▪️▪️▪️▪️▪️
يصفه كل هَمّك سهل
لو صحت يابو الفضل
▪️▪️▪️▪️▪️
أبو فاضل باب حاجه الما يرِد الداعِي
مأوه للما عنده مأوه او للقلُوب الراعِي
ابزينب الحوراء حلفه گِلّه گض اذراعِي
صيح يالطاهر دخيلك منّي زيل اوجاعِي

او بيك هوّه يكتفل
لو صحت يابو الفضل
▪️▪️▪️▪️▪️
الدنيه من اتزِيد همّك دگّه باب الكافل
گِلّه جيتك ياللي حاشه رجّعيت السائل
لو وگفت اگبال گبره كون دمعك هامل
اُرفع ايديك او تشوفه عنّك الهم زايِل

الگمر كِل شِدّه يحِل
لو صحت يابو الفضل
▪️▪️▪️▪️▪️
بالثِگال اِچهب مضيفه زين راح اتشوفه
اشلون يوگفلك لحد ما يكتمل معروفه
دوم بالوگفات هيّه ارويحِته موصوفه
امگطّعات او ما تقصّر بيها زود اچفوفه

بيها حزنك ينحمِل
لو صحت يابو الفضل
▪️▪️▪️▪️▪️
لو مشيت لعين فاطم ماي وجهك سيله
العِگل كِلها اتطيح يَمّه والغِتر والشيله
يَمّه سولف گِلّه گلبي التعب ماخِذ حيله
صافِيه نيتك لونها الحمِل هوّه ايشِيله

عنّك ايرفعه الحمِل
لو صحت يابو الفضل
▪️▪️▪️▪️▪️
من تجور الدنيه هايه والزمان ايكسرك
والطرق تنسد أمامك والمآسي اتقهرك
روح للعبّاس هوّه ماكو غَيره ايجبرك
سامِعي نسمات صَحنه هيّه تفتح صدرك

ترِد سالم بالفعِل
لو صحت يابو الفضل
▪️▪️▪️▪️▪️
ابو الحسن الوائلي

▪️▪️▪️▪️▪️
هذا تربات الأصيل
چنّه حمّاي الدخيل
▪️▪️▪️▪️▪️
علي الاكبر من دخل
الموت ليمينه امتثل
ما بُگه للجيش امل

الگاع خلّاها تميل
چنّه حمّاي الدخيل
▪️▪️▪️▪️▪️
السيف سلّه بقبضِته
او رجّفَتهم صولِته
كِلها ضاگت ضربِته

اليقترب منّه قتيل
چنّه حمّاي الدخيل
▪️▪️▪️▪️▪️
عالجمِع كلما يمُر
كِلها من يَمّه تفُر
يمنِته تسطر سطُر

سيفه سوّه المستحيل
چنّه حمّاي الدخيل
▪️▪️▪️▪️▪️
بكر ابن غانم اله
من بُرز هوّه ابتله
بضربه الاكبر جندِله

ضاع جدّام الثگيل
چنّه حمّاي الدخيل
▪️▪️▪️▪️▪️
صاح هذا موعِدي
يا جموع اتشاهِدي
حسين يبقه قائدي

ما إله واحد بديل
چنّه حمّاي الدخيل
▪️▪️▪️▪️▪️
ابو الحسن الوائلي

▪️▪️▪️▪️▪️
يا راد يوسف من مغيبه
سالم اوليدي لحضني جيبه
او هذا الگلُب سچّن نحيبه
▪️▪️▪️▪️▪️
الأم اذا عدها ولد وايكون الْوحيد
من يبتعد سالم يجي تتمنّه واتريد
ترتاح ما تعرف ابد واوليدها ابعيد
بالنسبه الها شوفته تسوه الف عيد

لذّة حياتي او كلشي ليّه
لو منّي راح اشلون بيّه
ايموت المحب ابلا حبيبه
▪️▪️▪️▪️▪️
ابني علي الوجهه عذِب مثله اكو وين
ضامي الگلُب يا حسرِتي انظرله بالعين
اشحاله علي ينظر إله بدموعه الْحسين
اوليده اخذ حيله الضمه واتگرّب البين

هضمه او ثجيله او حيل صعبه
امن العطش ابني السانه خشبه
شفته او بده گلبي ابنحيبه
▪️▪️▪️▪️▪️
ويّاه أخذ گلبي علي للحومه من راح
فگد الولد عالأم صعب وافراگه ذبّاح
من ابتعد چان الفكر ما لحظه مرتاح
أشبَه الوادم بالنبي فوگ الأرض طاح

صاح ابني الاكبر بالمنيّه
يحسين بويه الحگ عليّه
لحظات مو سهله رهيبه
▪️▪️▪️▪️▪️
لابنه علي حسين اعتنه واعيونه تدمع
شاف الولد مابي نفس ويلي او تگطّع
روح الابو كادت على جسم ابنه تطلع
او زينب نعت واني شفت گلبي تلوّع

صوت العقيله لوّع الروح
يا ليله جابوا علي مذبوح
واستقبلِت هاي المصيبه
▪️▪️▪️▪️▪️
الأم من ابنها ينجرح يلچمها هالحال
او يبگه عله حال الابن مدمعها همّال
من ودّعت ابني رجع متگطّع اوصال
بالطف اصد اتوذّرت روحي عالْرمال

ليش ابني جثته اموذّريها
اعليها طحت وابچي عليها
جمري ولا يطفه لهيبه
▪️▪️▪️▪️▪️
ابو الحسن الوائلي

▪️▪️▪️▪️▪️
امشن لخونه خل نودعه
باچر يروح ابلايه رجعه
راح الشمر راسه يگطعه يالفاطميات
▪️▪️▪️▪️▪️
العاشر وما أدراك مالعاشر
أعظم مصيبه بالدهر باچر
باچر الراح ايصير ما صاير
باچر نبي ينداس بالحافر

باچر نصد وين النعزّه
سِيف الغدر نحره يحزّه
امصيبه لعرش ربنه تهزّه يالفاطميات
▪️▪️▪️▪️▪️
باچر مصيبه كلّش اچبيره
والگاع كلها اگبالها ازغيره
بالطف نودّع كل ابو غِيره
واحنه نضل ابكربله ابحيره

من نفگد ارواح الحنينه
يعني نشِد حيل السبِينه
المو زلم تتمرجل علينه يالفاطميات
▪️▪️▪️▪️▪️
باچر فلا نلگه شخص سالم
توگع ضحايه كل بني هاشم
حتّه الطفل هم ينذبح لازم
واحنه علينه اتباوع الوادم

باچر تره گوم الردايه
يردونها اتطيح العبايه
لاچن محال اتصير هايه يالفاطميات
▪️▪️▪️▪️▪️
خلنّه نشبع من ابو الاكبر
باچر تره اتشوفنّه بس منحر
بالخيم نسمع عظمه يتكسّر
بعد السحگ بالگاع يتطشّر

لمّن تدوس الخيل جسمه
الأعوجيّه اتطحنه عظمه
راح ابرجلها اتشيل لحمه يالفاطميات
▪️▪️▪️▪️▪️
قَبلن چفوف الكافل اهوايه
باچر يطيحن هنه والرايه
ننضام حين انفارگ افيايه
وانتن تصيرن عگبه بحمايه

لو طاح ابو فاضل نشوفه
مذبوح مگطوعه چفوفه
يم النهر يصبح خسوفه يالفاطميات
▪️▪️▪️▪️▪️
عالحچي اليوجع كون نتعوّد
من الزلم عالرمضه تتوسّد
إحنه عگبهم عالهزل نصعد
واچفوفنه راح ابحبل تنشد

نترك أهلنه عالوطيّه
جوّه الشمس بالغاضريّه
او تنگاد وحدتنه سبيّه يالفاطميات
▪️▪️▪️▪️▪️
ابو الحسن الوائلي

▪️▪️▪️▪️▪️
جيت اودعك واشد حيلي الباچر
اوداعة الله احسين والله الساتر
▪️▪️▪️▪️▪️
جيت اودعك يا اعز كل الاحباب
واشِد من هالسّاعه أزري للمصاب
باچر انظر چم رزيّه او چم عذاب
گلبي يصبح من عگبكم حاير
▪️▪️▪️▪️▪️
ابليل توديعك فلا تغمضلي عين
بالي يمك ضال خويه يا حُسين
شنهو ذنبك تنذبح وانته الحنين
يطحن اضلوعك يخويه الحافر
▪️▪️▪️▪️▪️
يا شبول المرتضى بالطف سوه
اصِد واحدكم عگب لآخر هِوه
مختنگ صدري احسّ ابلا هَوه
والدُخان ابريتي يصعد صاير
▪️▪️▪️▪️▪️
عگب ميذبوحك خويه او نفترگ
واستمع بخيولها اعظامك تطگ
فوگ گلبي الخيم هذي تحترگ
يهد كل الحيل يوم العاشر
▪️▪️▪️▪️▪️
بيّه تلچم غدت كل ساعه التمر
آه شيجرعه يخي چاس الصبر
من بعدكم ياهو ليباري الخدر
من يدَورن ما يشوفن ناصر
▪️▪️▪️▪️▪️
مثل حزني او مثل همّي ما يصح
ينطبع باچر ابروحي اشچم جرح
الفاجعه لو شفت راسك عالرمح
من اشوفه اشلون گلبي ايكابر
▪️▪️▪️▪️▪️
ابو الحسن الوائلي

▪️▪️▪️▪️▪️
خويه يا عباس ترضه ابهايه
انسبي والغربه تمشي اويايه
▪️▪️▪️▪️▪️
اميسّره اگطع طريجي اعله الهزل
انته مو حادي الضعن يابو الفضل
من عگب چفّك يكض چفّي الحبل
يالطحت يم الفرات او مايه
▪️▪️▪️▪️▪️
وگع گلبي اوياك يم العلگمي
سهم لمصوبك ابگلبي منرمي
حرگت اعداكم عليّه امخيّمي
او عاينوا طولي يراعي الرايه
▪️▪️▪️▪️▪️
اگطعته دربي يالچفيل املوّعه
رمشي ابيض صار من الفاجعه
بُگت روحي تحوم يم المشرعه
صعبه علتي وانته بس ادوايه
▪️▪️▪️▪️▪️
انه البيّه المثل وابخدري انضرب
چم نذل يا حيف من عندي گرب
حامي ضعنچ ما فزعلچ يا عجب
احچاية الشامت ثگيله اهوايه
▪️▪️▪️▪️▪️
الهضمه من جابوا الي ماي الشرب
موقف ابداً مو سهل يدمي الگلُب
ابماي يرويني الگِطع نحرك صعب
انقهر يردوني كل الغايه
▪️▪️▪️▪️▪️
ابكربله المَر والجره گلبي مُرد
لا اخو منكم صفالي او لا ولد
منهو يابو الغيره يفزعلي بعد
وآنه صار اويه الغرب ممشايه
▪️▪️▪️▪️▪️
ابو الحسن الوائلي

▪️▪️▪️▪️▪️
زينب اهوايه چبير امصابها
اتأذّت اشگد ابفگد أحبابها
▪️▪️▪️▪️▪️
ايساعد الله اللي گلبها ضل جريح
والدمعها اعله الوجه أحمر يطيح
چم عزيز الشافته بالطف ذبيح
او عالترب جثته بقت بخضابها
▪️▪️▪️▪️▪️
يا گلُب يگدر عله همها الثگيل
الجبل ما يحتمل من عنده قليل
حگها ولله الفارگت مثل الچفيل
من يضل او ما يزول اصوابها
▪️▪️▪️▪️▪️
احسين اخوها الگضت ويّاه السنين
شافِته فوگ الرمل دامي او طعين
اگبال عيناها انگطع راس الحُسين
آ وا ويلاه چان اجوابها
▪️▪️▪️▪️▪️
اشلون ترتاح الأهلها اعله التراب
تنخه بيهم لچن ما تسمع جواب
مثل ما حرگوا عله امها الزهره باب
حرگت النيران كل اطنابها
▪️▪️▪️▪️▪️
يا حزنها الما عله واحد سده
امن الهضم دلّالها امورّم غده
عافها چافلها ما بين العده
رغم ما هوّه الحماها او جابها
▪️▪️▪️▪️▪️
من عگب كل المعزّه والدلال
صعدت ابلايه حمه فوگ الجِمال
اعليها تتفرّج غدت كل الرجال
الطاهره الما طلع ضل لحجابها
▪️▪️▪️▪️▪️
ابو الحسن الوائلي

▪️▪️▪️▪️▪️
يالهمّك اهوايه صعب ما ينحچي او ينگال
اسهام الزمان الصابتك يبن الحميّه اثگال
يا سيّدي يالمهدي  يا سيّدي يالمهدي
▪️▪️▪️▪️▪️
يالمبتعِد عن النظر بس بينه حاضر
عايش الحسره والالم لاچن تكابر
بعيونك ايّام السنه تحسبها عاشر
تذكر مصايب كربله والراس حاسر

عايش مصايب كربله الهمها صفه ماذيك
اموادع أخو ويّه أخو صوره تمر اعليك
يا سيّدي يالمهدي  يا سيّدي يالمهدي
▪️▪️▪️▪️▪️
عمرك محرّم سيّدي يالمهدي عشته
كل راحه بي ما شاهدِت متلوّع انته
صبح او مسه حگك اذا دمعك هِملته
تنظر على جدّك شمِر يگطع رگبته

اثنين ابوگعته اتراگضوا يالمهدي صوب احسين
شمْر الخنه الذبحه سعه او زينب تصد بالعين
يا سيّدي يالمهدي  يا سيّدي يالمهدي
▪️▪️▪️▪️▪️
اشما حاولِت تِغفه فلا عينك تغمُّض
تسمع الخيل الگامت ابجدّك ترترُض
راس الحسين اعله الرمح دنياك تعرض
ما آن مولاي الوعد واحزانك اتفُض

ليهسّه عبد الله الطفل تنصت أذانك ليهْ
عينك تباوع حرمله ابسهم الچتل يرميهْ
يا سيّدي يالمهدي  يا سيّدي يالمهدي
▪️▪️▪️▪️▪️
ماضِن هوه يالمنتظر بالريّه تشتم
تشتم دُخان اللي حرگ ذاك المخيّم
زينب تفر متراكضه بالتربه والدم
الله يعينك يالصرت متعايش الهم

اشلون انته عايش بالألم اسأل واريد اجواب
واتصد مصايب كربله الماكو مثلها امصاب
يا سيّدي يالمهدي  يا سيّدي يالمهدي
▪️▪️▪️▪️▪️
فوگ المصايب والمحن هاي التألمك
اهموم البشر يا سيّدي امزيّدته همّك
يا يوم سيفك تشهُره ابوجه اليظلمك
واحنه ابسلامه دائمه ايعيّشنه حُكمك

كلشي تراه ابعازتك واينادي يمته اتعود
هاي الأرض عدلك بقت محتاجه يالموعود
يا سيّدي يالمهدي  يا سيّدي يالمهدي
▪️▪️▪️▪️▪️
يمته تسد عين الشمس راية رجِعتك
فرّحنه خل ننسه الحزن كلّه ابطلِعتك
معقوله حد هسّه او بعد ما حان وكتك
امتانين يا ثار الله أن نسمع صرختك

ابهيبة علي يوم الترد هالدنيه ترعِدها
ثارات اهل بيتك سوه من ترجع اتردها
يا سيّدي يالمهدي  يا سيّدي يالمهدي
▪️▪️▪️▪️▪️
ابو الحسن الوائلي

▪️▪️▪️▪️▪️
طلعت والهضم مرسوم بالعين
تدوّر عن اثر من جسم الحسين
▪️▪️▪️▪️▪️
حِرگوها خِيمها ابعصر عاشور
بالليل اطلعَت و الظهر مكسور
تدوّر عن اخوها المات منحور
او تدير ابعينها ما شافت امعِين
▪️▪️▪️▪️▪️
ابمشيها بالولد ويلاه طاحت
لاچن عبرِته او للغالي راحت
تشم ريحة الخوّه ليها فاحت
وصلت عالعطر بين المطاعين
▪️▪️▪️▪️▪️
طاحت والصدر مخنوگ يمّه
واتقبله بعظُم نحره او تشمّه
تشوفه بعينها مسلوب هدمه
ميّتها رميّه ابغير تچفين
▪️▪️▪️▪️▪️
گلْب اختك يون واعليك مچوي
او عله فرگاك شط ادموع اسوّي
دوس الخيل لسّه بسمعي يدوي
ابسحگهم انظر اعظامك امكسرين
▪️▪️▪️▪️▪️
تنحب گامت او تصرخ يمظلوم
يبعد اختك المنها الحيل مهدوم
غريبه ابگيت خويه بين هالگوم
احشّم من او يفزع ليّه هالحين
▪️▪️▪️▪️▪️
يخوي الگوم من هجموا عليّه
چوت نار الخيم يحسين اديّه
نسه واطفال لاذوا شفت بيّه
وآنه اچبير همّي ابّين الاثنين
▪️▪️▪️▪️▪️
ابو الحسن الوائلي

▪️▪️▪️▪️▪️
واويلي على العطشَان
▪️▪️▪️▪️▪️
يتلوه بقه ابمهره   واويلي على العطشان
طاح ابدمه عالغبره  واويلي على العطشان
مطبور اثنعش طبره  واويلي على العطشان
گطعوا من گفاه نحره  واويلي على العطشان
او داست خيلهم صدره  واويلي على العطشان
▪️▪️▪️▪️▪️
طاح او طيحه مو سهله  واويلي على العطشان
او رد مهره يخبر اهله  واويلي على العطشان
اجروحه غيرت شكله  واويلي على العطشان
من راسه لحد رجله  واويلي على العطشان
احسين ابجسمه چم نبله  واويلي على العطشان
▪️▪️▪️▪️▪️
طاح او ماكو اليسنده  واويلي على العطشان
واتراب الارض لحده  واويلي على العطشان
لا أخ لا إبن عنده  واويلي على العطشان
صعبه اهوايه هالشِدّه  واويلي على العطشان
للماي انفطر چبده  واويلي على العطشان
▪️▪️▪️▪️▪️
طاح ابكثرة اجروحه  واويلي على العطشان
يهمس بس طلع نوحه  واويلي على العطشان
لخته عينه مشبوحه  واويلي على العطشان
ضلت عينه مفتوحه  واويلي على العطشان
صعدت للسمه روحه  واويلي على العطشان
▪️▪️▪️▪️▪️
طاح او چم جرح صابه  واويلي على العطشان
الظالم يرفس اصوابه  واويلي على العطشان
كلهم سلبوا اثيابه  واويلي على العطشان
تبقه الدمعه سچابه  واويلي على العطشان
اه يحسين وامصابه  واويلي على العطشان
▪️▪️▪️▪️▪️
ابو الحسن الوائلي

▪️▪️▪️▪️▪️
يـ اكثر واحد بهالليله مفجوع
الله يساعدك يابن الزچيّه

غايب بس مصاب حسين ما غاب
عن بالك ابكل صبح او مسيّه

يوميّه تشوف احسين مذبوح
او متگطع وصل بالغاضريّه

او ميفارگ اذانك كسر الضلوع
التنرض بالخيول الأعوجيّه

تسمع صوت زينب بالطف اتصيح
يبويه يا علي الحگ عليّه

مذبوحين اهلها اگبالها اتشوف
وابلا خيم ضعن الهاشميّه

چانت ما تشوف اخيالها الناس
او گادوها يبو صالح سبيّه

يا راحه تمر الفاگد احسين
گلبك شيّب بهاي الرزيّه

ضل بالشمس جسمه اثلاثه مطروح
وامگطّع وذر فوگ الوطيّه


چم عاشر اجه او ماجيت مولاي
ياللي امن الهضم مفطور چبدك

يالبثارك تشافي اجروح لحسين
سل سيفك او داوي صدر جدك
▪️▪️▪️▪️▪️
أعظَمَ اللهُ أجر صاحب الزّمان واُجورَنا بِمُصابِنا بِالحُسَينِ عليهِ السلام وَجَعَلَنا وَإيّاكُم مِن الطَّالِبينَ بِثأرِهِ مَعَ وَليِّهِ الإمام المَهديّ المنتظر المُنتقِم مِن آلِ مُحَمَّدٍ عليهم السلام

▪️▪️▪️▪️▪️
وا ويلي على المظلوم
وا ويلي على المظلوم
▪️▪️▪️▪️▪️
زينب شافتك واگع  وا ويلي على المظلوم
وابفيض الدمه ناكع
صاحت والكلب جازع
حيلي ابطيحتك مهدوم
وا ويلي على المظلوم
▪️▪️▪️▪️▪️
شافت حزنك او أمرك  وا ويلي على المظلوم
اختك حالها ايقهرك 
شمِر متربّع ابصدرك 
حزّه اگبالها نحرك 
لطمت والدمع مسجوم
وا ويلي على المظلوم
▪️▪️▪️▪️▪️
محتاره النسه بالبر  وا ويلي على المظلوم
فوگاها الخيم تسعر 
سمعت جوّه خيل الشر 
عظمك صار يتكسّر 
حاطوا عالنساء الگوم 
▪️▪️▪️▪️▪️
زينب حيل هضموها  وا ويلي على المظلوم
وابچم غالي فجعوها
الما يسوون شافوها
عگب الحامي ضربوها
ونّت والگلب مالوم
وا ويلي على المظلوم
▪️▪️▪️▪️▪️
راح النسوه يسبوهن  وا ويلي على المظلوم
عالمصرع يجيبوهن 
بس خاطر يلچموهن 
يا وسفه يچتفوهن 
زينب كافله امن اليوم
وا ويلي على المظلوم
▪️▪️▪️▪️▪️
ابو الحسن الوائلي

▪️▪️▪️▪️▪️
جسمك عله التربان متگطّعه اوصاله
او محّد يبو السجاد من الگاع شاله
▪️▪️▪️▪️▪️
عالرمضه متوزّع وصل جسمك يمظلوم
يا حسرِتي عگب السحگ سلبوك لهدوم
يومك محال او لا حصل مثله ابد يوم
والصارلك ما مر عله انسان او جراله
▪️▪️▪️▪️▪️
من الحوافر سيّدي ما سِلمت اضلوع
يحسين وابگلبك اثر رفستها مطبوع
وايلومني اللايم لون اجريها الدموع
والف او تسعميّة جرح كلشي بچاله
▪️▪️▪️▪️▪️
اثلاثه بُگيت ابكربله طايح رميّه
متوزّع ابحر الشمس والله رزيّه
منهو منيته الشابهت هاي المنيّه
وابنه ابحصيره ايجمّعه وايشوف حاله
▪️▪️▪️▪️▪️
زين العباد امن السبي اتعنّه الدفِنتك
مقهور گلبه او بالدمع يجمعها جثتك
جمّعك وابحسرة گلُب ناح الكسرتك
جسمك يبو اليمّه چفن لا ما لِگاله
▪️▪️▪️▪️▪️
كل مندفن راسه يوسدونه اعله خدّه
واشحال المگطّع وصل وابنه يصدّه
طفله الذي مذبوح باحضانه يوسده
متهنّي طفله بالذبح موش ابدلاله
▪️▪️▪️▪️▪️
حتّه العرش يا سيّدي لمصابك اهتز
واحمرّت آفاق السمه من نحرك انحز
ضحّيت للباري النفِس وابكلشي ينعز
وانطاك ارضه والسمه الباري تعاله
▪️▪️▪️▪️▪️
ابو الحسن الوائلي

▪️▪️▪️▪️▪️
اجروح اشكثر بيّه غميجه
والفلك كلّه ابعيني ضيجه
▪️▪️▪️▪️▪️
آ يالطفوف اهواي كلفه
الشافت حزنها تنسه تغفه
المنظر اليلچم من أوصفه
يابس ابذبحه احسين ريجه
▪️▪️▪️▪️▪️
اگبالي شفت گطعوا المنحر
حگه الدمع من يسچب أحمر
الهيّجني عگب الذبح أكثر
من بالخيم شبّت حريجه
▪️▪️▪️▪️▪️
آنه اللي محّد شاف طولي
صاروا الوادم ينظرولي
يا آل هاشم دلحگولي
حشّمت بس ابلا نتيجه
▪️▪️▪️▪️▪️
عگب الخدر ذاك او مقامي
ضلّيت وحدي گلبي دامي
تالي اَنسبي وابلا مُحامي
درب اليسر أگطع طريجه
▪️▪️▪️▪️▪️
طف كربله الغيّرلي وضعي
والسبب هوه ابسِيل دمعي
خلّاني اون كل يوم وانعي
هالأسم لجروحي يِهَيجه
▪️▪️▪️▪️▪️
ابو الحسن الوائلي
العتبة الحسينيّة المقدسة

▪️▪️▪️▪️▪️
احسين شفته انگطع نحره
او هم شفت عمّاتك اسره
خلصت اسنينك ابكسره
تذكر امصاب الحُسين
▪️▪️▪️▪️▪️
سيّدي الله اليعينك 
بالدمع تمّت سنينك
كربله زيدت ونينك 
خلّتك دومك حزين
▪️▪️▪️▪️▪️
ما شفت راحه ابحياتك 
سيّدي اللحظة مماتك
بس مصارع ذكرياتك 
والأهل متوسّدين
▪️▪️▪️▪️▪️
عاشت اللوعه ابمهجتك 
تهِد كل الحيل ونتك
صلّت امن اجلوس عمتك 
باوعتها يالحنين
▪️▪️▪️▪️▪️
صرت من العلّه ناحل
وانسبيت ابگلُب ذابل
انته والنسوه الثواكل 
عالهزل متگيّدين
▪️▪️▪️▪️▪️
ابناظرك شفت ابو اليمّه 
باقي فوگ الگاع جسمه
اتعبِت من جِيته تلمّه 
ابخيل عظمه طاحنين
▪️▪️▪️▪️▪️
يهد كل الحيل وضعك 
ذكريات الطف تفجعك
اتخلطه ويّ الماي دمعك 
او تبدي زادك بالونين
▪️▪️▪️▪️▪️
ابو الحسن الوائلي

‌▪️⁩‌▪️⁩‌▪️⁩‌▪️⁩‌▪️
چم مصيبه او معضله
عيشتني كربله
چم رزيّه .. چم رزيّه
‌▪️⁩‌▪️⁩‌▪️⁩‌▪️⁩‌▪️
آنه ابن الحُسين المنخطف لوني
مصيبه اشچم مصيبه شافت اعيوني
شفت اهلي ضحايه او حيل قهروني
وانه ابحيره تو عليل او هم يگيدوني

بالطفوف اشچم جرح
گلبي للهم ينفتح
يا أذيّه .. يا أذيّه
‌▪️⁩‌▪️⁩‌▪️⁩‌▪️⁩‌▪️
ابمصاب الطف احسّن گلبي يتكسّر
الصبر وي روحي يكبر والحزن يكبر
احتسب لله او روحي عالصبر تضطر
او ما گطعت اعيوني المدمع الاحمر

بالطفوف الفاجعه
ولله گلبي اتگطّعه
الغاضريّه .. الغاضريّه
‌▪️⁩‌▪️⁩‌▪️⁩‌▪️⁩‌▪️
شفت بالطف مصايب والكلب فاير
الصدر ديوان اشوفه وضيّف الحافر
الحافر من ابويه كل ضلع كاسر
وره هذا السحگ ضل جسمه متناثر

اصبر او زادي الصبر
گلبي بالطف منكسر
لوعه بيّه .. لوعه بيّه
‌▪️⁩‌▪️⁩‌▪️⁩‌▪️⁩‌▪️
ابوي المات ضامي ابحسرة الگطره
ابوي المِن گفاه منّه انگطع نحره
ابوي الكل ضلوع البيهْ متكسره
ابوي المنّه ما سلمت ولا وذره

والمصيبه المؤلمه
جسم ضنوة فاطمه
عالوطيّه .. عالوطيّه
‌▪️⁩‌▪️⁩‌▪️⁩‌▪️⁩‌▪️
رحت درب السبايا منشده بالي
واحزان الطفوف الغيّرن حالي
اتذكّر هلي او يبگه الدمع هالي
ادفنت بالغاضريه عندي چم غالي

او نگطع بدروب السبي
بيد اجانب ننسبي
صعبه هيّه .. صعبه هيّه
‌▪️⁩‌▪️⁩‌▪️⁩‌▪️⁩‌▪️
رزايه كربله طبعت عله ذهني
عشتها بالجروح او زيّدت حزني
انوح ابحسرتي او ما ينگطع ونّي
الذبح والگيد اكثر شي يلچّمني

تكبر اجروح الگلب
ويلي والمدمع يصب
الهم عليّه .. الهم عليّه
‌▪️⁩‌▪️⁩‌▪️⁩‌▪️⁩‌▪️
اذا شفت الاكل يبقه الدمع يجري
يجي ابّالي الحُسين او ينهدم صبري
يهل دمعي اعله خدّي او يلتهب جمري
مصاب الطف چبير او زيّد ابكسري

والدي جسمه انسحگ
مات ضامي يا خلگ
بالمنيّه .. بالمنيّه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي

▪️▪️▪️▪️▪️
زينب والقهر والليل والآهات والحسره
رغم كل السده والصار گلبها ما نفذ صبره
على زينب  أويلاه
على زينب  أويلاه
▪️▪️▪️▪️▪️
الله يعينها التنظر أهلها طرحه عالرمضه
ابعيناها الضوه مذبوح والليل ابحزن يگضه
ابد ما شافت الراحه او ألم صار الگلب نبضه
ويلي اشچم هضم منّه ابحزنها تسچب العبره

على زينب  أويلاه
على زينب  أويلاه
▪️▪️▪️▪️▪️
شافت چم جرح خلّه گلبها ينحب ابحرگه
والماتوا هله كلهم اشما يبچي او يون حگّه
من الطف بگت للموت بالحسرات مختنگه
ابريّتها يطب دخّان الهوه لو شمّته الحره

على زينب  أويلاه
على زينب  أويلاه
▪️▪️▪️▪️▪️
ابهمها اتصد عله العدوان تالي عالخدر دارت
او عگب عين الگمر عباس هيّه الكافله صارت
إلمن تحمي ما تدري ابنسه واطفالها احتارت
تربي ابعين صوب الماي مذبوح الوفه اتنظره

على زينب  أويلاه
على زينب  أويلاه
▪️▪️▪️▪️▪️
ركضت وادم ابلا خوف بالنار اعله خيمتها
او ركضت بت علي بالبر لجل تحفظ عبايتها
بت الشرف صعبه اهواي بين الغربه وگفتها
تدوّر ماكو كل فزّاع واتشوف العده كثره

على زينب  أويلاه
على زينب  أويلاه
▪️▪️▪️▪️▪️
يا لوعه التهد الحيل والتلچمها والتقهر
حين الفارِگت عباس لو ذبحة ابو الاكبر
لو من تستمع بالخيل عظم الغالي يتكسّر
لو لمّن خذوها الگوم فوگ الناگه متيسره

على زينب  أويلاه
على زينب  أويلاه
▪️▪️▪️▪️▪️
ابو الحسن الوائلي

▪️▪️▪️▪️▪️
انه ميّت چنت من قبل لا أنسَم
من شفت الأبو غارگ ابفيض الدم
گلبي انشلع ولله ابحالتي يعلم
ما تسكن هيهات اجروحي

مصايب كربله ماكو اليضاهيها
او كل هذا الوجود اتألّم اعليها
الها اعيوني ما گطعت بواچيها
حد ما گطعت ريتي انفاسي

كل صبح او مسه أبچي لأن مفجوع
أنظر راس عالي اعله الرمح مرفوع
واسمع ركض خيل او طحن مال اضلوع
والطم عالراس ابچفّيني

كل يوميّه لو رادت اعيوني اتنام
تتراودلي صورة حرگ مال اخيام
او ما بين الزلم تركض نسه وايتام
واتدوّر عن مشرد ليها

الطف كلما أذكره اتگوم روحي اتشوط
واشما تصد عيني اوصال ابوي اتحوط
الماي او زادي يصفه ابمدمعي مخلوط
اشگد فاجعني احسين امصابه
▪️▪️▪️▪️▪️

امن الطف للمنيّه امعاشِر الهم
تبچي او صار كل عمرك مُحرّم
تنصب سيّدي ابكل يوم مأتم
لحد ما ختم عمرك سيّدي السَم

▪️▪️▪️▪️▪️
اعظم الله اجر صاحب الزمان واجوركم بإستشهاد سيدنا ومولانا الامام الرابع زين العابدين علي بن الحسين السجّاد عليه السلام

▪️الاربعين
▪️▪️▪️▪️▪️
"مِن البَحرِ اِلىٰ النحرِ"
مسيره بالعشِگ تسرِي
▪️▪️▪️▪️▪️
حان الوعد لاذان العشگ يِبدِي
صار الگلُب بِينه الكربله يِحدِي
نمشِي سِوه اْو كِل حچْيْ العدُو اِنعدِّي
اويانَه نحِس يمشِي الكربله المَهدِي

النطَه كِلمَه مِشَه اِبهِمّه
اِبعزِم وَي "صاحِبَ العصرِ"
▪️▪️▪️▪️▪️
ابهذا الوعد دوم ابكُل سنَه نِحضر
للمنگطِع مِنه اِبكربله المنحَر
لجل المِشت مسبيَّه ابلهيب الحَر
نمشِي مثِل مَشيَتها اِبجمُر يِسعر

اِبسبِي راحَت اِبصمِت ناحَت
گلبنه بهالأمُر يدرِي
▪️▪️▪️▪️▪️
اِبهذا المشِي نوصَل للحُسيْن اِنزور
اْو مِن ينتهِي ننطُرها السنيْن اِتدور
اِنواسي الاِجت مَوجُوعَه اِبگلُب مَكسور
ركبَت هزِل ما ركبَت مَحامِل نُور

اِبمدامِعها اِبمواجِعها
فقَط رَب السِمه يدرِي
▪️▪️▪️▪️▪️
اِنريد اِبحزِن نوصَل للولِي اْو گبرَه
اْو يفرُق مشِي الزايِر عَن مشِي الحُرّه
اِحنَه المشِي هذا اِبراحَه نِنتظرَه
اْو هِيّه اِرجِعَت مِن ضيْم السبِي اْو قهرَه

اِرجِعت تالِي بِلا والِي
اِبقهرها والدمِع يجرِي
▪️▪️▪️▪️▪️
نسعِي اْو عسَه اِنعيْش اللوعَه والمأسَاة
اْو هَم تنخطِي كِل خُطوه اِبلهيْب الذَات
رَد الضعَن قران اْو حِمَل أيآت
بِي كُل شخُص رَد اْو يذرِف الدمعَات

الحزِن بيهُم نواسيهُم
اِجوا مِن لوعَة الأسرِ
▪️▪️▪️▪️▪️
واقِع صفَه واِبهذا الدرُب ملمُوس
اِبعيْن العلِي كِلمَن معتنِي محروس
اِشما بَيّنِت گلبَك بالحزِن متروس
اكبَر حزِن للجابَت معاهه الروس

اِبكسُر خاطِر مِن العاشِر
بِقه بيها الجمُر يسرِي
▪️▪️▪️▪️▪️
كِلمَن خِدَم ذَب حيلَه اْو وفَه بالديْن
يِدعِي تضَل يُوميَه الخِدامَه اِتحيْن
قصدَه فقَط واحِد ما إلَه قصديْن
حتّه يِضَل يِخدِم باليِزور اِحسيْن

الگلُب هايِم أضَل خادِم
اِبخدِمتَه مِنعگِد عُمرِي
▪️▪️▪️▪️▪️
ابو الحسن الوائلي
محرم ١٤٤٥هـ

▪️كأني بمولاتي ليلى عند قبر مولاي الحسين عليهما السلام
▪️▪️▪️▪️▪️
جيتَك حزينه امْن السبِي حبيبي
مِن غيبِتَك ما فَض بعَد نحيبي
اه اه اه اه
اه اه حُسين
▪️▪️▪️▪️▪️
يا حبيب الگلُب جيت مِن غُربتِي
باربعينَك انه راجِعه اِبدمعتِي
جيتَك اْو جايِبه كل حزِن رحلتِي
مِن ذبِحتك وانه اِتغيِّرت حالتِي

جِيتك يغالي اْو جايِبه مصابِي
اْو ما ينحمِل يا سيِّدِي عذابِي
اه اه اه اه
اه اه حُسين
▪️▪️▪️▪️▪️
اِنته كلشِي الي اْو خيمتِي والحِمه
عالبشَر افتخِر زوجِي ابِن فاطِمه
اِنته روحِي اْو رحِت اْو ما صرِت سالِمه
وانِي مِن روحِتَك روحِي مِتألِمَه

عذّبنِي فگدَك يا نظَر عُيونِي
وانِي الغرُب مِن غيبِتَك ولونِي
اه اه اه اه
اه اه حُسين
▪️▪️▪️▪️▪️
كتلِي مِنّچ ردِت صبرِچ اِعله الحمِل
اْو گلِت دومِي معَك كلشِي راح احتمِل
اِبچَف ادينَك شفِت هودَجِي يِعتدِل
اْو عگْب اِدينَك وسَف اركب اِعله الهزِل

مِن الدلال اعله الهزِل سبيَه
امشِي وسافه اِمچتّفَه اديَه
اه اه اه اه
اه اه حُسين
▪️▪️▪️▪️▪️
شرْد اسولف عله يا جرِح يا ألم
وانِي مِن ذبحِتك حيلِي كلّه اِنهِدم
مِن طحِت عالثره والگلُب ما سِلم
تدرِي ضَل السبِي يرمِي گلبِي اِبسهم

چَان الگمَر حارِس گبُل علينَه
اْو عگبه الشمِر يحديها للضعينَه
اه اه اه اه
اه اه حُسين
▪️▪️▪️▪️▪️
جيتَك امْن السبِي خاطرِي مِنكسُر
اْو بَس جروح اْو حزِن جايِبه امْن اليِسُر
كلشِي عنِّي رحَل بَس بقالِي الصبُر
الهِسّه جمْر الخِيم بالگلُب يِستعُر

يا خيمتِي الطاحَت غفُل عليَه
نار الخِيم تلهَب بعدها بيَه
اه اه اه اه
اه اه حُسين
▪️▪️▪️▪️▪️
حالِي ما يِنوصُف وانِي بارض الغرُب
كلشِي أحمِل سهِل بَس غِيابَك صعُب
الكِسرت اِبخاطرِي للقصُور امْن اطُب
واني شفْت الأشَد بالشتِم والضرُب

اِسياط العِده حيل الظهر تِگطعَه
اْو سَب اْو شتِم صرنَه فقَط نِسمعَه
اه اه اه اه
اه اه حُسين
▪️▪️▪️▪️▪️
مِن اسولف اكو بالگلُب چم جرِح
حالِي بعدك تره حالِي ما يِنشرِح
ياللي ماكو شخُص ثانِي مثلَك يصِح
عينَك اعله النسَه واِنته فُوگ الرمِح

طول الدرُب مِن نمشِي يا فُؤادِي
مِن نعثر اِسم الله النحر يِنادي
اه اه اه اه
اه اه حُسين
▪️▪️▪️▪️▪️
سيّدي اْو مسندِي اِبليلي اشُوفَك گمَر
طولك اْو هيبِتَك منها ضَل بَس نحر
حزِن طَف كربله رمحه بيَه اِستقَر
واِنته نمْت اِبگبُر وانِي عشْت اِبقهَر

اني ام علِي الاكبر يغالي اكلمَك
اتمنّه امُوت اْو گبري يصفَه يمَّك
اه اه اه اه
اه اه حُسين
▪️▪️▪️▪️▪️
ابو الحسن الوائلي
صفر ١٤٤٥هـ