الليالي الفاطميه ١٤٤٣_٢٠٢٢
الروايه الثالثه 👇

كأني بمولاتي فاطمه عليها السلام اعتذر منها بابها على ماجرى وردّت عليهِ
‌▪️⁩‌▪️⁩‌▪️⁩‌▪️⁩‌▪️
معذور يا بابي .. يا حامي احبابي
دفعوك الاصحاب
مو انته يا باب.. معذور يا بابي
‌▪️⁩‌▪️⁩‌▪️⁩‌▪️⁩‌▪️
باب الاصل انته نعم وانعرفه احنه
باب وابد مارد شخص خايب تعنّه
ابچف انطرق بابي وشفت طرقه رعبنه
مو چف فقير الّي طرق هالطرقه چنّه

طرقة غضب چانت .. وابروحي ما هانت
ضل وضعي مرتاب
مو انته يا باب.. معذور يا بابي
‌▪️⁩‌▪️⁩‌▪️⁩‌▪️⁩‌▪️
يا حامي آل المصطفى سيْد البريّه
بيك احتميت امن اعتنوا ولد الرديّه
خلفك چنت من اندفع ثگلك عليّه
واحجابي ماكو وعالوجه حطّيت اديّه

بچفوفي اتستّر .. واللوعه تتحظّر
گلبي ابحزن ذاب
مو انته يا باب.. معذور يا بابي
‌▪️⁩‌▪️⁩‌▪️⁩‌▪️⁩‌▪️
اني الزچيه واعرف ابروحك وامرها
وضعك كئيب وشاركِت روحي ابكسرها
ما ينّسي فضلك عله الرضّوا صدرها
باب وچنت للطاهره احجاب وسترها

باب وحميت اهلك .. واتستروا ابضلّك
انته الي احجاب
مو انته يا باب.. معذور يا بابي
‌▪️⁩‌▪️⁩‌▪️⁩‌▪️⁩‌▪️
يا باب اريدك لو غداً نكروا حچيهم
ماريدك اتضل ساكت ولا تعفي بيهم
عالدفعوا ابثگلك عله اضلوعي بديهم
افضحهم ابيوم الحشُر أشر عليهم

هذا الامُر حاسم .. أشّر عله الظالم
يالشفت المصاب
مو انته يا باب.. معذور يا بابي
‌▪️⁩‌▪️⁩‌▪️⁩‌▪️⁩‌▪️
انته التصد الفاطمه وتنظُر دمعها
انته اعلم ابكلشي جره وتدري ابوضعها
تشهد ردت كونك عله الچف الصفعها
يوم الحشُر أشّر عله الكاسر ضلعها

لا تبقه بالسكته .. اشّر عله الشفته
من عندك اِجواب
مو انته يا باب.. معذور يا بابي
‌▪️⁩‌▪️⁩‌▪️⁩‌▪️⁩‌▪️
انته الشفت كلمن هجم زيّد ونيني
لا ماصحت حيدر صحت فضّه اسنديني
كسرولي ضلعي وهم بعد سطرولي عيني
يوم الحشُر اشهد عله الطيّح جنيني

يالتعرف ابحزني .. انته الشفت ابني
طايح بالاعتاب
مو انته يا باب.. معذور يا بابي
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
جمادي الاول / ١٤٤٢هـ

كأني بـ لسان حال مولاتي زينب ع بعد رحيل امها الزهراء ع
‌▪️⁩‌▪️⁩‌▪️⁩‌▪️⁩‌▪️
امي وي فرگاها .. عمري راح اوياها
راحت وزاد الكسُر
مو حلو صار العمُر
‌▪️⁩‌▪️⁩‌▪️⁩‌▪️⁩‌▪️
ليله مو سهله وحزينه .. وشاهدت بيها الاذيه
وانظر ابعيني المصيبه .. والحزن داير عليه
زادت اجروح ابدليلي .. والالم والحسره بيّه
هالمسيّه ماتت امي .. فاطمه الزهره الزچيه

ودّعت افراحي .. وهم تزيد اجراحي
گلبي بالهم منفطُر
مو حلو صار العمُر
‌▪️⁩‌▪️⁩‌▪️⁩‌▪️⁩‌▪️
راحت الزهره الحبيبه .. وراحت الفرحه معاها
ظلمه صار الدار اصدّه .. من شفت سافر ضواها
مختنگ صدري بعدها .. واني اتنفّس هواها
ريته ياخذني اليّه .. بلكَت الموت الخذاها

يجري مدمع عيني .. من وفاة اسنيني
چم جرح گلبي يطُر
مو حلو صار العمُر
‌▪️⁩‌▪️⁩‌▪️⁩‌▪️⁩‌▪️
بارد البيت افگدها .. راحت وبيّن ظلامه
راحت امي من سفرها .. اخذت اوياهه السلامه
والفرح من ماتت امي .. شفته راح وشد حزامه
ومن بعد عيناهه تالي .. انكمّل الدنيه يتامه

ابلايه ام ضلّينه .. والفگد ياذينه
اشينفع اويانه الصبُر
مو حلو صار العمُر
‌▪️⁩‌▪️⁩‌▪️⁩‌▪️⁩‌▪️
راحت الزهره وبعدها .. بالگلب حسره چبيره
واليتم خيّم عليّه .. وانيْ ابعمري زغيره
فاطمه هذا فگدها .. شلون احمّله ولله حيره
گلبي للهم والمصايب .. والحزن يصبح مصيره

ويّه امي الليله .. گلبي رايح حيله
داخلي يسعر جمُر
مو حلو صار العمُر
‌▪️⁩‌▪️⁩‌▪️⁩‌▪️⁩‌▪️
چم سهم من دهري اني .. گلبي بالدنيّه يصيبه
منهدم كل حيلي منّي .. من مشت أمّي الحبيبه
ماتهيد ابروحي ضلّت .. تچوي جمرات المصيبه
والصبُر ليّه بعدها .. من بعدها منين اجيبه

من مشت ياويلي .. ما أنام ابليلي
چم جرح بيّه يمُر
مو حلو صار العمُر
‌▪️⁩‌▪️⁩‌▪️⁩‌▪️⁩‌▪️
ابگلبي من الفرگه يلهب .. ماخُمد لاوللّه جمري
بهذا عمري هذا زغري .. چم جرح راواني دهري
ازغيره عالدنيه بعدني .. وشفته بيّن بيّه كسري
خمسة اسنين ابحياتي .. بيّه لكن محني ظهري

خمسه بس اعوامي .. وشفت موت ايّامي
عمري مو مال الهجُر
مو حلو صار العمُر
‌▪️⁩‌▪️⁩‌▪️⁩‌▪️⁩‌▪️
راحت الفرحه شفتها .. وبالگلُب نيراني تلهَب
باچر ابضيم المصايب .. گلبي بالهم ايْتعذّب
زينب اني واللّه يدري .. چم رزيّه تصدها زينَب
اللّه يستُر من زماني .. چم مصيبه منّه تنصَب

راح اشاهد هَضمي .. باچر انظُر هَمّي
لحَد ما نام ابگبُر
مو حلو صار العمُر
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣ _٢٠٢٢

كأني بـ الامير ع بعد مرور سنه على موت حبيبته الزهراء ع
‌▪️⁩‌▪️⁩‌▪️⁩‌▪️⁩‌▪️
مرّت سنه الزهره عله فرگاهه
الفرحه بعدها بالله وين الگاهه
الفرح ميْرد اليّه
بعد موت الزچيّه
‌▪️⁩‌▪️⁩‌▪️⁩‌▪️⁩‌▪️
راحت الزهره ومشه وياهه الفرح
من مشت عني أنه گلبي انجرح
عمري ظلمه ابلايه عيناهه صُبح
ومن بعدها الحيل من عندي انطرح

محني وبعدهه ما تعيد اجروحي
من يوم ماتت ريت طلعت روحي
الحياة اشتسوه هيّه
بعد موت الزچيّه
‌▪️⁩‌▪️⁩‌▪️⁩‌▪️⁩‌▪️
من بعدهه فاطمه ظهري انكسر
صرت اشوف الدنيه آلام وخطر
زيّد آلامه عله آلامي الدهر
واعله فرگاهه دمع عيني مُطر

احلامي غابت هيّه لمّن غابت
ماتت فرحتي اوياهه لمّن ماتت
شفت كل الرزيّه
بعد موت الزچيّه
‌▪️⁩‌▪️⁩‌▪️⁩‌▪️⁩‌▪️
هذي أول سنه ابفرگاهه تمُر
واني كُل ليله التمُر بيّه انكسُر
اوياهه راحت فرحتي الوسط الگبُر
لهسّه من فرگاهه ظهري منكسُر

لمّن مشت ويّاهه اخذت حيلي
من فارگتها گوّه انام ابليلي
الحزن خيّم عليّه
بعد موت الزچيّه
‌▪️⁩‌▪️⁩‌▪️⁩‌▪️⁩‌▪️
صارت الدنيه حزينه ومؤلمه
من مشت عنّي الزجيه فاطمه
دمعي من عيني بقه يهمل دمه
چم سهم يا ويلي دلّالي انرمه

أيامي حسره وراح نور اعيوني
الچانوا صحابه ابفاطمه أذّوني
شفت كل الاذيّه
بعد موت الزچيّه
‌▪️⁩‌▪️⁩‌▪️⁩‌▪️⁩‌▪️
چنت ويّه الزهره متعاهد نضَل
ما يفارگنه شخص طول الازَل
لچن من الصار لن عقلي انذهَل
قتلوا احلامي ودمع عيني نزَل

حرموني منها وزيّدولي احزاني
راحت حبيبة روحي والهم جاني
الفرح ماباقي بيّه
بعد موت الزچيّه
‌▪️⁩‌▪️⁩‌▪️⁩‌▪️⁩‌▪️
فاطمه لمّن مشت زاد الهظُم
ومن بعدها الدنيه هم ما تنهظُم
ليش من عند الزچيه انحرُم
الحملت الاحزان من چف اللؤُم

زهرة حياتي ابيا ذنب مقتوله
وابروحي نيران الفگد مشعوله
بقت ناري سريّه
بعد موت الزچيّه
‌▪️⁩‌▪️⁩‌▪️⁩‌▪️⁩‌▪️
هذي أوّل سنه ابحسرتها ترِن
من بعدها فاطمه زاد الحزِن
اني ذاك الشلِت خيبر عالمتِن
هسه ما بيّه اكُف حتّه الردِن

من ادفنتها بيّنت احزاني
هدلَت اديّه وما تكُف ارداني
بقت ترجف اديه
بعد موت الزچيه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣ / ٢٠٢٠

قصائد وفاة السيدة الجليله الطاهره
أم البنين عليها السلام ١٤٤٣_ ٢٠٢١ 👇

‌▪️⁩‌▪️⁩‌▪️⁩‌▪️⁩‌▪️
فاطمه أول لقاء ابفاطمه
نصبن المأتم سوه فوگ السمه
هيّه والزچيه .. جلسه فاطميه.. فوگ السمه
‌▪️⁩‌▪️⁩‌▪️⁩‌▪️⁩‌▪️
فاطمه الليله التقت ويّه الحبيبه
والغريبه تنحب اگبال الغريبه
گعدن وعقدن سوه بهاي المصبيه
مأتم الهن بالسمه عالي نحيبه

گعدن وبيهن ولا ضل الصبُر
وحده تنعه وثانيه اتدگ الصدُر
صارت المسيّه .. جلسه فاطميه.. فوگ السمه
‌▪️⁩‌▪️⁩‌▪️⁩‌▪️⁩‌▪️
گعدت ام الاربعه ويّه الحنينه
كل گلب عدهن ولا يگطع ونينه
تنتحب ام الوفه وهيّه حزينه
عالبقه فوگ التراب امگطعينه

صاحت ام الاربعه بهذا الوضع
خلّي نبچي اعله الحبيب المنصرع
بانت الرزيه .. جلسه فاطميه.. فوگ السمه
‌▪️⁩‌▪️⁩‌▪️⁩‌▪️⁩‌▪️
وحده تنعه اعله المشه وتهمل دمعها
لجله ضحّت اربعه وموته فجعها
وحده تلطم خايفه لو فز وجعها
لأن فد واحد نذل كاسر ضلعها

يبچن ومن عدهن الحيل انهدم
اتشاركن نفس المصيبه والالم
فاجعه واذيّه .. جلسه فاطميه.. فوگ السمه
‌▪️⁩‌▪️⁩‌▪️⁩‌▪️⁩‌▪️
تنتحب بالفاجعه إگلوب الكسيره
اتشاركن نفس الجراحات الچبيره
ويلي يحسين الولي اتنادي الاميره
والزچيه اتنادي يا بدر العشيره

وحده صاحت ويلي ويلي اعله الگمر
وحده صاحت آ يمگطوع النحر
اتشاركن سويّه .. جلسه فاطميه.. فوگ السمه
‌▪️⁩‌▪️⁩‌▪️⁩‌▪️⁩‌▪️
هسه لو تحضرهن الحرّه العقيله
تكمل الجلسه بالاحزان الثجيله
أگلوب مفجوعه وبده يكبر عويله
منهن المدمع يضل جاري مسيله

جلسه لو زينب تجيهن تكتمل
تحضر الحرّه المشت فوگ الهزل
تحضر السبيه .. جلسه فاطميه.. فوگ السمه
‌▪️⁩‌▪️⁩‌▪️⁩‌▪️⁩‌▪️
صاحت الزهره يبو فاضل يذخري
يمّه ويلي اعليك يامن حامي خدري
وصاحت ام الاربعه ودمعتها تجري
ريته اني المنگطع يا يمّه نحري

صاحت الحرّه ابگلبها المنجرح
خلّي نبچي عالصريع المنذبح
باقي عالوطيه .. جلسه فاطميه.. فوگ السمه
‌▪️⁩‌▪️⁩‌▪️⁩‌▪️⁩‌▪️
تحچي ام الاربعه ويّه الزچيه
اتگلها يا أم الحسن ارضي عليّه
اني ضحّيت الولد كلهم هديّه
فدوه لعيونچ يبت سيْد البريّه

تحچي ويّاهه ابعيون الدامعه
فدوه لعيونچ أنه والاربعه
ودمعتي الجريّه .. جلسه فاطميه.. فوگ السمه
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣ _ ٢٠٢٢

مُتَبْارِكِيْن بِوِلَادَة السَّيِّدَة الطَّاهِرَة الطَهُوْرَه الْعَظِيمَةُ الوقُوْرَه سَيِّدِةُ الْكَوْنَيْن فَاطِمَةَُّ الزَّهْرَاءِ عَلَيْهَا السَّلَام
. .
نَسْأَلُ اللَّهَ بِحَقٍّ هَذِهِ اللَّيْلَةِ الْمُبَارَكَةِ أَنْ تُقْضِيَ حَوَائِجَكُم وتُشَافِي مَرَضَاكُم

متباركين بولادة سيدنا ومولانا الامام علي بن ابي طالب عليه السلام

⁦▪️⁩⁦▪️⁩⁦▪️⁩⁦▪️⁩⁦▪️
اني زينب والحزن بيه يعيش
المصايب والدهر عذبوني
ابد ما حسّبت اي لحظه اشوف
اخوتي وكل الاهل عافوني
⁦▪️⁩⁦▪️⁩⁦▪️⁩⁦▪️⁩⁦▪️
انتظر وادري اخوتي ما يجون
بس انادي هلبت ايحضروني
زحمه اني ابلا أهل تالي اموت
وحدي صعبه الغربه لو نظروني
⁦▪️⁩⁦▪️⁩⁦▪️⁩⁦▪️⁩⁦▪️
ردت اكّحل عينْي ابشوفة عزيز
گبل ما تغمض ابموتي اعيوني
عازة الخوّان عازه شي اكيد
واني اخوتي ابمحنتي تركوني
⁦▪️⁩⁦▪️⁩⁦▪️⁩⁦▪️⁩⁦▪️
أيّست من جيّة اخواني وبچيت
ما شفتهم لا ولا شافوني
واني ويّاهم شگد عندي كلام
ردت اعاتبهم لچن ماجوني
⁦▪️⁩⁦▪️⁩⁦▪️⁩⁦▪️⁩⁦▪️
ردت اسولف للحُسين اعله المصاب
ردت اگلّه اهل الغدُر حاطوني
ردت ابو فاضل يشوف البيّه صار
ليش لچفوف الشمر سلموني
⁦▪️⁩⁦▪️⁩⁦▪️⁩⁦▪️⁩⁦▪️
ردت اسوف للكفيل اعله الجروح
والعده بغيابه ما رحموني
من رحتله للشريعه وگلبي نار
يرضه بغيابه العده ضربوني
⁦▪️⁩⁦▪️⁩⁦▪️⁩⁦▪️⁩⁦▪️
تالي عافوني وبقه بس العليل
من بعد ما طاحوا اليحموني
دمعي يجري والخيم مشتعله نار
والعده ابموت اخوْتي ياذوني
⁦▪️⁩⁦▪️⁩⁦▪️⁩⁦▪️⁩⁦▪️
بالسبي شفت المصايب والعذاب
عله الناگه امچتّفه ايصعدوني
ردت ابو فاضل يجي من كربلاء
من يجي ينظُر سواد امتوني
⁦▪️⁩⁦▪️⁩⁦▪️⁩⁦▪️⁩⁦▪️
ردت كل اخواني لو حان الممات
حتّه اموت واخوتي ايشيعوني
نعشي ينشال ابچفوف اخواني ريت
وعالتراب ابچفهم ايدفنوني
⁦▪️⁩⁦▪️⁩⁦▪️⁩⁦▪️⁩⁦▪️
بعدكم كل حزن گلبي.. ولا هاد
يخوتي والجمر بيّه.. ولا هاد
دمع عيني الجره احمر.. ولا هاد
سنه ونص اني دمعاتي جريّه
....
سنه ونص اني دمعاتي.. تهل دم
عليكم يالـ تركتوني.. تهل دم
الدموع ومتني يخواني.. تهل دم
سوط الشمر بمتوني أذيّه
⁦▪️⁩⁦▪️⁩⁦▪️⁩⁦▪️⁩⁦▪️
ابو الحسن الوائلي
١٤٤٣ _ ٢٠٢٢

قصائد وفاة الشيخ المؤمن ابو طالب
رضوان الله عليه 👇

وفاة ابو طالب عليه السلام
⁦▪️⁩⁦▪️⁩⁦▪️⁩⁦▪️⁩⁦▪️
شلون اوصفك ياصعُب فوك المصاعب
ما شفتلك ثاني مثلك يابو طالب
ماكو اكثر .. يابو حيدر
⁦▪️⁩⁦▪️⁩⁦▪️⁩⁦▪️⁩⁦▪️
يا سيْد الحموله هيبه انته وعلَم
من قبل الرساله ما سجدت الصنَم
بعيونك تعدها الدنيْه كلها عدَم
بس انته الحقيقه واليضدّك وهَم

يا قضيّه بالوفاء وكلّه غيره
والجهنّم كلمن ايضدّك مصيره
ماله معبر .. يابو حيدر
⁦▪️⁩⁦▪️⁩⁦▪️⁩⁦▪️⁩⁦▪️
يا نور الحقيقه يا أصل كل أصِل
يا اصلْ السلامه يا صعُب عالسهِل
الشخصك ما لگينه يابو طالب مثِل
ما خالق مثيلك يا بدُر مكتمِل

والمقامك اي شخص ماشفنه واصل
طاهر انته بالسمه وعالتربه نازل
انته اكبر .. يابو حيدر
⁦▪️⁩⁦▪️⁩⁦▪️⁩⁦▪️⁩⁦▪️
ها يابو الحميّه ابمكّه دورك ثبَت
ما توصل مقامك سيّدي الحاولَت
ما توفْي بِذرّه العنّك اتحدثَت
عامود الامامه منك انته بدَت

الله شائك يا عظيم ابكل سلامه
منك انته سيّدي اتصير الامامه
الله قدّر .. يابو حيدر
⁦▪️⁩⁦▪️⁩⁦▪️⁩⁦▪️⁩⁦▪️
علّه الباري قدرك سيّدي يا ولي
دورك عِد الهٰك واضح ومفصلي
تكفل دينه ويّه المصطفى وما يلي
بالكعبه الشريفه انطاك حيدر علي

ابّيته هوّه خلّه ابنك نوره ظاهر
انته طاهر حتّه ابنك صار طاهر
يا مطهّر .. يابو حيدر
⁦▪️⁩⁦▪️⁩⁦▪️⁩⁦▪️⁩⁦▪️
ابدين الله وعظمته انته اسمك مهِم
رايك يعله كلشي يابو راي الحسِم
ابطاريك المعاني بالعقل تزدحِم
منّك يابو حيدر سيّدي والنعِم

منّك انته والنعم يابو الحموله
للعقيده دورك ابدور البطوله
دورك المَر .. يابو حيدر
⁦▪️⁩⁦▪️⁩⁦▪️⁩⁦▪️⁩⁦▪️
يا شيخ الغوالب يا كفيل النبي
مؤمن بالرساله غصُب عالناصبي
وضّحت ابقرارك گلت اني الابي
گلت اني محمّد سيّدي ومذهبي

يا شراره عاليضدّون الرساله
واليهمّك سيّدي فرض العداله
منك انقَر .. يابو حيدر
⁦▪️⁩⁦▪️⁩⁦▪️⁩⁦▪️⁩⁦▪️
القائل انته كافر هوّه أصله جهَل
بيك اشما يدوّر ما يشاهد خلَل
طعنوا في مقامك بس ختام الجدَل
العنّك يحچي عنده لا شغل لا عمَل

واليحاول سيّدي ابطاري يجيبك
من سهامه اي سهم لا ما يصيبك
انته جوهر .. يابو حيدر
⁦▪️⁩⁦▪️⁩⁦▪️⁩⁦▪️⁩⁦▪️
ابو الحسن الوائلي
١٤٤٣ _ ٢٠٢٢

الولادات الشعبانيه 👇

⁦▪️⁩⁦▪️⁩⁦▪️⁩⁦▪️⁩⁦▪️
چم گُمر .. هالشهر
شعّت انواره البهيّه
⁦▪️⁩⁦▪️⁩⁦▪️⁩⁦▪️⁩⁦▪️
نور الحُسين الليّ طلع ابّيت النبي نوره حصل
فوگ الارض بان وركَد فوگاهه هوّه من نزل
ابنوره ايتشرّف هالشهر هذا الشهر بيْه ابتهل
ابتشرت ابجيْته فاطمه والمصطفى وخير العمل

نوره شع .. هم سطع
ابمنزله السيْد البريّه
⁦▪️⁩⁦▪️⁩⁦▪️⁩⁦▪️⁩⁦▪️
بيت الرساله ابطلعته لن الفرح بيْه اندفع
رابع ايّامه هالشهر نبراس ابو فاضل سطع
بيوم اربعه بيته علي صوت الفرح منّه انسمع
وازدهرت الدنيه ابورد من نور ابو فاضل طلع

لن ظهَر .. هالگُمَر
من ظهر حامي الحميّه
⁦▪️⁩⁦▪️⁩⁦▪️⁩⁦▪️⁩⁦▪️
خامس ايّامه من وصل ابزين العباد اللّي ابتشر
السجاد نوره من صُبح اتشرّف ابنوره هالشهر
نوره وصل حد العرش والعرش من نوره انبهر
السجّاد لو ما طلعته محّد سجد من البشر

بالفرض .. عالارض
نوره بيّن عالوطيّه
⁦▪️⁩⁦▪️⁩⁦▪️⁩⁦▪️⁩⁦▪️
الحادي عشر من الشهر الاكبر ازدهرت وردتِه
ماكو ابجماله وما حصل چنّه محمّد صورِته
هيبة محمّد من طلع ابكاروكه بينت صفنِته
قرآن نايم بالمهد مو ولد من گد هيبِته

والِده .. ايشاهِده
وفرحِته اعظمها هيّه
⁦▪️⁩⁦▪️⁩⁦▪️⁩⁦▪️⁩⁦▪️
رابع عشر هذا الشهر بيْه ايتشرّف كل زمَن
ابّيت النبي البسمه تهِل والفرحه تتعاله ابشجَن
والحسن يوم اربعطعش ادموع الفرح منّه حِچَن
فرحان هوّه من انرزق بالقاسم اوليده الحسَن

المجتبه .. ايلاعِبه
جيّته ورده وزهيّه
⁦▪️⁩⁦▪️⁩⁦▪️⁩⁦▪️⁩⁦▪️
ابخامس عشر من الشهر تفرح الدنيه وتزدهُر
من بيت ابو زينب طلع آخر إمام من الطهُر
شِبل الحسن نوره ازدهر والفرحه تعله وتستمُر
واتعلّت اصوات الفرح من انولد راعي الامُر

نوره هل .. واكتمل
القائم ونفسه الابيّه
⁦▪️⁩⁦▪️⁩⁦▪️⁩⁦▪️⁩⁦▪️
ابو الحسن الوائلي
١٤٤٣ _ ٢٠٢٢

هوسات شعبانيه
⁦▪️⁩⁦▪️⁩⁦▪️⁩⁦▪️⁩⁦▪️
إحسين الوالي هذا اليوم بيّن للبشر نوره
صوّر شكله رب الكون طهور وطاهر الصوره
مو أي بشر هذا إحسين سوره وطلع من سوره

امن الكوثر شعّت انواره
⁦▪️⁩⁦▪️⁩⁦▪️⁩⁦▪️⁩⁦▪️
زاهر نوره فوك الگاع وبيْه الدنيه فرحانه
خجلان الورد خجلان منّه وضام اغصانه
الشمس غابت بهذا اليوم لأن من نوره خجلانه

ضوّه الدنيه وكل شيّ بيها
⁦▪️⁩⁦▪️⁩⁦▪️⁩⁦▪️⁩⁦▪️
ابو الحسن الوائلي
١٤٤٣ _ ٢٠٢٢

هوسات شعبانيه
‌▪️⁩‌▪️⁩‌▪️⁩‌▪️⁩‌▪️
هلال من السمه السبعه لن فوگ الارض نازل
أوّل ما نزل للگاع لن أصبح كُمر كامل
ابنص منزل علي الكرّار انولد هاليوم ابو فاضل

وانولدت ويّاه الغيره
‌▪️⁩‌▪️⁩‌▪️⁩‌▪️⁩‌▪️
نزل هاليوم ابو فاضل والغيره انزلت ويّاه
الله من الزغُر عباس كفّال الخدر خلّاه
زينب شاهدت شكله تصدله وشافته اشمحلاه

فرحانه وتنظر للكافل
‌▪️⁩‌▪️⁩‌▪️⁩‌▪️⁩‌▪️
ما تغمض اعيونه ابليل ولا عين الگمر تغفه
اذا ما يلزم العبّاس عباية زينب ابچفّه
ابيّد زينب ابو النوماس تربّه صاحب الكلفه

واترعرع هوّه ابأيديها
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣ _ ٢٠٢٢

ابخامس عشر من الشهر تفرح الدنيه وتزدهُر
من بيت ابو زينب طلع آخر إمام من الطهُر
شِبل الحسن نوره ازدهر والفرحه تعله وتستمُر
واتعلّت اصوات الفرح من انولد راعي الامُر

نوره هل .. واكتمل
القائم ونفسه الابيّه
....
يا صاحب الزمان 🤍

#خديجة_الكبرى
‌▪️⁩‌▪️⁩‌▪️⁩‌▪️⁩‌▪️
خديجه الفگد يكتل
ابوداعچ جروح احمل
دموعي بقت تهمل.. يروحي
‌▪️⁩‌▪️⁩‌▪️⁩‌▪️⁩‌▪️
خديجه فرگتچ صعبه تهدّم حيلي من عندي
ابوداعچ يا بعد روحي احس كلشي صبح ضدّي
ينور اعيوني لو رحتي اضل ويّه الحزن وحدي
ابد ما تنتهي احزاني ابوداعچ ولله لو تبدي

دمعتي تصُب حمره
حياتي صفت كسره
نويتي عله السفره.. يروحي
‌▪️⁩‌▪️⁩‌▪️⁩‌▪️⁩‌▪️
خديجه الدنيه تدريها أبد ما ترحم ابكسري
صعوبه لو عشت بيها وحيد او حاير ابـ أمري
المواجع تتّضح كلها حزين او ما يضل صبري
بعد ما تسوه من دونچ حياتي يا بعد عمري

حياتي بعد موتچ
حزينه بلا صوتچ
تشاهد حزن روحچ.. يروحي
‌▪️⁩‌▪️⁩‌▪️⁩‌▪️⁩‌▪️
صبرتي عالحزن والهم او تحملّتي الهضم انتي
حزام ابظهري كل لحظه الي يا طاهره چنتي
جهادچ بيّن الدينچ صبوره او كل الم شفتي
دفعتي اموالچ او كلشي لجل دين الله دافعتي

نطيتي شكو عندچ
واخذتي رضا ربّچ
طهوره او نقي گلبچ.. يروحي
‌▪️⁩‌▪️⁩‌▪️⁩‌▪️⁩‌▪️
تقاسمنه العمر احنه معاناة او جروح او هم
أبد ما لحظه عفتيني اذا شفتيني اتألّم
تروحين او تعوفيني الزمن تدرينه ما يرحم
كسير او مابقه حيلي ابوداعچ حيليْ اتهدّم

ابرحيلچ رحل حيلي
الدمعتي صحت سيلي
نهاري شِبه ليلي.. يروحي
‌▪️⁩‌▪️⁩‌▪️⁩‌▪️⁩‌▪️
اماني او مخزن اسراري الذي ابكلشي احاجيها
اشوف الدنيه بفراگچ ظلام او كلشي ما بيها
حياتي هايه من بعدچ ولا واحد يحلّيها
اشاهد بيها بس لوعه الفرح لا ما يرد ليها

وجودي الي او درعي
الوداعچ نزل دمعي
تغيّر انه وضعي.. يروحي
‌▪️⁩‌▪️⁩‌▪️⁩‌▪️⁩‌▪️
محمّد مختلف بعدچ ابدليله تستعر ناره
محمّد من بعد نورچ ظلام ايخيّم ابداره
يريتچ لو تصد عينچ محمّد تنظر اخباره
اذا عينچ تصد حالي دموعچ تبقه تتجاره

لونّچ تشوفيني
أضن ما تعرفيني
دمعتچ تواسيني.. يروحي
‌▪️⁩‌▪️⁩‌▪️⁩‌▪️⁩‌▪️
ابو الحسن الوائلي
١٤٤٣ _ ٢٠٢٢