▪️بين مولاتي رقية وابيها الحسين عليهم السلام
▪️▪️▪️▪️▪️
هيمه اباوِع بالعين او چان الفكِر قالِقني
وين الضعن رايِح وين يا والِدي جاوِبني
هذا الدرُب حيل ابعِيد
يا والِدي وين انريد
جاوِبني
▪️▪️▪️▪️▪️
آنا رُقيّه ابنيتَك اْو تدرِيني
قِطعه أنَه مِن گلبك امخلِّيني
ازغيره اْو مِشيت بهالسفَر يحسِيني
يصعَب عليّه واني خمسَه اسنِيني
هيمَه الطريق اْو فكِري ضَل ياذينِي
ابعيني اشوفه اشطوله يا ضَي عِيني

دربي ثجيل اعله الروح واني زغيره ابعُمرِي
ما ادري لا وين انروح ابهذا السفَر ما ادرِي
جاوبنِي خَل گلبِي اِيْهِيد
يا والِدي وين انريد
جاوِبني
▪️▪️▪️▪️▪️
لَمَّن دِريت الكربله مقصَدنَه
شُو مِن اِسمها گلبي حَس ابحِزنَه
مات الامان او بَس خطَر حايِطنَه
اْو طير المِنايه ضَل يِحوّم يمنَه
شو گلبي خايِف مِنها لا تجرحنَه
يا بويه مِنها خايفَه اتفارِگنَه

گلبِي يبويه مرعوب اْو بِنتَك بِدَت حيرتها
والهَم بقه ابروحِي النوب من كربله اْو نِيَّتها
اتمنَّه اعرف شتريد
يا والِدي وين انريد
جاوِبني
▪️▪️▪️▪️▪️
لَمّن أصِد اِعله الضعَن والعِيلَه
بِيْه الشمِس والگُمَر يِضوِي ابلِيلَه
چَنّي امْن اباوِعلَه افتهِم تفصِيله
ماي اْو يسِير اِعلَه الطفُوف ابسِيله
ساكِت اشوفك والمسافه اطوِيلَه
اْو تدرِي ابسَكِتَّك گلبي هَدَّت حِيلَه

بهالدرُب ملچومَه الروح والحيره حتماً تِذبَح
ما يِهده گلبِي المهموم بالسكته بيها اِتفرفَح
صار الخطَر بِيَّه ايْزيد
يا والِدي وين انريد
جاوِبني
▪️▪️▪️▪️▪️
گاع الطفُوف الإحنَه مِتعنّيها
چَنها تحِب الدَم يِسيل اِعليها
هالارض أشعُر بالغدُر يِمليها
ابلا طَلعه طبّتنه احِسَّن بِيها
كِل خطوه يا بويه الجدِم يِمشيها
تحمِل أحِس الفرگه مِن اخطيها

لو طحتوا فوگ التربان اْو واحِدكُم اِيْفارِگنَه
ياهُو اليِضَل للنسوان والناس كِلهُم ضِدنَه
والهَم بقه ابروحِي اِيْعيد
يا والِدي وين انريد
جاوِبني
▪️▪️▪️▪️▪️
لو غَمَّضِت عيني تزِيد اِسهامِي
صورة ذبِح ترعِب تمُر گِدّامِي
خَلّيْنَه نِرجع خلها تُمضِي اوهامِي
مادام بويه ماكو واحِد دامِي
اْو مادام ماكو مِنّه واحِد ضامِي
اْو مادام ما طاحت چِفوف الحامِي

بالطف مواجِع واحزان والدَم يسيْل اِبحرگَه
عالغبره يوگع قران خيْل اْو رجال اِتسِحگَه
واِهناكَه چَم گطْع اورِيْد
يا والِدي وين انريد
جاوِبني
▪️▪️▪️▪️▪️
يا مَن اِعِيُونَك صارَت اتباوِعلِي
رايَك يبويه اتمنَّه يِصبَح مِثلِي
بالطَف مصاب اْو هَم ابَد ما يِجلِي
اهناك الدمِع وانته ادره احمر يِهلِي
مُو مِن حرُب خُوف اللي غيّر شِكلِي
كِل خُوفي افُگدَك ولله يا بعْد اهلِي

شيْسَوِّي تعرِف وايْصِير فگْد الابُو بالطِفلَه
اِبعيناهه هالكون اِيْدير والدِنيْه لا ما تِحلَه
والجرحِي مَيْصِح تضميْد
يا والِدي وين انريد
جاوِبني
▪️▪️▪️▪️▪️
بويه قبِل ما نوصَل اْو ضَدّونه
اْو بويه قبِل ما نحرك ايگِطعونَه
اْو جِسمك قَبِل ما عالثره ايخلّونَه
وابخيلهُم يا والِدي ايسحگونَه
واحنه قبِل ما للسبِي ايْگودونَه
صعبه او ثِجيله الغُربه لو شافونَه

يوگع نهر فوگ الماي تحمِل الدِنيْه اِچفُوفه
والنسوه بعْد الحمَّاي تمشِي اِبسبِي مچتوفَه
وحدتنه مچتوفه الايْد
يا والِدي وين انريد
جاوِبني
▪️▪️▪️▪️▪️
ابو الحسن الوائلي
ذو القعده ١٤٤٤هـ

▪️لهفي لمولاي الحجَّه المُنتظَر "عج"وهو يستقبِل شهر مُحرَّم
▪️▪️▪️▪️▪️
عليْك الليله صايِر شُوفِي مشبُوح
شِفتَ هلَّة هِلالَك شايِل اِجروح
طلِعتَك شفِتها
اْو دمعتِي اِذرفِتها
▪️▪️▪️▪️▪️
يشَهرَك يا مُحرَّم
مِن بَيَّن هِلَالَه
گلبي گبْل الْعيِون
مِتحسِّر بِچالَه
اِبدمِعتِي الحمره ويلاه
اشُوفَه اْو حالِي حالَه
كِل اِشهُور السْنين
اِبعينِي چَن خِصالَه

لا مُو فقَط شهرَك بِيْه مَقهُور
كِل ليلَه التمُرنِي عِندِي عَاشُور
اِبسنينِي عشِتها
اْو دمعتِي اِذرفِتها
▪️▪️▪️▪️▪️
مَجموعَة جِراحات
اشُوف اِبهذا الهْلال
ابكسُر گلبِي اصِد ليْه
يويلِي اْو دمعِي همَّال
قَوس اِبلايَه السْهام
اشُوفَه بالسِمه هَال
لِأن مرمِيَّه السْهام
كلها اِبگلْب العِيال

اِبدمِعتِي الجارِيْه اِبخدِّي أصِد لِيْه
اْو سَبِي عمَّاتِي كِدَّامِي اِنرِسَم بِيْه
حريمِي اِنظرِتها
اْو دمعتِي اِذرفِتها
▪️▪️▪️▪️▪️
اِعلَه هُونَك ياشهَر بِيْك
گلْب اِحسين ملچُوم
أهُو گلبَه اِشبُقه بيْه
گد ما شاف الهْموم
يِعينَه البارِي مِن شَاف
تِحنِّي القاسِم اِدموم
لو مِن شَاف الاكبر
اوصَال اِمگطعِتَه الگوم

يِعينَه الله اِشكثُر هَم شَاف گلبَه
حزيْن اْو حالِتَه اِشگد هِيَّه صعبَه
اِبثِگلها اِحملِتها
اْو دمعتِي اِذرفِتها
▪️▪️▪️▪️▪️
هِلالَك شافِتَه العيْن
واحِس اِبناظرِي ايْشُوف
گمُر مِن السِمَه طاح
يويْلِي اْو بدرَه مخسُوف
اِبوگِعتَه حِضنِتَه الگاع
واِبعينَه طُفَه الشُوف
گمَر عالغبره مطروح
اْو مِنَّه اِنگِطعَت اِچفُوف

الگمَر مِن اِنحِنه اْو سَالت دِماءه
صعَد نُوره اْو بُقَه يِضوِي اِبسماءه
يِضَوِّي بختها
اْو دمعتِي اِذرفِتها
▪️▪️▪️▪️▪️
اِهلالَك شِفتَه مِن هَل
اْو بين اِعيُونِي نازِل
يِشبْه حال الحسِيْن
مِن مَات ابو فاضِل
رِجع لِخيامَه مكسُور
اْو دمعَه اِبحُرگه هامِل
محنِي اْو چنَّه هالكُون
فوگ اِمتُونَه شايِل

رِجَع لِخيامَه يِبچِي اْو دمعَه يِجرِي
يبُو فاضِل يِصيْح اِنكِسَر ظهرِي
جروحَه شلِتها
اْو دمعتِي اِذرفِتها
▪️▪️▪️▪️▪️
إِذا انظُر للهْلال
احِس حيلِي ايْتِهدَّم
كأِن عبد الله اصِد ليْه
يِلوج اِمْن العطَش هَم
ابُوه لجلَه طُلَب ماي
يِشربَه ما طُلَب دَم
رگبتَه الحِلوه چا ليش
اِبسهَم حاقِد مَتِسلَم

طفِل عبد الله بعدَه اْو لاحِگه الآه
اْو رگبتَه للسهَم صارَت يويلاه
الاعادِي اِگطعتها
اْو دمعتِي اِذرفِتها
▪️▪️▪️▪️▪️
انه ابهذا الحزِن ضَال
واحِس اِبجمرِي يِسعَر
كأنِّي اِبزِينَب اِتشُوف
اخوها اِبلايَه مَنحَر
اِبخِيمها اْو تِستمِع ليْه
عظُم صَدره اِيْتِكسَّر
خِيُول اِتسِحگه واِرجال
اْو تصِد جِسمَه تِوذَّر

اِبهضُم عشرَة حوافِر داسَت اِحسيْن
اْو قُطَع مِن جِلدَه أخذَت للنساويْن
عِظامَه اِكسَرتها
اْو دمعتِي اِذرفِتها
▪️▪️▪️▪️▪️
دمِعتِي الحمره تجرِي
علَه عمتِي وألمها
انهضُم كِل ساعه ولله
إِذا اذكُر إسِمها
وحَدهَا شافَت الويْل
بعَد طِيحَة زلِمها
أشِم يُوميَّه دُخَّان
مِن حرگة خِيمها

وكِت خلَّه العقيْلَه اِبكربلَه اِتحيْر
اْو عگُب كافِلها هِيَّه الكافِلَه اِتصيْر
جِرحها وكِتها
اْو دمعتِي اِذرفِتها
▪️▪️▪️▪️▪️
ابو الحسن الوائلي
ذو الحجَّة ١٤٤٤هـ

▪️كأني بمولاتي فاطِمة العليلة تخاطِب والِدها الإمام الحُسيْن عليها السلام
▪️▪️▪️▪️▪️
يالرحِت عَنِّي اْو بعَد ماضِن تجيْنِي
بعدَك الضَل عندِي بَس دمعَات عيْنِي
▪️▪️▪️▪️▪️
اني بِنتَك فاطِمه اِجروحِي ثجِيْلَه
اِبغيْبِتَك شُوفِي ولا يِگطَع مسِيْلَه
اِنته ابويَه الغالِي والدوم اشتكِيْلَه
اُوداعتَك فَگدَك الخلَّانِي علِيْلَه

اِعليْك بويَه ما يِكُف دمعِي اْو ونِيْنِي
بعدَك الضَل عندِي بَس دمعَات عيْنِي
▪️▪️▪️▪️▪️
تدرِي مِن يُوم اللي شِفتَك عنِّي رايِح
اِنته تِبعِد وانِي فكرِي بِيْك سارِح
صُفنَت الحيطَان مِن صوت النِوايِح
البِيْت ظلمَه اِبناظرِي اْو عامُودَه طايِح

صُفنَت الحِيْطان مِن شوگِي اْو حنِيْنِي
بعدَك الضَل عندِي بَس دمعَات عيْنِي
▪️▪️▪️▪️▪️
دِنيْتِي اِشمحلاهه بايَّامَك شفِتها
عشِت بيها چَن أميره اْو كمَّلِتها
اِبدُونَك اِتمنِّيْت أبدَاً ما عشِتها
لأن دُونَك كلشِي ما تِسوه اِعرفِتها

وحدِي بِيْن الحيره والهَم عايفِيْنِي
بعدَك الضَل عندِي بَس دمعَات عيْنِي
▪️▪️▪️▪️▪️
اِعلَيَّه كِل لِيْلَه التمُر ساهِر جرِحهَا
لِيْلَه ظلمه والهجُر كاتِل صبُحهَا
روحِي بِغيابَك إذَا يِحصَل شرِحهَا
روحِي وردَه لاچِن اِفراگَك ذِبحهَا

اِنتوا ماي الروحِي ليْش اِمذبِّليْنِي
بعدَك الضَل عندِي بَس دمعَات عيْنِي
▪️▪️▪️▪️▪️
مِن غبِت عَن عيْنِي يا أغلَه الحبايِب
عمرِي بِغيابَك أشُوفَه شمعَه ذايِب
مِن عفِتنِي اِلتمَّت ابروحِي المُصايِب
اِبچفَّك اِمسَلِّمنِي لِچفُوف النِوايِب

ليْش لِچفُوف العذاب اِمسَلِّمِيْنِي
بعدَك الضَل عندِي بَس دمعَات عيْنِي
▪️▪️▪️▪️▪️
رِحتوا عنِّي اِبسفَر بِدرُوب المخاطِر
جرحِي ما يِغفَه اْو علَه الهلبَت يِكابِر
البِيْت صار اِبغِيْبِتَك مكسُور خاطِر
والغُرف وحشَتهَا چَن وحشَة مگابِر

اِبوسَط دارِي يهلِي بَس اِمضَيِعِيْنِي
بعدَك الضَل عندِي بَس دمعَات عيْنِي
▪️▪️▪️▪️▪️
اِبگلبِي جرحِي اْو بِيَّه مو هَيْنَه المواجِع
اِويْه الضعَن مِن ودّعتنِي گلبِي طالِع
گابلِت درْب الخذَك مِنِّي اِبمدامِع
انتظِر هلبَت يجِي مِرسال اباوِع

وِحدَه مِنهِن لو أجِيلَك لُو تجِيْنِي
بعدَك الضَل عندِي بَس دمعَات عيْنِي
▪️▪️▪️▪️▪️
ابو الحسن الوائلي
ذو القعدة ١٤٤٤هـ

▪️خِطاب خادِم مع مولاه ابي عبد الله الحُسَيْن عليه السلام
▪️▪️▪️▪️▪️
يا ملِك روحي اْو يا عشِگ گلبِي
اْو راحتِي التمحِي مِنِّي كِل تعبِي
غالِي وابروحي اِسكنِت
يالمثِيلَك ما شفِت
حُسَيْن
▪️▪️▪️▪️▪️
يا إِمامِي اْو يا حَبِيبي اْو كلشِي بالنِسبَه إِلِي
مِن زغُر سِنِّي عِشَگتَك يا غرامِي الأوَّلِي
يا عشِگ روحي المِثالِي والتِوارَث مِن هَلِي
لِأن اِنته ابراسِي ساكِن دومَه راسِي مِعتلِي

يالصرِت واحِد ما إلَك ثانِي
عايِش الدِنيْه الخِدمِتَك انِي
مرتبَة حُبَّك نلِت
يالمثِيلَك ما شفِت
حُسَيْن
▪️▪️▪️▪️▪️
سيّدي لو ما أعرفَك كلشي ما أسوه لِأن
چِنت ضايِع يا حبيبي اْو شِفتك القلبِي وطَن
يا چبير اْو لا مثِيلَك عالي تبقه ابكِل زمَن
الدِنيْه والبيها اِحتراماً يَم مقامَك يِنحِنَن

كلشِي بالدِنيْه يِنحنِي القَدرَك
اْو كِل فضِل بيها ما يجِي الظِفرَك
واِنته سيِّدها صرِت
يالمثِيلَك ما شفِت
حُسَيْن
▪️▪️▪️▪️▪️
انته اصدق حُب عرفته اْو غيرك الشِفته وهَم
وانته يالنِعمه العظيمه التختلف عن النِعَم
وقُف گلبِي لجلَك اِنته اْو يرِف ضَل مثْل العلَم
ياللذي اِبدونَك حياتي حالها حال العدَم

كِل شبِر بِيَّه هايِم ابحُبَّك
وافتخِر گلبِي سيِّدي ايْحِبَّك
واِنته بِي دايِم عشِت
يالمثِيلَك ما شفِت
حُسَيْن
▪️▪️▪️▪️▪️
اِنته اقرب ليَّه مِنِّي اْو حتَّه مِن گلبِي اليدِگ
اِنته اوَّل جرْح اشوفه بالمُحِب يِنزِف عشِگ
اِنته امير الروح اِنته واِنته عالدِنيْه مَلِك
اِبلا هواك اللي أشِمَّه ولله صدرِي يختنِگ

دومَك ابعُمرِي ابكُلشِي الي واگِف
ثاني باوصافَك ولله ما شايِف
ولله باوصافَك حرِت
يالمثِيلَك ما شفِت
حُسَيْن
▪️▪️▪️▪️▪️
يا عشِگ روحي اْو ملِكها الكِل جرِح شِلتَك دِوه
مِن تمُر ابصَدرِي خَنگه الصَدرِي الگاك الهوه
گلبِي مُلكَك يا حَبيبي اْو كِل تفاصِيلَك حِوه
ابظَلمَه لو مار اْو نِخيتَك تِگلُب الظَلمَه ضُوه

كلشِي باعضائِي العالمَك يُوحِي
يالصرِت حتماً بوصلَة روحي
واِنته مُنقِذ لو تهِت
يالمثِيلَك ما شفِت
حُسَيْن
▪️▪️▪️▪️▪️
ياللي حُبَّك دِين اوصفَه اْو گلبِي هالدِين اِعتِنَق
اْو لا أشِك اْو لا أغالِي لا وحَق رَب الفلَق
اِشلُون مُو دِين اِنته واصلاً لَجلَك الكون اِنخِلَق
ساكِن ابوجدانِي تِبقه اْو نورَك ابروحي اِنبِثق

حُبَّك الغالِي اِمضَوِّي وِجدانِي
خادِم اِحسينِي اِشمحلَه عنواني
مبدأي هذا اعلَنِت
يالمثِيلَك ما شفِت
حُسَيْن
▪️▪️▪️▪️▪️
اشمستفاد الناس تِسأل لمَّن امحرَّم يِحين
واِنته تخدِم زِلمه ميَّت صار آلاف السِنين
ثابِت اْو واضِح جوابي حُب ابو السجّاد دِين
ما دروا خيري اْو عطائِي كِلَّه مِنَّك يا حُسين

خلهُم البغضوا ما يِهِمُّونَه
اْوداعة اِعيُونَك ما يِكسرونَه
خادِميْنَك كِل وكِت
يالمثِيلَك ما شفِت
حُسَيْن
▪️▪️▪️▪️▪️
ابو الحسَن الوائلي
كربلاء المُقَدّسَه
شوّال ١٤٤٤هـ

▪️للإمام الحُسيْن عليْهِ السلام
▪️▪️▪️▪️▪️
عشْت اْو تِعلَّه اِوياك نهْج الإمامَه
لو ما مسيْل اِدماك مَتضَل سلامَه
شامِخ تضَل للدُوم
هازِم ولا مهزوم
▪️▪️▪️▪️▪️
اِجيتَك جايِب الفكره اْو ضواهه اِعليْك سلَّطتَه
يعايِف بِيْتَك اْو گاصِد اِبرِساله مِعتنِي اِنته
تِشاهِد چَم هُبَل عينَك ابنشُر دِيْن الله طالبتَه
فَلا تِتعاوَن اِوياهُم صُعوبَه هالامُر شِفتَه
چان اِنته همَّك دِيْن ربَّك تعالَه
اِبذاك الزمَن والحيْن صُوت العدالَه
اْو تِتردَّد لهليُوم
هازِم ولا مهزوم
▪️▪️▪️▪️▪️
طلِعتَك مِن ارض جدَّك هدفها تِصلِح الأُمَّه
تِباوع وسفَه چَم حاكِم علَه الدِين اِنتِشَر ظُلمَه
ابخطَر دِين العلِي العالي يِريدَك تكشِف الغُمَّه
يضِن واحِدهُم اِعلَه الحق ولاكِن سايِر اِبعتمَه
بُغضاً نعَم عادوك اْو رادوا دحُورك
واضِح لچِن نكروك بَس يِبقه نورك
لا ما تحِجبَه اِغيُوم
هازِم ولا مهزوم
▪️▪️▪️▪️▪️
ابطريق الصحره مِتعنِّي يغالِي إِنته واِعيالَك
يهالماشِي ابدرُب مُوتَك ولاكِن مُطمَئِن بالَك
تسِير اْو تعرِف ابكلشِي والهٰك اعلَم اِبحالَك
وابَد ما مِهتَم المُوتَك تشُوف المُوت يِحلالَك
اِبعزمَك تِداوَت حِيْل نار اِصطبارَك
يالدَمَّك اِمْن اِيسيْل بِيْه اِنتصارَك
عزمَك يذِل الگُوم
هازِم ولا مهزوم
▪️▪️▪️▪️▪️
اِنتشَر امْر الظلُم تنظُر يبُو اليِمَّه اْو رفضْت امره
"فسُبحان الذي اِبعَبدَه" مُصلِح للظلُم أسره
اليِسألَك عالنِسَه اِتگلِّه ابسبَب جَيَّتهِن اِتخبره
قتِيل اِتگول "شاء الله يراني والنِسَه" أسرَه
گلبَك وسافه اِيْحير اْو تِكبَر همُومَه
واللي عليْك اِيْصير عِندَك علُومَه
واِنته ابرغُم مالُوم
هازِم ولا مهزوم
▪️▪️▪️▪️▪️
الهٰك بالسِمه خطها الرساله اْو جِهزَت اِبحِبكَه
لمَن شافَه ابخطَر دِينَه دِعاك اْو رادَك اِتدِركَه
اِعتنِيْت اْو رايِد اِتكرِّر دخُول المصطفىٰ المكَّه
الحقيقَه يا وِسَف صارت عليها اِخيُوط مِشتبكَه
اِخيُوط الخِيانه اِهواي فوگ الحقيْقَه
اِبچفَّك تحلها اِتريد المحَّد يِعيْقَه
چان العدِل مرسُوم
هازِم ولا مهزوم
▪️▪️▪️▪️▪️
بسِم دِين العلِي العالِي حكُمهُم والصِدَر عَنَّه
لچِن كِل الطِلَع منهُم قتِل واِرهاب والفِتنَه
صرِت ضِد الحكُم هذا اْو عليهُم رفضَك اِتعِلنَه
شَياطيْن الإِنِس ضِدَّك واشُوفَك وحدَك الجنَّه
واگِف واشُوف اِعداك صَارت تحيْطَك
اْو وحدَك سلامَه اِهناك جِنْت اِبطريْقَك
يا سيِّدي المظلُوم
هازِم ولا مهزوم
▪️▪️▪️▪️▪️
يـ أوَّل مِنتصِر عالِي عفى اْو ما واحِد اِيهِزمَك
يـ أوَّل مِنحنِي اِنشُوفَك ولاكِن ثابِت اِبعزمَك
بِچَت عيْن العرِش لجلَك دِمه لمَّن نِزَف دمَّك
اِنتهى دِين الله واِبفضلك تِعلَّه مِن وِگع جِسمَك
عالِي يِضَل يحسِيْن عالدِنيْه بختَك
واِتضَل دمُوع العِيْن تجرِي الذبِحتَك
لجلَك تسيْل اِدمُوم
هازِم ولا مهزوم
▪️▪️▪️▪️▪️
ابو الحسن الوائلي
ذو القعده ١٤٤٤هـ

▪️كأنِّي بمولاتِي فاطِمة العليلة "عليها السلام"
▪️▪️▪️▪️▪️
يهلِي مشِيتوا اْو مِشَه مِن عِندِي كِل الحِيْل
حاوطنِي يهلِي الحزِن اْو يُومِي اِنتِرس ياويْل
جِسمِي بعدكُم نحَل اْو ويَّه الرِياح ايمِيْل
▪️▪️▪️▪️▪️
احباب الگلُب جرحِي صعُب
عنِّي مِشِيتوا يا هلِي
صدرِي اِختِنَگ نبضِي خُفَگ
مِن عنَّه سافَر چَم ولِي
حيلِي اِنهِدَم زاد الالَم
اْو گلبِي ابجرِحكُم مِبتلِي
مِن العتَب اِلسَانِي تعَب
اصرَخ دخِيلَك يا علِي

يا بويَه گلِّي تجِي لو ما تجِي هَم گول
اتخلِّيني بِين الامَل اْو بِين اليأِس معقُول
مِنَّك جواب انتظُر يُوصَلنِي بالتأويْل
▪️▪️▪️▪️▪️
من هالبُعِد انطُر ترِد
اِغيَابَك شِغَل كِل الفكُر
ابقِلَّة أمَل صبرِي طِوَل
اْو مِنِّي جِزَع حتَّه الصبُر
سِيل الدمِع ما يِنگطِع
يجرِي ابسبَب هذا الهجُر
لو حَل مِسَه الصُبْح الاسى
انطُر صُبِح ثانِي يمُر

تدرِي بعدكُم صُفَت وحشَة لحِد بالبِيت
اْو مَل مِنِّي درْب السفَر گَد ما عليْه رَدّيْت
گابلتَه بُويَه الدرُب مِن صُبحِي حَد الليْل
▪️▪️▪️▪️▪️
وين الاهَل گلبِي سِئَل
ضلِّيت اناشِد كِل وكِت
الدِنيْه نعَم صارَت عدَم
غابَه وانه بيها تهِت
رحتوا وانه ظهري اِنحِنه
اْو مِن هالوِداع اِتألَّمِت
گلبِي اِنچِوه مات الهوه
اني متِت بَس ما متِت

ماكو هوه والصدُر دُون الهوه مخنوگ
ابجمْر الحزِن والفگِد گلبي تره محروگ
ماذِيني هذا الزمَن اْو بِيكُم جِرحنِي حِيْل
▪️▪️▪️▪️▪️
ها يا هلِي ياهُو إلِي
رحتوا واحِس حيلي اِنهِدَم
ابگلبي انه مات الهنَه
واتربَّع ابروحي الالَم
جرحِي بعَد مالَه ضُمَد
لا يِنزِف اْو لاهو اِلتئم
دمعِي جِره واِمناطِره
حتَّه الصبُر بِيَّه اِنصِدَم

مِن رحتوا عنِّي اِختِلَف يحبابِي كِل الحال
كِل حيلِي ولله اِنهِدَم اْو ونِّي يِدِك اِجبال
جارحنِي هذا البُعِد وادعِي العلِي مَيْطِيْل
▪️▪️▪️▪️▪️
زاد الوجِع فكري اِنصِدَع
اْو بِيَّه الجمُر يِچوي الشمِس
الكون ابحزِن شِفتَه وأوِن
ابعيني صُفَه يِفتَر عكِس
دمعِي نقِش ابسِجْن الرمِش
يِجرِي وابَد ما يِنحبِس
واِمأمِّنَه بعدَك انه
عدلَه أضَلَّن ما أحِس

عِيْن الدمِع يالابو مِن صَدلِي صاح اِبـ آه
مِن باوَع المدمعِي اِعلَيَّه صفَه مجراه
دمعِي ابرحيلَك جِره ابخَدِّي فُرات اْو نِيْل
▪️▪️▪️▪️▪️
ها يالأهَل ماكو أمَل
اْو عالبلكَت اعقِد ضنِّتِي
بَس ارتجِي بلكَت يجِي
طارِش واطَفِّي حسرِتِي
اِشمحلَا يمُر چَان العمُر
ما بِين ابويَه واِخوِتِي
لمَّن مِشَوا جرْح اِترِكوا
اِبلايَه الأهَل يا ضِيعِتِي

چانَت حياتي ورِد مِن چانوا اهلِي اِوياي
صحره شِفتها صُفَت ما بِيها گطرة ماي
اِبدُون اهلِي راحه ابَد مَتمُرنِي بالتفصِيْل
▪️▪️▪️▪️▪️
ما عِندِي حَل والعندِي ضَل
المدمَع عله اِخدودِي مُطَر
لِيلِي وكِح بِيْه انجرِح
وأسهَر أضَل ويَّه السهَر
حار الفكُر والهَم يمُر
وابذِهنِي تِتزاحَم صوَر
اِمضَيْعَه ابو اِمضَيْعَه اخو
ذبحة ضوه كسرة ظهَر

ممدُوده روحِي احِس وابراسِي طبرة سِيْف
اْو بالرگبه هَم سِيْف احِس يِگطع نحَر بالكِيْف
مِن ظهري طالِع سهَم وابصَدرِي ركضة خيْل
▪️▪️▪️▪️▪️
ابو الحسَن الوائلي
شوَّال ١٤٤٤هـ

▪️▪️▪️▪️▪️
زينب كل مسيَّه دمعتها جريَّه
لو هَل الشهر يمليها القهر
واِتنُوح السبيَّه
▪️▪️▪️▪️▪️
بت علي كِل ما يهِل شهْر الدمَه
تجري دمعتها الهِلالَه البالسِمَه
تِنحب الذِيچ المُصيبه المُؤلمَه
المِن ألمها اِدموعها سالت دِمَه
مِن تشُوف اِهلاله منظَر ترسِمَه
اِتشُوفه يِشبَه كسرة اُمها فاطِمَه

يِتزايَد ألمها بِي تِتذكَّر اُمها
مكسورة ضلِع واِتسيل الدمِع
للزهره الزچيَّه
▪️▪️▪️▪️▪️
مِن تباوعله يهِل هذا الشهر
اِبدمعه للصار اْو جره تذكُر صور
اْو مِن تغمُّض عينها اِتشاهِد نحر
اْو جسِم مرمِي اْو كِل عظُم بِيْه اِنكسر
اِبحسره زينب بالسِمه ترسِم نهر
اْو يَمَّه ترسِم بِت علِي طايِح گمر

تِذكُر مِن بچيها كِل المَر عليها
مِن ضِيم اْو حزِن مَجروحَه اْو تِون
والدمعَه جريَّه
▪️▪️▪️▪️▪️
زينب اْو مَدمعها لا ما يِنگطِع
فرض سادِس تِعتبُر مَجره الدمِع
صارت اضعف هِيَّه مِن خيط الشمِع
والحزنها الكون ابَد ما يِتِّسِع
ايْساعِد الله الضَل گلُبها مِنفجِع
مِن هضُمها تِنحَب اْو محنِي الضلِع

سالت عالمَواجِع مِن دَم المَدامِع
الضَل بَس الصبُر عِدها اْو چَم كسُر
بيها امْن الرزيَّه
▪️▪️▪️▪️▪️
زينب اِهلاله اِذا تنظُر إلَه
اِبلحظه تذكُر كِل مُصايِب كربلَه
تنحَب اِبحرگه المُصاب العايِلَه
اْو عله النِسوه الحارت اِبنُص الفلَه
اِشحالها الدمعتها ضلَّت هامِلَه
حزِن زينب يا گلُب يِتحمَّلَه

مِن گد المُصايِب مثْل الشمعَه ذايِب
گلْب الفاجِده ما لحظَه هِده
شاف اِشگَد أذيِّه
▪️▪️▪️▪️▪️
گلُب زينب آه چَم مرَّه اِنچوه
ماتت اِشكَم مرَّه هِيَّه اِبنينوه
اِجروحها البيها فَلا إلهِن دوه
جرِح فُوگ الجرِح ضَل يِنزِل سوه
اِبكربلَه اِبنُص عينها مات الضوه
ضلَّت اِتشِم القهَر مَتشِم هوه

يا ضيم اليمُرها بِي يِكبر قهرها
مچويَّة گلُب چَم موقِف صعُب
راواهه المنيَّه
▪️▪️▪️▪️▪️
كِل جرِح يلچِمها زينب مرِّتيْن
اْو بيها ما خُمدَت أبَد نار الأنيْن
اِيْساعِده الله گلبها اِشگد حزيْن
ما لِگت راحه أبَد طُول السِنيْن
هِيَّه كِل ليله اِبجزَع كُلما تِحيْن
اِتنادِي يا عبَّاس مرَّه اْو يا حُسيْن

اِتنادِي اِبكُل جزعها اْو ما يِهده وضِعها
عالخِلصوا چتِل دمعتها تهِل
اِبحرگه تبچِي هِيَّه
▪️▪️▪️▪️▪️
اِبكُل سنه لمَّن يهِل شهْر الحزِن
حتَّه لو ميتَه تضَل زينب توِن
للكفيل الگلُب مِنها ايْضَل يحِن
الچانَت اِوياه ما تحِس بَس بالأمِن
اِبحرگه تِنحَب عله الضَل اِبلا دفِن
الطاح ضامِي اْو عظُم صدره منطحِن

العِدها بَس صبُرها مأتَم كِل عمُرها
الشافَت بَس هظُم ضَل عِدها اللطُم
عالضلَّوا رميَّه
▪️▪️▪️▪️▪️
‏ابو الحسن الوائلي
‏ذو الحجَّة ١٤٤٤ هـ

▪️بين المولىٰ امير المؤمنين
والسيِّدَة أُم البنين عليهِما السلام
▪️▪️▪️▪️▪️
يالشَايِلَه هيبة سِمه
بالغيره ياللي امحزِّمه
صرتِيلِي سنَد ما مِثلِچ احَد
▪️▪️▪️▪️▪️
يَمْ الوِفه والعاطِفه
اني علي يا فاطِمه الحُرّه
عُگْب اُم حسَن صرتِي وطَن
لايتامي لمَّن راحت الزهره
لمَّن مِشت بيهُم بُقَت
كسره ابفگِدها اْو عاشَوا ابحسره
ابحضنِچ دِفوا واتأمِّنوا
عدهُم أحِس انجُبرَت الكسره

مثلِچ مره لا ما اجِد
اني نِدَه وانتِي ورِد
لجروحي ضُمَد ما مِثلِچ احَد
▪️▪️▪️▪️▪️
ابدفْن الطهُر يَمْ الگبُر
گلْت اشيِعوّض فاطِمه عِندِي
هَل يا تُره تُوجَد مره
وِحده ابصِفات اُم الحسَن تِبدِي
نفسِي اسألِت واتوقعِت
لَن راح اكمّل هالعمُر وحدِي
يَمْ الفخَر لَن القدَر
عوّضنِي بيچ اْو صرتِي اُم وِلدِي

مثلِچ بعَد ثاني منو
غيرچ الِي ما صَح كفو
والبيتي عمَد ما مِثلِچ احَد
▪️▪️▪️▪️▪️
عِشنَه سِوه ماي اْو هوه
ما نِفترِگ واهوايْه تعنيلِي
اِبعيني اصِد لَجْل للولِد
صرتِي امهُم اْو تكمِلتِي صرتيلِي
اِبتَعبِي القَوِي بِيچ ارتوِي
اْو مثْل الضوه صرتِي ابدُجَه ليلِي
زوجَة ولِي أَنظُر الِي
اربَع حيادِر اِنتِي جِبتيلِي

اربَع ولِد جِبتِي الِي
واحِدهُم ابهيبَة علِي
واحِدهُم اسَد ما مِثلِچ احَد
▪️▪️▪️▪️▪️
ابفضْل القدَر يَمْ الگمَر
اِحنَه سِوه ابهذا العمُر عِشنه
اِسنِين العمُر صارَت تمُر
اْو عالحِلوه والمُرَّه تِشارَكنَه
حَد ما وِصَل يُوم الاجَل
لَن اِبْنَ مُلجِم سِيفه فارگنَه
بَس اِتِّضَح إِنَ الاصَح
اِحنَه سِوه ابسِيف الغدُر مِتنَه

سِيْف ابْنَ مُلجِم مِن طُبَر
راسِي اْو بعَد گلبِچ فُطَر
والمُوت اِبوعَد ما مِثلِچ احَد
▪️▪️▪️▪️▪️
مَر الزمَن اِسنِينه اَركِضَن
اْو مات الحسَن مِتأثِّر ابسَمَّه
ابسَم الغدُر راح الطهُر
وابمُوته بحبابَه تِرَك لچمَه
اْو حان الاهَم يوم الالم
طف كربله والفاجِعه العُظمَه
جاب الوعَد يُوم العهَد
اْو ضحّيْتِي اولادِچ لبُو اليِمَّه

اِنطيتِي ولْد الاربعَه
كِلمَن مُهِمَّة مصرعه
بالطَف اِعتِمَد ما مِثلِچ احَد
▪️▪️▪️▪️▪️
وِلدِچ وِفوا واِتعلِّموا
واحِدهُم اِبعزمَه العهَد صانَه
ضَنوَة علِي عِنْد الولِي
خِدَّامَه صاروا هُمَّه واِخوانَه
صُوت الشرَف مِنِّچ هِتَف
امْر الوصيَّه هذا عُنوانَه
اِحسِيْن المُهِم مُو بالاسِم
نادوه يسَيِّدنَه اْو يمَولانَه

موقِف بطُولِي موقفِچ
ماكو كلام اِيْوَصُّفِچ
ذِكرِچ ما خُمَد ما مِثلِچ احَد
▪️▪️▪️▪️▪️
بهالفاجِعَه هالاربعَه
واحِدهُم اِبطَف كربلَه وفَّه
الغِيره اخذِتَه اْو مِن غِيرِته
ضَل الرعُب مِن عِندَه يِتخَفَّه
فوگ الثره طاحوا تره
اِثلاثَة كواكِب ماتوا اِبعِفَّه
اْو فُوگ النهَر عِندِچ گُمَر
شايِل سِمَه عالمشرعَه اِبچَفَّه

ربِّيْتِي وِلدِچ عالوِفَه
الهسَّه ذكرهُم ما طُفَه
كلشي اِلهُم شِهَد ما مِثلِچ احَد
▪️▪️▪️▪️▪️
ابو الحسن الوائلي
ذو القعدة ١٤٤٤هـ

▪️كأنِّي بحديث دار بين مولاتي زينب ومولاتي حميده بنت مُسلِم عليهما السلام
▪️▪️▪️▪️▪️
مِن دهرِي بَس اهات
اْو نِتشابَه باللوعات
اْو نِتشارَك بالونَّات
▪️▪️▪️▪️▪️
حديث اِبّيْن زينَب وَي حميدَه
يِدور ابهاي ابيات القصيدَه
تِسولِف بالحزِن بِنْت الصُميدَه
مَع الوالِدهه خلَّاهه وحيدَه
العليْهِن صارَت الراحَه بعيدَه
صُفَت كِل وِحدَه ونَّتهَا شديده

دمعتهِن اِتهِد الحيْل
مِن عدهِن تنزِل سيْل
عالوجنَه هالدمعات
▪️▪️▪️▪️▪️
يوردَه اْو مِنترِس يالطِيْب طبعِچ
توِنِّيْن ابرغُم صَمتِچ اسِمعِچ
زغيره بَس اشوفِچ محنِي ضِلعِچ
مثِل حالِي صُفَه يحبَيْبَه وضعِچ
رحَل عنِّچ ابوچ اْو يِجرِي دمعِچ
أثَر فگده اْو رحيْلَه ضَل يِصدعِچ

مِن عندِچ لمَّن راح
خلَّالِچ بَس اِجراح
بِغيابَه گلبِچ مات
▪️▪️▪️▪️▪️
الحزِن عمَّه يَزِيْنَب حِيْل يِصعَب
مثِل شِيْب البراسِچ گلبِي شيَّب
زغِيره اْو گلبِي عمَّه اِشگَد تِعذَّب
علَه راسِي الدهر لوعاته تِنصَب
تگِلها والدمِع فوگ الوجِن صَب
انه گطره ابَّحر حزنِچ يزينَب

يالشفتِي بَس اوجاع
كِل حزنِي اِگبالِچ ضاع
يالعمرِچ جَر حسرات
▪️▪️▪️▪️▪️
تصِد زينَب عله الطِفلَه اِبمَراره
تِصبِّرها اْو توِن اِوياهه تاره
تِباوعها الدمِع مِنها ايْتِجاره
گلبها اِمْن الهضُم ما تُطفَه نارَه
تگِلها والِدِچ نِعْم اِختِياره
ابُوچ اِبعزمَه ذَل قصْر الإماره

طَب ليهُم غيره اْو نار
مِن سيفَه الكِل اِحتار
اْو لوَّعهُم بالصولات
▪️▪️▪️▪️▪️
الدمِع مِن عينِي صار ابحُرگه يِهمِي
اْو رحِيْل الغالِي بَدَّل حتَّه رسمِي
وِداعَه المُو سهِل هَد مِنِّي عزمِي
احِس فگدَه يعمَّه شَال جِسمِي
اِعلَه گلبِي حگِّي لو يِزاد غَمِّي
تره اِفراگ الابُو واِوداعَه يِعمِي

فگْد الأب يِحنِي الروح
واِيْخلِّي بَس اِجروح
مُو كسرَه لا كسرات
▪️▪️▪️▪️▪️
ثجيِل اْو مُو سَهِل ضيْم اليِمُرِّچ
اْو يِشَيِّب كِل گلُب يبنَيْتِي امرِچ
إلِچ بَس المواجِع جاب عمرِچ
زغيرَه بَس چبير اِهوايَه كسرِچ
اِبفگِد مُسلِم بعَد ماكو اليجبرِچ
حميدَه كلشِي راح اْو باقِي صبرِچ

يالحزنِچ لا ماهان
واِبگلبِچ بَس احزان
اْو مِستعرَه بِي جمرات
▪️▪️▪️▪️▪️
حزنهِن يِصعب اِهوايَه عليهِن
تره اْو غير الصبُر مَيْصِح بديهِن
هِدَم كِل حيْل مِن عدهِن سبيهِن
اْو بُقَت نار المُصايِب تِدوِي بيهِن
بقَه ونهِن علَه فرگَة وليهِن
اْو يِزلزِل كِل جِبَل عالي بچيهِن

هالدِنيَه بَس آلام
واِعليهِن ترمِي اِسهام
مِن هَمهِن مجروحات
▪️▪️▪️▪️▪️
ابو الحسن الوائلي
ذو القعده ١٤٤٤هـ

أَيْنَ بَقِيَّةُ الله الَّتِي لاتَخْلُو مِنَ العِتْرَةِ الهادِيَةِ ؟
أَيْنَ المُعَدُّ لِقَطْعِ دابِرِ الظَّلَمَةِ ؟ أَيْنَ المُنَتَظَرُ لاِقامَةِ الاَمْتِ وَالعِوَجِ ؟
أَيْنَ المُرْتَجى لاِزالَةِ الجَوْرِ وَالعُدْوانِ ؟
أَيْنَ المُدَّخَرُ لِتَجْدِيدِ الفَرائِضِ وَالسُّنَنِ ؟
أَيْنَ المُتَخَيَّرُ لاِعادَةِ المِلَّةِ وَالشَّرِيعَةِ ؟
أَيْنَ المُؤَمَّلُ لاِحْياءِ الكِتابِ وَحُدُودِهِ ؟
أَيْنَ مُحْيِي مَعالِمِ الدِّينِ وَأَهْلِهِ ؟
أَيْنَ قاصِمُ شَوْكَةِ المُعْتَدِينَ ؟
أَيْنَ هادِمُ أَبْنِيَةِ الشِرْكِ وَالنِّفاقِ ؟
أَيْنَ مُبِيدُ أَهْلِ الفُسُوقِ وَالعِصْيانِ وَالطُّغْيانِ ؟
▪️▪️▪️▪️▪️
نيران الحقد رجعت
واكتاب العلي حرگت يمولاي
▪️▪️▪️▪️▪️
نفس نار الحقد يالمهدي تتكرر
ابمرور الزمن رجعت سيِّدي تثأر
اِبمراحل يابو صالح مرَّت اْو اكثر
اْو بقت هيَّه نفس ما هيَّه بس تِسعر
تلهب سيِّدي ضلَّت
ويَّه اِعداكم اِصطفَّت يمولاي
▪️▪️▪️▪️▪️
البدايه المِن سببها النار مِستعره
بدت يالمهدي عام اِهدعِش للهجره
اِحترگ باب النبِي اْو بِي عصروا الزهره
اْو مِن عدها وگع قران عالغبره
باب المصطفى الهادي
من عدها الحرِگ بادي يمولاي
▪️▪️▪️▪️▪️
بقت نار الشعلها الظالم الفاسِق
اِجت حرگتله بابه الجعفر الصادق
على هيئة بشَر مِن نزَّله الخالق
نزل عالگاع هوَّه المصحف الناطِق
علْم الباري واسراره
جازوه اِبحرِگ داره يمولاي
▪️▪️▪️▪️▪️
اشَد نار العليها العين لو تِعمَه
حرِگ نار المخيِّم حيلَك ايهِدمَه
اْو زينب يمها بَس الغُربَه مِلتمَّه
اْو بُقَت كِل الزغار اِتنادِي يا عمَّه
حيره والخيَم تِلهب
كِلها اِتنادِي يا زينب يمولاي
▪️▪️▪️▪️▪️
ابد يا سيِّدي ما خُمدَت النيران
رجع يالمنتظر سلوان ابن سفيان
أهُو شيطان بَس مِتنكِّر اِبـ إنسان
أمَام الدِنيْه والوادِم حِرگ قران
هذا الحارگ المصحف
حارِگ گلبك اِتوصَّف يمولاي
▪️▪️▪️▪️▪️
لسانات اليِحبُّونَك بُقَت تِلهَج
اِبگلبنَه النار واِعله الظلُم نِتفرَّج
مته يا غيرَة الباري متَه تُفرَج
تجِي واِتعدِّل ايْدينَك شكُو أعوَج
كلشِي ينتظِر سائِل
اِبجيتَك تِسحگ الباطِل يمولاي
▪️▪️▪️▪️▪️
ابو الحسن الوائلي
١٤٤٥هـ

▪️حوار بيْن جعفر بِن أبِي طالب الطيَّار والمولىٰ ابو الفضْل العبَّاس صلوات الله عليْهما في الجنَّة
▪️▪️▪️▪️▪️
عمَّك جعفَر الطيَّار يا كافِل خدر زينب
عزمَك ولَّد الاخطار كلشِي اِبعزمك اِتعجب
أشهدلَك ما صَح مثلك اِثنين
▪️▪️▪️▪️▪️
عمَّك انَه يابُو فاضِل هذا الحدِيث اِيلِمنَه
أوَّل لِقاء اني التقِي بِيْك اني وسْط الجنَّه
اِنته اِبْن اخويَه وافتخِر يابُو الفضِل اِنته اِبنَه
يالشايِل اِبروحَك وفَه حايِر شسُولِف عنَّه

يِحتار الوصُف شيْگُول عَن كِل الوفَه ابروحَك
كلشِي اِبغيْرِتَك مذهُول ضلَّت حتَّه بجروحَك
مَتوَصفَك لا ولله العناوِيْن
▪️▪️▪️▪️▪️
اني اللي ذلِّيْت الكفُر بِچفوف اِديَّه اْو هِنتَه
تِشهد بطُولاتِي إلِي وبالأخَص غزوة مؤتَه
أِي واحنَه ولْد الهاشمِي اليِحلِف الكُون اِبَّختَه
يا گمر هاشِم والوفَه مِن اهلَك اِتوارثتَه

اِنته وارِث الشِجعان واللي بالوِفَه تِلمَع
جدَّك والدِي عُمران أصْل الغيْره والمنبَع
مِن عِندَه أصْل الهيبَه والدِيْن
▪️▪️▪️▪️▪️
ميِّت گبُل ما تنولِد بَس اِنته عايِش بِيَّه
شاء القدَر واِستشهدِت ما شِفتَك بهالدِنيْه
عِشْت اِبحياتِي وما شفِت نورَك اْو فاگِد ضيَّه
وانظُر بطولاتَك إلِي باِحساسِي وِصلَت هِيَّه

طالِب حيدره معروف بِعيُونه الحرايِب فَن
اِيْمُوتَن يَم فِقاره اِسيُوف لو شافنَّه يِنجبرَن
يَم سِيْفَه اِسيُوف المعركَه اِتليْن
▪️▪️▪️▪️▪️
ياللي اِبوفَاك اْو غِيْرِتَك حار اِشيِسُولِف عمَّك
اِشعُضمَك يبو فاضِل نعَم والحُرَّه فاطِم أُمَّك
يا مَن شجاعة حيدره موروثَه تِمشِي اِبدمَّك
صفّيْن تِشهد والجمَل والنهروان العزمَك

يالعزمَك چبيْر اِهواي لا ما صَح مثِل عزمَك
ساحات الحرايِب هاي أبدَاً ما نِسَت إسمَك
يالطابع إسمَك بِيها للحِيْن
▪️▪️▪️▪️▪️
مِن عيْنِي لِمحَت هيْبِتَك بالحال بالِي اِتحيَّر
عگلِي اِنذِهَل واِتسائلِت هذا علِي لو حيدَر؟
يالهيْبِتَك هيبَة علِي أِي واِنتَه اِبْن القسوَر
چانَت زغِيرَه كربله اْو بيها حضُورَك أكبَر

گاع الطَف بُقَه مِحتار مِنَّك ضَل شكُو بيها
وانظُرها زغيْرَه اْو صار ثِگلَك يِصعَب اِعليْها
يالروحَك ناذِرها للحسِيْن
▪️▪️▪️▪️▪️
لمَّن نِزلْت المعركه مرتهِي اْو عزمَك كامِل
شِفتَك عليهُم حوَّمِت مِثْل الصِگر يالكافِل
أصنَام صاروا مِن لِگوا عبَّاس طولَك داخِل
واحِد وره الثانِي شفِت هذا جمِعهُم خاتِل

كِلهُم گِطعوا الأنفاس خيِّرهُم بُقَه ساكِت
اِگبالَك هُمَّه يا عبَّاس ما تِلگَه اللذي ثابِت
والشارِد ما يِدري الدرُب وِيْن
▪️▪️▪️▪️▪️
معنى الحميَّه والوِفَه والغيْرَه تِركَع لجلَك
يالماكُو بالدِنيْه مره حملَت اِبواحِد مِثلَك
نيشَان فضلَك يِنذكِر للخوَّه ثابِت فضلَك
عبَّاس واِنته اِبكِل زمَن طَف كربلَه يِشهدلَك

عالِي اِبكِل زمَن ضلِّيْت هَم قائِد وابِن قائِد
برض الطَف إلَك خلَّيْت اليِبقَه للأبَد شاهِد
چفِّيْنَك ويَّه نبلَة العِيْن
▪️▪️▪️▪️▪️
ابو الحسن الوائلي
ذو القعده ١٤٤٤هـ

▪️بين الإمام زين العابدين وعلي الاكبر عليْهِم السلام
▪️▪️▪️▪️▪️
رايِح اْو هاي الحياة
ظلمَه صارَت يالحبيب
حيلِي بعدَك كِلَّه مات
اْو جرحي ابدَاً ما يِطيب
رحيْل رحيْل گلبِي يِكسره
▪️▪️▪️▪️▪️
يساكِن بالگلُب تره فگدَك صعُب
يخويَه اْو نُور عينِي ابهذا عمرِي
ينِصفِي اِبغيْبِتَك أمُوت اِبمُوتِتَك
يغالِي اْو طيحِتَك تكسِرلِي ظهرِي

إذا ترحل شسوِّي ابعُمري مِن دونَك
العمُر ما يِسوه ولله اْوداعة اِعيُونَك
مِن دره اِبموتَك قريب
گلبِي سكتَه ضَل ينُوح
اِنته روحي اْو لو تغِيْب
خويَه ما تبقالِي روح
غِياب غِياب يِجرحنِي ذِكره
رحيْل رحيْل گلبِي يِكسره
▪️▪️▪️▪️▪️
يخويَه مِن طحِت الارُض هايَه شفِت
أصِد ليها بِدت بعيُونِي تِصغَر
علِيْك اِدموعِي دَم شبابَك ما سِلَم
عِمَت عينِي علَه حالَك يالاكبر

طحِت فُوگ الترايِب والجرِح بِيَّه
يخَي روحِي عليْك اِبحُرگه محنِيَّه
جِسمَك الفوگ الرِمال
غارِگ اِبفِيْض الدِمَه
ما سِلَم حتَّه الخيال
اِمْن السِيُوف الظالِمه
طريْح طريْح جِسمَك أنُظره
رحيْل رحيْل گلبِي يِكسره
▪️▪️▪️▪️▪️
ابونَه اِبدمعِته إِجاك اِبحرگِتَه
يوِن والدِنيْه وسْط اِعيونَه ظلمَه
اِبدمِع عينَه اليهِل نِدَب يابُو الفضِل
تعال اِويايَه للأكبَر نلِّمَّه

ابونه مِن اجاك اِدموعه مذروفه
عله الغبره توذَّر جِسمَك اِيْشُوفَه
يِنحَب اْو يِبچِي عليْك
نادَه والوَن ما هِده
يبنِي ليْش اِمگطِّعيْك
الله لا يِنطِي العِدَه
عليْك عليْك دمعاتَه حمره
رحيْل رحيْل گلبِي يِكسره
▪️▪️▪️▪️▪️
ابوگِعتَك عالترُب دمِعنه ضَل يصُب
الخِيْم والبيها باِمصابَك تألَّم
يكسرتنَه البِدَت الگلُوب اِتألِمَت
عليْك اِنته اِنكسَر گلْب المُخيَّم

چنِت إِنته هوانا اْو عافِيَة ناسَك
يتاليها وصَل مِتگطِّع إحساسَك
چنَّه نِنظُرلَك سلام
يا علِي اْو طولَك أمَل
هِسَّه جِسمَك بالخِيام
اِنشُوفَه متگطَّع وصَل
الدليْل الدليْل فگدَك يِدمره
رحيْل رحيْل گلبِي يِكسره
▪️▪️▪️▪️▪️
بقه سيْل الدمِع نخيْت بهالوضِع
يخَي رِدتَك تشاهِد حيرَة اُمَّك
تصِد ليْك ابحزِن تلِّمَّك لو توِن
بقت دمعتها تجري فوگ جِسمَك

گلُب أُمَّك صُفَه مثْل الجمُر يِلهَب
اِبدمِعها اِتگابُلَت ويَّه دمِع زينَب
زينَب اْو لِيْلَى اِبونِيْن
يِبچَن اْو شِهگَن بچِي
اِعليْهِن ايْصِد الحُسيْن
اِبحيْرَه ماعِنده حچِي
يشُوف يشُوف واِبصدرَه حسره
رحيْل رحيْل گلبِي يِكسره
▪️▪️▪️▪️▪️
چِوه روحِي الفگِد ردِت مِنَّك ترِد
اْو ترِد عافِيْتِي ليِّه اتمنَّه مِنَّك
المدامِع ما تشِح لوَن بِيدِي يصِح
أجِمعَك خويَه واِبروحِي ادِفنَك

رحِت عنِّي اْو رحيْلَك گلبِي ميْحِملَه
وحگَّك طيْحِتَك فُوگ العِلَل عِلَّه
يا علِي فگدَك ثجِيْل
يالوِداعَك مُوتتِي
فوگ ما اني عليْل
زاد مُوتَك علِّتِي
أخوك أخوك تِكسرلَه ظَهره
رحيْل رحيْل گلبِي يِكسره
▪️▪️▪️▪️▪️
شسُولِفلَك بعَد يخويَه بالشِدَد
عليْمَن أستنِد واِنته تچُوتِي
يخَي گلبِي اِنچِوه صُفَه خنگَه الهوه
عگُب عيناك راح اتمنَّه مُوتِي

حُرمنِي المُوت مِنَّك يا ضِوه عينِي
خذَك مِنِّي الأجَل واني يخلِّيْنِي
لو شفِت أُمَّك وابُوك
ماتوا اِنته مِن رحِت
واِنكِسَر گلبَه أخوك
واِنفِجَع لمَّن متِت
تراه تراه ما يِبقَه صبرَه
رحيْل رحيْل گلبِي يكسره
▪️▪️▪️▪️▪️
ابو الحسن الوائلي
ذو الحجَّة ١٤٤٤هـ

▪️حوار بين ليلة العاشِر وزينب عليها السلام
▪️▪️▪️▪️▪️
اني يخِت عبَّاس ليل المصيبَه
يالجمرِچ اللي بِيچ يِسعر لهيبَه
اني واكلمِچ عينِي اِعله همِچ يالحوراء
▪️▪️▪️▪️▪️
انه ليلة العاشِر يخْت الحسِيْن
تسهريني المسيِّه اِبلوعَة البِيْن
مَعاج بهالمسَه اِرجال اْو نِساويْن
اْو مثِل هذا الوكِت باچِر تِحيريْن

باچر تمُر اِجروح يِصعب هضُمها
يا زينَب اْو ياذيِچ لو مَر سهمها
يلچِم دليلِچ ما يِبقَه حيلِچ يالحوراء
▪️▪️▪️▪️▪️
ثگيله اِهوايَه هِيَّه ليلة اليُوم
عله گلبچ يزينَب صبَّت اِهمُوم
مِسَه باچِر وحيده اْو يمِّچ الگوم
اْو تشُوفين الثره مَصبوغَه بِدمُوم

العاشِر يجيب آلام الگلبِچ تجرحَه
باچر هلِچ عالگاع تلگيها طرحَه
فوگ الوطيِّه كلهُم سويَّه يالحوراء
▪️▪️▪️▪️▪️
بعَد هاي المسيِّه كلشِي يِرتاب
صعُب حتماً يبنت الزهره المْصاب
اشوفِچ وحدِچ اِنتِي اْو طرحَه الاحباب
فريسَه اِتصيري يَم اِحلوگ الذياب

اِشحالِچ يبِنت الحيْد واهلِچ رمايه
محَّد يِضَل اِوياچ بَس السبايه
كل البقالِچ نسوه اْو خيالِچ يالحوراء
▪️▪️▪️▪️▪️
الدمِع باچِر ابَد ما يوصِف الحال
وحيده اِبليله ظلمه اِبلايَه كفَّال
تطِيح اهْل الحميَّه اْو تِبقه الانذال
اْو بعَد چَف الكفيْل اِتگودِچ اِحبال

ولدِچ والاخوه اِتطيح والحيره حيره
اْو باچِر عگب عبَّاس تمشِين اسيره
والحامِي كلفَه مرمِي يوسفَه يالحوراء
▪️▪️▪️▪️▪️
بعد طيحَة كفيلچ يوگَع اِحزام
صعُب وضعِچ يصير اْو لا بالاحلام
الخِيول اِبلايَه رحمَه اِتدوس الاسلام
اْو قُطع مِن جِسمه يوصلِّچ للخْيام

اِتشُوفين اخوچ اِحسين يالحرَّه طايِح
فُوگ الترُب واِدماه اِتغيْر الملامِح
اِبعطْر الاخوَّه اِتعرفينَه هوَّه يالحوراء
▪️▪️▪️▪️▪️
اشُوفِچ باچر اِنتي وانظُر الصار
خيَم بَس نِسوه بِيها اْو تشتعِل نار
الحگِيلِي يعمَّه اِتصيِح الزغار
عله اليِحصَل يزينَب يبچِي الحجار

اهْل الوفَه خلّوچ مِحتاره بامرِچ
محَّد يضَل اِوياچ والباقِي صبرِچ
كلها تندبِچ اْو محتاره وحدِچ يالحوراء
▪️▪️▪️▪️▪️
بعَد كل اليمُر يا بِت علِي اِشلُون
فقَط نِسوه اِبسبِي كِلكُم تروحُون
نعَم واصعَب جرِح يالحُرَّه مَيهُون
نِسَه واِعليكُم اِتصِد كِل العيُون

ما ترحَم النسوان لِسْن الشِماتَه
صاحوا تره العبَّاس ذنِّي خواتَه
لا ترحمُوهِن حيْل اِضربُوهِن يالحوراء
▪️▪️▪️▪️▪️
ابو الحسن الوائلي
ذو الحجَّة ١٤٤٤هـ

▪️▪️▪️▪️▪️
يعِيْن الله الحُسيْن
وحيد اِبلا مُعين
بُقَه وحده غريب
يعِيْن الله الحُسيْن
▪️▪️▪️▪️▪️
مِن المُوت شاف اِحسيْن وحده
مِحتار اْو يِشُوف الاف ضِدَّه
لا أخ باقِي يمَّه اْو ماكُو ولده
وحيد اْو ماكو ابو غيره اْو يسِندَه

العدد ضِدَّه عدِيد
واهُو ضِدهُم وحِيد
بُقَه واگِف غريب
يعِيْن الله الحُسيْن
▪️▪️▪️▪️▪️
مثِل شجره اِبوسَط صحراء هيمَه
وگف مثْل الهوه اْو يِنشَم نسيمَه
يِضَل اِحسين حايِر يا هضيمَه
يَم وادِم مِن الغيره عديمَه

ابُو اليِمَّه الچبير
صدِگ وحده يحير
بُقَه اْو جمره لهيب
يعِيْن الله الحُسيْن
▪️▪️▪️▪️▪️
يِباوع يِمنَه يِسره اِتشُوف عينَه
العليْل اِبوحده باقي بالضعينَه
يِناظِر ما لِگه واحِد يِعينَه
اْو يِشُوف اِگباله وين البَاع دينَه

يِباوِع بالطفُوف
مُناصِر ما يِشُوف
يِنادي اْو لا مُجيْب
يعِيْن الله الحُسيْن
▪️▪️▪️▪️▪️
الحُسيْن ابْن الحميَّه الروحه ترفَه
رشِگ نِزلت اِبجِسمَه اِسهام صلفَه
بُقه الحَد گلبَه گوَّه اِيشيْل چفَّه
اْو وگع عالگاع مِن مُهره يوسفَه

وگف گلْب الرِياح
لمَن عالغبره طاح
الذبِح صار النصيب
يعِيْن الله الحُسيْن
▪️▪️▪️▪️▪️
ابُو السجَّاد باقي اِبطرِگ صبره
وحيد اْو عالشريعه اِحزام ظهره
رغُم ما منطرِح بَس عالي قدره
اْو لِوجْه الله فِدوه اِنگطع نحره

الاجَل يِبچي اْو نعاه
لمَن شافَه اِبدماه
اِبتراب اْو دَم خضِيْب
يعِيْن الله الحُسيْن
▪️▪️▪️▪️▪️
طريح اْو لا مُناصِر باقِي يَمَّه
اْو بُقَه فُوگ الترايِب يِجري دمَّه
ولا يِسوه الصبُر واِحسين جِسمه
اِنداس اِبخيل عشره اِبلايَه رحمه

اِبسحِگ جِسْم الصريع
وصَل مِنَّه تضيع
اِشيِلمها اْو ما تطِيْب
يعِيْن الله الحُسيْن
▪️▪️▪️▪️▪️
الولِي طاح اِبدماه والغبره مَضجَع
اْو مَلائكة الله رادَت كِلها تِفزَع
تِگطَّع جِسمَه هوَّه اْو مِن تِگطَّع
اِبثواب الله وصَل جِسمَه توزَّع

ابُو گلْب العطُوف
وصَل صايِر اشُوف
يِضَل لجلَه النحِيْب
يعِيْن الله الحُسيْن
▪️▪️▪️▪️▪️
ابو الحسن الوائلي
١٤٤٥هـ

▪️للإمام الحسين عليه السلام
▪️▪️▪️▪️▪️
ابكربله ارتجّ المكان اْو كلشي ضل نايِح
واِنحنه ابطوله الزمان عاللذي طايِح
عليْه ايْنُوح صفَه مَذبُوح
▪️▪️▪️▪️▪️
وگف شفْت الزمان ابطوله حاسِر
اْو شفِت مذبوح طايِح ظهره كاسِر
وگف مِحتار فوگه اْو فِكره حايِر
يصِدله ابعينه صار اْو دمعَه ماطِر
ابرغُم كلشِي بقه اِبصبره يكابِر
انذِبح والذبحه كِسرَت بالخواطِر

حامِي ديْن الله تصيْر يا خلَگ هايَه
وحده ما عِنده نصيْر والعِده اِهوايَه
نظَر مشبُوح صفَه مَذبُوح
▪️▪️▪️▪️▪️
صمِت والسِمه صارت كلها حمرَه
واشوف الگاع مُصفرّه اْو مِغبْرَه
اليشِم الهوه ضَل گوّه يِجُرَّه
اذيِّه اْو هالحدَث كِلشِي يِحيْرَه
اقَل تفسِير للمنظَر يِفسرَه
عمُود امْن السِمه طاح اِعله ظهره

عالثره مِن جِسمَه مال مالَت الدِنيْه
طيحِتَه طيحَة جِبال عالارُض هِيَّه
ثِجيْلَه اِتلُوح صفَه مذبُوح
▪️▪️▪️▪️▪️
عليْه كلشِي بِچَه اْو سالَت دمِعتَه
اْو رِكد كلشِي اِبوسَط وجدانَه سكتَه
وگع فوگ الثره اْو صارَت ذبِحتَه
اْو خِنَگ صدر الهوه العالِي اِبشهِگتَه
العظيم المالِي كِل الدِنيْه بَختَه
الهضُم غطَّه الارض كلها اِبوگِعتَه

شِجره بالطَف الحُسيْن اْو كربلَه صحره
جِسمَه مِن گَد ما طعيْن فارِش الغبره
بقَه مطروح صفَه مذبُوح
▪️▪️▪️▪️▪️
مُصِيبَه اْو يا مُصِيبَه واقسَه مِحنَه
عمُود الدِين واللي اِيْحامِي عنَّه
الشمِر فوگاه الف يا وسفَه ثنَّه
اْو گِطَع بالسِيْف راسَه مِن تِعنَّه
ابخِيُول الاعوجِيَّه اِيزيْد حِزنَه
عليْه داسَت اْو كِل عظمَه تطِحنَه

الحافِر الداس الاِمام اِشگَد جلِد شايِل
اْو صُوت تكسِير العِظام للخِيَم واصِل
تسِحگَه اِبروح صفَه مذبُوح
▪️▪️▪️▪️▪️
ثجيله اِهوايَه عِنْد اِبْن الحميَّه
چِفُوفَه اِتصافُح الچَف الرخيَّه
لهذا اِحسيْن برض الغاضريَّه
اِنذبَح ضامِي اْو بقه جِسمَه رميٍّه
الف مرَّه اِلَه سهلَه المنيَّه
نعَم والصعبه لو بايَع اُميَّه

غيرة الله والكتاب اِبعزمَه مثَّلها
والعِده اِگبالَه ذِياب بيِّنَت كِلها
تِزَيْد اِجروح صفَه مذبُوح
▪️▪️▪️▪️▪️
عجيبه ايْضَل وحِيْد ابْن الصُميده
ابرغُم ما چَان يِأمُر دِنيْه بِيده
اِبوگِعتَه اِعلَه التراب اِتضَل اكِيده
الحصىٰ عَن السِمه كلِّش بعِيده
نِزف دمَّه لجِل حِفْظ العقِيده
اْو نِزَف نُور العرِش مِن دَم ورِيده

طاح ابو اليِمَّه قتيْل اْو مِنَّه سال الدَم
جِسمَه للمذهَب سبيْل حتماً اِتقدَّم
فداء اِيْروح صفَه مذبُوح
▪️▪️▪️▪️▪️
الفَلا صايِر شخُص بالكون مِثلَه
فلا يُوصَل اظِفره الجيْش كِلَّه
عظيْم اْو بالصبُر حتماً تِحلَّه
وگع بَس چَان قدره اِبغيْره يِعلَه
جميل اِبكِل وضِع يِنشاف شِكلَه
لچِن بالذبِح چان اِحسيْن الاحله

هوَّه دُومَه اِنشُوفَه دِيْن يِبقَه للتالِي
يِبقَه موجُود الحُسَيْن اِبكِل وكِت عالِي
يِضَل ايْفُوح صفَه مذبُوح
▪️▪️▪️▪️▪️
ابو الحسن الوائلي
ذو القعده ١٤٤٤هـ

▪️الامام الحسين عليه السلام
▪️▪️▪️▪️▪️
هذا ابو اليِمَّه امير ازمانها
طاح واهتزَّت السبعه اركانها
▪️▪️▪️▪️▪️
هذا ابو اليِمَّه الامير ابكل وطَن
اتسَيَّد ابعزمَه اْو صُفه تاج الزمَن
طاح والسبعه ابوگعته اتألِّمَن
طاحن اْو ثبّتها وسْط امچانها
▪️▪️▪️▪️▪️
هذا ابو اليِمَّه الملِك ماكو سِواه
مِن اجِل دين الله كل دَمَّه فِداه
اتبرَّع ابعُمره اْو لجِل دِينَه نِطاه
ابفضلَه رَدَّت عافيتها اديانها
▪️▪️▪️▪️▪️
مِن وِگع فوگ الثره السبعه بِچَت
وانحِنه طول الزمان اْو ما ثِبَت
وابوگِعتَه الدِنيْه كلها اتعجِبَت
شافِته اموَسَّد بُگه ابتربانها
▪️▪️▪️▪️▪️
ابكربله حالة ابِن خير العمَل
چَن سِمَه مِن السِمَه ابدَمَّه نِزَل
ويلِي فوگ الگاع مِتوسِّد جِبَل
والفرح تارِس بُگه عدوانها
▪️▪️▪️▪️▪️
جِسمه فوگ الگاع مِن مال اْو هِوَه
ضامِي وسفه اْو بالضِمه گلبَه اِنچِوه
طاح واِبصدر الولِي مات الهَوه
اِنگلبَت الدِنيْه حمَار الوانها
▪️▪️▪️▪️▪️
اِنگلب احمر مِن وِگع لون الفضَه
للشمِر فُرصَه اِجه ابذَبحَه حِضَه
ويلِي باتَت كِل عِظامَه اِمرَضرِضَه
اْو سَدَّت الدِنيْه ابكسِرها آذانها
▪️▪️▪️▪️▪️
دَمَّه فوگ الگاع مِن سال اْو نِزَف
ويلي صوت الفاجِعه صاح اْو هِتَف
تبچِي حتَّه النار والحال اِختِلَف
اْو عالِي صُوت النُوح مِن اِجنانها
▪️▪️▪️▪️▪️
ويلِي لمَّن جسْم ابو الاكبر وگع
الشمِس ماتت اْو كِل ضيها انگِطَع
اْو راس ابو اليِمَّه عله اِرماحه اِرتِفع
عالرمح مِن رِكد ضوّه اكوانها
▪️▪️▪️▪️▪️
مِن بِده اِيقِل نور ابو اليِمَّه اليِشِع
مِن بُگه حاله عله هذا الوَضِع
اصوات باطِل هِيَّه ضَلَّت تِنسِمِع
واِبدِماءَه اِحسِيْن گص السانها
▪️▪️▪️▪️▪️
آني مِتيَقِّن اْو هاي الراجِحَه
ماهُو مَيِّت والحقيقه الواضِحه
هوَّه عاش اْو مات سيف الذابِحه
هاي ما واحِد حِسَب حسبانها
▪️▪️▪️▪️▪️
ابو الحسن الوائلي
شعبان ١٤٤٤هـ

▪️الامام الحسين عليه السلام
▪️▪️▪️▪️▪️
برَز والروح مِلتهيَه اِبذكِر ربها
وحده اْو كِل جمُوع الجيْش غالبها
▪️▪️▪️▪️▪️
نزَل أشبَه الناس اِبجدَّه للحومَه
اللي كِل اِعلُوم حيدَر صارَت اِعلُومَه
الحُسيْن الخلَّه كِل اِعداه مهمُومَه
اْو خلَّاهه تعيْش اِبرعُب مِن طبها
▪️▪️▪️▪️▪️
مِن الخُوف ضَل كِلمَن يشُوفه ايهِيْج
اْو كِلها اِگبالَه ضلَّت گوَّه تِبلَع ريْج
اِشويَّه اِشويَّه هاي الگاع گام اِتضيْج
بيهُم والحُسيْن اِبعزمَه راعُبها
▪️▪️▪️▪️▪️
ماتَت مِن رعُبها اِخيُول والفِرسان
اْو مِن هِيبة الوالِي اِحتارَت العِدوان
طالِب عِد علِي واِبنَه اْو دِخَل ميدَان
مِنُو اِيْرِد الذي المُرتضى اِمدرُّبها
▪️▪️▪️▪️▪️
اِبعينَه الحلوه ابُو اليِمَّه يصِد اِلها
مُوش اِبعينَه هاي اِجمُوعهُم كِلها
مِن صاح اِبن حيدر صُوتَه جفَّلها
اْو نيران الغضا فُوگ العِدَه صبها
▪️▪️▪️▪️▪️
گُصَص هذا الجمِع ضَل مايهِن ناشِف
اْو مُو مِن سيفَه بَس مِن هيبِتَه خايِف
نُص شِردَت اْو نُص خِتلَت وره الواگِف
اْو نُص اِمْن الرعُب غطَّت شواربها
▪️▪️▪️▪️▪️
شياطِين الولِي بِجموعها اِيْصِدها
عرفهُم ناس ذرَّة غيره ما عِدها
اْو مِن صَد ليها كِلِّش عُبرَت اِبحدها
هالناس اِبلِسان السيْف خاطبها
▪️▪️▪️▪️▪️
جِثَث واِدمُوم گاع الحرُب ماليها
مِثل حملات ابوه هُوَّه حِمَل بيها
يخربُطها اِبعزِم سِيفَه اْو يِصفِّيها
اِبكيفَه اِشلُون ما رايِد يِرتِّبها
▪️▪️▪️▪️▪️
بُگت نيران سيفَه اِعلَه العِدَه تِنصَب
اْو من اِحسين كلمَن واگف اِستغرب
أسَد غابَه اْو عليهُم صار يِتگلَّب
يِصَفِّيها اِبيِمينَه اْو ساعَه يِگلبها
▪️▪️▪️▪️▪️
اليِلاگيْه بالخطَر جِدَّامَه حتماً حَس
الشُجاع اِگبالَه ضَل بالگوَّه يِتنفَّس
عليهُم وجْه ابُو السجَّاد مِن عبَّس
الرَب يُوم القِيامَه اِعليْها كاتِبها
▪️▪️▪️▪️▪️
الذِيابَه اِعليْه كِلها اْو مالَت الكَفَّه
ظُفرَت بالأسَد مِن طاح يا وسفَه
عليْه دايِر غدِرها اْو ضعِّفوا چفَّه
اْو مِن غِدرِتَه اِعليْه نِشرَت مخالِبها
▪️▪️▪️▪️▪️
ابو الحسن الوائلي
ذو القعده ١٤٤٤هـ

▪️بين زينَب وابا الفضل العبَّاس عليهِما السلام
▪️▪️▪️▪️▪️
اِجيت اِبمُصابِي
اوجِّه عِتابي
أعاتِب واشكِي امري
يخويه اْو دمعِي يِجري
▪️▪️▪️▪️▪️
للنهر جِيْتَك يخُويَه اِويايَه جِبْت احزانِي
اْو بِيَّه اقسَه اِمْن المُخيَّم تِلتهِب نِيرانِي
يالچِنْت كِل ما أجِيْلَك اِنته تِتلَگّانِي
تدرِي جُثمانَك الطايِح انشْدِه خلَّانِي

أشُوفَك رميَّه
اْو دمِعتِي جريَّه
وگِعتَك بيها كسرِي
يخُويَه اْو دمعِي يِجري
▪️▪️▪️▪️▪️
مِن اِجيتَك گلبِي خايِف والمدامِع تِهلِي
خُطوه تِمشِي يابُو فاضِل خُطوه تِعثَر رِجلِي
چنِت تِزعَل لو تِشاهِد شمِس لاحَت ضِلِّي
هِسَّه شِتسَوِّي اِمْن اگِلَّك هالغرُب تِنظُرلِي

العِده ما رعيونِي
اِبغِيابَك ولونِي
تصِد كِلها اِعله خِدرِي
يخويه اْو دمعِي يِجري
▪️▪️▪️▪️▪️
يمَّك اْو مشدُوه بالِي والدمِع ضَل ماطِر
والخطر مِن مات امانَك بالنفَس ضَل دايِر
مدرِي أعتِب مدرِي أبچِي گلبِي حَتماً حايِر
تِفتَح اِعيُونَك أريدَك شُوف بِيَّه اِشصايِر

الحبيبه التوِدها
اِتركِتها وحدها
اِنهِتَك بِجفاك سِترِي
يخويه اْو دمعِي يِجري
▪️▪️▪️▪️▪️
چنِت مِن أمشِي يخُويَه تمشِي خلفِي اِتحامِي
تمسَح آثار اللي ضلَّت بيها دوس اِجدامِي
هِسَّه رِيتَك يا كفيلِي اِتشُوفه فِعْل ايّامي
اِجدامِي مَچويَّه تراهه ابسبَب نار اِخيامِي

الخِيَم يا ولينَه
اِحرِگوهِن علينَه
بقيت اِبحيْرَه تدرِي
يخويه اْو دمعِي يِجري
▪️▪️▪️▪️▪️
أمُر أفجَع مِن وگِعتَك مرنِي يِلچِم أمره
اِحسيْن ابُو اليِمَّه فِجعنِي اِبطيحِته عالغبره
عالترايِب شِفتَه مرمِي اِگبالِي گِطعوا نحره
واِسمعِتها اِخيُول اُميَّه عظُم جِسمَه اِتكسره

الشمِر حَز رگُبتَه
اْو ذِبحنِي اِبذبِحتَه
متِت لو ماكو صبرِي
يخويه اْو دمعِي يِجري
▪️▪️▪️▪️▪️
اِبحيرَه ما عندِي مُحامِي والحزن يبرالِي
مِنكسُر گلبِي عليْكُم واِختلَف كِل حالِي
عِفتوا اِختكُم بِيْن غُربَه حايِره اِبلا والِي
باقِي بَس الصبُر عندِي والدمِع ضَل هالِي

الضعَن يا هضيمَه
الغرُب يَم حريمَه
هِدَم كِل حيلِي دهرِي
يخويه اْو دمعِي يِجري
▪️▪️▪️▪️▪️
صدِگ صارَت يابُو فاضِل راح اضَل اِبوحدِي
وانِي مِحتاره اِبمُصابِي والصبُر بَس عندِي
اِمن الضرُب ضلَّيْت تدرِي گوَّه احرِّك زندِي
بأَزمه زينَب ياخُو زينَب مدرِي يمتَه اِتعدِّي

الوقوره النجيبَه
حزينه اْو غريبَه
الهوه يلچملِي صدرِي
يخويه اْو دمعِي يِجري
▪️▪️▪️▪️▪️
ابو الحسن الوائلي
النجف الاشرف
ذو القعده ١٤٤٤هـ

▪️للإمام الحسين عليه السلام
▪️▪️▪️▪️▪️
يا حُسين.. يا نبض هاي الحياة
يا حُسين.. إنته عامود الصلاة
يا حُسين.. يا سفينه للنجاة
‌▪️⁩‌▪️⁩‌▪️⁩‌▪️⁩‌▪️
اشما اباوعلك اشوفك
سيّد الدنيْه او ضواهه.. يا إمامي
ماتت الدنيْه أحسها
والذبح هوّه الحياهه.. يا إمامي
ابلا ذبحتك تدري هيّه
كلشي ما تسوه تراهه.. يا إمامي
هيّه مخنوگه شفتها
منّك اخذت كل هواهه.. يا إمامي

يا حُسين.. سيّدي شفتك ضوه
يا حُسين.. يا نفس هذا الهوه
يا حُسين.. الدين مِن دونك شُتات
‌▪️⁩‌▪️⁩‌▪️⁩‌▪️⁩‌▪️
واگف ابوحدك اشوفك
والعدو كثره سهامه.. حيّرتني
زلمه ما بيهم اشاهد
وانظُرك عسكر شهامه.. حيّرتني
انظُر اعدائك مخالِب
سيّدي او كلّك سلامه.. حيّرتني
همّه مِن رادوا ذبحتك
رادت اتقوم القيامه.. حيّرتني

يا حُسين.. الانِس والجِن والملَك
يا حُسين.. تجري دمعتهم إلَك
يا حُسين.. يا قتيل العَبرات
‌▪️⁩‌▪️⁩‌▪️⁩‌▪️⁩‌▪️
يعله دين اللّٰه ابوگعتك
هالقضيّه او بيها مهتَم.. يا حَبيبي
جسمك اعله الغبره دامي
ابطيحِتك كلشي تألّم.. يا حَبيبي
ما توافيك المدامِع
حگها لو تجري الدمع دَم.. يا حَبيبي
وسفه يابو الغيره تعطش
وانته كِلّك تجري زمزم.. يا حَبيبي

يا حُسين.. انته للدنيْه عمود
يا حُسين.. ضامي يا سِر الوجود
يا حُسين.. تعطش ابصفّ الفُرات
‌▪️⁩‌▪️⁩‌▪️⁩‌▪️⁩‌▪️
يا سلام اللّٰه اعله گلبك
يا سلام اللّٰه اعله صبرك.. يا عظَمتك
يا سمه او عالغبره طايح
جبل عالتربه أنظرك.. يا عظُمتك
لأن بانفاسَك مُحمّد
سيّدي گطعوه نحرك.. يا عظُمتك
ابصدرك انته السمه سرها
هالسبب سحگوه صدرك.. يا عظُمتك

يا حُسين.. ابصدرك أسرار السمه
يا حُسين.. اْو چم سهم بيْه انرمه
يا حُسين.. شلِت كِل النايِبات
‌▪️⁩‌▪️⁩‌▪️⁩‌▪️⁩‌▪️
حايِر اشما احچي عنّك
بيك ما يكفي الحچيْته.. شحچي عنّك
سيّدي ماكو ابصفاتك
عالي يا قدرك لگيته.. شحچي عنّك
محّد ايوافي جميلك
مات دين اللّٰه او حييْته.. شحچي عنّك
نبضه لو ما اِنته يوگف
سيّدي او نبضَك نِطيته.. شحچي عنّك

يا حُسين.. الك هالدنيْه تعود
يا حُسين.. كعبه تبقه للخلود
يا حُسين.. الدين لو ما إنته مات
‌▪️⁩‌▪️⁩‌▪️⁩‌▪️⁩‌▪️
يا عظيم او عالي قدرك
ما أوفّي اشما اكلمك.. وانته كعبه
الذبحه ما چانت تهمّك
بس عله دِين اللّٰه همّك.. وانته كعبه
والارُض چانت رخيّه
او ثبتتها ابمجره دمّك.. وانته كعبه
والتسعميّه او ألفها
صلّت او تربتها جسمك.. وانته كعبه

يا حُسين.. صلّت اسيوف او رماح
يا حُسين.. صرت كتله امْن الجِراح
يا حُسين.. طايح او كِلّك ثبات
‌▪️⁩‌▪️⁩‌▪️⁩‌▪️⁩‌▪️
كعبه فوگ الغبره شفتك
والعده صلّه نبلها.. ابمجره دمّك
اتوضّت ابدمّك شفتها
سيّدي او نزعت خجلها.. ابمجره دمّك
والسِيوف الضلّ أثرها
والرماح اعليك كلها.. ابمجره دمّك
جسمك ابكتلة جروحه
هوّه صاير كعبه الها.. ابمجره دمّك

يا حُسين.. طحت عالغبره كسير
يا حُسين.. او للسمه صاعد أمير
يا حُسين.. انته ذلّيت الطغاة
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
ذو الحجّة ١٤٤٤/٢٠٢٢ هـ

▪️السيدة زينب عليها السلام
▪️▪️▪️▪️▪️
زينب تنادي ابهاي الاحزان
اْو فوگ الثره مطروحه الاخوان
يا زينب يا زينب
▪️▪️▪️▪️▪️
اِطلعْت اْو دمِع مِن عينِي اجريْه
اِبْن اُمِّي حيره وين الگيْه
"اِسمعْته يوِن واِتگرَّبِت ليْه
اِلگيْت الولِي مِتوسِّد اِيديْه"

بدموعي يبْن اُمِّي اعتنيتَك
عالغبره مِتوسِّد لگيتَك
يا زينب يا زينب
▪️▪️▪️▪️▪️
جيتَك حزينه اْو جرحِي ويَّاي
مات السلام اْو بس خطر جاي
"يحسين اِجيتَك فاجده الراي
وامْن الرعُب تتراجف اِعضاي"

شفتَك عله التربان دامِي
خويَه الرعب رجَّف اِعظامِي
يا زينب يا زينب
▪️▪️▪️▪️▪️
يمَّه وصلْت اِبدمعة بالعين
اِسقيني گال اْو صحِت بالحيْن
"ياناس الدرب المشرعه اِمنيْن
عطشان خَيْيِ يا مُسلميْن"

لو بيدِي اصيرن ماي واسگيْك
محتار خويه اِشلون اداويْك
يا زينب يا زينب
▪️▪️▪️▪️▪️
لمَّن طحِت صيوانِي حرگوه
وامي وابويه الحيْد شِتموه
"طولي اللي ما ينشاف شافُوه
اْو صوتِي اللي ما يِنسمِع سمعُوه"

اني اللي خدرِي چان عالِي
مسبيَّه اصيرَن لنِّي تالي
يا زينب يا زينب
▪️▪️▪️▪️▪️
دمعِي بعد ما راح اهِملَه
يَم الشريعه اِهناك اِهِلَّه
"انا رايحه العبَّاس اگلَّه
نومَك يخويه مو محلَّه"

اگعد اْو شوف اِبزينب اِشصار
گلبي يخويه اِهواي مِحتار
يا زينب يا زينب
▪️▪️▪️▪️▪️
عبَّاس تدري اِختك سبوها
تسمع يريت امْن الولوها
"ايصيحون زينب طلَّعوها
اْو حرگوا گلبها اِبراس اخوها"

ما عندي والي اْو غربه هالناس
الحگلي يا خويَه يعبَّاس
يا زينب يا زينب
▪️▪️▪️▪️▪️
ها يا كفيلي المالِي غيره
هالطيحه يالكافِل چبيره
اِبزودك الجايِبها اميره
باچر يخُوها اِتروح اسيره

عگْب الهوادِج عالهزايِل
تاليها اركَب يابُو فاضِل
يا زينب يا زينب
▪️▪️▪️▪️▪️
ابو الحسن الوائلي
١٤٤٥هـ
▪️▪️▪️▪️▪️
*تضمين ابيات نعي بصوت المرحوم
السيِّد جاسِم الطويرجاوي رحمة الله عليه