#الليلة_الاولى 👇

ماهو حال زينب ع وهي تستقبل شهر محرم بعد سنه من مقتل اخوتها واهلها في كربلاء
‌▪️⁩‌▪️⁩‌▪️⁩‌▪️⁩‌▪️
شهر احزان زينب طر عليها
تشوف اهلاله تتذكر وليها
يا شهر المحرم ... يا شهر المحرم
‌▪️⁩‌▪️⁩‌▪️⁩‌▪️⁩‌▪️
اتشاهد اهلال الحزن زيّد حزنها
شافِته والدمعه مغروسه ابجفنها
اتذكّرت من مات اخوها او راح عنها
او تذكر اسياط العده الضربت متنها

شهر غيّر ملامحها او جرحها
ابمحرم مظلم اتشاهد صبحها
يا شهر المحرم ... يا شهر المحرم
‌▪️⁩‌▪️⁩‌▪️⁩‌▪️⁩‌▪️
تنظُر اهلاله او بقت بيها النوايب
يا گلبها الحرّه مِن اللوعه ذايِب
ابحرگه تبچي اتذكّرت ذيچ المُصايب
زينب ابطف كربله شافت عجايب

دمعها ايهل دمه لمّن تصدله
تباوع للسمه او ونّتها تعله
يا شهر المحرم ... يا شهر المحرم
‌▪️⁩‌▪️⁩‌▪️⁩‌▪️⁩‌▪️
شافته او ضلّت تهل الدمعه من دم
بهالشهر هذا ابگلبها اللوعه تلتم
هيّه مجروحه او گلبها اشگد تألّم
هيّه دُخّان الخيْم من عنده تشتم

حزينه او كربله راوتها كسره
او بقت بس الحزن منها تنظره
يا شهر المحرم ... يا شهر المحرم
‌▪️⁩‌▪️⁩‌▪️⁩‌▪️⁩‌▪️
زينب الشافت حزن طيلة عمرها
اتحمِّلتها الفاجعه او باقي صبرها
او هالدهر يا ذيها ما يجبر كسرها
والهوه لو شمّته ياذي ابصدرها

گلبها بهالشهر ما يغفه همّه
الهوه يلچمها لو رادت تشمّه
يا شهر المحرم ... يا شهر المحرم
‌▪️⁩‌▪️⁩‌▪️⁩‌▪️⁩‌▪️
چم جرح بالطف حزين اتشوف هيّه
كل اهلها اعله الثره او صعبه الرزيّه
اتشوف اخوها ابلا نحر فوگ الوطيّه
واللّي كافلها عله الشاطي رميّه

ابسهام الطف گلب زينب تصوّب
الحزن ضل او بقه ايدور اعله يزينب
يا شهر المحرم ... يا شهر المحرم
‌▪️⁩‌▪️⁩‌▪️⁩‌▪️⁩‌▪️
شاهِدت جيته او بده يكبر ألمها
بالطفوف المُفجعه الزينب لچمها
ابكربله آذاها للحرّه او هضمها
زيّد ابكسرة كلبها او ما رحمها

شهر بي عاشت الهم والمواجع
ابحزن هيّه بقت تجري المدامع
يا شهر المحرم ... يا شهر المحرم
‌▪️⁩‌▪️⁩‌▪️⁩‌▪️⁩‌▪️
اتعاتب اهلال الشهر واتگلّه تدري
انته بالطف زيّدتلي ابروحي كسري
اگبالي اهلي اتذبّحوا وادموعي تجري
واني مجروحه بقيت ابحيرة امري

شهر من شفتك او حيلي هدمته
ابذبح أهلي أحس گلبي ذبحته
يا شهر المحرم ... يا شهر المحرم
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣هـ

#الامام_الحسين ع
‌▪️⁩‌▪️⁩‌▪️⁩‌▪️⁩‌▪️
يالواضح ابنقائك .. يمضحّي كل دمائك
لو ما دمائك سيّدي أي ماكو دين
روحي تنادي او كل شبر بيّه حُسين
‌▪️⁩‌▪️⁩‌▪️⁩‌▪️⁩‌▪️
ينور اللّٰه العظيم النازل ابـ أرضه
دين اللّٰه اكيد انته الصرِت نبضه
دين الباري روحك سيّدي اتحفظه
لأن لو ما دمائك ما ثبت فرضه
المات او عز محبتك يا حسِن حظّه
او عقول اللّي تضدّك سيّدي مرضه

يالثابت ابجداره .. يا كعبة الغياره
لامع تضل او كل فخر للمؤمنين
روحي تنادي او كل شبر بيّه حُسين
‌▪️⁩‌▪️⁩‌▪️⁩‌▪️⁩‌▪️
يمن ضلّيت وحدك تنظر القسوه
تراه الكون كلّه ايروح الك فدوه
تضل ضامي او دليلك باقي يتچوّه
تموت امن العطش يا وسفه ما تروه
يصيت الماي عالي ابذبحتك هوّه
يا سر الحياه من دونك اشتسوه

يا سيّدي ابعظمتك .. ماكو مثل حضرتك
سر السمه ابصدرك يبو اليمّه دفين
روحي تنادي او كل شبر بيّه حُسين
‌▪️⁩‌▪️⁩‌▪️⁩‌▪️⁩‌▪️
أبد يا سيّدي ماكو ابمثل وضعك
عله الرايد يذبحك ينهمل دمعك
عله مر السنين او ثابت ابطبعك
تضل عالي او بعيد الرايد ايوگعك
شفت ذبح الاهالي او مذبحة ربعك
طريح او طيحتك فوگ السمه اترفعك

يا سيّدي الشهاده .. ابعينك صفت سعاده
عالي القدر يا مصحف النور المبين
روحي تنادي او كل شبر بيّه حسين
‌▪️⁩‌▪️⁩‌▪️⁩‌▪️⁩‌▪️
"ألا من ناصر" ابصوتك لمَن ناديت
ولا واحد ينصرك سيّدي او عانيت
ولا حس بيها صاحب غيره من انخيت
بقيت ابلايه ناصر ضد جمِع ضلّيت
لجل دين الرساله كل عزيز إنطيت
او لجل دين اللّٰه كل غالي إله ضحّيت

يا منهج الامامه .. يا سيّد السلامه
ابعين المحب انته تضل نور اليقين
روحي تنادي او كل شبر بيّه حُسين
‌▪️⁩‌▪️⁩‌▪️⁩‌▪️⁩‌▪️
فقط ربنه العظيم اللّي عرف سرّك
يالمضحّي لجل دين الله كل عمرك
تضل وحدك رغم كلشي تحت أمرك
يراس الدين يا حيف انگطع نحرك
او عشِر خيّاله داست صدرك او ظهرك
واهي اسرار السمه كلها ابوسط صدرك

تدري السمه ابوگعتك .. مالت عله ذبحتك
تعله ابذبحتك انته والذابح لعين
روحي تنادي او كل شبر بيّه حُسين
‌▪️⁩‌▪️⁩‌▪️⁩‌▪️⁩‌▪️
حروفي اشگد بسيطه او ما يوصفنّك
جروح الطف عظيمات او يجرحنّك
حجاب اللّٰه انهتك لو ما سبي ضعنك
ثبت دين اللّٰه من سال الدمه منّك
ابحقّك ما توافي اللّي حچت عنّك
واشهد سيّدي ما صح مثل حزنك

ما صح مثل همومك .. ماكو مثاله يومك
او مثلك فلا صاير على مر السنين
روحي تنادي او كل شبر بيّه حُسين
‌▪️⁩‌▪️⁩‌▪️⁩‌▪️⁩‌▪️
اجيتك شاعر او ما يوصِفك شعره
زغير او مبتدأ وانته اعرف او أدره
دريت اللّي يخدمك يا عظُم قدره
واجيتك اني رايد لو فقط نظره
عظيم ابكلشي انته او قدرك اشكبره
منو المثلك يضحّي الدينه كل عمره

گلبك بلايه قتلَه .. دين اللّٰه ماكو اصلَه
يا رحمة اللّٰه الواسِعه للمسلمين
روحي تنادي او كل شبر بيّه حُسين
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣هـ

#الامام_الحسين ع
‌▪️⁩‌▪️⁩‌▪️⁩‌▪️⁩‌▪️
احسين مو قيمه او لطم
احسين ثوره اعله الظلم
احسين منهاج الكرامه
احسين ثوره اعله الظلم
‌▪️⁩‌▪️⁩‌▪️⁩‌▪️⁩‌▪️
يالتحب احسين اريدك تعرف احسين اشيريد
ابيا سبب ضحّه ابدمائه ابيا سبب طايح شهيد
ابحب ابو اليمّه قواعد يا من اتحبّه تريد
مو لِسانك يحچي باسمه او گلبك اموالي يزيد

ما يحب حقْد البشَر
لاكن ايحب الفخَر
ايدوّر الثابت كلامه
احسين ثوره اعله الظلم
‌▪️⁩‌▪️⁩‌▪️⁩‌▪️⁩‌▪️
احسين ميحب التلوّن واضح ايريدك تصير
او ما يدوّر عالطفولي ايدوّر العقله چبير
ضحّه ابو اليمّه حياته من أجل يبقه الضمير
انقذ ابموته الكرامه انطاهه عمره او صار امير

عنده موته مو مهم
عنده دين اللّه المهم
يبقه دين اللّٰه ابسلامه
احسين ثوره اعله الظلم
‌▪️⁩‌▪️⁩‌▪️⁩‌▪️⁩‌▪️
هذا ابو اليمّه ابعظمته طفّه يحوي كم درِس
حضنِته الگاع ابوگعته او فِكره رادت تلتمِس
ذبحِته حِكمه او مواعِض هيّه لازِم تندرِس
ابفضله دين الباري باقي واضح اوضوح الشمِس

من أجل ربنه العلي
ضحّه كل عمره الولي
او فخر ثابِت للقيامه
احسين ثوره اعله الظلم
‌▪️⁩‌▪️⁩‌▪️⁩‌▪️⁩‌▪️
يالتحب احسين خلّي إله حَبّك مالَه حَد
لأن لو ما ذبحه بالطف ماكو دين اللّٰه بعد
خلّي كل لايم يلوم او خلّي عندك معتقد
احسين لو ما ذبحه اصلاً ينّسِي اللّٰه أحد

هذا ابن حامي الحِمه
دمّه قربه قدّمَه
او بالذبح چان التزامه
احسين ثوره اعله الظلم
‌▪️⁩‌▪️⁩‌▪️⁩‌▪️⁩‌▪️
احسين يستاهل تحبّه كل ذنِب حَبّه يزيح
خلّي حُبّك يالتحبّه حُب مثالي او هم صريح
طاح فوگ الغبره دامي والسمه رادت تطيح
اتوازنت خلّاهه بيده من وگع ضامي او ذبيح

مالت الدنيْه او هوت
ابأمر منّه اتصبّرت
سيّد او روح الإمامه
احسين ثوره اعله الظلم
‌▪️⁩‌▪️⁩‌▪️⁩‌▪️⁩‌▪️
الماكو مثله العالي قدره هذا ابن حامي الحمه
من أجل دين اللّٰه يعله عالارض جسمه انرمه
من وگع عالغبره دامي رادت اتطيح السمه
او هوّه صبّرها ابوگعته او صارت ابلون الدمه

الضحّه للدين العمُر
يبقه واضِح للحشُر
غصب عالشكّ ابمقامه
احسين ثوره اعله الظلم
‌▪️⁩‌▪️⁩‌▪️⁩‌▪️⁩‌▪️
ذبحه برض الغاضريّه خلّه قيمه للوجود
ماكو ذرّه الرب خلقها إلّه والاصله تعود
سيّد الدنيْه او أبوها البيده مفتاح الخلود
الدين عاموده الصلاة او للصلاه هوّه العمود

الجسمه طايح عالارض
حبّه واجب ينفرُض
واضح ابذبحه الوسامه
احسين ثوره اعله الظلم
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣هـ

#فاطمه_العليله
‌▪️⁩‌▪️⁩‌▪️⁩‌▪️⁩‌▪️
چا وين الاحباب
ما دگّوا الباب
‌▪️⁩‌▪️⁩‌▪️⁩‌▪️⁩‌▪️
ودّعت اهلي واخوتي او حالي مو حال
ليلي ويّه اهمومي طوّل صبري هم طال
عندي چم ذكره او صور ضلّت على البال
الفرحه راحت وي سفرهم والحزن ضال

اخذوها روحي
ضلّت جروحي
كل اهلي غيّاب
‌▪️⁩‌▪️⁩‌▪️⁩‌▪️⁩‌▪️
الدنيه غابه ابعيني صارت مِن وراهم
او يا دمع يجري او يصبّرني ابجفاهم
گلبي مِن راحوا أحس أخذوه معاهم
مختنگ صدري او ردت نسمة هواهم

وابصدري خنگه
وابروحي حرگه
روحي شمع ذاب
‌▪️⁩‌▪️⁩‌▪️⁩‌▪️⁩‌▪️
راحوا اهلي او اخذوا الراحه ابسفرهم
جسمي باقي بالمدينه او روحي يمهم
خبر لا مرسال اجاني او يحچي عنهم
مدري وين اهلي انگطع عنّي خبرهم

ما جتني أخبار
دمعاتي مدرار
ضل دمعي سچّاب
‌▪️⁩‌▪️⁩‌▪️⁩‌▪️⁩‌▪️
اهلي من عافوني وحدي او فارگوني
او راح كل حيل الگلب من ودّعوني
عنّي راحوا يا وسافه او ما خذوني
واني ما اندل هلي او لا همّه اجوني

محّد رجعلي
او لا اندل اهلي
ضل گلبي مرتاب
‌▪️⁩‌▪️⁩‌▪️⁩‌▪️⁩‌▪️
اعليّه من هل او اِجه شهر المُحرّم
او عالمِشوا عنّي اشكثُر گلبي تألّم
دمعة الفرگه عليهم تجري مِن دَم
بيها جيّه السَفره لو لا اللّٰه يعلَم

همّي ملاني
محّد اجاني
جرحي ولا طاب
‌▪️⁩‌▪️⁩‌▪️⁩‌▪️⁩‌▪️
ابأمل رجعتهم اتاني ابحرگه ضلّيت
واني كل ليله التمرني ادموعي هلّيت
امن الصبُر يا رب دخيلك وللّٰه ملّيت
ربّي راويني علامه ابصوتي ناديت

يالبيدك امري
اجبرلي كسري
راوينيْ اِجواب
‌▪️⁩‌▪️⁩‌▪️⁩‌▪️⁩‌▪️
ابحرگه بالعين انظر اتراوتلي رسمه
والِدي عالغبره طاح او دامي جسمه
منگطع نحره او صريع او يجري دمّه
او سحگت ابصدره الخيول او ما ترحمه

گطعوله نحره
سحگوله صدره
طاح اعله التراب
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣هـ

#فاطمه_العليله
‌▪️⁩‌▪️⁩‌▪️⁩‌▪️⁩‌▪️
وين الاهَل .. گلبي سئَل
ماكو خبَر .. منهم وصَل
نزلت دمعتي .. واني ابغربتي
‌▪️⁩‌▪️⁩‌▪️⁩‌▪️⁩‌▪️
أهلي وين اندب وانادي واسئل ابدمعي
من جفوني او ودّعتهم واختلف وضعي
انتظرها رجعة اهلِي ابكل مسه وانعي
خل يجون اهلي ابسلامه انتحب وادعي

اصعب وضع .. يجري الدمع
أي والگلب .. ضَل منفجع
تتعالَه ونتي .. واني ابغربتي
‌▪️⁩‌▪️⁩‌▪️⁩‌▪️⁩‌▪️
يصعب اوداع الحبايب يلچم الفاگِد
منكسُر گلبي واتاني والصبُر شاهِد
اتهدّم الحيل او تموتَه فرگة الوالِد
وأهلي كلهم ودّعوني او ما بقه واحِد

گلبي انكسر .. دمعي انحدر
او مِن الاهل .. محّد حضَر
ابداري وحشتي .. واني ابغربتي
‌▪️⁩‌▪️⁩‌▪️⁩‌▪️⁩‌▪️
اني مِن يوم اللّي راحوا منهدِم صبري
من مشوا ويّاهم اخذوا كل فرح عمري
عايِشه احساس الغريبه او يلتهب جمري
او صِرت احس ديرة مخيّم تلهب ابصدري

مات الصبُر .. بيّه الكسُر
لمّن مشوا .. راح العمُر
ضلّت حسرتي .. واني ابغربتي
‌▪️⁩‌▪️⁩‌▪️⁩‌▪️⁩‌▪️
ابروحي وحشه من بعدهم والحزن عشته
ابحيره مرعوبه بقيت او صبري تعّبته
حلمي راواني اِشاره او چم جرح شفته
انحور وادموم او منايه او حلمي تابعته

شفته الحلم .. واني انلچم
چن الگلب .. حَس باليتِم
خيّبلي ضنتي .. واني ابغربتي
‌▪️⁩‌▪️⁩‌▪️⁩‌▪️⁩‌▪️
أيّست لا ماكو رجعه والجرح يكبر
والخطر بالبيت اشوفه ايدور واتحسّر
احسين وحده اعليْه اباوع داير العسكر
مِن اغمّض عيني اشاهِد گطعة المنحر

والدم جره .. مِن منحره
گلبي وگع .. فوگ الثره
طفّوا شمعتي .. واني ابغربتي
‌▪️⁩‌▪️⁩‌▪️⁩‌▪️⁩‌▪️
منهدم ركني او شفتها ادموعي همّالَه
او راح ابويه واني گلبي مختلف حالَه
ابلايه منحر جسمه دامي اتدوسه خيّالَه
اِعظامه كسروها او اجوله گطعوا اوصالَه

طاح الضوه .. گلبي انچوه
فوگ الترب .. مات الهوه
صارت كسرتي .. واني ابغربتي
‌▪️⁩‌▪️⁩‌▪️⁩‌▪️⁩‌▪️
كمّلِت حلمي ابدموعي او روحي محنيّه
غافِيْه اجروحي اعله گلبي والحزن بيّه
والسمه غايب گمرها وانخسف ضيّه
او بت علي بالغربه صار تالي مسبيّه

اشرف عبي .. راحن سبي
النسوه بقت .. يم اجنبي
بالي اعله عمتي .. واني ابغربتي
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣هـ

#الليلة_الرابعة 👇

#أم_البنين
‌▪️⁩‌▪️⁩‌▪️⁩‌▪️⁩‌▪️
وينك يا ضوه العين .. گلبي حاوي جرحين
حالي اهوايه مو زين .. من بعدك يالحسين
دمعاتي جمُر .. ما ضل الصبُر
‌▪️⁩‌▪️⁩‌▪️⁩‌▪️⁩‌▪️
يبلسم ودّع اجروحي او رحل عنّي او تركني
ابغيابك ياضِوه اعيوني بعد ما يهده حزني
يروحي الساكن ابروحي او قريب اهوايه منّي
بعدني ابكل مسه انطُر تجي او ترجع بعدني

يا رب ادعي يا ريت .. ايردّك سالِم ادعيت
ابهمّي ابحزني ضلّيت .. ذكرك باقي بالبيت
من هذا الهجُر .. ما ضل الصبُر
‌▪️⁩‌▪️⁩‌▪️⁩‌▪️⁩‌▪️
غِبت عن عيني يوليدي لچنّ ابروحي ساكِن
ابخيالي صورِتك هيّه او حِوت كل الاماكِن
لون بيدي العمُر انطي إلَك يوليدي لكِن
بنيني او روحي ناطيتك شنو غالي سواهِن

گلبي ابداخِله إجراح .. حيلي ابروحِتك طاح
مثلك تدري ما صاح .. كل غالي إلك راح
إقبَل هالنذُر .. ما ضل الصبُر
‌▪️⁩‌▪️⁩‌▪️⁩‌▪️⁩‌▪️
نطيتك اربع ابنيني فداك او ما يضاهوك
كواكب لجلك اثلاثه او گمر كلهم يخدموك
إمام او سيّد اعليهم يبو اليمّه يخلّوك
لجل عينك فِده اولادي والواجب يوقروك

مثلك ما يلاگون .. مثلك ماكو بالكون
كلهم فدوه يرحون .. لجلك فدوه لعيون
تآمرهم أمُر .. ما ضلّ الصبُر
‌▪️⁩‌▪️⁩‌▪️⁩‌▪️⁩‌▪️
رِحت عنّي السفر هذا بلا رجعه عرفته
رِحت عنّي يضي عيني الگلُب ويّاك اخذته
ييمّه او حسّبت وجهك اذا غاب او فكدتّه
على بالي ارسمت شكلك انه او طولك رسمته

لو هذا السفر طال .. رسمك يبقه عالبال
حيلي اعله الارض مال .. فگدك يبني چتّال
مثلك ما يمُر .. ما ضل الصبُر
‌▪️⁩‌▪️⁩‌▪️⁩‌▪️⁩‌▪️
حلم وانظرله باليقضه اشوفك عالوطيّه
او شمِر جالِس على صدرك وانظرلك رميّه
يطبرك يا وسف سيفه اثنعش طبره أذيّه
يحز نحرك على مهله اگبال الهاشميّه

مشهد مفجع ايطول .. شفته او بالي مذهول
يبني او انته مچتول .. يبني اتدوسك اخيول
واترضّ الصدُر .. ما ضلّ الصبُر
‌▪️⁩‌▪️⁩‌▪️⁩‌▪️⁩‌▪️
اذا هذا الحلِم صاير جروح الطف تكامِل
بقت زينب وسط غربه وحيده او ماكو كافِل
الكفيل اعله النهر نايم او تنخه يابو فاضِل
اذا كل ولدي عالغبره اركبت زينب هزايِل

بالطف شافت النوح .. چم والي اللّي مذبوح
تكمل لوعه واجروح .. زينب بالسبي اتروح
يسبون الخدُر .. ما ضل الصبُر
‌▪️⁩‌▪️⁩‌▪️⁩‌▪️⁩‌▪️
الحلِم اتوقّع اتحقّق او معناهه انولينه
ابسبي ترحل إذاً زينب هيّه والضعينه
يضل بالي عله زينب عله الحرّه الحزينه
اتانيها تجي يمته او ترِد لرض المدينه

الزينب تعمه العيْون .. اللّٰه ايساعِد ام عون
الاصعب بالسبي اشلون .. لو بيها يضربون
ترجع انتظُر .. ما ضل الصبُر
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣هـ

#الليلة_الخامسة 👇

#مسلم_بن_عقيل
‌▪️⁩‌▪️⁩‌▪️⁩‌▪️⁩‌▪️
انه عونك يبو اليمّه
سفيرك اني اتسمّه.. يمولاي
انه گلبي ثبت عزمه
نطيتك سيّدي كلمه.. يمولاي
‌▪️⁩‌▪️⁩‌▪️⁩‌▪️⁩‌▪️
سفيرك سيّدي والغيره عنواني
ابطول الدرب بسمك يلهج الساني
يمن تستاهل انطيك العمُر آني
ولا يسوه العمُر هذا الشخص ثاني

نخيت او جاوبِت عونك
حياتي فدوه لعيونك.. يمولاي
شسوّي ابعمري من دونك
ابد ماكو يشبهونك.. يمولاي
‌▪️⁩‌▪️⁩‌▪️⁩‌▪️⁩‌▪️
دخلت الكوفه خطوه او تتبع ابخطوه
تره الحاكم زغير او عندي ما يسوه
اجيته او اني ثابت عزمي بي قوّه
إلي اسمك حرز يا سيّدي او تچوه

عدونه الظالم او حكمه
اسحگه ابرجلي لو يَمّه.. يمولاي
ابگلبهم ماكو كل رحمَه
يبغضونك يبو اليمّه.. يمولاي
‌▪️⁩‌▪️⁩‌▪️⁩‌▪️⁩‌▪️
اليباوعلي واشوفه وانظر ارسومه
واحدهم الغيره العنده معدومه
اليلاگيني اكيد ايحس وصل يومه
اباوعهم خرز متطشره بالحومه

اليلاگيني يحين امره
اضيّع روحه وي عمره.. يمولاي
أمامي يفقد القدره
ابّساطه ينگطع نحره.. يمولاي
‌▪️⁩‌▪️⁩‌▪️⁩‌▪️⁩‌▪️
اباوعهم سويّه اوجوه تنگط سَم
عله ارگاب العده سيفي ولا يرحَم
عليّه المدد يشهد ما شخُص يسلَم
اشما يكثر عددهم واني ما اهتَم

ثواني الضَدني معدوده
الشجاعه بيّه موجوده.. يمولاي
العدو اشما يكثر اجنوده
الجهنّم ضَربْتي اتقوده.. يمولاي
‌▪️⁩‌▪️⁩‌▪️⁩‌▪️⁩‌▪️
انه بالكوفه بس مو عالحرب عازِم
الرسائل كلها منهم گصدتك واهِم
اجت ضدّي جحافل واني متلازِم
اليواجه صارِمي لا ما يرد سالِم

ترجّوا وارتجوا هَدنه
او سيفي ثابت ابركنه.. يمولاي
نعم آل النبي احنه
نأمّن حتّه بالضدنه.. يمولاي
‌▪️⁩‌▪️⁩‌▪️⁩‌▪️⁩‌▪️
ملك الموت اجاني او يا هلَه ابضيفي
گعد عزريل واني الاقبض ابكيفي
السبع بيهم اشوفه ايخاف من طيفي
او علي لو ما وعدهم ما نزل سيفي

حثاله او ماكو كل زلمه
نذل واحدهم اتسمّه.. يمولاي
ابوعدهم خانوا الچلمه
وانه گلبي ثِبت عزمه.. يمولاي
‌▪️⁩‌▪️⁩‌▪️⁩‌▪️⁩‌▪️
انه ابعالي القصُر كل فكري ضل يمّك
او تراوالي عله الغبره وگع جسمك
جسم وابلا نحر طاح او يهل دمّك
او تراوالي اعوجيّه او تطحن ابعظمك

ذبيح او مختلف امرك
دمائك تجري من نحرك.. يمولاي
اباوع صدرك ابظهرك
واباوع ظهرك ابصدرك.. يمولاي
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣هـ

#أنصار_الحسين ع
‌▪️⁩‌▪️⁩‌▪️⁩‌▪️⁩‌▪️
إلك سهله المنيّه
يبِن حامي الحميّه
‌▪️⁩‌▪️⁩‌▪️⁩‌▪️⁩‌▪️
نضل او نبقه دوم او نهجك انحبّه
او مِن دمنه العهد يا سيّدي انكتبه
قليله انصارك او هل مسأله صعبه
بألف واحِدنه بالطف سيّدي حِسبه

زلم رغْم الرزيّه
يبن حامي الحميّه
‌▪️⁩‌▪️⁩‌▪️⁩‌▪️⁩‌▪️
تاج انحطّك اعله الراس وانرفعك
نقي او تنضح نقاء او ثابت ابطبعك
إذا عالجمر تمشي سيّدي انتبعك
يغالي او بالحرب نصبح مثل درعك

العمر دونك أذيّه
يبن حامي الحميّه
‌▪️⁩‌▪️⁩‌▪️⁩‌▪️⁩‌▪️
نعم يا سيّدي واحِدنه الك ناصِر
لجِل هاي الرساله كل شخص ثائِر
مسلم ، جون ، عابس ، ويّه ابِن ظاهِر
بُرير ، الحُر ، زهير ، او حظلَه ، او عامِر

زلم كلنا حميّه
يبن حامي الحميّه
‌▪️⁩‌▪️⁩‌▪️⁩‌▪️⁩‌▪️
عزيزه الروح تنعز هيّه بالتقوه
ولاكن سيّدي انقدّمها الك فدوه
ننصرك يالعزيز او نصرتَك قوّه
او نموت اوياك وللّه الموته هَم تسوه

المنيّه تسوه هيّه
يبن حامي الحميّه
‌▪️⁩‌▪️⁩‌▪️⁩‌▪️⁩‌▪️
إلك فدوه العمُر نفدي ولا نهتَم
إلك قدّمنه قربان النحر والدَم
يعيش ابخير دونك اي شخص يحلَم
اليكرهك سيّدي والزهره ما يفهَم

جهل كلهم سويّه
يبن حامي الحميّه
‌▪️⁩‌▪️⁩‌▪️⁩‌▪️⁩‌▪️
مثالك اللّٰه واحِد سوّه ماكو اثنين
نضحّي ابكلشي لجلك سيّدي او للدين
لحَد الموت اِحنه اعله العهد باقين
عمت عينه اليعوفك سيّدي يحسين

الذْي ايعوفك خطيّه
يبن حامي الحميّه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣ هـ

#أنصار_الحسين ع
‌▪️⁩‌▪️⁩‌▪️⁩‌▪️⁩‌▪️
خدّامك يغالي .. خدّامك يوالي
ما يسوه العمر لو ما وجودك
نرخص سيّدي الغالي اعله مودك
‌▪️⁩‌▪️⁩‌▪️⁩‌▪️⁩‌▪️
خدّامك نضل يا سيّدي او تستاهل انته
مولاي الگلب هذا الگلب انته السكنته
ما يسوه العمر هذا العمر دونك عرفته
واحدنه لجل عينك يضحّي ابدم رگبته

بالطف كلنه واحد .. احنه او الله شاهد
انظر سيّدي ابعينك حشودك
نرخص سيّدي الغالي اعله مودك
‌▪️⁩‌▪️⁩‌▪️⁩‌▪️⁩‌▪️
كل ربعك وفاء او مرجله او كلنه غياره
بس آمرنه وانجيب العده كلهم إساره
مولانه لجل هاي الحرب بينه الشراره
خدّامك يبو اليمّه او نضل رهن الاشاره

بس آمِر قِبلنه .. وانظر كل فعلنه
انته القائد او أحنه جنودك
نرخص سيّدي الغالي اعله مودك
‌▪️⁩‌▪️⁩‌▪️⁩‌▪️⁩‌▪️
هالصحبه عقد اي والعقد بالدم نوقعه
او كلمه انطينه يالوالي او أبد ما بيها رجعه
صوت اللي يحبّونك عله وانته التسمعه
حشِّمنه يبو اليمّه او تشاهد بينه فزعه

كل واحد يضدّك .. لا ما يخطي حدّك
نكسر كل رجل توصل حدودك
نرخص سيّدي الغالي اعله مودك
‌▪️⁩‌▪️⁩‌▪️⁩‌▪️⁩‌▪️
ما شفنه مثل شخصك ولا صار ابمثالك
وابنص الحرب هايه او بقه الدين اعله بالك
ما شفنه مثل طبعك ولا صار ابخصالك
ابطبعك منفرد يا سيّدي حتّه ابخيالك

يالنفسك كريمه .. تضحيتك عظيمه
خالد تبقه والضايع حسودك
نرخص سيّدي الغالي اعله مودك
‌▪️⁩‌▪️⁩‌▪️⁩‌▪️⁩‌▪️
اعلى امن السمه يبقه او يضل ما يطفه بدرك
يبقه سيّدي طول الازل أي عالي قدرك
الدين اللّٰه او نهج جدّك فده خلّيته عمرك
ضحّيت العمر يا سيّدي والجنّه أجرك

كل عمرك نطيته .. للباري هديته
والرب الشِكر لجله جهودك
نرخص سيّدي الغالي اعله مودك
‌▪️⁩‌▪️⁩‌▪️⁩‌▪️⁩‌▪️
ثابت هالوعد يا سيّدي او وحده المشاعِر
لو نُقتل عله نهجك نفوز ابجنّه باچِر
ننطيك العمر يا سيّدي او فدوه النواظِر
احنه الفائزين او كلمن ايعادينه خاسِر

يمضحّي ابمهجتك .. والفوز ابنصرتك
النه الجنّه وانطيت ابوعودك
نرخص سيّدي الغالي اعله مودك
‌▪️⁩‌▪️⁩‌▪️⁩‌▪️⁩‌▪️
دين الله يضل ثابت عدل بالغاضريّه
دين اللّٰه الاهم وانته التود هاي القضيّه
شامخ سيّدي تبقه او تضل يبن الحميّه
مثلك ما خلق رب السمه ابهاي الوطيّه

ناطي كل حياتك .. مرتاح ابمماتك
بالجنّه العذِب يسقينه جودك
نرخص سيّدي الغالي اعله مودك
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣هـ

#الليلة_السابعة 👇

#ابا_الفضل_العباس
‌▪️⁩‌▪️⁩‌▪️⁩‌▪️⁩‌▪️
زلزل الحومه
من علي اعلومه
يا أسد وابْن الاسد
‌▪️⁩‌▪️⁩‌▪️⁩‌▪️⁩‌▪️
گصد للحومه او اِجه ابراحة گلُب
چنّه ما داخِل ابو فاضِل حرُب
مبتسم والشافه مات امن الرعُب
المنّه شردوا واحد ابواحد يطُب

والعده خافت
هيبِته شافَت
يا أسد وابْن الاسد
‌▪️⁩‌▪️⁩‌▪️⁩‌▪️⁩‌▪️
اشمحله هالمنظر وابو فاضِل نزَل
اللّٰه يدري اشسوّه بيهم واشعِمَل
اتراجِعوا همّه وابو فاضِل حِمَل
هوّه ثابت والعده كلهم خلَل

الحومه فزّزها
والعده هزها
يا أسد وابْن الاسد
‌▪️⁩‌▪️⁩‌▪️⁩‌▪️⁩‌▪️
ابساعة الجاهُم وابو فاضِل نوه
چنّه حيدر هاجِم او بيده اللوه
خلّه ناس او خيل تترادم سوه
عن صدرهم لَن گطع حتّه الهوه

ما رحم بيهم
راد ينهيهُم
يا أسد وابْن الاسد
‌▪️⁩‌▪️⁩‌▪️⁩‌▪️⁩‌▪️
يا عظم قدره الولي وابْن الولي
صار بالطف نسخه من حيدر علي
شِدّه عالعسكر بعد ما تنجلي
ابسيفه خلّاهه العساكِر تنولي

ابچفّه يفرزها
او خبز يخبزها
يا أسد وابْن الاسد
‌▪️⁩‌▪️⁩‌▪️⁩‌▪️⁩‌▪️
من فعاله اتعجّبت حتّه السمه
ضربة العبّاس حتماً مؤلمه
من فِعاله اجيوشهم مو سالِمه
خلّه گاع الطف بحر من الدمه

اليمّه جاي ايموت
ضيفه ملك الموت
يا أسد وابْن الاسد
‌▪️⁩‌▪️⁩‌▪️⁩‌▪️⁩‌▪️
فرّق الاعداء بيده او سيفه هَد
مُهله ما ينطيهم الكافِل بعَد
اشحدهم العبّاس لو وجهه ارتعَد
واليموته ابسابع اجهنّم خِلَد

اليشرد احساسه
ينگطع راسه
يا أسد وابْن الاسد
‌▪️⁩‌▪️⁩‌▪️⁩‌▪️⁩‌▪️
من وصل عبّاس يم شاطي النهر
خاف حتّه الماي من عنده او حِذر
اهوايه خايف منّه من شافه خِزر
او بيده ذلّه الكافِل او مايه شُمر

والنهر هوّه
المنّه يتروّه
يا أسد وابْن الاسد
‌▪️⁩‌▪️⁩‌▪️⁩‌▪️⁩‌▪️
هذا ابو النوماس سبْع الگنطره
الخوف منّه ايخاف يا عالم تره
اليمّه يوصل هوّه يلزم منحره
والزلم عالموت لن لزموا سره

ابسيفه خزّاهُم
نسوه سوّاهم
يا أسد وابْن الاسد
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
ذي الحجّه ١٤٤٣ هـ

#الليلة_الثامنة 👇

#القاسم
‌▪️⁩‌▪️⁩‌▪️⁩‌▪️⁩‌▪️
صحت يابِن فاطِمه
عمري فدوه امقدّمه
او لجل عينك عندي عادي منّي لو سالت دِمه
‌▪️⁩‌▪️⁩‌▪️⁩‌▪️⁩‌▪️
شفتك ابحيره او دليلي صبره بالگوه اِمتلك
القاسِم ابْن الحسن آني سيّدي خادِم إلك
افتخُر ويّاك موتي او موتِتي لا تشغِلَك
خل اموت ابّين أيدك عمّي فدوه اتوسّلَك

ابگلبي ما ضل الصبُر
يمته دوري أنتظُر
روحي ملهوفه اعله موتي او بالصبُر متهدّمه
‌▪️⁩‌▪️⁩‌▪️⁩‌▪️⁩‌▪️
والِدي ضمني او ذخرني للطفوف ابكربله
ارخصني يا عمّي ادافع عنّك او عالعايِله
ما أخاف او عندي سهله وللّه هاي المسأله
وللّٰه لجلك موتي عادي ماهي صعبه او مُذهِله

تدري باحساس المُحِب
ريته موتي يقترِب
واني خايف ترفض انته او گلبي بسهام انرمه
‌▪️⁩‌▪️⁩‌▪️⁩‌▪️⁩‌▪️
يصبح ابموتي انتصاري بالقتِل عندي الامَل
صعبه انته ابلا مُناصِر واني اتنفّس اضَل
ليّه وافُقلِي الفرحتي او گلبي يفرح بالاجَل
الموت تدري وي نصرتك عندي احله امْن العسَل

إلك يا إبْن الطهُر
فدوه خلّيته العمُر
ارد اقاتِل عمّي دونك شَجّعتنِي الموزِمه
‌▪️⁩‌▪️⁩‌▪️⁩‌▪️⁩‌▪️
عمّي عد عيناك آني اليرتجف منّي الرعب
ريشه مو سيف البديّه واني فنّان الحرب
ابحيدر اني راح اذكرك للحرب لمّن أطُب
ابصارمِي كلمن اضربه گبل لجهنّم يطُب

روحي غيره تمتلي
من انادي يا علِي
راح يهجِم آنا احسّه اوياي حمّاي الحِمه
‌▪️⁩‌▪️⁩‌▪️⁩‌▪️⁩‌▪️
ابنصرِتك موتي عشگته او صار بعيوني المُهِم
ابمقتَلِي ايصير اِنتصاري او بيْه افرح وابتسِم
الحومه مِن طبّيت بيها والگلُب شايِل عزِم
سيفي بس لوّحته بيدي نسوه صاروا مو زلِم

ما يگدرون ايخسَه
مو زلِم كلهُم نِسه
كلها نسوان انظُر الها بالعده ماكو ازلِمه
‌▪️⁩‌▪️⁩‌▪️⁩‌▪️⁩‌▪️
زلمه نشمي وابن نشمي يختلِف كل عالمِي
حيدري عزمي اشوفه او صبري صايِر فاطمِي
انته ابويه وانته عمّي والك يحسين انتمِي
ارتوي ابحبّك تراني لو شفِت گلبي ضَمِي

كلمن ايعوفك هِلَك
روحي ناذرها إلَك
او شوفة اعيونك تراهه سيّدي تروي الضمه
‌▪️⁩‌▪️⁩‌▪️⁩‌▪️⁩‌▪️
اعرف اعليكم صعوبه لو طحِت فوك الثره
المثلي مِن ينظُر شبابه الدنيْه تحله ابناظِره
العمُر واحِد آنا ادري الموت هم واحِد تره
الموته وي واحِد مِثالَك يعم كلها مفخره

مو مهم عندي الاجل
لا يبِن خير العمَل
الموت چن حنّة زفافي ابعگلي هذا راسِمه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
محرّم ١٤٤٤ هـ