▪️أَيْنَ المَنْصُورُ عَلى مَنِ اعْتَدى عَلَيْهِ وَافْتَرى؟
أَيْنَ المُضْطَرُّ الَّذِي يُجابُ إِذا دَعا؟
أَيْنَ صَدْرُ الخَلائِقِ ذُو البِرِّ وَالتَّقْوى؟
▪️▪️▪️▪️▪️
يابو صالح گوم يا مولانه
عندك ابّغداد ثار اهنانه
▪️▪️▪️▪️▪️
گوم وانقذ وادمك من الحرج
غيبتك مثل السهم وسط المهج
باوع الثارات منتظره الفرج
او چم گلب تلهب بقت نيرانه
▪️▪️▪️▪️▪️
الدنيه يبن احسين يا حُر يا نفل
عكست اوياكم او ما جرّت عدل
بين مسموم الگضه والمنچتل
صفه او ملْچ الموت دگ بيبانه
▪️▪️▪️▪️▪️
چم مصيبه الصايبه گلبك سهم
او چم رزيّه المارّه واجروح چم
جدّك السادس تره ساگينه سَم
او زيّد امصابك لهيب احزانه
▪️▪️▪️▪️▪️
اعداك ما عدها حميّه او جرحِتك
ابجدّك الكاظم يالاوحد فجعِتك
ابضحِك هُمّه وانته تسچب دمعِتك
گوم ردهم خل يرف الوانه
▪️▪️▪️▪️▪️
اعذرني لو گلبك ابحچيِي ينقهُر
لچن هذا الصار يا راعي الأمر
الجسُر للباري طريح اعله الجسُر
نعشه يحچيلك المرّ بلسانه
▪️▪️▪️▪️▪️
يا حبيب اگلوبنه او أغله الاحباب
غيبتك صعبه او أشد من كل مصاب
رجع كل غايب يغالي امن الغياب
اشوكت يوسفنه يدز قمصانه
▪️▪️▪️▪️▪️
ابو الحسن الوائلي
١٤٤٥هـ

▪️في ذكرى حلول شهر شعبان و ولادات "الاقمار الشعبانيّة"
▪️▪️▪️▪️▪️
راح اتهيأ للافراح او راح انسه الاحزان
واستقبِل شهْر الاقمار اهلاً يا شعبان
▪️▪️▪️▪️▪️
يا شهْر البي طِيب اجراحي
يا شهْر التحمل افراحي
يا من راحة بالي ابليلك
او يَمطيّب روحي ابمصباحي

يا من للرحمه او للخير بهلالك بيبان
واستقبِل شهْر الاقمار اهلاً يا شعبان
▪️▪️▪️▪️▪️
يا شهْر الافراح الهالي
يُوم الثالث منّك غالي
بي انظر مولود الجنّه
بي مولود احسين الوالي

شع النور ابهذا اليوم كاشخ عالازمان
واستقبِل شهْر الاقمار اهلاً يا شعبان
▪️▪️▪️▪️▪️
ابيوم الرابع فرحه اچبيره
يحمِل مولد راعي الغيره
ظهْر احسين او نفسه او روحه
أعني العبّاس او مو غيره

الصارن معلم للتاريخ من عنده الذرعان
واستقبِل شهْر الاقمار اهلاً يا شعبان
▪️▪️▪️▪️▪️
ابيوم الخامس زيّن اسمه
او هل ابنوره مثْل النسمه
هذا السجّاد الشع نوره
التارس هاي الدنيْه ابعِلمه

هذا الصاير مثْل النور نازل عالتربان
واستقبِل شهْر الاقمار اهلاً يا شعبان
▪️▪️▪️▪️▪️
ابيوم الحادي عشر اتنوّر
شع ابهذا اليوم الاكبر
شمْس الباري غابت خجلت
لمّن شافت نور الاكبر

شع او مثله ابهذا الكون لا صار او لا كان
واستقبِل شهْر الاقمار اهلاً يا شعبان
▪️▪️▪️▪️▪️
يوم الخامس عشر الاروع
بي انوار المهدي تِسطع
الغايب عن اعيِون الوادم
وامتانينه ايهل او يطلع

ابخير اترد ابجيته الگاع واتزيّنها الوان
واستقبِل شهْر الاقمار اهلاً يا شعبان
▪️▪️▪️▪️▪️
مرّه الدنيْه باللي بيها
واهْل البيت اللي امحلّيها
نور ايخلّف نور ابعزمه
وايشع عالدنيْه او يضويها

كل منهم صاير قرآن وابهيئة انسان
واستقبِل شهْر الاقمار اهلاً يا شعبان
▪️▪️▪️▪️▪️
ابو الحسن الوائلي
١٤٤٤هـ

▪️في ولادة الامام الحسين عليه السلام
▪️▪️▪️▪️▪️
هالليله هذا العيد  من اجمل الاعياد
مستبشره الاكوان  ابمولد ابو السجّاد
▪️▪️▪️▪️▪️
هالدنيه ويّانه
هالليله فرحانه
والفرح عنوانه  هاي المسيّه

السان المدح حاير
من الفرح طاير
نور انولد صاير  من الزچيّه

كلشي فرح هاليوم  ابجيّة ابو الامجاد
مستبشِره الاكوان  ابمولِد ابو السجّاد
▪️▪️▪️▪️▪️
ابمولد ابو الاكبر
صوت الوحي بشّر
او بيت النبي اتنطّر  وامتاني جيته

مثْل الورد ازهر
والعالم اتنوّر
من فاطمه او حيدر  متضوّي بيته

ابّيت النبي المختار  صار الفرح يزداد
مستبشره الاكوان  ابمولد ابو السجّاد
▪️▪️▪️▪️▪️
ايحير المدح عنّه
لا مو بشر چنّه
ابوسْط المهد جَنّه  هالليله نازل

مثله ولا اجمل
منّه الشمس تخجل
وابضيّه تتغزّل  ما مثله حاصل

وانتشرت الافراح  في عالم الابعاد
مستبشره الاكوان  ابمولد ابو السجّاد
▪️▪️▪️▪️▪️
رب السمه ابعلوه
مثله فلا سوّه
ابكلشي انفرد هوّه  ما مثله صاير

كل الفخر يحوي
بالعالم العلوي
مثْل الشمس يضوي  چن گمر ناير

سيّد صفه هوّه  في عالم الارشاد
مستبشره الاكوان  ابمولد ابو السجّاد
▪️▪️▪️▪️▪️
فوگ الافق طالع
چنّه نجم لامع
لنّه نزل راكع  محله ابو الاكبر

ضوّه الارض نوره
والدنيه مسروره
ما أجمل الصوره   البيها تصوّر

وحْي السمه ناده  ابصوته عله الميعاد
مستبشره الاكوان  ابمولد ابو السجّاد
▪️▪️▪️▪️▪️
الماكو مثل شكله
رب السمه امنزله
رحمه او منو مثله  سوّاه ربّه

هذا ابو اليمّه
من خالِقه رحمه
حُبّه صفه نعمه  عالناس حُبّه

صار ابوضوحه التام  سر عالم الايجاد
مستبشره الاكوان  ابمولد ابو السجّاد
▪️▪️▪️▪️▪️
ابو الحسن الوائلي
١٤٤٤هـ

▪️ في مولد المولىٰ ابو الفضل العباس عليه السلام
▪️▪️▪️▪️▪️
شي لله يابو الفضل شي لله
انطاك رب الكون حتماً اعلى جاه
▪️▪️▪️▪️▪️
يابو فاضل سيّدي اعليك السلام
ياللي مثلك ماكو ثاني بهالأنام
منو ايشبهك بالخليقه بالعظيم
يا إمام او إبْن امام او أخ إمام
▪️▪️▪️▪️▪️
يا سلام الله عله اللي حملتك
بطن غيره يبو الغيره الجابتك
رضعِتك اُمّك وفه لا مو حليب
و عله النخوه يابو فاضل ربّتك
▪️▪️▪️▪️▪️
اشعظم قدرك سيّدي يابو الفضِل
اليحچي بيك ايهيم ما لحظه يمِل
فاهيه اتصير السوالف من عداك
ناقصه او بس من نذكرك تكتمِل
▪️▪️▪️▪️▪️
كل تفاصيل الوفه شخصك حوه
ياللي منّك ياخذ انواره الضوه
يالخصالك كلها متروسه وفاء
او للجرح اسمك يبو فاضل دوه
▪️▪️▪️▪️▪️
شايفك مو مثل غيري يالچبير
ساكن انته ابناظري يبن الأمير
مو بشر عادي أشوفك لا إمام
انته يا عباس بعيوني ضمير
▪️▪️▪️▪️▪️
ما يحجبك شي يبن حامي الحمه
الما يشوفك صايب اعيونه العمه
ياللي مثلك ماكو يا عِين البتول
اشگد عظيم او صرت عِين الفاطمه
▪️▪️▪️▪️▪️
بالطفوف ابهيبتك كلشي انثلم
انته دين اطلعت واتحطّم صنم
من امامك حسبوا اليشرد شجاع
واللي ضل ثابت اگبالك ما سلم
▪️▪️▪️▪️▪️
او بالنهايه يابو فاضل أرْد اگول
ياللي كلمن گاصدك كلشي ينول
گاصدين الليله يا شيخ الفرات
اقضي حاجات اليحبّونك هذول
▪️▪️▪️▪️▪️
ابو الحسن الوائلي
١٤٤٥هـ

ميلاد الإمام الحجّة ابن الحسن عج:
▪️▪️▪️▪️▪️
وينك كلشي يتسائل مته يالمنتظر ترجع
إرجع خل يعود الخير او تنسه اعيونّه المدمع
چم روح ابسبب فرگاك بقت يالمهدي تتلوّع
يمته ترد يبن الحُسين
كلشي يناديك ابحنين
خل نگطع الشك باليقين  او خبر رجعِتك خل نسمع
▪️▪️▪️▪️▪️
عجّل سيّدي الطلعه عليك ابداعة الزهره
شوف اشچم گلب مجروح بيهْ النار مستعره
جرح الغيبه هد الحيل ما يتوصّف اشكبره
ابعازتك في كل مستوى
ظلمه او نريدك يا ضوه
بس انته يالمهدي دوه  تره لجروحنه الخضره
▪️▪️▪️▪️▪️
يغايب شكل عن العين بس برواحنه موجود
ما نهتم اذا كلشي نخسره المهم انته اتعود
نطشلك من ترد مولاي العمر هذا سنينه اورود
خلّيه كلشي ينفگد
بس المهم سالم ترد
ناذر أطش عمري ورد  ابجيتك ولله يالموعود
▪️▪️▪️▪️▪️
ابو الحسن الوائلي
١٤٤٥هـ

لسن كل اليحبّونك بقت تلهج
ابگلبنه النار واعله الظلم نتفرّج
مته يا غيرة الباري مته تفرج
تجي واتعدّل ايدينك شكو أعوج

أسعد الله أيامكم أيها الموالين ودفع عنكم البلاء ببركات صاحب هذه الليلة عجل الله تعالى فرجه الشريف.

اللهم صلِّ على محمد وآل محمد وعجل فرجهم

ولا تنسَ الإمامَ العطشانَ الشهيد عليه السلام
الذي استغاث في آخر رمقٍ لـ(قطرة) من الماء فحزّوا رأسه في هذه الإستغاثة :
▪️▪️▪️▪️▪️
لو حان المغرب يالضامي امن افطر أذكرك
يوم الطف واگف متحاصر وحدك أنظرك
اتناديهم يا ناس اسقوني او ضل ضامي ثغرك
بس ما يسقونك يا ويلي ايگطعونه نحرك
▪️▪️▪️▪️▪️

▪️▪️▪️▪️▪️
يابو طالب غصباً اعليهم تضل
عالي من الله يبو خير العمل
▪️▪️▪️▪️▪️
أبتدي اوياك ابسلامي الواضح
يا عظيم او يا أبو كل صالح
شكو واحد سمّعك شي جارح
فاشل ايضل وانته بس الناجح

امعدّل او مهيوب والضدّك نزل
عالي من الله يبو خير العمل
▪️▪️▪️▪️▪️
المثلك انته سيّدي شنگلّه
نقره وانعيد ابصفاتك الّه
عالي قدرك ما شخص يوصلّه
سلّم الباري عليك او صلّه

عالبشر مثْل المطر خيرك هطل
عالي من الله يبو خير العمل
▪️▪️▪️▪️▪️
عالي والأقزام ما يدنولك
الخيّر البيهم ميوصل طولك
واللي چانوا كافر ايصيحولك
فدوه يابو المرتضى يرحولك

الحصى ماتوصل أبد علْو الجبل
عالي من الله يبو خير العمل
▪️▪️▪️▪️▪️
الله لاينطي اللي جاب آلامك
وانته أملاك السمه خدّامك
الجبل مايوصل سفوح اجدامك
غصباً اعليهم ثبت إسلامك

اسلام واحدهم يبو طالب بُطل
عالي من الله يبو خير العمل
▪️▪️▪️▪️▪️
اليوم راح احچيه ولله الشاهد
سبب كُرهك سيّدي يالماجد
انته يا مولاي ذنبك واحد
لأن للكرّار شخصك والد

لأن ابنك علي كل بغضك حِصل
عالي من الله يبو خير العمل
▪️▪️▪️▪️▪️
چنت كافل للرسول او ناصر
او ضوه ابليل اسلامك اصبح ظاهر
ابموتك اعله الهادي لا ما حاير
ايحامي عنّه علي ابدالك صاير

الفحل بس هوّه الذي ايخلّف فحل
عالي من الله يبو خير العمل
▪️▪️▪️▪️▪️
متت والهادي حناه امصابك
اعليه بده عام الحزن بغيابك
غلگ باب العطف من سد بابك
اتأذّوا ابفگدك يغالي احبابك

انحنوا لمّن شاهدوا نورك رحل
عالي من الله يبو خير العمل
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
كفيل المصطفى مات  وابو حامي الحميّه
عرج بي قابض الروح  الى رب البريّه
▪️▪️▪️▪️▪️
ابمدامع نرفع او حسره التعازي للنبِي المعصوم
او كُون المدمع الليله مو مدمع نسيله ادموم
محمّد والِده اتوفّه ابو طالب مشه بهاليوم
"فلا حولَ ولا قوّة إلا بالعلي القيّوم"

يعينه الباري هاليوم  أبو الزهره الزچيّه
يسلّم أمره مجبور  الى رب البريّه
▪️▪️▪️▪️▪️
عواصف بالحزن تفتر او صارت بالافق تندار
بُگت تسعِي على كل بيت بأن تتناقل الأخبار
رسُول الرحمه متألم ابخبر فرگة أبو الكرار
مهو مو بس ابو حيدر ابمثابة والد المُختار

كفيله والأبو چان  وفي او روحه نقيّه
جفاه او صعدت الروح  الى رب البريّه
▪️▪️▪️▪️▪️
بُگه صوت البچي عالي يسمعه كل گلب حزنان
الجماد بهالحدث يبچي مو بس صاحب الوجدان
الحزن ساد ابأرض مكّه او بيها الهم تعلّه او بان
او هبوب الريح لن باقي يسِد او يفتح البيبان

الخلائق تجري الدموع  دمه ابهاي الرزيّه
مشه البيها وفي چان  الى رب البريّه
▪️▪️▪️▪️▪️
انعلن هذا الخبر واعليه ابحزنها تنحب الجنّه
الأبد ما غفلت اعيونه عن الهادي غُمض جفنه
الملائك بالحزن رادت عله تشييعه تتعنّه
انبياء الباري هم طلبت تعزّي المصطفى ابحزنه

انبياء الله والاملاك  اجوا كلهم سويّه
يعزّونه عله الراح  الى رب البريّه
▪️▪️▪️▪️▪️
تِشّيع صاحب الرحمه وابگبره اندفن بجروح
عليهْ يبچي النبي آدم او نوح ابحزنه ضل اينوح
نعم واتگابلوا موسى او هارون ابدمع مسفوح
او محمّد يم علي يبچون سويّه او حيلهم مطروح

أبوهم والسند چان  صفه تحت الوطيّه
أمرهم سلموا اليوم  الى رب البريّه
▪️▪️▪️▪️▪️
يبو طالب نعم مدفون لچنّك ما متت هيهات
رحت انته او عفت إبنك والخلّف أبد ما مات
الـ علي إبنك يبو طالب تِشهد بالكتاب ايات
عظيم المرتضى حتماً او مثلك هوّه طيّب ذات

يبو طالب علي الحيد  حِمه الدين او نبيّه
واهو عمره وقف صار  الى رب البريّه
▪️▪️▪️▪️▪️
عشت عمرك كأنّك سيف يواجه خنجر الالام
صفه صدرك درع چنّه نعم واشگد تلگّه اسهام
لأن والد علي او عم النبي ايكرهونك الظلّام
او يبغضونك يبو طالب لأن ما تعبد الأصنام

إمامي خل يبغضوك  چفوف الشر رخيّه
وسيله تبقه مولاي  الى رب البريّه
▪️▪️▪️▪️▪️
ابو الحسن الوائلي
١٤٤٥هـ

يبو طالب يحامي الدين ياسيف
الحميّه الچنت كل باطل تفصمه

يالبيك الوصف يعجز شنو ايگول
يالخيرك عله الوادم تقسمه

السلام عليك سيّدي ومولاي يا أبا طالب ع

▪️في وفاة السيّدة خديجة عليها السلام
▪️▪️▪️▪️▪️
هايه سر الاسرار
هايه روح المختار
هايه منها ما صار الباري قدّرها
▪️▪️▪️▪️▪️
السيّده ام فاطمه الطاهر اثرها
الله والهادي او علي ايعرفونه سرها
في سبيل الله نعم ضحّت عمرها
حب محمّد چن سمه سوّه قدرها

هيّه تحمِل آيات
هيبة السماوات
حايِره العبارات ما تفسّرها
▪️▪️▪️▪️▪️
كل وفاهه مِنتشر وامغطّي مكّه
والفكِر يحتار لو رايد يدركه
والشرك يمها اذا يتعاله شركه
ينهدِم كلّه اذا اصبع تحركه

واضحه بلا لون
والصعب يمها ايهون
كل اوامر الكون هيّه تأمُرها
▪️▪️▪️▪️▪️
حبل صارت للسلامه او باقي ينمد
والكرم عند العظيمه حاشه ينحد
سيف وگفت عالظلم حاد او تجرّد
بالشدايد چانت احزام الـ محمّد

الطه صارت احزام
تسوه آلاف ازلام
والصعُوب الايّام هوّه ذاخرها
▪️▪️▪️▪️▪️
ابكلشي مختلفه وهي الطيّب اصلها
الباري خالقها او فلا يخلق مثلها
من كثر ما ربها قدّسها او يجلها
فاطمه الزهره العظيمه انطاهه الها

فاطمه بهالازمان
ما مثلها انسان
سر الٰه الاكوان فاطمه سرها
▪️▪️▪️▪️▪️
كلشي ضحّت من اجل ان ترضي ربها
الگاع ترتاح الها من تمشي ابدربها
كلها خير او عالمه او طاهر نسبها
والعظيمه المؤمنه الطيبه لقبها

هيبه بنت الاطياب
من شموخ الاصلاب
يخجل الهوه الهاب لمّن ايمُرها
▪️▪️▪️▪️▪️
ماتت او طه انهدم حيله ابفگدها
ماتت او عطره بُقه ينشم وردها
ماتت او طه فُگد حيله بعدها
من دفنها چن دفن نفسه ابلحدها

طه ودّعها ابليل
ودّع اوياهه الحيل
اعليها دمعته اتسيل ابخدّه ناثرها
▪️▪️▪️▪️▪️
ضحّت ابكُلشي الرضا رب البريّه
او مالها لجْل الرساله الاحمديّه
سانِدت طه ابحياته الدنيويّه
او ما تِخلّت عنّه لحظه للمنيّه

مِنها وين اكو وين ؟
الها ماكو وجهين
تصغر العناوين يمها عاذرها
▪️▪️▪️▪️▪️
ابو الحسن الوائلي
شعبان ١٤٤٤هـ

▪️▪️▪️▪️▪️
يا راعي الثار  آنه الكرار
علي امير المؤمنين
ها يالمختار  أسمع تكرار
"يالثارات الحسين"
▪️▪️▪️▪️▪️
يابُو الحميه  الكل الوفه يحويك
اطباع الرجوله  والغيره دارت بيك
اجروح اللي بينه  داوتها انته ايديك
ابشُكري الحضرتك  حاير شقدّم ليك

من الأنذال  عزمك قد نال
يالمحيت القاتلين
اطفيت اشچم نار  أسمع تكرار
"يالثارات الحسين"
▪️▪️▪️▪️▪️
الكوفه دخُولك  مِنتظرته ابكل حين
او من ادخلتها  مُبصر چنت بالعين
رافُع شعارك  أن "يالثار احسين"
او بيها الاراذل  حسّوا قريب البين

لمّن طبّيت  نارك شبّيت
چنت ناصب چم كمين
باسل مغوار  أسمع تكرار
"يالثارات الحسين"
▪️▪️▪️▪️▪️
جيتك عظيمه  جيّة بطل صنديد
داخل عليهم  ردْت الضلاله اتبيد
عالي ابولائك  وابعزمك التوحيد
اجموع الخيانه  تمحيها چنْت اتريد

صفّيت اعداك  ثار المولاك
كفو يبن الأكرمين
يبن الأطهار  أسمع تكرار
"يالثارات الحسين"
▪️▪️▪️▪️▪️
حقدك اشوفه  اعله اهْل الشرك يزداد
للتركوا ابني  جثّه عله الأوهاد
چم راس اجالك  بس جرحك او لا هاد
انته ارسلتهن  كلهن الى السجّاد

ها يالمحروس  ودّيت الروس
لابني زين العابدين
ابشُكرك محتار  أسمع تكرار
"يالثارات الحسين"
▪️▪️▪️▪️▪️
ابثارك اشوفك  تسعي ابحذر ضلّيت
بلكت تِخفّف  من محنة "ال البيت"
السبّب حزنهُم  اتدوّر عليْه ابگيت
تمحي اساسه  يالقائد اتمنّيت

يالگاطع راس  كل الأرجاس
يا مُذل الكافرين
مثلك ما صار  أسمع تكرار
"يالثارات الحسين"
▪️▪️▪️▪️▪️
الناس الغدوره  ها يالوفي رادوك
واصحابك الهُم  كلهُم سوه باعوك
ابعينك تباوع  بيد العدو سلموك
مثْل الشفتهم  غدروني هم غدروك

لا موش اصحاب  هالناس اذياب
باليودهم طاعنين
وادم أشرار  أسمع تكرار
"يالثارات الحسين"
▪️▪️▪️▪️▪️
ارجع واگلّك  ما منّك اَي اقصُور
الثارك جزاءً  بالجنّه نلْت اِقصُور
ياللي دمائك  بيها الحميّه اتفُور
تبقه ابشموخك  اشما هالزمان ايدور

للغيره انچان  يصبح عنوان
اتنوله انته يالأمين
تبقه اشما صار  أسمع تكرار
"يالثارات الحسين"
▪️▪️▪️▪️▪️
ابو الحسن الوائلي
١٤٤٥هـ

▪️في مدح الإمام الحسن المجتبى عليه السلام
▪️▪️▪️▪️▪️
يبو امحمّد أكتبك ردت يا مولاي
او حرت يا سيّدي اشلون ابتدي ابوصفك

أسولف عن كرم شخصك ولاكن لا
شضيفن لو گلت عنك سخي چفك

ربيت اعله الحميّه او عله اطباع الخير
ابسمه الله الغيره يبن المرتضى اترفّك

اليمد ايده إلك ما يرد خالي الإيد
يرد خايب حشه ولله الذي ايكلفك

يالوكت الشدايد مثل ذو الفقّار
او يم الفقره دومك تنحني ابعطفك

يبيرغ عالي يالبيك اعتز الإسلام
امن الشينه حفظته ابروحك انعرفك

شفّاف او خذت مولاي طبع الماي
الورود اتغار يبن الزهره من لطفك

شمس يالمجتبى دومك تضل موجود
عليت ابقدرك او محّد يجي ابصفّك

وحقك سيّدي ما يگدرون اعليك
رخيّه اچفوفها اللي رادت اتحذفك

مثل حيدر أبوك اوّل وما تنلاح
متقدّم او كلهم يالحسن خلفك

اتخلصوا منك او ما دروا ضنهم خاب
بحر جاري تضل للدوم شينشفك
▪️▪️▪️▪️▪️
ابو الحسن الوائلي
١٤٤٥هـ

كأنّي بالأمير ع:
▪️▪️▪️▪️▪️
ها يشيعه هالله هالله بالوصايه
موعضتها امن البدايه للنهايه
من علي الشيعة علي
▪️▪️▪️▪️▪️
آنه علي وابدي الحچي ابسلامي
للي يگول المرتضى إمامي
خل يحترمني او يحترم كلامي
من البدايه يسمع الختامي

خل يكون اللي يحبني راسه عالي
وابحچي المبغض أريده لا يبالي
التزموا انتوا ابما يلي
▪️▪️▪️▪️▪️
آنه علي والحق معايه يفتر
مثلي يريت الشيعي مَيتغيّر
للمنظلم لا لاتصيروا خنجر
اليكره الدنيه ابعيني هذا يكبر

الرافضي الرايدني اعبره بالقيامه
يلتزم كونه ابصلاته وابصيامه
بهالفعل ترضي الولي
▪️▪️▪️▪️▪️
چلمة الحگ مو كلها تشتهيها
البايع الگطره هذا ما يبيها
بس الغيور اليعتمد عليها
المنطق عدل حتماً يشوفه بيها

العنده غيره كلشي عالحق ما يفرقه
امحافظ اعليها اريده دومه يبقه
هالأمر واضح جلي
▪️▪️▪️▪️▪️
لو ردتوا عيشه تكمل ابسلامه
خلّوها عيناكم عله اليتامه
خلهم يعيشون ابوفه او كرامه
متفيده اليْزعّلهم الندامه

كلمن ايزعّل يتيم ابعيني اصدّه
آخره او دنيه انه يلگاني ضدّه
يعني حاربني الي
▪️▪️▪️▪️▪️
هالدنيه لتخلّوها ابد تغركم
بس الأجل بيها حقيقي اگلكم
ابشي منتهي لا ينعقد أملكم
لا تهبط الها أي وقت هممكم

لا تغركم ابداً الدنيه حقيره
اتجُر عدل ويّه الذي بايع ضميره
چنت بيها مبتلي
▪️▪️▪️▪️▪️
قتلوا نبينه او فاطمه الزچيّه
او طبرولي راسي بالغدر اليّه
او قتلوا شباب الجنّه يا رزيّه
هذا لأن للشينه رافضيّه

العنده موقف هذا كلشي ما يخوفه
حتّه لو ميّت عدل ناسه تشوفه
دومه يبقه معتلي
▪️▪️▪️▪️▪️
واضح كلامي والرساله وضحت
ما ترجع الگطره لون تبدّت
ابلا غيره شفْت الاكثريّه ضلّت
واهل الحميّه يا وسافه قلّت

اليؤمن ابحقي او يخاف الباري ربّه
يشمئز امن النفاق او ما يگربه
كل منافق جاهلي
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
محتاجيك  لو بس يوم
يترجّاك  كل مهموم
▪️▪️▪️▪️▪️
ريتك تجي او تنظر يوالينه
واتشوف عيناك الجره اعلينه
يابو الحميّه چم جرح بينه
متألمين اهوايه تدرينه

كل دلّال  ضل مالوم
يترجّاك  كل مهموم
▪️▪️▪️▪️▪️
ترجع يحيدر كلنه نتمنّه
واتزيحه كل هذا الظلُم عنّه
ما عدنه غيرك أمل ما عدنه
اتفتّ الصخر بالروح كل ونّه

ننخه ابصوت  حيدر گوم
يترجّاك  كل مهموم
▪️▪️▪️▪️▪️
نكتفي ابهاي الكلمه وانگلّك
إرجع ولو بعض الحچي ايزعلك
من ترجع النه الحال نشرحلك
محتاج كلشي بالأرض عدلك

ابهاي الگاع  چم ملچوم
يترجّاك  كل مهموم
▪️▪️▪️▪️▪️
لمّن تعود ابعينك اتناظر
صار الفساد اعله الارض ظاهر
مو هيّن او كلّش صعب صاير
محّد يسيطر عالوضع گادر

والهم ضال  يمنه ايحوم
يترجّاك  كل مهموم
▪️▪️▪️▪️▪️
يا حيدر اوداعتها للزهره
هذا الوضع بس انته التگدره
بينه الكسر زاد او صفه اشكبره
والفقره زادت يا علي الفقره

چم مهضوم  چم مظلوم
يترجّاك  كل مهموم
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
نعش الوصي نزلوه نزلوه
خلّيهم ايتامه يودعوه
▪️▪️▪️▪️▪️
نعشه يمن اتشيّعونه
خلّوا اليتامه ايودّعونه
والدهم او غمضت اعيونه
مترد بعد روحه الحنونه

سافر حبيب الروح تدروه
خلّيهم ايتامه يودعوه
▪️▪️▪️▪️▪️
هذا علي الروحه حنينه
ايحبنه او نحبّه يدري بينه
الشايل الدنيه ابچف ادينه
اشلون ابجنازه امشيّعينه

والدنه معقوله تدفنوه
خلّيهم ايتامه يودعوه
▪️▪️▪️▪️▪️
معروف ابو الحمله الصميده
كلمن نخاه ما رجّع ايده
شوفوهم ايتامه تريده
مشتاگه كلها اللمسة ايده

النظره الأخيره خل يصدّوه
خلّيهم ايتامه يودعوه
▪️▪️▪️▪️▪️
حيدر وداعه ولله كسره
دونه العمر ما يسوه نظره
الما يسد بابه ابوجه فقره
يا وسفه فتحت راسه طبره

من عدنه فدوه لا تبعدوه
خلّيهم ايتامه يودعوه
▪️▪️▪️▪️▪️
نزلوا الحبيب الغالي يمنه
من عدنه خل يسمع الونّه
هذا الصبح خيمه او تلمنه
عگبه تره اتطشّر شملنه

لا وين يولاده تودّوه
خلّيهم ايتامه يودعوه
▪️▪️▪️▪️▪️
من يندفن سيْد الإمامه
يعني عله الدنيه السلامه
اتشوف الهضم راح اليتامه
حگهم ابموت الإبتسامه

محتاجته ايتامه او يريدوه
خلّيهم ايتامه يودعوه
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
هامة الدين  طُبر سيف ابنَ مُلجَم
▪️▪️▪️▪️▪️
كل گلب مفجوع هاللّيله او حزين
والملائك بالسمه تبچي ابونين
ابهامتك شافوه نزل سيف اللعين
او كلها صاحت يا أمير المؤمنين

الدنيه يا حِيد  عليها سيطر الهم
▪️▪️▪️▪️▪️
اهتزّت الحالك علي السبعه الشداد
انطبر أشرف عبد من هاي العباد
طبرتك فجعت يحيدر كل فؤاد
تبچي كل روح او بچه حتّه الجماد

واعله الگلُوب  رعُب باللحظه خيّم
▪️▪️▪️▪️▪️
غده كلشي ابطيحتك دمعه يسيل
او بين معقوله اليگول او مُستحيل
علي الينهي ابچفّه كل حمْل الثجيل
اشلون لاحه السيف حمّاي الدخيل

كلشي مذهول  عليك انته او تألّم
▪️▪️▪️▪️▪️
كلها مفجوعه عليك الانبياء
شاهدوا مطبوره آيات الولاء
والسواد الليله سيطر عالضياء
والسمه يا حيدر انگلبت دماء

اتحوّل الكون  يحيدر قطعة من دم
▪️▪️▪️▪️▪️
ينتخي وكْت الشدايد كلشي بيك
مضطرب كلشي صفه او يبچي عليك
وسفه بالشايل الدنيه ابچف اديك
ارجعِت مخضوب ابدمه وامسنّديك

انته ابو الحيل  صدگ حيلك تهدّم
▪️▪️▪️▪️▪️
صعب فگدك يالصراط المُستقيم
يا عظيم اتمُوت بالشهْر العظيم
مِن طبر راسك علي چف اللئيم
ابطبرتك حتماً ذبح حلْم اليتيم

عگبك انشوف  علي كلشي تيتّم
▪️▪️▪️▪️▪️
ابو الحسن الوائلي
١٤٤٥هـ

▪️▪️▪️▪️▪️
الذي من صدره ياخذ عطرهْ الهيل
يلفض آخر الأنفاس صدره

غُمضت عينه والكون انگلب ليل
وانگلبت الوان الدنيه حمره

عظّم الله أجر صاحب الزمان عج وأجوركم بذكرى استشهاد أمير المؤمنين علي بن أبي طالب عليه الصلاة والسلام جعلنا الله وإيّاكم من المشمولين بشفاعتهِ يوم القيامة

دگ الجرس مو للبيت للموت
او سوه امن المدرسه نركض طلعنه

فرحانين والضحكه اعله الوجوه
او بقت آمالنه نوصل لاهلنّه

حلِمنه الچنّه نبنيه بالدرب مات
وتناثر عالجنط والگاع دمنه
▪️▪️▪️▪️▪️
خالص العزاء والمواساة

▪️▪️▪️▪️▪️
إنقضى شهرُ العِباده وقد مازِلتَ بعيد
ولظىٰ نار الغِيابِ في الصدورِ لا تهيد

ذا هلالُ العيدِ هلّا والأسى فينا يزيد
فسِواك يبن طه يا إمامي لا نُريد

ننظر الأيّامُ تمضي ولنا أمرٌ وحيد
يومَ نلقاكَ رجِعت هو هذا اليومُ عيد
▪️▪️▪️▪️▪️
عيدكم مُبارك
اللهم عجّل لوليّك الفرج يا الله

▪️▪️▪️▪️▪️
من يجي يبني القبور  المنتظر
▪️▪️▪️▪️▪️
ان شاء الله المهدي يجي او ناسه يقود
او تحت راية ثورِته نوگف جنود
ننسه كل ذيچ الليالي الكلها سود
بأمره نِبني الغرقد ابيوم اليعود

او شامِخه ترجع ابفضْل  المنتظر
▪️▪️▪️▪️▪️
الله لا ينطي هذوله المجرمين
اذّوا المهدي ابفعلهم مرّتين
الما يخاف الله سُليمان اللعين
اتراب سوّاهن قبور الطاهرين

ينتقم منّه اكيد  المنتظر
▪️▪️▪️▪️▪️
الحسن طيلة عمره شاف اجروح چم
او حتّه من مدفون مولاي انظِلم
ليش ابن حامي الحمه گبره انهدم
ليش "أهل البيت" شافوا بس ألم

احگوگهم ترجع ابچف  المنتظر
▪️▪️▪️▪️▪️
ابگبره زين اعبادها رد قهره ليه
او معلمَه ويّه الترايب جاعليه
الصادق الچان العلِم يدرس بديه
ثاني مرّه هايه داره واصليه

الباقر او ثاره يردّه  المنتظر
▪️▪️▪️▪️▪️
ذاك گبر اُم البنين اُم الصبر
الما يرد خايب الينخاهه بأمُر
فدوه ضحّت كل ولدهه للطهر
ينهدم زحمه گبرها او ينهجُر

چن ينادي او يستغيث  المنتظر
▪️▪️▪️▪️▪️
والمصيبه البيها امامي منفجِع
امصاب اُمّه المنها مكسور الضلع
مخفي گبر اُم الحسن هِل يا دمع
ابچف ابنها الثار باچر يرتجع

او يبني گبر اُمّه البتول  المنتظر
▪️▪️▪️▪️▪️
ابو الحسن الوائلي
١٤٤٥هـ