▪️في ولادة الامام الحسين عليه السلام
▪️▪️▪️▪️▪️
هالليله هذا العيد من اجمل الاعياد
مستبشِره الاكوان ابمولِد ابو السجّاد
▪️▪️▪️▪️▪️
هالدنيْه ويّانه
هالليله فرحانه
والفرح عنوانه هاي المسيّه
السان المدِح حايِر
مِن الفرح طايِر
نور انوِلد صايِر عنْد الزچيّه

كلشي فرح هاليوم ابجيّة ابو الامجاد
مستبشِره الاكوان ابمولِد ابو السجّاد
▪️▪️▪️▪️▪️
ابمولِد ابو الاكبر
صوت الوحي بشّر
اْو بيت النبي اتنطّر وامتانِي جيته

مثْل الورِد ازهر
والعالم اتنوّر
مِن فاطِمه وحيدر متضوِّي بيته

ابّيت النبي المختار صار الفرح يزداد
مستبشِره الاكوان ابمولِد ابو السجّاد
▪️▪️▪️▪️▪️
ايحير المدِح عَنَّه
لا مو بشر چَنَّه
ابوسْط المهد جَنَّه هالليله نازِل

مثله ولا اجمَل
مِنّه الشمِس تِخجَل
وابضَيَّه تِتغزَّل ما مِثله حاصِل

وانتشرت الافراح في عالم الابعاد
مستبشِره الاكوان ابمولِد ابو السجّاد
▪️▪️▪️▪️▪️
رب السِمه ابعِلوَه
مِثله فلا سوَّه
ابكلشي انفرد هوَّه ما مِثله صايِر

كل الفخر يِحوِي
بالعالم العِلوِي
مثْل الشمِس يِضوِي چَن گمر نايِر

سيِّد صفه هوّه في عالم الاِرشاد
مستبشِره الاكوان ابمولِد ابو السجّاد
▪️▪️▪️▪️▪️
فوگ الافُق طالِع
چنَّه نجِم لامِع
لنّه نِزَل راكِع محلَه ابو الاكبر

ضوّه الارض نوره
والدنيْه مسروره
ما أجمل الصوره البيها تصَوّر

وحْي السِمه ناده ابصوته عله المِيعاد
مستبشِره الاكوان ابمولِد ابو السجّاد
▪️▪️▪️▪️▪️
الماكو مثِل شِكلَه
رَب السِمه امنزلَه
رحمَه اْو منو مِثله سوّاه ربّه

هذا ابو اليِمَّه
مِن خالِقَه رحمَه
حُبّه صُفه نِعمَه عالناس حُبّه

صار ابوضُوحه التام سِر عالم الاِيجاد
مستبشِره الاكوان ابمولِد ابو السجّاد
▪️▪️▪️▪️▪️
ابو الحسن الوائلي
شعبان ١٤٤٤هـ

شَع ابو فاضِل عله الدِنيْه ضِواه
النور لمّن صَد عله نُوره خِجَل
ما گِدر حَتَّه الگُمر يِضوِي بِحيْث
غاب لَمّن شاف عَبّاس اِكتِمَل
▪️▪️▪️▪️▪️
#العباس عليه السلام

تَعْتَلِي الِافْرَاحُ فِي هَذَا الْمَسَاء
هِيَ زَادَتْ هِيَ حَتّى فِي الْجَمَاد
وِلَدَ الْعِلْمِ وَصَوْتُ الرُّوحِ صَاحِ
اشْرَقَت انْوَارَهُ "زَيْنُ الْعِبَاد"
▪️▪️▪️▪️▪️
#الامام_السجاد عليه السلام

شَع ولد يِشبْه مُحَمَّد للحُسَيْن
نِسخَه مِن الهادِي صَايِر كِلشِي بِيْه
مِله گلْب اِحسين فرحه ابجَيْتَه هاي
واشكثُر يِرتاح مِن ينظُر عليْه
▪️▪️▪️▪️▪️
#علي_الاكبر عليه السلام

ولا تنسَ الإمامَ العطشانَ الشهيد الحُسَيْن عليه السلام
الذي استغاث في آخر رمقٍ لـ(قطرة) من الماء فحزّوا رأسه في هذه الإستغاثة :

من اريد افطر عله الماي العذِب
عيني اغمُّضها واشوفك وانتحِب
اِنته اِبْن الماي ليش ابكربلاء
اِتمُوت عطشان اِنته ليش ابيا ذنِب

#ياحسين
#اللهم_عجل_لوليك_الفرج

▪️في وفاة مؤمِن قريش وسيّد البطحاء "ابا طالب" عليْه سلام الله
▪️▪️▪️▪️▪️
يا والِد الكرّار
يالماكو مثلك صار
بالهيبه ما محدود مثلك ولا موجود
اي يابو طالب
▪️▪️▪️▪️▪️
طبع بالناس لو واحِد يكرهون
ابسُمعته تبقه هالوادِم يشوهون
لان عالي القدر حتماً يشوفون
ابعزمهم بالحقد ينزل يريدون
شفتهم يابو حيدر وسْط العيون
تضل انته جبل هُمّه الينزلون

مِن الحقد عانيت
لكن جبل ضلّيت
ماگدروا ايشوهوك تنزل نعم يردوك
اي يابو طالب
▪️▪️▪️▪️▪️
عجيبه افلان اذا يكرهلَه زِلمَه
يضل صبْح او مِسَه ابحَچيْه يِذمَّه
ميدري الچِلمه لو طلعت تلِچمَه
او سمعْت اشگد حچي ياريت چِلمَه
اليكرهك يابو طالب هذا شِسمَه
يسمّونَك الكافِر وانته نِعمَه

مو مسلم ايگولون
والكافر ايسمّون
گالوا عِبد اصنام وانته ابو الاسلام
اي يابو طالب
▪️▪️▪️▪️▪️
اوگفْت راية وفه ابعلْو الثريّه
نعم طاهِر عشِت فوگ الوطيّه
چثيره اعداك يالروحك تقيّه
قليله اشما تزيد اعداك هيّه
يبغضونك نعم ولْد الرديّه
لان ابنك علي حامي الحميّه

اِبنَك علِي ايْشوفُوك
الهذا السبب كرهُوك
ابنك لأن معصوم بثّوا عليك اسموم
اي يابو طالب
▪️▪️▪️▪️▪️
شوصفك والمدح حار ابمعانِيك
شگول او هيبة الباري صُفت بِيك
عشت مثل السِمه او ربّك يِعلّيك
نعم لعنه عله الكرهوا يِخلّيك
زغير الحاول بأي چلمه ياذِيك
الخطر سالِم يصير اليوصَل اِعلِيك

لا ما يُمرّك ضيم
عالي انته مثل الغيم
يالماكو مثلك صار كلمن يضدّك عار
اي يابو طالب
▪️▪️▪️▪️▪️
عليت او ربّك العالي اللي علّاك
يمن يرتاح كلشي ايمرّه طرواك
اعتقادي يابو طالب الله حاچاك
يبو طالب نده ابنك علي هاك
اْو لأن مثلك فلا صايِر بالافلاك
كفيل اعظم يتيم الباري خَلَّاك

والغِيره عاشَت بِيك
والخالِق اِمعلِّيك
خَلَّاك ابو شخصين طه وابو الحسنين
اي يابو طالب
▪️▪️▪️▪️▪️
صرِح للغيره اشوفك كل زمن ضال
جبل بالهيبه شامخ طوله ما مال
عظيم ابكلشي باقي اْو تبقه للتال
مواقِف عِندك اِنته اتعادِل اجبال
الظلُم مهما يِجور اْو بيَّن اْو طال
العدِل هوّه اليِسود ابحكْم الآجال

حُبّك فخر وادروس
عِلمك فكِر ملموس
كل اللذي يقراك لا ما وصل معناك
اي يابو طالب
▪️▪️▪️▪️▪️
اقترب موتك يبو الغيره المتنعَد
استعِد حتّه تروح او لله تِصعَد
عله افراش الاجَل جِسمَك تِمدَّد
واجه ملْك الاجَل يمَّك يالاوحَد
گعد ما بين ابو الحمله اْو مُحمَّد
كأنّه واحِد اِمْن اولادك اِنعَد

اولادَك ابلا حيل
اوياهُم دمِعتَه اتسِيل
وابدمعِتَه ناداك ربَّك اِلَك مِشتاگ
اي يابو طالب
▪️▪️▪️▪️▪️
ابو الحسن الوائلي
رمضان ١٤٤٤هـ

▪️في وفاة السيّدة خديجة عليها السلام
▪️▪️▪️▪️▪️
هايه سر الاسرار
هايه روح المختار
هايه منها ما صار الباري قدّرها
▪️▪️▪️▪️▪️
السيّده ام فاطمه الطاهر اثرها
الله والهادي او علي ايعرفونه سرها
في سبيل الله نعم ضحّت عمرها
حب محمّد چن سمه سوّه قدرها

هيّه تحمِل آيات
هيبة السماوات
حايِره العبارات ما تفسّرها
▪️▪️▪️▪️▪️
كل وفاهه مِنتشر وامغطّي مكّه
والفكِر يحتار لو رايد يدركه
والشرك يمها اذا يتعاله شركه
ينهدِم كلّه اذا اصبع تحركه

واضحه بلا لون
والصعب يمها ايهون
كل اوامر الكون هيّه تأمُرها
▪️▪️▪️▪️▪️
حبل صارت للسلامه او باقي ينمد
والكرم عند العظيمه حاشه ينحد
سيف وگفت عالظلم حاد او تجرّد
بالشدايد چانت احزام الـ محمّد

الطه صارت احزام
تسوه آلاف ازلام
والصعُوب الايّام هوّه ذاخرها
▪️▪️▪️▪️▪️
ابكلشي مختلفه وهي الطيّب اصلها
الباري خالقها او فلا يخلق مثلها
من كثر ما ربها قدّسها او يجلها
فاطمه الزهره العظيمه انطاهه الها

فاطمه بهالازمان
ما مثلها انسان
سر الٰه الاكوان فاطمه سرها
▪️▪️▪️▪️▪️
كلشي ضحّت من اجل ان ترضي ربها
الگاع ترتاح الها من تمشي ابدربها
كلها خير او عالمه او طاهر نسبها
والعظيمه المؤمنه الطيبه لقبها

هيبه بنت الاطياب
من شموخ الاصلاب
يخجل الهوه الهاب لمّن ايمُرها
▪️▪️▪️▪️▪️
ماتت او طه انهدم حيله ابفگدها
ماتت او عطره بُقه ينشم وردها
ماتت او طه فُگد حيله بعدها
من دفنها چن دفن نفسه ابلحدها

طه ودّعها ابليل
ودّع اوياهه الحيل
اعليها دمعته اتسيل ابخدّه ناثرها
▪️▪️▪️▪️▪️
ضحّت ابكُلشي الرضا رب البريّه
او مالها لجْل الرساله الاحمديّه
سانِدت طه ابحياته الدنيويّه
او ما تِخلّت عنّه لحظه للمنيّه

مِنها وين اكو وين ؟
الها ماكو وجهين
تصغر العناوين يمها عاذرها
▪️▪️▪️▪️▪️
ابو الحسن الوائلي
شعبان ١٤٤٤هـ

▪️في ولادة الامام الحسن عليه السلام
▪️▪️▪️▪️▪️
الحسَن تاج الحميّه والوفاء
اطباعه چانَت بالوِفه معرُوفه
سيَّد الغِيره وابو گلْب الچبير
الماكو مِثله والسخِيَّه اِچفُوفَه
رحمه وابچَفّينَه يِستر كل مُعين
ليْه يِفزع لو ابحاجَه اِيشُوفَه
چان مال المالكه ابهاي الحياة
يِستُر اِعيُوب الدُنا المكشُوفه
چان للجايِع فزِعته ابلا مثِيل
يِشبِع ارواح البُقَت ملهُوفه
بايِع الدِنيْه اْو شِره بيها الجِنان
صار كعبه والوفاء ايطُوفه
ابِن حيدر ماكو مِثلَه بهالوجود
التِخجَل الدِنيْه ابحلاة اِطيُوفه
التقِي ، العابِد ، الزاهِد ، والكريم
ابيا وصُف روحه تِضَل موصُوفه
هالشُجاع الچان تِشهدلَه الحروب
الگاع تِرجِف لو خياله اتشُوفه
حسَن يا بخْت الحسَن كلّش چبير
كِل حرف نسمة هوه امْن اِحرُوفه
▪️▪️▪️▪️▪️
ابو الحسن الوائلي
رمضان ١٤٤٤هـ

تتوجّه الانظار نحو علي عليه السلام في تلك الليله التي كان لا يرقد فيها وكان يكثر من التسبيح والحمد والدخول والخروج الى صحن بيته والصعود الى سطح داره وهوه ينظر الى السماء وينعىٰ نفسه
▪️▪️▪️▪️▪️
ابعين السماء اِمصِيبِتَك
واتباوِعلها ابحَسرِتَك
مِختلفَه احوال السِمه
تنقِل خبَر عن طبرِتَك
▪️▪️▪️▪️▪️
يالصاعِد سطْح الدار
اْو هذا اليوم المُختار مِنطيك اعلومه
واِنته الحالَك معروف
تدعِي اْو راسَك مكشوف بانفاس مهمومه
يالتدري اشراح ايصير
بَس ما ردت التأخيِر والروح ملچومه
راح اتزِيد الاحزان
يا مولاي اْو رمضان ما تِكمِل صُومه

تِتباوع ابعين القدَر
واتشُوفَه مخسُوف الگمر
والليله روحَك عالِمه
تنقِل خبَر عَن طبرِتَك
▪️▪️▪️▪️▪️
يالچِنت ابذاك اليُوم
اتصلِّي اْو تگعِد واتگُوم واتناجِي العالِي
اترَدِّد وابصدرَك آه
ابهالّيله اقسِم بالله واعدنِي الغالِي
تِمسَح وجهَك بالثُوب
ناطِر ملگه المحبُوب واِنته اعرف تالِي
صُوت الغيب ايْنادِيك
وايطَمنَك وايدَرِّيك هاليُوم يالوالِي

كلشي يِناديْك ابـ اسى
وعدَك يحيدر هالمِسَه
ابچلمات متروسه دِمه
تنقِل خبَر عَن طبرِتَك
▪️▪️▪️▪️▪️
مِن بعْد التعقيبات
لَن ابهاي اللّحضات ابمحبُوبَك تِحلَم
وايگِلَّك يا كرّار
اتواعَدنَه اْو يومك صَار وامناطِر أَعلَم
يحضَرلَك أشقَىٰ النَّاس
حيدَر واِنشُوف الراس بالسيف ما يِسلَم
امْن ايطُبرَك يابو اِحسين
بعْد الضَربه ابيُومين نِتلاگه اْو نِلتَم

تالِي بعد هذا الفعِل
بالجنّه يِلتَم الشمِل
مِنتظرَه جيتَك فاطِمه
تنقِل خبَر عَن طبرِتَك
▪️▪️▪️▪️▪️
امحَزَّم والهَم ما هاد
اتصَلِّي اْو تسبِيحَك زاد والروح تِتچوّه
اتنادِي اْو مرفوع الصُوت
بارك لي ابهذا المُوت يالكِلَّك تَقوه
تسبِيحَك زاد اوياه
واتنادِي اِنّا للّٰه اْو لا حول لا قوّه
فاتِح للمُوت اِعيون
اْو تِستغفِر رَب الكون اْو تِتصبَّر گوّه

ماضَل بعَد عِندَك صبُر
وعدَك يحيدر تِنتظُر
روحَك يحِيد اِمحزِّمه
تنقِل خبَر عَن طبرِتَك
▪️▪️▪️▪️▪️
ها يا مُردِي الابطال
ها يالخِضْت الاهوال مِتغيِّر حالَك
يالمِثلَك وين اِنشُوف
اليِتطَمَّن حتَّه الخُوف لو شَاف اِخيالَك
يالنازِل چالقران
يالمِثلَك لا ما كان لا صار اِبدالَك
ها يالنازِل مِن نور
مُوتَك جاي اْو مسرور والمُوت يِحلالَك

عِندَك خبَر مُوتَك وصَل
هالّليله يا خير العمَل
وانته القرارَك راسِمه
تنقِل خبَر عَن طبرِتَك
▪️▪️▪️▪️▪️
الموتَك گمْت اتوضِّيت
واتهيَئِْت اْو ضَلَّيت تِتباوَع لامرَك
اتصِد ابعين الاقدار
اتمَشِّيْت ابصَحْن الدار والخَنگه ابصَدرَك
اتصَايَح صُوت الوزَّات
اْو بالبِاب اِحزامَك فات وايْريد ايخِبرَك
اِبقه اتحِس بي ناداك
ما يِگدر عَن فرگاك اْو شَدّيت كِل ازرك

كلشي عُرف بالفاجِعَه
عين الكواكِب دامِعَه
والدِنيْه لا مُو سالِمه
تنقِل خبَر عَن طبرِتَك
▪️▪️▪️▪️▪️
آخِر فرضَك أدِّيت
اْو ظهرَك للغدْر اِنطيت يالدارِي اشعِندَه
بأوَّل سَجدَه ايِشوفون
ابهامَك سِيف الملعون هَد حيل السجدَه
اتغيَّر حال الافلاك
اْو صارت كِل الاملاك للثار مِتحشدَه
كلشِي ابوِجدانَه اِجروح
والحالَك كلشي اِينوح والدمعَه ابخَدَّه

الكون ابطبُرتَك يا ولِي
يصرَخ دخيلَك يا علِي
لحضات چانَت مؤلِمه
تنقِل خبَر عَن طبرِتَك
▪️▪️▪️▪️▪️
راس القران اِنصاب
واتخَضَّب بالمحراب والفوز ترتِيْلَه
سَال اْو مِن سِيل اِدماه
غطَّه الكُون اِبمجراه اْو صابغها ابسِيْلَه
الدَكدَك بِچفُوفه اِجبال
ابچَف وِلدَه الليْله اِنشال والكون شيشِيْلَه
الشَال السبعَه ابيَمناه
گوّه ايْفتِّح عيناه مهدوم كِل حِيْلَه

الوضعَك علِي كلشِي نِحَب
مِن حيلَك اِنهَد اضطِرَب
سَيطَر عله الدِنيْه الضِمَه
تنقِل خبَر عَن طبرِتَك
▪️▪️▪️▪️▪️
ابو الحسن الوائلي
رمضان ١٤٤٤هـ

▪️وكيف بـ "ذُو الفِقار" وهو يرى قابِضهُ طرِيح الفِراش ويُعاني مِن ضربة الغدرِ
▪️▪️▪️▪️▪️
اني مهموم يا علِي اليوم
خايِف اِتروح
ابداخلِي اِجراح قابِضِي طاح
زادَت اِجروح
ها يحيدر ها يحيدر
▪️▪️▪️▪️▪️
اني يا حيدر فِقارَك زِين اعرفَك
اني چَم مرّه علِي قابِضنِي چفَّك
خضِت بِيَّه اشگد معارِك ما تِوصفَك
وابرغُم شِدَّتها چانَت ما تِكلفَك
هِسَّه حالَك مختلِف واشلُون اوصفَك
منطبُر راسَك علِي اْو ما يِغفَه نزفَك

الچان مَيْطِيح اِگبالَك ايْطِيح
واِنته ثابِت
هِسَّه يا حيف طابرَك سِيف
اْو باقِي ساكِت
ها يحيدر ها يحيدر
▪️▪️▪️▪️▪️
اثلاثه واِثمانِين حرْب امْن الحرايِب
خضِت بِيْدِينَك اْو رَدِّيت الكتايِب
ما تِركتَك يا علِي ابكِل المصاعِب
قبضتِي ابچفَّك نعم سوَّت عجايِب
هِسَّه كِل الحيل مِنَّك شِفتَه ذايِب
گوَّه تِتحرَّك وسَف عينِي تِراقِب

ابكِل حرُب دُوم ترعِب الگوم
اْو لا مثيلَك
بألِف معدُود هِسَّه ممدُود
راح حيلَك
ها يحيدر ها يحيدر
▪️▪️▪️▪️▪️
يا علِي ابچفَّك حروب اِشگد خضِتها
ال "لافتى" اْو "لاسيف" شايِلها اْو شلِتها
ابعزمَك اِرگاب العِدَه بِيَّه اِگطعِتها
اْو عالتراب اِشگد جماجِم طشَّرِتها
تالي هالقبضَه علِي بُردَت شفِتها
اْو للأبَد يا بالحسَن چنَّك عفِتها

ابسِيفِي مرسُوم منتصِر دُوم
هايَه وِضحَت
اي يبُو اِحسيْن شافَت العين
القبضَه بُردَت
ها يحيدر ها يحيدر
▪️▪️▪️▪️▪️
آنا سيف الما عُرَف بالمرَّه غِمدَه
كلها تِشهدلِي المعارِك وِحدَه وحدَه
مِن خيالِي اليُوگف اِگبالَه أشَردَه
والثِبَت راسَه زرِع وابضربَه احصدَه
يا علِي ابغِمدِي اِتركِتنِي صار مُدَّه
ابلايَه چفَّك چَف قبُضتِي اِشلُون اعودَه

فگدك اِجروح يا علِي اِتروح
ما أرِيدَك
سيفك الحار حيلَه مِنهار
ابلايَه اِيدك
ها يحيدر ها يحيدر
▪️▪️▪️▪️▪️
بيَّه عزمَك مِرتِبُط يالوالِي شِفتَه
ابضربَه وِحدَه ابْن وِد اِنته صرعته
ابضربَه كِل مَن حارِث اْو مرحَب طرحته
اْو باب خيبر يا علِي ابعزمَك قِلعتَه
يا علِي شِفتَه ابغمِد سيفي تركته
واِحنَه واحِد مَنتِفارَگ آنا واِنته

اتصِدلِي العيون شاحِب اللون
ماكو لونِي
شكلِي مهضُوم حيل مهمُوم
ايِباوعُونِي
ها يحيدر ها يحيدر
▪️▪️▪️▪️▪️
راح اجِرحَك يا علِي حامِي الحميَّه
ارْد اسولِف عالهِجُوم اِعلَه الزچيَّه
ولله لو مسلُول انَه ابذِيچ المسيَّه
ولله ماخلِّي أثَر للجَاب اذِيَّه
آنا ادرِي اشصار بِيك بهالقضِيَّه
گيَّدَك يا بالحسَن چَف الوصِيَّه

اقسى لحضات ابغِمدِي بالذات
مِن عفِتنِي
انظُر الحال للصبُر تال
سلَّمِتنِي
ها يحيدر ها يحيدر
▪️▪️▪️▪️▪️
آخِر اِحچايَه الِي حيدر يحيدر
راح اضَل مورُوث مِن المهدِي يِظهَر
باچِر المهدِي يجِي وابعزمَه يِثأر
ابقبضِتَه يِصبَح وقُوفِي اْو عزمِي يِحضَر
بِيَّه يمحِي الباطِل اْو يقضِي عله الشَر
السِلبوا اِحگُوك الرسُول اْو آلَه تُنحَر

المُنتقِم عُود لمَّن اِيعُود
ابچفَّه اوگف
اِهنَاكه لو عَاد للذبِح غَاد
كِلها تِصطَف
ها يحيدر ها يحيدر
▪️▪️▪️▪️▪️
ابو الحسن الوائلي
رمضان ١٤٤٤هـ

▪️في استشهاد امير المؤمنين علي بن ابي طالب عليه السلام
▪️▪️▪️▪️▪️
علي الما صَح مِثالَه
علي حامِي الرِسالَه
منو مِثلَه علي حامِي الحميَّه
▪️▪️▪️▪️▪️
علي مِن الولاده للشهاده
صفه قائد عظيم ابكل إراده
گبُل خلقه اخذ تاج السياده
خِلق ربنه علي رحمه العباده

امير الدِنيْه كِلها
علي الغيره واهلها
اْو كتاب الله النِزَل فوگ الوطيَّه
▪️▪️▪️▪️▪️
العظيم الما صبح ثاني ابصفاته
زرع في كل اثر طِيب ابحياته
چبير ابكلشي بيْه اْو طيبه ذاته
اْو ختم عمره على قبلة صلاته

خِتَم عُمره ابوعودَه
على القِبله ابعهودَه
اْو بقه عالي علي ابعِلوا الثُريَّه
▪️▪️▪️▪️▪️
علي الما شِدّه بالدنيْه تعيقه
مِثالي اْو يختلف عَن الخليقه
يِسير الحق معاه ابكل طريقه
وهَم كلشي اْو فقط هوّه الحقيقه

العظيم الكِلَّه تَقوه
يِعَلِّم كلشِي هوّه
علِم كلشي مِنْ افكاره البهيَّه
▪️▪️▪️▪️▪️
فلا صار ابمثل روحه النظيفه
العوالم تنحنِي النفسه العفيفه
جليل اْو روحه لمعتها شريفه
الكره الارضِيَّه تِفتر اِعله كيفه

اِله هالدِنيْه تبره
تحِت ايْدينه وامره
تِدور الدِنيْه بچفوفه السَخِيَّه
▪️▪️▪️▪️▪️
علي الچفّه يِسَهِّل كل ثجيله
حشاه حيدر يرد اليشتكيله
ابصفاته مختلف ماكو مثيله
الحرير اگبال ثوبه ينحنيله

فلا صار ابصفاته
سِتَر دِنيْه ابعباته
ثِيابَه للشرف صارت هويَّه
▪️▪️▪️▪️▪️
عظيم او صدره يتنفَّس سلامه
دُرر حامي الحميَّه كل كلامه
نِده اْو حضنه صُفه عِش اليتامه
يزِيح الحسره والهم بابتسامه

دخليه اشكبره بخته
تزِيح الهَم نظرته
علي وابچفَّه يقضي كل رزيَّه
▪️▪️▪️▪️▪️
لغز محَّد عرف سِرّه او يِحلَّه
اليِطمِّن فيَّه خُوف الدِنيْه كِلَّه
ابرغُم حيدر عرف مُوته وِصلَّه
تعنَّه الموته وابكل هيبه صَلَّه

ابد ما يِنسَه ربَّه
اِعتِنه الفرْض المَحبَّه
علَه القِبلَه خِتَم فرْض المنِيَّه
▪️▪️▪️▪️▪️
اشتره الجنّه علي ابروحه الفقيره
تعادل چم عرش ذيچ الحصيره
علي محَّد يِعوضَه اْو ماكو غيره
چبيره لوعَة افراگه چبيره

رحَل بَس ما تِركنه
عدِل ضَل ابگلبنه
رحَل بَس عدلَه روحه بينه هِيَّه
▪️▪️▪️▪️▪️
ابو الحسن الوائلي
رمضان ١٤٤٤هـ

▪️في ذكرى هدِم قبُور البقيع
▪️▪️▪️▪️▪️
اِذا ما نَفَّذِت هالطلَب يبْن اِسعُود
الروحَك شُوف چارَه مِن يجِي القائِم
▪️▪️▪️▪️▪️
هاي القبُور ابحرگة شعُور
اتنادِي اْو تصيْح يمته الظهور
مِنتظرَه جيتَك سيِّدِي ابحسره
مِنتظرَه بيدَك تبنِي چَم حضره
▪️▪️▪️▪️▪️
ايْنِدبَن اگبُور الاهالي ها يمهدِي كِل لحِد
امْتانِيات ابلهفه هِنَّه يمتَه يالغايِب ترِد
كِل گبُر بيهِن يِتانِي ينبنِي ابفضلَك يرِد
اگبُور لاچِن يابُو صالِح ما يِحملَن هالبُعِد

حتّه التراب حَس باكتِأب
تنهِي يريد عنَّه الضباب
رِدلَه مقامه واكشِف الغُبره
مِنتظرَه بيدَك تبنِي چَم حضره
▪️▪️▪️▪️▪️
اِعتِدوا آل اِسعُود شِفنَه گبُل مُدّه امْن الزمَن
وابحقِدهُم يابُو صالِح هالقِباب اتهَدِّمَن
هالقبُور اِهوايَه صعبَه عالترُب ما يِنبِنَن
اِنرِيد بِچفُوفَك يغايِب تِنبنِي اْو تِرجَع وطَن

ابجيتَك أكِيد هذا الوعِيْد
تبنِي القبُور اترِدهِن نِريْد
اگبُور اهلَك اترِد كِلها مزدهرَه
مِنتظرَه بيدَك تبنِي چَم حضره
▪️▪️▪️▪️▪️
كلشي يالمهدي ينَادِي واحمَر ايْهِل مدمعَه
لأن مُو سهلَه نصِدها صعبه حيل الفاجِعَه
يستغِيثَك كِلشِي صار اْو ريت صُوتَه تِسمعَه
قُبَب بِيدَك تبنِي كُونَك للبِدُور الساطِعَه

گلْب الوجِيِع ابتُربه يضِيْع
صعبَه يشُوف ارض البقِيْع
بِينَه ابجرحهِن تِلهَب الجمرَه
مِنتظرَه بيدَك تبنِي چَم حضره
▪️▪️▪️▪️▪️
مِن نِگِلَّك يمتَه تِظهَر والبعُد يَمتَه يِفُض
هذا مُو معناهه اِحنَه علَه امْر الله نعترُض
عله اگبُور اهلَك تِعدَّه الكافِر الما يِتّعُض
الذهَب يالمهدِي تِساوه صَعبَه بِتراب الارُض

ابچَف اللئام اگبُور العِظام
بعْد الممات ابلايَه سلام
چَف التِعدَّه اِعليهُم اتكِسرَه
مِنتظرَه بيدَك تبنِي چَم حضره
▪️▪️▪️▪️▪️
الكِل گبُر بيهِن يغايِب مِن نحِن وانشاهِدَه
ولله نِتحسَّر يمهدِي اْو نذكُر احقاد العِدَه
هُمّه نور الدِنيْه هايه اْو بعَد هَم هُمَّه النِدَه
سِده اعليهُم ياوِسافَه الما عله واحِد سِدَه

اِنخِلقوا أمان الكِلهُم حنان
اِعليهُم يجُور وسفَه الجبان
اِتراب البقِيع ايِرِيدَك اتنُصرَه
مِنتظرَه بيدَك تبنِي چَم حضرَه
▪️▪️▪️▪️▪️
اگبور اهل بيت الرساله واهل بيت المصطفى
الچانوا اِعيُون البلاغه اْو هُمّه شَمْس المعرِفَه
حتّه هُمَّه ابنُص گبرهُم ننظُر الهَمهُم لِفه
اْو ننظُر الباطِل تِعاله اْو هدَّم اگبُور الوِفه

اهْل الوفاء والكِبرِياء
صعبَه اكيد ايمُرهُم عناء
عِيشَتهُم اْو مُوتَتهُم ابحسرَه
مِنتظرَه بيدَك تبنِي چَم حضره
▪️▪️▪️▪️▪️
شِيعِتَك مولاي مِنَّك رِدنَه نطلُب هالطلَب
ننتظُر يالمهدِي تِرجَع سيِّدِي اْو تِبنِي القُبَب
يمتَه يا مولاي يمتَه يُومَك اِنشُوفه اِقتِرَب
اْو مو ابماي ابنار ثارَك سيِّدِي انطفّي اللهَب

حسْم الامُور بِيدَك ينُور
نِدعِي الاله ايْعَجْل الظهُور
نِدعي الله يِقرَب يُومَك اْو أمرَه
مِنتظرَه بيدَك تبنِي چَم حضره
▪️▪️▪️▪️▪️
ابو الحسَن الوائلِي
شوّال ١٤٤٤هـ

▪️في اِستشهاد الإِمام جعفر الصادِق عليْه الصلاة والسلام
▪️▪️▪️▪️▪️
سيِّد السلامه منهَج الشهامَه
مدرسَة علُومَه نابِعه كرامَه
▪️▪️▪️▪️▪️
الإِمام العِلمَه اعلَم كِل علِم
الدُونَه بُنيان العقِيدَه تنهدِم
عاش يدعِي للحقِيقَه ابكُل عزِم
ابنشُر دين الله صُفَه دوره مُهِم

الدِينَه كلشِي ضحَّه نوره يِضوي صُبحَه
عُمرَه صفحه صفحه يخدِم الاِمامَه
▪️▪️▪️▪️▪️
الخلَّص الدنيْه ابنهِج جدَّه التقِي
الچَان يِشتمَّه الهوه واصبَح نقِي
الشامِخ الكِلَّه وفه والاصدقِي
ابزمَن كثْر الكذِب حَچيْه المنطقِي

ثابِت اِبنقائَه عالِي كِبرِيائَه
واِتَِّضَح ولائَه صادِق اِبكلامَه
▪️▪️▪️▪️▪️
عالِم اْو كِل علِم مِن عِلمَه طِلَع
اْو چَم نهر مِن مَنبَع اِعلُومَه نِبَع
هيبَة افكَارَه الفكِر بيها انصِدَع
‏اْو ‏كل فكِر ملمُوس من عِلمَه اِنتِفَع

ما مثِل صِفاته واللي طيبَه داتَه
بالعلِم حياتَه بيها چَم علامَه
▪️▪️▪️▪️▪️
عاش بالدِنيْه سِمه فوگ السِمه
اْو ياوصُف يكفِي لابِن حامِي الحِمه
ابفِكره مِنهاج الحقيقه راسِمه
واليِعادِي يبقَه كِل عُمره ابعَمَه

منهَج الصميدَه يسرِي فِي وريدَه
عالبشَر اكيدَه واجِب اِحترامَه
▪️▪️▪️▪️▪️
هذا دين الله الـ إلَه تهوِي القِلُوب
گمَر وجهه اْو يِبزَغ ابوجْه الغرُوب
ابحُبَّه لو ذاب الگلُب حگّه يِذُوب
حُبَّه دِين اِبلايَه شَك يِمحِي الذِنوب

الما صُبح مِثالَه عالعِلُو تِعالَه
رائِعَه خِصالَه واِشعظُم مقامَه
▪️▪️▪️▪️▪️
الصادِق العالِي اللي ما يُعلىٰ عَلِيْه
والصِفات الطاهِره مَجمُوعَه بِيْه
لغز هُوَّه اْو ماكو فِكره تِحتِويْه
الارض تِفتَر ابعَظُمها ابچَف اِديْه

ما وصُف يحِدَّه ابعِلمَه چنَّه جدَّه
يهلِك اليضِدَّه الما تِبَع نِظامَه
▪️▪️▪️▪️▪️
اْو بالنِهايَه عِندِي ضَل بَس هالكلام
الكِل شخُص داوَم عله بُغْض الإِمام
صادق العِتره الوفِي واِبْن العِظام
اِشما تِبغضُونه يِضَل عالِي المقام

واللي ما يحِبَّه هذا عادَه ربَّه
تِصفَه لليحِبَّه الجنَّه بالقيامَه
▪️▪️▪️▪️▪️
ابو الحسَن الوائلي
شوَّال ١٤٤٤هـ

▪️ لسفير الحُسيْن مُسلِم بِن عقيل عليْهِ السلام
▪️▪️▪️▪️▪️
ها يا رسُول العدِل للكوفَه مِن مولاك
اِنته الثِقَه والوفِي والهُم نعَم ودَّاك
يِدرِي السَفيْر الكفُو اْو لِرسالِتَه خلَّاك
▪️▪️▪️▪️▪️
يبِن عم الحُسين او ناصِره اْو ثِقتَه
سفير اِرسالِته اِختارك اِلك إِنتَه
اِطلعِت مِن مكَّه وابكُل حُرگه ودَّعتَه
سَفيْر الحَق مِشيْت اْو هالدرُب سِرتَه

عِنده الثِقَه الكامِلَه اِبشخصَك اكيْد اِحسِيْن
واِختارَك اِنته اْو صرِت بالحَق رسُول الدِيْن
اِنته الأخو والولِي ماهو اِبولائَك شاك
▪️▪️▪️▪️▪️
رحِت للكوفَه تمشِي اِبعزمَك الصامد
اِبطريْقَك بَس بَبُو اليِمَّه الفكِر شارِد
اَبرغُم حر الشمِس گلبَك بقَه بارِد
لأن شايِل علِي اِبراسَك يهالقائِد

تمشِي الدرُب والعزِم عِندَك أبَد ما مات
عمَّك علِي والنعِم لا ما تذِل هيهات
صبرَك يذِل التعَب واِتحدَّه هالافلاك
▪️▪️▪️▪️▪️
دِخلْت الكوفَه تمشِي شامِخ اِبعزمَك
دسِت دولَة شرِكهُم سيِّدِي اِبجِدمَك
شفِت كثرَة مَكُرهُم واِنته مَيْهِمَّك
بعَد طالِب علِي ياهُو اللذي اِيْهِزمَك

كلشِي أمَامَك تره حَس بالخطَر موجُود
خافوا تذِلهُم إِلَك دزَّوا دعِم واِجنُود
اِبعزمَك دسِت عالشرِك يا لحظة الإِدراك
▪️▪️▪️▪️▪️
اِجيت اِعله الظلُم جمره اْو تهِب نارَك
رسول او دار طوعه اللي صُبَح غارَك
وحيد اْو عافِتَك يا مُسلِم انصارَك
بُقيْت اِنته ولا واحِد اِجَه اْو جارَك

كِلمَن كِتَب للولي يِتعنَّه ليهُم چان
كل قصدَه يِغدِر تره شايِل طبُع شيطان
هاي الرِسايِل اِجَت مِن كِل شخُص أفَّاك
▪️▪️▪️▪️▪️
بُقَت لاهْل الغدُر تِتباوَع اِعيُونَك
وحيد اِنته لچِن كلهُم يِهابُونَك
تِباوِعلَك جِبَل عِيْن اليِعادُونَك
مُو مُسلِم علِي اِبسِيْفَك يِشُوفونَك

سلِّيتَه سيفَك غضَب يِقضِي علَه الاشرار
مُو مُسلِم اِبهجمِتَك چَن حيدر الكرّار
مِن شاهِدوا هيْبِتَك حاوطهُم اِلإِرباك
▪️▪️▪️▪️▪️
عظيْم اِبمَقتلَك واِشعُضمتَك شِفتَك
طحِت عالِي اْو صُفَه قصْر الشرِك تحتَك
ملِك والكوفَه كِلها سِجدَت البختَك
نعَم صُوت العواذِل يِخرَس اِبصَمتَك

بالكوفَه كِل الشرِك قدره تحِت رِجليْك
تمحِي التريْده اْو تِضَل والدِنيْه ما تمحِيْك
عالِي على كِل عِلُو تِشهدلَك الأملاك
▪️▪️▪️▪️▪️
لِسانَك بالعِلُو اِبسطْح القصُر كَبَّر
سلام الله على انفاسَك يبُو الاكبَر
تِنادِي ابحَسرَه مِنَّك والگلُب مِجمَر
يريت اگدر انُصرَك بَس ولا أگدَر

اتمنَّه لو بالضعَن اِنته ترِد يحسيْن
محَّد تره يِستحِق جَيتَك ينور العِيْن
وادِم طبعهُم غدُر لو تِرجَع اترجَّاك
▪️▪️▪️▪️▪️
ابو الحسن الوائلي
شوَّال ١٤٤٤هـ

▪️▪️▪️▪️▪️
عيدنا الاكبر يبُو صالِح ظهُورَك
يمتَه يالمهدِي يهِل اِعلينَه نُورك
▪️▪️▪️▪️▪️
أسعد الله أيامكم بعيد الأضحى المبارك أعادهُ الله عليكم بالخير والبركة

▪️عيد الغدير
▪️▪️▪️▪️▪️
امْن السِمَه هِيَّه نِزلَت وصيَّه
حامِي الحميِّه... هوَّه الخليفَه
▪️▪️▪️▪️▪️
جِمع هالناس النبِي خير البشَر
واِبنيتَه اِبتِشَر اِيْنصُّب الحُجَّه
شاهِد اِعليها يِضَل اليِستمِع
اْو كِل هذا الجمِع اْو شهَر ذو الحُجَّه
امُر عِند المُصطفىٰ اِهوايَه مُهِم
هالليله يتِم الحُجَّة الحُجَّه

ماخِذ قراره اْو عِندَه بِشاره
الصِهره اِختِياره... هوَّه الخليفَه
▪️▪️▪️▪️▪️
نِزَل جِبرائيل مِن فوگ السِمَه
الوالِد فاطِمه باعِثَه ربَّه
يبُو الزهره اِيْسلِّم اِعليْك العلِي
واِيگِلَّك علِي الگلبَك ايْحِبَّه
هوَّه مِن بعدَك خليفَه اِعلَه الارُض
حيدَر يِفترُض بعدَك اِتنصبَه

هالامُر يِحصَل والرُفَض يِقبَل
حيدر الأوَّل... هوَّه الخليفَه
▪️▪️▪️▪️▪️
گبُل لا يِحچِي النبِي اْو صُوتَه رفَع
اْو ما واحِد سِمَع واِفتهَم قصدَه
يِنظُر اوجُوه المِئَه اْو عشرين الِف
الما بِيهُم كلِف بَيَّن اِبحِقدَه
اْو يدرِي يِقبَل صاحِب الغيره الأبِي
حيدَر للنبِي الوالِي مِن بعدَه

تِنظُر اِعيُونَه عاليِبغضُونَه
اْو قِلَّه يردُونَه... هوَّه الخليفَه
▪️▪️▪️▪️▪️
رفَع چَف المُرتضى خيْر العمَل
اْو چَف الوالِي ضَل بِيْد ابو الزهره
ناده والصُوت اِرتِفَع مِنَّه اِبفخَر
يا هاي البشَر اِبواضِح النبرَه
"مَن كُنِت مولاه يِضَل مولاه علِي"
مِن بعدِي ولِي يِبقَه يِعتبره

چَف الولايَه مرفُوعَه رايَه
بالسِمه اِحچايَه... هوَّه الخليفَه
▪️▪️▪️▪️▪️
مِن مُحمَّد ما طِلَع هذا الامُر
نازِل هالامُر امْن العلِي العالِي
والقِيادَه ما تلُوگ اْو تنعصِي
بَس بِيْد الوصِي أوَّل اْو تالِي
بخبخا للحقِ أو لا ما يهِم
غصباً عالزلِم حيدَر الوالِي

هالحچِي ليهُم حيدر اِعليهُم
يِبقَه واليهُم... هوَّه الخليفَه
▪️▪️▪️▪️▪️
ابو الحسن الوائلي
ذو الحجَّة ١٤٤٤هـ

▪️▪️▪️▪️▪️
الامُر واضِح وابد ما داعِي يِتأوَّل
غصبَاً عالرفَض واِعلَه اللي ما يِقبَل
أمُر رَب السِمه اُو بكِتابَه يِتنزَّل
نَص قُرانِي يِخسَه الرادَه يِتبدَّل
مُو رابِع علِي اْو هالشِي ولا يِحصَل
ولا ثالِث ولا ثانِي علِي الأوَّل
▪️▪️▪️▪️▪️
ابو الحسن الوائلي
#متباركين

كُل عام وأنتم بألف خير
جعلكم الله ثابتين على ولاية الحق ولاية أمير المؤمنين علي بن أبي طالب عليه الصلاة والسلام

جدول محرم الحرام
2023/1445👇

▪️الرَد على مُنتقديْن شعائِر خِدمة "الامام الحُسين عليْهِ الصلاة والسلام" بكُل انواعهِم
▪️▪️▪️▪️▪️
تِطلَع نشاهِد چَم لسِن لو هَل شهَر مُحرَّم
عالخِدمَه هجمَه تنعلِن نِنظُرها تبدِي بالذَم
اْو تِنعاد هاي الهجمَه يومِيَّه
على الشعائِر الحُسينِيَّه
▪️▪️▪️▪️▪️
سالفَه اِتفُض يا خلَگ ما أعتقِد
اِشما يهِل اِمحرَّم اِيهِل النقِد
ناس مدرِي اِشبيها متروسَه حقِد
لا شغل لا عمَل تگعِد تنتقِد

الما راده اِبِن خير العمَل يِطلَع لِسانَه حقَّه
الراد الخلَل هوَّه الخلَل والخِدمَه هايَه تِبقه
تِبقه الخِدامَه مِيَّه بالمِيَّه
على الشعائِر الحُسينِيَّه
▪️▪️▪️▪️▪️
اِبراحتَك عالخِدمَه إِحچِي اْشما تريْد
تدرِي حَچيَك غير نفسَك ما يِفيْد
بَس اگِلَّك إِحذَر اِشتحچِي أكيْد
تره اِتوگعَك حُوبَة اِحسيْن الشهيْد

اِثگَل نعَم لا تندفِع تِتمادَه ما أريْدَك
نقدَك تره اِبلايَه نفِع يا هذا ما يفيدَك
لتمِد لِسانَك اِثگَل اِشويَّه
على الشعائِر الحُسينِيَّه
▪️▪️▪️▪️▪️
يِبقَه راسِخ دومَه هذا المُعتقَد
والشعائِر ثابتَه اِتضَل للأبَد
الكِل كلامَك بينَه ما مِهتَم أحَد
اِجبال إِحنَه الريْح مَتهِزنه بعَد

غيرتنَه تِبقَه اِبكِل زمَن ما نِنسَه مُعتقدنَه
دُوم اِحنه بالعالِي لأن چَف الولِي رُفعنَه
أنفُسنَه ما تِنعَز فِدائيَّه
على الشعائِر الحُسينِيَّه
▪️▪️▪️▪️▪️
اِحسيْن مِثْل الشمِس يِطلَع كِل زمن
ضايْعِين اِحنَه اْو فقَط هُوَّه الوطَن
لجلَه لا ما ينتهِي هذا الشجَن
واِحنَه عَن دربَه اليِفارِگنَه الچِفَن

اِحسيْن النحِبَّه واحلَه حُب بالدِنيْه هايَه حُبَّه
دربَه الضوه اْو هذا الدرُب بِيْه الهِدايَه دربَه
ينجِي اليسيْر اِبخالِص النِيَّه
على الشعائِر الحُسينِيَّه
▪️▪️▪️▪️▪️
خلَّك اِنته ياللي رافُض تِقتنِع
الحچِي الزايِد تره مابِي كِل نفِع
خلنِي اني قابِل اِبهذا الوضِع
رزقِي صار اِبخدمِتِي سِيْل الدمِع

غثَّتكُم ادرِي اِبخِدمتِي واِمچلِّب آنه إلها
تِچويكُم اعرف دمعتِي لو عالوجِن أهِلها
محَّد غلبنِي والعزِم بِيَّه
على الشعائِر الحُسينِيَّه
▪️▪️▪️▪️▪️
إهدء اِنته واِفتهِم هذا الكلام
مِن تحاربنَه تحارب بالإمام
ويَّه ابُو السجَّاد نِتقدَّم أمَام
واللطُم بِصدُورنا أكبَر وسام

هاي الخدَم فُوگ الصدُر لو دگَّت اِبحراره
اِتلاگِي اِبگلُبها تِستعُر مِن الخِيْم شراره
هالوادِم اِبغيرتها مَچويَّه
على الشعائِر الحُسينِيَّه
▪️▪️▪️▪️▪️
بهالخِدامَه خَل أگِلَّك واِنتبِه
بِيها بَس يَم الحقيقَه نِتِّجه
واضحَه هايَه وأبَد ما مِشتبِه
اليِلبَس الأسود يِضَل ابيَض وجِه

كِلمَن تِعنَّه المأتمَه اِبثُوب اسود اْو يِحضره
باچر يِلاگي فاطِمه وجهه ابيْض اْو تشِكره
تِشفعلَه للدافَع نعَم هِيَّه
على الشعائِر الحُسينِيَّه
▪️▪️▪️▪️▪️
ابو الحسن الوائلي
ذو القعده ١٤٤٤هـ