▪️▪️▪️▪️▪️
الورِد ما يِنحَط اِبصحراء
لأن مِن العطش يِذبَل
طريق السبي كلّش حار
عالنسوه ولا يِسهَل
اْو وينه وينه الف يا حيف
عليهن گام يتمرجَل

مِن الضربات اِمورميهِن
والتِتعب ايده اِيسِب بيهِن
▪️▪️▪️▪️▪️
ذُول الوادِم الاحرار
العبيد اِشلون گادوهُم
الف يا وسفه "آل البيت"
خوارج تالي سمّوهُم
فلا تنوصُف حالتهم
يِشتمون اْو يِضربوهُم

عالنسوه اِيعلِّي اِبصرخاته
واِتحِز بالروح اِحچاياته
▪️▪️▪️▪️▪️
طريق السبي اسمه اِبليس
اْو صار الشمِر بِيه اِيسوگ
الركبن فوگ هودج نور
هسّه ركبن اِعله النوگ
الما طالع خيال اْو صوت
الهِن واگفات اِبسُوگ

وين الما بي كِل اِمروّه
يِتصفّح بوجوه النسوه
▪️▪️▪️▪️▪️
عالنسوه النظر مشبوح
واِعيون العده صلفَه
خشنات الحِبال اِهواي
واِچفوف النسه ترفَه
كِلّه اِبچفّه هذا الحال
اْو زينب حالها اِبچِفّه

مِنها المدمع مِن دَم نازِل
صارت أُم اْو أب اْو كافِل
▪️▪️▪️▪️▪️
مِشت طول الطريق اِبنوح
هيَه اْو حالهِا يِصعب
اْو ما صدّگوا مِن عرفوا
هاي ام الخدر زينب
طاحوا دگ ضرب بالسوط
عليها اْو بالشتِم والسَب

والوادِم كلما ضربوها
اِتباوع عالروس اِيشوفوها
▪️▪️▪️▪️▪️
هاي ام الخدر معقول
يا عاقِل يِصدّگها
تمشِي اِبلايه ابو فاضِل
والغربه ترافگها
اليِخجل منها جبرائيل
هِسّه الوادِم اِتطگها

مَيصدِّگ واحِد حالتها
محتاره اْو ما هُمّه اخوتها
▪️▪️▪️▪️▪️
ابو الحسن الوائلي
صفر ١٤٤٥هـ

▪️المصيبة: رجوع زينب في الاربعين

▪️▪️▪️▪️▪️
انه زينب يخوتِي يالجفيتونِي
اوَّل مرَّه اصيح اْو ما تحضرونِي
ابَد مو مِن عوايِدكُم تبچّونِي
مِحتاره اْو دمعاتِي اِتلالِي
محّد يدرِي اِشصار اِبحالي
▪️▪️▪️▪️▪️
انه ما جيت أأذيكُم نعَم تدرُون
بَس الذي صار اِوياي ابد مَيهُون
مِن گد البچِي ما ضلِّي شُوف اِعيُون
اندهكُم بَس مَتحضرونِي
بالخَد يهمِل دمْع اِعيونِي
▪️▪️▪️▪️▪️
اجيت امْن السبي اْو تهمِل دمُوع العين
الليالِي الفرِّگتنَه تسعه واثلاثين
التقينه اِردود لاچِن انتوا مدفونِين
زينب بالهَم رجعَت ليكُم
مدفونِين اِتصِد اِعليكُم
▪️▪️▪️▪️▪️
مِن حرْگ المُخيَّم مختنِگ صدري
وانه الفارگِت شخصين اِكسروا ظهري
بين اِگبوركم ريتَه اِنحُفر گبري
والمُوت اَتيقَّن يِحلالِي
ما بين اِحسين اْو كفّالِي
▪️▪️▪️▪️▪️
كأنِّي بها على قبر الحسين عليه السلام

يحسين يا عزنه او ولينه
مِن السبِي جتّي الضعينه
دگعد اْو شُوف اشصار بينه
واِشحالنه خويَه امْن اجينه
مِن يوم صرتم عايفينه
يحسينَّه وليَه اِنولينه
نسوه اْو بلا حامِي بگينه
اْو لِسبانَه صاروا گايدينه
اْو مِن عگْب الْچفوف الحنينه
صار الحبِل لازِم ادينه
اْو مُو عالهِوادِج مِن مشينه
عالهزِل خويَه اِمرچّبينه
ريتَك تصِد عينك علينه
يالعايف العيله حزينه
تگعِد يبُو الأكبَر رجينه
اْو بينه ترِد لارض المدينه
▪️▪️▪️▪️▪️
▪️عند وصولها الى قبر كفيلها ابي الفضْل العبّاس سلام الله عليه

عبّاس جيتَ اْو جرحِي ويّاي
والنار تسعَر خويَه بِحشاي
عطشانَه اشُوفنَّك يروَّاي
يا ماي منِّي ماخذَك ماي
مفجوعه جيْت اْو مالي كِل راي
والحال خويَه يِجرح اِهواي
عبَّاس جيتَك أبِث شكواي
لو چنِت مانَك بِيَّه درَّاي
دكعِد يخُوي اْو شُوف بلواي
گلِّي يكافِل تِقبَل اِبهاي؟:
عگْب الخدِر لنها يوفَّاي
صارت عليَّه اِتباوِع اِعداي
اعرف يخَي يا نُور عيناي
اِبهذا عتابِي تنجرِح جاي
بس جيْت اگلَّك تعرِف اِبهاي؟
اِبلا حامِي وحدي صار مسراي
▪️▪️▪️▪️▪️
ابو الحسن الوائلي
صفَر ١٤٤٥هـ

▪️في استشهاد رسول الله محمد عليه الصلاة والسلام
▪️▪️▪️▪️▪️
عالهادِي مُحمَّد
كلشِي حزنه يِشتَد
▪️▪️▪️▪️▪️
چن برض المدينه يدوي هالصُوت
اْو ريح الدنيَه عاصِف بِي خبَر مُوت
واِستأذَن حبيبَه ملِك المُوت
هالليله يـ طه فايِت الفُوت

يَم الباري اِصعَد
عالهادِي مُحمَّد
▪️▪️▪️▪️▪️
كاس السَم نبينه جارِع الكاس
يِنعاه الجماد اْو يبچِي الاحساس
خُمدَت مِنّه توها اصُوات الانفاس
عالهادي اْو عله اهلَه اِنگلبت الناس

لَن واحِدهُم اِرتَد
عالهادِي مُحمَّد
▪️▪️▪️▪️▪️
نازِل ساعه يِصعد يِنعه جبريل
اْو مِن كل الخليقَه المدمع اِيسيل
واصوات الملائِك چنها ترتيل
تندِب يا مُحمّد هيَه بالويل

كلشِي اِبدمعَه ردَّد
عالهادِي مُحمَّد
▪️▪️▪️▪️▪️
مِن طه المُسجّى فاضَت الروح
اْو للرب اِبسماءه هالمسَه اِيروح
عافوا طه عافوا جِسمه مطروح
اْو صارت للسقيفه الوادِم اِتروح

كلشِي اِعليها يِشهَد
عالهادِي مُحمَّد
▪️▪️▪️▪️▪️
ما طوّل محمَّد مِن الغْياب
چا ليش المدينه اِنترست اِذياب
والظالم تسيّد طه مِن غاب
صار الماله ذِمّه يحكُم الغاب

بالتاريخ الاسود
عالهادِي مُحمَّد
▪️▪️▪️▪️▪️
غاب الهادِي واِبنُص گبره مدفُون
اْو ما شِفنه الصحابه اويَه اليِشيعُون
ليش اْو هُمّه بامره اْو مُوتَه يِدرُون
بَس كرسِي الخلافه عامِي العْيُون

الحِقده كِل شخُص رَد
عالهادِي مُحمَّد
▪️▪️▪️▪️▪️
مِن غيبَة مُحمّد باقِي للآن
يِحكمنه الزنيم اْو بِيده العْنان
اِنريد البِي حميَه ايوخْر الاحزان
حتماً للشريف الكرسِي عطشان

والحاقِد تسيَّد
عالهادِي مُحمَّد
▪️▪️▪️▪️▪️
ابو الحسن الوائلي
صفر ١٤٤٥هـ

▪️في استشهاد الرسول الكريم محمد عليه الصلاة والسلام
▪️▪️▪️▪️▪️
يا رحمة الله الواسِعه اْو يا سيِّد الأمَّه
يالمنبعِث فُوگ الارُض مِن السمَه رحمَه
شفْت اِشكثُر اهات
شفْت اِشكثُر لوعات يا سيِّد الأمَّه
▪️▪️▪️▪️▪️
نبي الاكوان والرحمَه يهالمبعُوث مِن الله
يبُو الزهره عليك الله اِبسماءَه سلَّم اْو صلَّه
شوصفَك سيّدي حيره يمَن بيْك الوصُف يِحلَه
بِلا كِل شَك يبو القاسِم اِبصفات الزينَه تِتحلَّه

يا سيّدي كِل الوصُف لو يِنجمِع يمَّك
اكبر يهادينه يصِح منهِن فقَط اسمَك
ياللي عظيم الذات
شفْت اِشكثُر لوعات يا سيِّد الأمَّه
▪️▪️▪️▪️▪️
اِبمشيئة خالِقك انته يطَه الناس اَجيْت الها
عشِت واضِح يبُو الزهره وابَد لا ما تجامِلها
لچِن هالأمَّه خوّانَه ولا تستاهِلَك كِلها
النفاق اويَه الحقِد واكثر نعَم چانت فضائِلها

منّك يجِي بَس الوفَه يالطاهِره نفسَك
غصباً عله اِعيون النكَر ما تنحجِب شمسَك
يالتنثُر الرحمات
شفْت اِشكثُر لوعات يا سيِّد الأمَّه
▪️▪️▪️▪️▪️
اِبوسَط مكّه يبِن مكّه بديْت اِبدعوَة الاسلام
اِبفضِل عمّك وابِن عمَّك بنِيته اِبأصعَب الايّام
اِجيت الهُم تريد الخير ولاكِن وادِمَك نِيّام
ابَد كِل غِيره ما عِدهُم تحِب اِعبادَة الاصنام

يالهادِي چان المُجتمع گبلَك شبِه غابَه
واحِدهُم اِمآمِن چذِب بالله عله اعصابَه
غدْر الصحابه اِثبات
شفْت اِشكثُر لوعات يا سيِّد الأمَّه
▪️▪️▪️▪️▪️
چنِت يا سيِّدي تسعِي النشُر دينك يمولانَه
ابرغُم ما تعرِف اْو تدري جمِع هالناس خوّانَه
سعِيت اْو تدرِي نِيْت اِبليس يهزمَك هوّه واعوانَه
تبيعَك مِن أجِل يِرضى عليها اِفلان واِفلانَه

يِتأذّه گلبك سيّدي مِن هالبشَر حقَّه
هالوادِم اِبلا كِل وفَه يالمُصطفى حمقَه
بيهُم وفاهُم مات
شفْت اِشكثُر لوعات يا سيِّد الأمَّه
▪️▪️▪️▪️▪️
بده امْر الخِيانَه امِن الـ صحابه خانت المبدأ
اِبسببهُم سارَت الأمَّه مِن أسوء الى أسوء
اِبقرارات الردِي والعار عافوا طاهِر المنشأ
يبُو الزهره اْو بغُض بالنور رادوا ظلمَة المخبأ

حيدر خليفه نصَّبِت لاچِن بعَد مُدَّه
مِن غُمضَت اِعيونَك تره خلَّوا علِي وحدَه
اِختاروا خليفَه اللات
شفْت اِشكثُر لوعات يا سيِّد الأمَّه
▪️▪️▪️▪️▪️
يِوصفُونَك شخُص مو زين اِبكتبهُم رادوا اليقره
سِعوا يا سيّدي ايِشوهُون اِبسمُعتَك يا نبِي القُدره
ولاكِن باِختصار اِنگول اكيد اْو كِل شخُص أدره
الجبَل مَيهِمّه لا ولله ابداً كِل حچِي الحفره

نورك يضَل غصباً عله الما يِگدر اِيحِجبَه
ندرِي الذهب يبقَه ذهَب لو غطِّتَه التُربه
مَتضُرّك الطعنات
شفْت اِشكثُر لوعات يا سيِّد الأمَّه
▪️▪️▪️▪️▪️
حبيب البارِي يالمُختار اِنعبَر يا للأسَف حدَّك
نِسوا فضلَك واِجوا غِدروك اْو بالسَم اِنمُرد چبدَك
يضَل يابُو الزچيَه الثار قائِم يِبقَه مِن بعدَك
لحَد ما يِظهر الموعود الامام المهدِي مِن ولدَك

ثارات اهَل بيتَك ترِد مِن يِظهر المهدِي
ليل الحزِن يِخلص نعَم مِن طلعِتَه تبدِي
ماكُو بعَد نكبات
شفْت اِشكثُر لوعات يا سيِّد الأمَّه
▪️▪️▪️▪️▪️
ابو الحسن الوائلي
صفر ١٤٤٥هـ

آنا يالمهدي أمَك الزهره
الكاسِر اِضلوعِي يمتَه يوليدِي
اتصُلبَه عالشجره
مِنتظره منّك تاخِذ اِبثارِي
اِبجيتَك ييُمَّه تنطفِي نارِي
▪️▪️▪️▪️▪️
مُتباركين بفرحة مولاتُنا الزهراء عليها السلام.

▪️الليالي الفاطمية
▪️▪️▪️▪️▪️
اِدموع الحزِن فوگ الوجِن جريَه
حزناً عله هالنكبه يالزچيَه
▪️▪️▪️▪️▪️
من گربت ايّامِچ نشاهِد يَم الحسين
اِدموع الغياره اِتهامِلت مِن محجر العين
شِفنه الليالي الفاطميَه "قابَ قوسين"
واعله لطُمنه اِچفوف اِدينه "قابَ ضلعين"

بينه الحراره يالوديعَه هيَه
حزناً عله هالنكبه يالزچيَه
▪️▪️▪️▪️▪️
يالبينه شِفنه الكِل جرِح صرتِي طبيبه
او صرتِي چبيرتنه او اميرتنه الحبيبه
النار اللي حِرگت بابِچ اِبذيچ المصيبه
الحَد طلعة المهدِي تضَل بينه لهيبه

نارِچ تضَل اِبكِل گلُب سريَه
حزناً عله هالنكبه يالزچيَه
▪️▪️▪️▪️▪️
ها يالعظيمه واِحنه غيرچ ياهُو اِلنَه
يا فاطِمه او قطعاً بِلا شَك انتِي اُمنَه
مِحنة مُصابِچ عالمحِب ما منها مِحنَه
او كسْر الضلِع يا فاطِمه كاسِر ظهرنَه

اِبهاي المصيبه اللوعه والاذيَه
حزناً عله هالنكبه يالزچيَه
▪️▪️▪️▪️▪️
باب الله بابِچ ما يردنه اِشما نخينه
بالسهله والصعبه تجين او تعتنينه
يا فاطمه الزهره او يحبْل الله الأمينه
يُوم القيامه للنجاة انتِي السفينه

الجنَّة عدَن ندخِل غداً سويَه
حزناً عله هالنكبه يالزچيَه
▪️▪️▪️▪️▪️
نورچ مثِل شمْس الله لا ما يِطفَه نُوره
انتِي الغيوره او إِحنه اُولاد الغيُوره
لو حَن گلبنَه او لو طُلب گبرِچ يِزُوره
گبرِچ يمولاتِي يِشُوفه اِبنُص شعُوره

يِندلِّچ البِي غِيره والحميَه
حزناً عله هالنكبه يالزچيَه
▪️▪️▪️▪️▪️
يالصامِده چنتِي لمَن سالت دمائِچ
الكون او شنو يحوي الكسُر ضلعِچ فدائِچ
اني خذِت عزمِي او ولائِي مِن ولائِچ
فوزِي العظيم انِي اعتبُر عنِّي رضائِچ

يرضَه الله لنِّچ راضِيَه عليَه
حزناً عله هالنكبه يالزچيَه
▪️▪️▪️▪️▪️
اوَّل مره عزمِچ هِزم عزْم المنايَه
او اوَّل شهيده رحتِي مِن أجْل الولايَه
عندِي طلب رايِد اطلبَه بالنهايَه
اِبنظره فقَط جازينِي مولاتِي كفايَه

او هنيالِي لو عينِچ تصِد اليَه
حزناً عله هالنكبه يالزچيَه
▪️▪️▪️▪️▪️
ابو الحسن الوائلي
صفر ١٤٤٥هـ

▪️▪️▪️▪️▪️
سافرِت لارض المدينه والفكِر محتار
اِستغربِت باب الجلاله مشتعِل بالنار
ليش العناء ابِّيت الولاء
▪️▪️▪️▪️▪️
ابيقضتِي سافر خيالي للمدينه او شاهدِت
جابني يَم دار يمها وادِم اِهوايَه شفِت
شنو هاي اللمّه هايَه او باب مَن هاي اسئلِت
اسمعِت جاوبنِي شعُوري لاكِن انِي استغربِت
هذِي دار النبِي طٰه المصطفى اني اعرفِت
عله الدار الناس هايَه ليش مِلتمّه صحِت؟

اِعرفته بيت النبي الهادي والد البضعَه
ليش يَم بيت الرساله الامَّه مِجتمعَه
والادعياء ابِّيت الولاء
▪️▪️▪️▪️▪️
شفِت مِن عالبال چنها الحيره لا ما تنجلِي
واسئله عندِي چثيره بالي بيها ممتلِي
اِسمعِت واحِد عالي صوتَه لنَّه نادَه ما يلِي:
راح احرگه البيت وينك لينَه "اُخرج يا علِي"
اعرفِت نيّتهُم خبيثه والأمُر واضِح جلِي
للقضاء اعله العداله انتُفض چَف الجاهلِي!

شنو هالجرأه اللي عنده او ناده باحقاده
او منو هوّه وعله صنْو الـ هادي يِتماده
يِعله النداء اِبِّيت الولاء
▪️▪️▪️▪️▪️
واگف ودمعِي اعله خدّي او حيلِي حسّيته اِنهدم
واسمعِت صُوت الزچيَه تحچِي واِتنادِي اِبألم
يا رسول الله تنادي فاطِمه او تشكِي نعَم:
اتقَيِّدت بويه الحقيقه او فُرض سيطرتَه الوهَم
اُمّتَك بالغدُر هيَه الافضَل اِبكُل الأُمَم
مِن غبِت عنها يبويه اِتسيَّد اِعليها الصنَم

اِتأذّه گلبِي امْن اِسمعتها فاطِمه تحچِي
تشتكِي اِبحُرگه لابوها المصطفى او تبچِي
اِبحرگه او بُكاء اِبِّيت الولاء
▪️▪️▪️▪️▪️
صاح صُوت الغيره مِنها هالبتُول الزاكيَه
عِفتوا ابويَه او رحتوا كِلكُم للسقيفه المُغريَه
انِي ادري مِن جمِعكُم بَس اذيَه الآتيَه
وانظُر الاصنام صارت عله المذهَب عاليَه
اني ارفُض كِل أمُركُم واني للحَق داعيَه
بت مُحمّد اني للذِل ابقَه دومِي آبيَه

بعده ابويَه اِبگبره ماهُو طوّل اِغيابَه
ليش اشُوف ارض المدينه تِشبَه الغابَه
يهْل الجفاء اِبِّيت الولاء
▪️▪️▪️▪️▪️
البعَض ما هزّه ضميره مِن سمَع فاطِم توِن
راد يحرِگ بيت ابوها المِن يطُب ليها اِبإذِن
فاطِمه گالوله جوَّه رجَع گال الهُم "وإِن"
واِندفع باب الامان او دفعِته وَلدَت حزِن
اندِفع ثگلَه اِعله الزچيَه وانطبَگ طبْگ الجفِن
او صُوت كسْر اِضلوع فاطِم بالافُق ضلّت ترِن

اِهناكه خلْف الباب چانَت يدري بالزهره
او رغُم ما يدرِي دفعها او صارت العصره
انرَد الجزاء اِبِّيت الولاء
▪️▪️▪️▪️▪️
اِضلوع مِن صدْر الهِدايَه اِبيا جريمه امكسّره
او بالله محسن شنُو ذنبَه اِبدمّه طايح يا تُره؟
هالجموع اِبلا حميَه رادَت اتذِل حيدره
گادِته او رادَت يِبايِع هالچفُوف الغادِره
الزهره خلفه ابفزعه طلعَت تمشِي توگع عالثره
او قنفُذ اِبسُوطه اِجاهه او يطِگ متْن الطاهِره

خلّوا ابِن عمِّي تنادِي او نِظروا اِعليها
والنذِل سُوطه ولاهه او ما رحَم بيها
يِضربها جاء اِبِّيت الولاء
▪️▪️▪️▪️▪️
بالدمِع ناديت ويلِي يا علِي او صوتِي حزين
اِنضربت الزهره يحيدر يا أمير المؤمنين!
ردت اركُض افزع الها او دوّرت عن حيلِي وين
چنت احاوِل بَس شفتها اِجدامِي بيَه ما تعين
واِسمعِت صُوت المُنادي ليَه نادانِي ابونين
اني اريدن هالظلامه تنتقِل عبْر السنين

بِده مِن غدْر الصحابه هالأمُر بعدِي
خَل تشُوف الناس حالة فاطِمه او ولدِي
او كِل العناء اِبِّيت الولاء
▪️▪️▪️▪️▪️
ابو الحسن الوائلي
صفر ١٤٤٥هـ

▪️كأنِّي بالأمير ع بعد وداع الزهراء ع
▪️▪️▪️▪️▪️
كسُر ضلِع حبيبه كِسَر گلُب
گلُب بقه نحيبه دمِع يصُب
كسرتنِي اِبفگِدها ما أحمِل بُعُدها
▪️▪️▪️▪️▪️
اني علِي حامِي الحمه البالشِدَّه دوماً حاضِر
مِن مشَت عنّي فاطِمه جرّبت كسْر الخاطِر

انه العندي الصعُب يِسهل عله ايمينِي
انه الكلشِي يخُف مِن يوصَل ايدينِي
شفتها امْن البچِي حمره صفت عينِي
مصاب الزهره فاطِم شيّب اسنينِي

ضوَه هوَه الوليها او سنَد الِي
مشَت بعَد مشيها انكسَر علِي
چانت روحِي اصِدها ما أحمِل بُعُدها
▪️▪️▪️▪️▪️
يلهب وسَط روحِي جمُر يجرح اهواي امصابِي
او ضلّت ابگلبي تستعُر نار اللي شعلَت بابِي

انه اللي بالمعارك كِل وكِت غالِب
اَمامِي ابكِل حرب لا ما ثبَت شارِب
غِديت اشحالي هسَه او مدمعِي ساچِب
اختلف حاله علِي ابْنَ ابِي طالِب

علِي علِي معاهه علِي قَوي
علِي علِي بلاهه ضَل مِنچوي
واِشحالِي بعَدها ما أحمِل بُعُدها
▪️▪️▪️▪️▪️
أُم الحسَن چانت الِي مو نصفِي چانت كلشِي
مِن شلِت نعْش الطاهِره حسّيت شايِل نعشِي

الاسمها اِبكل وكِت مَيفارِگ اشفافِي
مثِل فاطِم ابَد ما واحِد ايوافِي
انه الشايِلها للدنيَه عله اطرافِي
عجَب تابوتها يِثگل عله اچتافِي

انه السهِل عليَه كلشِي شفِت
خشَب ثِگَل بديَه تالِي وكِت
حيلِي كِلّه عِدها ما أحمِل بُعُدها
▪️▪️▪️▪️▪️
مِن امشِي لحروبِي چنِت امشِي انَه اِبكل حيلِي
او چِنت ارِد دوماً مِنتصُر چِي فاطِمه تدعيلِي

انه اللي بالمصاعِب راسي ما ادنگه
عجيبه اليوم اباوِع روحِي مِختنگه
لچِن حَگّه الگلُب لمَّن يوِن حگّه
الدمِع مَهما كِثر ما يوصِف الفرگه

يوِن تره اِبحسرتَه الفُگد ولِف
وانه ولفِي الفُگدتَه يِسوه ألِف
چانت كلشِي اعِدها ما أحمِل بُعُدها
▪️▪️▪️▪️▪️
الچانَت اذا فتره غبِت عنها تسيل الدمعَه
شيَّعِت فاطِم للگبُر مَدرِي انِي عُمرِي امشيعَه

چنِت كلما أرِد مِتأذِي مِن سُوحِي
تداوينِي او تهِل دَمعتها لِجروحِي
اذكرت موقِفها هذا وانتفَض نوحِي
احملِتها للگبُر مدري احملِت روحِي

احفرِت لحِدها وانِي حزِن شفِت
غُفه ابلحِد حنانِي وانه متِت
اجروحِي اِبلا ضُمدها ما أحمِل بُعُدها
▪️▪️▪️▪️▪️
ماكو مره اِبعينِي أصِد مثْل الزچيَه اتحبنِي
عاشِگها واعرفها اشكثُر هاي المره تِعشگنِي

اِذا رايِد أوصُّف فاطِمه ابوصفِي
شسُولِف عَن وفاهه ولله ما يكفِي
العظيمه او هِيّه كِلِّي مُو فقَط نصفِي
أثَر فرگاهه منّه يرتجِف چفِّي

انه التنهِي يمينَه شكُو محَن
بقَت ترجِف ادينَه ابو الحسَن
عگْب المِفتقِدها ما أحمِل بُعُدها
▪️▪️▪️▪️▪️
مِن ادفنِتها الفاطِمه عشْت اِبكسرتِي او هضمِي
وسّدِت ويّاهه الفرح او عاشرِت حزنِي او همِّي

المُحِب الوَي حبيبه ايكوِّن العِشره
يِعيشُون العمُر عالحِلوه والمُرَّه
لچنِّي ابعشرتِي وَي فاطِمَه الزهره
ولا سمعَتنِي كلمَه اتغثِي بالمرَّه

انه ردِت مماتِي يجِي او يمُر
غُفت أمَل حياتِي وسَط گبُر
او ما أگدَر أرِدها ما أحمِل بُعُدها
▪️▪️▪️▪️▪️
ابو الحسن الوائلي
ربيع الاوّل ١٤٤٥هـ

▪️▪️▪️▪️▪️
يا أوَّل شهيده
مِن أجْل العقيده
يالزهره الزچيَه يالزهره الزچيَه
▪️▪️▪️▪️▪️
انتي اوَّل بت نبِي تحضه اِبقتِل
گلبِچ اِتأذَّه اِبسبب ذاك الفعِل
كسروا اِضلوعِچ وكتلولِچ طفِل
او وافُقوا بالنار بابِچ تشتعِل

بابِچ مِن حريقه
يِشهد عالحقِيقه
يالزهره الزچيَه يالزهره الزچيَه
▪️▪️▪️▪️▪️
هِجموا اعليچ الجهَل يالعالِمَه
خاطِر ايذلّوچ اولاد العِمَه
رادوا ايكسروچ بس يا فاطِمَه
الناصِي مهمَا صار مَيلُوح السِمَه

مهيوبه وگفتِي
او للظالم كسرتِي
يالزهره الزچيَه يالزهره الزچيَه
▪️▪️▪️▪️▪️
اِتَّخَذ ضلعِچ بالعصُر موقِف شرَف
او كلَّا للباطِل يمَولاتِي هِتَف
الباع دينَه اِبهجمِته اعليچ انعرَف
اِگبالِچ الملعُون مولاتِي انكشَف

ذاك الثانِي شيطان
بَس اِبهيئة اِنسان
يالزهره الزچيَه يالزهره الزچيَه
▪️▪️▪️▪️▪️
يبقَه شامِخ للأبَد طولِچ يضَل
والحصىٰ ابعيده نعَم عَن الجبَل
موقفِچ ثابِت يفاطِم للأزَل
صرتِي ضِد الخانوا ابخير العمَل

موقف عن درايَه
مِن أجْل الولايَه
يالزهره الزچيَه يالزهره الزچيَه
▪️▪️▪️▪️▪️
فاطِمه ذاك الضلِع مِن انكسَر
هوَّه للحريَّه ضَل يرسِم صوَر
رادوا ايهزّوچ بَس محَّد گِدَر
ثابِته واگبالِچ الكِل اِنحدَر

اگبال اهْل الرذيله
چنتِي انتِي اصيله
يالزهره الزچيَه يالزهره الزچيَه
▪️▪️▪️▪️▪️
يالعزيزه الحالتِچ كلشِي اِندهَش
انرعَب كلشِي وجفِن عينه ما رِمَش
غُمضَت اِعيونِچ او كون الله اِرتعَش
شاهَد اوَّل زهره تنشال اِبنعَش

الحالچ كلشِي ينحَب
ضَل او جمره يِلهَب
يالزهره الزچيَه يالزهره الزچيَه
▪️▪️▪️▪️▪️
مختفِي گبرِچ يبِنت المُصطفى
حتَّه كِل واحِد يِبَيِّن مَوقِفه
لو وفِي واِيكُون ويَّه اهْل الوفه
لو لعين يرافِگ اصحاب الجِفه

قصتِچ بيها حاصِل
تبيان المراجِل
يالزهره الزچيَه يالزهره الزچيَه
▪️▪️▪️▪️▪️
ابو الحسن الوائلي
ربيع الأوّل ١٤٤٥هـ

▪️▪️▪️▪️▪️
لسان حال أمير المؤمنين عليه السلام :

مشت عنّي الزچيَه وانِي موجوع
انتقلت رحمة الله الرحمة الله

گطع زهرة حياتي الموت اصِد ليه
واخذها وريته ماخِذ روحِي ويّاه

ضلعها المنكسُر ما فارَگ البال
هَد حيلِي وابد ما أگدر انساه

راحت فاطمه وابداري ضلّيت
وحدي ابلا حبيبه امگابل الآه
▪️▪️▪️▪️▪️
أعظم الله أجر صاحب الزمان عج وأجوركم باستشهاد سيدة النساء فاطمة الزهراء عليها السلام
ونسأله بكرامتها عند الله أن يشملنا برعايته وعنايته ويدفع عنَّا كل سوء وبلاء ويفرج عنّّا فرجاً قريباً عاجلاً كلمح البصر أو هو أقرب.

#الفاطمية_الأولى

▪️▪️▪️▪️▪️
يا ربِّي عجِّل بالفرج
▪️▪️▪️▪️▪️
يا ربِّي طالت غيبِته
عجِّل يرَب ابطلعِته
كلنا ترانه ابحاجِته
إنقِذ الناس امْن الحَرج
▪️▪️▪️▪️▪️
يا رَب نعَم طال البعِد
وانريده غايِبنه يرِد
لو رَد يرِد كلشِي ورِد
بيده يفُض هذا المَرج
▪️▪️▪️▪️▪️
انته معاه بس الأمَل
ابداً تره ما عِدنه حَل
عجِّل لابِن خير العمَل
آخِر وريث امْن الحُجج
▪️▪️▪️▪️▪️
صار الوضِع كلّش صعُب
يا سيّدي يچوي الگلُب
عدنه فقط دمْع اليصُب
واهوايه متأذيَه المُهج
▪️▪️▪️▪️▪️
عجِّل يرَب للمُنتقِم
هوّه الكفُو لهذا الإسِم
هوّه الأهَم مِن المهِم
بهذا الطلب صار اللُجج
▪️▪️▪️▪️▪️
ما نصطبِر أكثَر بعَد
والمُنتظَر عِنده وعَد
اثلاثَة عشَر دَم ما بُرد
يثأر لجلهِن لو خِرج
▪️▪️▪️▪️▪️
تمّت بعناية مولاي الحجة عجّل الله فرجه

ابو الحسن الوائلي
١٤٤٥هـ

▪️في ولادة السيدة زينب عليها السلام
▪️▪️▪️▪️▪️
قد اشرقت زينب
نزلت ضوه زينب
▪️▪️▪️▪️▪️
نزلت ملاك الفاطمه لا مو بشر چنها
ايحير ابوصفها اي بشر راد ايتمعّنها
ما تنوصف بنت الوصي اشما ينحچي عنها
عفّه او خدر واموقّره او هيه ابزغُر سنها

واتشرّف الكوكب
نزلت ضوه زينب
▪️▪️▪️▪️▪️
درّه سماويَه الارض من عدها تتنوّر
صارت نصف من فاطمه او نص ثاني من حيدر
بت اشرف الوادم عله هالگاع تتقدّر
اشما تنوصف هالطاهره بيها الوصف يزغر

بالغيره تتحجّب
نزلت ضوه زينب
▪️▪️▪️▪️▪️
نزلت وقوره او طاهره والغيره تمليها
عالِمَه هم مُعلّمه او علّمها باريها
اوصاف الكمال ابّت علي متجمّعه بيها
قرآن والشيطان ابد ما يگرب اعليها

رافع قدرها الرّب
نزلت ضوه زينب
▪️▪️▪️▪️▪️
طاهره صارت بت علي كل الوفه ايحدها
اهل السمه قبْل الارض فرحت ابمولدها
موقفها في طف كربله هوّه اللي خلّدها
حفظت وقار العايِله بالغيره وحّدها

ابدرب السبي الاصعب
نزلت ضوه زينب
▪️▪️▪️▪️▪️
اُمنيَه عندي بالگلُب تكسِر الي خاطِر
اوصل گبر زينب انه او للمرقد الطاهِر
ادعي الله كل ليله انه تتحقّق امناطِر
اني ادري تتحقّق الي امنيتي بالآخِر

سهله ولا تصعب
نزلت ضوه زينب
▪️▪️▪️▪️▪️
ابو الحسن الوائلي
جمادي الاول ١٤٤٤هـ

▪️لسان حال الزهراء فاطِمه ع:
▪️▪️▪️▪️▪️
اذّونِي واني رحمه اعله الوطيَه
اذّونِي شفِت منهُم بَس أذيَه
اذّونِي والالم مجموع بيَه
اذّونِي
▪️▪️▪️▪️▪️
شِفته يرتاح الاذِيتي كِلشي حيل
الدنيَه تضحك لو دمِع عيني يسيل
ابرغُم كِل المرنِي وابحزني الثجيل
يبقه شامِخ طولي وابداً ما يميل

بالتالي دومه بالعالي وجودِي
بالتالي ابَد ما يِطفه خلودِي
بالتالي كلشِي يِشهد للزچيَه
اذّونِي
▪️▪️▪️▪️▪️
الويَه ابويه حضروا ابيوم الغدير
كِلهم اختاروا علي هوّه الامير
او بعد ما مات النبي طٰه النذير
فزعوا او لِزموا سِره البِيع الضمير

ما عدهُم هُمَّه مِن الغِيره ذرَّه
ما عدهُم والگُصص ما بيها گطرَه
ما عدهُم لا حمُوله او لا حميَه
اذّونِي
▪️▪️▪️▪️▪️
ابكِل حروبه الخاضها طٰه النَبِي
الحرُب مِن تِشتَد يِلبسُون العبِي
ما نشُوف العِنده غِيره والأبِي
انشاهِد اليِلمَع خِيانه او ناصِبِي

واحِدهُم رجَع لاطباعه القديمَه
واحِدهُم امْن الوفه روحه عديمَه
واحِدهُم رجَع لاصْل الجاهليَه
اذّونِي
▪️▪️▪️▪️▪️
الماله فزعه بالحرُب تالي شفِت
اعليَّه يِسترجِل عِمت عين الوكِت
"وإن فاطِم" مِن حِچاهه اتألّمِت
گبُل موتِي مِن هالحچايَه متِت

مَوتونِي الهجمَه هايَه اقسَه هجمَه
مَوتونِي والهوه بالگوَّه اشِمَّه
مَوتونِي امْن ادفعَوا بابِي عليَه
اذّونِي
▪️▪️▪️▪️▪️
ليش بيد الناصبِي خدّي انسطر
ليش بيد الجاهلِي ضلعِي انكسر
انداس حدّي وانِي بِت سيْد البشر
ليش متگولونها القاتِل عُمر

هَد حيلِي البالحرُب سيفَه يشمره
هَد حيلِي وايده خلّت عينِي حمره
هَد حيلِي فعِل اُولاد الرديَه
اذّونِي
▪️▪️▪️▪️▪️
بابِي هاي الچانَت الهُم كلها ضِل
عله حرگتها نذِل حشَّم نذِل
چان ابويَه ابإذِن يدخِلها قبِل
تالِي خلّوها ابحطبهُم تشتعِل

رجعولِي حاوطَوا يا وسفَه بيتِي
رجعولِي او جابوا ابچفهُم اذيتِي
رجعولِي الخانوا الهادي او وصيَه
اذّونِي
▪️▪️▪️▪️▪️
الاخذ من ضيّي ضواه او ما طُفَه
اجَه مِتحزّم عله كسري او لفَه
لا ضَمير الهزّه لا مِن عاطفَه
النار نِدريها رماد امخلِّفَه

لا غِيره هاللعين ادريهْ عِندَه
لا غِيره ابهجمِته يكسرنِي قصدَه
لا غِيره روحهُم لا مُو وفيَه
اذّونِي
▪️▪️▪️▪️▪️
ابو الحسن الوائلي
جـ الأوّل ١٤٤٥هـ

هو ذلك الضلع الموجود في الجسد الطاهر لأعظم إنسانه في تاريخ البشرية ألا وهي فاطمة الزهراء عليها السلام:
▪️▪️▪️▪️▪️
كسروا ضلْع الاصلاح
وابوجْه الظالم صاح
گالوله كسرناك او حچيهُم منعلِن
گاللهُم أضَل قائِم رغُم كسري "وإِن"
▪️▪️▪️▪️▪️
ضلِع سور ابجسَد نور
ابجسَد خير النسه الزهره الزچيَه
سِكنها ابّدنها
لچِن مو مثْل الضلوع البقيَه
بِده يشوف اجَه الخوف
اجت يَمّه چفوف ابلا حميَه
بالاحطاب عله الباب
معاهُم جابوا اعليه الاذيَه

واگف ضلْع الإسلام
ينظُر جيَّة أصنام
ضَل واگف حدَس عنده يحِس جاي الحزِن
گاللهُم أضَل قائِم رغُم كسري "وإِن"
▪️▪️▪️▪️▪️
ضلِع غير ابجسَد خير
سِكن هوّه ابجسَد يِنگط محنّه
صفه بيهْ وطَن ليهْ
او يهنياله لان شايلته جنّه
رغم هاي نذِل جاي
اعله حدّه جايب الضيم او تعنّه
تحيَّر اجه الشَر
بده يشوف الخطر يقترِب مِنّه

خِرجوا عن المألوف
حاطوا بيت المعروف
كلها اتحزمت اتحرگه او ولا واحِد يحِن
گاللهُم أضَل قائِم رغُم كسري "وإِن"
▪️▪️▪️▪️▪️
ابحزن طال الضلِع گال
هذاك اليوم انه الزهره شفتها
امْن اجوا غاد الاوغاد
انه حيلِي جمعته او ما عفتها
اهِي احجاب وره الباب
او گصص كل ماي ما بيها ولتها
التأسَّس سهِل بَس:
الأشَد كلمة "وإِن" الألّمتها

بيت البِيه القران
تصعد مِنّه النيران
بيت اللي ابو القاسِم يطُب ليهْ اِبأذِن
گاللهُم أضَل قائِم رغُم كسري "وإِن"
▪️▪️▪️▪️▪️
اليتيمه العظيمه
اجوا وادِم عليها ابلا مخافَه
تمادوا تعنّوا
لجِل مقتلها والغايَه الخلافَه
اجوا ناس ولا ناس
أهل ختله نعَم وكْت الكلافَه
لچِن كيف؟ الف حيف
سطر چَف الجهَل وجْه الثقافَه

طاحَت والخَد مسطور
ضلْع الكوثر مكسور
ضَل هوّه ابسمه السبعه صده الكسره يرِن
گاللهُم أضَل قائِم رغُم كسري "وإِن"
▪️▪️▪️▪️▪️
بالاحزان الحقِد بان
ابدفِع باب الهِدايَه والإمامَه
بَلا خوف بالچفوف
عُصر وسفَه النذِل جسْم الكرامَه
الرعُب شاع عله الگاع
اضطرب كلشِي او كأن بانَت علامَه
بچه الكون او يحسّون
بعَد لحظات واتقُوم القيامَه

واتبيّن هذا الحال
اتغيرت كل الأحوال
عاللي مَر عله الزهره غِده كلشي يوِن
گاللهُم أضَل قائِم رغُم كسري "وإِن"
▪️▪️▪️▪️▪️
بده القَول مَمعقول
علِي حامِي الحِمه ايگيدون چفَّه
الحچِي ايزيد علِي الحيد
الجبل تالي الحُفر تِگدر تچِتفَه!
يشوفون بالعيون
اطلعت فاطِم واهِي المدمع تذرفَه
يسمعون او يسكتون
تنادي ابكِل غضَب والناس صلفَه

لو يرجعلِي المعصوم
لو اكشِف راسِي اليوم
يا ظلّام اسمعوه الحچِي واضِح أضِن
گاللهُم أضَل قائِم رغُم كسري "وإِن"
▪️▪️▪️▪️▪️
الذي صار عله الدار
مِن كل الجراحات او كسرها
بكل يوم تضَل دوم
الشمِس موجوده غصباً عالنكرها
الحچي جاد او قسَم حاد
وحگ هالطاهره المخفِي گبُرها
مَينهار بالآثار
يضل اُم الحسَن خالِد ذكرها

حتماً حتماً ولله
دوماً تبقَه الزهرا
ذكْر الزهره ما يخفَه وابد ما يندفِن
گاللهُم أضَل قائِم رغُم كسري "وإِن"
▪️▪️▪️▪️▪️
ابو الحسن الوائلي
ربيع الثاني ١٤٤٥هـ

▪️كأنِّي بالأمير ع يُكلِّم فِقاره:
▪️▪️▪️▪️▪️
لو عندي أمُر يا ذُو الفِقاري
ما چان الرجِس يتعنّه داري
▪️▪️▪️▪️▪️
آنه حيدر يا فِقار دمعي احمر يجري صار
ولله لو بيدي اكيد بابي ما تشعِلها نار
ليك اقدْم الإِعتذار حين هِجموا عله الدار
الأمُر لو بيدي يكُون ما يصير الذي صار

چان اللي هِجم تصليهْ ناري
ما چان الرجِس يتعنّه داري
▪️▪️▪️▪️▪️
الخان ربّه او دينه خان شيَّخه اعليَه الزمان
الاسمِي مِن ايمُر عليه گوّه يبلع ريجه چان
ابعيني اتحسّر واشُوف اجه الداري ابلايَه خُوف
تالي عالزهره يحيف صار رجَّال الجبان

مَيضل كل شخص كون ابقراري
ما چان الرجِس يتعنّه داري
▪️▪️▪️▪️▪️
الماله غيره او لا اصُول عابر احدود الرسُول
العمره ما سَل بيده سيف زلمه صار اعله البتُول
يصرخ او هدّدنِي گام كاسِر اضلوع السلام
العالي صوته ابّابِي چان بالحرُب گاعد خجُول

چا بيدي اذبحه الماله طاري
ما چان الرجِس يتعنّه داري
▪️▪️▪️▪️▪️
لوَن سلّيتك واروح أهجِم او أنهِي الجروح
والهِجم عالزهره چان ما أبقِّي ابصدره روح
بأمُر من الله اللي صار چان مو بيدي القرار
حتّه احافُظ عله الدين ما قِبل بيدي تلُوح

چان السيف بي يصبح حواري
ما چان الرجِس يتعنّه داري
▪️▪️▪️▪️▪️
وسفه ذوله الكافرين البابي كلهُم حاضرين
هِجموا اعليَه يحيف وآنه امير المؤمنين
احرگوا بابي الكلها خير لمَن باعوه الضمير
او چان نيَّتهُم اكيد گطِع حبْل الله المتين

أمحِي الرادوا ايكُون انكساري
ما چان الرجِس يتعنّه داري
▪️▪️▪️▪️▪️
گلبي بِجروحه غزير او كل جرح منهن چبير
زحمه من دمعِي يسيل عالوجِن وآنه الأمير
تجرح اهوايَه اكيد من اشوف ابْن العبيد
تالي ينعد عالرجال هالمُنافق والحقير

مِن عنده أرِد العندي ثاري
ما چان الرجِس يتعنّه داري
▪️▪️▪️▪️▪️
ابو الحسن الوائلي
ربيع الاوّل ١٤٤٥هـ

▪️▪️▪️▪️▪️
عظّم الله لكَ الأجْر يمهدي
▪️▪️▪️▪️▪️
البگه براسك يابو صالح هالمسيَه
ماتت اُمك فاطمه الزهره الزچيَه
الرحمة الله انتقلت بهالليله هيَه
اعليها دمعاتك صفت حمره جريَه
▪️▪️▪️▪️▪️
الزهره ماتت مِن كثُر همها او هضُمها
اهواي اذّاهه الزمان او ما رحمها
ماتت او هذا المسَه طافِي نجِمها
السمه لو دفنوها يا گاع التضُمها
▪️▪️▪️▪️▪️
اُمك اليغضب او يرضه الله الرضاهه
بالكسُر يا للأسَف ردّوا جزاهه
امن الحزن والضيم ذاك اللي لفاهه
غِدت محنيَه يمهدي مِن أساهه
▪️▪️▪️▪️▪️
ماتت او كِل راحه ما چانت تمُرها
وانته بس انته الذي تجبُر كسرها
اهموم شالت حيل اكبر مِن عمرها
او غاضِبه ماتت عله ذاك العصرها
▪️▪️▪️▪️▪️
تدري بالظُلام قتلوها ابصلافه
منها ناولوا كلّه مِن أَجْل الخلافه
منها حرموا حيدره ولله وسافه
او دِفن بيده باللحد كل الترافه
▪️▪️▪️▪️▪️
بهالليالي مدمعك بس ايتجاره
وادري گلبك تلهب او ما تطفه ناره
كلشي يسأل ابو صالح يمته ثاره
او يصلُب اعله الشجره جبتين الحقاره
▪️▪️▪️▪️▪️
ابحال فاطِم يابو صالح انته الادره
كسُر ضلْع النور بس انته التجبره
او لمّن اترِد ابحضورك نبني حضره
من هُنا مرقد الزهره ابقطعه نقره
▪️▪️▪️▪️▪️
ابو الحسن الوائلي
جـ الأوّل ١٤٤٥هـ

كأنّي بالحسين عليه السلام:
▪️▪️▪️▪️▪️
بالله امودّعه يا يُمّه الله وياچ
مدري شلون راح احمِل جرح فرگاچ

يوم الشلتي اباوع صار وحشه البيت
مثِل وحشة گبر حاله صفه ابليّاچ

خُمد نورچ يفاطِم واستحه كل نور
يطلع يضوي واتراب الگبُر غطّاچ

انتي العافيَه او منّچ حُرمنِي الموت
وابروحِي او دمِع عيني تِرك ذكراچ
▪️▪️▪️▪️▪️
أعظم الله أجر صاحب الزمان عج وأجوركم باستشهاد سيدة نساء العالمين مولاتنا فاطمة الزهراء صلوات الله عليها...


#الفاطمية_الثانية

▪️لسان حال الأمير ع:
▪️▪️▪️▪️▪️
يالمشيتي هايَه اوّل سنه مرّت وآنه وحدي
يالمشيتي فاطِمه بالله انه چَم زهره عندي
▪️▪️▪️▪️▪️
فاطمه آنه علِي الموتِچ چوانِي
اعليچ ابچِي والبچِي هوّه بچانِي
خذِچ منّي او ما رحَم حالِي زمانِي
راحَت البهجه او بقيت انحَب واعانِي

ياللي بعدچ كلشي بالدنيَه اشوفه صار ضدي
يالمشيتي فاطِمه بالله انه چَم زهره عندي
▪️▪️▪️▪️▪️
انتي شمسِي واللحِد غيّبلِي شمسِي
مدري جاي ارثيچ مدري ارثِي نفسِي
آنه بيدي بالحرايب سيفي يقسِي
حالِي مِن حال الغريب ابدونچ امسِي

اشصار بيّه وآنه ذاك الماكو واحِد يِدنه حدّي
يالمشيتي فاطِمه بالله انه چَم زهره عندي
▪️▪️▪️▪️▪️
علِي ما يِگطع عله افراگِچ نحيبه
والحبيب ايمُوت بِفراگ الحبيبه
جرّدِت سِيف اصطبارِي بهالمصيبه
من شفِت بدرچ مشه او فضّل مغيبه

وسط عيني حاله حال الليل مِن انهاري يبدي
يالمشيتي فاطِمه بالله انه چَم زهره عندي
▪️▪️▪️▪️▪️
ابروحِي خنگه والهوه ياذيلِي صدري
ادعِي بعدچ ما يطوّل كُونه عمري
آنه حلّال الصِعاب او كِلها تدري
فاطمه او موتِچ صفه كاسرلِي ظهري

يا كسرتي اشلون ما أدري يرِد حيلِي او تِعدّي
يالمشيتي فاطِمه بالله انه چَم زهره عندي
▪️▪️▪️▪️▪️
آنه ذاك الكلشِي ما يِصعب عليّه
احملِت خيبر يوم امِس باطراف اديّه
او مِن شلِت تابوتِچ اقسِم يالزچيّه
چَن احِس شايِل عله اچتافِي الثُريّه

هذا حالي صرت بالگوّه اكُفّ اردان زندي
يالمشيتي فاطِمه بالله انه چَم زهره عندي
▪️▪️▪️▪️▪️
غيبتِچ صعبه او صفت بيها كسرتي
اوياچ نامت بالگبر فاطم ضحكتي
المتِت آنه يم حسن لو انتِي متّي
چنِت محتاجِچ يزهره واندفنتي

عله موتچ جاريَه دمعاتِي من عيني اعله خدّي
يالمشيتِي فاطِمه بالله انه چَم زهره عندِي
▪️▪️▪️▪️▪️
امصابِچ امرافگنِي يبقه كِل حياتي
لحَد ما راح انطبُر لحظة صلاتي
ابَد ما أنساچ دوم ابذكرياتي
عله بالِي بكِل وكِت حتّه ابمماتي

يالعزيزه نلقي بالجنّه مِن يلفيني وعدي
يالمشيتي فاطمه بالله انه چَم زهره عندي
▪️▪️▪️▪️▪️
ابو الحسن الوائلي
جـ الاوّل ١٤٤٥هـ

▪️▪️▪️▪️▪️
ماتت بعد موت اُم حسن كل ابتسامه
هيّه السلامه او عاشت ابلايه سلامه

كلشي تألّم من مشت بالدنيه هايه
او مو بس ولدها اتيتّموا كلنا يتامه
▪️▪️▪️▪️▪️
أعظمَ الله أجر صاحب الزمان وأجوركم باستشهاد سيدة نساء العالمين مولاتنا المظلومة الشهيدة فاطمة الزهراء(عليها السلام).

#الفاطمية_الثالثة

▪️اُم البنين صلوات الله عليها
▪️▪️▪️▪️▪️
حرمه تحتار السوالف بيها
او يطمئن الخوف لو صد ليها
يا كلام اللي يفِي
اُم ابو الغيره الوفِي
▪️▪️▪️▪️▪️
كلشي يحتار ابوصُف اُم البنين
الكلشي بيها بالشدايِد يستعين
مره مختلفه او مثلها اتلاگي وين
فدوه ضحّت كل ولدها للحسين

صَح ولدها اربعَه تدريهُم
بس ابو اليمّه تعزّه اعليهُم
وابمحبته تكتفِي
اُم ابو الغيره الوفِي
▪️▪️▪️▪️▪️
ازغير يبقه اشما حِچه بيها الكلام
العفّه من تذكرها توگف إحترام
هالوفيّه ابتضحيَتها للإِمام
نالت اعلى مقدِره واعلى مقام

لجْل الحسين العمُر منطيته
باعَت الدنيَه او رضاه شاريته
الجرح بيها ينشفِي
اُم ابو الغيره الوفِي
▪️▪️▪️▪️▪️
هالعظيمه صارت اُم بيت السور
زوجِته يختارهه حيدر گِدر
سمه هيّه عالِيه تبقه ابفخر
ابلايه شك بس السمه اتخلّف گمر

محّد ايضاهيها اُم عبّاسها
شايِلتها الغيره تاج ابراسها
رمز صارت معرفِي
اُم ابو الغيره الوفِي
▪️▪️▪️▪️▪️
للحميّه او للوفه صارت وطن
او رايه للنخوه ترف ابكل زمن
بامتحان الباري ضامرها اطمئَن
ضحّت ابكلشي ابثواب اُم الحسن

رخصت الغالي التملكه احوالها
ترضه عنها الزهره كل آمالها
كلشي يمها ينّفِي
اُم ابو الغيره الوفِي
▪️▪️▪️▪️▪️
وضّحت موقفها لحسين الولي
ابيوم راد الطلعه ابن حيدر علي
گالت الهُم ولدي اسمعوا ما يلي:
ما اعتبره ابني اليرد سالم الي

گالت الهم لو يريد ادماكم
انطوه يستاهل تره مولاكم
يا گلبها العاطفِي
اُم ابو الغيره الوفِي
▪️▪️▪️▪️▪️
من اجت زينب واهِي ابأصعب وضِع
اتگلها ولدچ سبِع طايح يم سبِع
اتوجّهت للطف واهِي اتنادي ابدمِع
بيكم امغزّر حليبي المنرضِع

عفيه يا ولدي رفعتم راسي
بيكم افخر والأخص عبّاسي
ثبت بيكم موقفِي
اُم ابو الغيره الوفِي
▪️▪️▪️▪️▪️
ماتت او عدله بقت اُم العطاء
ابفضل موقفها البطولي بالفداء
باقِيه ما تنمحِي او تنضح نقاء
ترِف بآفاق السمه مثل اللواء

كلشي يمضي او كل وكِت نلگاهه
خالد اُم الاربعه ذكراهه
اثر لا ما تنخفِي
اُم ابو الغيره الوفِي
▪️▪️▪️▪️▪️
ابو الحسن الوائلي
النجف الاشرف
جـ الاوّل ١٤٤٥هـ

لسان حال ام البنين ع:
▪️▪️▪️▪️▪️
ابعالم النوم
شفت كل احباب گلبي يمي موجودين
ابعالم النوم
شفت عباس او اخوته والعزيز احسين
▪️▪️▪️▪️▪️
ابحلم كل الولد صدّيت يمي اعيوني شافتهم
هلا او ميّة هلا ناديت بالمِنتظره جيّتهم
روحي تطلع اتمنّيت من مرّتني فرگتهم
من يوم المشوا ضلّيت أحسِب يمته رجعتهم

من الفراگ
ادعيت من الله يجيني او يمُر بيّه الموت
من الفراگ
چنْت اناديهم تعالوا واليرِد الصوت
▪️▪️▪️▪️▪️
لا ما حسّبت فد يوم كل احبابي افارگها
او من صار البعُد محتوم صرت لازم اصدّگها
المثلي اشما دمعها ادموم لو يجري يضل حگها
گلبي منچوي او مالوم او روحي العبره تخنگها

فگْد الاحباب
غربه معروف او مثيله ما تصح غربه
فگْد الاحباب
هالمصيبه اهوايه حتماً مؤلمه او صعبه
▪️▪️▪️▪️▪️
گلبي منّه فاض احساس او ضل يتجاره دمْع العين
لمّن باوعت عبّاس بعيوني بلا چفين
او ضلّيت الطُم اعله الراس لمّن باوعِت لحسين
گتله يا اَعز الناس يبني الغالي راسك وين

ما ردت هيچ
ردِت أفرح من اشوفك مو تبچيني
ما ردت هيچ
او راسك الصدري اضُمّه يُمّه بيديني
▪️▪️▪️▪️▪️
احسين الخلّه دمعي ايسيل شاغَت روحي من شفته
سِلب من عندي كل الحيل والمدمع دمه سلته
من كل ذنّي الاصعب حيل مو ذبحه او ضِمه شفته
الحارِگ گلبي دوس الخيل صارت عظمه طاحنته

ويلي يالخيل
الداست احسين ابحقدها او رضرضت عظمه
ويلي يالخيل
امن السحگ ضل ابرجلها قطع من لحمه
▪️▪️▪️▪️▪️
فزّيت ابگلب مرعوب او رد الگلبي كل همّه
من حگها لونها اتذوب واتضَل روحي متألمه
الملگه احبابي روحي اتلوب بس احبابي ما هُمّه
لا عبّاسي من هالصوب لا يمّي ابو اليمّه

اتسائلِت وين
اليمّي چانوا وين راحوا صوتي ناداهُم
اتسائلِت وين
گمت من حلمي وادوّر بلكت الگاهُم
▪️▪️▪️▪️▪️
كل اُم اُمنيتها اتكون لو منها جريب الموت
كل اولادها ايحضرون خاطر يم ولدها اتموت
بجنازتها من يمشون يبچون ابنحيب او صوت
ابچفهم لمّن ايرفعون تحله رفعة التابوت

تخلص الروح
والولِد يمها سويّه من يودعوها
تخلص الروح
او تدري بجنازتها هُمّه اللي يشيعوها
▪️▪️▪️▪️▪️
ابو الحسن الوائلي
جـ الاوّل ١٤٤٥هـ