علي الحَبّك شريف او يا كُبر بخته
يعيش ابگدر عالي او ضامن آخرته
يمن للهادي درعه او هيبته او ثقته
طاهر مرضعه المولاه تكون انته
علي ما مثلك احّد نفسي عاشِگته
يمن والبيك رُبعه ابثاني ما شفته
اللي بس ربّه يعرفه شنهو منزلته
من الله اليبغضك روحي كارهته
▪️▪️▪️▪️▪️
متباركين بعيد الله الأكبر عيد الغدير
جعلنا الله وايّاكم من المتمسّكين بولاية أمير المؤمنين علي بن ابي طالب عليه السلام

بسم الله الرحمن الرحيم
بعد التوكّل على الله تعالى تم إكمال جزء كبير من منهاج محرم الحرام لعام ١٤٤٧هـ
وإن شاء الله سيتم نشره بشكل متقطّع هنا
وسائلين الله تعالى التوفيق والثبات بخدمة محمد وآل محمد الطاهرين

▪️▪️▪️▪️▪️
من هل شهر عاشور شهر المصيبه
سال الدمع عالطاح جثته سليبه
▪️▪️▪️▪️▪️
هلال الحزن من بان هاي المسيّه
دمعاتي عالوجنات صارت جريّه
اذكرته مُصاب حسين بالغاضريّه
من انذبح جدّام اخته الغريبه
▪️▪️▪️▪️▪️
هالليله هل اهلال شهر المحرّم
نلبس ثياب السود وانعاشر الهم
إبن الرسول الكون ناصبله مأتم
كل الوجود اينوح لجله ابنحيبه
▪️▪️▪️▪️▪️
كل ليله راعي الثار يبچي بحرگته
عينه تشوف حسين گطعوا رگبته
تركض امن النيران ينظرها عمته
جمر الخيم بحشاه يسعر لهيبه
▪️▪️▪️▪️▪️
كل خادم اصبح دور عنده او تكلّف
لو هل شهر عاشور ما لحظه يوگف
بي ينقل اللي صار من لوعة الطف
بالمحشر ايجازيه الله او حبيبه
▪️▪️▪️▪️▪️
كل خدمه ذلّه او هاي خدمتنه رِفعه
او باسْم الحُسين الراس عالي نرفعه
ابدمنه العهد ويّاه انكتبه او نوقعه
او كل خادم امن احسين ياخذ نصيبه
▪️▪️▪️▪️▪️
ابو الحسن الوائلي

▪️▪️▪️▪️▪️
خلنه انعاين اهلاله او نصد ليه
شهر عاشور يختي النفترگ بيه
▪️▪️▪️▪️▪️
هلاله بالسمه هذا المسه بان
شهر الذي ايفارگنه بالاحزان
أشعر منكسر ظهري من الآن
اكبر حزني من الرايد احچيه
▪️▪️▪️▪️▪️
ابهذا الشهر يختي ابگاع الطفوف
الرگاب الحلوه تتگطّع بالسيوف
يزينب چم مصيبه عينچ اتشوف
او چم محبوب يالحرّه تودعيه
▪️▪️▪️▪️▪️
اخبرچ بيها زينب مادري اشلون
اخير ايّامي هايه اوياچ يم عون
التلچمني الغرب طولچ يشوفون
وانه فوگ الرمل جسمي تشوفيه
▪️▪️▪️▪️▪️
اخبرچ وادري گلبج يختي حسّاس
ابن جوشن يگطعه اگبالج الراس
او يرفعه عالرمح والجسم ينداس
بالخيام او كسِر عظمي تسمعيه
▪️▪️▪️▪️▪️
ابمصابچ يم غرب بالطف تضلّين
يضحكون الدمعتچ وانتي تبچين
يبو فاضل عليّه الحگ تصيحين
او ما يفزعلچ العباس اعذريه
▪️▪️▪️▪️▪️
ابحبال الخشنه ايدچ راح تنكاد
تنظري روس اخوتج عله المياد
تدخلين اليزيد او عله ابن ازياد
بالديوان واحدهم تحاچيه
▪️▪️▪️▪️▪️
عگب عباس غربه ابضعنچ اتسوگ
او بلا هودج يصعدونچ عله النوگ
أسيره او يوگفوچ ابهوسة السوگ
والعدوان طولچ تنظر اعليهْ
▪️▪️▪️▪️▪️
افترگ ويّاچ برض الغاضريّه
انذبح وانتي يكودونچ سبيّه
إنتلاگه اردود بالجنّه سويّه
سنه او نصّ الدمع لفراگي تجريه
▪️▪️▪️▪️▪️
ابو الحسن الوائلي
العتبة الكاظميّة المقدّسة

▪️▪️▪️▪️▪️
يالخادم عله احسين إجريها دمعتك
▪️▪️▪️▪️▪️
گوم يا منّ منطي چلمه للحُسين
رجع شهر الفاجعه او شهر الدمِع
إعصي كل الفرح بس طِيع الونين
واحضر المأتم او نوح او إنفجِع

تفرح لمّن اتشوف مولاتك لطمتك
▪️▪️▪️▪️▪️
ساعِد الزهره ابحضورك بالعزاء
هيّه موجوده تره اتباوع عليك
اضلوعها ما وصلت لحال الشفاء
ابدالها فوگ الصدر الطم بديك

او حلّفها بالْحسين تتقبّل خدِمتك
▪️▪️▪️▪️▪️
الما تهل دمعات عينه لهالمصاب
هذا گلبه ابلايه شك بي مشكله
شنهو عذره لو اجه يوم الحساب
من يشوف العرش باچي لكربله

لا تبخل عالْحسين اوصيك ابعبُرتك
▪️▪️▪️▪️▪️
بالقيامه ابخُوف تبچي كلُّ عين
اهناك منّ اليجري وسط الآخِره
الّه عين الباچيه امصاب الحُسين
راح تدخل ضاحِكه او مُستبشره

اهناك الفرحه تنشاف مرسومه ابوجِنتك
▪️▪️▪️▪️▪️
اهناك بس اعمالك اتفيدك اكيد
ابيوم لا ينفع المال او لا بنون
والبچت عينه لبو اليمّه الشهيد
الدود ما ياكل ابد مِنّه العيون

جنّه تنگلُب راح يالخادم حفُرتك
▪️▪️▪️▪️▪️
نعم يالتخدم أهل بيت الرسول
هالعزه تدريهْ عدهم شي عظيم
الذي ايشارك بيهْ يسهلّه الدخول
ابلا حساب ايفوت جنّات النعيم

او بين الوادم اهناك تتباها ابنعِمتك
▪️▪️▪️▪️▪️
ابو الحسن الوائلي

▪️▪️▪️▪️▪️
مجلسك يحسين يبقه قائم او ما ينگطع
سيّدي او للموت هاي اعيونّه اتهلّ الدمع
▪️▪️▪️▪️▪️
يا ذبيح الغاضريّه المجلس ايضل مستمر
الآخر اللحظات يبقه يبو اليمّه امن العمر
وابد ما نترك عله امصابك ابد دگ الصدر
ما نجازي لو كسرنه واحنه نلطم كل ضلع
▪️▪️▪️▪️▪️
يا وتر ما الك ثاني او صرت للمذهب وتد
خيمِتك فَينه او سترنه انضَل تحِتها للأبد
يا حُسين العاف دربك ما يشوف الخير ابد
واليخدمونك ابجالك عايشين احسن وضع
▪️▪️▪️▪️▪️
خدمِتك مولاي نعمه للخدم اكبر بخت
ابكل وكت بيها نفكّر روحنه هيّه خذت
ما تهِمنه الدنيه كِلها لو علينه ما رضت
بس رضاءك يالحبيب البيهْ بالدنيه نفع
▪️▪️▪️▪️▪️
الثوب الاسود يا حُسين امبيّض اوجوه الخدم
إحنه دونه او دون حبّك وحگ دم نحرك عدم
الحقيقه الواضحه انته سيّدي او كلشي وهم
والحياة ابلا خدِمتك حنظل او ما تنجرع
▪️▪️▪️▪️▪️
يالذي الرحمن خالق لجل عينك هالفلك
الگاع صارت ويّ سماها طايعه كلها الك
كلشي غيرك ما يهمنه نسأل الله او نِسألَك
دوم يا مولاي نبقه عله امصابك ننفجع
▪️▪️▪️▪️▪️
ابو الحسن الوائلي

▪️▪️▪️▪️▪️
اقبلني خادم يحسين
او هذا الشرف يكفيني
▪️▪️▪️▪️▪️
ماريد كلشي من حياتي او دنياي
تكتبني خادم آنه اريدن بس هاي
يحسين احبّك وافتخر من اصباي
آنه هويتك مولاي
من منشأي او تكويني
▪️▪️▪️▪️▪️
اربيت اعله حبّك يا أبا عبد الله
او عاشرت مولاي المدامع والآه
منبرك رايد ينگضي عمري اوياه
لا شك اضيع ابليّاه
او هوّه شرف منطيني
▪️▪️▪️▪️▪️
رادوني أترك هالطريق اشگد ناس
بس سيّدي هيهات ينزل هالراس
ابهيبة جبل ويّاك احس والعباس
يمّك فخر لو كنّاس
هم قابل اتخلّيني
▪️▪️▪️▪️▪️
ميهمك اَي خادم تعرفه الوادم
هوّه الأهم مكتوب عندك خادم
لا شُهره تبقه لا الصيت الدايم
غيرك منو يوم الراح
اتحاسب اينجّيني
▪️▪️▪️▪️▪️
غانيني عن الدنيه حبّك يحسين
بي قانع او كافيني يا نور العين
ابمنهاجك ابقه ملتزم حد البِين
كلشي وهم عيني اتشوف
وانته الصحيح ابعيني
▪️▪️▪️▪️▪️
مابدلك بكلشي وحگ رب الكون
يا وتر مثلك ثاني هيهات ايكون
اطلب رضاتك عنّي وآنه الممنون
واقسم قسم بالزهراء
مرتضاتك اتكفّيني
▪️▪️▪️▪️▪️
ابو الحسن الوائلي

▪️▪️▪️▪️▪️
يحسين العمر دونك بلا معنه
ما يسوه فلس يا سيّد الجنّه
▪️▪️▪️▪️▪️
ما يسوه او بعد ما ينفهم حتّه
الضايفله طعم مولاي بس انته
وآنه لخاطرك يبن الطهر ردته
والخاطر خدِمتك هاي احبنّه
▪️▪️▪️▪️▪️
هوّه العمر هذا اشيحوي بالمضمون
عدم يصبح لوَن مو انته بيهْ اتكون
لا مو خادِمك يحسين خادم جون
تقبلني يبو السجاد اتمنّه
▪️▪️▪️▪️▪️
لو ما خدمِتك بالدنيه موجوده
متيقّن تصير ابلا ضوه او سوده
وآنه الروحي صارت بيك معگوده
يالنِعمه الهِداها الله الكريم النه
▪️▪️▪️▪️▪️
بالنعمه الفلا تشبهها كل نعمه
تدعي اگلوبنه يا سيّدي ابهِمّه
الله ايديمك اعلينه يبو اليمّه
لأن يا سيّدي ابدونك عدم إحنه
▪️▪️▪️▪️▪️
يالمضحّي لجل حفظ العدل دمّك
نِنسه ارواحنه او ما ينّسِي اسمك
نحبّك نقسِم ابداعة ضلع امك
او غيرك سيّدي محبوب ما عدنه
▪️▪️▪️▪️▪️
انته يا حُسين اللي سكنت الروح
غيرك سيّدي يسكنها ما مسموح
لمصابك يضل او ما نگطعه النوح
ابطلوع ارواحنه نگطعها للونّه
▪️▪️▪️▪️▪️
ابو الحسن الوائلي
العتبة الحسينية المقدسة

▪️▪️▪️▪️▪️
ابخدمة احسين تعال ابعالي هامه
يَومَ تُبلَى السّرائِر بالقيامه
▪️▪️▪️▪️▪️
يا من تبذله الجهد لحسين والمجلِسه
تحيي الأمر كل سنه وامصابه تتنفّسه
هذا التعب فاطمه بي هيّه مستانِسه
مَتخلّي يوم الحشر روحك ابد يائِسه

يا هلا اتصيح بِمن أثبت كلامه
يَومَ تُبلَى السّرائِر بالقيامه
▪️▪️▪️▪️▪️
من دون خدمه العمُر ما بي طعم يُعتبر
لحسين يسوه التعب يتسمّه تعب الفخر
هنياله كلمن خِدم او هنياله كلمن حِضر
بالمأتم او دمعِته تجري المُصاب النحر

او خطّت الإيد على صدره علامه
يَومَ تُبلَى السّرائِر بالقيامه
▪️▪️▪️▪️▪️
ما دامك اتشم هوه لتعوفه دگ الصدر
لمصاب ابن فاطمه سِيل الدمع وانقهر
ما يسوه گلبك لون لحسين ما ينكسر
عمرك بلايه نفع من يطفه بيك الجمر

ترفع الشان تره هاي الخِدامه
يَومَ تُبلَى السّرائِر بالقيامه
▪️▪️▪️▪️▪️
احسين الذي يترِكه لا شَك حياته عدم
هذا الدرب مدرسه والعافه عمره وهَم
الما يِنحب الكربله ما عرف معنى الألم
والما يهزّه الذبح ما مچوي من الخيم

يا تُرى اهناك شنو عذره لإمامه
يَومَ تُبلَى السّرائِر بالقيامه
▪️▪️▪️▪️▪️
كلّه خساره العمُر بس الحُسين الربِح
من تلتزم سيّدك تلگاه يرفعك صرح
خلها رضاته الهدف يستاهل المنذبح
ويّه حبيب السمه إحذر تخون الملح

اهناكَه مولاك يعبرك بالسلامه
يَومَ تُبلَى السّرائِر بالقيامه
▪️▪️▪️▪️▪️
لو عفته هذا الدرب عفت انته خير العمل
آلاف تلگه الشمر واحسين ماله مثل
من خِدمِتك تنزعج إعلم رباة الجهل
گلهم لگطع النفس لحسين خادم اضل

واليعاديك تحت رجلك مقامه
يَومَ تُبلَى السّرائِر بالقيامه
▪️▪️▪️▪️▪️
ابو الحسن الوائلي

▪️▪️▪️▪️▪️
ما رايد القاب اتصير الي ابكثره
يكفي اتسمّه خادم فاطمه الزهره
▪️▪️▪️▪️▪️
أعرّف نفسي للينشد عليّه امنين
آنه الخادم الربّاني حب احسين
اليجري بالمآتم دوم دمع العين
او لجل احسين وامصابه يدگ صدره
▪️▪️▪️▪️▪️
نذرت اسنيني خادم ما أدوّر صيت
چنت تايه او بس ابخدمتي اندليت
شفت طعم الحياة ابخدمة آل البيت
او ردت مرضاهم آنه ما ردت شُهره
▪️▪️▪️▪️▪️
ما غيّر طريقي او ما تهمني الناس
همّي يرضه عنّي احسين والعباس
بس الخدمه هذي بيها رفعة راس
والينقبل خادم بختهْ اشكبره
▪️▪️▪️▪️▪️
عالن للحُسين امن الزغر حبّي
اوّل ما وعيت احسين اخذ گلبي
لنها اجدامي زلّت يوگف ابدربي
يصحّح نيّتي من اوگع ابعثره
▪️▪️▪️▪️▪️
أساوم ولله زحمه او أخلِف النيّه
ابياض الوجه بالخِدمه الحُسينيّه
فلِس من دونها ما تسوه هالدنيه
مثل حنظل أبد ما تنجرع مُره
▪️▪️▪️▪️▪️
وحگ الصعدت اعله الناگه مچتوفه
واضح كل كلامي او نيتي معروفه
تطلع روحي وابقه احسين ماعوفه
منو ايقدس التراب او يترك الدرّه
▪️▪️▪️▪️▪️
ابو الحسن الوائلي

▪️▪️▪️▪️▪️
محرّم قادم استعد يالخادم
تخِدمه لازم ابا عبد الله
▪️▪️▪️▪️▪️
يا خدّام حسين الوالي ما ضل چم يوم العاشور
نظّف گلبك وابدي الخدمه لا لتضل اتلفّ واتدور
احضر للمجلس لتقصّر وانحب لمصاب المنحور
مو من هاي الوادم تسمع من فاطم كلمة مأجور

تراها الزهره تريد العبره
تِصيح ابحسره ابا عبد الله
▪️▪️▪️▪️▪️
دومك خلّي حسين المقصد او لتهزّك آراء الناس
لا ما تخسر من اتخلّي اچفوفك بچفوف العباس
ابداً لتضن ينزل قدرك درب حسين ايعلّي الراس
هذا العالم كلّه احجاره لاچن حب حسين الماس

تره ابلا حبّه العمر چن غربه
النفع بس دربه أبا عبد الله
▪️▪️▪️▪️▪️
إجمع من الخدمه هوايه حتّه ابدفنك ما تحتار
محّد للإنسان ايذكره لو مات او ما عنده آثار
من الناس اتطب اجهنّم ما تلمِس اطرافك نار
بالمحشر ما تبقه ابحيره ايگودك للجنّه الكرّار

علي ميعوفك يكض اچفوفك
او يطمّن خوفك ابا عبد الله
▪️▪️▪️▪️▪️
شِد الهِمّه لا تتعاجز واطلب من الزهره الحيل
لا تِبخل بالمأتم والطم للرضّتها اضلوعه الخيل
لا تحبِس دمعك والقائم دمعة عينه دم اتسيل
واجزع للعاشر وامصابه من اتذكره صيح الويل

حبيب الهادي المصابه السادي
ابحرِگتك نادي ابا عبد الله
▪️▪️▪️▪️▪️
إشمر كلشي ابظهرك إنته واستقبل عاشور ابروح
باب الباري احسين او مِنّه تنظر بس الخير ايلوح
لتطفّي الجمره الموجوده ابگلبك تلهب عالمذبوح
يالخادم تنسَر الزهره امن اتشوفك لحسين اتنوح

الزچيّه فاطم تعوفك واهم
تكتبك خادم ابا عبد الله
▪️▪️▪️▪️▪️
ابو الحسن الوائلي
العتبة العلوية المقدسة

▪️▪️▪️▪️▪️
تضل كل عمري دمعتي تجري
وادگلك صدري يا حُسين
▪️▪️▪️▪️▪️
عهد مني يبو الاكبر اضل أحيي مصابك
انا الخادم وابن خادم النذر عمره الجنابك
انعگد چنّه علگ زاير اصد عمري اعله بابك
ابد ماله الذهب قيمه اذا قِسته ابترابك

انه وعيونك عدم من دونك
افتخر مجنونك يا حُسين
▪️▪️▪️▪️▪️
فلس آنه فلا أسوه قسَم لو ما خِدمتك
عليّ فضلك جِزه حدّه چبيره يا نعمتك
اعرفت الله يبو اليِمّه تراني من عرفتك
عسن روحي اطلعت منّي اذا يالغالي عفتك

أعوفك زحمه أعوف النعمه
يـ أجمل كلمه يا حُسين
▪️▪️▪️▪️▪️
فلا جازي ربع فضلك لون عمري ايتقدّم
السنه كلها انه ميّت وارد أحيا ابمحرّم
وحگ نحرك فلا أكدر أموت ابلايه مأتم
من المهدِ الى اللحدِ محبتك تبقه بالدم

محبتك ربحي اصيح ابجرحي
مسيتي او صبحي يا حُسين
▪️▪️▪️▪️▪️
اويه كل خفگة گلُب اسمك يمولاي ايتردّد
اويه كل دمعه التهل ذكرك بالارواح ايتجدّد
العيون اتحِب مدامعها التسيل اتشرّف الخد
يجي اويانه ابمآتمنه نحس جدّك محمّد

تصب ادموعه او يدگ اضلوعه
او يصيح ابلوعه يا حُسين
▪️▪️▪️▪️▪️
يبو الاكبر تجارتنه معاك اعظم تجاره
صفه انشوفه الربح بيها ولا بيها خساره
الذي ايحبّك ولا تبرد وسط گلبه الحراره
تره الترضه عليهْ انته يفوز ابكل جداره

ابثيابك لازم أهدّك واهم
اضلّن خادم يا حُسين
▪️▪️▪️▪️▪️
ابو الحسن الوائلي

▪️▪️▪️▪️▪️
احسين ابوي  للعدل چانت طلعِته
احسين ابوي  يعتلي الدين ابذبحته
▪️▪️▪️▪️▪️
فاطمه آنه العليله او والِدي احسين
الطِلع من أرض المدينه ينصر الدين
عله المذهب دارت ايصد الشياطين
او يلفظ انفاسه الأخير شافه بالعين

احسين ابوي  شافه محتاج الوگفته
احسين ابوي  يعتلي الدين ابذبحته
▪️▪️▪️▪️▪️
اتعنّه ابوي امن المدينه ابكل الايمان
لمن شاف الدين دارت حوله الاوثان
گال ابد متهمني اُميّه او آل سفيان
ابراسهم شيطان وآنه ابراسي قرآن

احسين ابوي  ابعزم ناذرها مهجته
احسين ابوي  يعتلي الدين ابذبحته
▪️▪️▪️▪️▪️
بالصحاري گطع دربه او حلّ الاحرام
گاصد احسين الحقيقه ضد الاوهام
الهدف يحييها الشَريعه او دين الاسلام
چن محمّد بيده جاي ايحطْم الاصنام

احسين ابوي  تمّت ابكربله حِجته
احسين ابوي  يعتلي الدين ابذبحته
▪️▪️▪️▪️▪️
يعرِف او فاهم هدفها الناس الاشرار
عله الحق ضنّوا نفسهم والعكس صار
ابغيره راح اتحدّه عزمه كل الاقدار
خيبر ايشوف آل اُميّه او هوّه كرّار

احسين ابوي  ضد شكو ظالم وگفته
احسين ابوي  يعتلي الدين ابذبحته
▪️▪️▪️▪️▪️
نيته ينصر دين ربّه ابزود واحساس
راده يترسّخ او يبقه معتلي الراس
چان ما مِهتم عليهْ اجتمعت الناس
ما يهاب الدنيه كلها العنده عباس

احسين ابوي  حِچه او چانت كلها سكته
احسين ابوي  يعتلي الدين ابذبحته
▪️▪️▪️▪️▪️
من مشه ابتأييد الهي الكربله راح
او نيته عن هالدين كل اُغبار ينزاح
راد كل مُسلم يشوفه ايعيش مرتاح
وكت ما شاف الجهل ساكن بالارواح

احسين ابوي  بالذبح خطّط كلمته
احسين ابوي  يعتلي الدين ابذبحته
▪️▪️▪️▪️▪️
ابو الحسن الوائلي

▪️▪️▪️▪️▪️
گلُب طفله يكابر
واعله الونّه صابر
واهلي ضيّعوني او ضيّعتهم
▪️▪️▪️▪️▪️
أنا الطفله العليله الفاگده احبابي
ابحسرتي ودّعتهم وابتده امصابي
عجيبه استغربت ما حسبوا احسابي
فوگ الخد اديّه او گاعده ابّابي

صفت ظلمه دياري
وابد ما تطفه ناري
راحوا عنّي ما چن آنه بتهم
▪️▪️▪️▪️▪️
ابعِدوا عنّي سويّه وابتده صمتي
ابو فاضل وابويه واخوِتي او عمتي
مينلام الذي ايگلّي تغيّرتي
فگدهم هوّه مو غيره سبب علتي

يقيني او هذا ضنّي
المرض ينزاح منّي
اترد عافيتي ولله لو شفتهم
▪️▪️▪️▪️▪️
هلي اللي دائماً چانوا يفرحوني
نسوني او من نسوني اهوايه جرحوني
أناشدهم صرت وادموعي بعيوني
ارجعولي تعالوا او لا تموتوني

ردت أحزاني تهدي
لجل مرسال اودّي
بالنجمه الضعون الفارگتهم
▪️▪️▪️▪️▪️
ينجمه احچيلي خل گلبي تخف ناره
ابويه احسين هسّه اشلونه شخباره
أريد اخبار منّچ تحمل ابشاره
مته يرجع ينجمه العايف ادياره

ينجمه او هالمسيّه
شنو اخبار البقيّه
ردت موتي يجي من ودّعتهم
▪️▪️▪️▪️▪️
هلي اشما طوّلوا بالغيبه هاي اكثر
تزيد اهموم گلبي والحزن يكبر
انه صح اعله غيبتهم فلا أكدر
لچن مو بيدي لازم عالصبر اضطر

دعيت او محني طولي
ابسلامه يِرجعولي
عشت بالوحشه من يوم العفتهم
▪️▪️▪️▪️▪️
جواب النجمه چان ابنبره وابحسره
ابوچ امن الگفه منّه انگطع نحره
او توذّر من وگع بدمومه عالغبره
الحنين الصدره دافي داسوا ابصدره

اذا مذبوحه أهلي
بعد بالعِيشه شِلّي
حبايب روحي كلهم فارگتهُم
▪️▪️▪️▪️▪️
بعدها النجمه گالتلي خبر أصعب
دموع العين منّه ابكل قهر تنصب
عگب عمّي سبوها عمّتِي زينب
غريبه ابلا ولي فوگ الهزل تركب

وسف عمتي الأميره
وحدها ابلا عشيره
الغرب من طاح ابو فاضل سبتهم
▪️▪️▪️▪️▪️
ابو الحسن الوائلي

▪️▪️▪️▪️▪️
لمّن انعه احسين وانقل مصرعه
اشلون احاچي ام البنين الاربعه
من تناشد عن ولِدها ابدمعة العين
▪️▪️▪️▪️▪️
يبو الباقر آنه حاضر
ابطاعتي الأمرك
الگلُب ذايب يالمصايب
كربله اتقهرك
گتلي بالهمّ يبن حذلم
هالوصل دورك
اسبگني واِسعه احسين إنعه
تدخل انتظرك

حين تنعه هناك تحضرلك مره
ابهونك اخبرها تراها امحيّره
فاگده اربع ولد كِلهم ميامين
▪️▪️▪️▪️▪️
عله مهلك سولفلها
من تصد ليها
إحچي مُجمل لا تفصّل
من تحاچيها
فگْد الاربع ما يهمها
لا تهِم ليها
خبر واحد من صدمته
الراح يحنيها

إحذر اتفصل الجره وكت الذبح
امن الحزن لابد تون او تنجرح
يا بشِر ام الغياره اتموت بالحين
▪️▪️▪️▪️▪️
شلون ادخل للمدينه
وانعه ابو الاكبر
صعبه أسرد هالمصيبه
گلبي ما يگدر
شلون اگلهُم يهل يثرب
گطعوا المنحر
أبو اليمّه صار جسمه
وذر واتطشّر

شلون اگلهُم عله صدره المنسحگ
والسهام الطاحت ابجسمه رشگ
آه يا جسمه التوزّع عله الصوبين
▪️▪️▪️▪️▪️
اسلمت أمري بهالرزيّه
للعلي القهّار
ادخلت ناعي للمدينه
والدمع مدرار
لا مُقاماً بعد الكم
يعمر بهالدار
احسين دامي او راسه باقي
عالرمح يندار

ابلا رجال او لا علم رد الضعن
بس علي واوياه عمّاته إجن
امن الطفل مذبوحه كلها لحد الحسين
▪️▪️▪️▪️▪️
حرمه اجتني ابظهر محني
گرّبت منّي
هذي امّه لابو فاضل
صاحت اسمعني
عوف ولدي بشِر عنهم
لا تخبّرني
عن إمامي او تاج راسي
الآن جاوبني

صحت يم الاربعه ابطف نينوه
البگه براسچ ولدچ انذبحوا سوه
فدوه گالت كل بنيني لابن ياسين
▪️▪️▪️▪️▪️
يبن حذلم اسمعِت صاحت
والدمع ساجم
ولدي واهلي وآنه فدوه
لكل بني فاطم
ما يهمني وضع ولدي
هذا مو لازم
ابو اسكينه المهم راجع
بالضعن سالم

لا تنطرينه انگطع منّه النحر
إجت زينب إخته محنيّة ظهر
شاركيها بهالمصيبه يم البْنين
▪️▪️▪️▪️▪️
ابو الحسن الوائلي

▪️▪️▪️▪️▪️
يالعندك قضيّه او حِيرتك بيها
اقره الحمد لام عباس تگضيها
▪️▪️▪️▪️▪️
يالعندك أمر حاط ابدليلك خوف
دمعك منّه غادي عالوجه مذروف
اقره الفاتحه لام البنين او شوف
محلوله قضيتك راح تلگيها
▪️▪️▪️▪️▪️
اذا أمرك صعب همّك ابد لَيزيد
ام عباس إنخاها شوكت متريد
سخيّه حاجتك تنطيها الك بالإيد
ركعتين الها لمّن تنوي تهديها
▪️▪️▪️▪️▪️
نعم باب الله باب ام البنين ايكون
يعني اللي تريده ايصيرلك مضمون
تمِدلك لو ردت من عدها چف العون
گلبها اتعوفك ابحيره مينطيها
▪️▪️▪️▪️▪️
لون تقسم عليها ابداعة المذبوح
ثق واعتقد همّك كلّه راح ايروح
آلامك تزول او ما تضل مجروح
راح امن الهضم روحك تعافيها
▪️▪️▪️▪️▪️
تضل بالعالي مهما دارت الايّام
بِت احزام بالشدّه سند واحزام
زلم ربّت ولا الهم مثيل ازلام
نذرتهم خدم لحسين واليها
▪️▪️▪️▪️▪️
أهي يا مَرْت ابو بالدنيه ضاهتها
تضحّي اولادها فدوه لشريچتها
نعم بس هيّه هاي الحره سوّتها
او نالت مرتبه محّد يضاهيها
▪️▪️▪️▪️▪️
ابو الحسن الوائلي

▪️▪️▪️▪️▪️
اتمنّيت ويّاك روحي ابكربله تطلع
اتمنّيت قبلك يخويه جسمي يتگطّع
مسلم اهناك ايتوذّر
مثل ابو فاضل والاكبر اتمنّيت
▪️▪️▪️▪️▪️
يا خويه
طلعت روحي ريت ابكربله يمّك
يا خويه
وآنه ادمومي تجري من قبل دمّك
يا خويه
او ترض الخيل جسمي من قبل جسمك

لو اطيح عليك اسلّم بآخر انفاسي
لو اطيح بسيوف اميّه ينگطع راسي
واستغيث او يمّي تحضر
مثل ابو فاضل والاكبر اتمنّيت
▪️▪️▪️▪️▪️
بدموعي
اتوادع ويّه ولدي والدمع يجري
بدموعي
أحضنهم قبل ما ينگطع نحري
بدموعي
أمشي امن الخِيام او بالأجل أدري

يحسين بالطف انه موتي چنت رايد
يحسين يم راسي اشوفك بالأجل گاعد
اعليّه تبچي ابدمع أحمر
مثل ابو فاضل والاكبر اتمنّيت
▪️▪️▪️▪️▪️
يحسيني
ابمماتي ريته صار البيّه ما صاير
يحسيني
انگطع راسي لچن ما داسني الحافر
يحسيني
الكلام ازغير يم امصيبة العاشر

بالكون ماكو مثلها لوعِتك لوعه
بالكون ياهو انذبح وانطحنت اضلوعه
بالبُگيت اثلاثه بالحر
مثل ابو فاضل والاكبر اتمنّيت
▪️▪️▪️▪️▪️
يا جرحي
متت بالكوفه وحدي والخلگ غربه
يا جرحي
او وكت الموت جسمي محّد ابگربه
يا جرحي
غربتي اَكثر عليّه امن الأجل صعبه

آلام الغربه ثگيله او زيّدت كسري
آلام ما يمّي واحد يوگف ابظهري
انگطع راسي ابقبضة الشر
مثل ابو فاضل والاكبر اتمنّيت
▪️▪️▪️▪️▪️
ابو الحسن الوائلي

▪️▪️▪️▪️▪️
عد عيناك نبقه اوياك ضد اعداك
توگف كل الأنصار
▪️▪️▪️▪️▪️
عد عينك يبو السجاد ما تخلف وعد ربعك
نقسم ما نهاب الموت كل هاي الزلم درعك
يواحد محّد ايشبهك يتاج ابروسنه انرفعك
نگلبها گلُب عالجيش بس اتأشّر ابـ صِبعك

إيد بإيد لا مَنحيد كلشي اتريد
يحصل يابو الأحرار
▪️▪️▪️▪️▪️
مو مثل العِده هيهات عنهم نختلف إحنه
باعوا روحهم للمال واحنه الروح الك بعنه
وحدك ما تضل مولاي ثابت يبقه موقفنه
دونك يا حُسين انموت بالحومه تعاهدنه

يالمبخوت سِمعه الصوت انعيش انموت
راضين ابكل أقدار
▪️▪️▪️▪️▪️
ما نهتم منو الضدنه نسوّي الصعبه والمتصير
والينوي يصل حدّك راسه ابلايه رحمه ايطير
المَن تهوه هاي الروح بس انته الشرف لا غير
الذي تخلص حياته اوياك هذا يالحبيب بخير

ماكو انسان بهالأكوان مثلك چان
يحسين او أصلاً صار
▪️▪️▪️▪️▪️
شنگل لله لو عفناك ابحيره والعده كثره
لون ما ننذبح ويّاك ابّيش انگابل الزهره
خلّيها تصد لحسين چم واحد نِذر عمره
لونها ما تطيح الروس گبلك لحّد اتعذره

انضحّي ادموم والمحتوم ويّه الگوم
يحچي السان البتّار
▪️▪️▪️▪️▪️
نتگطّع وصل بالسيف بس گطرتنه ما توگع
نختار ابكرامه انموت وابد للذلّه ما نخضع
اشما يگرب علينه الموت نتقدّمله ما نرجع
للحگ اليضحّي الروح يشاهد لذّه بالمصرع

دمنه ايفور نوگف سور راح ادهور
وگفتنه اتضل تذكار
▪️▪️▪️▪️▪️
ابو الحسن الوائلي

▪️▪️▪️▪️▪️
يالبعدك شباب او ذبحك اتقدّر
يا ذخر الحسن لحسين ابو الأكبر
▪️▪️▪️▪️▪️
يا زلمه انته طالع من ظهر زلمه
يالمذخور يوم الطف لجل عمّه
حگها ما توصفك سيّدي الچلمه
وازغير الكلام او انته منّه اكبر
▪️▪️▪️▪️▪️
يا شاب او قليل اويه الجبل تنقاس
حگّه اهوايه من عطرك يغار الياس
ياللي اعله الشجاعه امدربك العباس
وانته ابن الچبير الحاني ظهر الشر
▪️▪️▪️▪️▪️
عمّك من نظرته ابكربلاء اهناك
لا عزّيت نفسك لا ردت دنياك
گتله سيّدي او مولاي عِد عيناك
أحله امن العسل موتي تره واكثر
▪️▪️▪️▪️▪️
صلِت صولة علي جدّك ابو السبطين
الوگف جدّامك المشرد يدوره امنين
صحِت رجله أگصها اليدنه يَم احسين
الشسِع نعلك نعم ما يوصل العسكر
▪️▪️▪️▪️▪️
تشطر بالتساوي انته بلا مَتقيس
يا قرآن واگبالك ضعيف ابليس
لأن زفّيت اُميّه اتلقّبت عرّيس
بيك الكون يبن المجتبى اتحيّر
▪️▪️▪️▪️▪️
ابو الحسن الوائلي

▪️▪️▪️▪️▪️
القاسم وحده بس بالمعركه اهواي
▪️▪️▪️▪️▪️
إذِن من عمّه جاب او دخل للحومه
غيره او زود هذا ابن الحسن يومه
اعداد الجيش كلها اگباله مهزومه

خلّاها تصير امضيّعه الراي
القاسم وحده بس بالمعركه اهواي
▪️▪️▪️▪️▪️
نشمي او ما وصل واحدهم الحدّه
العده آلاف بس ما گدرت اتردّه
طعم الموت أحله امن العسل عنده

هِتف هاي آل اميّه كِلها جوّاي
القاسم وحده بس بالمعركه اهواي
▪️▪️▪️▪️▪️
منو اليگدر يصدّه الدرّبه الكافل
هوّه الخطر واگباله الخطر زايل
ميقِل خِبره عن عمّه أبو فاضل

أخذ روس العده لا ما أخذ ماي
القاسم وحده بس بالمعركه اهواي
▪️▪️▪️▪️▪️
تِشبه صولِته صولة ابو السبطين
ما يدري الوگف يَمّه يروح امنين
يگلهم رجله اگصها اليدنه يم حسين

يروّي السيف من ادمومهم جاي
القاسم وحده بس بالمعركه اهواي
▪️▪️▪️▪️▪️
عالي الراس يخسه الرايد ايذلّه
من سيفه ابسهوله اليگرب ايكتله
كل الجيش الف فدوه لشسِع نعله

گدروله غدر يا وسفه من هاي
القاسم وحده بس بالمعركه اهواي
▪️▪️▪️▪️▪️
ابو الحسن الوائلي