▪️السيدة زينب عليها السلام
▪️▪️▪️▪️▪️
اِشگد صبرتِي يِعينِچ الله اِبكربلَه
كافلِچ طاح اْو صفيتِي الكافِلَه
أويلاه يابِت علِي
▪️▪️▪️▪️▪️
يِعينِچ الله اِشگد حزِن شفتِي اْو قهر
حاوطِچ يا زينب الهَم والخطر
الليل ظلمَه واِنتي ما عِندِچ گمر
اِبلا مُحامِي حايْره اِبنُص الفلَه
أويلاه يابِت علِي
▪️▪️▪️▪️▪️
يِعينِچ الله يالعقيله اِعله الحزِن
مِن عذابه اْو ضيمَه گلبچ منطعِن
يالعقيله اْو مِن جراحاتَه يِون
واِشكثُر يا زينب اِجروح اِمتلَه
أويلاه يابِت علِي
▪️▪️▪️▪️▪️
يِعينِچ الله اِعله المواجِع والصبُر
اِشحالِچ اْو ريتِچ بُقَت تِشتَم جمُر
حيلِچ اِنهَد مِن وگَع حامِي الخدُر
عافِچ الچنتِي معاه اِمدلله
أويلاه يابِت علِي
▪️▪️▪️▪️▪️
يِعينِچ الله يالعزيزه اِعله الجره
شِفتِي اخوچ اِحسين نايِم عالثره
اِگبال عينِچ شِفتِي گطعوا منحره
اْو دمعتِچ يَم جِثتَه ضلَّت سايِلَه
أويلاه يابِت علِي
▪️▪️▪️▪️▪️
يِعينِچ الله يالدمَه دمعِچ هِمَل
شِفتِي فوگ الكاع مصروعه الأهَل
وحدِچ انتِي اْو ضعنِچ اِبلا حامِي ضَل
حايِره اِبهيمه اْو بُقيتِي مِعولَه
أويلاه يابِت علِي
▪️▪️▪️▪️▪️
يِعينِچ الله اِشگد مواجِع مرِّتِچ
اكبر امْن الطَف يزينَب دمعتِچ
عالترايِب طرحه ولدِچ واِخوتِچ
كلها فُوگ الگاع اهْل المرجله
أويلاه يابِت علِي
▪️▪️▪️▪️▪️
يِعينِچ الله ياللي گلبِچ ما سِلَم
ياللي كِل حيلِچ امْن الصار اِنهِدَم
نِسوه ما عِدكُم مُحامِي اْو لا خِيَم
واِنتي يا زينب كفلتِي العايِلَه
أويلاه يابِت علِي
▪️▪️▪️▪️▪️
ابو الحسن الوائلي
١٤٤٥هـ

مولاي #يابقية_الله
لَيْتَ شِعْري اَيْنَ اسْتَقَرَّتْ بِكَ النَّوى
بَلْ اَيُّ اَرْض تُقِلُّكَ اَوْ ثَرى
اَبِرَضْوى اَوْ غَيْرِها اَمْ ذي طُوى
عَزيزٌ عَلَيَّ اَنْ اَرَى الْخَلْقَ وَلا تُرى
▪️▪️▪️▪️▪️
يِعينَك الله بهالليالي المُفجِعه
يِعينَك الله ياللي عينَك دامِعه
مُو سهِل گلبَك عذابَه
تبچِي للطَف اْو مُصابَه يِعينَك الله
▪️▪️▪️▪️▪️
السَلام اِعليْك يامَن غايِب اِوياك السَلام
ياللي مِن الطَف دليلَك مِنرمِي بِيْه السِهام
اِشحالَك اِبهاي الليالي يِعينَك الله يا إمام
سيِّدِي ما تحچِي لاكِن دمعَة اِعيُونَك كلام

ساكِت اِنته سيِّدي اْو دمعَك حِچَه
ساكِت اِنته بَس شفِت گلبَك بِچَه
گلبَك ايزيْد اِنتحابَه
تبچِي للطَف اْو مُصابَه يِعينَك الله
▪️▪️▪️▪️▪️
اِبعينك اِبهاي الليالي ينفتِح باب الطفوف
اْو كل تفاصيله الاليمه ابناظِرك هِيَّه تطُوف
اِحنه واصِل جزء منها اِلنه والمدمَع ذروف
اِشحالك اِنته يابُو صالِح كِل هضُم بيها تشُوف

اِبوسَط عينَك كِل مُصايِب كربله
اِبوسَط عينَك حزِن هاي المُعضِله
فاتِح اِبعيناك بابَه
تبچِي للطَف اْو مُصابَه يِعينَك الله
▪️▪️▪️▪️▪️
تارسه اِعيونَك يمهدي الحسره والهم والعذاب
سيَّدي اْو هاي الليالي يمتليك الاضطراب
اِبعين گلبي گمْت اشوفك تنحب الهذا المصاب
من طفوف الهم يمهدي غافي بيك الانتحاب

بِيك ساكِن يابُو صالِح چَم سهم
بِيك ساكِن سيِّدي كِل الالم
گلبَك اِشكَم سهَم صابَه
تبچِي للطَف اْو مُصابَه يِعينَك الله
▪️▪️▪️▪️▪️
دمعة اعيونك حزينه عالوجن حمره تسيل
تِسمع الميمون بذنك يعتلِي مِنَّه الصهيل
رجع مَلوي السرِج حاسِر للمخيَّم بالعويل
تِسمعه اينادي الظليمه طاح ابن حيدر قتيل

اِبحزنه يِصهِل اِتسِمعه يا راعِي الامُر
اِبحزنه يِصهِل اْو جاب دمَّه للخدُر
شافَن الدَم اْو خِضابَه
تبچِي للطَف اْو مُصابَه يِعينَك الله
▪️▪️▪️▪️▪️
اِتشوف عمَّاتك يمهدي ابكربله ماليها ضيم
والخيام اِچفوف اميَّه حارگيهِن عالحريم
اِيشِمَّن الدُخَّان گامن بعد ما مات النسيم
چم طفِل عينك تشوفه ضايِع او بالبر يهيم

حيْل صعبه اِتشُوف خِدرَك ينسبِي
حيْل صعبه سيِّدي خدْر النبِي
يا وسَف هِتكوا حِجابَه
تبچِي للطَف اْو مُصابَه يِعينَك الله
▪️▪️▪️▪️▪️
اِحساسِي گلِّي بهالليالي اِلك لا ما تِغفه عيْن
لان يا مولاي غافِي اِبناظِرك نحْر الحُسيْن
لمَّن اِتغمُّض تشوفه اِبحجر مصيُوب الجَبيْن
سابِح اِبدَم المنيَّه اْو عالارض دامِي اْو طعيْن

اِتشُوف جدَّك عالتراب اِبلا دفِن
اِتشُوف جدَّك عظُم صدره منطحِن
اْو مِنَّه مسلُوبَه ثِيابَه
تبچِي للطَف اْو مُصابَه يِعينَك الله
▪️▪️▪️▪️▪️
گلبك امْن الطف يمهدي حقَّه لو ما يستريح
سيِّدي اْو معذور اِنته لو دمَه دمعك يطيح
ابو فاضل عالشريعه عنده امانه ياجريح
رايِته اْو مكتوب يمها "يالثارات الذبيح"

يَمتَه ثارَك كلشِي ناداك اِبهضُم
يَمتَه ثارَك سيِّدي زاد الظلُم
اِنهض اْو إنهي الضبابَه
تبچِي للطَف اْو مُصابَه يِعينَك الله
▪️▪️▪️▪️▪️
ابو الحسن الوائلِي
١٤٤٥هـ

▪️السيدة زينب عليها السلام
▪️▪️▪️▪️▪️
صَدري مخنُوگ اْو دمعِي همَّال
وحدِي عالنُوگ اِبلايَه كفَّال
الغُربَه يمِّي اِهواي
اْو لا ولي ويَّاي
▪️▪️▪️▪️▪️
يِصعَب وضعِي حِيْل
اْو زاد الهَم والوِيْل
شافَت عيْنِي احزان
خلَّت دمعِي اِيسِيْل
مِنِّي اِنهَد الحِيْل
محَّد حزنِي اِيشِيْل
اِنهارِي يِحنِي الروح
اْو جارِح گلبِي الليْل

اِبمدمعِي الحار ليلي أسهَر
والجره اْو صار بِيَّه يِقهر
ما گِطَع مَبچاي
اْو لا ولي ويَّاي
▪️▪️▪️▪️▪️
ضَل گلبِي مجمُور
والخاطِر مكسُور
واِهوايَه اِتأذيْت
مِن فِعلَة عاشُور
بِيَّه الهَم اِيدور
مات اِبعينِي النُور
اْو روحِي الما تِرتاح
فُگدَت عيْن اْو سُور

سافر الحيْل اْو حزنِي ما راح
وحدِي يا ويْل اْو چَم علَم طاح
ماكو كِل حَمَّاي
اْو لا ولي ويَّاي
▪️▪️▪️▪️▪️
المُوتي اِشگَد نادِيْت
ياخِذنِي اْو ملِّيْت
لو طاح العامُود
كُونَه اِيطيح البِيت
ويَّه الهَم شبِّيْت
ما يُوم اِرتاحِيْت
مِن بعْد اهلِي اليُوم
اِبلا حارِس ضلِّيْت

مِن الدموع حمره عينِي
اْو گلبِي موجُوع مِن ونيْنِي
حايِره اِبلا رَاي
اْو لا ولي ويَّاي
▪️▪️▪️▪️▪️
تجرِي اِدمُوع العيْن
فُوگ الخَد نهريْن
اِجروح البِيَّه اِهواي
مُو واحِد واِثنيْن
بَس باصعَب جرحيْن
ضَل جارحنِي البِيْن
مِن مات العبَّاس
اْو لمَّن مات اِحسيْن

حزنِي ما راح بِيِّه يحدِي
والكِفَل طاح واني وحدِي
ابقَه بين اِعداي
اْو لا ولي ويَّاي
▪️▪️▪️▪️▪️
اِبگلبي اِهواي اِجروح
اْو كِل حيلِي مطروح
چَم موقِف بِي مُوت
عَن عينِي مَيْروح
بِيَّه احزانِي اِتفُوح
ما مگطوع النُوح
دمعِي امْن العينيْن
فُوگ الخَد مَسفُوح

جرحِي مِلتام امْن المصايب
اْو مِن الالام گلبِي ذايب
والقهَر حَدَّاي
اْو لا ولي ويَّاي
▪️▪️▪️▪️▪️
شافَت عينِي اِهمُوم
لا ما شافَت نُوم
مِن كِل اللي صار
گلبِي ضَل ملچُوم
يا جرحِي المالُوم
يالِمنِي اِبكِل يُوم
ما يِشفَه اْو مَيْطيب
راح ايْضَل للدُوم

چم ولِي راح اْو ضَيِّعوني
اصفگ الراح عالجفوني
يا قهَر دِنياي
اْو لا ولي ويَّاي
▪️▪️▪️▪️▪️
اِبضلِّي جرحِي اِيْبان
مِن بعْد الوليان
خَلَّوا دمعِي اِيسيْل
اِشگد راحولي اِحنان
اِبروحي اِشگَد احزان
اْو بِيها ضَل نيشان
يا گلبِي الملهُوف
لاحبابِي عطشان

بِيَّه الصواب اْو جرحِي دامِي
اْو لجْل الاحباب گلبِي ضامِي
آ يَجْرح المَاي
اْو لا ولي ويَّاي
▪️▪️▪️▪️▪️
ابو الحسن الوائلي
١٤٤٥هـ

▪️بين السيدة زينب وكفيلها ابا الفضل العباس عليهما السلام
▪️▪️▪️▪️▪️
يبُو فاضِل يبُو فاضِل
عفتنِي والدمِع هامِل يعباس
عليَه اِلحگ يبُو الغيره
تره اختَك ضلّت اِبحيره يعباس
▪️▪️▪️▪️▪️
اني زينَب راسِي مِن الشِفتَه شيَّب
وضعِي ياخويَه وحَگّك حيْل يِصعَب
گلبي مِن حرْگ المُخيَّم باقِي يِلهَب
يابُو فاضِل گوم شُوف اِشحال زينَب

انه اْو ليلِي اْو عِده يمِّي
وحيده اْو مُو سهِل همّي يويلاه
ردِت واحِد الِي يِفزع
يجينِي واگطَع المَدمَع يعباس
▪️▪️▪️▪️▪️
غربه يَمَّي اْو ليل شامِت واِعتنيتَك
اْو گاع حمره مثِل دمعِي مِن بچيتَك
بالجثَث ضلِّيْت ادورَك ما لگيتَك
عطرك الدلَّانِي بِمچانَك واجيتَك

مشيْت اْو حيرتِي اِويايَه
اِعله عطْر الخوّه ممشايَه بالاحساس
لگيتَك وانِي مذهولَه
جسَد مرمِي على طولَه يعباس
▪️▪️▪️▪️▪️
اِبطيحِتَك گلبِي يبُو فاضِل تأثَّر
والدمِع مِن عينِي يجري اِبلون الاحمَر
گبُل لا أنوي اصيحَك چنِت تحضَر
هسّه صِحتَك والصده بَس التكرَّر

يخُو زينب تره زينب
بقت يابُو الفضِل تنحَب وسَط خُوف
يضَي عينِي عمَت عينِي
وسَف وحدِي تخلّينِي يعباس
▪️▪️▪️▪️▪️
جيتَك اِبهَمِّي الترَس روحِي أخبرك
جِسمَك اِبلا راس اشُوفَه اْو باقِي نحرك
چنِت مِن صدرِي تشيل اِهمومي انُظرك
واني اِجيْت اِبچفِّي اشيْل اِسهام صدرك

چنِت بهمُومِي تِدفعها
واجيْت اِسهامَك اشلعها بالايديْن
بقيْت اِبحيره مِتوترَه
اْو عله الخَد اسچِب العبره يعباس
▪️▪️▪️▪️▪️
روحِي من بعدَك يبُو فاضِل حزينَه
كلشِي يسكِت بَس يِضل گلبِي اِبونينَه
عگب عينَك خويَه يالبيْك اِحتمينَه
الغرُب صارت للأسَف تحمِي الضعينَه

صدِگ يا كافِل اِضعونِي
الغرُب بعدَك يِحرسُونِي صدِگ هاي
الرعُب حاوطنِي والدهشَه
يخويَه اْو وحشِتَك وحشَه يعباس
▪️▪️▪️▪️▪️
راح اضَل يمَّك يخَي بَس هالمسيَّه
اْو مِن يطُر الفجُر راح امشِي سبيَّه
اِفتَح اِعيونَك اْو شُوف اِشصار بِيَّه
اْو روح ابُويَه ينكسُر گلبَك عليَّه

وحَگّك لو ترِد تحيَه
تمُوت اِبحزنَك اِعليَه عله الحال
يخويَه اْو داعة اِعيُونَك
غريبه زينب اِبدُونَك يعباس
▪️▪️▪️▪️▪️
الليل اشُوفَه اِبلا گمر يِجرح ظلامَه
واني ما مِتعودَه مكسوره وانامَه
منكسُر جنحِي يخَي مثْل الحمامَه
مِن وداعَك خويَه ودَّعْت السلامَه

اِبوداعَك زينبَك حارت
يخيمتها اْو غفُل طارت الف حيف
ازيدك خويَه بونينِي
الزلِم مِتحزمَه تسبينِي يعباس
▪️▪️▪️▪️▪️
ابو الحسن الوائلي
١٤٤٥هـ

▪️في ابا الفضل العباس صلوات الله عليه
▪️▪️▪️▪️▪️
يالبِيْن اِخيامَك عامُود
يا مَن طُولَك فَي مَمدُود
يا نهْر اْو شايْلَّك جُود
يا عباس
▪️▪️▪️▪️▪️
بالطَف زرعْت البذِر
خضَّر وفَه لِسنيْن
ياللي چنِت للأخُو
مثْل الرمِش للعيْن
واگف عمَد للخيْم
اْو واگف ظهر لِحسيْن
چنَّك فِقار اْو وگف
بِچفُوف ابو السِبطيْن

يا مَن ما فِكره التِحويْك
يِرتاح اِحسيْن الطاريْك
غِيرة حيدر دارَت بيْك
يا عباس
▪️▪️▪️▪️▪️
يا نسخه مِن حيدره
اِبكل الوفه موصُوف
يا كعبه چان الوفَه
مُحرِم عليْك اِيطُوف
حَگ الفعِل دَگ صدر
اْو حَگ الأخوَّه اِچفوف
يالصارِمَك مِن رعَد
گصَّت لِسنها اِسيُوف

ضِدِّيْن اِبروحَك تِندار
يالجامِعهِن ماي اْو نار
يالكِلَّك غِيره اْو إيثار
يا عباس
▪️▪️▪️▪️▪️
يا مَن نشُوف الگمر
مِن وجهه ياخِذ نُور
يا مَن چنِت بالخِيْم
واگف عمُود اْو سُور
ياهُو مثيلَك ضِمَه
اْو بِيدينَه عشْر اِبحُور
عزمَك يِرجْف الرعُب
اْو مِنَّك بُقَه مذعُور

يا فارِس واضِح تِنشاف
وحدَك واِگبالَك آلاف
اْو مِنَّك صارت كِلها اِتخاف
يا عباس
▪️▪️▪️▪️▪️
وعْد الوفَه اِبكربله
يابُو الفضِل وفِّيْت
يالثابِت اِبغيرِتَك
اْو فُوگ العِلُو اِتعلِّيْت
لمَّن وفيْت الوعَد
عايِش دهر ضلِّيْت
للخوَّه عُمرَك فِده
اْو عيْن اْو إديْن اِنطيْت

طاحَت چَفِّيْنَك والعيْن
بِيها النبلَه لجْل اِحسيْن
مِن دمَّك وفِّيْت الديْن
يا عباس
▪️▪️▪️▪️▪️
الخوَّه مُو بَس حچِي
موقِف ثگيْل اِتريد
واِبكربلَه موقِفَك
موقِف بطَل صِنديد
السبعين الف مِن وصَل
طولَك صفوا تبدِيد
اِگبالَك قليْل العدَد
واِنته البُقيت اِتزيد

يالواگف بِيْن العِدوان
تِنظُر واحِدهُم شَيطان
واِنته اِبنصهُم چِنْت اِنسان
يا عباس
▪️▪️▪️▪️▪️
يمخلِّي مِن طيحِتَك
بِين الخِيْم آلام
شِبْه الزلِم مِن طحِت
صاروا يوسفَه اِزلام
هامَك يِصيبَه العمَد
اْو ضَل مِرتفِعلَك هَام
صدرَك مُضيف الحسَن
اْو چانَت ضِيوفَه اِسهام

بالطَف واگف غيره اْو سِيْف
اْو كِل جرْح اللي صابَك ضِيْف
نار اِبگلبَك تِچوي الصِيْف
يا عباس
▪️▪️▪️▪️▪️
لمَّن وصَلْت النهر
يا ضَامِي يا روَّاي
اِبعينَك تشُوف النهر
لاحَه العطَش مولاي
مدِّيْت اِدينَك ردِت
مِنهِن تِشربَه الماي
ضَل يِجري طُول الزمَن
ماي الفُرات اِهواي

مِن فكَّر يِتعدَّه اِعليْك
ذلِّيْتَه اِبشمرَة اِيديْك
اْو ضَل اِبكِل وكتَه اِيْحيِّك
يا عباس
▪️▪️▪️▪️▪️
ابو الحسن الوائلي
١٤٤٥هـ

▪️في استهاض العقيلة زينب ع لابيها امير المؤمنين علي ع
▪️▪️▪️▪️▪️
يا بويه گلبِي صار عطَّاب
واِتحيَّرِت يا داحِيْ الباب
ضلَّيت اصِك الناب عالناب
واحباب گلبي كلها غِيَّاب
مِن حزنِي يا حيْد الگلُب ذاب
اْو مِن آل طالِب ماكو طلَّاب
شُوف الزمان اِشودَّه واِشجاب
خلَّانِي وحدِي اِبلايَه الاحباب
ما ينغلِگ مِن الحزِن باب
واِصوابِي ما صَح مِثلَه اِصواب
دوهنِّي يا بُويَه هالمْصاب
شُوف الدهر فُوگي شنُو صَاب
مذبوحَه اخوتِي فُوگ التراب
والنار وجَّت وسْط الاطناب
بنتَك الخدري چان يِنهاب
تاليها ابگَه بِيْن الاجناب
▪️▪️▪️▪️▪️
ابو الحسن الوائلي
١٤٤٥هـ

▪️كأنّي بمولاتي زينب عليها السلام تخاطِب والدها امير المؤمنين عليه السلام في الخرابه
▪️▪️▪️▪️▪️
زينب وين يابُو اِحسيْن من المَر عليها
ابلايه اخوان بالاحزان شِمَّات التجيها
شفْت القهَر گلبي اِنكسر
▪️▪️▪️▪️▪️
يابُو الحميَه زينب اني الشافَت اخطار
مخنوگ صدري واِبدليلي تستعُر نار
اِنته يبُو الحملَه يحيدر حامِيْ الجار
اِبناتَك بقت تالِي يبوهِن يَم الاشرار

لو مهمُوم صاحَك يُوم تنهِي معضلاتَه
هِسّه اِشصار حامِي الجار ما يِدرِك بناتَه
هِنّه اِبخطَر گلبِي اِنكسر
▪️▪️▪️▪️▪️
المَدمَع عله اِخدودي يحيدر صار نيشان
اْو مثْل الجبال اِبروحِي نزلت كِل الاحزان
تدرِي اِشجره اِبحالِي يبويَه عگْب الاخوان
اِيباوع عله خدري اْو عليَه ياهُو الچان

هذا الحال اصعَب حال والغربَه تناظِر
يَم اِعداي همّه اِهواي وانِي اِبلا مُناصِر
وين المفَر گلبِي اِنكسر
▪️▪️▪️▪️▪️
شرْد احچِي عَن ضيمِي علِي يا داحِيْ الباب
اِمشرّع بقَه اِعليَّه اِشيِسدّه باب المْصاب
اِصواب اللي مَر بِيَه ابَد ما مثلَه اِصواب
مِن ضيمَه يابُو الحملَه شابَت حتّه الاهداب

اِهواي اِجروح وسْط الروح شلْت اْو بيها تعبِي
اْو مِن بلواي عانَه اِهواي مِن الشافَه گلبِي
امْن البِيَه مَر گلبِي اِنكسر
▪️▪️▪️▪️▪️
دهري يصُب احزانَه فوگِي يا علِي گام
ما يِرحَم اِبحالِي اْو عليَه اِيجيْب الالام
طَف كربله هَدنِي اْو رمانِي بويَه بِاسهام
امْن الخيمَه للتَل اِكبرِت بويَه مئة عام

بويَه اِهناك بالطَف ذاك ضَل يِجرحنِي كلشِي
اِشگد اِهمُوم ذاك اليُوم شيّب حتّه رمشِي
مُر اْو أمَر گلبِي اِنكسر
▪️▪️▪️▪️▪️
مِن عينِي بالعاشِر بقَه يجرِي الدمِع سيْل
اْو ظلمَه اِبوسَط عينِي نهاره اْو يِشبَه الليْل
بُويَه الكسَر ظهري واخَذ مِن عندِي كِل حيْل
مفروش جسْم اِحسيْن اشُوفَه اْو داسِتَه الخيْل

مِن ذبحوه راسَه اخذوه اْو سلبوها العِمامَه
اِبخيْل اْو ناس جسمَه اِنداس واسمَع طَگ عِظامَه
جسمَه اِنتشَر گلبِي اِنكسَر
▪️▪️▪️▪️▪️
يا بويَه مِن ضيْم اللي مرنِي گلبِي محروگ
وحدِي عگُب ذيْچ الكفاله أركَب النوگ
مستغربَه الناس اْو علَيْ مفتوحَه الْحلوگ
حگهُم منُو اِيصدّگها زينَب توگف اِبسُوگ

الريْح الهاب چان يِهاب لو مَر چان بِيَه
وين اْو وين هسّه العين كلها اِتصِد عليَه
اِبحكْم الدهَر گلبِي اِنكسَر
▪️▪️▪️▪️▪️
بَس الله عدنَه والصبُر بِينَه بقَه اِيميْد
اْو درْب السبِي هذا النگطعَه اِطويْل واِبعيْد
اِبسكتَه اجُر حسراتِي واصفِج ايْد بالإيْد
اْو عگْب المعزّه بالخرابَه اِنبات يا حيْد

يابُو اِتراب فُوگ اِتراب گعدَن كِل بناتَك
اِشگد نِنخاك اِشگد ردناك واِنلُوذ اِبعباتَك
اِشگَد شفنَه شَر گلبِي اِنكسَر
▪️▪️▪️▪️▪️
ابو الحسن الوائلي
ذو الحجّة ١٤٤٤هـ

▪️مخاطبة العقيلة زينب ع لابيها امير المؤمنين علي ع
▪️▪️▪️▪️▪️
ما عندي والي اْو ماكو احَّد
بويه الخدر ضاع اْو تفرهَد
حشّمْت محَّد فزع محَّد
مِن اِخوتِي محّد إلِي رَد
بالحومه واحدهُم تِمدَّد
لبْن امّي رحْت اْو حزنِي يِشتَد
شِفته عله التربه امْوَسَّد
اِگباله الشمِر طگنِي تِعمَّد
ردلَه يِرفسَه اْو فوگه يِصعَد
يطبر ابراسه اْو سيفه يِرتَد
ابمهلَه گِطَع نحره اْو تِسَيَّد
اِجروح البجِسمَه ياعلي اِشگد
وابذبحَه احِس گلبِي اِتمرَّد
هذا اللي شِفته اْو ربّي يِشهَد
ما صَح مثِل حزني يالاوحَد
ضيم اللي مرنِي لا مَيِنعَد
اْو جمْر الگلُب هيهات يبرَد
ما يِطفه جمرِي لا مَيِخمَد
حتّه الهوه ياذيني وازيَد
حمره تسيل اِدموعي عالخَد
اْو باب الحزِن ما ضِنَّه يِنسَد
▪️▪️▪️▪️▪️
ابو الحسن الوائلي
١٤٤٥هـ

▪️استشهاد الامام السجاد عليه السلام
▪️▪️▪️▪️▪️
الله يِعينَك عالجره سيِّدي اْو مولاي
گلبَك مِن اِجروحَه صفَه متألِّم اِهواي
على الطف والحزِن يبُو الباقِر توِن
▪️▪️▪️▪️▪️
يهالشايِل حزِن ما شالِتَه الدِنيَه
اِبألم جمرتها روحَك هايَه مَچويَّه
اِذا چَم لحظه عينَك ما بِچَت هِيَّه
يضَل گلبَك ابَد ما يِنگطِع بَچيَه

اِبعينَك صور مِن الطفُوف
اِبكل ثانيَه صوره تشُوف
اِبروحَك مواجِع كربله عاشَت يمجروح
واِبصفنتَك جسْم الابُو اِتباوعلَه مطروح
دليلك يِنطعِن يبُو الباقِر توِن
▪️▪️▪️▪️▪️
يعايِش كربله اْو مرسومَه بعيونَك
اِشلونَك وانتَه بَس الفاجِعه لونَك
اِبعبرتَك مختنِگ كل ما يشُوفُونَك
الله يكون يابُو الباقِر اِبعُونَك

اِسنينَك عشِت هَم كربلاء
اِبگلبَك طبَع ذاك العناء
كِل المواقِف حاضِره اْو مرسومَه بالعين
ونّك ابَد ما يِنگطِع لِمصاب الحسيْن
اِنگلب لون الجفِن يبُو الباقِر توِن
▪️▪️▪️▪️▪️
جرِح عاشِر مُحرَّم مو سهِل حِملَه
وسَط روحَك سِكن يا سيِّدي اِبثگلَه
جروحَك يا إمامِي اِهوايَه مُو سهلَه
اِذا غمّضِت طَف الفاجِعه اِتصدلَه

اِبدمعَك نعَم تبدِي الصباح
اِشگد اذِّتَك ذِيچ الجراح
تبدِي نهارك مِن يجِي مِن سيْل الدموع
اْو ليلك يحِن يا سيِّدي اْو دمعَك ممگطوع
دمُوعَك عالوجِن يبُو الباقِر توِن
▪️▪️▪️▪️▪️
عشِت بِسنينَك اِبگلبَك اكُو صدعَه
مو وحدَك واهِي اِمخاويتَك الدمعَه
صفنتَك بيها منظَر گلبَك اِيفِجعَه
ابوك اِعله التراب اْو ينسحِگ ضلعَه

فُوگ الترُب ابْن البتُول
خيْل اْو زلِم فُوگه تجُول
مِن عاشِر اِمحرّم لحَد كل هاي الايام
بِذنَك ترِن اْو تنسمِع كسرات العظام
اِعله عظمَه المنطحِن يبُو الباقِر توِن
▪️▪️▪️▪️▪️
يمَن يُوم الدفِن كِل حيلَك اِيهِدّه
اريد اسأل سؤالي الگلبَك اِيمُردَه
عاده الميّت اِيوسدوه على خدّه
اِبيا حال الابُو اِتوسّد وسَط لحده؟

اِبدفْن الابُو گلبَك فجيْع
صدره صفَه قبْر الرضيْع
يا سيِّدي اِبيُوم الدفِن بچيْت الحْجار
اِبنفْس اللحد قبْر الابو اْو قبْر الابِن صار
بقيت امْن الدفِن يبُو الباقِر توِن
▪️▪️▪️▪️▪️
لوَن جِسمَك يدِفنُونه اْو مشَت روحَك
تضَل ما تندفِن يا سيِّدي اِجروحَك
ابَد مالُومَك اِعله اِدمُوعَك اْو نوحَك
السبِي اْو حرْگ المُخيَّم هادِم اِصروحَك

اِبرغْم المرض تمشِي اِبسَبيْك
اْو طول الدرُب مچتوفَه اِديْك
موقِف يبُو الباقِر نعَم بِجروحَه أذّاك
تمشِي اويَه چتّال الابُو درْب السبِي ذاك
مثِل كسرة غصِن يبُو الباقِر توِن
▪️▪️▪️▪️▪️
مصاب الطف ثگيل اْو دمعَك ايكِتبَه
اليُوم اللي بلا دمعَات مَتحِسبَه
تنادي يا حُسيْن اْو كِل مسَه اِتنِدبَه
النحِب يِبقه لوَن گلبَك گضَه نحبَه

كلما تجِي ليله اْو تحيْن
اِتنادِي اِبقهَر بُويَه حُسيْن
بيك المواجِع والالم والفاجِعه اِتحوط
حتّه شرابك والاكِل بالدمعَه مخلوط
لبُو اليِمّه تحِن يبُو الباقِر توِن
▪️▪️▪️▪️▪️
ابو الحسن الوائلي
١٤٤٥هـ

السيدة زينب عليها السلام
▪️▪️▪️▪️▪️
راحت اميره مو ذليله
للشام بت حامي دخيله
▪️▪️▪️▪️▪️
يا ناس لازم نفتهم
موضوعها الراحت أسيره
من گِطعت اِدروب السبي
چانت فقط هيَه الچبيره
بِنت النبِي الجيْش الكفُر
لمَّن مشَت جابَت مصيره
ايذلَّوها رادوا ما دروا
اِبكِل حال بِت حيدر اميره

مهيوبَه مِن الله العقيله
راحت اميره مو ذليله
▪️▪️▪️▪️▪️
راحت اميره اِموقَّره
تحمِل تفاصِيل الزچيَّه
اْو كِل كلمَه مِنها تنلفُظ
لافُظها چَن حامِي الحميَّه
مَهيوبه زينب عالهزِل
كعبه اْو علَه الناگه سبيَّه
لو شاهِدت روس الأهَل
تفتخُر هاي الهاشميَّه

تنظُر عله الروس الثگيله
راحت اميره مو ذليله
▪️▪️▪️▪️▪️
ثِبتَت أميرَة كربله
اِبهذا الدرُب يِصبَح نصُرها
صَح تمشِي مكسورة گلُب
بَس السبِي لا ما كسرها
جيش ال اُميَّه بالدرُب
لا ماگِدر يِثنِي صبُرها
هوَّه اليِربِّيها علِي
مَتذِلها هالدنيْه اِبكبُرها

هاي الشخصُها لا مثيله
راحت اميره مو ذليله
▪️▪️▪️▪️▪️
شِيذِلها ما تِنذَل أبَد
بِنت البراسَه الدنيَه تحلِف
والرايَه مِن طاحَت نعَم
عالناگه زينب ضلَّت اِترِف
عطشانَه بَس هِيَّه نهَر
جاري يِضَل اِبغيره مَيجِف
مَچتوفَه بِت حامِي الحِمَه
اْو دولة اُميَّه مِنها ترجِف

كلشِي العزِمها ينحنيله
راحت اميره مو ذليله
▪️▪️▪️▪️▪️
بعْد اِنتهاء الطَف نعَم
اهْل الوفَه طاحوا ضحايَه
واِهنانَه زينَب بِت علِي
اَعلِنَت ثوره اِبلا نِهايَه
صاحَت ينسوه اِتحزِّمَن
ما نِنهزِم واِحنه البِدايَه
چان الشِعار العلنِتَه
أن "يالثارات السبايه"

طُول الدرُب چانت تشيله
راحت اميره مو ذليله
▪️▪️▪️▪️▪️
مهيوبَه بِنت المُرتضى
نسخَه كأنها امْن الصميدَه
مقتنعَه تمشِي اِبكِل نظَر
اِبهذا السبِي عِدها عقيدَه
اِتكمْل الرساله بِهالدرُب
عگْب الذي گِطعوا وريدَه
واِخوتها مِن فُوگ الرمِح
اِيحرسوها هِيَّه مُو وحيدَه

حرستها كِل روس القبيله
راحت اميره مو ذليله
▪️▪️▪️▪️▪️
مِن كربله القصْر الشرِك
راحَت أميره اِبكِل كرامَه
اِشمحلاهه هِيَّه اْو عالهزِل
طُول الدرُب تنگط سلامَه
مِن بعْد اخوها المنذبِح
هِيَّه الخذَت تاج الزعامَه
الناس السِبتها البِت علِي
خلَّتها تشعُر بالندامَه

والجيْش مِن عدها يويله
راحت اميره مو ذليله
▪️▪️▪️▪️▪️
ابو الحسن الوائلي
١٤٤٥هـ

▪️المصيبة: زينب عليها السلام في قصر يزيد لعنه الله

قال الراوي: وأُدخل ثقل الحسين عليه السلام ونساؤه ومن تخلّف من أهله على يزيد وهم مقرَّنون في الحبال
▪️▪️▪️▪️▪️
اِدخلْت القصُر واِمجَمِّعَه الناس
اِتباوِعلِي صارت كِل الاجناس
واني وحيْده اِبلايَه حُرّاس
النظرات صعبَه اْو گلبِي حسَّاس
كِل ما تصِدلِي اِعيُون الارجاس
تِنظُر اِعيُوني الراس عبَّاس
سكته اِبدمعتِي اشكِي للراس
اْو مخنوگه صارت حتّه الانفاس
بنت الكتاب اِشلون تنقاس
توگف اِگبال اللازم الكاس
▪️▪️▪️▪️▪️
بَس هاي ما چانت عله البال
ادخِل اِبيُوم اِبقصْر الانذال
اِبنات الوصِي اْو ربّات الحْجال
عالهزِل نمشِي اْو مامِش اِضلال
كلّش صعُب يا ناس هالحال
ما عِندي والي اْو ماكُو كفّال
واصعَب اِحچايَه اِگبالي تِنگال :
زينب اِجت هيَه والعْيال
▪️▪️▪️▪️▪️
ابو الحسن الوائلي
١٤٤٥هـ

▪️مولاتِي زينب عليها السلام في قصر الملعون يزيد
▪️▪️▪️▪️▪️
انَه زينَب.. انَه الحُرَّه الأميره
انَه زينَب.. انَه هاي الچبيره
صُفَه اِسلاِحِي الصبُر
أذِلَّك وانتصُر
▪️▪️▪️▪️▪️
انِي بِت علِي الكرَّار واُمِّي فاطِمَه الزهرَه
انِي اِخْت الگمَر واِحسيْن انِي زينَب الكُبرَى
غالِب إلنَه اِنسَه اِتشُوف بَس واحِد ولو مرَّه
اِنته اْو زُمرِتَك جوَّاي واحِدكُم يصِح قدرَه

تحِت رجلِي.. دولتَك هايَه كِلها
تحِت رجلِي.. تره هِيَّه واصِلها
تره اِبهذا الأسُر
أذِلَّك وانتصُر
▪️▪️▪️▪️▪️
لا ما تِغلِب اَهْل البِيْت تِغلِبنَه أگول اِنسَه
لتفكّر ولو باِحساس چان اِحساسَك ايْحِسَّه
حيدر بالحروب المُوت يِتسمَّه وانَه نفسَه
كِل صُولاتَه راح اِتشُوف تِتكرَّر معِي هِسَّه

يهالظالِم.. أسِحگه كِل جمِعكُم
يهالظالِم.. اِبعباتِي وحدِي ضِدكُم
اهِز كِل القصُر
أذِلَّك وانتصُر
▪️▪️▪️▪️▪️
تِسمعنِي أريدَك زين كُونَك تحترم قدرَك
ما تِسوه فلِس ولله لا اِنته ولا قصرَك
ما يِحتاج اكلَّك وين يا ظالِم خُلَص عُمرَك
لا ما يِنستِر مفضُوح يَيزيْد النذِل سِرَّك

اِذا أغضَب.. ولا يِنهز كِيانِي
اِذا أغضَب.. أضَيِّعكُم ترانِي
تره اِبجيْش الخدُر
أذِلَّك وانتصُر
▪️▪️▪️▪️▪️
يبْن المَا وراهُم خِير والبِيهُم الشَر اِيمِيْد
جايِبنَه سبايا اِهنا حسبالَك تِذِلنه اِتريْد
خلِّيها اِعلَه بالَك هَاي واِتضَل هِيَّه بالتأكيْد
باحلامَك تِضَل ولله مَيذِلّن بنَات الحيْد

فلا تِگدَر.. تِحرِّك طارِف اِلنَه
فلا تِگدر.. يهالظالِم تذِلنَه
واضَل طُول العمُر
أذِلَّك وانتصُر
▪️▪️▪️▪️▪️
لتضِن الرِسالَه اِتمُوت عالِي يِبقَه راس الديْن
لا ما تنتصِر ولله دوم اِحنه اللي مِنتصرين
صَح بِسيُوفَك العميَات اهلِي كِلها مِنذبحيْن
كلشِي يا يزيد اِيزُول بَس خالِد يضَل اِحسين

يِضَل عالِي.. عزِم أهلِي يَقاتِل
يِضَل عالِي.. اخوي اْو كلشِي زايِل
ندوس اِعله الكفُر
أذِلَّك وانتصُر
▪️▪️▪️▪️▪️
انِي الحاطِمه عالجيْش واِعليكُم أصُب نارِي
اْو غيرَة والدِي الكرّار بِورِيدِي نهَر جارِي
خلّيها اِعله بالَك هاي يالحِقدَك بُقَه سارِي
مِن عِندَك يظالِم راح ياخِذ ثارنَه البارِي

تره باچِر.. عليْك اِبغيرَه نِرعِد
تره باچِر.. مِنْ البارِي مَتشرِد
يظالِم ما تفُر
أذِلَّك وانتصُر
▪️▪️▪️▪️▪️
كل البينه صار اْو دار يَيْزيد اْو بعَد أكثَر
مَيهِمنَه نِضَل عاليْن شِيذِلهُم بنِي حيدَر
مِن اهلِي اگلَّك راح لو تِگطَع ألف منحَر
نِبقَه اِبكل زمان اِشيُوخ واِعله الدِنيْه نِتأمَّر

تره كلشِي.. شريْف اِويانَه يِتبَع
تره كلشِي.. يظالِم إلنَه يِركَع
يِضَل عِندَه الامُر
أذِلَّك وانتصُر
▪️▪️▪️▪️▪️
ابو الحسن الوائلي
ذو الحجَّة ١٤٤٤هـ

▪️المصيبة : في تغسيل السّيدة رقيّة عليها السلام
▪️▪️▪️▪️▪️
«...ورد في بعض الأخبار أنّ المغسّلة عندما كانت تغسّل جسد السيّدة رقيّة عليها السلام ، تركت التغسيل فجأة وتساءلت قائلة : من هو كبير هؤلاء الأسرى؟ فأجابتها السيّدة زينب وقالت : ماذا تريدين؟ قالت المغسّلة : ماذا كان مرض هذه الطفلة حتّى أصبح جسدها هكذا؟ فأجابتها العقيلة عليها السلام : إنّ الطفلة لم تكن مريضة أنّها آثار السياط ، وطعنات كعب الرماح»(١)
▪️▪️▪️▪️▪️
ماهِي مريضَه الطفله لنها
بيدَه الشمِر ورّم بدنها
اْو بالسوط يضربها اِبمتنها
ساعه يرِد يسطُر جفِنها
أي رحمه روحه ماكو منها
اْو يِرتاح اِذا شاهَد حزنها
▪️▪️▪️▪️▪️
وفي خبر(٢) أن المُغسِّلة أول ما رأت العقيلة عليها السلام سألتها :أليس لهذه الطفلة أبْ !؟
أجابَت زينب ع

لو يمها والِدها اْو حضرها
محّد دناهه اْو لا سطرها
فارگها واِزغيره اِبعمُرها
اْو زايِد عله اِبنيتَه قهرها

راح الابُو منها تنظره
اْو مِن غيبِته الهسّه تنطره
ما تدرِي ابوها اِنگطع نحره
والخيل داست فوگ صدره
▪️▪️▪️▪️▪️
ابو الحسن الوائلي

▪️استشهاد الامام الحسن عليه السلام
▪️▪️▪️▪️▪️
اِبمضيف الحموله الضيافَه ضمير
يشيخ الرجوله الوفائَك چبير
عظيم عظيم إمامِي الحسَن
▪️▪️▪️▪️▪️
ها يا حفيد المصطفى يا روحه يا حبيبه
مِن حگّه يِحتار الحچِي باوصافَك الرهيبه
لا مَنخِلق مثلَك بشَر اطباعَه كلها هيبَه
لاچِن وسافَه ظلمتَك دنيانَه يا عجيبه

العمُر كلَّه عِشتَه وفي بالحياة
شريد احچي واِنته عظيم الصفات
شگول شگول إمامِي الحسَن
▪️▪️▪️▪️▪️
عنّك شسولِف والمدِح يَم هيبِتَك تحيَّر
كِل الكلام اِبحضرتَك گدّامَك اِنته يِصغَر
انته الذي اِبهاي الارض ماكو اِبصفاتَه اكثَر
كِل الشرِح يمّك حرف مِن شرحِي اِنته اكبر

كلامِي المسيَه يشُوفَه النظَر
مثِل گطره هيَه اْو تطيح اِبّحر
اكيد اكيد إمامِي الحسَن
▪️▪️▪️▪️▪️
يالمثْل ابوك المرتضى تنگط وفَه اْو كرامَه
مِن مات ابوك اِنته صرِت بعدَه ابو اليتامَه
واضِح تضَل مثْل الشمِس واِتضَل الى القِيامَه
باقِي اْو تشِع مثْل البدُر يضوي اِبوسَط تمامَه

يمَن اِبوفائَك تغطّي الوجود
يضَل كبريائَك بلا كِل حدود
چبير چبير إمامِي الحسَن
▪️▪️▪️▪️▪️
حملاتَك ابكِل معركه كِل صوله تشهَد اِلها
كِلها اِشهِدتلَك يالشهِم اِنته اصبحِت بطلها
بِثلَث حرايِب بيِّنت معنى الشجاعَه كِلها
غيبوا حقائقهِن لأن سيفَك عقَر جملها

اِبثلاثَة حرايِب الكفُر ذابِحه
اعله ذيچ الكتايِب انقره "الفاتِحه"
شجاع شجاع إمامِي الحسَن
▪️▪️▪️▪️▪️
اِيبغضُونَك اِبلا كل سبب بَس البغُض خباثه
يالگلبك اعلَه الذَم أبَد ما يِعلِن اِكتراثه
يالما ترِد المعتنِي ليك اْو طلب إغاثَه
ياللي الكرم ليك اِنتقل مِن الأهَل وراثه

الذي يِعتنيلَك اعله حاجه يجيك
يغالِي اِبقليلَك تعينَه اِديك
كريم كريم إمامِي الحسَن
▪️▪️▪️▪️▪️
عشْت العمُر درّه اِبوكِت مابِي دُرر قليله
يا واحِد اِبلايَه شبَه ماكُو شخُص مثيله
ياللي مقامَك كِل وكِت هالدنيَه تنحنيله
اِبتسميمَك اِنرد الفضِل بايّامَك الطويله

بعد كل رحلتَك بعمرٍ مديد
تسمَّك زوجتَك بامُر مِن يزيد
شهيد شهيد إمامِي الحسَن
▪️▪️▪️▪️▪️
فضلَك يبُو اِمحمّد إلك بالسَم وسافه ردّوه
ذاك التعَب كلّه نِسوا تالي الچبِد يسمّوه
گبْل الطفوف اِبموتِتَك زينب گلبها فجعُوه
اْو ظهر الحُسيْن اِبمقتلك گبْل الشريعه كسروه

رحيلك وجعهُم اْو يزيد العناء
مصابك فِجعهُم گبُل كربلاء
جروح جروح إمامِي الحسَن
▪️▪️▪️▪️▪️
ابو الحسن الوائلي
صفر ١٤٤٥هـ

رقيَه اِيعينها الله اِبهاي حالتها
عله اِفراگ الابُو اِتصبّرها دمعتها
نعَم كلمة "اموت اِعليك" طبقتها
مِن شافت والدها اِبدمّه
بَس هيَه الطبقت هالكلمَه
▪️▪️▪️▪️▪️
ابو الحسن الوائلي

▪️السيدة زينب عليها السلام
▪️▪️▪️▪️▪️
صعبه هواي زينب سبيَه
والعبّاس فوگ الوطيه
▪️▪️▪️▪️▪️
الدهر ما عِنده كل رحمه
عله زينب مواجِع صَب
الدهر راواهه چَم لوعه
يِعين الله گلُب زينَب
الحزِن مِن الزغُر حد مَا
اجه طَف كربله الأصعَب
بقَه اِمرافگها للحُرّه
اْو جمرها منَّه ضَل يِلهَب

شافَت ضيم طيلة عمرها
چَن ترتاح الدنيَه اِبكسرها
مِن اِتنوح بنْت الحميَه
▪️▪️▪️▪️▪️
چبيره زينَب اْو ايضاً
مواجِعها صفَت كبره
عمرها عاشِتَه اِبلوعَه
اْو مِن كسره الى كسره
اِشلون اِحتملت اْو شافَت
اخوها يِنگطع نحره
نصفها الثانِي والغالي
تشُوفَه اَشلاء عالغبره

تصعَب حيل لمّن تناظِر
دوس الناس اْو سحْگ الحوافِر
داسوا فوگ جثتَه الرميَه
▪️▪️▪️▪️▪️
تألَم زينب اِهوايَه
گلبها الله اليْعينَه
مشَت تتعثّر اِبظلمه
لاخوها اللي وفَه اِبدينَه
يويلِي مِن اِجت يمّه
تشُوفَه اِمگطّعَه اِيدينَه
اخوها اللي حِرس حدها
سهَم شافَت وسَط عينَه

صاحَت اه اني الاميره
يا عبّاس صرْت الاسيره
والعدوان تنظُر عليَه
▪️▪️▪️▪️▪️
الف وسفَه اخِت عبّاس
الدهر هيچِي عِمَل بيها
الچانوا بَس اسامِي اِرجال
رجُوله باعوا اِعليها
عگب ذاك الخدِر تالِي
الغرُب صارت تباريها
الضِلها اْو حِسها ما طالِع
الاجَه اْو رايِح يصِد ليها

صاح اِبصوت واِيلوِّح ايده
زينب هاي بنْت الصميده
وايأشرون عالهاشِميَه
▪️▪️▪️▪️▪️
بعَد ذبْح العزيز اِحسيْن
اِنسبَت يا وسفَه للكوفه
الاِجَت هودجها هودَج نور
مشَت عالناگَه مچتوفَه
يِضربوها بِلا رحمَه
اْو يسِبها التِتعَب اِچفوفَه
اِبحزنها تشتكِي للروس
اْو دمعها يِسچِب اِتعوفَه

هذا اِبسُوط ما عِنده رحمَه
اْو ثانِي اِهناك الحيدر يشِتمَه
واِيضحكُون الدمْع السبيَه
▪️▪️▪️▪️▪️
بلا كل غيره يرتاحون
اذا منها تهِل دمعه
اْو يسمعوها حچِي الشِمّات
يخلِّي بالگلُب صدعَه
واحِد يِندس اِبواحِد
اْو حچيهُم زينب اِتسِمعَه
ابوها عِدنه ثار اوياه
نريد اِبزينب اِنرجعه

يعنِي الناس بُغضاً بابوها
لارض الشام زينب سبوها
الثار اخذوه مِن عِدها هيَه
▪️▪️▪️▪️▪️
مشَت مَسبيَه لارض الشام
اْو روس اِخوتهه ويّاها
مشَت هيَه اِبگلُب مكسور
مو مكسوره معناها
قره بيها علِي الكرار
كأن الراد يِقراها
باشاره للسمه تمحِيه
الحاول مرّه يِدناها

زينب هاي رايَه اْو ترفرِف
اْو جيش ايزيد مِن عِدها يِرجِف
بنت الحِيد حرَّه اْو ابيَه
▪️▪️▪️▪️▪️
ابو الحسن الوائلي
صفر ١٤٤٥هـ

▪️في استشهاد الامام الرضا عليه السلام
▪️▪️▪️▪️▪️
يا وارث اِعلوم الهدايَه والتُقاة
انته يحبْل الله الذي بيه النجاة
عالِي دوم عالِي دوم يالرضا
▪️▪️▪️▪️▪️
الك يبْن النِبي ابعَث تحيَه
يثامن حُجّه مِن آل الحميَه
منو مِثلك يبو الروح النقيَه
يالمأدِي الرساله الاحمديَه

شمْس الله انته التبقه مِن بعْد الغرُوب
يا رحمة الباري الإِلك تهوِي القلُوب
عالِي دوم عالِي دوم يالرضا
▪️▪️▪️▪️▪️
جبِت عمرك نعَم تنثُر سلامه
واِجه دورك تحُط تاج الزعامه
العلِم مَوروث الك مِن الإمامه
ازرعِت بيدك نعَم غيره اْو كرامه

عالباطِل ابعِلمَك يهِب ريحَك حطُوم
مِن والِدك واجدادك اورَثْت العلُوم
عالِي دوم عالِي دوم يالرضا
▪️▪️▪️▪️▪️
چنِت كِلَّك وفَه يبْن الأفاضِل
الورِد يِنحط صعُب يَم المناجِل
اِبسلاح العلِم بالضدَّك تقاتِل
اِبوكِت انته الصحيح اْو كلها باطِل

عشْت العمُر شجره اِبوكِت هالدنيَه فُوس
دومَك أنيس انته تضَل لجْل النفُوس
عالِي دوم عالِي دوم يالرضا
▪️▪️▪️▪️▪️
اذا جالك شخُص رايِد يِناضِر
يشُوفَك كِل وكِت مولانه حاضِر
اذا تبطِل دعُوته بالمُباشِر
يِگلّك ها ، اعود اِعليك باچِر

محّد گدرلك وانته الاوّل عالجميع
انته الحقيقه الباطِل اِگبالك يضيع
عالِي دوم عالِي دوم يالرضا
▪️▪️▪️▪️▪️
اِبزمانك سيِّدي اِبعينَك تباوِع
اعله كلشِي الأوّل انته اِبلا مُنازِع
نعَم للحَق چنِت كلشِي تصارِع
تضَل مثْل الشمِس والعاده ضايِع

گلبك حنين انته مثِل گلْب الحُسين
تبقه الك تهوه قلُوب العاشقِين
عالِي دوم عالِي دوم يالرضا
▪️▪️▪️▪️▪️
اِبحقِدهُم قرّروا قتْل الثقافَه
اْو يِسمّونَك يوسفه اِبكِل صلافَه
بنِي العبّاس أبناء الخرافه
لأن خافَوا عله كرسِي الخلافَه

انته ابِن حيدر ولا عايِز حكُم
وانتوا اِبعظُمها الدنيَه مخلوقَه لكُم
عالِي دوم عالِي دوم يالرضا
▪️▪️▪️▪️▪️
نعَم مهما تجِي واِتروح الازمان
تضَل سلطان وابكِل وكِت سلطان
انه عبدك وحگّك گلبِي ولهان
اَريدك منِّي كون اِتشيل الاحزان

هذا العمُر باللي يجِي واللي مُضَه
اني افتخِر لو انحسِب "عبد الرضا"
عالِي دوم عالِي دوم يالرضا
▪️▪️▪️▪️▪️
ابو الحسن الوائلي
صفر ١٤٤٥هـ
▪️▪️▪️▪️▪️
هذا ما تصدّقت به لمولاي "أنيس النفوس" الامام الضامِن "علي بن موسى الرضا" صلوات الله عليه

▪️الاربعين
▪️▪️▪️▪️▪️
"مِن البَحرِ اِلىٰ النحرِ"
مسيره بالعشِگ تسرِي
▪️▪️▪️▪️▪️
حان الوعد لاذان العشگ يِبدِي
صار الگلُب بِينه الكربله يِحدِي
نمشِي سِوه اْو كِل حچْيْ العدُو اِنعدِّي
اويانَه نحِس يمشِي الكربله المَهدِي

النطَه كِلمَه مِشَه اِبهِمّه
اِبعزِم وَي "صاحِبَ العصرِ"
▪️▪️▪️▪️▪️
ابهذا الوعد دوم ابكُل سنَه نِحضر
للمنگطِع مِنه اِبكربله المنحَر
لجل المِشت مسبيَّه ابلهيب الحَر
نمشِي مثِل مَشيَتها اِبجمُر يِسعر

اِبسبِي راحَت اِبصمِت ناحَت
گلبنه بهالأمُر يدرِي
▪️▪️▪️▪️▪️
اِبهذا المشِي نوصَل للحُسيْن اِنزور
اْو مِن ينتهِي ننطُرها السنيْن اِتدور
اِنواسي الاِجت مَوجُوعَه اِبگلُب مَكسور
ركبَت هزِل ما ركبَت مَحامِل نُور

اِبمدامِعها اِبمواجِعها
فقَط رَب السِمه يدرِي
▪️▪️▪️▪️▪️
اِنريد اِبحزِن نوصَل للولِي اْو گبرَه
اْو يفرُق مشِي الزايِر عَن مشِي الحُرّه
اِحنَه المشِي هذا اِبراحَه نِنتظرَه
اْو هِيّه اِرجِعَت مِن ضيْم السبِي اْو قهرَه

اِرجِعت تالِي بِلا والِي
اِبقهرها والدمِع يجرِي
▪️▪️▪️▪️▪️
نسعِي اْو عسَه اِنعيْش اللوعَه والمأسَاة
اْو هَم تنخطِي كِل خُطوه اِبلهيْب الذَات
رَد الضعَن قران اْو حِمَل أيآت
بِي كُل شخُص رَد اْو يذرِف الدمعَات

الحزِن بيهُم نواسيهُم
اِجوا مِن لوعَة الأسرِ
▪️▪️▪️▪️▪️
واقِع صفَه واِبهذا الدرُب ملمُوس
اِبعيْن العلِي كِلمَن معتنِي محروس
اِشما بَيّنِت گلبَك بالحزِن متروس
اكبَر حزِن للجابَت معاهه الروس

اِبكسُر خاطِر مِن العاشِر
بِقه بيها الجمُر يسرِي
▪️▪️▪️▪️▪️
كِلمَن خِدَم ذَب حيلَه اْو وفَه بالديْن
يِدعِي تضَل يُوميَه الخِدامَه اِتحيْن
قصدَه فقَط واحِد ما إلَه قصديْن
حتّه يِضَل يِخدِم باليِزور اِحسيْن

الگلُب هايِم أضَل خادِم
اِبخدِمتَه مِنعگِد عُمرِي
▪️▪️▪️▪️▪️
ابو الحسن الوائلي
محرم ١٤٤٥هـ

▪️كأني بمولاتي ليلى عند قبر مولاي الحسين عليهما السلام
▪️▪️▪️▪️▪️
جيتَك حزينه امْن السبِي حبيبي
مِن غيبِتَك ما فَض بعَد نحيبي
اه اه اه اه
اه اه حُسين
▪️▪️▪️▪️▪️
يا حبيب الگلُب جيت مِن غُربتِي
باربعينَك انه راجِعه اِبدمعتِي
جيتَك اْو جايِبه كل حزِن رحلتِي
مِن ذبِحتك وانه اِتغيِّرت حالتِي

جِيتك يغالي اْو جايِبه مصابِي
اْو ما ينحمِل يا سيِّدِي عذابِي
اه اه اه اه
اه اه حُسين
▪️▪️▪️▪️▪️
اِنته كلشِي الي اْو خيمتِي والحِمه
عالبشَر افتخِر زوجِي ابِن فاطِمه
اِنته روحِي اْو رحِت اْو ما صرِت سالِمه
وانِي مِن روحِتَك روحِي مِتألِمَه

عذّبنِي فگدَك يا نظَر عُيونِي
وانِي الغرُب مِن غيبِتَك ولونِي
اه اه اه اه
اه اه حُسين
▪️▪️▪️▪️▪️
كتلِي مِنّچ ردِت صبرِچ اِعله الحمِل
اْو گلِت دومِي معَك كلشِي راح احتمِل
اِبچَف ادينَك شفِت هودَجِي يِعتدِل
اْو عگْب اِدينَك وسَف اركب اِعله الهزِل

مِن الدلال اعله الهزِل سبيَه
امشِي وسافه اِمچتّفَه اديَه
اه اه اه اه
اه اه حُسين
▪️▪️▪️▪️▪️
شرْد اسولف عله يا جرِح يا ألم
وانِي مِن ذبحِتك حيلِي كلّه اِنهِدم
مِن طحِت عالثره والگلُب ما سِلم
تدرِي ضَل السبِي يرمِي گلبِي اِبسهم

چَان الگمَر حارِس گبُل علينَه
اْو عگبه الشمِر يحديها للضعينَه
اه اه اه اه
اه اه حُسين
▪️▪️▪️▪️▪️
جيتَك امْن السبِي خاطرِي مِنكسُر
اْو بَس جروح اْو حزِن جايِبه امْن اليِسُر
كلشِي عنِّي رحَل بَس بقالِي الصبُر
الهِسّه جمْر الخِيم بالگلُب يِستعُر

يا خيمتِي الطاحَت غفُل عليَه
نار الخِيم تلهَب بعدها بيَه
اه اه اه اه
اه اه حُسين
▪️▪️▪️▪️▪️
حالِي ما يِنوصُف وانِي بارض الغرُب
كلشِي أحمِل سهِل بَس غِيابَك صعُب
الكِسرت اِبخاطرِي للقصُور امْن اطُب
واني شفْت الأشَد بالشتِم والضرُب

اِسياط العِده حيل الظهر تِگطعَه
اْو سَب اْو شتِم صرنَه فقَط نِسمعَه
اه اه اه اه
اه اه حُسين
▪️▪️▪️▪️▪️
مِن اسولف اكو بالگلُب چم جرِح
حالِي بعدك تره حالِي ما يِنشرِح
ياللي ماكو شخُص ثانِي مثلَك يصِح
عينَك اعله النسَه واِنته فُوگ الرمِح

طول الدرُب مِن نمشِي يا فُؤادِي
مِن نعثر اِسم الله النحر يِنادي
اه اه اه اه
اه اه حُسين
▪️▪️▪️▪️▪️
سيّدي اْو مسندِي اِبليلي اشُوفَك گمَر
طولك اْو هيبِتَك منها ضَل بَس نحر
حزِن طَف كربله رمحه بيَه اِستقَر
واِنته نمْت اِبگبُر وانِي عشْت اِبقهَر

اني ام علِي الاكبر يغالي اكلمَك
اتمنّه امُوت اْو گبري يصفَه يمَّك
اه اه اه اه
اه اه حُسين
▪️▪️▪️▪️▪️
ابو الحسن الوائلي
صفر ١٤٤٥هـ

▪️الامام الحسين "عليه السلام" يناشد المواكب الحسينية يوم الاربعين :
▪️▪️▪️▪️▪️
وين هالرايات چانت وينها
مِن بگه بالطف وحيد اِحسينها
▪️▪️▪️▪️▪️
وين هالرايات چانت والالوف
والحشُود الگاصده اْو هاي الصفوف
اِبيوم ضلّ اِحسين وحده بالطفوف
لمَن رادت روحه شخْص اِيعينها
▪️▪️▪️▪️▪️
وين چانت يُوم عاشِر هِيه ويْن
اِبيُوم ناصِر چان مِحتاج الحُسيْن
وحده ضَل اِبلا نصير اْو لا مُعيْن
واكثرية الناس باعَت دينها
▪️▪️▪️▪️▪️
لوَن هالرايات والوادِم اِجَت
اِبفزع لِحسيْن العزيز اْو جاهِدَت
دُونَه بِذلت روحها اْو چان اِدفعَت
الضيم والشَر عَن ابِن ياسينها
▪️▪️▪️▪️▪️
لوَن هاي اعدادها الما تنحصِي
حاضره يُوم اللي ضَل ابْن الوصِي
اِتلبّي أمْر اِحسينها اْو ما يِنعصِي
أمره والأرواح اِله فادينها
▪️▪️▪️▪️▪️
لوَن هالرايات چانَت حاضِره
لابُو اليِمّه اِبيُوم گِطعوا مَنحره
چان تلگاها صفُوف اِمحضّره
المُوتها اْو مَتعُوفَه وحده اِبحينها
▪️▪️▪️▪️▪️
لوَن حضرت كربله ويَه الانصار
اْو تدخِل اِبفزعَه سوه يُوم المغار
اِمناثر الدَم يِصبَح اِيمين اْو يِسار
اْو تِفعَل افعال الصعُب تبيينها
▪️▪️▪️▪️▪️
لوَن حضرت هالمجاميع العِظام
اِبيُوم عاشِر مِن طُلب فزعَه الإمام
يا سبِع يوصَل لعِد حَد الخِيام
والوصَل حدها تگُص رجلينها
▪️▪️▪️▪️▪️
لوَن چانت هاي كِل هاي الرجال
حاضره بالعاشِر اِبيُوم النزال
منو يِتجاسر اْو يوصَل للعيال
والتجاسَر منها تُفگِس عينها
▪️▪️▪️▪️▪️
لوَن حضرت هالجمُوع الموزمَه
چان محّد يعتنِي لاِمخيّمَه
اْو ماكو واحِد يصِل حَد بِت فاطِمَه
اْو ماكو نسوه اِبلا ولي اِمسلبينها
▪️▪️▪️▪️▪️
ريت هالرايات يوم الضَل وحيد
تفدِي لجْل اِحسين هيَه چَم وريد
چان ما جرّوا النسوه كالعبيد
اْو ما تتِم لايْزيدها اِمچتفينها
▪️▪️▪️▪️▪️
ابو الحسن الوائلي
محرم ١٤٤٥هـ