لسان حال سيدتي ومولاتي رقيه بنت الحسين ع بعد رؤية رأس ابيها في الطشت
‌▪️⁩‌▪️⁩‌▪️⁩‌▪️⁩‌▪️
راسك ابوسط الطشت
شفته يا بويه ونحت
ما دريت ابموتك اشصار ابـ رقيه
‌▪️⁩‌▪️⁩‌▪️⁩‌▪️⁩‌▪️
بويه تدريني ابغيابك عيني شافت چم جرح
منذبح گلبي يغالي من لگيتك منذبح
شفتك اعله الغبره دامي عالترايب منطرح
من رحل نورك عليه ظلمه انظُر كل صبح

ولله عاشرت الهضُم
ما رحم سوط الظلم
ظهري ازرگ بويه من إسياط اميه
‌▪️⁩‌▪️⁩‌▪️⁩‌▪️⁩‌▪️
يالعفتني ابلايه والي گلبي بعدك منهدم
عيني شافت چم مصيبه وانته ماعندك علم
بويه تلچم گلبي اكثر تدري نظرات الزلم
بويه نيتهم خبيثه النيّه لا ما تنفهِم

ودعتني ابكل قهر
گلبي بجفاك انكسر
اربع اسنين وصرت بعدك سبيه
‌▪️⁩‌▪️⁩‌▪️⁩‌▪️⁩‌▪️
ياهو مثلي اتشوف ابوها عالترب عظمه يطگ
ياهو مثلي اتشوف ابوها جسمه ذابل بالسحگ
ياهو مثلي اتشوف ابوها چم جرح شاهد صدگ
ياهو مثلي اتشوف ابوها اسهام بي نزلن رشگ

ياهو مثلي امحيّره
اتشوف ابوها ومنحره
وجسم ابوها منسحگ بالاعوجيه
‌▪️⁩‌▪️⁩‌▪️⁩‌▪️⁩‌▪️
بويه دمع الشوگ يجري عالوجن دمعي همل
اربع اسنين ابحياتي واحلف ابشيبي اضَل
بويه ياذيني ضربهم للعظم طگهم وصَل
متني اسود من ضربهم بالضرب دمّي نزَل

امتوني تعرف ورّمت
سوده يا بويه بقت
اسياط خشنه وكلهن اندارن عليه
‌▪️⁩‌▪️⁩‌▪️⁩‌▪️⁩‌▪️
تدري من يوم العفتني بيّه ضل يلهب جمُر
بويه مشتاگه ارد اشوفك روحي ملّت بالصبُر
يالرحت عنّي وعفتني تدري طعم الفرگه مُر
ودعتني ودمعي يجري گلبي بعدك منفطُر

يالرحت گلبي انجرح
اوياك ودّعت الفرح
بويه تلچمني جروح الغاضريه
‌▪️⁩‌▪️⁩‌▪️⁩‌▪️⁩‌▪️
بويه بعدك چم رزيه عيني شافت من رحت
تدري يالغالي ابرحيلك من رحت عنّي متت
بويه چم لوعه ابوداعك تدري بغيابك شفت
من الطفوف ومن ذبحتك گوّه يابويه عشت

حيلي بالهم منهدم
شفتك ابهذا الحلم
شوفتك نسمة هوه لو تمضي بيه
‌▪️⁩‌▪️⁩‌▪️⁩‌▪️⁩‌▪️
بالحلم شفتك يبويه وگتلي اگعدي راح امُر
واني فزّيت ابلهفتي وگلبي مل من الصبُر
صوتي يندب وين ابويه گلبي بالهم منكسُر
بالطشت راسك اشوفه والجرح بيّه يمُر

شفتك ودمعي يصُب
زرگه شفتك بالضرُب
شفتك ووصلتني يابويه المنيه
‌▪️⁩‌▪️⁩‌▪️⁩‌▪️⁩‌▪️

ابو الحسن الوائلي
٢٠٢١/ ١٤٤٣

يا سيدي چبدك تفطّر بالسم
ابسم الحقد حيلك اشوفه اتهدّم
بيك المآسي والمواجع تلتم

بيدك تجرّعت الموت
والهم چبير ابروحك
⁦▪️⁩⁦▪️⁩⁦▪️⁩⁦▪️⁩⁦▪️
سّم الحقد يسري اعله گلبك مولاي
شفت الحزن شفت الجراحات اهواي
رادوا ينشفونك لأن انته الماي

جعده وحقدها المدفون
سمها الاليم ايلوحك
⁦▪️⁩⁦▪️⁩⁦▪️⁩⁦▪️⁩⁦▪️
شفت المواجع والحزن زايد بيك
سم الحقد صاير تلوب امخلّيك
مهما حصل حتّه الاجل ما يمحيك

ذكرك يضل ابكل حين
عدله تضل اجروحك

الاربعين 👇

لسان حال السيده زينب ع بعد الوصول الى قبر اخيها الحُسين ع في الاربعين
⁦▪️⁩⁦▪️⁩⁦▪️⁩⁦▪️⁩⁦▪️
جيتك يخويه الكربله
دمعاتي ضلّت هامله
طول الدرب .. دمعي يصب
دمعاتي ضلّت هامله
⁦▪️⁩⁦▪️⁩⁦▪️⁩⁦▪️⁩⁦▪️
مرتين جيت الكربله الاوله أميره
أوّلها وي حامي الخدُر بدر العشيره
بس ثاني مرّه اميسّره جيت الها اسيره
لخواني جيت ابكل حزن روحي كسيره

محتاره ويسيل الدمع
گلبي ودليلي منفجع
شفت القهر .. والهم كُبَر
دمعاتي ضلّت هامله
⁦▪️⁩⁦▪️⁩⁦▪️⁩⁦▪️⁩⁦▪️
ويّه العليل احچي ابحزن گلبي ومصابه
دلّيني چا وين الگبُر شفت انتحابه
زينب اختكم يالاهل عگب المهابه
ويّه النسه بهذا الحزن تبقه ابخرابه

وابروحي ماضل اي صبُر
ذبّيت روحي اعله الگبر
خويه صحت .. ابدمعي نحت
دمعاتي ضلّت هامله
⁦▪️⁩⁦▪️⁩⁦▪️⁩⁦▪️⁩⁦▪️
بچفوفي محضون الگبر وابروحي كسري
وشگد بچيت شگد نحت وابگلبي جمري
احچي اويه اخويه ابلوعتي والدمعه تجري
راسك يخويه من اليسُر ويّايه يسري

مجروح راسك بالرمح
ابراسك يخويه اشچم جرح
بي فاجعه .. هل مدمعه
دمعاتي ضلّت هامله
⁦▪️⁩⁦▪️⁩⁦▪️⁩⁦▪️⁩⁦▪️
احچي اويه گبرك بالدمع ياخويه وانحب
شفت المواجع والالم گلبي تعذّب
فوگ الگبر گلبي انكسر والدمعه تنصب
ماتدري ياخويه اشجره وصار اعله زينب

ما تدري چم لوعه شفت
بعدك عجيبه وما متت
يا كربله .. چم معضله
دمعاتي ضلّت هامله
⁦▪️⁩⁦▪️⁩⁦▪️⁩⁦▪️⁩⁦▪️
عنّي مشيتوا ودمعي ضل ابخدّي ينقاس
خلّيتوا اختكم بالحزن چن فرجه للناس
شگد اشتكيكم وانتخي والطم عله الراس
من انضرب راسك بچه وي راس عباس

بهذا الدرب دمعي يصُب
يبچي الرأس من انضرُب
من الدهر .. گلبي انفطر
دمعاتي ضلّت هامله
⁦▪️⁩⁦▪️⁩⁦▪️⁩⁦▪️⁩⁦▪️
شلون احچي هالكلمه صحت واللوعه بيه
احچيها بس كل الحزن داير عليه
يا خويه يا خويه الضعن مابي رقيه
من شافت الراس ابطشت شافت منيه

راسك تشوفه اتألمت
صاحت يبويه اوودّعت
مدمع يُفض .. ماضل نبُض
دمعاتي ضلّت هامله
⁦▪️⁩⁦▪️⁩⁦▪️⁩⁦▪️⁩⁦▪️
راح ارجع ابدمعي يخي لرض المدينه
ام البنين بهالارض ضلّت حزينه
منتظره منكم أي خبر عن الضعينه
وشلون اجاوب لو تگول إحسين وينه

ضحّت ولدها الخدمتك
شلون انقل الها موتتك
لو انسأل .. دمعي يهل
دمعاتي ضلّت هامله
⁦▪️⁩⁦▪️⁩⁦▪️⁩⁦▪️⁩⁦▪️

ابو الحسن الوائلي
٢٠٢١/ ١٤٤٣

لسان حال السيده زينب ع عند قبر اخيها العباس ع
‌▪️⁩‌▪️⁩‌▪️⁩‌▪️⁩‌▪️
جِيْتَك يَخُويَه مِن اليِسُر
مِنْ السّبْيِ رَدّ الخِدُر
احَچِيلَك الْهَمّ وَالْأَلَم
والمَدمَع ابْعيْنِي جَمُر
‌▪️⁩‌▪️⁩‌▪️⁩‌▪️⁩‌▪️
جِيْتَك يَخُويَه مِنْ السّبْيِ
وَالوجْنَه بِأَلْوان العِبْي
بَعْدَك يَعبّاس الكُمَر
ضَلّ يَحْدِي ضَعْنِي الْأَجْنَبِي
رحْنَه ابّسَبيْنه إبِلا وَلِيّ
بِهَذَا الدرُب نِحبِي حِبِي
يَا خُويَه شَوفْونَه الْقَهْر
واحنَه شَرَف آلِ النَّبِي

يَا خويه بِدروْب السَّفَر
رحْنَه وتِعدّيْنه الْخَطَر
كُلّ حِيَلِي مِنْ عِنْدِي انْهِدَم
والمَدمَع ابْعيْنِي جَمُر
‌▪️⁩‌▪️⁩‌▪️⁩‌▪️⁩‌▪️
ابْدرب السَّبْي المَدمَع يهِل
ابْدرب المَواجِع نِرْتِحِل
بَيْن التَّسيْر أَعَلْه الْأَرُض
بَيْن السِبيّه أَعَلَه الْهِزْل
بَيْن المِشَتْ ويّه الضَّرُب
بَيْن الّي چِتْفوها ابّحَبِل
بَيْن التَّنَادِي يَا عَلِي
بَيْن النِخَت يَا بُو الْفَضِْل

نِسْوَه إحْنَه والمَدمَع يُصُب
لَو نِنْتِخَيِكُم نِنْضُرُب
دَلّالِي يَا خُويْه انْلِچَم
والمَدمَع ابعِيْنِي جَمُر
‌▪️⁩‌▪️⁩‌▪️⁩‌▪️⁩‌▪️
جِيْتَك يَعبّاس الكُمَر
وابّرُوحْي ياخُويَه الْقَهْر
مِن أَذْكُر اسْمَك بالدَرُب
اُنْظُرْ عَلَى خَدّي انْسِطر
مَسْبِيَّه والمَدمَع جِرَه
دَمْعِي عِله الْخَدّ انْحِدَر
يَابُو الْفَضْل مِنْ الضَّرُب
لِزگت عَبْاتِي اعَلْه الظّهْر

شِفْت الْقَهْر شَفْت الْحِزْن
وَرّم يَبو الْغَيْرَه الْمَتِن
مِن عِدنَه مَا وَاحِد سِلَم
والمَدمَع ابْعيْنِي جَمُر
‌▪️⁩‌▪️⁩‌▪️⁩‌▪️⁩‌▪️
يَا كَافِلْي مَا ضَل صَبُر
ابْدِيْوَان خَلّونَه نطُر
وايْزيْد مِتْعلّي الْعَرْش
بِچْفُوفَه ياخُويِه الخَمُر
صَاح اللَّعِين ابْفَرحِتَه
دَخَلُوهَا زَيْنَب للقَصُر
شَوفُوها أَنْوَاع الْأَلَم
وگلبِي ابْكُلمْتَه مِنْفطُر

اوْلوْها يَا عَالَمٌ وَلِي
لَا تِرحَموْها بِتّ عَلِي
وگفُوها مَا بِيْن الزَّلَم
والمَدمَع ابْعيْنِي جَمُر
‌▪️⁩‌▪️⁩‌▪️⁩‌▪️⁩‌▪️
چَم حَسْرَه چَم لَوْعَه شِفَت
بِقَصْر الْجُرُوْح اتألَمِت
أحْزَانِي نَامَت بالگلُب
والفَاجِعاْت اتْحَمَلِت
بِنْت الحُسَيْن الغَاليْه
ويّاهه مِن نَاحَت نِحِت
جِيْبُوْلِي صَاحَت وَالِدِي
وانْطُوها رَاسَه بِالطَّشِت

ضَلّت عِلَه رَاسَه تِوْن
مَاتَت عِلَه الرَّاس ابْحِزْن
مَاتَت أَهِي وگلبِي انْجِسَم
والمَدمَع ابْعيْنْي جَمُر
‌▪️⁩‌▪️⁩‌▪️⁩‌▪️⁩‌▪️
مَرَّتَيْن اجْيت الكَرْبَلَه
الْأَوْلَه أَمِيرَه امْدَلَلَه
ويّاك اجْيت بْـ هالأرُض
خُويَه يَبِن عَقْد الْوِلَه
بَس ثَانِي مَرّه امْيَسّره
جِيْت إلَهًا ويّه العَايِلَه
جِيْت اگصِد اگبُور إخْوَتِي
ودَمْعاتِي ضَلّت هَامِله

گلبْي ودِلِيْلي مِنشِلِع
طُول الدَّرُب يَجْرِي الدَّمِع
دلّالِي مَصْيُوب ابْسَهم
والمَدمَع ابْعيْنِي جَمُر
‌▪️⁩‌▪️⁩‌▪️⁩‌▪️⁩‌▪️
بَعْد الخِدُر مِتْيَسّره
يَخْوُانِي والمَدمَع جِره
لَرضْ الْمَدِينَه المُؤلِمَه
رَاح ارْجَع الذِيْچ الثَره
وَهنَاك اتْلَگّه ابْحِزِن
أُمِّ الْبَنِين الطَّاهِرَه
وأدْرِيْها مِنْتَظِرَه خَبَر
عَن الحُسَيْن امْنَاطِره

رَاح أَرْوِي كُلّ الفَاجِعْه
للنْذْرَت اوْلَاد أَرْبَعَه
ياخُويَه ياراعِي الْعَلَم
والمَدمَع ابْعيْنِي جَمُر
‌▪️⁩‌▪️⁩‌▪️⁩‌▪️⁩‌▪️

ابو الحسن الوائلي
٢٠٢١/ ١٤٤٣

لسان حال مولاتي زينب ع بعد الوصول الى قبر اخيها الحسين ع
‌▪️⁩‌▪️⁩‌▪️⁩‌▪️⁩‌▪️
يَا أَخِي قَلْبِي بَقِى حزِيْن
وَسْطَ قَلْبِي يكْثرُ الْأَنِين
مِنْ سِبْا قَدْ جِئْتُ ياحُسَيْن
يَا حُسَيْن
‌▪️⁩‌▪️⁩‌▪️⁩‌▪️⁩‌▪️
يَا أَخِي قَدْ جِئْتُ مِنْ دَرْبِ الْجُرُوح
وَسَط قَلْبِي يَا أَخِي حُزْنِي يَلُوُح
فـ البُكا لَمْ يَنْقَطِعْ دَوماً انوح
حُزْنِي فِي نَفْسِي بَقِى جِسْماً وَرَوْح

يَا أَخِي قَلْبِي بَقِى كَسَيْر
دَمْعٌ عَيْنِي فِي أَذِى غَزِيْر
فـ أَنَا مِنْ دُونِكُمْ أَسِيْر
يَا حُسَيْن
‌▪️⁩‌▪️⁩‌▪️⁩‌▪️⁩‌▪️
جِئْتُ مِنْ دَرْبِ السّبَا دَمْعِي يَسِيْل
يَا طَرِيقْ السَّبْي كَمْ كَانَ طَوِيْلَ
يَا أَخِي كَان السّبَا جدّاً ثَقِيْلٌ
وخُصوْصاً انَّنِي دُوْنَ الْكَفِيْل

قَد طُوِيَتُ الدَّرْبَ بِالدُّمُوع
يَا أَخِي وَالْقَلْبُ كَم يلوع
يَا أَخِي قَدْ ورّمُوْا الضُّلُوع
يَا حُسَيْن
‌▪️⁩‌▪️⁩‌▪️⁩‌▪️⁩‌▪️
حَمْلُة الأَحْزَانِ فِي رَأْسِي ثِقْال
فَوْقَ رَأْسِي شَابَهَتْ حِمَلَ الْجِبَال
مِن جُرُوْح السَّبْيِ هَذَا الدَّمْع سَال
قَد تَوَرّم كَفّي مِنْ قَيْدِ الْحِبَال

نُور عَيْنِي مِعصَمِيْ جَرِيحٌ
أَشْتَكِي مِن حزْنِي ياذَبِيْح
يَبْن أُمِّي والسِّبْا قَبِيح
يَا حُسَيْن
‌▪️⁩‌▪️⁩‌▪️⁩‌▪️⁩‌▪️
جِئْتُ أشْكُوْكَ الْأَذَى يَبْنَ الرَّسُوْل
ذِكْرَيَاتُ أَلْطِّفُِ فِي بَالِي تَصْوْل
لَازَمَت فِي بَالِي رَكَضَاتْ الْخُيُول
عِنْدَمَا فِي الصَّدْرِ قَدْ كَانَتْ تَجُول

عَاشِرُ الْحُزْن بَقِى ظَلَام
صَدْرِك الْبَاقِي بِلَا عِظَام
قَد رَقَّت فِي صَدْرِكَ السِّهَام
يَا حُسَيْن
‌▪️⁩‌▪️⁩‌▪️⁩‌▪️⁩‌▪️
رِحْلَتِي فِي السَّبْيِ كَانَت مُؤْلِمَه
تَبْقَى فِي قَلْبِي جُروْحِي عَالِمَه
رُوحِي بَعْد السَّبْي لَيْسَت سَالِمَه
كَيْفَ فِي حَالِيْ اللَّيَالِي القَادِمَه

سَأعيْشُ الْحُزْن وَالْمُصَاب
فَوْقَ رَأْسِي يعتلي الْعَذَاب
سَيُحِيْط الرُّوحُ انْتِحاب
يَا حُسَيْن
‌▪️⁩‌▪️⁩‌▪️⁩‌▪️⁩‌▪️
فِيهِ نَقْصٌ ضَعنُ آيَاتْ الْمُصَاب
مَاتَتْ الطِّفْلَةُ فِي ذَاكَ الْخَرَاب
قَدْ رَأَتْ رَأْسَك فِي الطَّشْتِ وَذَاب
قَلْبُهَا وَالرُّوْحُ ذَابَت بِالْعَذَاب

قَدْ رَأَتْ رُقَيَّةُ الْجُرُوح
لَمْ تَزَلْ بِالطَّشْتِ فِيهَا رُوح
فَوْق رَأْسَك بِالْأَذَى تَنُوح
يَا حُسَيْن
‌▪️⁩‌▪️⁩‌▪️⁩‌▪️⁩‌▪️
ذَبْحُكُم وَالسَّبْي قَدْ كَانَتْ حَيَاة
فِي مَسِيرِي للسِبْا كَانَت نَجَاةٌ
رَغِم كُلّ الْحُزْن لازَمْنِي الثَّبَات
قَدْ عَلَتْ اقْدَامِي فِي رُوس الطُّغَاة

دَسْتُ رَأْسْ الْجِبْتِ بِالْمَسِيْر
نَصَرْنَا فِي كَلِمَةٍ يَصِيْر
يَا عَلِيُّ المُرتَضْى الأَمِير
يَا حُسَيْن
‌▪️⁩‌▪️⁩‌▪️⁩‌▪️⁩‌▪️

ابو الحسن الوائلي
٢٠٢١/ ١٤٤٣

كأني بسيدي ومولاي الامام الحجه عج في شهر محرم وهو يذكر مصاب جدّه الحسين ع
‌▪️⁩‌▪️⁩‌▪️⁩‌▪️⁩‌▪️
جرح الطف چبير اهوايه جرحه
ظلمه ابعيني صاير حته صبحه
اصبر بس كبر صبري
دمعي اعله الوجن يجري
‌▪️⁩‌▪️⁩‌▪️⁩‌▪️⁩‌▪️
آني المهدي ودموعي تضل بالخد جريه
من أذكر ذبح جدّي براضي الغاضريه
ويلي ينگطع نحره وتصدله الهاشميه
يبقه اعله الارض دامي وتدوسه الاعوجيه

جدّي اعله الترب طايح انظره
بخيول العده طحنوله صدره
هاي التمرد ابعمري
دمعي اعله الوجن يجري
‌▪️⁩‌▪️⁩‌▪️⁩‌▪️⁩‌▪️
لو هلّ هالشهر يبقه دمع عيني يلالي
اذكر كربله وجدّي يمر ذكره اعله بالي
گبال اعيوني مرسومه صور كل الاهالي
يبدي اگبالي يتوضّح ذبح اهلي الغوالي

كلهم عالترب طاحوا عمامي
واحدهم أشاهد جسمه دامي
انذبحوا من ألم دهري
دمعي اعله الوجن يجري
‌▪️⁩‌▪️⁩‌▪️⁩‌▪️⁩‌▪️
لو مرني الشهر يكبر حزن گلبي ونحيبه
لو مر بالگلب يلهب أثر جمر المصيبه
جرح اليفگد احبابه أثر فگده اشيطيبه
أبچي وگلبي ما يگطع ونينه ولا نحيبه

انوح وگلبي من دمعي تفطّر
دمع عيني اليهل بالوجنه احمر
جمره وتشعل ابصدري
دمعي اعله الوجن يجري
‌▪️⁩‌▪️⁩‌▪️⁩‌▪️⁩‌▪️
من اذكر جروح الطف توج ابروحي جمره
گلبي اعله المصايب والحزن گوّه أصبره
مرسومه الخيم گدّامي والمنظر اصوره
عطشانه الخيم والبيها والمنظّر يكبره

دمعتي اعله الوجن خيّم اثرها
حزين وروحي يتلهّب جمرها
ابنص روحي اشتعل جمري
دمعي اعله الوجن يجري
‌▪️⁩‌▪️⁩‌▪️⁩‌▪️⁩‌▪️
لو شفت الظلام ايهل عله اعيوني الدميعه
اذكر عمّي ابو فاضل وگع فوگ الشريعه
بعيونه السهم نابت چفوف ايده گطيعه
وجها اليشرگ وضاوي انخسف آه يافجيعه

گمر هاشم خسف كل نوره عالماي
اسهام ابظهره نامن كلهن اهواي
يكبر بالگلب كسري
دمعي اعله الوجن يجري
‌▪️⁩‌▪️⁩‌▪️⁩‌▪️⁩‌▪️
تلچم صدري أي نسمه تجي من الهوه الهب
من گد المصايب گلبي يچوي وجمره يلهب
گلبي من الحزن والهم عله الطف ايتعذب
والحملت حزن ديره ابصبرها عمتي زينب

گلبها من الحزن واللوعه لاهب
راحت بالسبي ويّه الاجانب
بيّه الفاجعه تسري
دمعي اعله الوجن يجري
‌▪️⁩‌▪️⁩‌▪️⁩‌▪️⁩‌▪️
يا جرح الطفوف شگد چبيره وبيّه يجرح
دمعي اعله الوجن بالدم اشوفه ابخدّي ينضح
يا هم كربله اليكبر واحس طاريهه يذبح
من اذكر مصاب الطف احس گلبي ايتفرفح

أحس الطف حزن خيّم عليه
ابظهوري ايرد غصب ثاري اليه
من اثأر يكون امري
دمعي اعله الوجن يجري
‌▪️⁩‌▪️⁩‌▪️⁩‌▪️⁩‌▪️
تمت

ابو الحسن الوائلي
٢٠٢١/ ١٤٤٣

ياسيدي ويامولاي
ياحجة الله متى ترانا ونراك
‌▪️⁩‌▪️⁩‌▪️⁩‌▪️⁩‌▪️
يمته تاخذ ثار ابن حامي الحمه
يمته تاخذ ثار ضنوة فاطمه
العجل .. العجل
‌▪️⁩‌▪️⁩‌▪️⁩‌▪️⁩‌▪️
يمته يالمهدي تجي وتثأر نشوفك
تثأر ابسيفك لعد دولة طفوفك
والصبُر طوّل نعم ندري ابظروفك
يمته ننظُر سيدي تبرگ سيوفك

يمته سيفك سيدي ايلوح العده
يمته يوم الثار من اهل الرده
العجل .. العجل
‌▪️⁩‌▪️⁩‌▪️⁩‌▪️⁩‌▪️
سيدي يمته تجي وتعلنه ثارك
سيدي يالمهدي نبقه بأنتظارك
يمته تكسر حاجز اهموم اصطبارك
الّه يوم الثار تطفه هناكه نارك

يمته تظهر سيد طال الصبُر
شگد صبرنه وبينه ضل يلهب جمُر
العجل .. العجل
‌▪️⁩‌▪️⁩‌▪️⁩‌▪️⁩‌▪️
سيدي يمته الفرج ننطُر وعيدك
عجّل ابثارك يبو صالح نريدك
سيدي من تظهر اوياك ونأيدك
سيدي وثار الطفوف الباقي بيدك

كل گلب يا سيدي ابصبره امتحن
سيدي يمته الفرج يبن الحسن
العجل .. العجل
‌▪️⁩‌▪️⁩‌▪️⁩‌▪️⁩‌▪️
يمته ثار الطف يبو صالح تنصره
وتاخذ ابثار الطفوف البيها جمره
وتاخذ ابثار الذي گطعوله نحره
جدّك الضل عالترب طحنوله صدره

ضل ثلاث ايام دامي ابلا دفن
يمته تاخذ ثار صدره المنسحن
العجل .. العجل
‌▪️⁩‌▪️⁩‌▪️⁩‌▪️⁩‌▪️
صعبه ايام الطفوف اعليك اصعب
مو بعيد الطف تحس اوياك اقرب
عينك اتشوف الرؤوس ابدم تخضّب
يمته يوم الثار يالمهدي ايتقرّب

روس اخوتك والاهل فوگ الرمح
بسمك اينادن يمهدي ابكل جرح
العجل .. العجل
‌▪️⁩‌▪️⁩‌▪️⁩‌▪️⁩‌▪️
من الف عام وبقت نارك سريه
هوايه تلچم گلبك اجروح السبيه
ابلايه كافل تمشي بچفوف ال اميه
بالخرابه اتنام يا اصعب رزيه

من بعد ذاك الخدر زينب مشت
بالسبي وثارك بقت تنطُر بقت
العجل .. العجل
‌▪️⁩‌▪️⁩‌▪️⁩‌▪️⁩‌▪️
تمت

ابو الحسن الوائلي
٢٠٢١/ ١٤٤٣

لـ رسول الله
⁦▪️⁩⁦▪️⁩⁦▪️⁩⁦▪️⁩⁦▪️
سيْد البريه .. يهل الحميه
غمّض جفونه .. هاي المسيه
⁦▪️⁩⁦▪️⁩⁦▪️⁩⁦▪️⁩⁦▪️
وصّه طه المصطفى حيدر خليفه
تارك أهل البيت والعتره الشريفه
گالوا الـ طه نعم لاكن مخيفه
اتجمعوا من مات طه بالسقيفه

شفنه الحقيقه .. تركوا طريقه
اختاروا خليفه .. وخانوا وليّه
⁦▪️⁩⁦▪️⁩⁦▪️⁩⁦▪️⁩⁦▪️
بعده ما مدفون طه بالترابْه
عالوصي انقلبوا نعم صاروا عصابْه
الچانوا اصحاب النبي صاروا ذيْابه
من رحل بينت حقيقتها الصحابْه

لمّن تركهم .. بينوا حقدهم
ضد الامامه .. رصدوا أذيه
⁦▪️⁩⁦▪️⁩⁦▪️⁩⁦▪️⁩⁦▪️
خانوا ابـ طه النبي لجل المطامع
رادوا ابحيدر يجي الاول يبايع
حيدره هوّه الخليفه وتالي رابع
لو يگدرون الـ علي ايخلّونه تاسع

وليْه اعله حيدر .. واللوعه تكبر
رادوا يبايع .. أبن الرديّه
⁦▪️⁩⁦▪️⁩⁦▪️⁩⁦▪️⁩⁦▪️
سمعوا ابـ حيدر رفض يتبع صنمهم
اتجمعوا يم داره ولد الذلّه كلهم
ملتزم حامي الحمه ويدري ابغدرهم
ابصبره حيدر هالجمع يكسر خشمهم

واحد ينادي .. من الاعادي
حرگوله داره .. هاللحظه هيّه
⁦▪️⁩⁦▪️⁩⁦▪️⁩⁦▪️⁩⁦▪️
الامّه يَم دار النبي خلّت جمعها
فاطمه من سمعته اتغيّر وضعها
لاذت الزهره وعمر جاهه ودفعها
يعصر الزهره الى أن طگ ضلعها

واحد دفعها .. واحد صفعها
واحد ضربها .. ضربه قويه
⁦▪️⁩⁦▪️⁩⁦▪️⁩⁦▪️⁩⁦▪️
التمّوا اعله المرتضى ولد الرديّه
شنّوا اعليْه ابحقد هاللحظه وليه
بالحبل للمسجد اخذوه ابـ أذيه
خلّوا ابن عمّي علي اتصيح الزچيه

اتألم گلبها .. وقنفذ ضربها
ابرجله رفسها .. فوگ الوطيه
⁦▪️⁩⁦▪️⁩⁦▪️⁩⁦▪️⁩⁦▪️
رد علي لاكن رجع وابروحه جمره
البيته رد وصفنته اتنادي يزهره
شافته الزهره وخفت من خدها سطره
ما تريده ايصد عله عيناهه حمره

لمّن نظرها .. محني ظهرها
مختلفه شاهد .. هاي الزچيه
⁦▪️⁩⁦▪️⁩⁦▪️⁩⁦▪️⁩⁦▪️

ابو الحسن الوائلي
٢٠٢١/ ١٤٤٣

قناة اسد الله الغالب وما ادراك من هو اسد الله الغالب لا تقصروا في الانضمام إلى هذه القناة


@OWJSJDHDOKKSJSNSNKSNS

الليالي الفاطميه ١٤٤٣ _ ٢٠٢١ 👇

بين مولاتي فاطمه ومولاي علي ع
‌▪️⁩‌▪️⁩‌▪️⁩‌▪️⁩‌▪️
ياجبل مكسور شفتك ياجبل
عالجره يابالحسن دمعك نزل
وضعك غريب .. ها يالحبيب .. لا ياجبل
‌▪️⁩‌▪️⁩‌▪️⁩‌▪️⁩‌▪️
ابوجهك الحيره شفتها وانت مجروح الگلُب
ابعينك اتشوف المصيبه ودمعتك ضلت تصُب
والچبير الگوم تنظُر يا علي الداري يطُب
ياعلي اتشاهد كسرتي وماتسِل سيفك صعُب

تعرف ابروحي المواجع باقيْه
كلشي يسهل بس دمعتك غاليْه
لا مو سهِل .. دمعك يهِل .. لا ياجبل
‌▪️⁩‌▪️⁩‌▪️⁩‌▪️⁩‌▪️
من اجه الثاني عليّه ومن هِجَم ابن الردِه
يا علي شفته ورحتله ابعينك المتراعِده
تطرحه ودسْت اعله راسه ادري گلبك ماهِده
واعرف النار ابدليلك يا علي متوسّدِه

يا علي بأمر الوصيّه تصطبُر
واني عاذرتك علي لا تعتذُر
مثلك أبد .. ماكو بعد .. لا ياجبل
‌▪️⁩‌▪️⁩‌▪️⁩‌▪️⁩‌▪️
يا علي الشفته وجرالي يترك ابروحي ألم
دمعتك يابو الحميه هيّه فوگ اهمومي هم
بيّه لا ماباقي حيلي وگلبي بالباب انلچم
من اندفع بابي عليّه يا علي حيلي انهدم

اصبُر بهالحاله يا ضي ناظري
شوفتك مكسور تكسر خاطري
زيد الصبُر .. لا تنكسُر .. لا ياجبل
‌▪️⁩‌▪️⁩‌▪️⁩‌▪️⁩‌▪️
صعبه يا حامي الحميه هالمصيبه ومؤلمه
گالوا إحچايه أضنها زعّلوا بيها السمه
فاطمه بالدار گالوا و"أن" گلهم فاطمه
يرفس الباب وعصرني واني ما عندي حِمه

ما رحمني وسوطه يضرب بالظهر
گمت احس من الضرب ظهري انكسر
زاد الحزن .. شفتك تون .. لا ياجبل
‌▪️⁩‌▪️⁩‌▪️⁩‌▪️⁩‌▪️
أدري متألم دليلك ياعلي ابنار الصبُر
ينكسُر گلبك عليّه لو گلتلك عـ الكسُر
ياعلي ومسمار تدري بيّه نابت بالصدُر
طحت عالگاع ورفسني الظالم ابأفجع أمُر

ما صحت بسمك يحيدر بالجره
يا علي ومحسِن وگع فوگ الثره
يابالحسن .. شفت المحن .. لا ياجبل
‌▪️⁩‌▪️⁩‌▪️⁩‌▪️⁩‌▪️
يا علي لمّن تغسّل جسمي واتشوف الوضع
اتحمّل واصبُر اگلّك لمّن اتجيس الضلع
إهناكه متني اتشوف ازرگ وانت گلبك منفجع
اصبُر وشد ليّه چفني يا علي ومشّ الدمع

تكبر اهمومك يحمّاي الحمه
لو شفت من المتن ينزل دمه
صد الضلع .. لا تنفجع .. لا ياجبل
‌▪️⁩‌▪️⁩‌▪️⁩‌▪️⁩‌▪️
ايگلها يالزهره كسرتچ كسرت ابروحي جنح
فاطمه گلبي اعله حزنچ يالحبيبه منجرح
چنّچ اتودعيني اشوفچ من كلامچ يتّضح
لو مشت عينچ عليه يكبر ابگلبي الجرح

فاطمه ابموتچ تسافر فرحتي
من بعد عينچ تبيّن كسرتي
حامي الحمه .. ابلا فاطمه .. لا ياجبل
‌▪️⁩‌▪️⁩‌▪️⁩‌▪️⁩‌▪️

ابو الحسن الوائلي

بين الحسين وفاطمه عليهم السلام
⁦▪️⁩⁦▪️⁩⁦▪️⁩⁦▪️⁩⁦▪️
يزهره الزچيّه
اشوف الاذيّه
⁦▪️⁩⁦▪️⁩⁦▪️⁩⁦▪️⁩⁦▪️
يمه يامن ماكو مثلچ يالحبيبه
صعبه يا يمّه وشفت هاي المصيبه
چم سهم من الدهر گلبي يصيبه
والصبُر يمّه اصيح منين اجيبه

ابوداعچ يزهره
شفت چم رزيّه
⁦▪️⁩⁦▪️⁩⁦▪️⁩⁦▪️⁩⁦▪️
يالمشيتي چم جرح بيّه تركتي
يمّه فگدچ بيّن ابوجهي وصفنتي
روحي راحت يمّه لمّن عنّي رحتي
ما أريد الدنيه يمّه بعدچ انتي

تفتّت دليلي
ودمعتي جريّه
⁦▪️⁩⁦▪️⁩⁦▪️⁩⁦▪️⁩⁦▪️
بعدچ ابروحي الحزن يحبيبه يلتم
بيّه يزداد الجرح واللوعه والهم
گلبي بفراگچ يضي عيني تألم
حيلي يمّه ابفرگتچ شفته تهدّم

اشاهد تخيّم
مواجع عليّه
⁦▪️⁩⁦▪️⁩⁦▪️⁩⁦▪️⁩⁦▪️
الدنيه سوده ابغيبتچ شو چنها غيمه
من بعد عينچ يضي عيني أليمه
هايه روحي ابلا حضورچ مو سليمه
ابفرگتچ يمّه اشاهد چم هضيمه

الفرح ما اشوفه
حزن يمشي بيّه
⁦▪️⁩⁦▪️⁩⁦▪️⁩⁦▪️⁩⁦▪️
بعدچ الدنيه ظلام وسوده تصبح
گلبي من بعدچ يضي عيني تفرفح
وجهي يالزهره ابدمع موتچ توشّح
كلمة الماتت ييمّه ابگلبي تجرح

كأن كل حياتي
ظلام المسيّه
⁦▪️⁩⁦▪️⁩⁦▪️⁩⁦▪️⁩⁦▪️
ابفرگتچ زاد الحزن والهم اجاني
يالحبيبه وأدري بفراگچ حناني
مو سهل يالزهره ما يرحم زماني
يمّه بعدچ والاجل ريته لفاني

ابوداعچ يفاطم
اريد المنيّه
⁦▪️⁩⁦▪️⁩⁦▪️⁩⁦▪️⁩⁦▪️
بعدچ الدنيه اشتساوي لو عشتها
والحياة ابلايه عينچ ما ردتها
اوياچ كل الدنيه اعيش اتوقعتها
فرگتچ يا روحي لا ما حسبتها

حياتي ابوداعچ
حزن ادري هيّه
⁦▪️⁩⁦▪️⁩⁦▪️⁩⁦▪️⁩⁦▪️

ابو الحسن الوائلي

عَظّمْ اللَّهُ أجُوْرَنْا واجُوْرَكُمْ بِذِكْرَىٰ إسْتِشْهَاد الصِّدِّيقَةُ الكُبْرَىٰ فَاطِمَةَُ الزَّهْرَاءِ "عَلَيْهَا السَّلَامْ"
....
الروايه الاولى

مولاتي زينب ع بعد موت مولاتي فاطمه ع وهي تنظُر الى زوايا البيت ويقع نظرها على الباب
⁦▪️⁩⁦▪️⁩⁦▪️⁩⁦▪️⁩⁦▪️
كلما اشوف الباب .. اذكر ضلع ومصاب
واتذكر امي فاطمه الزهره الزچيه
⁦▪️⁩⁦▪️⁩⁦▪️⁩⁦▪️⁩⁦▪️
زينب انه وكل الحزن گدامي شفته
وجرح الزچيه فاطمه بالحسره عشته
يوجعني باب الطاهره كل ما نتظرته
جرح المصيبه وحسرته ابّالي رسمته

شفت الحزن والنوح .. عن بالي لا ميروح
وانظُر صورها الفاجعه التمت عليه
⁦▪️⁩⁦▪️⁩⁦▪️⁩⁦▪️⁩⁦▪️
طفله وشفت امي ابحزن يثگل خطاهه
من حسّت الظالم دنه الباب واجاهه
عرفت اذا يدخل نعم يكبر اساهه
عالزهره فات الظالم وحتماً ولاهه

جاهه ابحقد ويلاه .. هاجم عله الزهراه
امي ابحزنها وشاهدت منّه الاذيه
⁦▪️⁩⁦▪️⁩⁦▪️⁩⁦▪️⁩⁦▪️
امي حزينه وبالگلب يكبر خطرها
انظُر رِفَس ابن الخنه الباب وعصرها
مسمار من گد العصر نام ابصدرها
ضل يعصر الزهره ورجع بيده سطرها

وابلا خجل مكمون .. يضبرها هالملعون
من الضرب أمي تمنّتها المنيّه
⁦▪️⁩⁦▪️⁩⁦▪️⁩⁦▪️⁩⁦▪️
امي رغم كل الحزن والهم عليها
شفته النذل ابن النذل هاجم يجيها
بالسوط اجاهه بكل حقد واللوعه بيها
ما يرحم الزهره وبقت تشگف بديها

بعد الكسر والنار .. سوط وبعد مسمار
تتبعها رفسه اعله البطن كلّش قويه
⁦▪️⁩⁦▪️⁩⁦▪️⁩⁦▪️⁩⁦▪️
بعيوني شفت الثاني رد ابكل حقاره
بالسوط اجه وظهر امي بيّن انكساره
شفت امي محنيّه وانه دمعي تجاره
وحيدر ابويه ملتزم ما سل فقاره

ادري النبي المختار .. وصّه علي الكرار
دافِع لچِن لتسلّه سيفك بالرزيه
⁦▪️⁩⁦▪️⁩⁦▪️⁩⁦▪️⁩⁦▪️
اجتمعت عله الزهره وعلي كل المدينه
انظُرهم اشباه الزلم دخلوا علينه
هجموا عله الزهره وبقت امي حزينه
وانظُر ابو الحمله ابويه امگيدينه

لو ما وصية دين .. ما طلعت الهم عين
چا ما اجونه وچتّفوا حامي الحميه
⁦▪️⁩⁦▪️⁩⁦▪️⁩⁦▪️⁩⁦▪️
كل زاويْه ابداري بدت تنطيني ذكره
بالدار اشاهد كل شبِر يرسملي كسره
ابحجرتها ابچي وانتحب واندب يزهره
يا يمّه من دونچ صحت گلبي اشيصبره

ابموتچ تزيد اجروح .. شيسوه العمر والروح
والدنيه بغيابچ صفت چالغابه هيّه
⁦▪️⁩⁦▪️⁩⁦▪️⁩⁦▪️⁩⁦▪️

ابو الحسن الوائلي

الامير بعد موت فاطمه ع
⁦▪️⁩⁦▪️⁩⁦▪️⁩⁦▪️⁩⁦▪️
كسري ما ينجبُر .. من بعد فاطمه
عنّي راح الصبُر .. وروحي متألمه
⁦▪️⁩⁦▪️⁩⁦▪️⁩⁦▪️⁩⁦▪️
منشلع گلبي وحزين وناري تسعر
راحت الزهره وشفت حالي تغيّر
دمعتي تنزل عليها ابلون الاحمر
من شفت كسرتها چن گلبي تكسّر

حاير ومنكسُر .. دنيتي مؤلمه
عنّي راح الصبُر .. وروحي متألمه
⁦▪️⁩⁦▪️⁩⁦▪️⁩⁦▪️⁩⁦▪️
راحت الزهره وبده يتعاله ونّي
هيّه كل الفرحه بس زيدتلي حزني
هيّه روحي ومن مشت گلبي لچمني
هيّه كلشي ابدنيتِي وفرگاهه هزني

اوياهه راح العمُر .. من مشت للسمه
عنّي راح الصبُر .. وروحي متألمه
⁦▪️⁩⁦▪️⁩⁦▪️⁩⁦▪️⁩⁦▪️
ويلي ياجرح الزچيه ويا حزنها
فاطمه هاي العظيمه الماكو منها
راحتي راحت لمَن غمضت جفنها
من المواجع فاطمه ارتاحت اضنها

گلبي بيه الجمُر .. والجرح غيّمَه
عنّي راح الصبُر .. وروحي متألمه
⁦▪️⁩⁦▪️⁩⁦▪️⁩⁦▪️⁩⁦▪️
راحت الزهره وبقت ناري سريه
بيتي اظلم من بعد موت الزچيه
چم جرح ضل عندي من غابت عليه
گلبي يوجعني بقه واللوعه بيه

ما أحمله الهجُر .. حزني ما أعظمه
عنّي راح الصبُر .. وروحي متألمه
⁦▪️⁩⁦▪️⁩⁦▪️⁩⁦▪️⁩⁦▪️
يا دمع بي تصطبر عيني ابجفاهه
راحت ونبض الگلب يخفت وراهه
صدري مخنوگ ومشت واخذت هواهه
هيّه نجمه ورجعت ابكسره السماهه

ابروحي هم اشكثُر .. كلها متهدمه
عنّي راح الصبُر .. وروحي متألمه
⁦▪️⁩⁦▪️⁩⁦▪️⁩⁦▪️⁩⁦▪️
غسّلت بنت النبي وأدري ابوجعها
واعله وجنتها أثر باقي الدمعها
ركّزت وانظُر أثر چف الصفعها
اتهدمت لمّن جست كسرة ضلعها

بيدي صار الكسُر .. والدِليل انرمه
عنّي راح الصبُر .. وروحي متألمه
⁦▪️⁩⁦▪️⁩⁦▪️⁩⁦▪️⁩⁦▪️
حيلي كلّه وفرحتي اوياهه شلتها
شيّعت أسم الفرح من شيّعتها
فاطمه الزهره ابگبرها وسّدتها
راحِتي ابوسط اللحد يمها عفتها

وسّدتها الگبُر .. والدمع صب دمه
عنّي راح الصبُر .. وروحي متألمه
⁦▪️⁩⁦▪️⁩⁦▪️⁩⁦▪️⁩⁦▪️

ابو الحسن الوائلي

الليالي الفاطميه ١٤٤٣ _ ٢٠٢١
الروايه الثانيه 👇