▪️▪️
ابدون شك للناس باين هالوضع
كل بشر يرتاح من يجري الدمع
او بالأخص الحرمه لمّن تنفجع
او فاطمه من البچي ايمنعونها
▪️▪️▪️▪️▪️
استرجعت هاي الوديعه الطاهره
استرجعت مهضومه من اللي جره
استرجعت واضلوعها متكسّره
استرجعت والهضم غيّر لونها
▪️▪️▪️▪️▪️
ابو الحسن الوائلي

▪️▪️▪️▪️▪️
فگدچ كسرني
يمّه او هُضمني
هذا المصاب هذا المصاب
▪️▪️▪️▪️▪️
يمّه افراگ وجهچ زيّد اجروحي
خذاچ الموت منّي يا بعد روحي
رحيلچ يالزچيّه هدّم اصروحي
ليل انهار ابچي او يعتلي نوحي

وابكل مسيّه
ادموعي جريّه
عمري عذاب عمري عذاب
▪️▪️▪️▪️▪️
من رحتي ييمّه وحشه صار البيت
والگعداتنه او ضحكاتنه حنيت
يا ريت الأجل يوصل الي يا ريت
مكسور الگلُب من غيبتچ ضليت

دفنوا حياتي
وكل امنياتي
جوّه التراب جوّه التراب
▪️▪️▪️▪️▪️
حنانچ ذاك من عنده حرمني البين
عمرچ ما وصل يالزهره للعشرين
بعده ازغير واتيتّم وراچ احسين
خلّيتيني من دم أجري دمع العين

ابگلبي يزهره
ملتهبه جمره
دلّالي ذاب دلّالي ذاب
▪️▪️▪️▪️▪️
امّي فارگِتها او بالگلُب همّي
والله العين حگها بالبچي تعمي
عافت بس ذكرها الساكن ابدمي
او هنياله التراب اللي دفن امّي

اكبر هضيمه
موت العظيمه
اصعب غياب اصعب غياب
▪️▪️▪️▪️▪️
ابو الحسن الوائلي

▪️▪️▪️▪️▪️
هذا لطمنا للأبد عله الزچيّه الزهره
▪️▪️▪️▪️▪️
نبقه ندگ هذا الصدر عله الزچيّه الزهره
بالروح جمره تستعر عله الزچيّه الزهره
والگلُب يبقه منكسر عله الزچيّه الزهره
ما تنجبر هالكسره عله الزچيّه الزهره
▪️▪️▪️▪️▪️
اتضل المدامع ساجمه عله الزچيّه الزهره
ما نوفي لو نبچي دمه عله الزچيّه الزهره
وانواسي حمّاي الحمه عله الزچيّه الزهره
مكسور حيدر ظهره عله الزچيّه الزهره
▪️▪️▪️▪️▪️
گصدوا او بيديهم حطب عله الزچيّه الزهره
والباب دفعوه من لهب عله الزچيّه الزهره
يعتدي الظالم يا عجب عله الزچيّه الزهره
ايهجمون أفسد زمره عله الزچيّه الزهره
▪️▪️▪️▪️▪️
دفعوا الباب الطاهره عله الزچيّه الزهره
واسياطهم نزلت تره عله الزچيّه الزهره
تبچي الثريّه والثره عله الزچيّه الزهره
او ناح الجماد ابحسره عله الزچيّه الزهره
▪️▪️▪️▪️▪️
مجلسنه دومه ينّصب عله الزچيّه الزهره
نگطع مآتمنا صعب عله الزچيّه الزهره
خضره جراحات الگلُب عله الزچيّه الزهره
ننهضم مثل العتره عله الزچيّه الزهره
▪️▪️▪️▪️▪️
ابو الحسن الوائلي

▪️▪️▪️▪️▪️
يا ربِّي عجِّل بالفرج
▪️▪️▪️▪️▪️
يا ربِّي طالت غيبِته
عجِّل يرَب ابطلعِته
كلنا ترانه ابحاجِته
إنقِذ الناس امْن الحَرج
▪️▪️▪️▪️▪️
يا رَب نعَم طال البعِد
وانريده غايِبنه يرِد
لو رَد يرِد كلشِي ورِد
بيده يفُض هذا المَرج
▪️▪️▪️▪️▪️
انته معاه بس الأمَل
ابداً تره ما عِدنه حَل
عجِّل لابِن خير العمَل
آخِر وريث امْن الحُجج
▪️▪️▪️▪️▪️
صار الوضِع كلّش صعُب
يا سيّدي يچوي الگلُب
عدنه فقط دمْع اليصُب
واهوايه متأذيَه المُهج
▪️▪️▪️▪️▪️
عجِّل يرَب للمُنتقِم
هوّه الكفُو لهذا الإسِم
هوّه الأهَم مِن المهِم
بهذا الطلب صار اللُجج
▪️▪️▪️▪️▪️
ما نصطبِر أكثَر بعَد
والمُنتظَر عِنده وعَد
اثلاثَة عشَر دَم ما بُرد
يثأر لجلهِن لو خِرج
▪️▪️▪️▪️▪️
تمّت بعناية مولاي الحجة عجّل الله فرجه

ابو الحسن الوائلي
١٤٤٥هـ

▪️▪️▪️▪️▪️
ابداعة دمعتي إبريها ذمتي
آنه احس موتي قريب
اوداعة الله يالحبيب
▪️▪️▪️▪️▪️
علي يا نسمة هوه اتمر اعله صدري
محني ظهرك والسبب أدريهْ كسري
من اشوفك منقهر يزداد قهري
هواي تعّبتك بهاي الفتره ادري

ليل او نهاري بيّه تداري
يالصرت لجلي طبيب
اوداعة الله يالحبيب
▪️▪️▪️▪️▪️
أنعه نفسي يا علي راح امشي عنّك
هيّه چم ليله او تشيّعني اعله متنك
هذا أمْر الباري وآني امقدره حزنك
مو كسر ضلعي علي يلچمني ونّك

ابدمعك يحيدر گلبي تفطّر
هواي ياذيني النحيب
اوداعة الله يالحبيب
▪️▪️▪️▪️▪️
لا يهمك حالي يا حامي الحميّه
فدوِتك ضلعي علي والصار بيّه
حته لو چوّت النار چفوف اديّه
المهم انته بخير يالغالي عليّه

سهله المنيّه افراگك رزيّه
للحجر حزني يذيب
اوداعة الله يالحبيب
▪️▪️▪️▪️▪️
لو متت غسّلني بچفوفك يحيدر
وابظلام الليل إدفنّي او لتجهر
لا يشيّعني اللي خلّه خدّي أحمر
إخفي گبري ما أريده گبري يظهر

الطفّه شمعتي اشعنده ابدفنتي
لا يجي ابدفني الغريب
اوداعة الله يالحبيب
▪️▪️▪️▪️▪️
يمّك اولادي يماي اعيوني خلهم
يا علي ايّام هيّه او امشي عنهم
لا تحسّسهم يتامه او مَيته امهم
اصغار ولدي واليتم يجرح گلبهم

واوصيتي بيهم عينك عليهم
آنه عنكم راح اغيب
اوداعة الله يالحبيب
▪️▪️▪️▪️▪️
اوداعة الله والاله ايعظّم اجرك
او ملتقانه من ابن مُلجم يطبرك
بآخر اللحظات تبقه ابهذا عمرك
بشيلتي جرحك اشدّه من احضرك

وابموتك انحب وابچي اويه زينب
اعرف الموقف رهيب
اوداعة الله يالحبيب
▪️▪️▪️▪️▪️
ابو الحسن الوائلي

▪️▪️▪️▪️▪️
يا علي ابموت الحبيب
صرت يا حيدر غريب
▪️▪️▪️▪️▪️
دمعتك حگها دمه تصب يا حامي الحمه
انته فاگد فاطمه منّك اتعاله النحيب
صرت يا حيدر غريب
▪️▪️▪️▪️▪️
راحت الچانت ضوه واعز حتّه امن الهوه
ما إله جرحك دوه راحت الچانت طبيب
صرت يا حيدر غريب
▪️▪️▪️▪️▪️
طفت حيدر شمعِتك يا عظُمها امصيبِتك
الگوم گطعوا وردِتك حگّه لو راسك يشيب
صرت يا حيدر غريب
▪️▪️▪️▪️▪️
غسّلت جسم الطهُر والهوه ابريتك جمُر
لمست ايدك چم كسُر للقيامه ما يطيب
صرت يا حيدر غريب
▪️▪️▪️▪️▪️
خطوِتك تچوي الثره او شيّبت بالمگبره
من دفنت الطاهره ما متت والله عجيب
صرت يا حيدر غريب
▪️▪️▪️▪️▪️
شيّبك والله الحزن وانهدل ذاك المتن
يا علي حگّك تون والله هالموقف رهيب
صرت يا حيدر غريب
▪️▪️▪️▪️▪️
الدارك ابحسره تطب والدمع منّك يصب
الزهره نامت بالترب الحزن دلّالك يذيب
صرت يا حيدر غريب
▪️▪️▪️▪️▪️
ابو الحسن الوائلي

▪️▪️▪️▪️▪️
ضلع واحد يا علي شافت العين
منكسر واشحال لو شفت الحسين
بالطفوف اموسّد او دامي او طعين
اهدومه مسلوبه او محزوز الوتين
يا علي او بالخيل فوگاه ساحگين
بالسيوف اوصال جسمه امگطّعين
▪️▪️▪️▪️▪️
اعظم الله أجوركم وأجر بقية الله صاحب الزمان
عجّل الله فرجه
سائلين الله أن يرزقنا طلب ثأرِها مع إمامٍ منصور من أهلِ بيت محمّد

يا سيّدي يا صاحب الزمان
اللهُم عجّل لوليّك الفرج

▪️▪️▪️▪️▪️
يا شيعتي  آنه الزچيّه
يا شيعتي  عندي وصّيه
اتنصروني كون انتوا تضلّون
خففوا احزاني او لا تزَيدون  يا شيعتي
▪️▪️▪️▪️▪️
بسم رب الرحمه والعزّ والجلاله
آنه فاطم رحمة الباري تعاله
لكُم يا شيعة علي عندي رساله
للوگف ضدّي او يأيّد بالضلاله

قطعاً تره  الما هزّه دمعي
قطعاً تره  ياذيلي ضلعي
فتحوا گلبكم گبْل لعيون
خففوا احزاني او لا تزَيدون  يا شيعتي
▪️▪️▪️▪️▪️
الديني ضحّيت العمُر كلّه او حياتي
اثمنطعش عمري او ذبح حلمي مماتي
اچبيره عند الله اتعرِف كِلها ابغلاتي
او رغم كلشي الطاغي زيّد نايباتي

لا ما حُفظ  حُرمة محمّد
لا ما حُفظ  واتجاوز الحد
ملعون گولوا الثاني ملعون
خففوا احزاني او لا تزَيدون  يا شيعتي
▪️▪️▪️▪️▪️
لجل ديني قدّمت ضلعي او جنيني
او لجل عيناكم يشيعه حمره عيني
اكسروا ضلعي بس ولا كسروا يقيني
ابقه اردّد علي اَميري او هوّه ديني

ما تنمحي  عندي عقيده
ما تنحمي  ديني الصميده
صيحوا معاي او ما تخسرون
خففوا احزاني او لا تزَيدون  يا شيعتي
▪️▪️▪️▪️▪️
الأشد من كسر الضلع والصار بيّه
ايدافعون البعض عالهجموا عليّه
العذُر مو كافي الدليل اعله القضيّه
هذا ويّه اللي هِجم يخلد سويّه

يوم الحشر  ميفيده يندم
يوم الحشر  يصفه ابجهنّم
اجهنّم ترحّب بالينكرون
خففوا احزاني او لا تزَيدون  يا شيعتي
▪️▪️▪️▪️▪️
عالدفع بابي او هِتك بچفوفه ستري
عنّه صار اكبر دليل اخفيته قبري
اجه نادم من فعِلته ايريد عذري
لچن ما سامحته ابداً والله يدري

يهل البخت  ناس السقيفه
يهل البخت  لا مو شريفه
وادم ردايه او هذا مضمون
خففوا احزاني او لا تزَيدون  يا شيعتي
▪️▪️▪️▪️▪️
باچر ابني المهدي كل حقّي يظهره
يبني گبري والبقيع ايجعله حضره
ينتقم وايصيح لبّيكِ يزهره
او يصلب الشيخين بيده عله شجره

ثار الضلع  لو ناده أسمع
ثار الضلع  بچفوفه يرجع
لابني أريدنكم تنصرون
خففوا احزاني او لا تزَيدون  يا شيعتي
▪️▪️▪️▪️▪️
ابو الحسن الوائلي
تمّت برعاية صاحب الزمان عج

▪️▪️▪️▪️▪️
اعذركم آني اتحلمون والذمّه ما أبريها
▪️▪️▪️▪️▪️
انته او رفيجك جيت تتعذّرلي
عذرينه يا فاطم سمعت اتگلّي
يا عذر هذا او انته كاتل طفلي
هذا العذر ما مقبول يالأوّل او ثانيها
▪️▪️▪️▪️▪️
اسأل الناس الساچنه المعموره
يابت نبي قبلي ابحقد معصوره
چفها احترگ واضلوعها مكسوره
يابت نبي لمّن مات هجموا اصحابه اعليها
▪️▪️▪️▪️▪️
جيتوني شنهو الفايده متندمين
وانتم كسرتم ضلع سيْد الكونين
ابقه عليكم ساخطه يالشيخين
اللعنه عليكم كل يوم وابكل فرض أحچيها
▪️▪️▪️▪️▪️
اذّت الرب اهواي هاي الصفعه
او إنتم سبب آلامي المتفرعه
يالمالكم وكْت الشِدايد فزعه
إنتم تضمّون الروس او حامي الحمه ينهيها
▪️▪️▪️▪️▪️
انتم كفو معروفه بس ابوحده
انتم كفو من عدنه بس بالشرده
والمرتضى يوگف ابوجه الشِدّه
محّد غلبكم هيهات والشرده فزتم بيها
▪️▪️▪️▪️▪️
يالتدّعون اصحاب ابويه الهادي
تاذوني عدكم هالعمل شي عادي
بالرفسه مات اصغر ولد باولادي
عدكم يظلّام اگلوب بس الحقد ماليها
▪️▪️▪️▪️▪️
الما عنده غِيره يستحي ما معقول
او منّي الشفاعه لا تضن راح اتنول
يوم القيامه احسابك اهناك ايطول
انته واليوگف ويّاك اجهنّم لكم تاليها
▪️▪️▪️▪️▪️
ابو الحسن الوائلي

▪️▪️▪️▪️▪️
انهدم صبري انكسر ظهري
يُمّه يا بعد عمري
▪️▪️▪️▪️▪️
يزهرة روحي آنه حسين يالفراگچ هدم حيلي
مشيتي او من عگب عيناچ ييمّه ما نمت ليلي
عليچ ابچي واون باقي واشعر كلشي يبچيلي
كلشي امن ايدي خل ايروح المهم انتي تردّيلي

صبح يُمّه العمُر ظلمه
او خلّاني أوِن دهري
يُمّه يا بعد عمري
▪️▪️▪️▪️▪️
من حگّي عله افراگچ أنوح او أذرف المدمع
او ترافة روحچ الحلوه وسافه نامت ابمضجع
مو هيّن جمر فگدچ واحس بي بالگلُب يلسع
صدگ كلّه جمالچ ذاك راح او ما بعد يرجع

جرحتيني كسرتيني
ابصف گبرچ ردت گبري
يُمّه يا بعد عمري
▪️▪️▪️▪️▪️
يالفراگچ صعب أمره او نابت بالگلُب سهمه
او هاي الفرگه لحسينچ اوّل فاجعه او لچمه
ابو اليمّه انكسر گلبه صفه إسمه أبو الهضمه
او بعد ما يعرف الراحه النامت بالتراب اُمّه

رحيل الأم أمُر يهضُم
الفارگ امّه بي يدري
يُمّه يا بعد عمري
▪️▪️▪️▪️▪️
الدهر بهمومه واجروحه من هسّه تولّاني
من زغري وگف ضدّي انوح ابحرگه خلّاني
يفاطم بابچ او ناره فِتح بوّابة احزاني
رسملي كربله او همها واللوعات راواني

الي وضّح سبي او مذبح
بيّن فاجعة كسري
يُمّه يا بعد عمري
▪️▪️▪️▪️▪️
نار الوجّت اعله الباب تلهب بالخيم باچر
يحبيبه او غربتچ هاي بيّه اتصير بالعاشر
أهلي او ربعي اباوعهم ذبايح والعدو فاجر
او زينب عينها تنظر دمّي او لحمي بالحافر

الخيم تلهب عله زينب
واتضل حايره ابخدري
يُمّه يا بعد عمري
▪️▪️▪️▪️▪️
بالطف يالزچيّه انخاچ يوم الموعِده يحضر
من اوگع عله التربان الي اتحضريني اتنطّر
تشوفين الشمِر گاعد ابصدري يگطع المنحر
جدّامچ ييمّه اهناك جسمي اعظامه تتكسّر

يسلبوني يوذروني
دمّي اعله الترب يجري
يُمّه يا بعد عمري
▪️▪️▪️▪️▪️
ابو الحسن الوائلي

ايكابر علي چيف او يباوع
ابخد فاطمه مطبوعه اصابع
بت نبي ابعمره ياهو سامع
اتموت او گلبها اهموم شابع
▪️▪️▪️▪️▪️
اعظم الله أجوركم وأجر بقية الله صاحب الزمان
عجّل الله فرجه
سائلين الله أن يرزقنا طلب ثأرِها مع إمامٍ منصور من أهلِ بيت محمّد

▪️▪️▪️▪️▪️
التقن ام البنين او فاطمه الزهره
سويّه اتشابگن بالدمعه والحسره
▪️▪️▪️▪️▪️
عگب ما ماتت ام الاربعه الطيبين
بالجنّه التقت بالزهره عين بعين
شكرتها عله موقفها ويّه احسين
لان ضحّتله لمّن رادها النصره
▪️▪️▪️▪️▪️
تحاچي ام البنين ابصوت بي ونّه
شرايچ لاچن اكثر من خوات احنه
وانتي ابلا غرابه وحده من عدنه
مقامچ عالي يم عباس واشكبره
▪️▪️▪️▪️▪️
احچاياتي قليله ابحگچ ادريهم
يالعندچ مواقف صعبه اجازيهم
مثل اولادچ اولادي اعتبرتيهم
الف شكراً الچ يا فاطمه الحرّه
▪️▪️▪️▪️▪️
جزاءً ليچ يالضحّيتي بالاطياب
للحاجات رب القدره شاءچ باب
ما خاب اليگصده لا ابد ما خاب
واتسهلين كل واحد نخاچ امره
▪️▪️▪️▪️▪️
أجابتها ابكلام ام الوفي الماجد
اليخدمكم بعد يا فاطمه اشرايد
اذا ذكره يضل طول العمر خالد
يا محلاها منكم لو أخذ أجره
▪️▪️▪️▪️▪️
يزهره انتي او علي اتمنّه تعذروني
لان سوط الشمر ما ضارب امتوني
ولا وي زينب ابكل قسوه چتفوني
ولا ويّاها آنه امشيت متيسره
▪️▪️▪️▪️▪️
تگلها الزهره يوم المحكمه الاصعب
گبل ضلعي التكسّر عندي هالمطلب
چفوف الغيره ليش اتگطّعت يا رب
انتقِم من الگِطعها او خاطري جُبره
▪️▪️▪️▪️▪️
ابو الحسن الوائلي
العتبة الحسينيّة المقدسة
١٤٤٦هـ

#ام_البنين
‌▪️⁩‌▪️⁩‌▪️⁩‌▪️⁩‌▪️
حرمه حتّه الغيره حارت بيها
امعدّله او كل الوفه ماليها
ابغيره هيّه امحزّمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
شحچي عنها الكامِله و امكمّله
البالوفه فوگاهه ما واحِد عله
أقل شي ينگال عنها امعدّله
اربع انهار انطت الطف كربله

امْن الحُسين او فاطمه خجلانه
مثْل ابنها ماتت او عطشانه
او ما شِكت مِن الضمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ما مثلها أي مره او هذا مُحال
حرمه بيها انجمعت اوصاف الكمال
تضحيتها ما تمُر اعله الخيال
للحُسين انطت فده اربع جبال

واليحب لازِم يضحّي ابغالي
او ضحّت العدها فده للوالي
اربعه للموزمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
لبوه ما منها او مثلها اتلاگِي وين
باعت الدنيْه او شِرت حُب الحُسين
هيّه ما بخلت نطت لجله البنين
او هم تضحّيهُم لوَن عدها اربعين

العندي كِلّه للحُسين انطيته
امقصره گالت واني ما جازيته
اشگد عظيمه فاطِمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
بيها مِن احچي كلامي اشگد قليل
ما أجازي ابشرحي موقفها الثگيل
امْن اختصر الگه اختصاري هم طويل
يا مره التنطي الولِد كلهُم سبيل

ضحّت ابكلشي العِيُون اِحسينها
اِحسين ابو السجّاد أصبح دِينها
تفرح امْن اتكلِّمَه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
اموقّره اشما أنظُر اعليها أشوف
كعبه هيّه والوفه اعليها يطوف
فوگ خدها آيات مدمعها ذروف
بالمدينه او عاشت اجروح الطفوف

ابلا ولي شافتها رِجعت زينب
والجمُر ضل بيها عايِش يلهب
چم سهم بيها انرمه
والوفه ما اعظمه
‌▪️⁩‌▪️⁩‌▪️⁩‌▪️⁩‌▪️
تبچي كل ليله او جفنها ضل ذبول
ابعينها ليل الحزن باقي يطول
رغم كل التضحيْه تبچي او تگول
اني خاف امقصّره ويّه البتول

ماتت او مات الوفه ويّاهه
ابكل مسه لمّن مشت ينعاهه
او ينتحِب عالعالِمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ابتضحيتها بيِّنَت معنى الولاء
ثلث كواكِب والگمر انطت فداء
يا عظمها چن نهر فايِض عطاء
حُب علي خلّاهه اعله امْن السماء

كلها غيره او ماكو منها اهوايه
عاليْه او مهيوبه هيبة رايه
رايه رفّت بالسمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
صفر ١٤٤٤ هـ

#ام_البنين
▪️▪️▪️▪️▪️
لو شفت نفسك حزين
نادي يا أم البنين
▪️▪️▪️▪️▪️
لو همومك طالِعه
او حتّه عينك دامِعه
نادي ام الاربعه

هايه ام گلْب الحنين
نادي يا ام البنين
▪️▪️▪️▪️▪️
انخاهه لو عندك جرِح
ما تعوفك منجرِح
اتشيله حمْل المنطرِح

ما يضل گلبك طعين
نادي يا ام البنين
▪️▪️▪️▪️▪️
اوياهه احچي مُطمئِن
خايِب اترِد لا تضِن
اتردّك ابلايه حزِن

اعليها اقسِم بالحُسين
نادي يا ام البنين
▪️▪️▪️▪️▪️
خلّي نيتَك صافِيْه
بس اشاره كافِيْه
عندك اترِد عافِيْه

سامِعي ابرفع الادين
نادي يا ام البنين
▪️▪️▪️▪️▪️
هالكلام انوثِّقه
هيّه عِنْد الله ثِقه
اعتبره هَمّك ما بُقه

والطلب مگضي او امين
نادي يا ام البنين
▪️▪️▪️▪️▪️
لو شفِت همّك كُبر
نادي يا ام الگمر
انخاهه ما يبقه قهر

اشكثُر ما عندك انين
نادي يا ام البنين
▪️▪️▪️▪️▪️
احچايِتْي بالخاتِمه
ارفع ايدك للسِمه
او گلّه ربّي ابفاطِمه

انتخي او بيها استعين
نادي يا ام البنين
▪️▪️▪️▪️▪️
ابو الحسن الوائلي
جمادي الاول ١٤٤٤هـ

▪️بين المولىٰ امير المؤمنين
والسيِّدَة أُم البنين عليهِما السلام
▪️▪️▪️▪️▪️
يالشَايِلَه هيبة سِمه
بالغيره ياللي امحزِّمه
صرتِيلِي سنَد ما مِثلِچ احَد
▪️▪️▪️▪️▪️
يَمْ الوِفه والعاطِفه
اني علي يا فاطِمه الحُرّه
عُگْب اُم حسَن صرتِي وطَن
لايتامي لمَّن راحت الزهره
لمَّن مِشت بيهُم بُقَت
كسره ابفگِدها اْو عاشَوا ابحسره
ابحضنِچ دِفوا واتأمِّنوا
عدهُم أحِس انجُبرَت الكسره

مثلِچ مره لا ما اجِد
اني نِدَه وانتِي ورِد
لجروحي ضُمَد ما مِثلِچ احَد
▪️▪️▪️▪️▪️
ابدفْن الطهُر يَمْ الگبُر
گلْت اشيِعوّض فاطِمه عِندِي
هَل يا تُره تُوجَد مره
وِحده ابصِفات اُم الحسَن تِبدِي
نفسِي اسألِت واتوقعِت
لَن راح اكمّل هالعمُر وحدِي
يَمْ الفخَر لَن القدَر
عوّضنِي بيچ اْو صرتِي اُم وِلدِي

مثلِچ بعَد ثاني منو
غيرچ الِي ما صَح كفو
والبيتي عمَد ما مِثلِچ احَد
▪️▪️▪️▪️▪️
عِشنَه سِوه ماي اْو هوه
ما نِفترِگ واهوايْه تعنيلِي
اِبعيني اصِد لَجْل للولِد
صرتِي امهُم اْو تكمِلتِي صرتيلِي
اِبتَعبِي القَوِي بِيچ ارتوِي
اْو مثْل الضوه صرتِي ابدُجَه ليلِي
زوجَة ولِي أَنظُر الِي
اربَع حيادِر اِنتِي جِبتيلِي

اربَع ولِد جِبتِي الِي
واحِدهُم ابهيبَة علِي
واحِدهُم اسَد ما مِثلِچ احَد
▪️▪️▪️▪️▪️
ابفضْل القدَر يَمْ الگمَر
اِحنَه سِوه ابهذا العمُر عِشنه
اِسنِين العمُر صارَت تمُر
اْو عالحِلوه والمُرَّه تِشارَكنَه
حَد ما وِصَل يُوم الاجَل
لَن اِبْنَ مُلجِم سِيفه فارگنَه
بَس اِتِّضَح إِنَ الاصَح
اِحنَه سِوه ابسِيف الغدُر مِتنَه

سِيْف ابْنَ مُلجِم مِن طُبَر
راسِي اْو بعَد گلبِچ فُطَر
والمُوت اِبوعَد ما مِثلِچ احَد
▪️▪️▪️▪️▪️
مَر الزمَن اِسنِينه اَركِضَن
اْو مات الحسَن مِتأثِّر ابسَمَّه
ابسَم الغدُر راح الطهُر
وابمُوته بحبابَه تِرَك لچمَه
اْو حان الاهَم يوم الالم
طف كربله والفاجِعه العُظمَه
جاب الوعَد يُوم العهَد
اْو ضحّيْتِي اولادِچ لبُو اليِمَّه

اِنطيتِي ولْد الاربعَه
كِلمَن مُهِمَّة مصرعه
بالطَف اِعتِمَد ما مِثلِچ احَد
▪️▪️▪️▪️▪️
وِلدِچ وِفوا واِتعلِّموا
واحِدهُم اِبعزمَه العهَد صانَه
ضَنوَة علِي عِنْد الولِي
خِدَّامَه صاروا هُمَّه واِخوانَه
صُوت الشرَف مِنِّچ هِتَف
امْر الوصيَّه هذا عُنوانَه
اِحسِيْن المُهِم مُو بالاسِم
نادوه يسَيِّدنَه اْو يمَولانَه

موقِف بطُولِي موقفِچ
ماكو كلام اِيْوَصُّفِچ
ذِكرِچ ما خُمَد ما مِثلِچ احَد
▪️▪️▪️▪️▪️
بهالفاجِعَه هالاربعَه
واحِدهُم اِبطَف كربلَه وفَّه
الغِيره اخذِتَه اْو مِن غِيرِته
ضَل الرعُب مِن عِندَه يِتخَفَّه
فوگ الثره طاحوا تره
اِثلاثَة كواكِب ماتوا اِبعِفَّه
اْو فُوگ النهَر عِندِچ گُمَر
شايِل سِمَه عالمشرعَه اِبچَفَّه

ربِّيْتِي وِلدِچ عالوِفَه
الهسَّه ذكرهُم ما طُفَه
كلشي اِلهُم شِهَد ما مِثلِچ احَد
▪️▪️▪️▪️▪️
ابو الحسن الوائلي
ذو القعدة ١٤٤٤هـ

▪️اُم البنين صلوات الله عليها
▪️▪️▪️▪️▪️
حرمه تحتار السوالف بيها
او يطمئن الخوف لو صد ليها
يا كلام اللي يفِي
اُم ابو الغيره الوفِي
▪️▪️▪️▪️▪️
كلشي يحتار ابوصُف اُم البنين
الكلشي بيها بالشدايِد يستعين
مره مختلفه او مثلها اتلاگي وين
فدوه ضحّت كل ولدها للحسين

صَح ولدها اربعَه تدريهُم
بس ابو اليمّه تعزّه اعليهُم
وابمحبته تكتفِي
اُم ابو الغيره الوفِي
▪️▪️▪️▪️▪️
ازغير يبقه اشما حِچه بيها الكلام
العفّه من تذكرها توگف إحترام
هالوفيّه ابتضحيَتها للإِمام
نالت اعلى مقدِره واعلى مقام

لجْل الحسين العمُر منطيته
باعَت الدنيَه او رضاه شاريته
الجرح بيها ينشفِي
اُم ابو الغيره الوفِي
▪️▪️▪️▪️▪️
هالعظيمه صارت اُم بيت السور
زوجِته يختارهه حيدر گِدر
سمه هيّه عالِيه تبقه ابفخر
ابلايه شك بس السمه اتخلّف گمر

محّد ايضاهيها اُم عبّاسها
شايِلتها الغيره تاج ابراسها
رمز صارت معرفِي
اُم ابو الغيره الوفِي
▪️▪️▪️▪️▪️
للحميّه او للوفه صارت وطن
او رايه للنخوه ترف ابكل زمن
بامتحان الباري ضامرها اطمئَن
ضحّت ابكلشي ابثواب اُم الحسن

رخصت الغالي التملكه احوالها
ترضه عنها الزهره كل آمالها
كلشي يمها ينّفِي
اُم ابو الغيره الوفِي
▪️▪️▪️▪️▪️
وضّحت موقفها لحسين الولي
ابيوم راد الطلعه ابن حيدر علي
گالت الهُم ولدي اسمعوا ما يلي:
ما اعتبره ابني اليرد سالم الي

گالت الهم لو يريد ادماكم
انطوه يستاهل تره مولاكم
يا گلبها العاطفِي
اُم ابو الغيره الوفِي
▪️▪️▪️▪️▪️
من اجت زينب واهِي ابأصعب وضِع
اتگلها ولدچ سبِع طايح يم سبِع
اتوجّهت للطف واهِي اتنادي ابدمِع
بيكم امغزّر حليبي المنرضِع

عفيه يا ولدي رفعتم راسي
بيكم افخر والأخص عبّاسي
ثبت بيكم موقفِي
اُم ابو الغيره الوفِي
▪️▪️▪️▪️▪️
ماتت او عدله بقت اُم العطاء
ابفضل موقفها البطولي بالفداء
باقِيه ما تنمحِي او تنضح نقاء
ترِف بآفاق السمه مثل اللواء

كلشي يمضي او كل وكِت نلگاهه
خالد اُم الاربعه ذكراهه
اثر لا ما تنخفِي
اُم ابو الغيره الوفِي
▪️▪️▪️▪️▪️
ابو الحسن الوائلي
النجف الاشرف
جـ الاوّل ١٤٤٥هـ

لسان حال ام البنين ع:
▪️▪️▪️▪️▪️
ابعالم النوم
شفت كل احباب گلبي يمي موجودين
ابعالم النوم
شفت عباس او اخوته والعزيز احسين
▪️▪️▪️▪️▪️
ابحلم كل الولد صدّيت يمي اعيوني شافتهم
هلا او ميّة هلا ناديت بالمِنتظره جيّتهم
روحي تطلع اتمنّيت من مرّتني فرگتهم
من يوم المشوا ضلّيت أحسِب يمته رجعتهم

من الفراگ
ادعيت من الله يجيني او يمُر بيّه الموت
من الفراگ
چنْت اناديهم تعالوا واليرِد الصوت
▪️▪️▪️▪️▪️
لا ما حسّبت فد يوم كل احبابي افارگها
او من صار البعُد محتوم صرت لازم اصدّگها
المثلي اشما دمعها ادموم لو يجري يضل حگها
گلبي منچوي او مالوم او روحي العبره تخنگها

فگْد الاحباب
غربه معروف او مثيله ما تصح غربه
فگْد الاحباب
هالمصيبه اهوايه حتماً مؤلمه او صعبه
▪️▪️▪️▪️▪️
گلبي منّه فاض احساس او ضل يتجاره دمْع العين
لمّن باوعت عبّاس بعيوني بلا چفين
او ضلّيت الطُم اعله الراس لمّن باوعِت لحسين
گتله يا اَعز الناس يبني الغالي راسك وين

ما ردت هيچ
ردِت أفرح من اشوفك مو تبچيني
ما ردت هيچ
او راسك الصدري اضُمّه يُمّه بيديني
▪️▪️▪️▪️▪️
احسين الخلّه دمعي ايسيل شاغَت روحي من شفته
سِلب من عندي كل الحيل والمدمع دمه سلته
من كل ذنّي الاصعب حيل مو ذبحه او ضِمه شفته
الحارِگ گلبي دوس الخيل صارت عظمه طاحنته

ويلي يالخيل
الداست احسين ابحقدها او رضرضت عظمه
ويلي يالخيل
امن السحگ ضل ابرجلها قطع من لحمه
▪️▪️▪️▪️▪️
فزّيت ابگلب مرعوب او رد الگلبي كل همّه
من حگها لونها اتذوب واتضَل روحي متألمه
الملگه احبابي روحي اتلوب بس احبابي ما هُمّه
لا عبّاسي من هالصوب لا يمّي ابو اليمّه

اتسائلِت وين
اليمّي چانوا وين راحوا صوتي ناداهُم
اتسائلِت وين
گمت من حلمي وادوّر بلكت الگاهُم
▪️▪️▪️▪️▪️
كل اُم اُمنيتها اتكون لو منها جريب الموت
كل اولادها ايحضرون خاطر يم ولدها اتموت
بجنازتها من يمشون يبچون ابنحيب او صوت
ابچفهم لمّن ايرفعون تحله رفعة التابوت

تخلص الروح
والولِد يمها سويّه من يودعوها
تخلص الروح
او تدري بجنازتها هُمّه اللي يشيعوها
▪️▪️▪️▪️▪️
ابو الحسن الوائلي
جـ الاوّل ١٤٤٥هـ

▪️▪️▪️▪️▪️
معناها  بي نضل بحيره
نلگاها  للوفه چن ديره
هاي اُم البنين  هاي اُم البنين
▪️▪️▪️▪️▪️
حرمه عظيمه والوصف لا ما يوصّفها
هيّه قصيده والفخر دوماً يسولفها
حتّه الكرم يخجل إذا ذكروه موقفها
من تدعي ربها حاشه لو خالي يرد چفها

قدّرها  ابنفسه ربنه الواعد
والسرها  ما يقرّب واحد
هاي اُم البنين  هاي اُم البنين
▪️▪️▪️▪️▪️
ديرة حميّه والحچي ابمعناهه يتحيّر
انطاهه الأله اربع زلم كلهم مثل حيدر
چفها بأمر ربنه نعم ضل لازم المحور
هيّه سمه او بس السمه اتخلّف گمر تگدر

مهيوبه  او محّد ايضاهيها
إعجوبه  بالصفات البيها
هاي اُم البنين  هاي اُم البنين
▪️▪️▪️▪️▪️
رايه ترفرف عاليه دوم ابسمه القُدره
نذرت للحسين الولد كلهم حزِم ظهره
ضامرها متطمّن بقه او ما بخلت الحرّه
عذريني صاحت قصّرت مولاتي يالزهره

ما عندي  بس أمر تدروني
ما عندي  خادمه اتقبلوني
هاي اُم البنين  هاي اُم البنين
▪️▪️▪️▪️▪️
اُم الگمر هيّه ابوكت بيهْ الگصص شحّت
موقفها لحسين الإبي هالطاهره وضحت
ضحّت ولدها الخِدمِته بيهم سوه ضحّت
وابهذا موقفها نعم أم للفخر صُبحت

ابموقفها  للحُسين الغالي
نعرفها  راسها ضل عالي
هاي اُم البنين  هاي اُم البنين
▪️▪️▪️▪️▪️
حين الذي رد الضعن واكتشفت الحاصل
ابزينب تناشد راحت او منها الدمع هامل
اولادي خو ما قصّروا همّه وابو فاضل
انطيت الولد دون الخيم واحدهم ايقاتل

يا عيني  ولدي فدوه ادماهم
بشريني  باللي صار اوياهم
هاي اُم البنين  هاي اُم البنين
▪️▪️▪️▪️▪️
لو قصّروا ولدي انه اعليهم فلا أقبل
طمنتها زينب جاوبت ولدچ وفاهم ضل
طاحوا سويّه اعله الثره امعدّل وره امعدّل
يشهد عليهم للحشر يبقه النهر والتل

وفّايه  قصّروا حاشاهم
للـ آيه  رخّصوها ادماهم
هاي اُم البنين  هاي اُم البنين
▪️▪️▪️▪️▪️
ابو الحسن الوائلي
١٤٤٥هـ