▪️كأنِّي بالأمير ع يُكلِّم فِقاره:
▪️▪️▪️▪️▪️
لو عندي أمُر يا ذُو الفِقاري
ما چان الرجِس يتعنّه داري
▪️▪️▪️▪️▪️
آنه حيدر يا فِقار دمعي احمر يجري صار
ولله لو بيدي اكيد بابي ما تشعِلها نار
ليك اقدْم الإِعتذار حين هِجموا عله الدار
الأمُر لو بيدي يكُون ما يصير الذي صار

چان اللي هِجم تصليهْ ناري
ما چان الرجِس يتعنّه داري
▪️▪️▪️▪️▪️
الخان ربّه او دينه خان شيَّخه اعليَه الزمان
الاسمِي مِن ايمُر عليه گوّه يبلع ريجه چان
ابعيني اتحسّر واشُوف اجه الداري ابلايَه خُوف
تالي عالزهره يحيف صار رجَّال الجبان

مَيضل كل شخص كون ابقراري
ما چان الرجِس يتعنّه داري
▪️▪️▪️▪️▪️
الماله غيره او لا اصُول عابر احدود الرسُول
العمره ما سَل بيده سيف زلمه صار اعله البتُول
يصرخ او هدّدنِي گام كاسِر اضلوع السلام
العالي صوته ابّابِي چان بالحرُب گاعد خجُول

چا بيدي اذبحه الماله طاري
ما چان الرجِس يتعنّه داري
▪️▪️▪️▪️▪️
لوَن سلّيتك واروح أهجِم او أنهِي الجروح
والهِجم عالزهره چان ما أبقِّي ابصدره روح
بأمُر من الله اللي صار چان مو بيدي القرار
حتّه احافُظ عله الدين ما قِبل بيدي تلُوح

چان السيف بي يصبح حواري
ما چان الرجِس يتعنّه داري
▪️▪️▪️▪️▪️
وسفه ذوله الكافرين البابي كلهُم حاضرين
هِجموا اعليَه يحيف وآنه امير المؤمنين
احرگوا بابي الكلها خير لمَن باعوه الضمير
او چان نيَّتهُم اكيد گطِع حبْل الله المتين

أمحِي الرادوا ايكُون انكساري
ما چان الرجِس يتعنّه داري
▪️▪️▪️▪️▪️
گلبي بِجروحه غزير او كل جرح منهن چبير
زحمه من دمعِي يسيل عالوجِن وآنه الأمير
تجرح اهوايَه اكيد من اشوف ابْن العبيد
تالي ينعد عالرجال هالمُنافق والحقير

مِن عنده أرِد العندي ثاري
ما چان الرجِس يتعنّه داري
▪️▪️▪️▪️▪️
ابو الحسن الوائلي
ربيع الاوّل ١٤٤٥هـ

▪️▪️▪️▪️▪️
عظّم الله لكَ الأجْر يمهدي
▪️▪️▪️▪️▪️
البگه براسك يابو صالح هالمسيَه
ماتت اُمك فاطمه الزهره الزچيَه
الرحمة الله انتقلت بهالليله هيَه
اعليها دمعاتك صفت حمره جريَه
▪️▪️▪️▪️▪️
الزهره ماتت مِن كثُر همها او هضُمها
اهواي اذّاهه الزمان او ما رحمها
ماتت او هذا المسَه طافِي نجِمها
السمه لو دفنوها يا گاع التضُمها
▪️▪️▪️▪️▪️
اُمك اليغضب او يرضه الله الرضاهه
بالكسُر يا للأسَف ردّوا جزاهه
امن الحزن والضيم ذاك اللي لفاهه
غِدت محنيَه يمهدي مِن أساهه
▪️▪️▪️▪️▪️
ماتت او كِل راحه ما چانت تمُرها
وانته بس انته الذي تجبُر كسرها
اهموم شالت حيل اكبر مِن عمرها
او غاضِبه ماتت عله ذاك العصرها
▪️▪️▪️▪️▪️
تدري بالظُلام قتلوها ابصلافه
منها ناولوا كلّه مِن أَجْل الخلافه
منها حرموا حيدره ولله وسافه
او دِفن بيده باللحد كل الترافه
▪️▪️▪️▪️▪️
بهالليالي مدمعك بس ايتجاره
وادري گلبك تلهب او ما تطفه ناره
كلشي يسأل ابو صالح يمته ثاره
او يصلُب اعله الشجره جبتين الحقاره
▪️▪️▪️▪️▪️
ابحال فاطِم يابو صالح انته الادره
كسُر ضلْع النور بس انته التجبره
او لمّن اترِد ابحضورك نبني حضره
من هُنا مرقد الزهره ابقطعه نقره
▪️▪️▪️▪️▪️
ابو الحسن الوائلي
جـ الأوّل ١٤٤٥هـ

كأنّي بالحسين عليه السلام:
▪️▪️▪️▪️▪️
بالله امودّعه يا يُمّه الله وياچ
مدري شلون راح احمِل جرح فرگاچ

يوم الشلتي اباوع صار وحشه البيت
مثِل وحشة گبر حاله صفه ابليّاچ

خُمد نورچ يفاطِم واستحه كل نور
يطلع يضوي واتراب الگبُر غطّاچ

انتي العافيَه او منّچ حُرمنِي الموت
وابروحِي او دمِع عيني تِرك ذكراچ
▪️▪️▪️▪️▪️
أعظم الله أجر صاحب الزمان عج وأجوركم باستشهاد سيدة نساء العالمين مولاتنا فاطمة الزهراء صلوات الله عليها...


#الفاطمية_الثانية

▪️لسان حال الأمير ع:
▪️▪️▪️▪️▪️
يالمشيتي هايَه اوّل سنه مرّت وآنه وحدي
يالمشيتي فاطِمه بالله انه چَم زهره عندي
▪️▪️▪️▪️▪️
فاطمه آنه علِي الموتِچ چوانِي
اعليچ ابچِي والبچِي هوّه بچانِي
خذِچ منّي او ما رحَم حالِي زمانِي
راحَت البهجه او بقيت انحَب واعانِي

ياللي بعدچ كلشي بالدنيَه اشوفه صار ضدي
يالمشيتي فاطِمه بالله انه چَم زهره عندي
▪️▪️▪️▪️▪️
انتي شمسِي واللحِد غيّبلِي شمسِي
مدري جاي ارثيچ مدري ارثِي نفسِي
آنه بيدي بالحرايب سيفي يقسِي
حالِي مِن حال الغريب ابدونچ امسِي

اشصار بيّه وآنه ذاك الماكو واحِد يِدنه حدّي
يالمشيتي فاطِمه بالله انه چَم زهره عندي
▪️▪️▪️▪️▪️
علِي ما يِگطع عله افراگِچ نحيبه
والحبيب ايمُوت بِفراگ الحبيبه
جرّدِت سِيف اصطبارِي بهالمصيبه
من شفِت بدرچ مشه او فضّل مغيبه

وسط عيني حاله حال الليل مِن انهاري يبدي
يالمشيتي فاطِمه بالله انه چَم زهره عندي
▪️▪️▪️▪️▪️
ابروحِي خنگه والهوه ياذيلِي صدري
ادعِي بعدچ ما يطوّل كُونه عمري
آنه حلّال الصِعاب او كِلها تدري
فاطمه او موتِچ صفه كاسرلِي ظهري

يا كسرتي اشلون ما أدري يرِد حيلِي او تِعدّي
يالمشيتي فاطِمه بالله انه چَم زهره عندي
▪️▪️▪️▪️▪️
آنه ذاك الكلشِي ما يِصعب عليّه
احملِت خيبر يوم امِس باطراف اديّه
او مِن شلِت تابوتِچ اقسِم يالزچيّه
چَن احِس شايِل عله اچتافِي الثُريّه

هذا حالي صرت بالگوّه اكُفّ اردان زندي
يالمشيتي فاطِمه بالله انه چَم زهره عندي
▪️▪️▪️▪️▪️
غيبتِچ صعبه او صفت بيها كسرتي
اوياچ نامت بالگبر فاطم ضحكتي
المتِت آنه يم حسن لو انتِي متّي
چنِت محتاجِچ يزهره واندفنتي

عله موتچ جاريَه دمعاتِي من عيني اعله خدّي
يالمشيتِي فاطِمه بالله انه چَم زهره عندِي
▪️▪️▪️▪️▪️
امصابِچ امرافگنِي يبقه كِل حياتي
لحَد ما راح انطبُر لحظة صلاتي
ابَد ما أنساچ دوم ابذكرياتي
عله بالِي بكِل وكِت حتّه ابمماتي

يالعزيزه نلقي بالجنّه مِن يلفيني وعدي
يالمشيتي فاطمه بالله انه چَم زهره عندي
▪️▪️▪️▪️▪️
ابو الحسن الوائلي
جـ الاوّل ١٤٤٥هـ

▪️▪️▪️▪️▪️
ماتت بعد موت اُم حسن كل ابتسامه
هيّه السلامه او عاشت ابلايه سلامه

كلشي تألّم من مشت بالدنيه هايه
او مو بس ولدها اتيتّموا كلنا يتامه
▪️▪️▪️▪️▪️
أعظمَ الله أجر صاحب الزمان وأجوركم باستشهاد سيدة نساء العالمين مولاتنا المظلومة الشهيدة فاطمة الزهراء(عليها السلام).

#الفاطمية_الثالثة

▪️اُم البنين صلوات الله عليها
▪️▪️▪️▪️▪️
حرمه تحتار السوالف بيها
او يطمئن الخوف لو صد ليها
يا كلام اللي يفِي
اُم ابو الغيره الوفِي
▪️▪️▪️▪️▪️
كلشي يحتار ابوصُف اُم البنين
الكلشي بيها بالشدايِد يستعين
مره مختلفه او مثلها اتلاگي وين
فدوه ضحّت كل ولدها للحسين

صَح ولدها اربعَه تدريهُم
بس ابو اليمّه تعزّه اعليهُم
وابمحبته تكتفِي
اُم ابو الغيره الوفِي
▪️▪️▪️▪️▪️
ازغير يبقه اشما حِچه بيها الكلام
العفّه من تذكرها توگف إحترام
هالوفيّه ابتضحيَتها للإِمام
نالت اعلى مقدِره واعلى مقام

لجْل الحسين العمُر منطيته
باعَت الدنيَه او رضاه شاريته
الجرح بيها ينشفِي
اُم ابو الغيره الوفِي
▪️▪️▪️▪️▪️
هالعظيمه صارت اُم بيت السور
زوجِته يختارهه حيدر گِدر
سمه هيّه عالِيه تبقه ابفخر
ابلايه شك بس السمه اتخلّف گمر

محّد ايضاهيها اُم عبّاسها
شايِلتها الغيره تاج ابراسها
رمز صارت معرفِي
اُم ابو الغيره الوفِي
▪️▪️▪️▪️▪️
للحميّه او للوفه صارت وطن
او رايه للنخوه ترف ابكل زمن
بامتحان الباري ضامرها اطمئَن
ضحّت ابكلشي ابثواب اُم الحسن

رخصت الغالي التملكه احوالها
ترضه عنها الزهره كل آمالها
كلشي يمها ينّفِي
اُم ابو الغيره الوفِي
▪️▪️▪️▪️▪️
وضّحت موقفها لحسين الولي
ابيوم راد الطلعه ابن حيدر علي
گالت الهُم ولدي اسمعوا ما يلي:
ما اعتبره ابني اليرد سالم الي

گالت الهم لو يريد ادماكم
انطوه يستاهل تره مولاكم
يا گلبها العاطفِي
اُم ابو الغيره الوفِي
▪️▪️▪️▪️▪️
من اجت زينب واهِي ابأصعب وضِع
اتگلها ولدچ سبِع طايح يم سبِع
اتوجّهت للطف واهِي اتنادي ابدمِع
بيكم امغزّر حليبي المنرضِع

عفيه يا ولدي رفعتم راسي
بيكم افخر والأخص عبّاسي
ثبت بيكم موقفِي
اُم ابو الغيره الوفِي
▪️▪️▪️▪️▪️
ماتت او عدله بقت اُم العطاء
ابفضل موقفها البطولي بالفداء
باقِيه ما تنمحِي او تنضح نقاء
ترِف بآفاق السمه مثل اللواء

كلشي يمضي او كل وكِت نلگاهه
خالد اُم الاربعه ذكراهه
اثر لا ما تنخفِي
اُم ابو الغيره الوفِي
▪️▪️▪️▪️▪️
ابو الحسن الوائلي
النجف الاشرف
جـ الاوّل ١٤٤٥هـ

لسان حال ام البنين ع:
▪️▪️▪️▪️▪️
ابعالم النوم
شفت كل احباب گلبي يمي موجودين
ابعالم النوم
شفت عباس او اخوته والعزيز احسين
▪️▪️▪️▪️▪️
ابحلم كل الولد صدّيت يمي اعيوني شافتهم
هلا او ميّة هلا ناديت بالمِنتظره جيّتهم
روحي تطلع اتمنّيت من مرّتني فرگتهم
من يوم المشوا ضلّيت أحسِب يمته رجعتهم

من الفراگ
ادعيت من الله يجيني او يمُر بيّه الموت
من الفراگ
چنْت اناديهم تعالوا واليرِد الصوت
▪️▪️▪️▪️▪️
لا ما حسّبت فد يوم كل احبابي افارگها
او من صار البعُد محتوم صرت لازم اصدّگها
المثلي اشما دمعها ادموم لو يجري يضل حگها
گلبي منچوي او مالوم او روحي العبره تخنگها

فگْد الاحباب
غربه معروف او مثيله ما تصح غربه
فگْد الاحباب
هالمصيبه اهوايه حتماً مؤلمه او صعبه
▪️▪️▪️▪️▪️
گلبي منّه فاض احساس او ضل يتجاره دمْع العين
لمّن باوعت عبّاس بعيوني بلا چفين
او ضلّيت الطُم اعله الراس لمّن باوعِت لحسين
گتله يا اَعز الناس يبني الغالي راسك وين

ما ردت هيچ
ردِت أفرح من اشوفك مو تبچيني
ما ردت هيچ
او راسك الصدري اضُمّه يُمّه بيديني
▪️▪️▪️▪️▪️
احسين الخلّه دمعي ايسيل شاغَت روحي من شفته
سِلب من عندي كل الحيل والمدمع دمه سلته
من كل ذنّي الاصعب حيل مو ذبحه او ضِمه شفته
الحارِگ گلبي دوس الخيل صارت عظمه طاحنته

ويلي يالخيل
الداست احسين ابحقدها او رضرضت عظمه
ويلي يالخيل
امن السحگ ضل ابرجلها قطع من لحمه
▪️▪️▪️▪️▪️
فزّيت ابگلب مرعوب او رد الگلبي كل همّه
من حگها لونها اتذوب واتضَل روحي متألمه
الملگه احبابي روحي اتلوب بس احبابي ما هُمّه
لا عبّاسي من هالصوب لا يمّي ابو اليمّه

اتسائلِت وين
اليمّي چانوا وين راحوا صوتي ناداهُم
اتسائلِت وين
گمت من حلمي وادوّر بلكت الگاهُم
▪️▪️▪️▪️▪️
كل اُم اُمنيتها اتكون لو منها جريب الموت
كل اولادها ايحضرون خاطر يم ولدها اتموت
بجنازتها من يمشون يبچون ابنحيب او صوت
ابچفهم لمّن ايرفعون تحله رفعة التابوت

تخلص الروح
والولِد يمها سويّه من يودعوها
تخلص الروح
او تدري بجنازتها هُمّه اللي يشيعوها
▪️▪️▪️▪️▪️
ابو الحسن الوائلي
جـ الاوّل ١٤٤٥هـ

يالنهايه الحلوه بالعام القديم
او يا بداية خير بالعام الجديد
▪️▪️▪️▪️▪️
على العهدِ يا مولاي يا أبا عبد الله الحسين
الى ما لا نهاية ...

فَاءٌ: فَاطِمَةُ انْسِيّة
الْفٌ: انْفَاسٌ قُدْسِيّة
طَاءٌ: طَاهِرَةٌ وَرَضِيّة
مِيمٌ: مَعْنَاهَا مَرْضِيّة

وَ"الْهَمْزَةُ" تَحْوِي آلَاء
وِلِدَتْ فَاطِمَةُ الزَّهْرَاء
▪️▪️▪️▪️▪️
اللهُم عجّل لوليّك الفرج

حاير شسولف بيك يا من معناك
ما يگدر ايدركه اللسان الناطق

والرايد ايفسرك شنو ايريد ايگول؟
وإنته أبو المولى الإمام "الصادق"
▪️▪️▪️▪️
متباركين بحلول شهر رجب
وولادة إمامنا محمد بس علي الباقر عليهم الصلاة والسلام

▪️ولادة أمير المؤمنين علي بن أبي طالب عليه الصلاة والسلام
▪️▪️▪️▪️▪️
حيّاك الله أهلاً حيدر
العالم كلّه الليله اتنوّر
▪️▪️▪️▪️▪️
الليله مستبشره الدنيه بالولاده الحيدريّه
السمه قبل الأرض صاحت بالفرح هاي المسيّه
يا هلا ابفيصل البرزخ يا هلا ابحامي الحميّه
صوت الضماير يعتلي
يا رحمة الرب العلي
يا هلا او مرحب يا علي الثره نادت والثريّه

كلشي الليله ابجيتك أزهر
العالم كلّه الليله اتنوّر
▪️▪️▪️▪️▪️
صوّرك ربك تعاله يا علي او ما سوّه مثلك
او عالبشر كلها يحيدر چان يهواك او يجلّك
گلّك اشتحتاج أطلب منّي تلگاني انفّذلك
من اسمي گلّك يالشهم
اشتقّيت الك هذا الإسم
وابساگ عرشي منرسم هالكرامه كلها لجلك

وابكرسيّه إسمك صوّر
العالم كلّه الليله اتنوّر
▪️▪️▪️▪️▪️
قبل مينزّلك ربّك سيّدي من سمه القدره
عالأرض شاهد رسوله ابلا أخو يمّه ينصره
گلّك الباري أريد اتصير إنته احزام ظهره
غيرك يبو الحمله منو
يصلح لابو الزهره كفو
شاءك إله عون او أخو هذا رب السمه أمره

ابجيتك طه ميشوف الشر
العالم كلّه الليله اتنوّر
▪️▪️▪️▪️▪️
بالمهد بعدك يحيدر لچن عالي او كلشي حدرك
الگاع قبلك ظلمه چانت واشرقت من نور بدرك
لو ردت شي من الهك ابلا تعب فوراً يحضرك
لو أشّرت بيدك فقط
كلشي يصير ابلا غلط
بيدك الرب العالي حط الكون كلّه تحِت أمرك

كل الدنيه ابچفّك تفتر
العالم كلّه الليله اتنوّر
▪️▪️▪️▪️▪️
انشگ جدار الكعبه لجلك حتّه تستقبلها جيتك
وآنه گلبي انشگ جداره يالعزيز او صار بيتك
لم يلِد لا ولم يولد ابّيته بس انته لگيتك
يا حاضر ابكل المحن
يا وطن للماله وطن
وابكل فخر يابو الحسن من صغر سنّي هويتك

انته المنجي يوم المحشر
العالم كلّه الليله اتنوّر
▪️▪️▪️▪️▪️
ابو الحسن الوائلي
رجب ١٤٤٥هـ

▪️وفاة السيدة زينب عليها السلام
▪️▪️▪️▪️▪️
اشما عمري طوَل والنفس بيّه
الزينب ضلّي يا دمعه جريّه
▪️▪️▪️▪️▪️
عله زينب يعيناي ارتجيلچ
لا ما تنگطع دمعة مسيلچ
يا ريت ابنهارچ لو ابليلچ
المواجعها يريتچ يبدي حيلچ

الحزن بت حيدر او بنت الزچيّه
الزينب ضلّي يا دمعه جريّه
▪️▪️▪️▪️▪️
عاشت بت علي طيلة عمرها
صبوره او يا صبر يوصل صبرها
ابد كل راحه ما چانت تمرها
هِدم كل حيلها منها دهرها

شافت ضيم ابد ما مثله هيّه
الزينب ضلّي يا دمعه جريّه
▪️▪️▪️▪️▪️
هاي الكل جرح مغروس بيها
من طف كربله او رحلة سبيها
هضيمه الناس كلها اتصد عليها
ضل حتّه الحجر يبچي البچيها

چم موته لگت گبل المنيّه
الزينب ضلّي يا دمعه جريّه
▪️▪️▪️▪️▪️
احسين الچانت اتنام اعله ضلّه
تحبّه او چان عدها ماكو مثله
امگطّع شافته اعله الغبره كلّه
ابجسمه ما سِلم كلشي تصدله

اموذّر شافته بالغاضريّه
الزينب ضلّي يا دمعه جريّه
▪️▪️▪️▪️▪️
وسف گاد الحبل ايد العفيفه
حين الگطعوا الچف الشريفه
سِبت ام الشرف وادم خفيفه
من ذبحوا الارواح النظيفه

سبوها من عگب أهْل الحميّه
الزينب ضلّي يا دمعه جريّه
▪️▪️▪️▪️▪️
زينب بقت من حرگ المخيّم
لحَد الموت بس دخّان تشتم
حزينه والحزن فوگاهه خيّم
ما خلّاهه ابداً لحظه تِسلم

اشگد شافت معانات او اذيّه
الزينب ضلّي يا دمعه جريّه
▪️▪️▪️▪️▪️
صعُب زينب تره اتموت ابوحدها
تنوح او كل أمل ما باقي عِدها
يحيرتها الچفوف المن تمدها
واهي لا إخوه يمها او لا ولدها

اتموت ابغربه وسفه الهاشميّه
الزينب ضلّي يا دمعه جريّه
▪️▪️▪️▪️▪️
ابو الحسن الوائلي
رجب ١٤٤٥هـ

▪️▪️▪️▪️▪️
البگه براسك يبو فاضل ولله ايعظّمه أجرك
ماتت زينب اختك گوم روحلها ابلهب جمرك
▪️▪️▪️▪️▪️
البگه براسك يبو فاضل ماتت زينب بهاليوم
فلا حول ولا قوّة إلّا بالعلي القيّوم
أخِبرك يابو راس الحار ماتت والگلب مهموم
يبو فاضل تره صعبه
أخيتك ماتت ابغربه
يا حلّال كل نكبه
گوم اگصدها لارض الشام او ودّع يا گمر صبرك
▪️▪️▪️▪️▪️
اذا رحتلها لا لتروح وانته ايديك مگطوعه
اهِي ما عايِزه لوعات اكثر ماهِي مفجوعه
تره العاشر هِدم كل حيل بيها او زيّد اللوعه
من ذاك الحدث هيّه
لحد هالساعه محنيّه
تون او تنعه ليليّه
من توصلها راح اتشوف الدمع عن حالها ايخبرك
▪️▪️▪️▪️▪️
يعباس امشي واتعنّه لاخيتك ولله تستاهل
إجت ليك ابهذاك الليل ابكسرها والدمع هامل
تمشي او تعثر او همها إلك توصل يبو فاضل
تدوّر بقت عن جسمك
كل همها تصِل يمّك
إختك چانت او أُمّك
مثل ما جتّك اعله الماي تجيها الليله تنتظرك
▪️▪️▪️▪️▪️
من فگدك لحَد الموت بگت عطشانه مختنگه
تره عطشانه مو للماي لچن عطشانه للملگه
ابشرط من توصل الها اتشوف بيها تنطفي الحرگه
من حرگ الخيم زينب
بگه بيها الجمر يلهب
تنوح او تلطم او تنحب
من العاشر لهاليوم تنصب مأتم اتذكرك
▪️▪️▪️▪️▪️
إختكم يابو فاضل هاي هضيمه من تخلّوها
واهي محتاجه وگفتكم كلّش زين تدروها
الجنازه اتدوّر الها امتون بالهيبه يرفعوها
الجنازه اتدوّر الها احباب
يشيلوها ابدمع سچّاب
واختك يبِن داحي الباب
ابوسط غربتها تتأمل يبلكت تحضر اتنظرك
▪️▪️▪️▪️▪️
ابو الحسن الوائلي
رجب ١٤٤٥هـ

▪️في استشهاد الإمام موسى بن جعفر الكاظم عليه السلام
▪️▪️▪️▪️▪️
ظلموك يا بن علي
هضموك يا بن علي
▪️▪️▪️▪️▪️
ضماير مالها الجهلت مقامك
يمن واجب عليهم احترامك
عجيبه يالدرر كلّه كلامك
بس السكته والظلمه أمامك

لچموك يا بن علي
هضموك يا بن علي
▪️▪️▪️▪️▪️
شفت چم لوعه يا حجّة زمانك
ابهمّك ماكو واحد شفته عانك
هضيمه بالسجن يصفه كيانك
مكانك عالعرش ولله مكانك

سجنوك يا بن علي
هضموك يا بن علي
▪️▪️▪️▪️▪️
السلاسل كون لايدك ما تمسها
عسه بيدي او معاناتك أحِسها
الاخذت حيلك الدنيه نفسها
التحِت إيدك گمرها ويّ شمسها

يدروك يا بن علي
هضموك يا بن علي
▪️▪️▪️▪️▪️
ابسبب گيد السلاسل يجري دمّك
ترضرض من وراهن حتّه عظمك
اذا تشتم هوه الظالم يلطمك
تنوح او تذكر اللي لطموا اُمّك

ضربوك يا بن علي
هضموك يا بن علي
▪️▪️▪️▪️▪️
يحرموك الشمس يالطيبه ذاتك
ما يدرون اصلها من عباتك
بقه ضنهم يهزّونه ثباتك
او بقيت ابعزمك املازم صلاتك

جهلوك يا بن علي
هضموك يا بن علي
▪️▪️▪️▪️▪️
تمنّيت الجرالك والجرعته
عساه بيّه او فلا تتأذّه انته
الرشيد ابلا رشد بايعها ذمته
ابصمودك سيّدي انته الهزمته

اتضل فوگ يا بن علي
هضموك يا بن علي
▪️▪️▪️▪️▪️
ابو الحسن الوائلي
١٤٤٥هـ

▪️ إستشهاد الإمام موسى بن جعفر عليه السلام
▪️▪️▪️▪️▪️
يمن للحاير او للمختنگ نسمه
يالديرة أمان الناسه صار اسمه
ندائي ابكل وكت يا موسى ابن جعفر
▪️▪️▪️▪️▪️
اذا وكتي لواني او ضاعت اعلومي
او معانات الگلب بانت عله ارسومي
يصير اسود امن الهم والحزن يومي
اجيلك يبن جعفر واشتكي اهمومي

اذا جيت او شكيت ابهمّي وابتعبي
انه بيدك أحِس تمسح على گلبي
متخلّيني ابداً سيّدي اتحيّر
ندائي ابكل وكت يا موسى ابن جعفر
▪️▪️▪️▪️▪️
لون هالدنيه رادت مرّه تحنيني
او خلّتني أنوح او يعتلي اونيني
أجيك او بالصحن أذرف دمع عيني
كلام اشعُر يصير ابّينك او بيني

اذا گلْت السلام اعليك بدموعي
عليّه اترد نعم واتحلّه موضوعي
متردني ابد لو جيتك او مضطر
ندائي ابكل وكت يا موسى ابن جعفر
▪️▪️▪️▪️▪️
امن اطبلك يا إمامي أشعُر ابودّك
تگلّي احچيلي شنهو المشكله العندك
ايعرف قدرك لهذا السائل ايگصدك
تحب تقضي الحوائج چن علي جدّك

النوه ايجيلك او شِدّه ايكلّفك بيها
بعده ابمنزله والحاجه تگضيها
اليگصدك ولله فايز عمره ما يخسر
ندائي ابكل وكت يا موسى ابن جعفر
▪️▪️▪️▪️▪️
اشوفك بالصحن واگف گمر عالي
مينذل الگصد يمّك يضل غالي
امن اطب ابمستحاي او خيبة آمالي
اباوع محمل اذنوبي يرد خالي

اطبلك گلبي مچوي او منكسُر جنحي
واشوفه ابعيني شباچك دوه الجرحي
أرِد ابعافيه من يمّك او أفخر
ندائي ابكل وكت يا موسى ابن جعفر
▪️▪️▪️▪️▪️
اليبغضك انته واهلك سيّدي انفهمه
ترك هالدرر هاي الخاطر الفحمه
يريد التل نشوفه او يرفض القمّه
يضن عالنور يمشي او هوّه بالظلمه

نعم كلمن بغضكم هايه ندريها
يبيع الآخره والدنيه يشريها
عليكم خل يضل كل عمره يتحسّر
ندائي ابكل وكت يا موسى ابن جعفر
▪️▪️▪️▪️▪️
انسجنْت انته ابقرار الظالم المُرتد
لأن ما ماد إلهم يبن جعفر يد
يضن شخصه عليكم هوّه يتسيّد
ابد ما حسّب انتم عنّه حيل ابعد

مسجونه الشمس والظلمه سجنتها
ضنّوا تطفه بس هيّه اعله حطّتها
نور الدنيه أصبح منها يتنوّر
ندائي ابكل وكت يا موسى ابن جعفر
▪️▪️▪️▪️▪️
طلب إسمحلي اطلبه ابگلبي واونينه
دعيت ابجاهك المهدي يرد لينه
الوطن مكسور ظهره او دمعِته ابعينه
فقط هوّه الذي ايداويه وايعينه

ظلام الدنيه يرحل نوره من يطلع
يرد الخير كلّه ابجيته لو يرجع
أملنه بالله معقود او بابن حيدر
ندائي ابكل وكت يا موسى ابن جعفر
▪️▪️▪️▪️▪️
ابو الحسن الوائلي
١٤٤٥هـ

▪️للإمام الكاظم عليه السلام
▪️▪️▪️▪️▪️
يعتلي الصوت والدمع ساجم
ابلا سبب ليش سجنوا الحاكم
▪️▪️▪️▪️▪️
هالأمر هذا صعب كلّش اكيد
الملك محطوط ابوسط سجْن العبيد
موسى البچفّه يسوّي اشما يريد
يا وسف بيده صفه گيد الحديد

ينظلم حيف السيّد الراحم
ابلا سبب ليش سجنوا الحاكم
▪️▪️▪️▪️▪️
صعبه نور الله يحرمونه الضوه
مختنگ صدره صفه الينطي الهوه
لاكن الظالم ابفعله اشما نوه
حتماً ايضل دوم خالي المحتوه

الواهم ايكون كل وكت واهم
ابلا سبب ليش سجنوا الحاكم
▪️▪️▪️▪️▪️
الكرسي معروفه اذا لاحه الخفيف
يعني يتسيّد عله القوّه الضعيف
ابكل وكت ينظلم تلگاه الشريف
ابدولة الأنجاس ميعيش النظيف

الحاكم ايكون بي وفه لازم
ابلا سبب ليش سجنوا الحاكم
▪️▪️▪️▪️▪️
البِدر من موسى شنو نوع الجرم
خاطر ايسجنه اللعين او ينظلم
صعبه حيل اهواي لا ما تنهضم
الطاهر ابسجْن الردايه ينحكم

وسفه الانذال ظلمت العالِم
ابلا سبب ليش سجنوا الحاكم
▪️▪️▪️▪️▪️
شاف ضيم اهواي لا ما ينحمل
گيّده الحاقد الموسى ابچم رطل
او بغض بي يمّه يجي الماله أصل
يشتم اُمّه فاطمه او دمعه يهل

ينتحب لو تنشتم فاطم
ابلا سبب ليش سجنوا الحاكم
▪️▪️▪️▪️▪️
اليركض اعله الدنيه ابد ما يستراح
ايعيش خسران او فلا يلگه الرباح
شوف طغيان الرشيد المنّه طاح
وابن جعفر عدل چن وجه الصباح

شوفه ضل دوم شامخ الكاظم
ابلا سبب ليش سجنوا الحاكم
▪️▪️▪️▪️▪️
ابو الحسن الوائلي
١٤٤٥هـ

▪️أَيْنَ المَنْصُورُ عَلى مَنِ اعْتَدى عَلَيْهِ وَافْتَرى؟
أَيْنَ المُضْطَرُّ الَّذِي يُجابُ إِذا دَعا؟
أَيْنَ صَدْرُ الخَلائِقِ ذُو البِرِّ وَالتَّقْوى؟
▪️▪️▪️▪️▪️
يابو صالح گوم يا مولانه
عندك ابّغداد ثار اهنانه
▪️▪️▪️▪️▪️
گوم وانقذ وادمك من الحرج
غيبتك مثل السهم وسط المهج
باوع الثارات منتظره الفرج
او چم گلب تلهب بقت نيرانه
▪️▪️▪️▪️▪️
الدنيه يبن احسين يا حُر يا نفل
عكست اوياكم او ما جرّت عدل
بين مسموم الگضه والمنچتل
صفه او ملْچ الموت دگ بيبانه
▪️▪️▪️▪️▪️
چم مصيبه الصايبه گلبك سهم
او چم رزيّه المارّه واجروح چم
جدّك السادس تره ساگينه سَم
او زيّد امصابك لهيب احزانه
▪️▪️▪️▪️▪️
اعداك ما عدها حميّه او جرحِتك
ابجدّك الكاظم يالاوحد فجعِتك
ابضحِك هُمّه وانته تسچب دمعِتك
گوم ردهم خل يرف الوانه
▪️▪️▪️▪️▪️
اعذرني لو گلبك ابحچيِي ينقهُر
لچن هذا الصار يا راعي الأمر
الجسُر للباري طريح اعله الجسُر
نعشه يحچيلك المرّ بلسانه
▪️▪️▪️▪️▪️
يا حبيب اگلوبنه او أغله الاحباب
غيبتك صعبه او أشد من كل مصاب
رجع كل غايب يغالي امن الغياب
اشوكت يوسفنه يدز قمصانه
▪️▪️▪️▪️▪️
ابو الحسن الوائلي
١٤٤٥هـ

▪️في ذكرى حلول شهر شعبان و ولادات "الاقمار الشعبانيّة"
▪️▪️▪️▪️▪️
راح اتهيأ للافراح او راح انسه الاحزان
واستقبِل شهْر الاقمار اهلاً يا شعبان
▪️▪️▪️▪️▪️
يا شهْر البي طِيب اجراحي
يا شهْر التحمل افراحي
يا من راحة بالي ابليلك
او يَمطيّب روحي ابمصباحي

يا من للرحمه او للخير بهلالك بيبان
واستقبِل شهْر الاقمار اهلاً يا شعبان
▪️▪️▪️▪️▪️
يا شهْر الافراح الهالي
يُوم الثالث منّك غالي
بي انظر مولود الجنّه
بي مولود احسين الوالي

شع النور ابهذا اليوم كاشخ عالازمان
واستقبِل شهْر الاقمار اهلاً يا شعبان
▪️▪️▪️▪️▪️
ابيوم الرابع فرحه اچبيره
يحمِل مولد راعي الغيره
ظهْر احسين او نفسه او روحه
أعني العبّاس او مو غيره

الصارن معلم للتاريخ من عنده الذرعان
واستقبِل شهْر الاقمار اهلاً يا شعبان
▪️▪️▪️▪️▪️
ابيوم الخامس زيّن اسمه
او هل ابنوره مثْل النسمه
هذا السجّاد الشع نوره
التارس هاي الدنيْه ابعِلمه

هذا الصاير مثْل النور نازل عالتربان
واستقبِل شهْر الاقمار اهلاً يا شعبان
▪️▪️▪️▪️▪️
ابيوم الحادي عشر اتنوّر
شع ابهذا اليوم الاكبر
شمْس الباري غابت خجلت
لمّن شافت نور الاكبر

شع او مثله ابهذا الكون لا صار او لا كان
واستقبِل شهْر الاقمار اهلاً يا شعبان
▪️▪️▪️▪️▪️
يوم الخامس عشر الاروع
بي انوار المهدي تِسطع
الغايب عن اعيِون الوادم
وامتانينه ايهل او يطلع

ابخير اترد ابجيته الگاع واتزيّنها الوان
واستقبِل شهْر الاقمار اهلاً يا شعبان
▪️▪️▪️▪️▪️
مرّه الدنيْه باللي بيها
واهْل البيت اللي امحلّيها
نور ايخلّف نور ابعزمه
وايشع عالدنيْه او يضويها

كل منهم صاير قرآن وابهيئة انسان
واستقبِل شهْر الاقمار اهلاً يا شعبان
▪️▪️▪️▪️▪️
ابو الحسن الوائلي
١٤٤٤هـ

▪️في ولادة الامام الحسين عليه السلام
▪️▪️▪️▪️▪️
هالليله هذا العيد  من اجمل الاعياد
مستبشره الاكوان  ابمولد ابو السجّاد
▪️▪️▪️▪️▪️
هالدنيه ويّانه
هالليله فرحانه
والفرح عنوانه  هاي المسيّه

السان المدح حاير
من الفرح طاير
نور انولد صاير  من الزچيّه

كلشي فرح هاليوم  ابجيّة ابو الامجاد
مستبشِره الاكوان  ابمولِد ابو السجّاد
▪️▪️▪️▪️▪️
ابمولد ابو الاكبر
صوت الوحي بشّر
او بيت النبي اتنطّر  وامتاني جيته

مثْل الورد ازهر
والعالم اتنوّر
من فاطمه او حيدر  متضوّي بيته

ابّيت النبي المختار  صار الفرح يزداد
مستبشره الاكوان  ابمولد ابو السجّاد
▪️▪️▪️▪️▪️
ايحير المدح عنّه
لا مو بشر چنّه
ابوسْط المهد جَنّه  هالليله نازل

مثله ولا اجمل
منّه الشمس تخجل
وابضيّه تتغزّل  ما مثله حاصل

وانتشرت الافراح  في عالم الابعاد
مستبشره الاكوان  ابمولد ابو السجّاد
▪️▪️▪️▪️▪️
رب السمه ابعلوه
مثله فلا سوّه
ابكلشي انفرد هوّه  ما مثله صاير

كل الفخر يحوي
بالعالم العلوي
مثْل الشمس يضوي  چن گمر ناير

سيّد صفه هوّه  في عالم الارشاد
مستبشره الاكوان  ابمولد ابو السجّاد
▪️▪️▪️▪️▪️
فوگ الافق طالع
چنّه نجم لامع
لنّه نزل راكع  محله ابو الاكبر

ضوّه الارض نوره
والدنيه مسروره
ما أجمل الصوره   البيها تصوّر

وحْي السمه ناده  ابصوته عله الميعاد
مستبشره الاكوان  ابمولد ابو السجّاد
▪️▪️▪️▪️▪️
الماكو مثل شكله
رب السمه امنزله
رحمه او منو مثله  سوّاه ربّه

هذا ابو اليمّه
من خالِقه رحمه
حُبّه صفه نعمه  عالناس حُبّه

صار ابوضوحه التام  سر عالم الايجاد
مستبشره الاكوان  ابمولد ابو السجّاد
▪️▪️▪️▪️▪️
ابو الحسن الوائلي
١٤٤٤هـ

▪️ في مولد المولىٰ ابو الفضل العباس عليه السلام
▪️▪️▪️▪️▪️
شي لله يابو الفضل شي لله
انطاك رب الكون حتماً اعلى جاه
▪️▪️▪️▪️▪️
يابو فاضل سيّدي اعليك السلام
ياللي مثلك ماكو ثاني بهالأنام
منو ايشبهك بالخليقه بالعظيم
يا إمام او إبْن امام او أخ إمام
▪️▪️▪️▪️▪️
يا سلام الله عله اللي حملتك
بطن غيره يبو الغيره الجابتك
رضعِتك اُمّك وفه لا مو حليب
و عله النخوه يابو فاضل ربّتك
▪️▪️▪️▪️▪️
اشعظم قدرك سيّدي يابو الفضِل
اليحچي بيك ايهيم ما لحظه يمِل
فاهيه اتصير السوالف من عداك
ناقصه او بس من نذكرك تكتمِل
▪️▪️▪️▪️▪️
كل تفاصيل الوفه شخصك حوه
ياللي منّك ياخذ انواره الضوه
يالخصالك كلها متروسه وفاء
او للجرح اسمك يبو فاضل دوه
▪️▪️▪️▪️▪️
شايفك مو مثل غيري يالچبير
ساكن انته ابناظري يبن الأمير
مو بشر عادي أشوفك لا إمام
انته يا عباس بعيوني ضمير
▪️▪️▪️▪️▪️
ما يحجبك شي يبن حامي الحمه
الما يشوفك صايب اعيونه العمه
ياللي مثلك ماكو يا عِين البتول
اشگد عظيم او صرت عِين الفاطمه
▪️▪️▪️▪️▪️
بالطفوف ابهيبتك كلشي انثلم
انته دين اطلعت واتحطّم صنم
من امامك حسبوا اليشرد شجاع
واللي ضل ثابت اگبالك ما سلم
▪️▪️▪️▪️▪️
او بالنهايه يابو فاضل أرْد اگول
ياللي كلمن گاصدك كلشي ينول
گاصدين الليله يا شيخ الفرات
اقضي حاجات اليحبّونك هذول
▪️▪️▪️▪️▪️
ابو الحسن الوائلي
١٤٤٥هـ

ميلاد الإمام الحجّة ابن الحسن عج:
▪️▪️▪️▪️▪️
وينك كلشي يتسائل مته يالمنتظر ترجع
إرجع خل يعود الخير او تنسه اعيونّه المدمع
چم روح ابسبب فرگاك بقت يالمهدي تتلوّع
يمته ترد يبن الحُسين
كلشي يناديك ابحنين
خل نگطع الشك باليقين  او خبر رجعِتك خل نسمع
▪️▪️▪️▪️▪️
عجّل سيّدي الطلعه عليك ابداعة الزهره
شوف اشچم گلب مجروح بيهْ النار مستعره
جرح الغيبه هد الحيل ما يتوصّف اشكبره
ابعازتك في كل مستوى
ظلمه او نريدك يا ضوه
بس انته يالمهدي دوه  تره لجروحنه الخضره
▪️▪️▪️▪️▪️
يغايب شكل عن العين بس برواحنه موجود
ما نهتم اذا كلشي نخسره المهم انته اتعود
نطشلك من ترد مولاي العمر هذا سنينه اورود
خلّيه كلشي ينفگد
بس المهم سالم ترد
ناذر أطش عمري ورد  ابجيتك ولله يالموعود
▪️▪️▪️▪️▪️
ابو الحسن الوائلي
١٤٤٥هـ