#الليالي_الفاطميه
⁦▪️⁩⁦▪️⁩⁦▪️⁩⁦▪️⁩⁦▪️
هذا القلع باب الحصن چفّه
يحمل نعشها ماگدر وسفه
⁦▪️⁩⁦▪️⁩⁦▪️⁩⁦▪️⁩⁦▪️
معقوله هذا بو الحسن حيدر
يحمل نعشها الزهره ما يگدر
مو هوّه چفّه اللّي قلع خيبر

مهدوم كل حيله ابو الكلفه
⁦▪️⁩⁦▪️⁩⁦▪️⁩⁦▪️⁩⁦▪️
مكسور گلبه او روحه منصدعه
چفّه النعش ما يگدر ايرفعه
او هوّه الچفوفه شالت القلعه

واجروح كلبه صعبه لو تخفه
⁦▪️⁩⁦▪️⁩⁦▪️⁩⁦▪️⁩⁦▪️
مِن البواچي احمرّت اعيونه
هوّه الحِمل خيبر عله امتونه
بجنازة الزهره يعينونه

اجروح ابوسَط گلبه ولا تشفه
⁦▪️⁩⁦▪️⁩⁦▪️⁩⁦▪️⁩⁦▪️
هذا علي الفوگ الصعب اصعب
او حتّه الخطر مِن چفّه يتهرّب
يا وسفه راسه والگلُب شيّب

او چنّه بُقه يرجِف مثِل سعفه
▪️⁩‌▪️⁩‌▪️⁩‌▪️⁩‌▪️
كل حيله منّه حيدر اتهدّم
بس حگّه حيدر هيچي يتألّم
افراگ الحبايِب ولله ما يرحم

افراگ الغوالي المدمع ايوصفه
▪️⁩‌▪️⁩‌▪️⁩‌▪️⁩‌▪️
لمّن دفنها الفاطمه حيدر
رد محني ظهره والگلُب مِجمَر
خطوه مشاهه او خطوه يتعثّر

كل باله يمها او حالِته كلفه
▪️⁩‌▪️⁩‌▪️⁩‌▪️⁩‌▪️
ابو الحسن الوائلي
ربيع الاوّل ١٤٤٤هـ
▪️⁩‌▪️⁩‌▪️⁩‌▪️⁩‌▪️

#الليالي_الفاطميه
▪️⁩‌▪️⁩‌▪️⁩‌▪️⁩‌▪️
ام البنين .. اتحاچي العقيله
او مرّت سنين .. ابموت الجليله
يسأل حزنها .. الحرّه الوفيّه
رادتها تحچي .. عن الزچيّه
▪️⁩‌▪️⁩‌▪️⁩‌▪️⁩‌▪️
ابكل حرگه الكلام ايدور بين الحرّه والحرّه
هاي ام البنين اتريد زينب تحچي عالزهره
بدأت زينب الحوراء تحچي او بالگلُب جمره
دارت عينها اعله الباب واتذكرتها للكسره

ذكرت مُصاب .. امها الحبيبه
تاذيها حيل .. هاي المصيبه
ذكرت مواجع .. ذيچ المسيّه
رادتها تحچي .. عن الزچيّه
▪️⁩‌▪️⁩‌▪️⁩‌▪️⁩‌▪️
لجل الكرسي وين الچان اخرس رد واجه ناقِم
اثلثمية نذل عالباب حضروا والامُر حاسم
وين الماله غيره او دين عالزهره اجه هاجِم
گالوله الزچيّه اهنا جاوبهُم و"إن" فاطِم

رغْم اللّي صار .. او ضلْع التكسّر
كلمة "وإن" .. أذّتها اكثر
فوگ الرزايا .. چانت رزيّه
رادتها تحچي .. عن الزچيّه
▪️⁩‌▪️⁩‌▪️⁩‌▪️⁩‌▪️
ما غزّر ملح بالگوم ذيچ العشره خانوها
باب القدّسه جبريل وادِم صلفه حرگوها
ما خافوا الٰه الكون رفسوها او يدفعوها
باب او كلها مِن اجذوع بيها الزهره عصروها

باب الرسول .. بيده دفعها
والدفعه ذيچ .. كسرت ضلعها
ابقوّة دفِعته .. طاحت رميّه
رادتها تحچي .. عن الزچيّه
▪️⁩‌▪️⁩‌▪️⁩‌▪️⁩‌▪️
من عصروها للزهراء طاحت والحزن بيها
يرفسها او ضربها ابسوط باحقاده رجع ليها
صاحت فضّه لحگي ابساع والعصره تأذّيها
ما صاحت علي الكرّار تدري الدنيه يمحيها

فاطِم تصيح .. فضّه اسنديني
لچمنّي حيل .. ضلعي او جنيني
صاحت يفضّه .. لحگي عليّه
رادتها تحچي .. عن الزچيّه
▪️⁩‌▪️⁩‌▪️⁩‌▪️⁩‌▪️
هاي الصحبه كلها اذياب يُمّه او فاطمه ترفه
ورده فاطمه او يا حيف يگطعها الخشِن چفّه
انكتلت بالضحى ابلا خوف واعيون الحقد صلفه
وسفه او تالي نص الليل نور الله انحمل وسفه

نور الله ذاك .. يا وسفه غايِب
بالظلمه صار .. تحت الترايِب
ام السلامه .. تحت الوطيّه
رادتها تحچي .. عن الزچيّه
▪️⁩‌▪️⁩‌▪️⁩‌▪️⁩‌▪️
كل ليله تمرني اجروح واني ابجمري اتچوّه
فرگة امّي تصعب حيل واني احملها بالگوّه
يحرمني الف يا حيف منها الما إلَه امروّه
دون امّي العمر ولله من راحت ولا يسوه

راحت واشوف .. عمري ابفگدها
ما يسوه شي .. هوّه بعدها
اخذت فرحتي .. ويّاهه هيّه
رادتها تحچي .. عن الزچيّه
▪️⁩‌▪️⁩‌▪️⁩‌▪️⁩‌▪️
ابو الحسن الوائلي
ربيع الآخِر ١٤٤٤هـ

ولادة السيدة زينب ع
▪️▪️▪️▪️▪️
قد اشرقت زينب
نزلت ضوه زينب
▪️▪️▪️▪️▪️
حوريّه نزلت بالارض لا مو بشر چنها
ايحير ابوصفها اي بشر راد ايتمعّنها
ما تنوصف بنت الوصي اشما ينحچي عنها
عفّه او خدر واموقّره او هيّه ابزغُر سنها

واتشرّف الكوكب
نزلت ضوه زينب
▪️▪️▪️▪️▪️
درّه سماويّه الارض من عدها تتنوّر
نص فاطمه صارت بعد نص ثاني من حيدر
بت اشرف الناس اعله هاي الگاع تتقدّر
اشما تنوصف هالطاهره بيها الوصف يزغر

بالغيره تتحجّب
نزلت ضوه زينب
▪️▪️▪️▪️▪️
نزلت وقوره او طاهره والغيره تمليها
عالِمَه هم مُعلّمه او علّمها باريها
عظيمه واوصاف الكمال امجمّعه بيها
قرآن والشيطان ابد ما يگرب اعليها

رافع قدرها الرّب
نزلت ضوه زينب
▪️▪️▪️▪️▪️
طاهره صارت بالارض كل الوفه ايحدها
اهل السمه قبْل الارض فرحت ابمولدها
موقفها في طف كربله هوّه اللّي خلّدها
حفظت وقار العايِله بالغيره وحّدها

ابدرب السبي الاصعب
نزلت ضوه زينب
▪️▪️▪️▪️▪️
اُمنيْه عندي بالگلُب تكسِر الي خاطِر
اوصل گبر زينب انه او للمرقد الطاهِر
ادعي الله كل ليله انه تتحقّق امناطِر
اني ادري تتحقّق الي امنيتي بالآخِر

سهله ولا تصعب
نزلت ضوه زينب
▪️▪️▪️▪️▪️
ابو الحسن الوائلي
جمادي الاول ١٤٤٤هـ

استشهاد مولاتنا فاطمة الزهراء "عليها السلام"
الروايه الثانية👇

#الليالي_الفاطميه
▪️▪️▪️▪️▪️
يا شيعه.. اني الزهره امكم
يا شيعه.. چم احچايه الكم
اشبدر منّي بالدهر
والضلع منّي انكسر
▪️▪️▪️▪️▪️
فاطمه الزهره انه الماكو مثلها
منزلة نفسي ولا واحد وصلها
اني هاي الدنيه صارت مِن اجلها
الدنيه والبيها انخلق يرجع لاصلها

ام الكون.. والزهره العظيمه
ام الكون.. شافت چم هظيمه
ظلمه ليلي ابلا گمر
والضلع منّي انكسر
▪️▪️▪️▪️▪️
الظالمين اتعمّدوا كسري او عذابي
واني ستر الدنيه مستور ابحجابي
رغم كل المرني واجروحي او مصابي
ارد اگول ابيا سبب محروگه بابي

اني الصار.. اشسوّيت او حملته
اني الصار.. بالگوّه جرعته
شاهدِت كل الخطر
والضلع منّي انكسر
▪️▪️▪️▪️▪️
مِن دفع بابي اللعين ابن الرديّه
أحس چن الدنيْه دافعها عليّه
طحت فوگ الگاع وادموعي جريّه
او شفته طايح عالارض محسن رميّه

اني اوياه.. طيحتنه چبيره
اني اوياه.. مكسور او كسيره
ابني مات او ما كُبر
والضلع منّي انكسر
▪️▪️▪️▪️▪️
بت محمد اني هوّه الگال عنّي
فاطمه روحي تراهه او بضعه منّي
گال وقروها ابغيابي ابهايه اعني
شنهو ذنبي الصار والظالم عصرني

خلف الباب.. عيني اتشاهِد الهم
خلف الباب.. كل حيلي تهدّم
انهظُم شاء القدر
والضلع منّي انكسر
▪️▪️▪️▪️▪️
منزله عند الله ما أعظمها عندي
او سادة الجنّه الحسن واحسين ولدي
الحزن ذاك المرني شفته اني وحدي
ازرگ اني امْن الضرب يا وسفه جلدي

طاح الحيل.. واسياط اعله متني
طاح الحيل.. واني ابروحي حزني
حزن واجروح او قهر
والضلع منّي انكسر
▪️▪️▪️▪️▪️
الحزن كلّه الصار واجروح الچبيره
چي ابويه اختار ابو الحمله وزيره
چلمه احچيها او تبث ابروحي غِيره
حيدر ايضل الامير او ماكو غيره

والكرّار.. بس هوّه الخليفه
والكرّار.. اي والباقي جيفه
بالكلام المُختصر
والضلع منّي انكسر
▪️▪️▪️▪️▪️
الدافع ابنفسه عله هاي الظلامه
اويايه بالجنّه يجي او مرفوع هامه
والنكرني او ضدّي وجّه كل كلامه
خل يفيده افلان باچر بالقيامه

وين ايروح.. كلمن حقّي ناكر
وين ايروح.. مِن الباري باچر
بالحشُر ماكو مفر
والضلع منّي انكسر
▪️▪️▪️▪️▪️
ابو الحسن الوائلي
ربيع الثاني ١٤٤٤هـ

#الليالي_الفاطميه
▪️▪️▪️▪️▪️
امٌ تخاطب ولدها الغائِب البعيد وتشكو لهُ المها
▪️▪️▪️▪️▪️
آنه يالمهدي امّك الزهره
الكاسِر اضلوعي يمته يوليدي
اتصُلبه عالشجره
مِنتظره منّك تاخِذ ابثاري
ابثارك يَيُمّه تنطفِي ناري
▪️▪️▪️▪️▪️
آنه امّك الزهره صحت واحچيلك ابحسرتي
منتظره ثارك كل وكِت وابداخِلي لهفتي
ناري ابوسط گلبي او ردِت تطفِي الي جمُرتي
بس انته باچر من تجي تجبُر الي كسرتي

انتظر ثارك واحسِب ايّامه
ما يضل حزني ابجيتك او گلبي
اتخفِف آلامه
الطلعه البهيّه اتنشِّف ادموعي
تجبُرلي جيتك كسرة اضلوعي
▪️▪️▪️▪️▪️
يالمنتظر ذاك النذِل من جاني وانته تدري
اعليّه دفع بابي ابحقِد زيّد عليّه كسري
بالباب انه او حيلي لذِت ودّعته كلّه صبري
ابحقده كسر جنبي واحِس ليهسّه محني ظهري

الزيّد احزاني او ما رحم حالي
يضحك اعليّه واني گدّامه
دمعتِي اتلالي
ويّه انكسار اضلوعي كسرتني
كلمة "وإن" يوليدي اذّتني
▪️▪️▪️▪️▪️
عالدنيه نورك من يهل تهده جروحي يبني
ترجع عله ابناء الحقد واتحاسب البغضني
تكسر رجل ذاك الدفع بابي واجه عصرني
او تگطع چفوف الما رحم بيّه واجه صفعني

الثاني چفّينه عالوجِه مدهِن
وانسطر خدّي واثر چفّينه
ابوجهي طابعهِن
تتجاره ضلّت دمعة اعيوني
او سوط العبِد طابع عله امتوني
▪️▪️▪️▪️▪️
الساعة ظهورك ارتقب والجيتك الرشيده
والثارك احسب وانتظر يمته تجي او تعيده
ترعد عله ابناء الكفر يبني مثل رعيده
اي والكسر ضلعي ابحقد يبني تگصها ايده

الهاجِم اعليّه هوّه واعوانه
وال"وإن" ناده صاحب الكلمه
تگطع السانه
اتماده عليّه او هم عُبر حدّي
ايضل هوّه حصتك يبني يالمهدي
▪️▪️▪️▪️▪️
نار اللذي بيها احترگ بابي او لهب جمرها
ابروحي لهبها ما طفه يبني او بقه اثرها
منّك اريد اطلب طلب من روحك او صبرها
تمحي السقيفه من تجي او تگطع نحر غدرها

الما رعوا بينه انته تعرفهم
الخالفوا حيدر او سلبوا احگوگه
انته أدّبهم
انقلبوا علينه الچانوا اصحابه
صاروا عصابه او صاروا اذيابه
▪️▪️▪️▪️▪️
ما ضل صبُر عن غيبتك والغيبه هايه صعبه
منتظره جيتك يا وكت والدنيه كلها غربه
عندي بعد منّك طلب يبني او ردت اطلبه
روس الحقد لمّن تجي تگطعها رگبه رگبه

من تجي تحكُم تاخِذ ابحيفك
والظلُم كلّه باچر ابجيتك
ينتهي ابسيفك
تنهي الظلُم يوليدي مِن اصله
او دولة علي ابجيتك ترِد تعله
▪️▪️▪️▪️▪️
عندي طلب واعرف صعب تكسِر اليّه خاطِر
ادري يرِد ثاري الي ابجيتك يَيُمّه باچِر
يم گبري اني ابيا وكت يبني انظُر المنايِر
او مِن ينبني مرقد الي الشيعي يجيني زايِر

اعرف ابجيتك تنبني الحضره
واقره بالقطعه من هُنا مرقد
فاطمه الزهره
يمته تجي الشيعه يزوروني
اولادي هُمّه او هم يعزّوني
▪️▪️▪️▪️▪️
ابو الحسن الوائلي
جمادي الاوّل ١٤٤٤هـ

#الليالي_الفاطميه
▪️▪️▪️▪️▪️
باب او مسمار او حايط هم
مِن عدهِن فاطِم تتألّم
ابذيچ الدفعه او ذيچ العصره
لا ما رحموا بيها الزهره
▪️▪️▪️▪️▪️
فاطِمه الزهراء والِدة طه
يم علي مِن راح ابحِفظه خلّاهه
يعرِف المُختار اليجري ويّاهه
او يدري كلّش زين باللّي أذّاهه
اليغضَب الجبّار او يرضه لرضاهه
ذاكه جاب الضيم هوّه راواهه

اثلثمية واحِد يَم فاطِم
واحِد حاقِد واحِد هاجِم
منهُم شافَت لوعه او حسره
ابذيچ الدفعه او ذيچ العصره
▪️▪️▪️▪️▪️
اتعنّوا اعله الدار خِسّة الوادِم
النيّه حرگه چان والامُر لازِم
اجتمعوا ابلا خوف والالم قادِم
رفضوا الكرّار ابموت ابو القاسِم
فاطِمه بالدار لا تجي هاجِم
جاوب ابلا خوف اي "وإن" فاطِم

يندب والكلمه ايسمعوها
حرگوا الباب او لترحموها
گال الكلمه او نفذوا امره
ابذيچ الدفعه او ذيچ العصره
▪️▪️▪️▪️▪️
صعدت النيران للسمه السبعه
او صارت الاملاك ابحالة الفزعه
اتسائِلت بالخوف او هيّه منصدعه
وسفه اشرف باب شافت الدفعه
فاطِمه الزهراء خلفه متلوعه
انكسرت الها اضلوع او بالوجه صفعه

اضلوع الخير اضلوع الكوثر
تكسرها اشلون اچفوف الشر
اعليها انمدّت چف الغدره
ابذيچ الدفعه او ذيچ العصره
▪️▪️▪️▪️▪️
بردت الاحداث او موجِعه الفِعله
والمُصيبه اهواي صعبه مو سهله
باب يخجل چان اليوگف ابظِلّه
وسفه ياهو الچان .. تالي يوصلّه
وسفه چف افلان يگدر ايشعله
وسفه عالزهراء يندفِع ثگله

باب الما ردّ الينخونه
وسفه الظلّام ايحرگونه
فِعل الفاعِل بي چم كسره
ابذيچ الدفعه او ذيچ العصره
▪️▪️▪️▪️▪️
انصابت الزهراء فاطِمه ابكسره
الحايِط المِسمار انصابن ابحسره
اتكلّم المِسمار او خنگِته العبره
اتنبّتِت يا حيف اني بالزهره
الحايِط ابهَم گال مِن رحل صبره
اعليّه سِر الكون دفعوا الزهره

واحدهُم ينحب واينادي
بينه اتأذّت روح الهادي
انكسرت بينه اعظم دُرّه
ابذيچ الدفعه او ذيچ العصره
▪️▪️▪️▪️▪️
بضعة المُختار ما يراعوها
للابو الاصحاب ابكسره رجعوها
بالهجوم الصار اهوايه أذّوها
فاجِعه واجروح او لوعه راووها
هجموا ابلا خوف الصحبه خانوها
والامانه ذيچ ما يوقروها

وادِم ما تملِك كِل رحمه
ما راعوا فاطِم بالهجمه
او گلْب الزهره اتمسّك صبره
ابذيچ الدفعه او ذيچ العصره
▪️▪️▪️▪️▪️
هالامُر معروف الوادِم اتفهمه
فشله عالرِجّال لو ضُرب حُرمه
ما يجي بجروح حتّه لو كلمه
اعليها يرفع صوت فشله عالزِلمه
بت رسول الله اتحملت الهجمه
مِن هذاك العار شافت اللچمه

يهجم عالزهره ابكِل حقده
اعليها الظالم چفّه ايمدّه
اشگد أذّاهه فعل الزمره
ابذيچ الدفعه او ذيچ العصره
▪️▪️▪️▪️▪️
ابو الحسن الوائلي
رييع الثاني ١٤٤٤هـ

يلچم كسرها الطاهره شم الهوه
مكسوره وابعيناهه لا ماضل ضوه
راحتها والحيل انتهن ماتن سوه
بس الاجل ينفعها وايصير الدوه
▪️▪️▪️▪️▪️
ابو الحسن الوائلي

#الليالي_الفاطميه
▪️▪️▪️▪️▪️
يا علي الله يكون ابعونك
تنظر او تصبر على الياذونك
▪️▪️▪️▪️▪️
ايساعِدك الله يبن عم الرسول
اليا وكت يا بالحسن صبرك يطول
او تنظر اگبالك اجوا يم البتول
او تبقه ساكت يا علي ايشوفونك
▪️▪️▪️▪️▪️
يا قوي انته لغز كلّش صعُب
الخوف لو شافك يموت امْن الرعُب
فاطمه الزهره ابحضورك تنضرُب
شافت المنظر اشلون اعيونك
▪️▪️▪️▪️▪️
يا علي ابگلبك بقه يلهب جمُر
يمَن علّمت الصبُر معنى الصبُر
حاضر انته او ضلع فاطم ينكسُر
ابهاي حگهُم يا علي ايلومونك
▪️▪️▪️▪️▪️
خندق او خيبر يهالداحِيْ الباب
كلها تشهدلك عله گص الرِگاب
وابرغمها اندفع يا حيدر الباب
وانته متوصّي علي ايعرفونك
▪️▪️▪️▪️▪️
بيها امرين الوصيّه تمتثِل
فاطِمه او ما بين دين الله العدِل
ايموت واحد حتّه ثاني ايضَل عدِل
او بينهن يا حيدر ايخيرونك
▪️▪️▪️▪️▪️
امْن المئه او عشرين الف يوم الغدير
اختارك المختار من بعده وزير
كلها شهدت يا علي انته الامير
وابرغمها يا علي ايرفضونك
▪️▪️▪️▪️▪️
ناس متريد العدِل لا يا علي
ناس ما تستحي والرب العلِي
لا فهِم لا علِم واختاروا ولي
وانته يا حيدر علي ايعوفونك
▪️▪️▪️▪️▪️
ابو الحسن الوائلي
ربيع الآخر ١٤٤٤هـ

استشهاد مولاتنا فاطمة الزهراء "عليها السلام
الروايه الثالثة👇

#الليالي_الفاطميه
▪️▪️▪️▪️▪️
يَيُمّه مو سهِل فگدچ
ولا يسوه العمُر بعدِچ يَيُمّه يَيُمّه
ابوسط روحي لهب جمره
وداعچ مو سهِل امره يَيُمّه يَيُمّه
▪️▪️▪️▪️▪️
انه زينب او وضعي يصعب اهواي
بعد عينچ يَيُمه ظلمه دنياي
يضل ما ينگطع كل ليله مبچاي
مشت كل راحِتي او بس القهر جاي

اشوف الدنيْه مگضيّه
ابمصابچ روحي محنيّه يَيُمّه يَيُمّه
اريدچ يِمّه يالزهره
وداعچ مو سهِل امره يَيُمّه يَيُمّه
▪️▪️▪️▪️▪️
احِس حيلي ابوداعچ عالثره طاح
اشوفه ابروحتچ كل الفرح راح
يضل بيّه الحزن ما ضنّه ينزاح
واضل ابغيبتچ مكسورة اجناح

الضوه بعدچ فلا يضوي
يضي عيني الفگِد يچوي يَيُمّه يَيُمّه
كسيره او كسري شيجُبره
وداعچ مو سهِل امره يَيُمّه يَيُمّه
▪️▪️▪️▪️▪️
زغيره او عيني شافت كل المْصاب
فريسه صرتي انتي ابّين الذْياب
وره بابچ وگفتي انتي بلا احجاب
عله طولچ شفتها اندفعت الباب

شفِت بابچ يحرگوها
ثجيله او هيّه دفعوها يَيُمّه يَيُمّه
السمه ناحت عله العصره
وداعچ مو سهِل امره يَيُمّه يَيُمّه
▪️▪️▪️▪️▪️
فراشه انتي ابمخالبهُم يحيطوچ
انعصر گلبي احسّه من يعصروچ
احِس خدّي انسطر من انتي سطروچ
انه طاحت دمعتي وانتي طيحوچ

انحنيتي وانتشر حزنچ
او شفِت واحِد رفس بطنچ يَيُمّه يَيُمّه
اشوفچ طحتي عالغبره
وداعچ مو سهِل امره يَيُمّه يَيُمّه
▪️▪️▪️▪️▪️
انه او فضّه اجينه او گلبي مالوم
شفت محسن سِگط من عصرة الگوم
علي ما سَل فِقاره او باقي مهموم
الوصيّه منعته او ما خلِّته ايگوم

ابو الحمله اخذ حيفه
فزع لاچن بِلا سيفه يَيُمّه يَيُمّه
الوصيّه گادِته الصبره
وداعچ مو سهِل امره يَيُمّه يَيُمّه
▪️▪️▪️▪️▪️
عله موتچ شفتها مرّت اعوام
وانه كل ليله صاحي جرحي ما نام
ترِد باچر عليّه نفْس الالام
الحِرگ بابِچ يرِد ابنه اعله الخْيام

اشوف احزاني تتجدّد
او جمُر گلبي فلا يبرد يَيُمّه يَيُمّه
تعاوِد باچِر الكسره
وداعِچ مو سهِل امره يَيُمّه يَيُمّه
▪️▪️▪️▪️▪️
اشوف الطف يجيني او دمعي بالعين
واشوف اهلي ابچتِل عالغبره ماضين
اذا فوگ الترايِب ذبحوا اِحسين
اضل ابلا ولي وانطي الوجه وين

الخيول اهوايه مو وحده
ابسحگها ينشلِه جلده يَيُمّه يَيُمّه
او شسولف عالسبي او قهره
وداعچ مو سهِل امره يَيُمّه يَيُمّه
▪️▪️▪️▪️▪️
ابو الحسن الوائلي
ربيع الاوّل ١٤٤٤هـ

#الليالي_الفاطميه
▪️▪️▪️▪️▪️
متّي او ماتت ابموتچ ضحكتي
محتاجِچ يَيُمّه واندفنتي
▪️▪️▪️▪️▪️
اني اِحسين ابنچ يجري دمعي
بعدچ مختلِف يحبيبه وضعي
يُمّه اليوم اسولفلچ واسمعي
عله ضلْع التكسّر محني ضلعي

ولله ابكسرِتچ زادت كسِرتي
محتاجِچ يَيُمّه واندفنتي
▪️▪️▪️▪️▪️
انهد كل حيلي لمّن غبتي عنّي
حزنچ يُمّه زيّد بيّه حزني
موتچ يا هوه اهوايه جرحني
اغيابِچ يا ضوه اعيوني لچمني

حالي ابموتچ اتشرحه دمِعتي
محتاجِچ يَيُمّه واندفنتي
▪️▪️▪️▪️▪️
چنت اتمنّه لو نبقه سويّه
اشبع منّچ اني ابكل مسيّه
وامنيتي صُفت يحبيبه هيّه
تاخِذ روحي من عندي المنيّه

عمري اشيسوه يُمّه ابدونچ انتي
محتاجِچ يَيُمّه واندفنتي
▪️▪️▪️▪️▪️
بفراشِچ اشگد ابچي ابمكانِچ
هاي الدنيْه خوف ابلا امانِچ
يالماكو شخص يوصل كيانِچ
شلتي او شايِل ابموتچ حنانِچ

شالت راحِتي من انتي شلتي
محتاجِچ يَيُمّه واندفنتي
▪️▪️▪️▪️▪️
روحي ابغيبتچ يكبر المها
مشتاگ ارد ابوس ايدچ واشمها
يا مَن غيبتِچ مدري اشعظمها
موتچ سهم وابروحي سهمها

اتبيّن فرگِتچ حتّه ابصفُنتي
محتاجِچ يَيُمّه واندفنتي
▪️▪️▪️▪️▪️
گلبي ابغيبِتچ متحيِّر امره
لا گاه اليتِم يُمّه اعله زُغره
وحشه الدنيْه مِن دونچ يزهره
رحتي او صارت ابنص گلبي كسره

يعافيتي او نِده روحي او يصحتي
محتاجِچ يَيُمّه واندفنتي
▪️▪️▪️▪️▪️
بعدِچ ما يضل ابروحي صبري
غطّاچ التراب او غطّه عمري
جمُر فگدِچ اشوفه ابروحي يسري
حد موتي يضل ابروحي جمري

هايه غيبتچ صابت مُهجتي
محتاجِچ يَيُمّه واندفنتي
▪️▪️▪️▪️▪️
ابو الحسن الوائلي
ربيع الاول ١٤٤٤هـ

#الليالي_الفاطميه
▪️▪️▪️▪️▪️
يا ضي عيني رحتي او رايِح كلشي اوياچ
دوّرتِچ مفگوده ابروحي وين الگاچ
محتاجِچ بَس عفتيني
فگدِچ حيل ايأذّيني
▪️▪️▪️▪️▪️
انه يا فاطِمه حامي الحِمه حيدر
عله فگدچ احير اشلون اتصبّر
ابرحيلچ منّي ضل يجري الدمِع احمر
بدونچ ولله حيره اشلون اتصبّر

فگدِچ حناني ما احمله اني
ابجمره چواني يا فاطِمه

يا فاطِم فگدچ ما يسهل يصعب حيل
اظلم مصباحي ابلا عينچ صايِر ليل
جمرة موتچ تچويني
فگدِچ حيل ايأذّيني
▪️▪️▪️▪️▪️
انه ذاك الشلِت خيبر عله امتوني
شلتها ابلا تعب كلهُم يشهدوني
لچنّي مِن شلِت نعشِچ يشوفوني
انهِدم حيلي او گلِت يا ناس اعينوني

فگدِچ يويلي يلچم دليلي
ما خلّه حيلي يا فاطِمه

فگدِچ ما يرحمني او خلّه ابروحي النار
شلت التابوت اعله اچتافي او بيّه اشصار
يا ريتچ لو شفتيني
فگدِچ حيل ايأذّيني
▪️▪️▪️▪️▪️
مشيتي والفرح يالزهره ودّعته
العمُر دونچ ولا يسوه العمُر شفته
دفنتچ واني چم مرّه متِت سكته
ارجعت بس گلبي يمّچ باللحِد عفته

گلبي اشيصبره او لحدچ يزهره
ابچي واحفره يا فاطِمه

مِن وسّدتِچ انظُر گلبي ابلحدِچ طاح
او كل حيلي ابموتچ يا فاطِم خلّه او راح
ميّت مِن ودّعتيني
فگدِچ حيل ايأذّيني
▪️▪️▪️▪️▪️
رجعت او بانت اجروحي عله اخيالي
دخلْت الداري والهم حاضِر اگبالي
اصِد اعله الزوايا ابمدمعِي الهالي
مكانِچ يالحبيبه ابكل شبِر خالي

يالزهره اخبرچ بي باقي عطرچ
ابشمّه اذكرِچ يا فاطِمه

صار البيت ابموتچ ظلمه او مابي روح
رحتي او ضل عطرچ يا فاطِم منّه ايفوح
ابذكرچ انتي اتكسريني
فگدِچ حيل ايأذّيني
▪️▪️▪️▪️▪️
احِن واتذكّرِچ لمّن امِس بابچ
يضل ذكرى ابحياتي فاطِمه امصابچ
انه اقسِم يالزچيّه ابكل جرِح صابچ
وحگ عشرتنه ما اگدر عله اغيابچ

الودّع حبيبه جرحه اشيطيبه
فگده يشيبه يا فاطِمه

يالزهره افراگِچ خلّالي اجروح اهواي
يا كوثر عطشان انظرلچ مو للماي
شوفة وجهِچ ترويني
فگدِچ حيل ايأذّيني
▪️▪️▪️▪️▪️
الضوه بعدچ يفاطِم ما دخل بيتي
الهوه لمّن اشمّه ايْشَگِگ ابريتي
بعد عينچ يزهره وحده امنيتي
اموت اني واجي لو انتي ما جيتي

مشتاگ اشوفچ واشتم چفوفچ
صعبه اعوفچ يا فاطِمه

شيصبّرني او موتچ خلّه ابگلبي اجراح
مِن بعدچ بس موتي الاگدر بي ارتاح
اتنطّر تغمض عيني
فگدِچ حيل ايأذّيني
▪️▪️▪️▪️▪️
مشيتي او حيلي بعدچ فاطِمه اتهدّم
او عله افراگِچ انه ابكل ليله اتألّم
يزهره امْن القهر روحي ولا تسلم
لحد موتي اعله موتچ ناصُب المأتم

فتره ابحياتي او يصبح مماتي
ابلحظة صلاتي يا فاطِمه

احسِب يا فاطِم كُل ليله الهذا اليوم
واني انطر سيف اليطبرني او بيّه اهموم
ابطبرة راسي اتشوفيني
فگدِچ حيل ايأذّيني
▪️▪️▪️▪️▪️
ابو الحسن الوائلي
ربيع الاول ١٤٤٤هـ

#الليالي_الفاطميه
▪️▪️▪️▪️▪️
بعد ان سمِع خِطاب والدته لابُد ان يجيبها
‌▪️⁩‌▪️⁩‌▪️⁩‌▪️⁩‌▪️
اني المهدي ابنچ
لا ما ناسي حزنچ
تضلّين اعله بالي ابكل مسيّه
يرِد ثارچ يَيُمّه ابّين اديّه
‌▪️⁩‌▪️⁩‌▪️⁩‌▪️⁩‌▪️
انه المهدي وسَط روحي اشكبُر صبري
عليچ ابدي ابسلامي او مدمعي يجري
الليالي اتمُر عليّه او ينحنِي ظهري
أحِس مِن حولي كُلشِي ايعظُّم ابـ أجري

احسب ليله ليله
وآلامي ثجيله
مُصابچ زيّد اجروحي عليّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
انه امْن اذكُر جروح اهدعِش للهِجره
انوح او گلبي گوّه يمتلِك صبره
اضل انحب عليچ او بالگلُب حسره
يهِد حيلي مُصابچ من يجي ذكره

لجله ابگلبي ناري
يرجع ويّه ثاري
ابظهُوري للمله اي يالزچيّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
مُصابچ يالوديعه چم گلُب كاسِر
اليذكره يبقه مِن عينه الدمِع ماطِر
انه گلبي اعله حزنچ ما يضل صابِر
انه بس الله يدري ابحالِتي اشصايِر

ابكل ليله تجيلي
آلام ابدليلي
ابحسرتي ادعي يمته ابكِل مِسيّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
ابوسَط روحي ابد ما تنطفي ناري
وانه حالي عليچ اتشرحه اعباري
عله الهجمه يضل منّي الدمِع جاري
هذيچ الدار اكيده ابلايه شَك داري

من نار اللّي تسعر
يُمّه گلبي وجّر
احترگ گلبي او بقت آلامي بيّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
ابليالِيّچ طُفن كلهن ضوه اشموعي
اعله حزنچ منّي حمره تنزِل ادموعي
يضي عيني مُصابچ هوّه موضوعي
الكِسر ضلعچ ابچفّه كاسِر اضلوعي

اعليچ الرافع ايده
الطگ ظهرچ اكيده
اگصها رجله واچفوفه سويّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
عله الدنيه ابظهوري نوري مِن يطلع
ابچفوفي منهُم آخِذ ثارِچ امربّع
اجي او ترجع احگُوگِچ يُمّه مِن ارجع
ارِد واعداي منّي ابجَيتي تتلوّع

لمّن ارجع الها
اعداي امحيها كلها
اعيّشها ابندامه كلها هيّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
إذا ارجع واجرّد صارِمي الابشَط
اسوّي مِن دماهُم بيدي باچر شَط
انه الآمِر الناهي ابكيفي اتشرّط
او عله گبرچ يضي عيني الگُبب تنحط

آياتي او وعيدي
مرقد أبني بيدي
واسوّي الحضره يا يُمّه زهيّه
يرِد ثارچ يَيُمّه ابّين اديّه
▪️⁩‌▪️⁩‌▪️⁩‌▪️⁩‌▪️
ابو الحسن الوائلي
ربيع الثاني ١٤٤٤هـ

▪️▪️▪️▪️▪️
الله ايْسَاعِدَك يابُو الحَمِيّه
ابْيا رُوح ادفَنِت جِسْم الزچِيّه
بَلا الزَهره حَيَاتَك ظَلْمَه هِيّه
دِفَنْت الضِحكَه وَيّاهَه سوِيّه
مِشَت عَنَّك او راحَت للمنِيّه
او بُگت مِن عِينَك ادمُوعَك جرِيّه
اشْكثُر گلبَك يِكابِد مِن اذِيّه
الصَبُر گادَك يَمَن روحَك تَقِيّه
علي ابْحِيرَه بُگيت ابهَالرزِيّه
رِضَخْت او گيَّدَك چَف الوصِيّه
▪️▪️▪️▪️▪️
ابو الحسن الوائلي
جمادي الاوّل ١٤٤٤هـ

#الليالي_الفاطميه
▪️▪️▪️▪️▪️
"نصّاري"
▪️▪️▪️▪️▪️
بَابْ ايْكُون قِيمَتهَا ابسِترها
وگفَت فاطِمْه خَلفَه ابصَبُرها
▪️▪️▪️▪️▪️
بَاب او چَان جبريل اليِجلهَا
بَابٍ اوْ چانَت اتحامِي أَهْلهَا
يَويلِي اعَلَه ام حسَن دَفَعَوا ثِگلها
اوْ بَيْن الْبَاب وَالْحَايِط عِصَرهَا
▪️▪️▪️▪️▪️
اذيْاب اتعنّت او زِيدَت الْمَهَا
او تَرَفْه فاطِمَه يَصْعَب هَضُمها
بگه يُعْصُر الزَّهْرَه اوْ مَا رَحَمهَا
اِرْتَاح اهِواي لَمّن طَگ ظَهْرهَا
▪️▪️▪️▪️▪️
طاحَت وَانْتِشَر هَمْهَا او حِزْنهَا
او طاحَت قوّة السَّوْط ابمَتِنها
واجتهّا ابِلا رَحَم رَفْسَه ابّطِنها
او سِگط مِحسِنها واجروُحَه اشكُبرها
▪️▪️▪️▪️▪️
وَلَا هَمْهَا ابِنْهَا اوْ لَا وِجَعهَا
وَلَا هَمْهَا ابَد كَسَرَة ضِلعهَا
وَلَا هَمْهَا يِسِيل احْمَر دَمِعهَا
چَان ام الحسَن هَمْهَا سْتِرهَا
▪️▪️▪️▪️▪️
ابو الحسن الوائلي
جمادي الاول ١٤٤٤هـ

وفاة مولاتنا السيّدة ام البنين عليها السلام 👇

#ام_البنين
‌▪️⁩‌▪️⁩‌▪️⁩‌▪️⁩‌▪️
حرمه حتّه الغيره حارت بيها
امعدّله او كل الوفه ماليها
ابغيره هيّه امحزّمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
شحچي عنها الكامِله و امكمّله
البالوفه فوگاهه ما واحِد عله
أقل شي ينگال عنها امعدّله
اربع انهار انطت الطف كربله

امْن الحُسين او فاطمه خجلانه
مثْل ابنها ماتت او عطشانه
او ما شِكت مِن الضمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ما مثلها أي مره او هذا مُحال
حرمه بيها انجمعت اوصاف الكمال
تضحيتها ما تمُر اعله الخيال
للحُسين انطت فده اربع جبال

واليحب لازِم يضحّي ابغالي
او ضحّت العدها فده للوالي
اربعه للموزمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
لبوه ما منها او مثلها اتلاگِي وين
باعت الدنيْه او شِرت حُب الحُسين
هيّه ما بخلت نطت لجله البنين
او هم تضحّيهُم لوَن عدها اربعين

العندي كِلّه للحُسين انطيته
امقصره گالت واني ما جازيته
اشگد عظيمه فاطِمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
بيها مِن احچي كلامي اشگد قليل
ما أجازي ابشرحي موقفها الثگيل
امْن اختصر الگه اختصاري هم طويل
يا مره التنطي الولِد كلهُم سبيل

ضحّت ابكلشي العِيُون اِحسينها
اِحسين ابو السجّاد أصبح دِينها
تفرح امْن اتكلِّمَه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
اموقّره اشما أنظُر اعليها أشوف
كعبه هيّه والوفه اعليها يطوف
فوگ خدها آيات مدمعها ذروف
بالمدينه او عاشت اجروح الطفوف

ابلا ولي شافتها رِجعت زينب
والجمُر ضل بيها عايِش يلهب
چم سهم بيها انرمه
والوفه ما اعظمه
‌▪️⁩‌▪️⁩‌▪️⁩‌▪️⁩‌▪️
تبچي كل ليله او جفنها ضل ذبول
ابعينها ليل الحزن باقي يطول
رغم كل التضحيْه تبچي او تگول
اني خاف امقصّره ويّه البتول

ماتت او مات الوفه ويّاهه
ابكل مسه لمّن مشت ينعاهه
او ينتحِب عالعالِمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ابتضحيتها بيِّنَت معنى الولاء
ثلث كواكِب والگمر انطت فداء
يا عظمها چن نهر فايِض عطاء
حُب علي خلّاهه اعله امْن السماء

كلها غيره او ماكو منها اهوايه
عاليْه او مهيوبه هيبة رايه
رايه رفّت بالسمه
والوفه ما أعظمه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
صفر ١٤٤٤ هـ

#ام_البنين
‌▪️⁩‌▪️⁩‌▪️⁩‌▪️⁩‌▪️
يابو الفضِل وينك .. امّك ماتت ابغربه
لو ما تحِضروها .. اي يابو الفضِل صعبه
وسفه تخلّيها .. محّد حضر ليها
سيّدي سيّدي
‌▪️⁩‌▪️⁩‌▪️⁩‌▪️⁩‌▪️
يا سيدي الكافل هاي القصه معروفه
كلمن يجي يومه كل اهله تجي اتشوفه
بين اللذي ايْودعه او بين اليشبع ابشوفه
او بين اليسِد عينه او بين اليلزم اچفوفه

بس امّك الحرّه .. يابو الغيره محنيّه
ما چنها ام اربع .. چنها ابلا ولد هيّه
والغربه تچويها .. محّد حضر ليها
سيّدي سيّدي
‌▪️⁩‌▪️⁩‌▪️⁩‌▪️⁩‌▪️
امّك يبو الغيره ضل بيها الوفه كامِل
لمّن اجت زينب لاگتها ابدمِع هامِل
حاچتها محروگه يُمّه احچيلي عالكافِل
گالت كفو منّه ما قصّر ابو فاضِل

واتوجِهَت للطف .. نادتلك يعبّاسي
مشكوره يوليدي .. ابفضلك مرتفِع راسي
فضلك يعلّيها .. محّد حضر ليها
سيّدي سيّدي
‌▪️⁩‌▪️⁩‌▪️⁩‌▪️⁩‌▪️
يا سيّد الغيره امّك عالقِمم قِمه
نصرة ابو الاكبر تحسبها مثل نعمه
بالغيره ضحّتكُم او گالت بالفخر كلمه
صح انتم اولادي بس الاغله ابو اليِمّه

انتوا خدم عنده .. او هوّه الوالي والقائد
خادم لابو الاكبر .. بيكم انتوا كل واحد
خدمه النصُر بيها .. محّد حضر ليها
سيّدي سيّدي
▪️⁩‌▪️⁩‌▪️⁩‌▪️⁩‌▪️
امّك يبو فاضِل چانت سيّدة نخوه
چانت نهر غيره منّه الغيره تتروّه
حاچتكم احچايه چانت كلمة امروّه
يولادي ابو الاكبر ترحوله الف فدوه

گالت ردت منكم .. كلمن ينگطع نحره
واللي رجع سالِم .. هذا منّه اتبرّه
ابكل غيره تحچيها .. محّد حضر ليها
سيّدي سيّدي
▪️⁩‌▪️⁩‌▪️⁩‌▪️⁩‌▪️
يا سيّد النخوه امّك طاهِره او اكثر
ضحّتكم ابغيره او ضل بيها الوفه امحيّر
عاشت مثل رايه واترِف ابعشِگ حيدر
عيشتها مهيوبه اعلى امْن السمه واكبر

صارت جبل عالي .. من حب حيدر الوالي
او للغالي موقفها .. من ضحّتله كل غالي
والغيره تمليها .. محّد حضر ليها
سيّدي سيّدي
▪️⁩‌▪️⁩‌▪️⁩‌▪️⁩‌▪️
امّك يبو فاضِل چانت بالوفه اچبيره
رفّت مثل رايه مهيوبه ابسمه الغيره
الرايد يوصّفها والجاب الها فد سيره
ايضل بالوصُف حاير تعجز كل تعابيره

الجابت ولد مثلك .. لا مو بس يجلّوها
لا ولله بالنسوه .. ما لازِم يقيسوها
محّد يضاهيها .. محّد حضر ليها
سيّدي سيّدي
▪️⁩‌▪️⁩‌▪️⁩‌▪️⁩‌▪️
يا سيّد الموقف امّك هايه وحّدها
ما چنها ام اربع چنها او لا ولد عدها
ماكو اليغسّلها او ماكو اللي يوسّدها
بس الدمِع يمها موجود ابوسط خدها

تتلفّت ابحرگه .. ما شافت ولي يمها
مفجوعه مكسوره .. والغربه تالّمها
وين اليواريها .. محّد حضر ليها
سيّدي سيّدي
▪️⁩‌▪️⁩‌▪️⁩‌▪️⁩‌▪️
ابو الحسن الوائلي
ربيع الاول ١٤٤٤

#ام_البنين
▪️▪️▪️▪️▪️
لو شفت نفسك حزين
نادي يا أم البنين
▪️▪️▪️▪️▪️
لو همومك طالِعه
او حتّه عينك دامِعه
نادي ام الاربعه

هايه ام گلْب الحنين
نادي يا ام البنين
▪️▪️▪️▪️▪️
انخاهه لو عندك جرِح
ما تعوفك منجرِح
اتشيله حمْل المنطرِح

ما يضل گلبك طعين
نادي يا ام البنين
▪️▪️▪️▪️▪️
اوياهه احچي مُطمئِن
خايِب اترِد لا تضِن
اتردّك ابلايه حزِن

اعليها اقسِم بالحُسين
نادي يا ام البنين
▪️▪️▪️▪️▪️
خلّي نيتَك صافِيْه
بس اشاره كافِيْه
عندك اترِد عافِيْه

سامِعي ابرفع الادين
نادي يا ام البنين
▪️▪️▪️▪️▪️
هالكلام انوثِّقه
هيّه عِنْد الله ثِقه
اعتبره هَمّك ما بُقه

والطلب مگضي او امين
نادي يا ام البنين
▪️▪️▪️▪️▪️
لو شفِت همّك كُبر
نادي يا ام الگمر
انخاهه ما يبقه قهر

اشكثُر ما عندك انين
نادي يا ام البنين
▪️▪️▪️▪️▪️
احچايِتْي بالخاتِمه
ارفع ايدك للسِمه
او گلّه ربّي ابفاطِمه

انتخي او بيها استعين
نادي يا ام البنين
▪️▪️▪️▪️▪️
ابو الحسن الوائلي
جمادي الاول ١٤٤٤هـ

▪️في مولد السيّدة الطاهرة فاطمة الزهراء عليها السلام
▪️▪️▪️▪️▪️
قَدْ فَرِحَتْ ارْضٌ وَسَمَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
شَعّتْ نُورًاً وَاضِحُ كَانْا
جُزْءٌ مِنْ نُورِ الرَّحْمَنَْا
فَهِيَ بِمَدَارِ الاَزْمَانْا
تُعْطِي نُورَاً لِلَاكْوَانْا

نُورَاً مَا مِثْلُهُ قَدْ جَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
لَمْ تُخْلَقْ مِنْ طِينٍ ، اكْبَر
خَلَقَ الْبَارِي فَاطِمُ جَوْهَر
قَالَ اللَّهُ وَطٰه اسْتَبْشَر
"إِنَّا أَعْطَيْنَاكَ الْكَوْثَرَ"

بِكِتَابِ الْبَارِي الِانْبَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
سُبْحَانَ مُصَوّر صُورَتِهَا
وَمُسَوّي هَذِي هَيْبَتِهَا
فَخَدِيجَةُ لَوْ لَا عَظَمَتِهَا
مَا صَارَتْ فَاطِمَةُ ابْنَتِهَا

مَا أَعْظَمَ امْ الِابْنَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
تُفَّاحَةُ انَزَلَهَا الْبَارِيِ
نُورًا تَضْوِي لِلَانْوَارِ
فَاطِمَهَا الرَّبُّ مِنَ النَّارِ
فَاطِمَةٌ امُّ الِاطهَارِ

لِمُحِبِّيهَا الْجَنَّةِ شَاءَ
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
فَاءٌ: فَاطِمَةُ انْسِيّة
الْفٌ: انْفَاسٌ قُدْسِيّة
طَاءٌ: طَاهِرَةٌ وَرَضِيّة
مِيمٌ: مَعْنَاهَا مَرْضِيّة

وَ"الْهَمْزَةُ" تَحْوِي آلَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
سُبْحَانَ الْعَالِي السِّوّاهَا
تَخَلُوْا مِنْ سُوءِ خُلّاهَا
لَا شَيْءَ يُفَسّرُ مَعْنَاهَا
اذْ يَرْضَا الْبَارِي لِرِضَاهَا

مِثْلُ الْبَارِي فِي الْآرَاء
وِلِدَتْ فَاطِمَةُ الزَّهْرَاء
‏️️️️️▪️▪️▪️▪️▪️
مَا أَعْظَمَ خَالِقِهَا الِادْرَا
قَدِ ابْدَعَ فِي خَلْقِ الزُّهْرَا
سوّاها عَالِيَةَ الْقَدَرَا
فَهِيَ الْكُبْرَى بِنْتُ الْكُبْرَى

وَلَهَا اسِّرَارُ الِاسْمَاء
وِلِدَتْ فَاطِمَةُ الزَّهْرَاءِ
▪️▪️▪️▪️▪️‏️️️️️
ابو الحسن الوائلي
جمادي الاخِر ١٤٤٤هـ