استشهاد الامام الصادق ع
‌▪️⁩‌▪️⁩‌▪️⁩‌▪️⁩‌▪️
جعفر الشاف الأذيّه
يبچي لجل الغاضريّه
‌▪️⁩‌▪️⁩‌▪️⁩‌▪️⁩‌▪️
الصادق او فخر الامامه
عاش عنوان السلامه
هوّه ابن أهل الكرامه
للأسف جهلوا مقامه

بس تضل چفهم رخيّه
يبچي لجل الغاضريّه
‌▪️⁩‌▪️⁩‌▪️⁩‌▪️⁩‌▪️
امن انولد لي حد مماته
لوعه شاهدها حياته
بالغدر جرحوله ذاته
او وصلوا النار البناته

شاهد النار السريّه
يبچي لجل الغاضريّه
‌▪️⁩‌▪️⁩‌▪️⁩‌▪️⁩‌▪️
صاحب النفس كريمه
داره حرگوا يا هظيمه
اتذكر ابهمّه الظليمه
اگباله تلهب خيمه خيمه

ينحب الذيچ الرزيّه
يبچي لجل الغاضريّه
‌▪️⁩‌▪️⁩‌▪️⁩‌▪️⁩‌▪️
تجري دمعاته ابغزاره
يا وسف حرگوله داره
ذكرته النار بأشاره
الكربله ما تطفه ناره

للجره ادموعه جريّه
يبچي لجل الغاضريّه
‌▪️⁩‌▪️⁩‌▪️⁩‌▪️⁩‌▪️
الشيعه إجوله ايصبّرونه
شاهِدوا حمره عيْونه
عالمدامع يسألونه
تجري ليش ايناشِدونه

ليا مصاب او يا قضيّه!
يبچي لجل الغاضريّه
‌▪️⁩‌▪️⁩‌▪️⁩‌▪️⁩‌▪️
جاوب او دمعاته تنصب
من نظرته داري يلهب
اطفيته آنه بس الاصعب
ايساعد الله عمتي زينب

ضلّت ابلا والي هيّه
يبچي لجل الغاضريّه
‌▪️⁩‌▪️⁩‌▪️⁩‌▪️⁩‌▪️
الطف بقه بيّه عذابه
ابچي لحسين او مصابه
جدي ضل فوگ الترابه
او عمتي گعدت بالخرابه

اويه الغرب راحت سبيّه
يبچي لجل الغاضريّه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٥هـ

▪️▪️▪️▪️▪️
بالسمه اعلان الحِداد
آه يمصاب الجواد
▪️▪️▪️▪️▪️
انّصب مأتم بالسمه بالليله هايه
ابذكرى مقتل تاسع اشموس الهدايه
ذبل كلشي وانخطف وجه المنايه
مو شخص عادي نعم مقتوله آيه

الحزن أصبح بازدياد
آه يمصاب الجواد
▪️▪️▪️▪️▪️
كلشي بالعالم توشّح لابس اسود
لأن هالمقتول قطعه من محمّد
ينلچم كلشي عليه الحاله لو صد
اجروح گلبه مو قليله صعبه تنعد

الكون ماليه السواد
آه يمصاب الجواد
▪️▪️▪️▪️▪️
فاطمه الزهره ابرغم همها او حزنها
امن المدينه اعتنت هالليله لابِنها
الحسره يم گبره غدت مبعوثه منها
بدت تنعي او بچّت الدنيه اعله ونها

صاحت ابّاب المراد
آه يمصاب الجواد
▪️▪️▪️▪️▪️
لابو الهادي البالحزن فاضت مهجته
يبچي كل وجدان وايصبها دمعته
حجّة الله اعله الثره اتسمّه زوجته
آمر المستعصِم او نفذَت كلمته

وانچتل خير العِباد
آه يمصاب الجواد
▪️▪️▪️▪️▪️
بقت روحه اتلوج من سمّ المنيّه
صعد سطح الدار بدموعه الجريّه
ايواسي راد احسين هوّه بهالرزيّه
بالشمس مات او ثلاثه ضل رميّه

كل مصاب احسين عاد
آه يمصاب الجواد
▪️▪️▪️▪️▪️
علي الهادي ابدفنة الوالد ينظره
جسمه سالم منّه ما مگطوع نحره
او محّد اتجرّه عله عظمه يِكسره
او ما قِبل واحد بناته ايروحن اسره

ينتحب حتّه الجماد
آه يمصاب الجواد
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
ابنهاية حياته  ابدمعته التسيح
يسلم اعله جدّه  الحُسين الذبيح
مصابين  چنهن مصيبه
▪️▪️▪️▪️▪️
اعله نفس الشاكله امصايب
ابو الهادي وابو الاكبر
التشابُه والفرِق بيهن
راح ايبيّن او أكثر
الجواد ابمقتله اتسمّم
بچفوف الكفُر والشر
او بقه فوگ التراب احسين
جسمه غادي بس منحر

غده بي تشابُه  هضُم وي هضُم
المآسي اللي بيهم  ولا تنهضُم
جراحات  كُبره او رهيبه
▪️▪️▪️▪️▪️
ابو اليمّه وابو الهادي
مرار الغربه قاسوها
الزمن ضدهم وگف وسفه
او نفس المحنه عاشوها
ابد ما شافوا الراحه
مآسي الدنيه شافوها
انذبح بالطف غريب احسين
والآخر روحه سمّوها

ابو اليمّه بالطف  الجسد منطرح
الجواد ابمماته  بقه اعله السطح
گلبهم  نسمع نحيبه
▪️▪️▪️▪️▪️
أبو الهادي انتقل لله
ابفعِل اُم الفضِل مسموم
او بعد ما قِتلِته ندمت
لاكن ما يفيد اللوم
او غده بالطف ابو السجّاد
من ماي العذب محروم
ضامي او يابِسه اشفافه
او متهيئه الذبِحته الگوم

عله هالمصايب  يطول النحيب
يويلي عليهم  غريب ابغريب
ولدموع  اعليهم سكيبه
▪️▪️▪️▪️▪️
بقه فوگ السطح جسم الـ
جواد او عالأرض شمروه
رفضوا واحد ايشيله
او تحت حرّ الشمس خلّوه
بس ويلي اعله حال احسين
اوّل ما وگع سَلبوه
گطعوا راسه والخنصُر
او بالخيل الجسم رضّوه

بحيث العقيله  ابقهرها تگول
اسمعِت عظم اخويه  تِكسره الخيول
عله الگاع  جثته سليبه
▪️▪️▪️▪️▪️
إمامي او سيّدي الهادي
تعنّه الوالِده شيّع
مراسيم الدفن كملت
او تواره جسمه بالمضجع
يعين الله علي السجّاد
صد اعله الأبو امگطّع
لا راس العليهْ لا ثوب
ابحصيره اوصاله ضل يجمع

يدفنه ابدموعه  او دليله الوجيع
بعد جسمه خلّه  اعله صدره الرضيع
بچه اهواي  إبنه حبيبه
▪️▪️▪️▪️▪️
الجواد اعله الترب من طاح
ما ضربوا إله نسوان
ولا عنده نسه واطفال
ابخيمهن شعلوا النيران
عليهن ما إجوا بالسوط
ولا سلبوهن العدوان
ولا ويّه الغرب راحن
سبايا يمشن بأحزان

ولا گيّدوهن  نساءه ابحِبال
ولا صعّدوهن  عده عالجِمال
يويلا  اشحال الغريبه
▪️▪️▪️▪️▪️
ابو الحسن الوائلي
١٤٤٥هـ

▪️المصيبة: لمّا بلغت روح الإمام الجواد ع التراقي صعد سطح الدار ورمق السماء بطرفه وتشهّد الشهادتين وغمّض عينيه وأسبل يديه ورجليه وعرق جبينه وسكن أنينه وفارقت روحه الدنيا.. وبقي جسد الإمام ثلاثة أيّام على سطح الدار..
▪️▪️▪️▪️▪️
من السَم تعاني اهواي ضلّيت
مُرد گلبك لحد ما بي توفّيت
حالك حال جدّك سيّدي ابگيت
بلا مدفن اثلث أيّام بالحر
▪️▪️▪️▪️▪️
اعله حزنك كون تزداد النوايح
يالدمعك دمه امن العين سايح
من ضليت فوگ الگاع طايح
ما جاك الشمِر يگطع المنحر
▪️▪️▪️▪️▪️
ضل عالگاع جسمك يبن الاطياب
بس اعداك ما سلبولك اثياب
يمصاب الأبد ما مثله امصاب
مصاب احسين حتّه الحجر يقهر
▪️▪️▪️▪️▪️
ما عندك اخو عالماي مطروح
ولا عندك رضيع ابسهم مذبوح
ولا خَيتك غريبه اميسّره اتروح
ضعنها اويه العده لبعيد گوطر
▪️▪️▪️▪️▪️

أعظم الله أجر صاحب الزمان عج وأجوركم بذكرى إستشهاد إمامنا محمد بن علي الجواد عليه الصلاة والسلام جعلنا الله وإيّاكم من الطالبين بثأره مع إمامٍ منصور ورزقنا الله وإيّاكم شفاعته يوم يقوم الحساب

اختارني زوجه الك ربنه الجليل
علي واختارك الي الباري بعد

من گلِت مَهري الدرع قصدي عليك
إنته درعي يا علي وانته السند

▪️▪️▪️▪️▪️
يشايف كربله ابعينك
الهك سيّدي ايعينك
▪️▪️▪️▪️▪️
يالتجري من دم دمعة المحاجر
او شافت عيُونك گطعة المناحر
ازغير العمر يا سيّدي او تناظر
جدّك تهوّس فوگه الحوافر

وانته أربعه اسنينك
الهك سيّدي ايعينك
▪️▪️▪️▪️▪️
يا سيّدي الباقر شوصفه حزنك
امشيّب دليلك يا إمامي ونّك
يالطابِعه اسياط العده اعله متنك
واحبال اُميّه اويه النسه سبنّك

الف يا وسفه سابينك
الهك سيّدي ايعينك
▪️▪️▪️▪️▪️
من تذكر الكوفه الدمع تسيله
تذكر مواجع عمتك العقيله
مسبيّه واهموم الگلُب ثجيله
عالناگه مچتوفه واهي الأصيله

مثلها اهوايه ماذينك
الهك سيّدي ايعينك
▪️▪️▪️▪️▪️
الشام ابدليلك چم رزيّه جاعل
وامبينه بيديك اشكثر فواصل
ابحزنك تنادي حاسر ابتواصل
مرّه حُسين او مرّه يابو فاضل

گوّه اتحرّك ايدينك
الهك سيّدي ايعينك
▪️▪️▪️▪️▪️
من حگها دمعاتك دمه جريّه
اگبالك تموت اتباوع الرقيّه
ما تدري ابوها ذابحِينه هيّه
فوگ الترايب داسته اعوجيّه

المنيّه بينها او بينك
الهك سيّدي ايعينك
▪️▪️▪️▪️▪️
امن ابدايِته عمرك الى النهايه
خلّصته هم او فاجعه او رزايه
حِقدوا عليك الوادم البغايه
ضنّوا ابچتلك تنتهي الولايه

شامخ تبقه دارينك
الهك سيّدي ايعينك
▪️▪️▪️▪️▪️
ابو الحسن الوائلي
١٤٤٥هـ

لا طعمَ للأعياد دونَ إمامُنا
العيدُ يحلو عِيدنا لو عادا

لمّا نرى المهديِّ فينا حاضِراً
فستُعتبر أيّامُنا أعيادا
▪️▪️▪️▪️▪️
عيدكم مبارك
اللهم عجّل لوليٌك الفرج

▪️▪️▪️▪️▪️
يامن ذكر إسمك عباده  لايگ إلك تاج السياده
من الله يا حامي الحميّه  لايگ إلك تاج السياده
يا حيدر  يا حيدر
▪️▪️▪️▪️▪️
يا واحد ابلايه شبَه بالدنيه ينعد
يالخالِقك رب السمه عون المحمّد
أوّل يحيدر تنحسِب ما فوگك احّد
تاريخك ابيض واليضِد تاريخه أسود

ليك النبي وضّح كلمته  خير البشر وافضلها انته
يا أبو العتره الهاشميّه  لايگ إلك تاج السياده
يا حيدر  يا حيدر
▪️▪️▪️▪️▪️
شنهو اليحجبك يا أسد الله او رسوله
بيك القلم حاير يضل شنهو اليگوله
يامن نلِت رِفعه او قدِر محّد ينوله
بس يمّك او تگطع يبو الحمله البطوله

كل معركه تدخل عليها  سيفك علامه ايخلّي بيها
تكسرها لخشوم الرديّه  لايگ إلك تاج السياده
يا حيدر  يا حيدر
▪️▪️▪️▪️▪️
تشهد حروبك أصبحت فارسها واكثر
نيشان خال ابكل حرب وابرزها خيبر
غيرك منو يابو الحسن عالصعبه يگدر
حتّه النبي ايناديلك ادخيلك يحيدر

من ينتخي يبن ابو طالب ابسوح الحرب تمحي الكتايب
واتحامي دين الله او نبيّه  لايگ إلك تاج السياده
يا حيدر  يا حيدر
▪️▪️▪️▪️▪️
ابيوم الغدير المصطفى أعلنها هايه
دين الله مو كامل لون ماكو الولايه
واضح يعرفك مو مثل أهل البغايه
شاءك أمير انته على كل البرايه

انته يمولاي الخليفه  غصباً عله اتباع السقيفه
خل يسمعون الناصبيّه  لايگ إلك تاج السياده
يا حيدر  يا حيدر
▪️▪️▪️▪️▪️
دوم اعله حبّك يا علي الباري أحِمده
فشله امن اعدّك فد شخص فوگك اعِدّه
ما دوّرت جاه او حكُم والغايه وحده
الكرسي اجه ابنفسه الك رادك تصِعده

ما غرّك الكرسي استحاله  همّك رضا الباري تعاله
نيتك يحيدر انقه نيّه  لايگ إلك تاج السياده
يا حيدر  يا حيدر
▪️▪️▪️▪️▪️
يا رحمه والهاي الخلگ أهداك ربّك
أعمى الينكرك يا علي والما يحبّك
مَنحير اذا طحنه ابشِدد انته نندبك
ما دام نشتم الهوه منعوفه دربك

حبّك نهج يروي الضماير  واللي يعوفك دومه خاسر
واحنه ننادي للمنيّه  لايگ إلك تاج السياده
يا حيدر  يا حيدر
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
هلا بعيد الله الچبير  هلا بتنصيب الأمير
هلا يا عيد الغدير  يا هلا او ميّة هلا
▪️▪️▪️▪️▪️
هلا او ميّة هلا بعيد اللهُ الاكبر
هذا عيد البي صُبح مولانه حيدر
ثبت هالأمر السماوي او مَيتغيّر
علي الكرّار الخليفه الباري قرّر
غصباً اعله الناكر الشانئ الأبتر
ابن عمّ الهادي يستاهلها واكثر

والخلافه مستحيل  لغير حمّاي الدخيل
ما تلوگ او ما تصير  يا هلا او ميّة هلا
▪️▪️▪️▪️▪️
للي نفسه فدوه للمذهب فِداها
أصبحت لجله الخلافه مُهتداها
عاف هالدنيه الدنيّه ابمحتواها
هيّه اجتّه ما رِكض حيدر وراها
سند للقرآن صار او ظَهر طه
مرتبة حيدر ولا واحد عِلاها

ابد ماكو بهالسنين  مثل اَمير المؤمنين
گالها طه النذير  يا هلا او ميّة هلا
▪️▪️▪️▪️▪️
مثل حيدر ياهو موصوف او تأرخ
اختاره رب الكون فيصل عله البرزخ
راسه للكرسي حشه حامي الحمه طخ
الكرسي هوّه اتعنّه يم اجدامه يرضخ
ابچفّه ذلها الدنيه هايه او ما تلطّخ
العاده حيدر باچر امن النار يصرخ

البايعه يعبر سليم  عالصراط المستقيم
كلشي يصبحله يسير  يا هلا او ميّة هلا
▪️▪️▪️▪️▪️
خبر عاجل رايد الباري يوصله
بيد جبريل الوحي للهادي دزله
أمُر ربّك بلّغ اعله الناس انقله
علي من بعدك خليفه راح اجِعله
المؤمن الحَبّه هلا الجنّه تگلّه
والذي مَيحب علي مايعرف اهله

كل شخص باليبغضوه  ضايعين اُمّه وابوه
واليحبّه إبن خير  يا هلا او ميّة هلا
▪️▪️▪️▪️▪️
ابثاني ما يتقارن اليحمي دخيله
او فخر للإسلام حيدر ينتميله
بالغدير اَعلن محمّد عن بديله
رفع چف حيدر التنهي كل ثجيله
علي هوّه الدرب لله والوسيله
حيدر الراي الذي ماكو مثيله

علي للدين العمود  وطن متحدّه حدود
كل حرف باسمه عبير  يا هلا او ميّة هلا
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
عشگي الاوّل علي  او عشگي الاخير
اهوايه أفخر علي  اعليّه أمير
أميري أميري  أبو الحسن
▪️▪️▪️▪️▪️
علي لا يوجد انسان
مثيله ابهاي الاكوان
بشر بس ذاته قرآن
أميري  أميري

علي اللي أسند الدين
تسير اَعوام و اسنين
حبيبي بس ابو احسين
أميري  أميري

عالي قدره بالمراتب
علي مُظهر للعجائب

الكون كلّه علي  بيده يدير
اهوايه أفخر علي  اعليّه أمير
أميري أميري  أبو الحسن
▪️▪️▪️▪️▪️
علي نور الله بالگاع
سفينه هوّه واشراع
خِتم قاموس لسباع
أميري  أميري

ابعزِم يدخِل للحروب
الخطر يم ذكرهْ ايذوب
علي ابنص گلبي مكتوب
أميري  أميري

تركع الدنيه القراره
من يلوّح ذو الفِقاره

بالمصاعِب علي  هوّه الجدير
اهوايه أفخر علي  اعليّه أمير
أميري أميري  أبو الحسن
▪️▪️▪️▪️▪️
علي ينهيها الآلام
رفع من شان الاسلام
تشوفه فرحه الايتام
أميري  أميري

شديد ابحربه تلگاه
ولاكن يم يتاماه
تكسره الدمعه والآه
أميري  أميري

ادخيله لمضيّگ لثامه
عِش يلِم كل اليتامه

صدره بلسم علي  لجرح الفقير
اهوايه أفخر علي  اعليّه أمير
أميري أميري  أبو الحسن
▪️▪️▪️▪️▪️
علي ميزان لحگوك
ابد ما مثله معشوگ
الخلافه بس اله اتلوگ
أميري  أميري

محبته فرض مشروط
خليفه امن الله محطوط
لأن بس هوّه مضبوط
أميري  أميري

لنّه واضح ويّه ربّه
حتّه بارينه يحبّه

أرقه حاكم علي  او عرشه حصير
اهوايه أفخر علي  اعليّه أمير
أميري أميري  أبو الحسن
▪️▪️▪️▪️▪️
الموالي لمّن ايموت
الصراط ايعبره مبخوت
ينادي يا علي ابصوت
أميري  أميري

اليبغضه يبقه محتار
تگلّه مرحبا النار
يمن تبغض الكرار
أميري  أميري

ابزوده باچر بالقيامه
ندخل الجنّه ابسلامه

كلشي بيده علي  باچر يصير
اهوايه أفخر علي  اعليّه أمير
أميري أميري  أبو الحسن
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
رفع چف الإمامه او صاح يا هالوادم المختار
"ألا من كنتُ مولاهُ فـ مولاهُ علي الكرار"
يفوز البايعه قطعاً والعاده مصيره النار
بجهنّم محجوز امچانه
▪️▪️▪️▪️▪️
اهناك ابلحظة التنصيب الجماعه چانوا ايسمعون
طگ ابطگ محمّد گال علي من بعدي هوّه ايكون
الله اختاره والي ايصير غصب ترضون ما ترضون
هوّه الها او متلوگ لغيره
▪️▪️▪️▪️▪️
لا مو عن فراغ اختار بارينه علي لهالدور
ما غيره كفو يدري والها بس علي مذخور
الظلام اشما يسوّي ايريد ابداً ما يغطّي النور
متحِجبه الدنيه او ما بيها
▪️▪️▪️▪️▪️
ابو الحسن الوائلي

بسم الله الرحمن الرحيم

على بركة الله من الليلة سيتم نشر جدول قصائد محرّم الحرام لعام ١٤٤٦هـ
راجين من الله قبول هذا القليل ببركة مُحمّدٍ وآل مُحمّد

▪️▪️▪️▪️▪️
يا محرّم  يشهر اجروحي
يا محرم  يشهر اجروحي
▪️▪️▪️▪️▪️
من نظرنه هلالك جرت عبراتنه
ما تِمالك صبرنه او عِلت آهاتنه
چنها عِشرة مدامع اكو بيناتنه
وابتدينه نعلّگ الك راياتنه

هالكلمه نفخر تنحچي
حيّ على الهم والبچي

يالمصابك  يهدم اصروحي
يا محرم  يشهر اجروحي
▪️▪️▪️▪️▪️
كل لياليّك انته كأنها العاشر
كل مسيّه ابفكرنه ركض للحافر
أبو صالح يجي بالـ عزاء الطاهر
مو نظَرنه الضماير تحس بي حاضر

بي نشعُر المجلس حضر
ينحب معانه اعله النحر

ويّ نياحه  ايتعاله نوحي
يا محرم  يشهر اجروحي
▪️▪️▪️▪️▪️
انته شهر المصيبه شهر محبوبنه
ثوب الاسود نلبسه اشحلاته ثوبنه
بيك اكيده المآتم تطهر اگلوبنه
والدموع الجريّه تزيل اذنوبنه

كل لطمه تنزل عالصدر
بيها المعاصي تنغفر

هالمجالس  حبيبة روحي
يا محرم  يشهر اجروحي
▪️▪️▪️▪️▪️
للي ضحّه ابدماءه او سبوها اعياله
تبقه روحي حزينه او تضل تنعاله
للي جسمه ترضرض منْ الخيّاله
صدري لو هم اكسره اله يفداله

للراسه مرفوع ابرمح
ما أُوفي لو هم انذبح

ما أجازي  فضل مذبوحي
يا محرم  يشهر اجروحي
▪️▪️▪️▪️▪️
ما يهمني النقدني او كلامه ايزيده
كل محرّم اليّه صفت تعويده
آنه همّي الوحيد الـ عَداه ماريده
همّي أرضي إمامي الگطيع اوريده

كل همّي هذا او مُنيِتي
يشفعلي اِمامي ابموتتِي

الباري جنته  الحضوري توحي
يا محرم  يشهر اجروحي
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
من هلالك شفت لوعات او جرح
وانرسم كلشي الي بشهر الذبح
▪️▪️▪️▪️▪️
أشوفك يا هِلال ابعيني آنه احسين
أبد ما تِشبه المرّن مدار اسنين
أحسّك گاصد او جايب قهر واونين
صور كلها مصايب راسم اعله العين

جزء هذا واكثر ايطول الشرح
وانرسم كلشي الي بشهر الذبح
▪️▪️▪️▪️▪️
وسط گلبي المواجع هالشهر تبدي
حتّه الماي يوگف راح اصد ضدّي
بعد ذبحة هلي كلهم أضل وحدي
أنادي يا خلگ ضامي وحق جدّي

يذبحوني او راسه يعله اعله الرمح
وانرسم كلشي الي بشهر الذبح
▪️▪️▪️▪️▪️
بده الشهر او أباوع بيّه زاد الهم
واحِس دُخّان چنّي مو هوه أشتم
أباوع عالسمه وبالمنرسم أفهم
علينه الموت اشوفه ابكربله اتحتّم

كلنا شاء الله نموت او ننذبح
وانرسم كلشي الي بشهر الذبح
▪️▪️▪️▪️▪️
أحِس چن الزمن ناده يبو اليمّه
علي الأكبر وگعته الحيلك اتهدمه
تشوفه امگطّع ابنك من تجي يمّه
او يطيح اعله الرمل جسّام ابن عمّه

اگبالي واحد واحد انظُر منطرح
وانرسم كلشي الي بشهر الذبح
▪️▪️▪️▪️▪️
الي هاي العلامه اتوضّح ابحسره
ابو فاضل يطيح او ينخسف بدره
يضل يم النهر لا يمنه لا يسره
ايتمنّه منّه يوصل للخيم عذره

مقتل العباس يكسرلي الجنح
وانرسم كلشي الي بشهر الذبح
▪️▪️▪️▪️▪️
وأما الفاجعه المنها الحزن صاير
يفطمون الرضيع ابني ابسهم غادر
وانه اوگف بلا والي او بلا ناصر
يذبحوني او عليّه يسحگ الحافر

بالخيول ادمومي بالطف تنمسح
وانرسم كلشي الي بشهر الذبح
▪️▪️▪️▪️▪️
رساله امن السمه جتني ابقهر وآهات
شاء الله يشوف النسوه مسبيّات
مشيهن ويّه وين الماله غيره او ذات
يروحن للسبي وايشوفن النكبات

ايشوفن اهموم او مصايب ما تصح
وانرسم كلشي الي بشهر الذبح
▪️▪️▪️▪️▪️
ابو الحسن الوائلي
العتبة العلويّة المقدّسة
١٤٤٥هـ

كأنّي بالحجّة عج:
▪️▪️▪️▪️▪️
آ يا عاشور  حين الهلّيت
ويلاه يحسين  بالهم ناديت
آ يا عاشور
▪️▪️▪️▪️▪️
يهلالك  من شفته 
ناديت آ يا عاشور
يا ويلي  من عندك
دلّالي اشگد مقهور

يالمخلّي النواظر تجري ما تنشف
يا شدّه التهون او ياهي بيك اكلف
اشوكت ناسيه أنه خاطر أذكره الطف
دوم انظر عله صورة نحر لو چف

دوم انظر دوم  صورة مذبوح
جسمه اعله الگاع  مليان اجروح
آ يا عاشور
▪️▪️▪️▪️▪️
من شفتك  دمعاتي
صارت تجري امن العين
ابصفناتي  جدّامي
أتصوّر حال احسين

انگطع جدّام اخيته امن الگفه نحره
او تشوف ابعينها ابراسه اثنعش طبره
طريح او خيل اميّه داست ابصدره
الأمر هذا الحچي ما يگدر ايفسره

امصاب المنحور  ما مثله امصاب
تارك أدريه  ابكل روح اصواب
آ يا عاشور
▪️▪️▪️▪️▪️
أيّامك  لو مرّن
بيهن حيل اتألم
واتصوّر  عمّاتي
واذكر كل ذاك الهم

بقن يم العده او ماكو ولي يمهن
او عليهن حرگوا اخيام الستر كلهن
ابصلافه الماله غيره اسمعله يشتمهن
ولاهن وابسياطه الحمره روّعهن

خدر الأشراف  يم ارذل ناس
ضربوهن حيف  عگب العباس
آ يا عاشور
▪️▪️▪️▪️▪️
هالصوره  ما ترحل
أذكرها ابسيل ادموع
ايبچّيني  ابكل لحظه
راس احسين المگطوع

الشمر فوگ الرمح راس السبط شايل
ايتگاطر دمّه صار امن الرمح نازل
تصد الراسه زينب والدمع هامل
او عله مجره دمعها يضحك القاتل

شاف الحوراء  تبچي بأحزان
صاحلها ابصوت  وين الخوّان
آ يا عاشور
▪️▪️▪️▪️▪️
تهضمني  او تاذيني
كل ليله اهواي اهواي
او كل لحظه  اتألّم
لمّن أنظُر عالماي

أختنگ حين الأباوع للسمه بإحساس
گمر أحمر أشوف او تخفت الأنفاس
أذكره اعله الشريعه طايح العباس
إدينه امگطّعه ويلي ابفعل أرجاس

صابغته ادموم  بدره او مخسوف
او سهم ابعيناه  طفّاله الشوف
آ يا عاشور
▪️▪️▪️▪️▪️
اعله احسيني  واجروحه
حيلي ابلا شك ينهار
گاضيها  ابحسراتي
وامناطر يوم الثار

انه امتاني إشاره امن السمه واثأر
واصول او ينگطع دمعي اليسيل احمر
جرح گلبي اويه جرح الغيبه هم يكبر
يحين امْر الله يمته باقي أتصبّر

أمري ابكل يوم  منتظره ايحين
واصرخ بالكون  "يا ثار احسين"
آ يا عاشور
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
ياللي اخدمتني خل اوصّيك
لا لا تضن لحظه أخلّيك
▪️▪️▪️▪️▪️
يا من إلي عمرك وقف صار
او كل ما تدور الخدمه يندار
گبرك إذا باچر صفه الدار
إنسه تمس اطرافك النار

باچر اذا موتك وصل ليك
لا لا تضن لحظه أخلّيك
▪️▪️▪️▪️▪️
الگتلي يبو اليمّه هويتك
او صارت حُسينيّاتي بيتك
يوم الذي توصل منيتك
من تندفن تلگاني اجيتك

ماريدك اتفكّرني ناسيك
لا لا تضن لحظه أخلّيك
▪️▪️▪️▪️▪️
لو ضمّك بأي لحظه گبرك
يا وحشه من احضر تمرّك
كلّش بعيده يصعب امرك
يسهل شكو شي من احضرك

ماكو عذاب ايمُر بعد بيك
لا لا تضن لحظه أخلّيك
▪️▪️▪️▪️▪️
الضل ملتزم كل عمره بيّه
ابداً بعد متعوفه اديّه
إسمك يمن لاطم عليّه
ابدفترها كاتبته الزچيّه

اُمّي تضل اتباوع اعليك
لا لا تضن لحظه أخلّيك
▪️▪️▪️▪️▪️
يامن عليّ دمعك تِجاره
بي تربح الجنّه ابجداره
هالخدمه هاي اعظم تجاره
او بيها أبد ماكو خساره

ابجنّة عدن باچر أجازيك
لا لا تضن لحظه أخلّيك
▪️▪️▪️▪️▪️
يالشفتك اسنينك عشتهن
يا خادمي او ما ضيّعتهن
بيهن نعم من انذرتهن
مرضه الله وارضاي اكسبتهن

إيدي تضل املازمه ايديك
لا لا تضن لحظه أخلّيك
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
الصوت اِعتله  نبقه علَه
هذا النهِج مَنبدّله
نسلِك طريقك يحسين او هذا قليل انقدمه
▪️▪️▪️▪️▪️
يابو علي يامن صرت والينه
خدّامك انضل چلمه ليك انطينه
زلم المجالس كلشي ما يلوينه

ما ننگدر  يبن الطهُر
عدنه السند راعي الأمُر
يلزم ظهرنه الموعود وانشِد عزمنه ابـ إسمه
▪️▪️▪️▪️▪️
يا سيّدي انظُر عاليخدمونك
همهُم يبن حامي الحمه يرضونك
ايهون التعب كلّه فده لعيونك

أقسِم قسم  هاي الخدم
الينخاهه يسمع بس نعم
وابخيمِتك ملتمّين ماكو احله من هاللمّه
▪️▪️▪️▪️▪️
يالساكن ابوجدان هاي الوادم
واحدنه بذيالك وحگك لازم
انته الحقيقه او كلشي غيرك واهم

انته الصدگ  انته العشگ
عنّك ابد ما نفترگ
مو عاقل الما يهواك يحسين وانته النِعمه
▪️▪️▪️▪️▪️
نبقه وابد هذا الدرب مَنعوفه
لا والذي گطعوا اثنين اچفوفه
ايوصّلنه دربك للجنان انشوفه

هذا الدرب  راده الگلُب
من عنده للجنّه نطب
كلنه عبيد او خِدّام ما عدنه بس هالكلمه
▪️▪️▪️▪️▪️
نبقه نخدمك يا حُسين ابلا حَد
جمره إلك وسط الگلُب ما تبرد
أحله ثِيابي ولله ثوب الأسود

طاهر صفه  شيوصّفه
ثوب الفخر ثوب الوفه
هوّه نعم ثوب الخير إي ولله يابو اليِمّه
▪️▪️▪️▪️▪️
آنه اللي يمّك خلّصت كل عمري
ابهذا اللطم وادموع عيني التجري
صرت آنه رايدهن ذخيره الگبري

الضمهن ذخُر  وسط الگبر
ماكو عذاب اعليه يمُر
ايفوز الذي لاگه الموت لو انته تحضر يَمَّه
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
الحمدُ لله على حب الحسين
▪️▪️▪️▪️▪️
الحمدُ لله صوتي كل لحظه يگول
لأن زارع بينه حُب ابن الرسول
نعم هاي الخدمه تهواهه البتول
او صرنه نهواهه لأن تهواها
▪️▪️▪️▪️▪️
ابكل ضمير ايخلّي حب احسين ضيّ
وجعلنا كل محب بالخدمه حيّ
ما نريد انحصّل امن الدنيه شيّ
بس رضاه او اُمّه هم مرضاها
▪️▪️▪️▪️▪️
حب ابو السجاد نعمه امن الأله
يحفظ او يحرس او ايضاً بي الجاه
النيّه كون ابكل وكت بيضه معاه
حتّه أنظُر ليه انطاني ايّاها
▪️▪️▪️▪️▪️
عله امصابه امنيتي گلبي يحترگ
واعتقادي عنّه ما لحظه افترگ
وهم كل الدنيه واحسين الصدگ
الدنيه دونه فاهيه معناها
▪️▪️▪️▪️▪️
غير حُب احسين ما أملك تره
اتقدّم اوياه ابد مارِد ليوره
رايد ادموعي ذخُر للآخره
ضوه تصبح بالحشر الگاها
▪️▪️▪️▪️▪️
تمحي ابو اليمّه محبته كل ذنِب
فخر لو خادم للحسين انحسِب
لليخدمه الجنّه باچر تنكتِب
حيدر اهناكه يعبره او طه
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
من زغري لجلك  عالن ولائي
يحسين اگلّك  هذا ندائي
عمري كلمتين 
خادم لِلحسين  هذا ندائي
▪️▪️▪️▪️▪️
أنه العشت العمر  الك منطيه نذر
إمامي واتفخر  ابمحبتك
ابد مالك مثل  حبيبي ابلا جدل
فخر لنّي أضل  ابخدِمتك

أحبك ما أحب غيرك يالمغرّگني بافضالك
الك ناذرهن اسنيني يمن گلبي حرز شالك

بارينه شاهد  عشگي صفاتك
ما عندي واحد  ثاني ابغلاتك
يا قرّة العين
خادم لِلحسين  هذا ندائي
▪️▪️▪️▪️▪️
عشگتك يالولي  اجعلتني ممتلي
صرت كلشي الي  ابحياتي
جِذبني عالمك  ملاذي مأتمك
أكونن خادِمك  اُمناتي

هنياله الذي اتقبله الك يبن الطهر خادم
يبقه ابجالك امعزّز حد الموت مو نادم

ابدمعي رجيتك  يمعلّي ناسك 
تحسبني ريتك  خادم مداسك
هذا الشرف وين
خادم لِلحسين  هذا ندائي
▪️▪️▪️▪️▪️
ينور امن العرش  ابغرامك مِنتعش
حروف اسمك نقش  ابدليلي
جرح بيّه انكتب  يـ أغله امن الذهب
ولا يبرد لهب  غليلي

لاحزانك تضل يحسين بيّه الجمره لهّابه
ابقه اصرخ لحد الموت "آ يحسين وامصابه"

بيها أفاخر  گلبي سكنته
محلاها صاير  كل وقتي انته
أحچيها كل حين
خادم لِلحسين  هذا ندائي
▪️▪️▪️▪️▪️
يرحمه امنزّله  البشر تهوي إله
أشوفك بوصله  الى الله
ابجِنان الله الصمد  الذي اتقبله خِلد
ولا يلگه ابد  معاناه

للجنّه التقبله ايفوت مهيوب ابقدر عالي
يا غالي او مثيلك صار كل خادم الك غالي

يالدامي جسمك  ليوم القيامه
كلمن يخدمك  ايعيش ابكرامه
يلگه قدِر زين
خادم لِلحسين  هذا ندائي
▪️▪️▪️▪️▪️
الحزن ما ينگطع  يعِبره او يا دمع
الك كون انفجِع  حبيبي
يضل او يستمر  يمرضوض الصدر
اعله حزنك للحشر  نحيبي

ننعاك ابقهر واحساس ما دام النفس بينه
بالمجلس نحس موجود يبچي اويانه مهدينه

حاضر نعِرفه  يبچي اعله زينب
واجروحه كلفه  ويّانه ينحب
اشما تمضي لسنين
خادم لِلحسين  هذا ندائي
▪️▪️▪️▪️▪️
وحگ دم رگبِتك  إمامي او ذبحِتك
المُهج لمصيبِتك  حزينه
العِده خل تطمئن  فلا ننسه الحزن
بأمل من نندفِن  تجينه

ابداً ولله ما ننساك او چلمة يا حُسين انعيد
او رجوانه يبو السجّاد باچر تشفع النه انريد

دمعاتي هايه  تجري ابقناعه
منّك رجايه  بس الشفاعه
لمّن يجي البين
خادم لِلحسين  هذا ندائي
▪️▪️▪️▪️▪️
ابو الحسن الوائلي
١٤٤٥هـ