▪️▪️▪️▪️▪️
خويه يا عباس ترضه ابهايه
انسبي والغربه تمشي اويايه
▪️▪️▪️▪️▪️
اميسّره اگطع طريجي اعله الهزل
انته مو حادي الضعن يابو الفضل
من عگب چفّك يكض چفّي الحبل
يالطحت يم الفرات او مايه
▪️▪️▪️▪️▪️
وگع گلبي اوياك يم العلگمي
سهم لمصوبك ابگلبي منرمي
حرگت اعداكم عليّه امخيّمي
او عاينوا طولي يراعي الرايه
▪️▪️▪️▪️▪️
اگطعته دربي يالچفيل املوّعه
رمشي ابيض صار من الفاجعه
بُگت روحي تحوم يم المشرعه
صعبه علتي وانته بس ادوايه
▪️▪️▪️▪️▪️
انه البيّه المثل وابخدري انضرب
چم نذل يا حيف من عندي گرب
حامي ضعنچ ما فزعلچ يا عجب
احچاية الشامت ثگيله اهوايه
▪️▪️▪️▪️▪️
الهضمه من جابوا الي ماي الشرب
موقف ابداً مو سهل يدمي الگلُب
ابماي يرويني الگِطع نحرك صعب
انقهر يردوني كل الغايه
▪️▪️▪️▪️▪️
ابكربله المَر والجره گلبي مُرد
لا اخو منكم صفالي او لا ولد
منهو يابو الغيره يفزعلي بعد
وآنه صار اويه الغرب ممشايه
▪️▪️▪️▪️▪️
ابو الحسن الوائلي

▪️▪️▪️▪️▪️
زينب اهوايه چبير امصابها
اتأذّت اشگد ابفگد أحبابها
▪️▪️▪️▪️▪️
ايساعد الله اللي گلبها ضل جريح
والدمعها اعله الوجه أحمر يطيح
چم عزيز الشافته بالطف ذبيح
او عالترب جثته بقت بخضابها
▪️▪️▪️▪️▪️
يا گلُب يگدر عله همها الثگيل
الجبل ما يحتمل من عنده قليل
حگها ولله الفارگت مثل الچفيل
من يضل او ما يزول اصوابها
▪️▪️▪️▪️▪️
احسين اخوها الگضت ويّاه السنين
شافِته فوگ الرمل دامي او طعين
اگبال عيناها انگطع راس الحُسين
آ وا ويلاه چان اجوابها
▪️▪️▪️▪️▪️
اشلون ترتاح الأهلها اعله التراب
تنخه بيهم لچن ما تسمع جواب
مثل ما حرگوا عله امها الزهره باب
حرگت النيران كل اطنابها
▪️▪️▪️▪️▪️
يا حزنها الما عله واحد سده
امن الهضم دلّالها امورّم غده
عافها چافلها ما بين العده
رغم ما هوّه الحماها او جابها
▪️▪️▪️▪️▪️
من عگب كل المعزّه والدلال
صعدت ابلايه حمه فوگ الجِمال
اعليها تتفرّج غدت كل الرجال
الطاهره الما طلع ضل لحجابها
▪️▪️▪️▪️▪️
ابو الحسن الوائلي

▪️▪️▪️▪️▪️
يالهمّك اهوايه صعب ما ينحچي او ينگال
اسهام الزمان الصابتك يبن الحميّه اثگال
يا سيّدي يالمهدي  يا سيّدي يالمهدي
▪️▪️▪️▪️▪️
يالمبتعِد عن النظر بس بينه حاضر
عايش الحسره والالم لاچن تكابر
بعيونك ايّام السنه تحسبها عاشر
تذكر مصايب كربله والراس حاسر

عايش مصايب كربله الهمها صفه ماذيك
اموادع أخو ويّه أخو صوره تمر اعليك
يا سيّدي يالمهدي  يا سيّدي يالمهدي
▪️▪️▪️▪️▪️
عمرك محرّم سيّدي يالمهدي عشته
كل راحه بي ما شاهدِت متلوّع انته
صبح او مسه حگك اذا دمعك هِملته
تنظر على جدّك شمِر يگطع رگبته

اثنين ابوگعته اتراگضوا يالمهدي صوب احسين
شمْر الخنه الذبحه سعه او زينب تصد بالعين
يا سيّدي يالمهدي  يا سيّدي يالمهدي
▪️▪️▪️▪️▪️
اشما حاولِت تِغفه فلا عينك تغمُّض
تسمع الخيل الگامت ابجدّك ترترُض
راس الحسين اعله الرمح دنياك تعرض
ما آن مولاي الوعد واحزانك اتفُض

ليهسّه عبد الله الطفل تنصت أذانك ليهْ
عينك تباوع حرمله ابسهم الچتل يرميهْ
يا سيّدي يالمهدي  يا سيّدي يالمهدي
▪️▪️▪️▪️▪️
ماضِن هوه يالمنتظر بالريّه تشتم
تشتم دُخان اللي حرگ ذاك المخيّم
زينب تفر متراكضه بالتربه والدم
الله يعينك يالصرت متعايش الهم

اشلون انته عايش بالألم اسأل واريد اجواب
واتصد مصايب كربله الماكو مثلها امصاب
يا سيّدي يالمهدي  يا سيّدي يالمهدي
▪️▪️▪️▪️▪️
فوگ المصايب والمحن هاي التألمك
اهموم البشر يا سيّدي امزيّدته همّك
يا يوم سيفك تشهُره ابوجه اليظلمك
واحنه ابسلامه دائمه ايعيّشنه حُكمك

كلشي تراه ابعازتك واينادي يمته اتعود
هاي الأرض عدلك بقت محتاجه يالموعود
يا سيّدي يالمهدي  يا سيّدي يالمهدي
▪️▪️▪️▪️▪️
يمته تسد عين الشمس راية رجِعتك
فرّحنه خل ننسه الحزن كلّه ابطلِعتك
معقوله حد هسّه او بعد ما حان وكتك
امتانين يا ثار الله أن نسمع صرختك

ابهيبة علي يوم الترد هالدنيه ترعِدها
ثارات اهل بيتك سوه من ترجع اتردها
يا سيّدي يالمهدي  يا سيّدي يالمهدي
▪️▪️▪️▪️▪️
ابو الحسن الوائلي

▪️▪️▪️▪️▪️
طلعت والهضم مرسوم بالعين
تدوّر عن اثر من جسم الحسين
▪️▪️▪️▪️▪️
حِرگوها خِيمها ابعصر عاشور
بالليل اطلعَت و الظهر مكسور
تدوّر عن اخوها المات منحور
او تدير ابعينها ما شافت امعِين
▪️▪️▪️▪️▪️
ابمشيها بالولد ويلاه طاحت
لاچن عبرِته او للغالي راحت
تشم ريحة الخوّه ليها فاحت
وصلت عالعطر بين المطاعين
▪️▪️▪️▪️▪️
طاحت والصدر مخنوگ يمّه
واتقبله بعظُم نحره او تشمّه
تشوفه بعينها مسلوب هدمه
ميّتها رميّه ابغير تچفين
▪️▪️▪️▪️▪️
گلْب اختك يون واعليك مچوي
او عله فرگاك شط ادموع اسوّي
دوس الخيل لسّه بسمعي يدوي
ابسحگهم انظر اعظامك امكسرين
▪️▪️▪️▪️▪️
تنحب گامت او تصرخ يمظلوم
يبعد اختك المنها الحيل مهدوم
غريبه ابگيت خويه بين هالگوم
احشّم من او يفزع ليّه هالحين
▪️▪️▪️▪️▪️
يخوي الگوم من هجموا عليّه
چوت نار الخيم يحسين اديّه
نسه واطفال لاذوا شفت بيّه
وآنه اچبير همّي ابّين الاثنين
▪️▪️▪️▪️▪️
ابو الحسن الوائلي

▪️▪️▪️▪️▪️
واويلي على العطشَان
▪️▪️▪️▪️▪️
يتلوه بقه ابمهره   واويلي على العطشان
طاح ابدمه عالغبره  واويلي على العطشان
مطبور اثنعش طبره  واويلي على العطشان
گطعوا من گفاه نحره  واويلي على العطشان
او داست خيلهم صدره  واويلي على العطشان
▪️▪️▪️▪️▪️
طاح او طيحه مو سهله  واويلي على العطشان
او رد مهره يخبر اهله  واويلي على العطشان
اجروحه غيرت شكله  واويلي على العطشان
من راسه لحد رجله  واويلي على العطشان
احسين ابجسمه چم نبله  واويلي على العطشان
▪️▪️▪️▪️▪️
طاح او ماكو اليسنده  واويلي على العطشان
واتراب الارض لحده  واويلي على العطشان
لا أخ لا إبن عنده  واويلي على العطشان
صعبه اهوايه هالشِدّه  واويلي على العطشان
للماي انفطر چبده  واويلي على العطشان
▪️▪️▪️▪️▪️
طاح ابكثرة اجروحه  واويلي على العطشان
يهمس بس طلع نوحه  واويلي على العطشان
لخته عينه مشبوحه  واويلي على العطشان
ضلت عينه مفتوحه  واويلي على العطشان
صعدت للسمه روحه  واويلي على العطشان
▪️▪️▪️▪️▪️
طاح او چم جرح صابه  واويلي على العطشان
الظالم يرفس اصوابه  واويلي على العطشان
كلهم سلبوا اثيابه  واويلي على العطشان
تبقه الدمعه سچابه  واويلي على العطشان
اه يحسين وامصابه  واويلي على العطشان
▪️▪️▪️▪️▪️
ابو الحسن الوائلي

▪️▪️▪️▪️▪️
يـ اكثر واحد بهالليله مفجوع
الله يساعدك يابن الزچيّه

غايب بس مصاب حسين ما غاب
عن بالك ابكل صبح او مسيّه

يوميّه تشوف احسين مذبوح
او متگطع وصل بالغاضريّه

او ميفارگ اذانك كسر الضلوع
التنرض بالخيول الأعوجيّه

تسمع صوت زينب بالطف اتصيح
يبويه يا علي الحگ عليّه

مذبوحين اهلها اگبالها اتشوف
وابلا خيم ضعن الهاشميّه

چانت ما تشوف اخيالها الناس
او گادوها يبو صالح سبيّه

يا راحه تمر الفاگد احسين
گلبك شيّب بهاي الرزيّه

ضل بالشمس جسمه اثلاثه مطروح
وامگطّع وذر فوگ الوطيّه


چم عاشر اجه او ماجيت مولاي
ياللي امن الهضم مفطور چبدك

يالبثارك تشافي اجروح لحسين
سل سيفك او داوي صدر جدك
▪️▪️▪️▪️▪️
أعظَمَ اللهُ أجر صاحب الزّمان واُجورَنا بِمُصابِنا بِالحُسَينِ عليهِ السلام وَجَعَلَنا وَإيّاكُم مِن الطَّالِبينَ بِثأرِهِ مَعَ وَليِّهِ الإمام المَهديّ المنتظر المُنتقِم مِن آلِ مُحَمَّدٍ عليهم السلام

▪️▪️▪️▪️▪️
وا ويلي على المظلوم
وا ويلي على المظلوم
▪️▪️▪️▪️▪️
زينب شافتك واگع  وا ويلي على المظلوم
وابفيض الدمه ناكع
صاحت والكلب جازع
حيلي ابطيحتك مهدوم
وا ويلي على المظلوم
▪️▪️▪️▪️▪️
شافت حزنك او أمرك  وا ويلي على المظلوم
اختك حالها ايقهرك 
شمِر متربّع ابصدرك 
حزّه اگبالها نحرك 
لطمت والدمع مسجوم
وا ويلي على المظلوم
▪️▪️▪️▪️▪️
محتاره النسه بالبر  وا ويلي على المظلوم
فوگاها الخيم تسعر 
سمعت جوّه خيل الشر 
عظمك صار يتكسّر 
حاطوا عالنساء الگوم 
▪️▪️▪️▪️▪️
زينب حيل هضموها  وا ويلي على المظلوم
وابچم غالي فجعوها
الما يسوون شافوها
عگب الحامي ضربوها
ونّت والگلب مالوم
وا ويلي على المظلوم
▪️▪️▪️▪️▪️
راح النسوه يسبوهن  وا ويلي على المظلوم
عالمصرع يجيبوهن 
بس خاطر يلچموهن 
يا وسفه يچتفوهن 
زينب كافله امن اليوم
وا ويلي على المظلوم
▪️▪️▪️▪️▪️
ابو الحسن الوائلي

▪️▪️▪️▪️▪️
جسمك عله التربان متگطّعه اوصاله
او محّد يبو السجاد من الگاع شاله
▪️▪️▪️▪️▪️
عالرمضه متوزّع وصل جسمك يمظلوم
يا حسرِتي عگب السحگ سلبوك لهدوم
يومك محال او لا حصل مثله ابد يوم
والصارلك ما مر عله انسان او جراله
▪️▪️▪️▪️▪️
من الحوافر سيّدي ما سِلمت اضلوع
يحسين وابگلبك اثر رفستها مطبوع
وايلومني اللايم لون اجريها الدموع
والف او تسعميّة جرح كلشي بچاله
▪️▪️▪️▪️▪️
اثلاثه بُگيت ابكربله طايح رميّه
متوزّع ابحر الشمس والله رزيّه
منهو منيته الشابهت هاي المنيّه
وابنه ابحصيره ايجمّعه وايشوف حاله
▪️▪️▪️▪️▪️
زين العباد امن السبي اتعنّه الدفِنتك
مقهور گلبه او بالدمع يجمعها جثتك
جمّعك وابحسرة گلُب ناح الكسرتك
جسمك يبو اليمّه چفن لا ما لِگاله
▪️▪️▪️▪️▪️
كل مندفن راسه يوسدونه اعله خدّه
واشحال المگطّع وصل وابنه يصدّه
طفله الذي مذبوح باحضانه يوسده
متهنّي طفله بالذبح موش ابدلاله
▪️▪️▪️▪️▪️
حتّه العرش يا سيّدي لمصابك اهتز
واحمرّت آفاق السمه من نحرك انحز
ضحّيت للباري النفِس وابكلشي ينعز
وانطاك ارضه والسمه الباري تعاله
▪️▪️▪️▪️▪️
ابو الحسن الوائلي

▪️▪️▪️▪️▪️
اجروح اشكثر بيّه غميجه
والفلك كلّه ابعيني ضيجه
▪️▪️▪️▪️▪️
آ يالطفوف اهواي كلفه
الشافت حزنها تنسه تغفه
المنظر اليلچم من أوصفه
يابس ابذبحه احسين ريجه
▪️▪️▪️▪️▪️
اگبالي شفت گطعوا المنحر
حگه الدمع من يسچب أحمر
الهيّجني عگب الذبح أكثر
من بالخيم شبّت حريجه
▪️▪️▪️▪️▪️
آنه اللي محّد شاف طولي
صاروا الوادم ينظرولي
يا آل هاشم دلحگولي
حشّمت بس ابلا نتيجه
▪️▪️▪️▪️▪️
عگب الخدر ذاك او مقامي
ضلّيت وحدي گلبي دامي
تالي اَنسبي وابلا مُحامي
درب اليسر أگطع طريجه
▪️▪️▪️▪️▪️
طف كربله الغيّرلي وضعي
والسبب هوه ابسِيل دمعي
خلّاني اون كل يوم وانعي
هالأسم لجروحي يِهَيجه
▪️▪️▪️▪️▪️
ابو الحسن الوائلي
العتبة الحسينيّة المقدسة

▪️▪️▪️▪️▪️
احسين شفته انگطع نحره
او هم شفت عمّاتك اسره
خلصت اسنينك ابكسره
تذكر امصاب الحُسين
▪️▪️▪️▪️▪️
سيّدي الله اليعينك 
بالدمع تمّت سنينك
كربله زيدت ونينك 
خلّتك دومك حزين
▪️▪️▪️▪️▪️
ما شفت راحه ابحياتك 
سيّدي اللحظة مماتك
بس مصارع ذكرياتك 
والأهل متوسّدين
▪️▪️▪️▪️▪️
عاشت اللوعه ابمهجتك 
تهِد كل الحيل ونتك
صلّت امن اجلوس عمتك 
باوعتها يالحنين
▪️▪️▪️▪️▪️
صرت من العلّه ناحل
وانسبيت ابگلُب ذابل
انته والنسوه الثواكل 
عالهزل متگيّدين
▪️▪️▪️▪️▪️
ابناظرك شفت ابو اليمّه 
باقي فوگ الگاع جسمه
اتعبِت من جِيته تلمّه 
ابخيل عظمه طاحنين
▪️▪️▪️▪️▪️
يهد كل الحيل وضعك 
ذكريات الطف تفجعك
اتخلطه ويّ الماي دمعك 
او تبدي زادك بالونين
▪️▪️▪️▪️▪️
ابو الحسن الوائلي

‌▪️⁩‌▪️⁩‌▪️⁩‌▪️⁩‌▪️
چم مصيبه او معضله
عيشتني كربله
چم رزيّه .. چم رزيّه
‌▪️⁩‌▪️⁩‌▪️⁩‌▪️⁩‌▪️
آنه ابن الحُسين المنخطف لوني
مصيبه اشچم مصيبه شافت اعيوني
شفت اهلي ضحايه او حيل قهروني
وانه ابحيره تو عليل او هم يگيدوني

بالطفوف اشچم جرح
گلبي للهم ينفتح
يا أذيّه .. يا أذيّه
‌▪️⁩‌▪️⁩‌▪️⁩‌▪️⁩‌▪️
ابمصاب الطف احسّن گلبي يتكسّر
الصبر وي روحي يكبر والحزن يكبر
احتسب لله او روحي عالصبر تضطر
او ما گطعت اعيوني المدمع الاحمر

بالطفوف الفاجعه
ولله گلبي اتگطّعه
الغاضريّه .. الغاضريّه
‌▪️⁩‌▪️⁩‌▪️⁩‌▪️⁩‌▪️
شفت بالطف مصايب والكلب فاير
الصدر ديوان اشوفه وضيّف الحافر
الحافر من ابويه كل ضلع كاسر
وره هذا السحگ ضل جسمه متناثر

اصبر او زادي الصبر
گلبي بالطف منكسر
لوعه بيّه .. لوعه بيّه
‌▪️⁩‌▪️⁩‌▪️⁩‌▪️⁩‌▪️
ابوي المات ضامي ابحسرة الگطره
ابوي المِن گفاه منّه انگطع نحره
ابوي الكل ضلوع البيهْ متكسره
ابوي المنّه ما سلمت ولا وذره

والمصيبه المؤلمه
جسم ضنوة فاطمه
عالوطيّه .. عالوطيّه
‌▪️⁩‌▪️⁩‌▪️⁩‌▪️⁩‌▪️
رحت درب السبايا منشده بالي
واحزان الطفوف الغيّرن حالي
اتذكّر هلي او يبگه الدمع هالي
ادفنت بالغاضريه عندي چم غالي

او نگطع بدروب السبي
بيد اجانب ننسبي
صعبه هيّه .. صعبه هيّه
‌▪️⁩‌▪️⁩‌▪️⁩‌▪️⁩‌▪️
رزايه كربله طبعت عله ذهني
عشتها بالجروح او زيّدت حزني
انوح ابحسرتي او ما ينگطع ونّي
الذبح والگيد اكثر شي يلچّمني

تكبر اجروح الگلب
ويلي والمدمع يصب
الهم عليّه .. الهم عليّه
‌▪️⁩‌▪️⁩‌▪️⁩‌▪️⁩‌▪️
اذا شفت الاكل يبقه الدمع يجري
يجي ابّالي الحُسين او ينهدم صبري
يهل دمعي اعله خدّي او يلتهب جمري
مصاب الطف چبير او زيّد ابكسري

والدي جسمه انسحگ
مات ضامي يا خلگ
بالمنيّه .. بالمنيّه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي

▪️▪️▪️▪️▪️
زينب والقهر والليل والآهات والحسره
رغم كل السده والصار گلبها ما نفذ صبره
على زينب  أويلاه
على زينب  أويلاه
▪️▪️▪️▪️▪️
الله يعينها التنظر أهلها طرحه عالرمضه
ابعيناها الضوه مذبوح والليل ابحزن يگضه
ابد ما شافت الراحه او ألم صار الگلب نبضه
ويلي اشچم هضم منّه ابحزنها تسچب العبره

على زينب  أويلاه
على زينب  أويلاه
▪️▪️▪️▪️▪️
شافت چم جرح خلّه گلبها ينحب ابحرگه
والماتوا هله كلهم اشما يبچي او يون حگّه
من الطف بگت للموت بالحسرات مختنگه
ابريّتها يطب دخّان الهوه لو شمّته الحره

على زينب  أويلاه
على زينب  أويلاه
▪️▪️▪️▪️▪️
ابهمها اتصد عله العدوان تالي عالخدر دارت
او عگب عين الگمر عباس هيّه الكافله صارت
إلمن تحمي ما تدري ابنسه واطفالها احتارت
تربي ابعين صوب الماي مذبوح الوفه اتنظره

على زينب  أويلاه
على زينب  أويلاه
▪️▪️▪️▪️▪️
ركضت وادم ابلا خوف بالنار اعله خيمتها
او ركضت بت علي بالبر لجل تحفظ عبايتها
بت الشرف صعبه اهواي بين الغربه وگفتها
تدوّر ماكو كل فزّاع واتشوف العده كثره

على زينب  أويلاه
على زينب  أويلاه
▪️▪️▪️▪️▪️
يا لوعه التهد الحيل والتلچمها والتقهر
حين الفارِگت عباس لو ذبحة ابو الاكبر
لو من تستمع بالخيل عظم الغالي يتكسّر
لو لمّن خذوها الگوم فوگ الناگه متيسره

على زينب  أويلاه
على زينب  أويلاه
▪️▪️▪️▪️▪️
ابو الحسن الوائلي

▪️▪️▪️▪️▪️
انه ميّت چنت من قبل لا أنسَم
من شفت الأبو غارگ ابفيض الدم
گلبي انشلع ولله ابحالتي يعلم
ما تسكن هيهات اجروحي

مصايب كربله ماكو اليضاهيها
او كل هذا الوجود اتألّم اعليها
الها اعيوني ما گطعت بواچيها
حد ما گطعت ريتي انفاسي

كل صبح او مسه أبچي لأن مفجوع
أنظر راس عالي اعله الرمح مرفوع
واسمع ركض خيل او طحن مال اضلوع
والطم عالراس ابچفّيني

كل يوميّه لو رادت اعيوني اتنام
تتراودلي صورة حرگ مال اخيام
او ما بين الزلم تركض نسه وايتام
واتدوّر عن مشرد ليها

الطف كلما أذكره اتگوم روحي اتشوط
واشما تصد عيني اوصال ابوي اتحوط
الماي او زادي يصفه ابمدمعي مخلوط
اشگد فاجعني احسين امصابه
▪️▪️▪️▪️▪️

امن الطف للمنيّه امعاشِر الهم
تبچي او صار كل عمرك مُحرّم
تنصب سيّدي ابكل يوم مأتم
لحد ما ختم عمرك سيّدي السَم

▪️▪️▪️▪️▪️
اعظم الله اجر صاحب الزمان واجوركم بإستشهاد سيدنا ومولانا الامام الرابع زين العابدين علي بن الحسين السجّاد عليه السلام

▪️الاربعين
▪️▪️▪️▪️▪️
"مِن البَحرِ اِلىٰ النحرِ"
مسيره بالعشِگ تسرِي
▪️▪️▪️▪️▪️
حان الوعد لاذان العشگ يِبدِي
صار الگلُب بِينه الكربله يِحدِي
نمشِي سِوه اْو كِل حچْيْ العدُو اِنعدِّي
اويانَه نحِس يمشِي الكربله المَهدِي

النطَه كِلمَه مِشَه اِبهِمّه
اِبعزِم وَي "صاحِبَ العصرِ"
▪️▪️▪️▪️▪️
ابهذا الوعد دوم ابكُل سنَه نِحضر
للمنگطِع مِنه اِبكربله المنحَر
لجل المِشت مسبيَّه ابلهيب الحَر
نمشِي مثِل مَشيَتها اِبجمُر يِسعر

اِبسبِي راحَت اِبصمِت ناحَت
گلبنه بهالأمُر يدرِي
▪️▪️▪️▪️▪️
اِبهذا المشِي نوصَل للحُسيْن اِنزور
اْو مِن ينتهِي ننطُرها السنيْن اِتدور
اِنواسي الاِجت مَوجُوعَه اِبگلُب مَكسور
ركبَت هزِل ما ركبَت مَحامِل نُور

اِبمدامِعها اِبمواجِعها
فقَط رَب السِمه يدرِي
▪️▪️▪️▪️▪️
اِنريد اِبحزِن نوصَل للولِي اْو گبرَه
اْو يفرُق مشِي الزايِر عَن مشِي الحُرّه
اِحنَه المشِي هذا اِبراحَه نِنتظرَه
اْو هِيّه اِرجِعَت مِن ضيْم السبِي اْو قهرَه

اِرجِعت تالِي بِلا والِي
اِبقهرها والدمِع يجرِي
▪️▪️▪️▪️▪️
نسعِي اْو عسَه اِنعيْش اللوعَه والمأسَاة
اْو هَم تنخطِي كِل خُطوه اِبلهيْب الذَات
رَد الضعَن قران اْو حِمَل أيآت
بِي كُل شخُص رَد اْو يذرِف الدمعَات

الحزِن بيهُم نواسيهُم
اِجوا مِن لوعَة الأسرِ
▪️▪️▪️▪️▪️
واقِع صفَه واِبهذا الدرُب ملمُوس
اِبعيْن العلِي كِلمَن معتنِي محروس
اِشما بَيّنِت گلبَك بالحزِن متروس
اكبَر حزِن للجابَت معاهه الروس

اِبكسُر خاطِر مِن العاشِر
بِقه بيها الجمُر يسرِي
▪️▪️▪️▪️▪️
كِلمَن خِدَم ذَب حيلَه اْو وفَه بالديْن
يِدعِي تضَل يُوميَه الخِدامَه اِتحيْن
قصدَه فقَط واحِد ما إلَه قصديْن
حتّه يِضَل يِخدِم باليِزور اِحسيْن

الگلُب هايِم أضَل خادِم
اِبخدِمتَه مِنعگِد عُمرِي
▪️▪️▪️▪️▪️
ابو الحسن الوائلي
محرم ١٤٤٥هـ

▪️كأني بمولاتي ليلى عند قبر مولاي الحسين عليهما السلام
▪️▪️▪️▪️▪️
جيتَك حزينه امْن السبِي حبيبي
مِن غيبِتَك ما فَض بعَد نحيبي
اه اه اه اه
اه اه حُسين
▪️▪️▪️▪️▪️
يا حبيب الگلُب جيت مِن غُربتِي
باربعينَك انه راجِعه اِبدمعتِي
جيتَك اْو جايِبه كل حزِن رحلتِي
مِن ذبِحتك وانه اِتغيِّرت حالتِي

جِيتك يغالي اْو جايِبه مصابِي
اْو ما ينحمِل يا سيِّدِي عذابِي
اه اه اه اه
اه اه حُسين
▪️▪️▪️▪️▪️
اِنته كلشِي الي اْو خيمتِي والحِمه
عالبشَر افتخِر زوجِي ابِن فاطِمه
اِنته روحِي اْو رحِت اْو ما صرِت سالِمه
وانِي مِن روحِتَك روحِي مِتألِمَه

عذّبنِي فگدَك يا نظَر عُيونِي
وانِي الغرُب مِن غيبِتَك ولونِي
اه اه اه اه
اه اه حُسين
▪️▪️▪️▪️▪️
كتلِي مِنّچ ردِت صبرِچ اِعله الحمِل
اْو گلِت دومِي معَك كلشِي راح احتمِل
اِبچَف ادينَك شفِت هودَجِي يِعتدِل
اْو عگْب اِدينَك وسَف اركب اِعله الهزِل

مِن الدلال اعله الهزِل سبيَه
امشِي وسافه اِمچتّفَه اديَه
اه اه اه اه
اه اه حُسين
▪️▪️▪️▪️▪️
شرْد اسولف عله يا جرِح يا ألم
وانِي مِن ذبحِتك حيلِي كلّه اِنهِدم
مِن طحِت عالثره والگلُب ما سِلم
تدرِي ضَل السبِي يرمِي گلبِي اِبسهم

چَان الگمَر حارِس گبُل علينَه
اْو عگبه الشمِر يحديها للضعينَه
اه اه اه اه
اه اه حُسين
▪️▪️▪️▪️▪️
جيتَك امْن السبِي خاطرِي مِنكسُر
اْو بَس جروح اْو حزِن جايِبه امْن اليِسُر
كلشِي عنِّي رحَل بَس بقالِي الصبُر
الهِسّه جمْر الخِيم بالگلُب يِستعُر

يا خيمتِي الطاحَت غفُل عليَه
نار الخِيم تلهَب بعدها بيَه
اه اه اه اه
اه اه حُسين
▪️▪️▪️▪️▪️
حالِي ما يِنوصُف وانِي بارض الغرُب
كلشِي أحمِل سهِل بَس غِيابَك صعُب
الكِسرت اِبخاطرِي للقصُور امْن اطُب
واني شفْت الأشَد بالشتِم والضرُب

اِسياط العِده حيل الظهر تِگطعَه
اْو سَب اْو شتِم صرنَه فقَط نِسمعَه
اه اه اه اه
اه اه حُسين
▪️▪️▪️▪️▪️
مِن اسولف اكو بالگلُب چم جرِح
حالِي بعدك تره حالِي ما يِنشرِح
ياللي ماكو شخُص ثانِي مثلَك يصِح
عينَك اعله النسَه واِنته فُوگ الرمِح

طول الدرُب مِن نمشِي يا فُؤادِي
مِن نعثر اِسم الله النحر يِنادي
اه اه اه اه
اه اه حُسين
▪️▪️▪️▪️▪️
سيّدي اْو مسندِي اِبليلي اشُوفَك گمَر
طولك اْو هيبِتَك منها ضَل بَس نحر
حزِن طَف كربله رمحه بيَه اِستقَر
واِنته نمْت اِبگبُر وانِي عشْت اِبقهَر

اني ام علِي الاكبر يغالي اكلمَك
اتمنّه امُوت اْو گبري يصفَه يمَّك
اه اه اه اه
اه اه حُسين
▪️▪️▪️▪️▪️
ابو الحسن الوائلي
صفر ١٤٤٥هـ

▪️الامام الحسين "عليه السلام" يناشد المواكب الحسينية يوم الاربعين :
▪️▪️▪️▪️▪️
وين هالرايات چانت وينها
مِن بگه بالطف وحيد اِحسينها
▪️▪️▪️▪️▪️
وين هالرايات چانت والالوف
والحشُود الگاصده اْو هاي الصفوف
اِبيوم ضلّ اِحسين وحده بالطفوف
لمَن رادت روحه شخْص اِيعينها
▪️▪️▪️▪️▪️
وين چانت يُوم عاشِر هِيه ويْن
اِبيُوم ناصِر چان مِحتاج الحُسيْن
وحده ضَل اِبلا نصير اْو لا مُعيْن
واكثرية الناس باعَت دينها
▪️▪️▪️▪️▪️
لوَن هالرايات والوادِم اِجَت
اِبفزع لِحسيْن العزيز اْو جاهِدَت
دُونَه بِذلت روحها اْو چان اِدفعَت
الضيم والشَر عَن ابِن ياسينها
▪️▪️▪️▪️▪️
لوَن هاي اعدادها الما تنحصِي
حاضره يُوم اللي ضَل ابْن الوصِي
اِتلبّي أمْر اِحسينها اْو ما يِنعصِي
أمره والأرواح اِله فادينها
▪️▪️▪️▪️▪️
لوَن هالرايات چانَت حاضِره
لابُو اليِمّه اِبيُوم گِطعوا مَنحره
چان تلگاها صفُوف اِمحضّره
المُوتها اْو مَتعُوفَه وحده اِبحينها
▪️▪️▪️▪️▪️
لوَن حضرت كربله ويَه الانصار
اْو تدخِل اِبفزعَه سوه يُوم المغار
اِمناثر الدَم يِصبَح اِيمين اْو يِسار
اْو تِفعَل افعال الصعُب تبيينها
▪️▪️▪️▪️▪️
لوَن حضرت هالمجاميع العِظام
اِبيُوم عاشِر مِن طُلب فزعَه الإمام
يا سبِع يوصَل لعِد حَد الخِيام
والوصَل حدها تگُص رجلينها
▪️▪️▪️▪️▪️
لوَن چانت هاي كِل هاي الرجال
حاضره بالعاشِر اِبيُوم النزال
منو يِتجاسر اْو يوصَل للعيال
والتجاسَر منها تُفگِس عينها
▪️▪️▪️▪️▪️
لوَن حضرت هالجمُوع الموزمَه
چان محّد يعتنِي لاِمخيّمَه
اْو ماكو واحِد يصِل حَد بِت فاطِمَه
اْو ماكو نسوه اِبلا ولي اِمسلبينها
▪️▪️▪️▪️▪️
ريت هالرايات يوم الضَل وحيد
تفدِي لجْل اِحسين هيَه چَم وريد
چان ما جرّوا النسوه كالعبيد
اْو ما تتِم لايْزيدها اِمچتفينها
▪️▪️▪️▪️▪️
ابو الحسن الوائلي
محرم ١٤٤٥هـ

▪️المصيبة: رجوع زينب في الاربعين

▪️▪️▪️▪️▪️
انه زينب يخوتِي يالجفيتونِي
اوَّل مرَّه اصيح اْو ما تحضرونِي
ابَد مو مِن عوايِدكُم تبچّونِي
مِحتاره اْو دمعاتِي اِتلالِي
محّد يدرِي اِشصار اِبحالي
▪️▪️▪️▪️▪️
انه ما جيت أأذيكُم نعَم تدرُون
بَس الذي صار اِوياي ابد مَيهُون
مِن گد البچِي ما ضلِّي شُوف اِعيُون
اندهكُم بَس مَتحضرونِي
بالخَد يهمِل دمْع اِعيونِي
▪️▪️▪️▪️▪️
اجيت امْن السبي اْو تهمِل دمُوع العين
الليالِي الفرِّگتنَه تسعه واثلاثين
التقينه اِردود لاچِن انتوا مدفونِين
زينب بالهَم رجعَت ليكُم
مدفونِين اِتصِد اِعليكُم
▪️▪️▪️▪️▪️
مِن حرْگ المُخيَّم مختنِگ صدري
وانه الفارگِت شخصين اِكسروا ظهري
بين اِگبوركم ريتَه اِنحُفر گبري
والمُوت اَتيقَّن يِحلالِي
ما بين اِحسين اْو كفّالِي
▪️▪️▪️▪️▪️
كأنِّي بها على قبر الحسين عليه السلام

يحسين يا عزنه او ولينه
مِن السبِي جتّي الضعينه
دگعد اْو شُوف اشصار بينه
واِشحالنه خويَه امْن اجينه
مِن يوم صرتم عايفينه
يحسينَّه وليَه اِنولينه
نسوه اْو بلا حامِي بگينه
اْو لِسبانَه صاروا گايدينه
اْو مِن عگْب الْچفوف الحنينه
صار الحبِل لازِم ادينه
اْو مُو عالهِوادِج مِن مشينه
عالهزِل خويَه اِمرچّبينه
ريتَك تصِد عينك علينه
يالعايف العيله حزينه
تگعِد يبُو الأكبَر رجينه
اْو بينه ترِد لارض المدينه
▪️▪️▪️▪️▪️
▪️عند وصولها الى قبر كفيلها ابي الفضْل العبّاس سلام الله عليه

عبّاس جيتَ اْو جرحِي ويّاي
والنار تسعَر خويَه بِحشاي
عطشانَه اشُوفنَّك يروَّاي
يا ماي منِّي ماخذَك ماي
مفجوعه جيْت اْو مالي كِل راي
والحال خويَه يِجرح اِهواي
عبَّاس جيتَك أبِث شكواي
لو چنِت مانَك بِيَّه درَّاي
دكعِد يخُوي اْو شُوف بلواي
گلِّي يكافِل تِقبَل اِبهاي؟:
عگْب الخدِر لنها يوفَّاي
صارت عليَّه اِتباوِع اِعداي
اعرف يخَي يا نُور عيناي
اِبهذا عتابِي تنجرِح جاي
بس جيْت اگلَّك تعرِف اِبهاي؟
اِبلا حامِي وحدي صار مسراي
▪️▪️▪️▪️▪️
ابو الحسن الوائلي
صفَر ١٤٤٥هـ

السيدة زينب ع:
▪️▪️▪️▪️▪️
من السبي لگبوركم جيت
اعليكم يخوتي ابقر ونيت
هنيالي لو يمكم توفيت
او بيناتكم لحدي تمنّيت

يمكم لفيت ابضيم بلواي
صوغه جبتها الروس وياي
تعبانه من هذا السبي اهواي
دربي گضيته ابدمع عيناي

ما هاد يهل البخت ونّي
واجروح دهري شيّبني
يخواني من رحتوا اجنّي
وين اليلچمن صوّبنّي

من عگب كل الصار بيّه
امن الفاجعه المرّت عليّه
تالي ارجعت للغاضريّه
الأخذت احبابي من اديّه

يحسين جيتك گلبي تعبان
باليسر شفت اشكال والوان
اعتذر عفتك عله التربان
مسحوگ وامگطّع او عريان

يحسين بيّه الجمر يسلع
ابيا عين اطب بيتك امن ارجع
يا ريت يمك روحي تطلع
ابقه المن او گلبي تگطّع

جيتك لچن بنتك يبوها
اهناك الردايه لوّعوها
ابذاك الطشت لمّن اجوها
شافت الراس او موّتوها

عباس اريد ابچي اعله گبره
مخنوگه ريتي ارد اشم عطره
او لازم ابو فاضل أشكره
الـ بالحرب خلّه اوجوه صفره

عباس يصبي عين اختك
يا حامل الرايه او جربتك
هيبه چنت حتّه ابوگعتك
ابرايِتك سِلمت بس قبضتك

يمضحّي بچفوفك لاخيّك
بالحر مشينه عگب فيّك
امن الراس لو ما يشع ضيّك
ابظلمه بقينه او روح ابيّك
▪️▪️▪️▪️▪️

▪️▪️▪️▪️▪️
باچر ورانه اموادع او منيّه
خلّينه نرضي فاطمه الزچيّه
▪️▪️▪️▪️▪️
باچر وداع او موت قادم
او هذا العمر هيهات دايم
ترضه علينه ندعي فاطم
عنده بخت لتقِبله خادم

من عدها تنطيه عزّه كوثريّه
خلّينه نرضي فاطمه الزچيّه
▪️▪️▪️▪️▪️
بالزهره واضح كل املنه
ابطارف عبايتها لزمنه
اللي رضاها يرضي ربنه
لولاها ابد ما نسوه احنه

وانريد بس ترضه علينه هيّه
خلّينه نرضي فاطمه الزچيّه
▪️▪️▪️▪️▪️
لمأتم الزهره الچان يسعه
هذا الحضور اشگد ينفعه
تضوي اله لو باچي دمعه
وابچفه لاطم عله البضعه

يربح رضا رب السمه او نبيّه
خلّينه نرضي فاطمه الزچيّه
▪️▪️▪️▪️▪️
ويّ فاطمه الصفّاها نيته
راح البتول اتعلّي صيته
توگفله من توصل منيته
او بالآخره اتوقّع هويته

بيضه تريد الزهره عنده نيّه
خلّينه نرضي فاطمه الزچيّه
▪️▪️▪️▪️▪️
سطره او ضلع مكسور واجنين
ابكل غالي ضحّت فدوه للدين
اشما نبذل احنه ابهايه الْسنين
لا ما نجازي ام حسن واحسين

ماتت لجل يبقه الشرف هويّه
خلّينه نرضي فاطمه الزچيّه
▪️▪️▪️▪️▪️
ام الحسن هالدنيه كلها
الباري خلقها من أجِلها
الخدّام بيد الزهره املها
الجنّه نطب الها ابفضلها

بيديها هاي الطاهره القضيّه
خلّينه نرضي فاطمه الزچيّه
▪️▪️▪️▪️▪️
ابو الحسن الوائلي

▪️▪️▪️▪️▪️
يا زهراء  خدمكم يزهراء
▪️▪️▪️▪️▪️
فاطمه يا رحمة الله وانتي سرّه
اليوم منّچ هالخدم محتاجه نظره
گلوبنه تدريها عدها اوياچ عِشره
كلنه فدوه نروح لعيونچ يزهره

حبيناچ  او يولّون الاعداء
يا زهراء  خدمكم يزهراء
▪️▪️▪️▪️▪️
احنه لو ما خدمِتچ ما النه قيمه
الله لا يحرمنه هالنعمه العظيمه
او هايه متأكدين منها يالكريمه
حاضره مجلس عزاچ اللي نقيمه

واتسجلين  يمولاتي الاسماء
يا زهراء  خدمكم يزهراء
▪️▪️▪️▪️▪️
انتي يا فاطم شرفنه او بيچ نفخر
يالبتول احنه عطاشه وانتي كوثر
دون خدمه انعيش لا هيهات نگدر
الله خالقنه خدم من عالم الذر

محجوزين  الچ قبل الانشاء
يا زهراء  خدمكم يزهراء
▪️▪️▪️▪️▪️
العايش او يرجه رضاتچ هذا فاهم
الصدگ انتي فاطمه والباقي واهم
يحضر ابوحده لعزائچ ماكو خادم
ابدعوه منچ هوّه يحضرله يفاطم

انتي الأُم  نعم واحنه ابناء
يا زهراء  خدمكم يزهراء
▪️▪️▪️▪️▪️
لو يمرنه فد أمر يصعب نصدله
من نكلفچ يم حسن چفّچ يحلّه
الباري من ابفاطمه نحلفك نگلّه
الأمور الصعبه كلها تصير سهله

وابطاريچ  تجي اجمل انباء
يا زهراء  خدمكم يزهراء
▪️▪️▪️▪️▪️
يالبتول انحلفچ ابوالد سُكينه
ابغيرنه ايخدموچ ابد لتبدلينه
خيرچ انريده يضل دايم علينه
من رحمتچ فاطمه لا تحرمينه

نترجاچ  يـ أغله الأعزاء
يا زهراء  خدمكم يزهراء
▪️▪️▪️▪️▪️
ابو الحسن الوائلي