▪️▪️▪️▪️▪️
هاي يخواني صفت تاليها
زينب الناس الغرب سابيها
▪️▪️▪️▪️▪️
زينب او عِشره اليّه اويه الجروح
من عگب ذاك الستر مسبيّه اروح
ولله حگي اشما أضل ابچي وانوح
ياللي اختكم حايره امخلّيها
▪️▪️▪️▪️▪️
آنه بت فاطم او حمّاي الدخيل
ياخذوني اميسّره فوگ الهزيل
ماكو هودج عله ضعني لا چفيل
وحدي ضلّيت او دموعي اجريها
▪️▪️▪️▪️▪️
انه الما لمحت الي ضِل الشمس
او چان صوتي يم هلي ما ينهجس
الفرق واضح أصبح اليوم او أمس
تون روحي والحزن ماليها
▪️▪️▪️▪️▪️
چنت مهيوبه وابو فاضل معاي
منّي اباوعله تجرّه او خذه الماي
ابگيت ما بين الغرب تايه الراي
اچفوف اديّه صاروا امچتفيها
▪️▪️▪️▪️▪️
قبل يمكم چنت مرفوعه الجبين
او شكو چلمه احچيها أسمع تآمرين
او عگب عينك يابو فاضل يا حُسين
تآمر اعليّه العده انظر ليها
▪️▪️▪️▪️▪️
آه يخواني اشكثر هضمي چبير
احملت هم اثگيل ما مثله يصير
روسكم أنظرها من اعيوني ادير
عالرماح العاليه امعلگيها
▪️▪️▪️▪️▪️
امن البواچي صايره حمره الجفون
والجروح ابگلبي ماضنها تهون
رايده انشدكم ابزينب تقبلون
من ديار الثانيه امودّيها
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
احسين شفته انگطع نحره
او هم شفت عمّاتك اسره
خلّصت اسنينك ابكسره
تذكر امصاب الحُسين
تذكر امصاب الحُسين
▪️▪️▪️▪️▪️
سيّدي الله اليعينك 
بالدمع تمّت سنينك
كربله زيدت ونينك 
خلّتك دومك حزين
▪️▪️▪️▪️▪️
ما شفت راحه ابحياتك 
سيّدي اللحظة مماتك
بس مصارع ذكرياتك 
والأهل متوسّدين
▪️▪️▪️▪️▪️
عاشت اللوعه ابمهجتك 
تهِد كل الحيل ونتك
صلّت امن اجلوس عمتك 
باوعتها يالحنين
▪️▪️▪️▪️▪️
صرت من العلّه ناحل
وانسبيت ابگلُب ذابل
انته والنسوه الثواكل 
عالهزل متگيّدين
▪️▪️▪️▪️▪️
ابناظرك شفت ابو اليمّه 
باقي فوگ الگاع جسمه
اتعبِت من جِيته تلمّه 
ابخيل عظمه طاحنين
▪️▪️▪️▪️▪️
يهد كل الحيل وضعك 
ذكريات الطف تفجعك
اتخلطه ويّ الماي دمعك 
او تبدي زادك بالونين
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
ابرجلي تنداس  دولة اميّه
ما تذلون  بنت الحميّه
▪️▪️▪️▪️▪️
آنه زينب يا خلگ بت حيدره
يعني بنت الشرف كلّه بالثره
صح سبيتوني او مشيت اميسّره
لچن ما أنذل أضل امخدّره

أخْت الحسين  للذل أبيّه
ما تذلون  بنت الحميّه
▪️▪️▪️▪️▪️
آنه إخت الطاح بس ما منهزم
طاح بس ضل رايه واترفّ ابعزم
ولله ما أدريه واقع لو حلم
من وگع صگّاركم صرتم زلم

رايه عباس  بالغاضريّه
ما تذلون  بنت الحميّه
▪️▪️▪️▪️▪️
من وگع عباس اخوي اعله النهر
ابزودي صرت القائده بعد الگمر
راح اذلكم وامشي مهيوبه ابفخر
محّد ايذلني وانه ابچفّي القدر

لجلي هالكون  ياخذ تحيّه
ما تذلون  بنت الحميّه
▪️▪️▪️▪️▪️
وكت أغبر خلّه هذا الشي يحل
يحرس اضعون الشرف صار النذل
ما تهمني احبالكم وآنه الأصل
الوتد لازم ينلزم بيهْ الحبل

ابقه ليفوگ  ابعلْو الثريّه
ما تذلون  بنت الحميّه
▪️▪️▪️▪️▪️
الجِهل قدري خلّه يسمع ما يلي
الله سوّه الهيبه والعزّ الهلي
اليحط راسه ابراسي ولله يبتلي
ذو الفقار الساني والهيبه علي

آنه ابو احسين  وآنه الزچيّه
ما تذلون  بنت الحميّه
▪️▪️▪️▪️▪️
وحگ دم احسين ابو اليمّه الشهيد
هلي كل صولاتهم بيكم أعيد
لا عبيد الله يهمني او لا يزيد
اتراب رجلي أغلى منهم شي اكيد

ما يگدرون  للهاشميّه
ما تذلون  بنت الحميّه
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
يا خويه گومي امن النوم  فزّت رقيّه
حاچيها يا زينب جاي  تسأل عليّه
الله اشمصيبه
▪️▪️▪️▪️▪️
العقيله امن الحزن رادت تغمْض العين
او رادت راحه من هم او مصاب البين
اهي چم لحظه حين الطبگت الجفنين
التقت باليقضه هيّه ويّ أخوها احسين

واحد للآخر مشتاگ  انجمعوا سويّه
عگب الوداع اللي صار  بالغاضريّه
الله اشمصيبه
▪️▪️▪️▪️▪️
ابدمعها عاينتله او شافت احواله
واخوها احسين ضمها ابدمعه همّاله
يصدها واستحه من عدها بالحاله
او شكرها اهوايه لنها حرست اعياله

احميتي العِيال اشما بيچ  من آل اُميّه
شاگفتي عن النسوان  اسياط الاذيّه
الله اشمصيبه
▪️▪️▪️▪️▪️
اسمعَت صوته يگلها ابعبرِته التحزن
اگعدي خويه يا زينب رقيّه اتون
اعله والِدها طبعها الطفله دوم اتحن
بعدني اشتم هوه بنتي العزيزه اتضن

ما تدري بيّه مذبوح  فوگ الوطيّه
والجسم داست فوگاه  خيل اعوجيّه
الله اشمصيبه
▪️▪️▪️▪️▪️
زينب حين فزّت شافت المدمع
گلب عمتچ تگلها ابدمعچ اتلوّع
رقيّه گالت الها اجوابچ ارد اسمع
ابويه احسين وينه واشوكت يرجع

وين الابو انطيني اجواب  منّچ اليّه
يا عمّه متأخر ليش  شنهو القضيّه
الله اشمصيبه
▪️▪️▪️▪️▪️
گلب هالطفله زينب رادت اتصبره
بس هذا الوضع خلّاهه متحيره
تگلها والِدچ طاح انگطع نحره!
لو يرجعلچ الوالد بعد فتره

اتگلها أبوچ اموذريه  ابسيف المنيّه
لو هاي الايّام ايعود  حيره او رزيّه
الله اشمصيبه
▪️▪️▪️▪️▪️
العقيله اتذكرت من فارِگت اُمها
ثياب اُم الحسن بالحِجره تشتمها
او علي ابنومه تكلمه فاطمه ابهمها
زينب فزّت الحگ يا علي ضُمها

اتذكّرت زينب بالحال  موت اُمها هيّه
تسأل علي هم اتعود  اُمّي الزچيّه
الله اشمصيبه
▪️▪️▪️▪️▪️
ابو الحسن الوائلي
١٤٤٥هـ

‌▪️⁩‌▪️⁩‌▪️⁩‌▪️⁩‌▪️
ياللي انويت واغيابك اختاريته
حيلي اعليك كل الحيل هدّيته
‌▪️⁩‌▪️⁩‌▪️⁩‌▪️⁩‌▪️
وسافه اتسمِّمت روحك ينور العين
ريت آنه الذي ابدالك لفاني البين
اذّيته ابوداعك حيل اخوك احسين
موش اشلون ما چان انته اذّيته
‌▪️⁩‌▪️⁩‌▪️⁩‌▪️⁩‌▪️
امشيت او ما مشه لمّن مشيت النوح
او زادت من رحيلك بالدليل اجروح
اشعِدها الروح لنها اتضل يبعد الروح
او موتك يا حزام الظهر لاگيته
‌▪️⁩‌▪️⁩‌▪️⁩‌▪️⁩‌▪️
بُطل حيلي واحسّه ابدفنِتك وشّل
يا جرح العضيد اچبير وايسِل سلّ
اوداعك ما أضنها الروح تتحمّل
اخوك احسين دون افياي خلّيته
‌▪️⁩‌▪️⁩‌▪️⁩‌▪️⁩‌▪️
يبو امحمّد دليلي اعليك متعذّب
يحزامي او عضيدي افراگك ايشيّب
دمع العين ضل اعله الوجه يسچب
دم اعليك خويه دمعي صبّيته
‌▪️⁩‌▪️⁩‌▪️⁩‌▪️⁩‌▪️
اخلافك ريتي تشتم الهوه حسره
الدهر يم الشريعه ضاملي كسره
الكفيل الگاه طايح منخسف بدره
واجب عالفگدكم ينهدم بيته
‌▪️⁩‌▪️⁩‌▪️⁩‌▪️⁩‌▪️
دِفنتك تالي يا محبوبي بيديني
كسير ابوحدي معقوله تخلّيني
غطّيته ابترايب مدري بسنيني
جسمك يا أنيس الروح غطّيته
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٦هـ

▪️▪️▪️▪️▪️
سوه سوه سوه  للاغله امن الهوه
الى قبر الحُسين
▪️▪️▪️▪️▪️
خدّام الحُسين اعله الوعد يبقون
ابسبيله عن قناعه العدهم ايبذلون
اجه الموعد او لازم للولي يرحون
مجالسهم گضوها واعتنوا يمشون

لابو الوفه الصدگ  الى معنى العشگ
الى قبر الحُسين
▪️▪️▪️▪️▪️
انجِمعنه او كربله انريد انتعنّاها
نواسيها الإجت والروس ويّاها
التعب ننساه من نذكر الوافاها
افراگ اعزازها اشگد هوّه اذّاها

ضعنها الزينبي  رجع من السبي
الى قبر الحُسين
▪️▪️▪️▪️▪️
الحزن مهما لابو الأكبر كُبر بينه
جرحه الأصل بس ايعِرفه مهدينه
عله ذبحة الوالي ايباوع ابعينه
نواسيه باربعين ابن الوصي جينه

حزن فلا يصح  جرح رافگ جرح
الى قبر الحُسين
▪️▪️▪️▪️▪️
من خير الحُسين اشلون نستغرِب
طول الدرب موكب يتبع ابموكب
اكبار اكبار تلگه ابروحها اتعزّب
عن افضالهم شتگول واشتكتِب

تصد شكو خدم  تگلّك بس نعم
الى قبر الحُسين
▪️▪️▪️▪️▪️
لابن حيدر مشه كل زاير ابهِمّه
العاشگ لو بعيد الدرب ميهِمّه
دون احسين كل هذا العمر ظلمه
البلد غرگان يبقه ابخير ابو اليِمّه

أبد ما ينجلي  فضل أبو علي
الى قبر الحُسين
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
حيدر دمعته جاريه ادموم
حگه عضيده فارِگه اليوم
▪️▪️▪️▪️▪️
حيدر تسيل ادموعه واينوح
شاف امن اخيّه طلعت الروح
ابغمضة اعيونه بدت لجروح
وابعينه خلّه الفاجعه اتحوم
▪️▪️▪️▪️▪️
ابعينه يصد راح القبل چان
ايشاركه بالفرحه والاحزان
ماچن ولد عم چنهم اخوان
ابفگده علي كل حيله مهدوم
▪️▪️▪️▪️▪️
ابفگده حزن ضل يعصف الريح
يسمع علي صوت السمه اتصيح
كل داعي ماكو ايصير توضيح
قطعاً محمّد مات مسموم
▪️▪️▪️▪️▪️
خلصت سنينه يهدي بالناس
من عنده حد ما شيّب الراس
شاف البعض ما تملك احساس
واحدهم امن الغيره معدوم
▪️▪️▪️▪️▪️
طه النبي من غمّض العين
موته كشف كل الشياطين
زادوا ابلوعات ام الْحسين
خلّوا گلبها اهواي ملچوم
▪️▪️▪️▪️▪️
توّه النبي ابوسط الگبر نام
گاع المدينه انترست اصنام
ما وِفوا ويّه الناس الاكرام
واحفادهم موجوده لليوم
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
حاضره الليله الزهراء  او تحديداً ابسامرّه 
عاشر ولد وا ويلاه  مات او اجتّي اتحضره
▪️▪️▪️▪️▪️
الزچيّه فاطمه بهاليوم
السامرّه اعتنت بهموم
ابنها اللي گضه مسموم  حاضرته

اجت بضلوع محنيّه
الليله عدها تعزيّه
غده عاشر ابن هيّه  فاگدته

كون احنه بدموع العين  انشارِك عزاء الزهره
عاشر ولد وا ويلاه  مات او اجتّي اتحضره
▪️▪️▪️▪️▪️
يجمر الزهره ما يبرد
گلبها اعله الأسه اتعوّد
مصاب العسكري زيّد  لوعتها

اجتّه وابحزن ناحت
المصيبه ابعينها لاحت
آ يبني ابقهر صاحت  ابصرختها

وام الحسن ما تنلام  لنها غدت متغيره
عاشر ولد وا ويلاه  مات او اجتّي اتحضره
▪️▪️▪️▪️▪️
انحِنت يَمّه تنادي ابصوت
وسف يوليدي يالمبخوت
ابشبابك واعتناك الموت  بآلامه

النوايح هيّه من علّت
الملائك باچيه نزلت
عله ونها تون ضلّت  محتامه

أرض او سمه مفجوعات  حُزناً ابهاي الذكره
عاشر ولد وا ويلاه  مات او اجتّي اتحضره
▪️▪️▪️▪️▪️
البتول الله يساعدها
هالدنيه صفت ضدها
من افراگ والدها  مجروحه

شافت چم حزن واصواب
الضلع منها انكسر بالباب
گلبها بهالمصايب ذاب  من نوحه

صُبّت عليها الآلام  خلّت حزنها اشكبره
عاشر ولد وا ويلاه  مات او اجتّي اتحضره
▪️▪️▪️▪️▪️
المواجع كلها عاشتها
ابولِدها الدنيه فجعتها
ابد ما تخفه حسرتها  والمِحنه

من هام الذي اتصوّب
لحّد العسكري تنحب
غده منها الدمع ينصب  عالوجنه

عاشت مصايب واحزان  تچويها مثل الجمره
عاشر ولد وا ويلاه  مات او اجتّي اتحضره
▪️▪️▪️▪️▪️
تضل الزهره مهمومه
مشت من ليلها انجومه
تتاني ابن الحسن يومه  من يبدي

اويه اُمّه فاطمه انگلّه
تراها الغيبه مو سهله
يمته رايِتك تعله  يا مهدي

ليل الفرج صار اطويل  چا يمته يطلع فجره
عاشر ولد وا ويلاه  مات او اجتّي اتحضره
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
گوم من غيبتك واجلِي اغبارها
وانتفض للزهره واخْذ ابثارها
▪️▪️▪️▪️▪️
گوم منتظريك يا ليث العرين
الدين ما عِنده بعد غيرك معين
اخِذ ثار اُمّك الزهره اُم الحْسين
اللي حَد الان تلهَب نارها
▪️▪️▪️▪️▪️
گوم يالشمْس التي خلف السحاب
من گبُل يوم الحساب اعلِن حساب
عله الدفعوها عله الكوثر الباب
هجموا اعليها واهِي ابنُص دارها
▪️▪️▪️▪️▪️
غيبتك مو بالسهِل كلّش تطول
اليمته ناويها يبن طه الرسول
هسَه عاد الخاطر الزهره البتول
انهض او غيبتك زِيح استارها
▪️▪️▪️▪️▪️
اُمّك الزهره ابگلبها اللهب ضال
وانته الادره ابحالها الما مثله حال
هجموا اعليها رجال او لا رجال
الشرده وكْت الشِدد كل مگدارها
▪️▪️▪️▪️▪️
حال أُمّك فاطِمه كلّش عصيب
للجروح البيها بس انته الطبيب
ابرغم ما تعرف لچِن هاوي المغيب
وانته الادره ابحالها او باخبارها
▪️▪️▪️▪️▪️
حال اُمّك فاطِمه ماله شبيه
بابها اثگيل او عليها دافعيه
آه بالعصره صدرها امصوّبيه
هذا بعض الصار مِن المارها
▪️▪️▪️▪️▪️
ينكسُر گلْب الحجر عالبيها مار
بابها الجنّه او صفه حارگته نار
لو ردِت تعرف بعد اكثر اخبار
خَل يخبرك بالجره بسمارها
▪️▪️▪️▪️▪️
ابو الحسن الوائلي
١٤٤٥هـ

ماتت فاطمه الزهره الزچيّه
الله يعين أهلها بهالرزيّه
كل البيت ظلمه بعينهم صار
طفت وي موتها انواره الزهيّه

أعظم الله أجر صاحب الزمان  وأجوركم باستشهاد مولاتنا الزهراء عليها السلام

▪️▪️▪️▪️▪️
الله يعينك يا علي يحيدر
حگك اذا دمعك دمه تفجّر
اليفگدله غالي قطعاً ايتغيّر  يحيدر
▪️▪️▪️▪️▪️
يعينك الله يمن صبرك حيّرت بيه الصبر
مثل ما ضلْع الزچيّه گلبك اصبح منكسر
محّد ايلومك لونها سالت ادموعك حمُر
يجرح افراگ الاحبّه او كسرِته ما تنجبر

يالفاگد ام بيتك حزينه روحك
للموت ابد ما تندمل جروحك
اتكابر يحمّاي الحمه متگدر  يحيدر
▪️▪️▪️▪️▪️
من اجالك خبر موت الزهره حيل اتألّمت
واوگعت بالخبر هذا او حاسر لبيتك گمت
ارجعت كِلّك لهفه تركض للوداع اتحزّمت
يا علي ابموت الوديعه للصبر ما قاومت

ما تنحمل لا ولله هالمصيبه
الله يصبرك راحت الحبيبه
ابگلبك جرح فگد الزچيّه يقهر  يحيدر
▪️▪️▪️▪️▪️
المغتسل زيّد بحزنك من وراه دمعك جره
اضلوع بالزهره الوديعه اتلمّسِت متكسّره
گلِت عينوني ابحمِلها عجبه وانته حيدره
يا علي ما چن يمينك أمس قلعت خيبره

بالگوّه تابوت ام حسن حملته
ما چن امس باب الحصن قلعته
يالجرحك ابهاي الرزيّه يكبر  يحيدر
▪️▪️▪️▪️▪️
ابدارك الوحشه چبيره من عگب ام الحسن
صار يخنگ من بعدها او كل تفاصيله محن
الزهره ما چانت زوجتك علي چانتلك وطن
شنهو ذنب اللي جنيته او بيها ياذيك الزمن

حملت يمولاي الحزن مهجتك
من العرِگ گطعوا الك وردتك
ريتك يأذّيها الهوه اذا مر  يحيدر
▪️▪️▪️▪️▪️
لكل زوايا البيت تنظر والمدامع هامله
محّد اتلگّاك وانته ادفنت چلمة يا هله
ابد ما ينشال جرحك منو يگدر يحمِله
الفاتِحه لو تنوي تقره تنهضم بالبسمله

چانت فرحتلك كلها تعتبرها
عشرين ما تم يا علي عمرها
قتلوا طفلكم والضلع تكسّر  يحيدر
▪️▪️▪️▪️▪️
اشچان حالك يا إمامي وانته تدفن فاطمه
شنهو صار اوياك حتّه اعليك بچّيت السمه
وسّدتها او شفت كل الدنيه صارت مظلمه
الضحكه راحت والأماني ها يحمّاي الحمه

خلّت يتامه فاطمه ابحزنها
مأواهم انته من بعد حضنها
شيرجّع الزهره يداحي خيبر  يحيدر
▪️▪️▪️▪️▪️
ابو الحسن الوائلي
١٤٤٦هـ

▪️▪️▪️▪️▪️
انگلبت الامّه على أعقابها
واجوا اشرف دار حرگوا بابها
▪️▪️▪️▪️▪️
انگلبت الامّه عگب موت الرسول
عله العتره او گصدوا لدار البتول
حاوطوها المالهم غيره او اصول
او شعلت اعله الباب نار احطابها
▪️▪️▪️▪️▪️
البالشدايد قبل ضمّوها الرگاب
گصدوا اعليها يصفّون الحِساب
ابدال ميعزّون فاطم بالمصاب
زادوا ابكسرة ضلعها امصابها
▪️▪️▪️▪️▪️
شياطين اتعنّوا ابهيئة بشر
آه وابچف الردي خدها انسطر
لا طفل همها ولا ضلع انكسر
چان همها لا يطيح احجابها
▪️▪️▪️▪️▪️
رغم ما كسروا ضلع من فاطمه
غصباً اعله الكِسر ضلّت قائمه
ابعيده لا شك الحصه عن السمه
فاطمه ما هزها ذاك اصوابها
▪️▪️▪️▪️▪️
چان ابوها بعده فوگ المغتسل
او ربعه باعوها الضماير بالعجل
او خطّطوا للإنقلاب ابلا خجل
او گصدت الداره جموع اذيابها
▪️▪️▪️▪️▪️
بگت نيران السقيفه اموجّره
والسيوف البگت بيها امشهّره
جابت الهمّ عله العتره الطاهره
والبغض تارس غده اصحابها
▪️▪️▪️▪️▪️
ابو الحسن الوائلي
١٤٤٦هـ

ماتت فاطمه الزهره ابگلب مقهور
محنيّه او غده منها الضلع مكسور
او بالبسمار صدر الطاهره محفور
من عصروها طاحت تون عالغبره
▪️▪️▪️▪️▪️
أعظم الله أجر صاحب الزمان وأجوركم باستشهاد سيدة نساء العالمين (عليها السلام)، ونسأل الله بحقِّها أن يفرِّجَ عنَّا قريباً عاجلا.

▪️▪️▪️▪️▪️
روحك اعله الصاير الله ايعينها
يالفگدت اُم الحسن واحسينها
▪️▪️▪️▪️▪️
يالجبت عمرك الدين الله نصير
عگب فاطم هالصفه گلبك كسير
اجبال مَتحمله علي جرحك چبير
ياللي آلامك صعب تبيينها
▪️▪️▪️▪️▪️
انته يا نار الغضب عالظالمين
دِفع بابك يا وسف چف اللعين
او خلفه فاطم يا أمير المؤمنين
انعصرت او هلّت مدامع عينها
▪️▪️▪️▪️▪️
يالگطعت ابذو الفِقار اشگد رِگاب
او لامرك بهالكون كلشي مستجاب
زهرِتك ماتت واهي ابعِز الشباب
امن العرِگ گطعوا جمال اسنينها
▪️▪️▪️▪️▪️
اتغرّبت عگب الزچيّه والرسول
وابد ما تنلام لو حزنك يطول
بالمغيسل شاهدت جسم البتول
اضلوعها يا حيدر امكسرينها
▪️▪️▪️▪️▪️
ابنار صبرك يبو الحسنين انچويت
اعليها حگك يا علي اشگد ما بچيت
صارن اعيونك حمُر حين الدريت
فاطمه الزهراء السطره ابعينها
▪️▪️▪️▪️▪️
شيّعِت نعش الحبيبه بإنتحاب
ابليل أظلم وانته حانيك المصاب
وسّدِت فاطم يبو اتراب ابتراب
او صار مانع بينك او ما بينها
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
الچ يا فاطمه خدام شرف لنّچ تقبلينه
غيرچ ولله ما عدنه يا مولاتي تدرينه
▪️▪️▪️▪️▪️
عبيدچ نفتخر نصبح يا أُم الحسن واحسين
ترخصلچ تراها الروح واشما عدنه من اسنين
فدوه تروح لسنينچ الما وصلت رقم عشرين

مجانين او علي ابمعناچ
او هاي ارواحنه تفداچ
نحيه نموت إحنه وياچ
محبتچ يا صراط الله تدور اويه الدمه بينه
▪️▪️▪️▪️▪️
فِتحنه اعيونّه او حبّچ لگيناه ساكن الوجدان
واسمچ حرز للشِدّات شلناه فاطمه او عنوان
طريقچ ولله منعوفه او علينه يشهد الرحمن

درب الله نتركه شلون
من عنده النجاة اتكون
ما نگدر ابد من دون
هاي الخدمه والاجواء الله يديمها اعلينه
▪️▪️▪️▪️▪️
وقف صاير يتاج الراس الچ والمنبرچ عمري
واحسّه يالزچيّه يصير فاهي ابلا لطم صدري
عساها تنعمي اعيوني لون دمعتها ما تجري

من ناعي الحزن ينعه
لمصيبتچ يالبضعه
تضل تتهامل الدمعه
بالمجلس نشكره هواي الينعاچ او يبچّينه
▪️▪️▪️▪️▪️
وحگ الگام بفراگچ يسولف حزنه ويّه البير
عمُر مابي خدمتچ هاي يا مولاتي مابي خير
مآتمنا وحگ ضلعچ نضل نحييها لو شيصير

فلا نگدر بليّاها
حيل اهوايه نهواها
يسِر الروح طرواها
نبذل الها كل مجهود حين اللي تمُر بينه
▪️▪️▪️▪️▪️
ابرواياتچ ولا تگطع مجلس يتبع ابمجلس
الذكرهن فاطمه نبدي نحضّر كلنا ونأسس
وابكل خطوه يالزهره منچ بالامداد انحِس

واتشوفيهم ازلامچ
تركض تحيي أيّامچ
طلبها صار خدّامچ
عبيدچ احنه نترجاچ منّچ لا تحرمينه
▪️▪️▪️▪️▪️
ابو الحسن الوائلي
١٤٤٦هـ

يمن گلبك ابد ما ينوصف همّه
وابروحك چبيره سيّدي الهضمه
مته تاخذ ابثار الضلع واللطمه
كسرها بيا وكت يالغايب اتجبره
▪️▪️▪️▪️▪️
أعظم الله أجر صاحب الزمان عج واجوركم بذكرى استشهاد سيّدتنا ومولاتنا فاطمة الزهراء عليها السلام

▪️▪️▪️▪️▪️
اشناطر بعد يالموعود والگوم
طبوا گبر عمتك وانته تنظُر
ما تتلاحگلها او فازع اتگوم
او كل اظهورهم مولاي تكسُر
▪️▪️▪️▪️▪️
عجّل الله فرجك الشريف

▪️▪️▪️▪️▪️
التقن ام البنين او فاطمه الزهره
سويّه اتشابگن بالدمعه والحسره
▪️▪️▪️▪️▪️
عگب ما ماتت ام الاربعه الطيبين
بالجنّه التقت بالزهره عين بعين
شكرتها عله موقفها ويّه احسين
لان ضحّتله لمّن رادها النصره
▪️▪️▪️▪️▪️
تحاچي ام البنين ابصوت بي ونّه
شرايچ لاچن اكثر من خوات احنه
وانتي ابلا غرابه وحده من عدنه
مقامچ عالي يم عباس واشكبره
▪️▪️▪️▪️▪️
احچاياتي قليله ابحگچ ادريهم
يالعندچ مواقف صعبه اجازيهم
مثل اولادچ اولادي اعتبرتيهم
الف شكراً الچ يا فاطمه الحرّه
▪️▪️▪️▪️▪️
جزاءً ليچ يالضحّيتي بالاطياب
للحاجات رب القدره شاءچ باب
ما خاب اليگصده لا ابد ما خاب
واتسهلين كل واحد نخاچ امره
▪️▪️▪️▪️▪️
أجابتها ابكلام ام الوفي الماجد
اليخدمكم بعد يا فاطمه اشرايد
اذا ذكره يضل طول العمر خالد
يا محلاها منكم لو أخذ أجره
▪️▪️▪️▪️▪️
يزهره انتي او علي اتمنّه تعذروني
لان سوط الشمر ما ضارب امتوني
ولا وي زينب ابكل قسوه چتفوني
ولا ويّاها آنه امشيت متيسره
▪️▪️▪️▪️▪️
تگلها الزهره يوم المحكمه الاصعب
گبل ضلعي التكسّر عندي هالمطلب
چفوف الغيره ليش اتگطّعت يا رب
انتقِم من الگِطعها او خاطري جُبره
▪️▪️▪️▪️▪️
ابو الحسن الوائلي
العتبة الحسينيّة المقدسة

▪️▪️▪️▪️▪️
هلا ياللي رفع راسي
هلا ابطولك يعباسي
مشكوره  مشكوره  يالما خيّبت ضنّي
▪️▪️▪️▪️▪️
آنه امك جيت اشكرك يا حبيبي
ياللي ضميتك ذخر لايام شيبي
طلع بيك امغزر اهوايه حليبي
ابن مثلك فخر صاير من نصيبي

متت لاچن عدل اسمك
او ضل ذكرك يبعد امّك
مشكوره  مشكوره  يالما خيّبت ضنّي
▪️▪️▪️▪️▪️
بالزغر وصّيتك اتصير العضيدك
درع وابعينك تحط زينب اريدك
ما تقصْر اوياهم الگطعة وريدك
الامر لو يحتاج خل تتگطع ايدك

ييمّه گتلي عد عينچ
اصيرن خادم احسينچ
مشكوره  مشكوره  يالما خيّبت ضنّي
▪️▪️▪️▪️▪️
للحميّه مثل صرتوا يذكروكم
لان ضحيتوا بالارواح لأخوكم
الدنيه والبيها ابد ما غيّروكم
يالرفعتم هامتي گدّام ابوكم

انه بيكم يهنيالي
كسرتوا كل خشم عالي
مشكوره  مشكوره  يالما خيّبت ضنّي
▪️▪️▪️▪️▪️
امن السبي زينب الحره من اجتني
اعليك يوليدي اسألتها او جاوبتني
كفو من عنده الذي اچفوفه اكفِلتني
صحت عفيه بإبني يالما فشلتني

وفيت لزينب اعهودك
الهوه ما مرها بوجودك
مشكوره  مشكوره  يالما خيّبت ضنّي
▪️▪️▪️▪️▪️
من هويت ابدون يسراك او يمنتك
ابو غيره او گد الحچايه عرفتك
چان همك يابو فاضل مو وگعتك
المهم يوليدي ردت تسلم جربتك

سهمها اشد من عينك
معاها اتبدت اسنينك
مشكوره  مشكوره  يالما خيّبت ضنّي
▪️▪️▪️▪️▪️
كل رضاي اعليك يبني ماله لازم
المهم يا عباس لمّن ترضه فاطم
مو شريچه او لا اخو واحدنه خادم
الترضه عنّه فاطمه ميكون نادم

رضاهم شي مهم واكثر
ينجّي ابساحة المحشر
مشكوره  مشكوره  يالما خيّبت ضنّي
▪️▪️▪️▪️▪️
ابو الحسن الوائلي
١٤٤٦هـ

لهفي لمولاتي اُم البنين عليها السلام في آخر لحظات عمرها:
▪️▪️▪️▪️▪️
وصل موتي او زيّد ابروحي اللهيب
او ما اجاني ابموتتي حسين الحبيب
وحدي بالغربه اون وابچي ابنحيب
او ماكو من احبابي اي واحد قريب
▪️▪️▪️▪️▪️
عينيْ اعله الباب مشبوحه تصد
بلچيْ فد واحد امن اولادي يرد
حته اگولن ما نِسوا ذكري الولِد
هذا غسّل ذاكه نزلني اللحد
▪️▪️▪️▪️▪️
وحشه والحسبات زيدتلي القهر
او عله الوجنات الدمع تارك أثر
الي شيجيبه الطريح اعله النهر
يا مصابه خاطرِي او گلبي كِسر
▪️▪️▪️▪️▪️
الاشد من امصاب مگطوع الإدين
يهد كل حيلي گطِع راس الحُسين
واسمعِت فوگه جِلس شمر اللعين
او گلها يا زينب بگيتي ابلا معين
▪️▪️▪️▪️▪️
براسي تركض خيل واتكسّر ضلوع
او منظر بعيني لطفل ضامي يلوع
حگها من عيني دمه تجري الدموع
او گلبي مالومه يون وايضل جزوع
▪️▪️▪️▪️▪️
راح اموت او مهجتِي متألّمه
بالجِنان اشلون اجابل فاطمه
متني من السوط ما نازف دمه
او لا اديّه امْن الحبال امورّمه
▪️▪️▪️▪️▪️
فاطمه اتمنّاها لو تعذرني حيل
مثل زينب ما سبوني عالهزيل
آنه محّد شافني او بيّه يعيل
هيّه ضل ايشوفها وين الذليل
▪️▪️▪️▪️▪️
عندي خمس اولاد بس المشكله
ابموتي ما جوني ولِد عقْد الوله
راح اغمْض عيوني وآنه امعلعله
شكثُر ردته ايكون گبري ابكربله
▪️▪️▪️▪️▪️

▪️▪️▪️▪️▪️
الله يعظّم اجرك يابو فاضل
ماتت هالمسيّه امك يكافل
تحضر رادتك تحمل نعشها
تنطر والدمع من عدها هامل

اعظم الله اجر صاحب الزمان واجوركم بذكرى وفاة آية الوفاء مولاتنا ام الاقمار فاطمة ام البنين عليها السلام