▪️في ذكرى حلول شهر شعبان و ولادات "الاقمار الشعبانيّة"
▪️▪️▪️▪️▪️
راح اتهيأ للافراح او راح انسه الاحزان
واستقبِل شهْر الاقمار اهلاً يا شعبان
▪️▪️▪️▪️▪️
يا شهْر البي طِيب اجراحي
يا شهْر التحمل افراحي
يا من راحة بالي ابليلك
او يَمطيّب روحي ابمصباحي

يا من للرحمه او للخير بهلالك بيبان
واستقبِل شهْر الاقمار اهلاً يا شعبان
▪️▪️▪️▪️▪️
يا شهْر الافراح الهالي
يُوم الثالث منّك غالي
بي انظر مولود الجنّه
بي مولود احسين الوالي

شع النور ابهذا اليوم كاشخ عالازمان
واستقبِل شهْر الاقمار اهلاً يا شعبان
▪️▪️▪️▪️▪️
ابيوم الرابع فرحه اچبيره
يحمِل مولد راعي الغيره
ظهْر احسين او نفسه او روحه
أعني العبّاس او مو غيره

الصارن معلم للتاريخ من عنده الذرعان
واستقبِل شهْر الاقمار اهلاً يا شعبان
▪️▪️▪️▪️▪️
ابيوم الخامس زيّن اسمه
او هل ابنوره مثْل النسمه
هذا السجّاد الشع نوره
التارس هاي الدنيْه ابعِلمه

هذا الصاير مثْل النور نازل عالتربان
واستقبِل شهْر الاقمار اهلاً يا شعبان
▪️▪️▪️▪️▪️
ابيوم الحادي عشر اتنوّر
شع ابهذا اليوم الاكبر
شمْس الباري غابت خجلت
لمّن شافت نور الاكبر

شع او مثله ابهذا الكون لا صار او لا كان
واستقبِل شهْر الاقمار اهلاً يا شعبان
▪️▪️▪️▪️▪️
يوم الخامس عشر الاروع
بي انوار المهدي تِسطع
الغايب عن اعيِون الوادم
وامتانينه ايهل او يطلع

ابخير اترد ابجيته الگاع واتزيّنها الوان
واستقبِل شهْر الاقمار اهلاً يا شعبان
▪️▪️▪️▪️▪️
مرّه الدنيْه باللي بيها
واهْل البيت اللي امحلّيها
نور ايخلّف نور ابعزمه
وايشع عالدنيْه او يضويها

كل منهم صاير قرآن وابهيئة انسان
واستقبِل شهْر الاقمار اهلاً يا شعبان
▪️▪️▪️▪️▪️
ابو الحسن الوائلي
١٤٤٤هـ

▪️▪️▪️▪️▪️
عيدك مبارك يا حبيبي 
يالحبّك امرادي او نصيبي
كل عام وانت بخير يا روحي
▪️▪️▪️▪️▪️
يا أغله كلشي بالعمر اليّه
يالصار حبّك للگلُب هويّه
لا ثره اتلمني الليله لا ثريّه
وابمولِدك فرحان كلشي بيّه

شيوصّف الليله فرحتي
بشفافي وابگلبي ضحكتي
يالحبّك امثبّتهن اصروحي
كل عام وانت بخير يا روحي
▪️▪️▪️▪️▪️
انته الفلا يوصل أحد جلالك
انته الله ما خالق أحد مثالك
انته الگمر ما يوصل الجمالك
انته حرز بالشدّه گلبي شالك

ابنص الگلُب ثابت مچانك
يالما شفت ثاني ابحنانك
توفيقي كلّه النظرِتك يوحي
كل عام وانت بخير يا روحي
▪️▪️▪️▪️▪️
يرزقنه ندعي الله العلي نظُرتك
يمسح علينه بلكي چف رحمتك
متفضّل اعلينه اشكثر حضرتك
امغرّگنه انته ابخيرك او نعمتك

منجازي فضلك من نعدّه
گلبك نريد الله يسعده
غالي اشكثر يا بلسم اجروحي
كل عام وانت بخير يا روحي
▪️▪️▪️▪️▪️
العام اليجي بلكت يحل ظهورك
ظلمه او نريده ايشع علينه نورك
نحيي الولاده نندعي ابحضورك
إمسح دمعتك خل نصد سرورك

خل دمعك ايصير ابتسامه
او روحك تعيش ابكل سلامه
هالليله لجلك زاعلت نوحي
كل عام وانت بخير يا روحي
▪️▪️▪️▪️▪️
ابليل الولاده دعوِتي الوحيده
يا ربّي عجّل طلعِته الرشيده
هوّه الفرج هوّه الأمل نريده
يحكمها هاي الدنيه كلها بيده

يمته نشوف المهدي حاكم
هذا عزيز الزهره فاطم
امتاني رجِعته كاتب ابـ لوحي
كل عام وانت بخير يا روحي
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
يابو طالب غصباً اعليهم تضل
عالي من الله يبو خير العمل
▪️▪️▪️▪️▪️
أبتدي اوياك ابسلامي الواضح
يا عظيم او يا أبو كل صالح
شكو واحد سمّعك شي جارح
فاشل ايضل وانته بس الناجح

امعدّل او مهيوب والضدّك نزل
عالي من الله يبو خير العمل
▪️▪️▪️▪️▪️
المثلك انته سيّدي شنگلّه
نقره وانعيد ابصفاتك الّه
عالي قدرك ما شخص يوصلّه
سلّم الباري عليك او صلّه

عالبشر مثْل المطر خيرك هطل
عالي من الله يبو خير العمل
▪️▪️▪️▪️▪️
عالي والأقزام ما يدنولك
الخيّر البيهم ميوصل طولك
واللي چانوا كافر ايصيحولك
فدوه يابو المرتضى يرحولك

الحصى ماتوصل أبد علْو الجبل
عالي من الله يبو خير العمل
▪️▪️▪️▪️▪️
الله لاينطي اللي جاب آلامك
وانته أملاك السمه خدّامك
الجبل مايوصل سفوح اجدامك
غصباً اعليهم ثبت إسلامك

اسلام واحدهم يبو طالب بُطل
عالي من الله يبو خير العمل
▪️▪️▪️▪️▪️
اليوم راح احچيه ولله الشاهد
سبب كُرهك سيّدي يالماجد
انته يا مولاي ذنبك واحد
لأن للكرّار شخصك والد

لأن ابنك علي كل بغضك حِصل
عالي من الله يبو خير العمل
▪️▪️▪️▪️▪️
چنت كافل للرسول او ناصر
او ضوه ابليل اسلامك اصبح ظاهر
ابموتك اعله الهادي لا ما حاير
ايحامي عنّه علي ابدالك صاير

الفحل بس هوّه الذي ايخلّف فحل
عالي من الله يبو خير العمل
▪️▪️▪️▪️▪️
متت والهادي حناه امصابك
اعليه بده عام الحزن بغيابك
غلگ باب العطف من سد بابك
اتأذّوا ابفگدك يغالي احبابك

انحنوا لمّن شاهدوا نورك رحل
عالي من الله يبو خير العمل
▪️▪️▪️▪️▪️
ابو الحسن الوائلي

▪️▪️▪️▪️▪️
يا شجاع الحرب يا صنديدها
عجبه راسك ينطبر يا حيدها
▪️▪️▪️▪️▪️
شلون يالچفك كِسر ظهر الكفر
فتح راسك بالصلاه سيف الغدر
الهضمه يا ليث الحرايب تنگدر
وانته أهل الجور كاسر إيدها
▪️▪️▪️▪️▪️
أمس باب القلعه بيديك انحِمل
او كلها شهدت ليك يا خير العمل
الموزمه غيرك فلا عرفت بطل
ضايعه من دونك ارواشيدها
▪️▪️▪️▪️▪️
تحكم الاكوان بالطول او عرض
تندل ادروب السمه قبل الأرض
حيف دم راسك نزل ويّ الفرض
او نال ابن ملجم الچان ايريدها
▪️▪️▪️▪️▪️
طيحتك كسره چبيره يالهُمام
كونها اتعينك يمولاي الجِدام
ابّباب دارك تصد عينك للايتام
اشلونه ابونه يا علي ترديدها
▪️▪️▪️▪️▪️
انته بين السبعه والسبعه وصل
والدعاء باسمك يحيدر ينقبل
والايتام ابجاهك ابدمع اليهل
تدعي كون الها تضل يا عيدها
▪️▪️▪️▪️▪️
لاچن المحتوم ثابت لا محال
راح تصعد روحك لرب الجلال
گرّبت شمسك علي من الزوال
ذيچ ايّامك بعد شيعيدها
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
زينب الباري يكون ابعونها
حيدر امدّد تشوفه اعيونها
▪️▪️▪️▪️▪️
شلون بيها تشوف والدها طريح
نايم او ينزف دمه راسه الجريح
علي الوجهه كل وكت همها يزيح
صعب وضعه او صار خاطف لونها
▪️▪️▪️▪️▪️
عاينت عالمرتضى ابدمع اليهل
من رجع بچتاف ولده منحمل
هوايه هالمنظر عليها مو سهل
حال ابوها خيّبلها اضنونها
▪️▪️▪️▪️▪️
بات بفراشه او تحاچيه او تنوح
بويه ضلع امي بعدني منّه اَنوح
تالي جتني طبرِتك فوگ الجروح
خلّت العينين دم اجفونها
▪️▪️▪️▪️▪️
بالغدر حين انطبر راسك يحيد
انذبحت احلام اليتامه يالعمِيد
كل نوايه اعداك يا حيدر اكيد
رحمة الله ابموتك ايقتلونها
▪️▪️▪️▪️▪️
ادري من عندك گرب يوم الوعد
بس يبويه الفقره وايتامك بعد
ياهو الهم يوگف او طاح السند
اليبذل العنده او يجاهد دونها
▪️▪️▪️▪️▪️
لو رحت يا هيبِتي من هالسنه
راح افگده يا علي طعم الهنه
يعني خيمتنه الچبيره الآمِنه
راح باطباق الثره ايدفنونها
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
أويلاه يالمرتضى
أويلاه يالمرتضى
▪️▪️▪️▪️▪️
طبروك يا حامي الحمه  أويلاه يالمرتضى
وانترس محرابك دمه
صارت الدنيه املعثمه
عامود طاح امن السمه
بالجنه تصرخ فاطمه
والدمعه منها ساجمه

بهالفاجعه اسودّ الفضه
أويلاه يالمرتضى
▪️▪️▪️▪️▪️
جبريل ضج ابصرخته  أويلاه يالمرتضى
طبروها سورة "هل اتى"
طاح الچبير ابوگفته
الذلّت الكافر قبضِته
والسيف طر اعمامته
او خلّاها تنزف هامته

سيف الغدر منّه قضه
أويلاه يالمرتضى
▪️▪️▪️▪️▪️
اشحاله علي خير العمل  أويلاه يالمرتضى
هوّه ابچتف ولده انحمل
هذا الفلا مثله بطل
چف الردي صاب الفحل
أيتامه گصدوه ابوجَل
حين الدروا يومه وصل

ياهو يلمهم لو مضه
أويلاه يالمرتضى
▪️▪️▪️▪️▪️
ممدود غوث المبتلي  أويلاه يالمرتضى
أحبابه مدمعها ايهلي
صار الحزن واضح جلي
والهم مِله العالم ملي
لمّن غمض جفنه الولي
كل ذرّه صاحت يا علي

استشهد أمير الرافضه
أويلاه يالمرتضى
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
الحسَن تاج الحميّه ابلا جدال
اطباعه چانت بالوفه معروفه

سيَّد الغِيره وابو گلْب الچبير
الماكو مِثله والسخِيّه اچفوفه

رحمه وابچفّينه يستر كل مُعين
ليْه يِفزع لو ابحاجه ايشُوفه

چان مال المالكه ابهاي الحياة
يستُر اعيُوب الدنا المكشوفه

چان للجايِع فزِعته ابلا مثيل
يِشبِع ارواح البُقت ملهوفه

بايِع الدِنيْه او شِره بيها الجِنان
صار كعبه والرجوله اتطوفه

التقِي ، العابِد ، الزاهِد ، والكريم
ابيا وصُف روحه تِضل موصوفه

هالشُجاع الچان تِشهدله الحروب
الگاع تِرجف لو خياله اتشوفه

حسَن يا بخْت الحسَن كلّش چبير
كل حرف نسمة هوه امن اِحروفه
▪️▪️▪️▪️▪️
ابو الحسن الوائلي
رمضان ١٤٤٤هـ

▪️▪️▪️▪️▪️
وينك يا علي كلشي يريدك
هذا الكون كلّه ابحاجة ايدك
تحكم سيّدي انريد يا حيدر ولو يوم
▪️▪️▪️▪️▪️
يا علي كلشي ينادي او يرتجي منك تجينه
حالنه مو حال صاير يبو الحمله يا ولينه
چم مصيبه چم رزيّه سيّدي چم جرح بينه

مولايَ يا نبض الگلب
ياللي العدل منك يصب
الفاسد اويه المصلح حرب
الوضع هذا يا علينه

عُبّاد القصور انظر عليها
بيت المال صار ابين اديها
واعليهم يقسموه وولدك شبعت اهموم
▪️▪️▪️▪️▪️
حتّه لو بس يوم ترجع يا علي فدوه انتمنّه
ابحكم ابو سفيان هاي السلطه من عدها انظلمنه
تأمر ابمنكر علينه يا علي او زادو جرحنه

سوّوا علي بس الغلط
خاطر يأمرونه فقط
ما بيهم البي غيره قط
گوم يا حيد الحگ النه

اعلينه ارواحهم لا مو حريصه
وارواح البشر عدهم رخيصه
ابجالك چنه غالين يامير النحل گوم
▪️▪️▪️▪️▪️
انته ابونه او عله همنه بالدمع نشكي او نگلّك
كلشي وسط الگاع أعوج يالعزيز ايريد عدلك
الناس نزعت مستحاها يا علي او كلشي وصلّك

يا سيّدي الشين انفرض
واهل الشرف صاروا بعَض
والشهره قد صارت مرض
بعد مدري شسولفلك

اليمشي اعله العدل صاير يغثهم
يعتبروه تخلّف هسه عدهم
شيخلّصها مولاي يردوها تضل دوم
▪️▪️▪️▪️▪️
دولة العدل الالهي الچنت تحكمهه يطاهر
بالفساد انملت هيّه بس ظلم بيها او مخاطر
من يجي راعي أمرنه ايشوف كل البيها صاير

ما ينوصف هالحال ابد
غابه صفه لا مو بلد
غيرك وحگك لا أحد
ايسيطر اعله الوضع گادر

كلها اتدگ صدرها إحنه وإحنه
وباقي يا علي نفسه وضعنه
بس تصريح واعلام گوم النه يجيدوم
▪️▪️▪️▪️▪️
راح اثبتلك او أقسم يا علي اوداعة الزهره
محّد ايراعي اليتامه سيّدي او زادت الفقره
رغم ما وصّيت بيهم عكس سوّوا يبو العتره

گالوا شكو هم ينجلي
خلّو اولادك تبتلي
أيتام ما عدهم علي
الكسُر بيهم صفه اشكبره

من عگبك يبو اچفوف السلامه
ما واحد يدگ باب اليتامه
چم واحد يمولاي يدعي ابگلب ملچوم
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
وا علياه  الصرخه بالآه
انهدمت اركان الهدايه الف ويلاه
▪️▪️▪️▪️▪️
كلشي بالكون اختلف
الملك من صاح او هِتف
دم ابو العتره نزف  وكت السجود

الحزن بيّن بالسمه
كلها صارت مظلمه
والملائك لاطمه  فوگ الخِدود

انطبر حيدر او دمّه غرّگ المحراب
سئل سائل منو اتعدّه اعله داحي الباب

حالة ارباك  صارت اهناك
امن انطبر حامي الحميّه في مصلّاه
▪️▪️▪️▪️▪️
صاح جبريل ابـ نِده
انهدمت اركان الهُده
الما يخاف الله اعتده  عالكلّه دِين

هذا سيف الله العلي
او غوث كلمن مبتلي
يا وسف يغدر علي  سيف اللعين

هبّت ريح سوده او غطّت الكوفه
او گلُب اولاد حيدر لاحِته الخوفه

علي المهيوب  شيبه مخضوب
عالارض هذا المعدّل نزفت ادماه
▪️▪️▪️▪️▪️
الدِحت خيبر قبضِته
او ضاگت اعداه ضربِته
او تحِت طاعة يمنِته  ايدور المدار

هالبطل حيله انهدم
او گوّه ينگلها الجِدم
عله ولده بالألم  يتوچه صار

رجع للدار حيدر عالچتف مشيول
زينب شافته او صبّت دمعها اسيول

غدت بجروح  اتصيح واتنوح
بويه حالك كسر گلبي او زاد بلواه
▪️▪️▪️▪️▪️
ابمنزله خير العمل
بات بفراش الأجل
گلّه جرّاحه وصل  ليك الممات

ابذعر أيتامه إجت
عله الباب اتجمّعت
بالخبر هذا اِفزِعت  بالنايحات

اليتامه ابصوت صاحوا للگلوب ايذيب
ننطي عافيتنه بلچي ابونه ايطيب

فدوه كل روح  للوصي اتروح
كون سالم يرجعلنه او زين نلگاه
▪️▪️▪️▪️▪️
غُمض جفن المرتضى
ويلي واوسدّ الفضه
حيدر الوالي مضه  للرب چتيل

ياهو للفقره بعد
يوگف احزام او سند
ياهو يفزع لو أحَد  بيهم يعيل

راح الچان ينطي الحاجه متلثّم
من ضمّه اللحد صار الصبح مظلم

راح ابو حسين  ابچي يا عين
لو بدينه عادي عدنه انموت ويّاه
▪️▪️▪️▪️▪️
ابو الحسن الوائلي
العتبة الحسينية المقدسة
١٤٤٦هـ

▪️▪️▪️▪️▪️
يالرحت للمسجد ابطولك
او رديت ولدك يتچولك
انته علي الما يگدرولك
گاع او سماها الكل بچولك

محتار ما ادري شوصّف
هاي المسيّه شلون موقف
يالمنّك انته الموت يرجف
دم هامتك يا حيد ينزف

يالضربتك بالحومه كلفه
يابو الحسن تنغدر وسفه
هيهات جرح الهامه يشفه
الصابك عساه مشلول چفّه

يا خيمة الفقره ابصلاتك
سيف الردي گرّب مماتك
حگهن يمن ماكو ابغلاتك
يبچن عله حالك بناتك

الله يا حامي الحميّه
بينه ولا بيك الاذيّه
تشتم حزن مو هوه الريّه
كلشي ولا طاري المنيّه

دمك صبغ لون العمامه
يا علي او ما ضلّت سلامه
ابموتتك يالمطبور هامه
تنطي الوجه وين اليتامه
▪️▪️▪️▪️▪️

▪️▪️▪️▪️▪️
يفراگ الابو كسره چبيره
اتعادل دفنته دفنة عشيره
بغيابه عله الراحه السلامه
ما واحد يسد امچانه غيره

المن عايش المدفون أبيّه
عافيته صفت جوّه الوطيّه
ما يرتاح ابد طيلة حياته
التجبر كسرته بس المنيّه

الفاگدله ابو بالدنيه شلّه
وحشة فرگة الوالد تكتله
واحنه الليله فارگنه ابونه
حماي الحميّه الماكو مثله

الچانت شوفته مرهم جرحنه
ماوصفه الحنان المالي حضنه
صارت من وگع هالدنيه غربه
طاح او طيحته كسرتنه كلنه

خلّصهن سنينه الوالي حيدر
كل ليل او فجر عالفقره يفتر
يطلع يگضي للناس الحوائج
گلبه ينجرح لو مسهم الضَر

صابت هامته الضربه اللعينه
ويلي واخذته من بين ادينه
هذا العيد اجه بس ما نريده
فايدته شنو او دفنوا ولينه
▪️▪️▪️▪️▪️

▪️▪️▪️▪️▪️
هامة الدين  طُبر سيف ابنَ مُلجَم
▪️▪️▪️▪️▪️
كل گلب مفجوع هاللّيله او حزين
والملائك بالسمه تبچي ابونين
ابهامتك شافوه نزل سيف اللعين
او كلها صاحت يا أمير المؤمنين

الدنيه يا حِيد  عليها سيطر الهم
▪️▪️▪️▪️▪️
اهتزّت الحالك علي السبعه الشداد
انطبر أشرف عبد من هاي العباد
طبرتك فجعت يحيدر كل فؤاد
تبچي كل روح او بچه حتّه الجماد

واعله الگلُوب  رعُب باللحظه خيّم
▪️▪️▪️▪️▪️
غده كلشي ابطيحتك دمعه يسيل
او بين معقوله اليگول او مُستحيل
علي الينهي ابچفّه كل حمْل الثجيل
اشلون لاحه السيف حمّاي الدخيل

كلشي مذهول  عليك انته او تألّم
▪️▪️▪️▪️▪️
كلها مفجوعه عليك الانبياء
شاهدوا مطبوره آيات الولاء
والسواد الليله سيطر عالضياء
والسمه يا حيدر انگلبت دماء

اتحوّل الكون  يحيدر قطعة من دم
▪️▪️▪️▪️▪️
ينتخي وكْت الشدايد كلشي بيك
مضطرب كلشي صفه او يبچي عليك
وسفه يالشايل الدنيه ابچف اديك
ارجعِت مخضوب ابدمه وامسنّديك

انته ابو الحيل  صدگ حيلك تهدّم
▪️▪️▪️▪️▪️
صعب فگدك يالصراط المُستقيم
يا عظيم اتمُوت بالشهْر العظيم
مِن طبر راسك علي چف اللئيم
ابطبرتك حتماً ذبح حلْم اليتيم

عگبك انشوف  علي كلشي تيتّم
▪️▪️▪️▪️▪️
ابو الحسن الوائلي
١٤٤٥هـ

خلّصهن سنينه الوالي حيدر
كل ليل او فجر عالفقره يفتر
يطلع يگضي للناس الحوائج
گلبه ينجرح لو مسهم الضَر

أعظم الله أجر صاحب الزمان واجوركم بذكرى استشهاد أمير المؤمنين الإمام علي بن أبي طالب عليه الصلاة والسلام رزقنا الله وايّاكم شفاعته في الآخره

كُل عام وأنتم بألف خير تقبل الله طاعاتكم واعمالكم

▪️▪️▪️▪️▪️
انهض يحماي الحمه من الغري گوم
چم گبر بالغرقد غده مولاي مهدوم
▪️▪️▪️▪️▪️
گوم اعتني الطيبه يبو الحمله يكرار
ادري ولا يحتاج اخبرك عندك اخبار
ساووا قبور اولادك اويه الگاع الاشرار
هالعَمله منها كل موالي گلبه مالوم
▪️▪️▪️▪️▪️
مرتين هدموها الگُبب هالناصبيّه
او منعوا الزوّار التجي ولد الرديّه
كل هذا بغضاً بيك يا حامي الحميّه
بصدورهم يغلي الحقد باقي لهاليوم
▪️▪️▪️▪️▪️
هذا الامر تدريهْ بينه ايهيج الاحزان
جنّة الغرقد سيّدي اتحوّلت تربان
ما خلّوا لهاي القبور اعداك نيشان
والدمع حگّه يا علي لو يهمل ادموم
▪️▪️▪️▪️▪️
ماكو موالي ابراحته يا سيّدي ايزور
داير عله أهل البخت يا حيدر السور
يا علي ايمنعون اللي يتبرّك بالگبور
كسرة ظهر محتاجه يا مولاي هالگوم
▪️▪️▪️▪️▪️
لهاي المصيبه يا علي حشّم الموعود
بِعنانه خل يگصِد مهو للشِدّه مريود
بالسيف يذبحهم نريده كل بني اسعود
ياخذ ابحگّه ابلايه شك لازم المظلوم
▪️▪️▪️▪️▪️
ابو الحسن الوائلي

▪️▪️▪️▪️▪️
عالصادق يدمعي اتهامل ادموم
خلصت كل حياته اهموم بهموم
▪️▪️▪️▪️▪️
يِعينه الله اعله همّه او نايِباته
أحزان او غُصص خلّص حياته
مفطور الچبد لاگه مماته
طعم الراحه ما ضاگه ولا يوم
▪️▪️▪️▪️▪️
مثل ما بُغضت الكرّار جدّه
بغضاً بي صفت دنياه ضدّه
خلّت دمع عينه فوگ خدّه
يتهامل او بيها عاش مالوم
▪️▪️▪️▪️▪️
چان ايريد للامّه العداله
لاچن طبع هالامّه النذاله
تجازه چم جرح بالروح شاله
حليم او جابها بالصبر ملزوم
▪️▪️▪️▪️▪️
ابو الاخلاق ليش النذل عاداه
الردي ساوته الدنيه ابعالي الجاه
جابوا عله روحه الحزن والآه
المنصور الفلا منصور والگوم
▪️▪️▪️▪️▪️
من حگّه الذي بهالفاجعه اينوح
او عالصادق دمع عيناه مسفوح
عساها ابيوم فگده تطلع الروح
گضه نحبه إمام الكون مسموم
▪️▪️▪️▪️▪️
ضلع ام الحسن هاليوم كسروه
او راس المرتضى الكرّار طبروه
واردود الحسن بالغدره سمّوه
او شمِر رد او گطع منحر المظلوم
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
أصبح العِلم دماً يجري العيُون
أطبقَ أُستاذهُ اليوم الجفون
ناعياً صار ويبكي بشجون
سيّدي يا سيّدي قام يصيح
▪️▪️▪️▪️▪️
صادقُ العلمِ بغدرِ السُمِّ غاب
وعلى الكونين ساد الإكتئاب
دفنوا بدر الهُدى تحت التراب
وعلى مهديّنا ضاق الفسيح
▪️▪️▪️▪️▪️
من يعزّي صاحِب الأمرِ يُريد
حزنهُ هذهِ الأيّامُ شديد
جدّهُ الصادق لقد مات شهيد
ولهذِي الفاجعه بات جريح
▪️▪️▪️▪️▪️
قلبهُ قد غُرِست فيه الجروح
دمعُ عينيهِ على الوجهِ يلوح
أيُ آلامٍ لها المهدي ينوح
رُزء فاطِم أم تُرى رُزء الذبيح
▪️▪️▪️▪️▪️
آهِ وا لهفي على المولى الحزين
إذ بهِ دوماً يرى ذبح الحُسين
يا تُرى كيف لهُ تُغمِضُ عين
ويرى منهُ دمُ النحرِ يسيح
▪️▪️▪️▪️▪️
يا تُرى في صمتهِ ماذا يقول
عندما يُصغِي الى سحقِ الخيول
فوق جسمِ الطهرِ بالطفِّ تجول
كيف في هذِي المصائب يستريح
▪️▪️▪️▪️▪️
لو أتى إبنَ النجومِ الزاهِره
يحرِقُ الأعداء قبل الآخره
ثُم يبني معلماً للطاهِره
عندما يثأر سيَصحُّ الصحيح
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
گرب شهر الفاجعه او جايب الهَم
للخِدامه اتحضّروا او شِدّوا الهِمم
▪️▪️▪️▪️▪️
ادري بيكم يا خدم متحضّرين
حتّه تحييون المآتم للحُسين
فاطمه الزهراء آنه وابيقين
بالأسامي كلها أعرفها الخدم
▪️▪️▪️▪️▪️
تسر گلبي تره الخادم شوفِته
يحيي امرنه او بالمآتم وگفِته
وعد منّي راح أقبل خدمِته
او باچر ارفع هامِته بين الأمم
▪️▪️▪️▪️▪️
الگال اقبليها خدمتي يالبتول
من يصفّي نيته مرضاتي ينول
ما يحير او يلزم بأيده الرسول
او هوّه بالخِدمه يثبّتله الجِدم
▪️▪️▪️▪️▪️
اوصيتي يا خِدّام بحسين الحبيب
الشاعر او رادود اناشد والخطيب
دوم بچّوني عله الشِيب الخضيب
دمعي بالمأتم اريده يجري دم
▪️▪️▪️▪️▪️
يمن ضحّيتوه للخدمه العمر
ابدالي يا لطّامه لطموا عالصدر
لأن تدرون آنه ضلعي منكسر
ايهيج كلما حرّكت ايدي الألم
▪️▪️▪️▪️▪️
او هذي الچلمات يالخادم اكيد
تره ابهاي الدنيه كلشي ما يفيد
البيها ينفع بس ابو اليمّه الشهيد
او خدمِته او لولاهم العالم عدم
▪️▪️▪️▪️▪️
ابو الحسن الوائلي
١٤٤٦هـ

▪️المصيبة: لمّا بلغت روح الإمام الجواد ع التراقي صعد سطح الدار ورمق السماء بطرفه وتشهّد الشهادتين وغمّض عينيه وأسبل يديه ورجليه وعرق جبينه وسكن أنينه وفارقت روحه الدنيا.. وبقي جسد الإمام ثلاثة أيّام على سطح الدار..
▪️▪️▪️▪️▪️
من السَم تعاني اهواي ضلّيت
مُرد گلبك لحد ما بي توفّيت
حالك حال جدّك سيّدي ابگيت
بلا مدفن اثلث أيّام بالحر
▪️▪️▪️▪️▪️
اعله حزنك كون تزداد النوايح
يالدمعك دمه امن العين سايح
من ضليت فوگ الگاع طايح
ما جاك الشمِر يگطع المنحر
▪️▪️▪️▪️▪️
ضل عالگاع جسمك يبن الاطياب
بس اعداك ما سلبولك اثياب
يمصاب الأبد ما مثله امصاب
مصاب احسين حتّه الحجر يقهر
▪️▪️▪️▪️▪️
ما عندك اخو عالماي مطروح
ولا عندك رضيع ابسهم مذبوح
ولا خَيتك غريبه اميسّره اتروح
ضعنها اويه العده لبعيد گوطر
▪️▪️▪️▪️▪️

▪️▪️▪️▪️▪️
الله ايعين گلبك سيّدي الباقر
بعيونك شفتها امصيبة العاشر
▪️▪️▪️▪️▪️
صبي او عينك تصد امصاب ابو اليمّه
سمعت الخيل من رضّت عظم جسمه
السبي او گطعة الراس لگلبك اتهضمه
والطف خلّه دمعك عالوجه ماطر
▪️▪️▪️▪️▪️
عمرك سيّدي خلّص قهر واحزان
وادموعك تصب للمنذبح عطشان
تنظر عالخيم من هجمت العدوان
شفت اهدوم جدّك جابها الحافر
▪️▪️▪️▪️▪️
بعيونك شفت ركضة يتامه ازغار
عليكم يوم حرگوها الخيم بالنار
يا راحه التمرّك وانته ليل انهار
شفت سوط العدو فوگ المتن داير
▪️▪️▪️▪️▪️
يا مولاي حيل اچبيره لوعاتك
وانته الطف فتح باب لمعاناتك
سبوك اعله الهزايل ويّه عمّاتك
من طاح الگمر گيّدهن الفاجر
▪️▪️▪️▪️▪️
حياتك خلّصت يا سيّدي مهضوم
ما لحظه نسيت امصيبة المظلوم
دمعاتك تهل حد ما متت مسموم
متت يا من چنت عالفاجعه صابر
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
امْن السِمَه هِيَّه نِزلَت وصيَّه
حامِي الحميِّه... هوَّه الخليفَه
▪️▪️▪️▪️▪️
جِمع هالناس النبِي خير البشَر
واِبنيتَه اِبتِشَر اِيْنصُّب الحُجَّه
شاهِد اِعليها يِضَل اليِستمِع
اْو كِل هذا الجمِع اْو شهَر ذو الحُجَّه
امُر عِند المُصطفىٰ اِهوايَه مُهِم
هالليله يتِم الحُجَّة الحُجَّه

ماخِذ قراره اْو عِندَه بِشاره
الصِهره اِختِياره... هوَّه الخليفَه
▪️▪️▪️▪️▪️
نِزَل جِبرائيل مِن فوگ السِمَه
الوالِد فاطِمه باعِثَه ربَّه
يبُو الزهره اِيْسلِّم اِعليْك العلِي
واِيگِلَّك علِي الگلبَك ايْحِبَّه
هوَّه مِن بعدَك خليفَه اِعلَه الارُض
حيدَر يِفترُض بعدَك اِتنصبَه

هالامُر يِحصَل والرُفَض يِقبَل
حيدر الأوَّل... هوَّه الخليفَه
▪️▪️▪️▪️▪️
گبُل لا يِحچِي النبِي اْو صُوتَه رفَع
اْو ما واحِد سِمَع واِفتهَم قصدَه
يِنظُر اوجُوه المِئَه اْو عشرين الِف
الما بِيهُم كلِف بَيَّن اِبحِقدَه
اْو يدرِي يِقبَل صاحِب الغيره الأبِي
حيدَر للنبِي الوالِي مِن بعدَه

تِنظُر اِعيُونَه عاليِبغضُونَه
اْو قِلَّه يردُونَه... هوَّه الخليفَه
▪️▪️▪️▪️▪️
رفَع چَف المُرتضى خيْر العمَل
اْو چَف الوالِي ضَل بِيْد ابو الزهره
ناده والصُوت اِرتِفَع مِنَّه اِبفخَر
يا هاي البشَر اِبواضِح النبرَه
"مَن كُنِت مولاه يِضَل مولاه علِي"
مِن بعدِي ولِي يِبقَه يِعتبره

چَف الولايَه مرفُوعَه رايَه
بالسِمه اِحچايَه... هوَّه الخليفَه
▪️▪️▪️▪️▪️
مِن مُحمَّد ما طِلَع هذا الامُر
نازِل هالامُر امْن العلِي العالِي
والقِيادَه ما تلُوگ اْو تنعصِي
بَس بِيْد الوصِي أوَّل اْو تالِي
بخبخا للحقِ أو لا ما يهِم
غصباً عالزلِم حيدَر الوالِي

هالحچِي ليهُم غصباً اِعليهُم
علي واليهُم... هوَّه الخليفَه
▪️▪️▪️▪️▪️
ابو الحسن الوائلي
ذو الحجَّة ١٤٤٤هـ