يلچم كسرها الطاهره شم الهوه
مكسوره وابعيناهه لا ماضل ضوه
راحتها والحيل انتهن ماتن سوه
بس الاجل ينفعها وايصير الدوه
▪️▪️▪️▪️▪️
ابو الحسن الوائلي

#الليالي_الفاطميه
▪️▪️▪️▪️▪️
يا علي الله يكون ابعونك
تنظر او تصبر على الياذونك
▪️▪️▪️▪️▪️
ايساعِدك الله يبن عم الرسول
اليا وكت يا بالحسن صبرك يطول
او تنظر اگبالك اجوا يم البتول
او تبقه ساكت يا علي ايشوفونك
▪️▪️▪️▪️▪️
يا قوي انته لغز كلّش صعُب
الخوف لو شافك يموت امْن الرعُب
فاطمه الزهره ابحضورك تنضرُب
شافت المنظر اشلون اعيونك
▪️▪️▪️▪️▪️
يا علي ابگلبك بقه يلهب جمُر
يمَن علّمت الصبُر معنى الصبُر
حاضر انته او ضلع فاطم ينكسُر
ابهاي حگهُم يا علي ايلومونك
▪️▪️▪️▪️▪️
خندق او خيبر يهالداحِيْ الباب
كلها تشهدلك عله گص الرِگاب
وابرغمها اندفع يا حيدر الباب
وانته متوصّي علي ايعرفونك
▪️▪️▪️▪️▪️
بيها امرين الوصيّه تمتثِل
فاطِمه او ما بين دين الله العدِل
ايموت واحد حتّه ثاني ايضَل عدِل
او بينهن يا حيدر ايخيرونك
▪️▪️▪️▪️▪️
امْن المئه او عشرين الف يوم الغدير
اختارك المختار من بعده وزير
كلها شهدت يا علي انته الامير
وابرغمها يا علي ايرفضونك
▪️▪️▪️▪️▪️
ناس متريد العدِل لا يا علي
ناس ما تستحي والرب العلِي
لا فهِم لا علِم واختاروا ولي
وانته يا حيدر علي ايعوفونك
▪️▪️▪️▪️▪️
ابو الحسن الوائلي
ربيع الآخر ١٤٤٤هـ

استشهاد مولاتنا فاطمة الزهراء "عليها السلام
الروايه الثالثة👇

#الليالي_الفاطميه
▪️▪️▪️▪️▪️
يَيُمّه مو سهِل فگدچ
ولا يسوه العمُر بعدِچ يَيُمّه يَيُمّه
ابوسط روحي لهب جمره
وداعچ مو سهِل امره يَيُمّه يَيُمّه
▪️▪️▪️▪️▪️
انه زينب او وضعي يصعب اهواي
بعد عينچ يَيُمه ظلمه دنياي
يضل ما ينگطع كل ليله مبچاي
مشت كل راحِتي او بس القهر جاي

اشوف الدنيْه مگضيّه
ابمصابچ روحي محنيّه يَيُمّه يَيُمّه
اريدچ يِمّه يالزهره
وداعچ مو سهِل امره يَيُمّه يَيُمّه
▪️▪️▪️▪️▪️
احِس حيلي ابوداعچ عالثره طاح
اشوفه ابروحتچ كل الفرح راح
يضل بيّه الحزن ما ضنّه ينزاح
واضل ابغيبتچ مكسورة اجناح

الضوه بعدچ فلا يضوي
يضي عيني الفگِد يچوي يَيُمّه يَيُمّه
كسيره او كسري شيجُبره
وداعچ مو سهِل امره يَيُمّه يَيُمّه
▪️▪️▪️▪️▪️
زغيره او عيني شافت كل المْصاب
فريسه صرتي انتي ابّين الذْياب
وره بابچ وگفتي انتي بلا احجاب
عله طولچ شفتها اندفعت الباب

شفِت بابچ يحرگوها
ثجيله او هيّه دفعوها يَيُمّه يَيُمّه
السمه ناحت عله العصره
وداعچ مو سهِل امره يَيُمّه يَيُمّه
▪️▪️▪️▪️▪️
فراشه انتي ابمخالبهُم يحيطوچ
انعصر گلبي احسّه من يعصروچ
احِس خدّي انسطر من انتي سطروچ
انه طاحت دمعتي وانتي طيحوچ

انحنيتي وانتشر حزنچ
او شفِت واحِد رفس بطنچ يَيُمّه يَيُمّه
اشوفچ طحتي عالغبره
وداعچ مو سهِل امره يَيُمّه يَيُمّه
▪️▪️▪️▪️▪️
انه او فضّه اجينه او گلبي مالوم
شفت محسن سِگط من عصرة الگوم
علي ما سَل فِقاره او باقي مهموم
الوصيّه منعته او ما خلِّته ايگوم

ابو الحمله اخذ حيفه
فزع لاچن بِلا سيفه يَيُمّه يَيُمّه
الوصيّه گادِته الصبره
وداعچ مو سهِل امره يَيُمّه يَيُمّه
▪️▪️▪️▪️▪️
عله موتچ شفتها مرّت اعوام
وانه كل ليله صاحي جرحي ما نام
ترِد باچر عليّه نفْس الالام
الحِرگ بابِچ يرِد ابنه اعله الخْيام

اشوف احزاني تتجدّد
او جمُر گلبي فلا يبرد يَيُمّه يَيُمّه
تعاوِد باچِر الكسره
وداعِچ مو سهِل امره يَيُمّه يَيُمّه
▪️▪️▪️▪️▪️
اشوف الطف يجيني او دمعي بالعين
واشوف اهلي ابچتِل عالغبره ماضين
اذا فوگ الترايِب ذبحوا اِحسين
اضل ابلا ولي وانطي الوجه وين

الخيول اهوايه مو وحده
ابسحگها ينشلِه جلده يَيُمّه يَيُمّه
او شسولف عالسبي او قهره
وداعچ مو سهِل امره يَيُمّه يَيُمّه
▪️▪️▪️▪️▪️
ابو الحسن الوائلي
ربيع الاوّل ١٤٤٤هـ

#الليالي_الفاطميه
▪️▪️▪️▪️▪️
متّي او ماتت ابموتچ ضحكتي
محتاجِچ يَيُمّه واندفنتي
▪️▪️▪️▪️▪️
اني اِحسين ابنچ يجري دمعي
بعدچ مختلِف يحبيبه وضعي
يُمّه اليوم اسولفلچ واسمعي
عله ضلْع التكسّر محني ضلعي

ولله ابكسرِتچ زادت كسِرتي
محتاجِچ يَيُمّه واندفنتي
▪️▪️▪️▪️▪️
انهد كل حيلي لمّن غبتي عنّي
حزنچ يُمّه زيّد بيّه حزني
موتچ يا هوه اهوايه جرحني
اغيابِچ يا ضوه اعيوني لچمني

حالي ابموتچ اتشرحه دمِعتي
محتاجِچ يَيُمّه واندفنتي
▪️▪️▪️▪️▪️
چنت اتمنّه لو نبقه سويّه
اشبع منّچ اني ابكل مسيّه
وامنيتي صُفت يحبيبه هيّه
تاخِذ روحي من عندي المنيّه

عمري اشيسوه يُمّه ابدونچ انتي
محتاجِچ يَيُمّه واندفنتي
▪️▪️▪️▪️▪️
بفراشِچ اشگد ابچي ابمكانِچ
هاي الدنيْه خوف ابلا امانِچ
يالماكو شخص يوصل كيانِچ
شلتي او شايِل ابموتچ حنانِچ

شالت راحِتي من انتي شلتي
محتاجِچ يَيُمّه واندفنتي
▪️▪️▪️▪️▪️
روحي ابغيبتچ يكبر المها
مشتاگ ارد ابوس ايدچ واشمها
يا مَن غيبتِچ مدري اشعظمها
موتچ سهم وابروحي سهمها

اتبيّن فرگِتچ حتّه ابصفُنتي
محتاجِچ يَيُمّه واندفنتي
▪️▪️▪️▪️▪️
گلبي ابغيبِتچ متحيِّر امره
لا گاه اليتِم يُمّه اعله زُغره
وحشه الدنيْه مِن دونچ يزهره
رحتي او صارت ابنص گلبي كسره

يعافيتي او نِده روحي او يصحتي
محتاجِچ يَيُمّه واندفنتي
▪️▪️▪️▪️▪️
بعدِچ ما يضل ابروحي صبري
غطّاچ التراب او غطّه عمري
جمُر فگدِچ اشوفه ابروحي يسري
حد موتي يضل ابروحي جمري

هايه غيبتچ صابت مُهجتي
محتاجِچ يَيُمّه واندفنتي
▪️▪️▪️▪️▪️
ابو الحسن الوائلي
ربيع الاول ١٤٤٤هـ

#الليالي_الفاطميه
▪️▪️▪️▪️▪️
يا ضي عيني رحتي او رايِح كلشي اوياچ
دوّرتِچ مفگوده ابروحي وين الگاچ
محتاجِچ بَس عفتيني
فگدِچ حيل ايأذّيني
▪️▪️▪️▪️▪️
انه يا فاطِمه حامي الحِمه حيدر
عله فگدچ احير اشلون اتصبّر
ابرحيلچ منّي ضل يجري الدمِع احمر
بدونچ ولله حيره اشلون اتصبّر

فگدِچ حناني ما احمله اني
ابجمره چواني يا فاطِمه

يا فاطِم فگدچ ما يسهل يصعب حيل
اظلم مصباحي ابلا عينچ صايِر ليل
جمرة موتچ تچويني
فگدِچ حيل ايأذّيني
▪️▪️▪️▪️▪️
انه ذاك الشلِت خيبر عله امتوني
شلتها ابلا تعب كلهُم يشهدوني
لچنّي مِن شلِت نعشِچ يشوفوني
انهِدم حيلي او گلِت يا ناس اعينوني

فگدِچ يويلي يلچم دليلي
ما خلّه حيلي يا فاطِمه

فگدِچ ما يرحمني او خلّه ابروحي النار
شلت التابوت اعله اچتافي او بيّه اشصار
يا ريتچ لو شفتيني
فگدِچ حيل ايأذّيني
▪️▪️▪️▪️▪️
مشيتي والفرح يالزهره ودّعته
العمُر دونچ ولا يسوه العمُر شفته
دفنتچ واني چم مرّه متِت سكته
ارجعت بس گلبي يمّچ باللحِد عفته

گلبي اشيصبره او لحدچ يزهره
ابچي واحفره يا فاطِمه

مِن وسّدتِچ انظُر گلبي ابلحدِچ طاح
او كل حيلي ابموتچ يا فاطِم خلّه او راح
ميّت مِن ودّعتيني
فگدِچ حيل ايأذّيني
▪️▪️▪️▪️▪️
رجعت او بانت اجروحي عله اخيالي
دخلْت الداري والهم حاضِر اگبالي
اصِد اعله الزوايا ابمدمعِي الهالي
مكانِچ يالحبيبه ابكل شبِر خالي

يالزهره اخبرچ بي باقي عطرچ
ابشمّه اذكرِچ يا فاطِمه

صار البيت ابموتچ ظلمه او مابي روح
رحتي او ضل عطرچ يا فاطِم منّه ايفوح
ابذكرچ انتي اتكسريني
فگدِچ حيل ايأذّيني
▪️▪️▪️▪️▪️
احِن واتذكّرِچ لمّن امِس بابچ
يضل ذكرى ابحياتي فاطِمه امصابچ
انه اقسِم يالزچيّه ابكل جرِح صابچ
وحگ عشرتنه ما اگدر عله اغيابچ

الودّع حبيبه جرحه اشيطيبه
فگده يشيبه يا فاطِمه

يالزهره افراگِچ خلّالي اجروح اهواي
يا كوثر عطشان انظرلچ مو للماي
شوفة وجهِچ ترويني
فگدِچ حيل ايأذّيني
▪️▪️▪️▪️▪️
الضوه بعدچ يفاطِم ما دخل بيتي
الهوه لمّن اشمّه ايْشَگِگ ابريتي
بعد عينچ يزهره وحده امنيتي
اموت اني واجي لو انتي ما جيتي

مشتاگ اشوفچ واشتم چفوفچ
صعبه اعوفچ يا فاطِمه

شيصبّرني او موتچ خلّه ابگلبي اجراح
مِن بعدچ بس موتي الاگدر بي ارتاح
اتنطّر تغمض عيني
فگدِچ حيل ايأذّيني
▪️▪️▪️▪️▪️
مشيتي او حيلي بعدچ فاطِمه اتهدّم
او عله افراگِچ انه ابكل ليله اتألّم
يزهره امْن القهر روحي ولا تسلم
لحد موتي اعله موتچ ناصُب المأتم

فتره ابحياتي او يصبح مماتي
ابلحظة صلاتي يا فاطِمه

احسِب يا فاطِم كُل ليله الهذا اليوم
واني انطر سيف اليطبرني او بيّه اهموم
ابطبرة راسي اتشوفيني
فگدِچ حيل ايأذّيني
▪️▪️▪️▪️▪️
ابو الحسن الوائلي
ربيع الاول ١٤٤٤هـ

#الليالي_الفاطميه
▪️▪️▪️▪️▪️
بعد ان سمِع خِطاب والدته لابُد ان يجيبها
‌▪️⁩‌▪️⁩‌▪️⁩‌▪️⁩‌▪️
اني المهدي ابنچ
لا ما ناسي حزنچ
تضلّين اعله بالي ابكل مسيّه
يرِد ثارچ يَيُمّه ابّين اديّه
‌▪️⁩‌▪️⁩‌▪️⁩‌▪️⁩‌▪️
انه المهدي وسَط روحي اشكبُر صبري
عليچ ابدي ابسلامي او مدمعي يجري
الليالي اتمُر عليّه او ينحنِي ظهري
أحِس مِن حولي كُلشِي ايعظُّم ابـ أجري

احسب ليله ليله
وآلامي ثجيله
مُصابچ زيّد اجروحي عليّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
انه امْن اذكُر جروح اهدعِش للهِجره
انوح او گلبي گوّه يمتلِك صبره
اضل انحب عليچ او بالگلُب حسره
يهِد حيلي مُصابچ من يجي ذكره

لجله ابگلبي ناري
يرجع ويّه ثاري
ابظهُوري للمله اي يالزچيّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
مُصابچ يالوديعه چم گلُب كاسِر
اليذكره يبقه مِن عينه الدمِع ماطِر
انه گلبي اعله حزنچ ما يضل صابِر
انه بس الله يدري ابحالِتي اشصايِر

ابكل ليله تجيلي
آلام ابدليلي
ابحسرتي ادعي يمته ابكِل مِسيّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
ابوسَط روحي ابد ما تنطفي ناري
وانه حالي عليچ اتشرحه اعباري
عله الهجمه يضل منّي الدمِع جاري
هذيچ الدار اكيده ابلايه شَك داري

من نار اللّي تسعر
يُمّه گلبي وجّر
احترگ گلبي او بقت آلامي بيّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
ابليالِيّچ طُفن كلهن ضوه اشموعي
اعله حزنچ منّي حمره تنزِل ادموعي
يضي عيني مُصابچ هوّه موضوعي
الكِسر ضلعچ ابچفّه كاسِر اضلوعي

اعليچ الرافع ايده
الطگ ظهرچ اكيده
اگصها رجله واچفوفه سويّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
عله الدنيه ابظهوري نوري مِن يطلع
ابچفوفي منهُم آخِذ ثارِچ امربّع
اجي او ترجع احگُوگِچ يُمّه مِن ارجع
ارِد واعداي منّي ابجَيتي تتلوّع

لمّن ارجع الها
اعداي امحيها كلها
اعيّشها ابندامه كلها هيّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
إذا ارجع واجرّد صارِمي الابشَط
اسوّي مِن دماهُم بيدي باچر شَط
انه الآمِر الناهي ابكيفي اتشرّط
او عله گبرچ يضي عيني الگُبب تنحط

آياتي او وعيدي
مرقد أبني بيدي
واسوّي الحضره يا يُمّه زهيّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
ابو الحسن الوائلي
ربيع الثاني ١٤٤٤هـ

▪️▪️▪️▪️▪️
الله ايْسَاعِدَك يابُو الحَمِيّه
ابْيا رُوح ادفَنِت جِسْم الزچِيّه
بَلا الزَهره حَيَاتَك ظَلْمَه هِيّه
دِفَنْت الضِحكَه وَيّاهَه سوِيّه
مِشَت عَنَّك او راحَت للمنِيّه
او بُگت مِن عِينَك ادمُوعَك جرِيّه
اشْكثُر گلبَك يِكابِد مِن اذِيّه
الصَبُر گادَك يَمَن روحَك تَقِيّه
علي ابْحِيرَه بُگيت ابهَالرزِيّه
رِضَخْت او گيَّدَك چَف الوصِيّه
▪️▪️▪️▪️▪️
ابو الحسن الوائلي
جمادي الاوّل ١٤٤٤هـ

#الليالي_الفاطميه
▪️▪️▪️▪️▪️
"نصّاري"
▪️▪️▪️▪️▪️
بَابْ ايْكُون قِيمَتهَا ابسِترها
وگفَت فاطِمْه خَلفَه ابصَبُرها
▪️▪️▪️▪️▪️
بَاب او چَان جبريل اليِجلهَا
بَابٍ اوْ چانَت اتحامِي أَهْلهَا
يَويلِي اعَلَه ام حسَن دَفَعَوا ثِگلها
اوْ بَيْن الْبَاب وَالْحَايِط عِصَرهَا
▪️▪️▪️▪️▪️
اذيْاب اتعنّت او زِيدَت الْمَهَا
او تَرَفْه فاطِمَه يَصْعَب هَضُمها
بگه يُعْصُر الزَّهْرَه اوْ مَا رَحَمهَا
اِرْتَاح اهِواي لَمّن طَگ ظَهْرهَا
▪️▪️▪️▪️▪️
طاحَت وَانْتِشَر هَمْهَا او حِزْنهَا
او طاحَت قوّة السَّوْط ابمَتِنها
واجتهّا ابِلا رَحَم رَفْسَه ابّطِنها
او سِگط مِحسِنها واجروُحَه اشكُبرها
▪️▪️▪️▪️▪️
وَلَا هَمْهَا ابِنْهَا اوْ لَا وِجَعهَا
وَلَا هَمْهَا ابَد كَسَرَة ضِلعهَا
وَلَا هَمْهَا يِسِيل احْمَر دَمِعهَا
چَان ام الحسَن هَمْهَا سْتِرهَا
▪️▪️▪️▪️▪️
ابو الحسن الوائلي
جمادي الاول ١٤٤٤هـ

وفاة مولاتنا السيّدة ام البنين عليها السلام 👇

#ام_البنين
‌▪️⁩‌▪️⁩‌▪️⁩‌▪️⁩‌▪️
حرمه حتّه الغيره حارت بيها
امعدّله او كل الوفه ماليها
ابغيره هيّه امحزّمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
شحچي عنها الكامِله و امكمّله
البالوفه فوگاهه ما واحِد عله
أقل شي ينگال عنها امعدّله
اربع انهار انطت الطف كربله

امْن الحُسين او فاطمه خجلانه
مثْل ابنها ماتت او عطشانه
او ما شِكت مِن الضمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ما مثلها أي مره او هذا مُحال
حرمه بيها انجمعت اوصاف الكمال
تضحيتها ما تمُر اعله الخيال
للحُسين انطت فده اربع جبال

واليحب لازِم يضحّي ابغالي
او ضحّت العدها فده للوالي
اربعه للموزمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
لبوه ما منها او مثلها اتلاگِي وين
باعت الدنيْه او شِرت حُب الحُسين
هيّه ما بخلت نطت لجله البنين
او هم تضحّيهُم لوَن عدها اربعين

العندي كِلّه للحُسين انطيته
امقصره گالت واني ما جازيته
اشگد عظيمه فاطِمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
بيها مِن احچي كلامي اشگد قليل
ما أجازي ابشرحي موقفها الثگيل
امْن اختصر الگه اختصاري هم طويل
يا مره التنطي الولِد كلهُم سبيل

ضحّت ابكلشي العِيُون اِحسينها
اِحسين ابو السجّاد أصبح دِينها
تفرح امْن اتكلِّمَه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
اموقّره اشما أنظُر اعليها أشوف
كعبه هيّه والوفه اعليها يطوف
فوگ خدها آيات مدمعها ذروف
بالمدينه او عاشت اجروح الطفوف

ابلا ولي شافتها رِجعت زينب
والجمُر ضل بيها عايِش يلهب
چم سهم بيها انرمه
والوفه ما اعظمه
‌▪️⁩‌▪️⁩‌▪️⁩‌▪️⁩‌▪️
تبچي كل ليله او جفنها ضل ذبول
ابعينها ليل الحزن باقي يطول
رغم كل التضحيْه تبچي او تگول
اني خاف امقصّره ويّه البتول

ماتت او مات الوفه ويّاهه
ابكل مسه لمّن مشت ينعاهه
او ينتحِب عالعالِمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ابتضحيتها بيِّنَت معنى الولاء
ثلث كواكِب والگمر انطت فداء
يا عظمها چن نهر فايِض عطاء
حُب علي خلّاهه اعله امْن السماء

كلها غيره او ماكو منها اهوايه
عاليْه او مهيوبه هيبة رايه
رايه رفّت بالسمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
صفر ١٤٤٤ هـ

#ام_البنين
‌▪️⁩‌▪️⁩‌▪️⁩‌▪️⁩‌▪️
يابو الفضِل وينك .. امّك ماتت ابغربه
لو ما تحِضروها .. اي يابو الفضِل صعبه
وسفه تخلّيها .. محّد حضر ليها
سيّدي سيّدي
‌▪️⁩‌▪️⁩‌▪️⁩‌▪️⁩‌▪️
يا سيدي الكافل هاي القصه معروفه
كلمن يجي يومه كل اهله تجي اتشوفه
بين اللذي ايْودعه او بين اليشبع ابشوفه
او بين اليسِد عينه او بين اليلزم اچفوفه

بس امّك الحرّه .. يابو الغيره محنيّه
ما چنها ام اربع .. چنها ابلا ولد هيّه
والغربه تچويها .. محّد حضر ليها
سيّدي سيّدي
‌▪️⁩‌▪️⁩‌▪️⁩‌▪️⁩‌▪️
امّك يبو الغيره ضل بيها الوفه كامِل
لمّن اجت زينب لاگتها ابدمِع هامِل
حاچتها محروگه يُمّه احچيلي عالكافِل
گالت كفو منّه ما قصّر ابو فاضِل

واتوجِهَت للطف .. نادتلك يعبّاسي
مشكوره يوليدي .. ابفضلك مرتفِع راسي
فضلك يعلّيها .. محّد حضر ليها
سيّدي سيّدي
‌▪️⁩‌▪️⁩‌▪️⁩‌▪️⁩‌▪️
يا سيّد الغيره امّك عالقِمم قِمه
نصرة ابو الاكبر تحسبها مثل نعمه
بالغيره ضحّتكُم او گالت بالفخر كلمه
صح انتم اولادي بس الاغله ابو اليِمّه

انتوا خدم عنده .. او هوّه الوالي والقائد
خادم لابو الاكبر .. بيكم انتوا كل واحد
خدمه النصُر بيها .. محّد حضر ليها
سيّدي سيّدي
▪️⁩‌▪️⁩‌▪️⁩‌▪️⁩‌▪️
امّك يبو فاضِل چانت سيّدة نخوه
چانت نهر غيره منّه الغيره تتروّه
حاچتكم احچايه چانت كلمة امروّه
يولادي ابو الاكبر ترحوله الف فدوه

گالت ردت منكم .. كلمن ينگطع نحره
واللي رجع سالِم .. هذا منّه اتبرّه
ابكل غيره تحچيها .. محّد حضر ليها
سيّدي سيّدي
▪️⁩‌▪️⁩‌▪️⁩‌▪️⁩‌▪️
يا سيّد النخوه امّك طاهِره او اكثر
ضحّتكم ابغيره او ضل بيها الوفه امحيّر
عاشت مثل رايه واترِف ابعشِگ حيدر
عيشتها مهيوبه اعلى امْن السمه واكبر

صارت جبل عالي .. من حب حيدر الوالي
او للغالي موقفها .. من ضحّتله كل غالي
والغيره تمليها .. محّد حضر ليها
سيّدي سيّدي
▪️⁩‌▪️⁩‌▪️⁩‌▪️⁩‌▪️
امّك يبو فاضِل چانت بالوفه اچبيره
رفّت مثل رايه مهيوبه ابسمه الغيره
الرايد يوصّفها والجاب الها فد سيره
ايضل بالوصُف حاير تعجز كل تعابيره

الجابت ولد مثلك .. لا مو بس يجلّوها
لا ولله بالنسوه .. ما لازِم يقيسوها
محّد يضاهيها .. محّد حضر ليها
سيّدي سيّدي
▪️⁩‌▪️⁩‌▪️⁩‌▪️⁩‌▪️
يا سيّد الموقف امّك هايه وحّدها
ما چنها ام اربع چنها او لا ولد عدها
ماكو اليغسّلها او ماكو اللي يوسّدها
بس الدمِع يمها موجود ابوسط خدها

تتلفّت ابحرگه .. ما شافت ولي يمها
مفجوعه مكسوره .. والغربه تالّمها
وين اليواريها .. محّد حضر ليها
سيّدي سيّدي
▪️⁩‌▪️⁩‌▪️⁩‌▪️⁩‌▪️
ابو الحسن الوائلي
ربيع الاول ١٤٤٤

#ام_البنين
▪️▪️▪️▪️▪️
لو شفت نفسك حزين
نادي يا أم البنين
▪️▪️▪️▪️▪️
لو همومك طالِعه
او حتّه عينك دامِعه
نادي ام الاربعه

هايه ام گلْب الحنين
نادي يا ام البنين
▪️▪️▪️▪️▪️
انخاهه لو عندك جرِح
ما تعوفك منجرِح
اتشيله حمْل المنطرِح

ما يضل گلبك طعين
نادي يا ام البنين
▪️▪️▪️▪️▪️
اوياهه احچي مُطمئِن
خايِب اترِد لا تضِن
اتردّك ابلايه حزِن

اعليها اقسِم بالحُسين
نادي يا ام البنين
▪️▪️▪️▪️▪️
خلّي نيتَك صافِيْه
بس اشاره كافِيْه
عندك اترِد عافِيْه

سامِعي ابرفع الادين
نادي يا ام البنين
▪️▪️▪️▪️▪️
هالكلام انوثِّقه
هيّه عِنْد الله ثِقه
اعتبره هَمّك ما بُقه

والطلب مگضي او امين
نادي يا ام البنين
▪️▪️▪️▪️▪️
لو شفِت همّك كُبر
نادي يا ام الگمر
انخاهه ما يبقه قهر

اشكثُر ما عندك انين
نادي يا ام البنين
▪️▪️▪️▪️▪️
احچايِتْي بالخاتِمه
ارفع ايدك للسِمه
او گلّه ربّي ابفاطِمه

انتخي او بيها استعين
نادي يا ام البنين
▪️▪️▪️▪️▪️
ابو الحسن الوائلي
جمادي الاول ١٤٤٤هـ

▪️في مولد السيّدة الطاهرة فاطمة الزهراء عليها السلام
▪️▪️▪️▪️▪️
قَدْ فَرِحَتْ ارْضٌ وَسَمَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
شَعّتْ نُورًاً وَاضِحُ كَانْا
جُزْءٌ مِنْ نُورِ الرَّحْمَنَْا
فَهِيَ بِمَدَارِ الاَزْمَانْا
تُعْطِي نُورَاً لِلَاكْوَانْا

نُورَاً مَا مِثْلُهُ قَدْ جَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
لَمْ تُخْلَقْ مِنْ طِينٍ ، اكْبَر
خَلَقَ الْبَارِي فَاطِمُ جَوْهَر
قَالَ اللَّهُ وَطٰه اسْتَبْشَر
"إِنَّا أَعْطَيْنَاكَ الْكَوْثَرَ"

بِكِتَابِ الْبَارِي الِانْبَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
سُبْحَانَ مُصَوّر صُورَتِهَا
وَمُسَوّي هَذِي هَيْبَتِهَا
فَخَدِيجَةُ لَوْ لَا عَظَمَتِهَا
مَا صَارَتْ فَاطِمَةُ ابْنَتِهَا

مَا أَعْظَمَ امْ الِابْنَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
تُفَّاحَةُ انَزَلَهَا الْبَارِيِ
نُورًا تَضْوِي لِلَانْوَارِ
فَاطِمَهَا الرَّبُّ مِنَ النَّارِ
فَاطِمَةٌ امُّ الِاطهَارِ

لِمُحِبِّيهَا الْجَنَّةِ شَاءَ
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
فَاءٌ: فَاطِمَةُ انْسِيّة
الْفٌ: انْفَاسٌ قُدْسِيّة
طَاءٌ: طَاهِرَةٌ وَرَضِيّة
مِيمٌ: مَعْنَاهَا مَرْضِيّة

وَ"الْهَمْزَةُ" تَحْوِي آلَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
سُبْحَانَ الْعَالِي السِّوّاهَا
تَخَلُوْا مِنْ سُوءِ خُلّاهَا
لَا شَيْءَ يُفَسّرُ مَعْنَاهَا
اذْ يَرْضَا الْبَارِي لِرِضَاهَا

مِثْلُ الْبَارِي فِي الْآرَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
مَا أَعْظَمَ خَالِقِهَا الِادْرَا
قَدِ ابْدَعَ فِي خَلْقِ الزُّهْرَا
سوّاها عَالِيَةَ الْقَدَرَا
فَهِيَ الْكُبْرَى بِنْتُ الْكُبْرَى

وَلَهَا اسِّرَارُ الِاسْمَاء
وِلِدَتْ فَاطِمَةُ الزَّهْرَاءِ
▪️▪️▪️▪️▪️‏️️️️️
ابو الحسن الوائلي
جمادي الاخِر ١٤٤٤هـ

▪️في استشهاد الامام العاشِر علي الهادي عليه السلام
▪️▪️▪️▪️▪️
بجروح معتنِي حيدر علي الامير
بجروح رايِح السامرّه بَس كسير
بجروحه علِي متعنّي الـ علِي
▪️▪️▪️▪️▪️
انظُر ابوَجْه السِمه او خِنگتنِي عبره
چنها حزنانه او شِفتها كِلها حمره
اتسائلِت عَن السَبب وابصَدري حسره
بالسِمه المح مُصيبه او بيها كسره
اسئلِت روحي ياهو هذا الگاضِي عمره
المات هذا ابلايه شَك يم الله سرّه

والمات ارد اعرفه ابحسرَة الكلام
والمات اشعِنده يَم الباري مِن مقام ؟
والمطلب جلِي متعنّي الـ علِي
▪️▪️▪️▪️▪️
گلبي ودّاني ابثگُل حسراته ديره
ابأرض سامرّه لِگه گلبي مصيره
لن نعِش مشيُول والوادِم چثيره
استغرَبت واتسائلِت وابروحِي حيره
گلت شِسمَه المَيِّت او مِن يا عشيره
علي گالوا اِسمه والكلمه چبيره

واجواب مِن عرفْت الميّت ابذهول
واجواب المِنقتِل يُنسَب الى الرسول
الهم ما ينجلِي متعنّي الـ علِي
▪️▪️▪️▪️▪️
اعرفِت منهو الميّت ابهاي الرزيّه
علي الهادي او جدّه حمّاي الحميّه
ابن وادِم كلها غيره او نخوه هيّه
ايموت مَسموم ابفعِل ولْد الرديّه
شمِس هوّه او يندفِن تحْت الوطيّه
ابموته حتّه الجنّه دمعتها جريّه

ويلاه اللي من دونه الارُض سراب
ويلاه وسفه تالي يِغفه بالتراب
الغيره ممتلِي متعنّي الـ علِي
▪️▪️▪️▪️▪️
ابگبره يا ويلي امام الشيعه نازِل
ابن وادِم ما ترِد بالمرّه سائِل
ابلايه شَك مات الامام ابفعِل فاعِل
مِن بني العبّاس هذا اللي قاتِل
المُعتَز المُنذَل صُفه وابلا مراجِل
من وراه حيدر علِي ضل دمعه هامِل

مقتول السيّد الشايِل وفه او امان
مقتول يا وسافه من فعِل جبان
او چف الجاهلِي متعنّي الـ علِي
▪️▪️▪️▪️▪️
مختلِف حال الامير او حيله ما ضَل
او هذا عاشِر ولد مِن اولاده يُقتَل
مِن دمه مِنّه الدَمِع فوگ الوجِن هَل
حگّه لو مِن البواچي جِفنه يِذبَل
او حگّه اكثر لو بِده كل حيله يرحَل
اهناكه بالطف من يشاهِد اقسَه مقتَل

واهناك ابكربلاء او مقتَل الحبيب
واهناك يبگه وحده حايِر او غريب
ما عنده ولِي متعنّي الـ علِي
▪️▪️▪️▪️▪️
ايساعِد الله حيدر ابهاي المصيبه
من يشوف ابناظِره مقتل حبيبه
ايصيح "الا مِن ناصر" او محّد يجيبه
او هوّه نيران الضِمه ابروحه لهيبه
ابلا نحر فوگ الثره او جثته سليبه
او زينب اتضَل حايِره او تصبح غريبه

واتشوف كل اهلها اعله الثره تطيح
واتشوف ياهو يفزعلِي تِضل تصيح
اتنادي يا هلِي متعنّي الـ علِي
▪️▪️▪️▪️▪️
ايساعِد الله زينب اهناك ابهضُمها
ابلا ولِي بنْت الولِي او يكبر المها
اتباوع اعله الغبره مذبُوحه زلِمها
ابلا كفيل او ماكو حامي اهناكه يمها
دارت اعليها العده او محّد رحمها
ابحيره شافوها واجوا حرگوا خيمها

والناس اعليها دارت كلها بالطفوف
والناس رحمه من عدهم فلا تشوف
زينب تنولِي متعنّي الـ علِي
▪️▪️▪️▪️▪️
ابو الحسن الوائلي
جمادي الاخِر ١٤٤٤هـ

▪️في مولد امير الرحمه وسيّد السلامه
الامام علي بن ابي طالب عليه الصلاة والسلام
▪️▪️▪️▪️▪️
فرحانه كل الدنيْه فرحانه
هالليله بالمولِد يمولانه
يالمولِدك بي ماتَت احزاني
ما عندِي غيرك بالگلُب ثاني
▪️▪️▪️▪️▪️
علّة الكون الما شخُص مِثلَك
ربّك رُفع قدرَك ، منو اينَزلَك ؟
ربّك نعم كُلشِي خِلق لجلَك
يا واحِد او ماكو اللذي ايمثلَك
غابَت شمِسنه امْن انخِلق ضِلَّك
او غاب الگمَر لمّن نُظَر شِكلَك
اوياك احچِي واعرف صُوتِي يوصَلّك
اضلُوع البجسمِي اشموع اشعِلَّك

گلبي يريدك يا بعد گلبي
هالليله احِس كِلّه انمِحه تعبي
مولِدك تدري ابراحه خلّاني
ما عندي غيرك بالگلُب ثاني
▪️▪️▪️▪️▪️
اشمكبر فرحتِي ابمولِدك تِدرِي
يالحُبّك انته اويْه الدِمه يِسرِي
ياللي امْن اذكرك ينجبر كَسرِي
دونَك اعيش اشلون ما ادرِي
انته امل روحي اللذي ابعُمرِي
محتاجك اشلون الهوه الصدرِي
افخر عشگتَك اني مِن زُغرِي
وابقه لحَد ما ينحفُر گبرِي

يالكُلشي بالنسبه الي اعتبرك
اگطع لِساني لو نِسه ايذكرك
دائماً باسمك يلهج الساني
ما عندي غيرك بالگلُب ثاني
▪️▪️▪️▪️▪️
ليلة المولِد ما وصفناهه
حتّه الوصُف حايِر بمعناهه
ليله جليله ابفرحه عشناهه
كلّش عظيمه هيّه شفناهه
ظلمه الارض دونك عرفناهه
او ربّك خلق نورك او ضوّاهه
واسراره عندَك كلها خلّاهه
والدنيْه لجلَك هوّه سوّاهه

ميوصّفوك اشما يوصفونك
الله او محمّد بس يعرفونك
او صارت محبتك امُر ربّاني
ما عندي غيرك بالگلُب ثاني
▪️▪️▪️▪️▪️
ورْد الحدايِق بيك مِن يسمَع
كلساع لاسمك مِن يمُر يركَع
او مِن ينتهي طرواك يتطلَّع
ينفتِح مِن اسمك يرِد يرجَع
مِن اسمك انته عطره يتجمَّع
او يبقه العطر عالناس يتوزَّع
بافكاري اشوفك اكبر او أوسَع
او غيرك حَبيب الروحي ما أقنَع

وحدك يروحي ساكِن ابروحي
يا بالحسَن يا بلسَم اِجروحي
اِسمك يسير ابوسَط شرياني
ما عندي غيرك بالگلُب ثاني
▪️▪️▪️▪️▪️
رَب البريّه العالِي والعادِل
سوّاك هوّه امكَمَّل او كامِل
عِلمَك الهْي او كِل علِم شامِل
قُران ناطق عالارض نازِل
ذَرّه ابعُلومَك يا بشَر شايِل
حَتّه الخيالَك يا بشر واصِل
خلهُم يبغضونَك اْهو الحاصِل
ثابت تِضل واليُبغُضَك زايِل

رايِد شِعار اللي الگلُب شالَه
كلمن يُبغضك كل اصِل مالَه
الما عنده مثلك عايِش ايعاني
ما عندي غيرك بالگلُب ثاني
▪️▪️▪️▪️▪️
رب السمه البي ما تمُر صعبَه
مِن نور سوّاك اِنته مو تُربَه
ابيُوم الولاده صارت العُجبَه
لجلك يوالي انشگت الكعبَه
يابو السلامه او كاشِف الكُربَه
الشيعي اعله حُبّك يحمِد ابربَّه
اْو هوّه ابندائه يعلِن ابحُبَّه
والما يريدك مُشكِله ابگلبَه

عنواني هذا البي صرِت امشي
حيدر اميري او سيّدي او كلشي
شيعي او موالي او هذا عنواني
ما عندي غيرك بالگلُب ثاني
▪️▪️▪️▪️▪️
ابو الحسن الوائلي
رجب ١٤٤٤هـ

▪️للامام علي عليه السلام
▪️▪️▪️▪️▪️
الله شگ يا بالحسن ليك الجِدار
او گال انته يا علي اهنا تنوضِع
ابّيتي نورك يا علي ايضوّي الوجود
او يا علي ابّيتي ابمماتك تنرفِع
▪️▪️▪️▪️▪️
يا علي توّك طِلعْت اعله الوجود
او دوّروا كاروك لجلك مَنوِجَد
وابوسَط هذا الحچي شاء الاله
ايصير الَك يا سيّدي بيته مهَد
▪️▪️▪️▪️▪️
من طلع نورك عله الدنيْه يحيد
الباري من فوگ السمه اصَدر قرار
الگُمر گدّام ضي وجهك يغيب
او تنحنِي النورك أُمَر شمْس النهار
▪️▪️▪️▪️▪️
ما أوصفك يا أمير المؤمنين
يَمَن اِسمك بالشرايين انكِتب
اتراب كل الناس هاي بهالوِجود
ولله يا مولاي بس انته الذهب
▪️▪️▪️▪️▪️
ابو الحسن الوائلي
رجب ١٤٤٤هـ

▪️السيّدة زينب عليها السلام
▪️▪️▪️▪️▪️
موتي أحِس ليّه وصَل
او ما واحِد امْن اهلِي وصَل
عافوني والحال اختلف
او منهُم ولا واحِد سِئَل
▪️▪️▪️▪️▪️
اني زينب عشِت لوعات او كسُر
ابحزِن بادي او يخلص اوياي العمُر
امْن الصبُر شيّب دليلي والهجُر
چِنت امُوت امْن اشوكِت لوما الصبُر

ويّه الصبُر عِشره إلي
ضَل مِن مشوا عنّي هلِي
غابوا وانه گلبي انچوه
والمَدمَع الاحمر هِمَل
▪️▪️▪️▪️▪️
گلبي ملچوم او عله الحسره عشِت
او مِن زغُر سِنّي مُصايِب شاهدِت
چم رزّيه او فاجِعه ابعيني شفِت
او روح ابوي امْن المُصايِب شيّبِت

ذيِچ المواجِع والهظُم
اني ابذكرهِن انهُظُم
ما مَر عله واحِد أبد
كِل الجرالي والحِصَل
▪️▪️▪️▪️▪️
مِن اغمُّض عيني اباوِع بالحلِم
مَذبح اِحسينِي امامِي ينرسِم
او لمّن اصفُن چَن اباوِع للجسِم
چنّ اشُوف اضلُوع اخوي التنهشِم

جِسمه الوگع فوگ الثره
دامِي او بُگه ابلا منحره
مِن شفته طايِح عالترُب
حيلي انهِدم مِن انچِتَل
▪️▪️▪️▪️▪️
او بعد ذبْح اِحسين اكو ذبحة نهَر
عله الشاطِي فگدت اعيوني گُمَر
مِن رحتله جدمي كل خطوه ايعثَر
شيّبِت عالمشرعه او ظهري انكسَر

غافي ابوسَط عينه السهَم
ويلي ابعمَد راسه انهِشَم
او مگطوعه چفّين الوَفي
شفته او دمِع عيني نِزَل
▪️▪️▪️▪️▪️
اوداع واحِد عمري ودّعهُم سوه
ابجمرة الفرگه أحِس گلبي انچوه
مِن بعدهُم عمري ظلمه ابلا ضوه
او مِن اشمّه ايشگِگ ابريتي الهوه

يكبر انيني والقهر
ضيّعني واخواني الدهر
ابعيني شفتهُم واصبرِت
غالي وره غالي رِحَل
▪️▪️▪️▪️▪️
مِن بعد طف كربله هدنِي الحزِن
امورّم امْن الطف لحَد هسّه المتِن
فوگ جرح الطف جرِح خلّاني اوِن
لا ابو اليحضرني لا أخ لا إبِن

عافوني واني ابلا ولِي
وحدي واجه موتي إلِي
والغُربه تذبحني ذبِح
او غير الصبُر ماعندي حَل
▪️▪️▪️▪️▪️
حايره او بعيوني بانت حيرِتي
واني هالّلحظات تطفه شمعِتي
سنَد ما عندي السنَد بس دمعِتي
اجه موتي او ما اجوا ليّه اخوِتي

عندي انغلق باب الرجه
بس الاجل ليّه اِجه
چنْت انتظُر جيّة عرِف
لاچِن اِجه بَس الاجَل
▪️▪️▪️▪️▪️
اُمنِيْه عندي او تحِز ابداخلِي
عله گد موتي ايتِعَنُّونِي هلِي
اهوايه محتاجتهُم ايحِضرُون اِلي
صعُب موتي واني ماعندي ولِي

لو ما تجي اخواني بعَد
ياهو اللذي ايشيْع الجسَد
او ياهو اليوسّدني ابترُب
لو ما إجَت ليّه الأهَل
▪️▪️▪️▪️▪️
ابو الحسن الوائلي
رجب ١٤٤٤هـ

▪️نعي
▪️▪️▪️▪️▪️
يويلي اعله التِلاگه ويّه بِنته
عين ابعين لاگاهه ابحسِرته
يصِد الحالها او سالت دمِعته
يِگلها صِدك هايه اِنتي زينب
▪️▪️▪️▪️▪️
شُبگها او عينه ضَل يجري دمِعها
او حسّت لچم بالشبگه ضلِعها
استغرَب!؟ رادها اتسولِف وضِعها
او عن ضيم الگلبها بي تصوّب
▪️▪️▪️▪️▪️
صاحت بويه يا بويه يحيدر
الجمر تدري بُگه بالروح يسعر
ردتك يا علي چم مرّه تحضر
بالطف بگه ابروحي الجمُر يلهب
▪️▪️▪️▪️▪️
اخوتي اعله الترب طاحت شفتها
وذر فوگ الثره اخواني عفتها
وانه ادروب اليسُر بويه اگطعتها
سبيّه ابلا ولي او گلبي تعذّب
▪️▪️▪️▪️▪️
احملِت ضيم الرواسي ما تحمله
الثوب امتوني هدلت ما تحمله
اخوتي النعشي وسفه ما تحمله
غريبه ابعيشتي او موتي سويّه
▪️▪️▪️▪️▪️
ابو الحسن الوائلي
رجب ١٤٤٤هـ
▪️▪️▪️▪️▪️

▪️المولى علي بن ابي طالب عليه السلام رأى مولاتنا زينب عليها السلام في الجنّة
فقال لها...
▪️▪️▪️▪️▪️
زينب نزلت دمعتي
هايه معقوله انتي
حالچ متغيّر امره
گلبچ ما باقي صبره
▪️▪️▪️▪️▪️
يا زينب شنو صايِر
وضعِچ يكسِر الخاطِر
حالچ سبّبه العاشِر ؟
يبنتي

اگبالچ چلمِتي الاوله
هايه انتي معقوله ؟
ظهرچ منحني طوله
يبنتي

حزنچ يبنيتي يِصعب
ايعينچ الله يزينب
كسرچ بنتي اشيجبره
گلبچ ما باقي صبره
▪️▪️▪️▪️▪️
يبنيتي اشجره ابوضعِچ
او مِن دم ينهمِل دمعِچ
اشصار او لازِمه ضلعِچ
علامِچ

بيچ الفاجِعه هيّه
مِن اللوعه محنيّه
اچفوفچ چَنها مچويّه
علامِچ

گلبچ بالجمره لاهِب
واشگد شِفتي مصايب
ابصدرچ كل شهگه حسره
گلبچ ما باقي صبره
▪️▪️▪️▪️▪️
ضلْع الزهره لو راسِي
ابياهِي گلبچ ايقاسِي ؟
احچي يا اعز ناسِي
يزينب

زيدت كِسرَتِچ جُعده
مسموم الحسن چَبده
گلبچ بس حزن عِنده
يزينب

الغالي عايِف مكانه
ضلّت ريحة حنانه
بالسَم ختموله عمره
گلبچ ما باقي صبره
▪️▪️▪️▪️▪️
ابگلبچ تكبر اجروحِچ
والطف يلچم ابروحِچ
لا ما ينگطِع نوحِچ
مصيبه

بالطف گلبچ اتچوّه
ابكل لحظه الف قَسوه
گطعوا ريحة الخوّه
مصيبه

عينچ مدمعها يُذرَف
متّي چم مرّه بالطف
بالطف كل لحظه كسره
گلبچ ما باقي صبره
▪️▪️▪️▪️▪️
بالطف عذّبِچ دهرِچ
والكافِل اخذ عمرِچ
بعده حايِره ابخدرِچ
غريبه

الكافِل گطعوا اچفوفه
وابسهمه طُفه شوفه
صِرتي بعده معروفه
غريبه

طايِح بدر العشيره
عافِچ محتاره حيره
خِسفوا عالشاطِي بدره
گلبچ ما باقي صبره
▪️▪️▪️▪️▪️
گلبچ ما مِلَك صبره
احسينِچ دامِي عالغبره
اگبالِچ ينگطِع نحره
يبويه

يتجاره بُگه دمّه
طايِح وانسِلب هِدمه
داسَت وادِم ابجِسمه
يبويه

شِفتي ذيِچ المشاعِر
تِسحگ بِيها الحوافِر
طُبگوا ظهره اعله صدره
گلبچ ما باقي صبره
▪️▪️▪️▪️▪️
چَم لوعه اْو حزِن شِفتي
مكسُورَة گلُب صِرتي
من ضِيم السبِي متّي
حزينه

موت ابلا حَفُر گبرِچ
يِكبر كِل مِسه قهرِچ
والحَد ما خُلص عمرِچ
حزينه

خلصت قِصّة حياتِچ
كسره ليحَد مماتِچ
القَسوه اتضل بيها ذكرى
گلبچ ما باقي صبره
▪️▪️▪️▪️▪️
ابو الحسن الوائلي
رجب ١٤٤٤هـ

▪️في استشهاد الامام موسى بن جعفر عليه السلام
▪️▪️▪️▪️▪️
سيّدي ابشبابك
مو سهْل عذابك
يالسجِن صعُب
يا نقي الگلُب
▪️▪️▪️▪️▪️
امام الجعفريّه الصافِي والنعمه
ابسِمه حُبّه يصير الشيعي چن نجمه
العظيم اليصفن العالِم على عِلمه
الف وسفه الرشيد الظالِم ايسِمّه

التختلف صفاته
كلها طيبه ذاته
چن ضوه ابدرُب
يا نقي الگلُب
▪️▪️▪️▪️▪️
چبير اْو هم چبيره سيّدي اجروحك
رغُم صمتك اشوفك ينسمِع نوحك
تِضل دومك عظيم اْو صابِره روحك
اشما سوّه الرشيد ابحِقده ميلوحك

ترعِب ابقيودك
الساجِن ابصمودك
ينرعُب رعُب
يا نقي الگلُب
▪️▪️▪️▪️▪️
لان جدّك علي الوادم يكرهونك
يروح اللّي يكرهك فدوه لعيونك
يمولاي اْو عله اعناد اليبغضونك
جبل انته تضل اْو ما يلوحونك

زايِل اليغدرك
يبقه عالي قدرك
تشبَه السحُب
يا نقي الگلُب
▪️▪️▪️▪️▪️
لغز شفتك صعُب ما لاگي تفسيره
اجه قلمِي يوصفك خانه تعبيره
الرشيد المو الرشيد الماله كل غيِره
يسجنك يا امامي صعبه واچبيره

انته چن سجنته
بالصبُر سحگته
غاية العجُب
يا نقي الگلُب
▪️▪️▪️▪️▪️
علِم حيدر علي حامي الحمه عندَك
واشوفك بالكرم مثْل الحسَن جدَّك
واشوف احسين صبره ابروحك ايِمدَّك
لان ذوله هلك چم حاقِد ايضِدَّك

اهلك الغياره
سيّدي شراره
عالظلُم تصُب
يا نقي الگلُب
▪️▪️▪️▪️▪️
اشوفه اعله الجسِر نعشَك بلا حِيلَه
واصِد اعله السِمه وانظرها تبچِيلَه
عرِف ماكو التجيك او نعشَك اتشِيلَه
الف وسفه الغرُب صارت حمامِيلَه

اجنازِتك عجيبه
تنحمِل غريبه
انشالت ابغرُب
يا نقي الگلُب
▪️▪️▪️▪️▪️
عظيم اهوايه يا مَن طاهِر اِحساسك
مثل وجه السِمه ضل مرتفِع راسك
تفوح امْن الگبُر يا سيّدي انفاسك
شفِت گبرك حضِن بي تجتمع ناسك

اِبحاجِته اليِكلمَك
تِگضي واهوَه يمَّك
تگضِي مِن يطُب
يا نقي الگلُب
▪️▪️▪️▪️▪️
ابو الحسن الوائلي
جمادي الاول ١٤٤٤هـ