للأمام الحسين ع
⁦▪️⁩⁦▪️⁩⁦▪️⁩⁦▪️⁩⁦▪️
طايح عالترب يبن الحميه
فوگ الغبره واتشوف المنيه
يا أصعب أمُر .. يا أصعب أمُر
⁦▪️⁩⁦▪️⁩⁦▪️⁩⁦▪️⁩⁦▪️
حاير ابطف كربله ويّه الاهالي
وحدك اتضل سيدي وابلايه والي
تفگد ابهاي الارض كل لحظه غالي
عاليطيح اعله الثره دمعك يلالي

مو سهله الشمس غيرت رسومك
ثلث أيام بالحر تگضي يومك
يا حرّ الظهُر .. يا أصعب أمُر
⁦▪️⁩⁦▪️⁩⁦▪️⁩⁦▪️⁩⁦▪️
بيك عاشت سيدي جمره اعله جمره
واگف ابنص الشمس والحسره حسره
عينك امن الفاجعات اهوايه حمره
تعطش وضيم العطش چبدك يفطره

الماي من العده ابنفسك تطلبه
تبقه ثلث ليالي وما تشربه
چبدك منفطُر .. يا أصعب أمُر
⁦▪️⁩⁦▪️⁩⁦▪️⁩⁦▪️⁩⁦▪️
اتقاتل وضيم التعب عينك ملاهه
وحدك وجمر والعطش چبدك چواهه
چم سهم من العده بالهم اجاهه
چم جرح بعد السهم روحك لگاهه

باچر عالتراب ابغيب صبحك
توگع والشمر رايد يذبحك
وجروح التمُر .. يا أصعب أمُر
⁦▪️⁩⁦▪️⁩⁦▪️⁩⁦▪️⁩⁦▪️
بالگلب سهم الغدر صارت ضربته
وبسهم ذو شفرتين وبيك شفته
توگع اعله الگاع من قوّة ضربته
ترتعش ضليت من الضربه أنته

گلبك شاهد اهموم المنايه
تمّمها السهم كل الرزايه
من سهم الغدُر .. يا أصعب أمُر
⁦▪️⁩⁦▪️⁩⁦▪️⁩⁦▪️⁩⁦▪️
عالارض جسمك طريح ودمّه سايل
نورك اليضوي السمه عالغبره هاطل
الموتتك تبچي السمه ومدمعها هامل
طولك اليحمي الخيم عالتربه نازل

طولك بالخيم يحويله هيبه
لاكن من طحت جتها المصيبه
شافت چم كسُر .. يا أصعب أمُر
⁦▪️⁩⁦▪️⁩⁦▪️⁩⁦▪️⁩⁦▪️
يا جبل من المهُر عالغبره واگع
أنته يا أول جبل شايل مواجع
ابصدرك الحافر أشوف آثار طابع
باوعت چفّك شفت تسعة أصابع

خنصر چفك الضايع تعوفه
ظهرك عالصدر مطبوگ اشوفه
وجروح التطُر .. يا أصعب أمُر
⁦▪️⁩⁦▪️⁩⁦▪️⁩⁦▪️⁩⁦▪️
ياضوه ومن الخيم طفّوله ضيّه
سيدي عشت الحزن قبل المنيه
جسمك العانه السحگ بالغاضريه
جسمك اتگطّع وذر فوگ الوطيه

منك ما سِلم كلشي يدامي
سلبوا حتّه ثوبك يا أمامي
بچفوف الشمُر .. يا أصعب أمُر
⁦▪️⁩⁦▪️⁩⁦▪️⁩⁦▪️⁩⁦▪️
تمت

ابو الحسن الوائلي

٢٠٢١/ ١٤٤٣

ليله ١١ محرم 👇

للسيده زينب ع
⁦▪️⁩⁦▪️⁩⁦▪️⁩⁦▪️⁩⁦▪️
الليله زينب بت علي اتغير وضعها
ابلا ولي ومحتاره واتهل ابدمعها
بت علي مهمومه والمذبح لچمها
⁦▪️⁩⁦▪️⁩⁦▪️⁩⁦▪️⁩⁦▪️
زينب اشچم فاجعه اتشوف وأذيه
عاشت ابـنـص الجرح شافت رزيه
ويـه ابـو فاضـل اسـمها الهاشميه
چان زينب بـت علي صار السبيه

ويّه عباس الگمر مهيوبه چانت
هسه محتاره وبلا عباس صارت
كربله وضيم السبي غيّر أسمها
⁦▪️⁩⁦▪️⁩⁦▪️⁩⁦▪️⁩⁦▪️
ابليلة الحادي عشر حيرتها حيره
خـيّـمـت فوگاهه الهموم الچبيره
كل شخص من الاهل يلتم مصيره
اگبال زيـنـب تنذبح كل العشيره

شافت اشچم فاجعه ويكبر جرحها
اگبال زينب منذبح بالطف صبحها
حايره وعباس ما يدري ابألمها
⁦▪️⁩⁦▪️⁩⁦▪️⁩⁦▪️⁩⁦▪️
عاشرت كـل الـجـروح المـاكـو منها
ابلا حمه وسوط النذل يجرح متنها
حيره محتاره وبقت نسوه ابضعنها
بس عليل اوياهه ضل ويا حزنها

بس عليل اوياهم ومچتوفه ادينه
والنسه اوياهه وبقت زينب حزينه
ابليلة الوحشه حزينه وزاد همها
⁦▪️⁩⁦▪️⁩⁦▪️⁩⁦▪️⁩⁦▪️
زينب ابـطـف كربله المدمع حناهه
من عگب عباس ابن جوشن سباهه
بالطفوف ابـلا ولـي وظـالـم ولاهه
اگبال عيناهه صـفـه مذبوح اخاهه

كربله وبيها الجره يلچم گلبها
دمعة الفاگد عله الوجنه تصبها
كربله وهذا الاسم لا مارحمها
⁦▪️⁩⁦▪️⁩⁦▪️⁩⁦▪️⁩⁦▪️
زينب الـچـانـت قـبـل ما ينظُروها
خمسه واثلاثين عام اوياهه اخوها
مـن بـعـد عـباس زيـنـب يسّروها
باقي فـوگ الـگاع والـغربه سبوها

يا ظلام الليل هونك عالغريبه
شاهدت چم فاجعه ابليل المصيبه
ألمن ابليل الهضم تشرح هضمها
⁦▪️⁩⁦▪️⁩⁦▪️⁩⁦▪️⁩⁦▪️
زيـنـب الـچـان الهوه يخجل يمرها
تـمـشي چـانـت يمسح الكافل اثرها
تمشي مهيوبه وعگب طيحة گمرها
شاهدوها الناس يا وسفه ابيسرها

چان ابو فاضل يضللها ابمشيها
وينه عباس الگمر لحظة سبيها
بالطفوف اتذبحت زينب زلمها
⁦▪️⁩⁦▪️⁩⁦▪️⁩⁦▪️⁩⁦▪️
لـو رجـع عباس يـم زيـنـب ندبها
وشاف زينب تبچي والدمعه تصبها
چـان هـاي الـدنـيـه بـچـفوفه گلبها
وتنگطع أيـد الـذي اتـعـده وضربها

بالحـبـل گـيـدوها واتهل ابدمعها
من الضرب زينب تره كسروا ضلعها
بالضرب من الضلع ضل يجري دمها
⁦▪️⁩⁦▪️⁩⁦▪️⁩⁦▪️⁩⁦▪️
تمت

ابو الحسن الوائلي

٢٠٢١/ ١٤٤٣

لسان حال السيده زينب عند جسد الحسين ع
⁦▪️⁩⁦▪️⁩⁦▪️⁩⁦▪️⁩⁦▪️
خويه خويه عالارض طايح لگيتك
جيتك أركض خويه بدموعي بچيتك
عالوطيه .. يا رزيه
⁦▪️⁩⁦▪️⁩⁦▪️⁩⁦▪️⁩⁦▪️
خويه اشچم جرح من مر الصبح
بجروحه وتعنّه بيه
چم لوعه التمُر من مر الظهر
أحزانه حِمل عليه
خويه اعله الارض وضلوعك ترض
بيها الخيل الاعوجيه
واعظامك تطگ من گد السحگ
صوت الطگ وصل أليه

دمعي يجري والحرم تنحب أمامك
بالمخيّم واسمعت كسرة عظامك
يا أذيه .. يا رزيه
⁦▪️⁩⁦▪️⁩⁦▪️⁩⁦▪️⁩⁦▪️
شفتك عالارض والمدمع يفض
جيتك والحرم ورايه
كلها اموذره خويه اعله الثره
كل اهلي بقوا رمايه
ماعدنه ولي نسوه ابمحملي
نسوه ومالگت حمايه
مدمعنه يصب نمشي بهالدرب
خويه اويه العده سبايه

ماكو والي شافوا النسوه الاعادي
ابلايه كافل والشمر صار النه حادي
ابهالقضيه .. يا رزيه
⁦▪️⁩⁦▪️⁩⁦▪️⁩⁦▪️⁩⁦▪️
دمعاتي جمُر گلبي يستعُر
من اللوعه والمصيبه
ويزيد الحزن وابگلبي اليِون
گلبي الزايد ابنحيبه
ياجرح الصعُب شافتها الغرُب
بت حيدر صفت غريبه
ويزيد الهضُم زينب تنهضُم
جرح الفاجده اشيطيبه

هايه زينب حايره وشافت مصايب
ابلايه اخوها حرمه واتشوف العجايب
الهاشميه .. يا رزيه
⁦▪️⁩⁦▪️⁩⁦▪️⁩⁦▪️⁩⁦▪️
من بعد الخدُر ياخويه الشمُر
بسياط الزجُر ضربنه
والمدمع دمه ماعدنه حمه
لا والي حمايه عدنه
ما واحد سلم هجموا عالخيم
يا خويه احرگوا خيمنه
والمدمع هِمل لا خيمه التضل
خويه ونحتمي ابشيلنه

ماكو والي وبالشيِل نستُر وجهنه
خويه تصعب نظرة الظالم تهدنه
لوعه بيه .. يا رزيه
⁦▪️⁩⁦▪️⁩⁦▪️⁩⁦▪️⁩⁦▪️
يا خويه الحزن بجروح المتن
وسياط المتن ثجيله
والمدمع جلي ماعندي ولي
والمدمع دمه مسيله
يا خويه الدرب ما يسهل صعب
وهموم الدرب طويله
ماعندي ولي طايح كافلي
زينب صارت الكفيله

ماكو والي زينب الكفلت خدرها
يا جرحها كلشي مايجبُر كسرها
ادموعي هيه .. يا رزيه
⁦▪️⁩⁦▪️⁩⁦▪️⁩⁦▪️⁩⁦▪️
ربّات الخدر ياوسفه الشمر
وسفه ابسوطه رد عليهن
تنسب فاطمه وحماي الحمه
وسفه وينشتم نبيهن
والمدمع يصُب من گد الضرب
ورّم بالضرب أديهن
لا أخ لا ابو بس أبن الاخو
ما يگدر يحامي بيهن

ياهو يفزع يگدر ايحامي العقيله
أبن اخويه حاير وصحته عليله
فزعه ليّه .. يا رزيه
⁦▪️⁩⁦▪️⁩⁦▪️⁩⁦▪️⁩⁦▪️
خويه ابكل صبُر راح امشي ابيسُر
أبري ذمتي ياحبيبي
بدروب السفر ينشاف الخطر
خويه ويعتلي نحيبي
للشام اعتني والمدمع حني
وابگلبي اشتعل لهيبي
شكراً كربله شفت المسأله
ابگاعچ هايه هذا شيبي

يا مصابي والگلب يشتد نحيبه
شوفتني هالطفوف اشچم مصيبه
الغاضريه .. يا رزيه
⁦▪️⁩⁦▪️⁩⁦▪️⁩⁦▪️⁩⁦▪️
تمت

ابو الحسن الوائلي

٢٠٢١/ ١٤٤٣

ليالي السبي 👇

⁦▪️⁩⁦▪️⁩⁦▪️⁩⁦▪️⁩⁦▪️
عالهزل هيبة علي سبيه
ماكو والي وشافت الاذيه
سلمت أمرها .. تمشي ابيسرها
سبيه
⁦▪️⁩⁦▪️⁩⁦▪️⁩⁦▪️⁩⁦▪️
هيبة الكرار هـايـه وروح ابـو فاضـل سبيه
هايه گلب احسين هايه زينب اتشوف الاذيه
زينب اتشوف المصيبه وعاشرت هـاي الرزيه
عگب ابو فاضل حداهه كل شخص ماله حميه

راحت ابدرب السبي حزينه
يا گلبها الـمـو سـهـل ونينه
يصبح خبرها .. تمشي ابيسرها
سبيه
⁦▪️⁩⁦▪️⁩⁦▪️⁩⁦▪️⁩⁦▪️
زينب الـضـلـت حزينه والـدمـع بالخد يلالي
زينب الـراحـت سبيه حـايـره دون الاهالي
تبقه محتاره وغريبه شافت اشچم لوعه تالي
وسفه ابن جوشن نظرها ابكربله ماعدها والي

دمـعـة الحـايـر بـقـت تهلها
عگب ابو فاضل منو الكفلها
يطول صبرها .. تمشي ابيسرها
سبيه
⁦▪️⁩⁦▪️⁩⁦▪️⁩⁦▪️⁩⁦▪️
من عگب كافل خدرها حايِره اتضل العقيله
حره محتاره وحزينه والدمع بالخد تسيله
للسبي وماتلگه غيره وما بقت عدها وسيله
من عگب عباس اخوها عالضعن صارت كفيله

زينب الما شافت السلامه
هيه كافل تبقه عاليتامه
الحيره اشكبرها .. تمشي ابيسرها
سبيه
⁦▪️⁩⁦▪️⁩⁦▪️⁩⁦▪️⁩⁦▪️
بالدرب يسچب دمعها تنتحب مثل الثواكل
تدري درب الشام يصعب زينب وماعدها كافل
ضلّت اتحامي الضعينه واليتامه والارامل
لو ينظروها الاعادي اتنادي وينك يابو فاضل

لو يباوع واحد العقيله
تبقه تبچي والدمع تسيله
وتندب گمرها .. تمشي ابيسرها
سبيه
⁦▪️⁩⁦▪️⁩⁦▪️⁩⁦▪️⁩⁦▪️
راحت ابدرب المصيبه والغرب تحرس ضعنها
لا أخو الضل لا گرايب عدها زينب ياحزنها
شافت الحسره الچبيره شافت اللوعه ابزمنها
صعبه تحريك العبايه لازگ الثوب ابمتنها

زينب وما يستقر ألمها
والسياط التنزل ابجسمها
طابع ظهرها .. تمشي ابيسرها
سبيه
⁦▪️⁩⁦▪️⁩⁦▪️⁩⁦▪️⁩⁦▪️
من مشت درب اليساره ابهيبه ماعدها حمايه
من مشت مهيوبه هيه اتحزمت ابعباس رايه
صح مشت مسبيه لاكن قاومت حته النهايه
وايخسه راحت ذليله زينب ابدرب السبايه

مو ذليله وبالدرب سبيه
عاشت الحره وتزول أميه
عايش خدرها .. تمشي ابيسرها
سبيه
⁦▪️⁩⁦▪️⁩⁦▪️⁩⁦▪️⁩⁦▪️
تمت

ابو الحسن الوائلي

٢٠٢١/ ١٤٤٣

للسيده زينب ع
⁦▪️⁩⁦▪️⁩⁦▪️⁩⁦▪️⁩⁦▪️
زينب غريبه ابلا ولي...... يعباس
محتاره زينب بت علي... يعباس
مدمعها هامل .. ماعدها كافل
يعباس
⁦▪️⁩⁦▪️⁩⁦▪️⁩⁦▪️⁩⁦▪️
أختك المهيوبه يا كافل خدرها
حايره وبين الغرب يكبر صبرها
زينب الچان الهوه يخجل يمرها
ابحيره بعدك وانته ماتدري ابكسرها

محتاره ماعدها حرس... يعباس
بالگوّه لو جرّت نفس..... يعباس
والهم يكامل .. ماعدها كافل
يعباس
⁦▪️⁩⁦▪️⁩⁦▪️⁩⁦▪️⁩⁦▪️
يابو فاضل زينب اليكبر ألمها
والمصايب بالگلب طرّت سهمها
اختك ابلا كافل وما تدري همها
تعرف ابدرب السبي ابموتك لچمها

ما يسهل وهمها صعب... يعباس
راحت سبيه ابهالدرب... يعباس
ها يابو فاضل .. ماعدها كافل
يعباس
⁦▪️⁩⁦▪️⁩⁦▪️⁩⁦▪️⁩⁦▪️
وياك يا عباس اجت من المدينه
هسه رجعت يا گمر هاشم حزينه
اتنادي بعدك يا ضوه اعيوني انولينه
بالسبي صارت كفيله اعله الضعينه

مسبيه من دونك مشت... يعباس
تنحب يبو فاضل بقت... يعباس
مثل الثواكل .. ماعدها كافل
يعباس
⁦▪️⁩⁦▪️⁩⁦▪️⁩⁦▪️⁩⁦▪️
زينب العاشت يعباس الاذيه
شافت ابعاشر محرم چم رزيه
كل اهلها اعله الثره فوگ الوطيه
راحت ابدرب السبي ابدمعه جريه

هم السبي بعد الحزن... يعباس
ابهذا الدرب زينب تون... يعباس
چم لوعه شايل .. ماعدها كافل
يعباس
⁦▪️⁩⁦▪️⁩⁦▪️⁩⁦▪️⁩⁦▪️
زينب ابهذا الدرب مدمعها هامل
ناحت ابدرب السبي مثل الثواكل
وابحبلهم عالهزل گيدها جاهل
ترضه گيدوها ابحبلهم يابو فاضل

زينب تشاهد چم جرح... يعباس
ترفه الچفوف وتنجرح... يعباس
گيد السلاسل .. ماعدها كافل
يعباس
⁦▪️⁩⁦▪️⁩⁦▪️⁩⁦▪️⁩⁦▪️
گلب زينب يابو فاضل باقي ذايب
عن ضعنها ابهالدرب چم والي غايب
شافت ابطف كربله كل العجايب
تمشي درب الشام واتشوف المصايب

راحت سبيه اعله الهزل... يعباس
ابدرب السبايه الموسهل... يعباس
چم حسره حامل .. ماعدها كافل
يعباس
⁦▪️⁩⁦▪️⁩⁦▪️⁩⁦▪️⁩⁦▪️
تمت

ابو الحسن الوائلي

٢٠٢١/ ١٤٤٣

لهفي لـ حال السيده زينب في ليل الحادي عشر وهي أول ليله لها من دون اخوه
⁦▪️⁩⁦▪️⁩⁦▪️⁩⁦▪️⁩⁦▪️
اجروحي چبيره .. ادموعي غزيره
الدمعه تلالي .. الدمعه تلالي
⁦▪️⁩⁦▪️⁩⁦▪️⁩⁦▪️⁩⁦▪️
اشوف الليله ظلمه وحايره ابوحدي
واشوف الغربه گامت بالضعن تحدي
اباوع يمنه يسره ودمعتي ابخدي
ولا كافل حضرني ولا اخو عندي

ليله طويله .. بيها العقيله
ما عدها والي .. ما عدها والي
⁦▪️⁩⁦▪️⁩⁦▪️⁩⁦▪️⁩⁦▪️
اشاهد چم مصيبه ابحسرتي او ونّي
مشوا اهلي وبقيت اتمايل ابحزني
وكت ما ودّعوني وغادروا عنّي
بقه حتّه الهوه ابنسماته يلچمني

ليله عظيمه .. ليلة هضيمه
واني اشبقالي .. واني اشبقالي
⁦▪️⁩⁦▪️⁩⁦▪️⁩⁦▪️⁩⁦▪️
حزينه ابليلتي واخواني مو يمي
جروح هوايه بيّه ومو سهل همي
السياط البيّه تنزل زورگت عظمي
التعب سيطر عليه وخيّم ابجسمي

سوط آل اميه .. ينزل عليه
ورّمني تالي .. ورّمني تالي
⁦▪️⁩⁦▪️⁩⁦▪️⁩⁦▪️⁩⁦▪️
حزينه ابوحدي والعالم ينضروني
عگب عباس ابو الغيره يضربوني
احشّم وين اخوتي وما يحضروني
سبيه اعله الهزل همهم يگودوني

ابدرب المنايه .. نرحل سبايه
هم واجالي .. هم واجالي
⁦▪️⁩⁦▪️⁩⁦▪️⁩⁦▪️⁩⁦▪️
أنه الما چان واحد ينظر إخيالي
اباوع كلها تنظُر عالخدُر تالي
اروح شلون دربي ابلايه كفّالي
اشاهد للسبي حظروا الي إحبالي

جابوا حبلهم .. خشنات اصدهم
حضروا حبالي .. حضروا حبالي
⁦▪️⁩⁦▪️⁩⁦▪️⁩⁦▪️⁩⁦▪️
ونيني إشلون اگطعه وانفي مبچايه
وكفيلي اعله الشريعه وطاحت الرايه
حزينه وتاذي كلّش هاي الحچايه
تأذيني وتزيّد لوعتي اهوايه

والكافل اخته .. هزني ابوگعته
هذا الجرالي .. هذا الجرالي
⁦▪️⁩⁦▪️⁩⁦▪️⁩⁦▪️⁩⁦▪️
انوح وگلبي من اللوعه شيصبره
واشوف إحسين ضامي وينگطع نحره
واشوف اعظام اخويه كلها متكسره
اشوف الاعوجيه الداست ابصدره

طبگوله ظهره .. طحنوله صدره
دم نحره هالي .. دم نحره هالي
⁦▪️⁩⁦▪️⁩⁦▪️⁩⁦▪️⁩⁦▪️

تمت

ابو الحسن الوائلي
٢٠٢١/ ١٤٤٣

‌▪️⁩‌▪️⁩‌▪️⁩‌▪️⁩‌▪️
قرائين... مشن درب اليساره
قرائين... وسط قصر الاماره
مشن درب السبي
خدُر عفّه وعبي
‌▪️⁩‌▪️⁩‌▪️⁩‌▪️⁩‌▪️
تبدي احزان السبايه من الطفوف القاحله
صوت الاحزان الچبيره طالع وبالطف عله
زينب اعله الـتـل تنادي والـمـدامـع هامله
كل اهلنه اعله الوطيه انذبحوا ابطف كربله

والجروح... چبيره وماكو والي
والجروح...... دمع عيني يلالي
اعله تل الزينبي
خدُر عفّه وعبي
‌▪️⁩‌▪️⁩‌▪️⁩‌▪️⁩‌▪️
عالمصاب المر عليهن حيلي صاير منهدِم
وسفه ربّات الحجاب اتباوع اعليها الزلِم
زينب اتنادي حـقـيقه هايه لو هايه حلِم
امـذبّحه كل الاهالي وبينه ماعدهم علِم

والالام... حبل چتفوها ادينه
والالام... غرُب تنظُر علينه
نسه آل النبي
خدُر عفّه وعبي
‌▪️⁩‌▪️⁩‌▪️⁩‌▪️⁩‌▪️
زينب الچانت أمـيـره وچـان حاميها گمر
الدنيه راوتها المصايب مارحم بيها الدهر
هذي زينب يابو فاضل حايره وزاد القهر
تنظُر اعليها الاعادي وانته ماعندك خبر

يحماي... صفت زينب غريبه
يحماي... تشوف اشچم مصيبه
ابچفوف الناصبي
خدُر عفّه وعبي
‌▪️⁩‌▪️⁩‌▪️⁩‌▪️⁩‌▪️
الواحد الماعنده والي حاله يصبح مو سهل
زينب الـراحـت سبيه ابـلا ولي فـوگ الهزل
حايره وماعـدها والي والـدمـع مـن دم يهل
بس عليل بهالضعينه ويمشي مچتوف ابحبل

والچفوف... ابحبلهم گيّدوها
والچفوف... أبد مايرحموها
حداهن أجنبي
خدُر عفّه وعبي
‌▪️⁩‌▪️⁩‌▪️⁩‌▪️⁩‌▪️
دخلوا الكوفه يساره وما بقه بيهم صبُر
يمشن وماكو حمايه يمشن وزاد الكسُر
نسوه جابوهن يساره دخّلوهن للقصُر
اتصدهن ابن ازياد عينه وبالمتن سوط الزجُر

بالعيون... يصدون ابمصيبه
بالعيون... يجروحون الحبيبه
يصد الهن صبي
خدُر عفّه وعبي
‌▪️⁩‌▪️⁩‌▪️⁩‌▪️⁩‌▪️
بالقـصُـر مـحتاره زيـنـب تبقه ويسيل الدمع
والدمه من گد ضربهم تبقه تجري من الضلع
اتنادي يخواني الغريبه والـمـعـاتـب ينسمع
ايگلها أبـن ازياد هـذا راس اخـوچ المنگطع

بالعناد... يلّوح راسه يمها
بالعناد..... تعاتب يا ألمها
يزينب عاتبي
خدُر عفّه وعبي
‌▪️⁩‌▪️⁩‌▪️⁩‌▪️⁩‌▪️
بالقصر زينب حزينه تبچي والمدمع يصب
حرمه واتصد الها غربه هايه ياعالم صعب
وسفه بت حيدر غريبه وحايره بين الغرب
گلب زينب بالمصايب ياخلگ افجع گلب

والهموم...... تمُر كلش ثگيله
والهموم... تفت گلب العقيله
ويضل خدرچ نبي
خدُر عفّه وعبي
‌▪️⁩‌▪️⁩‌▪️⁩‌▪️⁩‌▪️
تمت

ابو الحسن الوائلي

٢٠٢١/ ١٤٤٣

لسان حال الامام السجاد ع عندما أتر لدفن الجثث الطاهره
⁦▪️⁩⁦▪️⁩⁦▪️⁩⁦▪️⁩⁦▪️
يا حيرتي ابكربله
ادموع الوجن هامله
لأحبابي أحفر چم گبُر
وسط الگلب يلهب جمُر
⁦▪️⁩⁦▪️⁩⁦▪️⁩⁦▪️⁩⁦▪️
جيت لرض الطف حزين وبيّه جمري
ادفن اهلي وكل اخوتي وزاد صبري
دمعتي من دم بقت بخدودي تجري
جمري وسط احشاي يلهب بيّه يسري

دمعي يهل بالوجن
وابگلبي زاد الحزن
طاحوا قتل أصعب أمُر
وسط الگلب يلهب جمُر
⁦▪️⁩⁦▪️⁩⁦▪️⁩⁦▪️⁩⁦▪️
گلبي برض الطف يبيّن انكساره
روحي ملهوفه على اهلي الغياره
گلبي ماضل بي صبر مات اصطباره
چم لحد احفر انه ودمعي ايتجاره

انظر جثثهم سوه
فوگ الثره ابنينوه
ظهري ابفگدهم منكسُر
وسط الگلب يلهب جمُر
⁦▪️⁩⁦▪️⁩⁦▪️⁩⁦▪️⁩⁦▪️
رايد احفر بيدي ملحوده چبيره
بيها اوسد انصارنه الشالتها غيره
كل شخص بيهم وفه واثبت مصيره
ثلث ليالي اعله الثره ابحرّ الظهيره

انصار ابوي الابي
ضحّوا عمُر للنبي
للدين نذروه العمُر
وسط الگلب يلهب جمُر
⁦▪️⁩⁦▪️⁩⁦▪️⁩⁦▪️⁩⁦▪️
هايه حفره وكون اجيب احزامي ليها
بيدي احفرها ابدمع عيني وبچيها
جثته فوگ الغبره والدم غافي بيها
جثّة الاكبر طريحه ودم عليها

الاكبر بقه اعله الثره
والجثّه متوذره
نار المصايب تستعُر
وسط الگلب يلهب جمُر
⁦▪️⁩⁦▪️⁩⁦▪️⁩⁦▪️⁩⁦▪️
حفره للقاسم احطها ودمعي يهفه
هذا ابن عمّي صريع وجرحه نزفه
ابدال ما ينزَف ولا يتحنّه چفّه
يركض الموته وشفت بعيونه لهفه

وسط الحرب زفّته
من دم صبح حنّته
هذا الطهُر وابن الطهُر
وسط الگلب يلهب جمُر
⁦▪️⁩⁦▪️⁩⁦▪️⁩⁦▪️⁩⁦▪️
هذا عمّي ارد ادفنه وهذا لحده
مو سهل عمّي الگمر ياذينه فگده
جيت اشبگه وماشفت چفّه اعله زنده
هواي احبّه وگوّه راح اگدر اوسده

فارگنه راعي الفخر
صار الوعد عالنهر
بفراگه چم لوعه التطُر
وسط الگلب يلهب جمُر
⁦▪️⁩⁦▪️⁩⁦▪️⁩⁦▪️⁩⁦▪️
جيت يم جثّة ابوي ابدمعه حمره
ابلهفتي الصدره اجيته وردت انظره
اذكر الخيل الاجت كسرتله صدره
اسيوف وارماح وخيول ودامي نحره

دمّه اليهل بالجسم
داسنّه خيل وزلم
جسمه انسحگ وكت الظهُر
وسط الگلب يلهب جمُر
⁦▪️⁩⁦▪️⁩⁦▪️⁩⁦▪️⁩⁦▪️
وسّدت جسم الابو ابعيني الدميعه
جمّعتهن گوّه اوصاله الگطيعه
عدنه عبد الله الطفل اعظم فجيعه
الّه اوسده اعله الصدر وادفن رضيعه

محّد سِلم بالذبح
حتّه الطفل منذبح
صاب الطفل سهم الغدُر
وسط الگلب يلهب جمُر
⁦▪️⁩⁦▪️⁩⁦▪️⁩⁦▪️⁩⁦▪️
تمت
١٤٤٣_٢٠٢١
ابو الحسن الوائلي

لسان حال السيده زينب في طريق السبي
⁦▪️⁩⁦▪️⁩⁦▪️⁩⁦▪️⁩⁦▪️
يگلبي ونحيبه
ينار المصيبه
⁦▪️⁩⁦▪️⁩⁦▪️⁩⁦▪️⁩⁦▪️
انسبيت وضاعت وجوه الوسامه
مشيت وبالسبي ماكو سلامه
مره وما بين نسوان ويتامه
شفت روس اخوتي السارت علامه

الرؤوس الخضيبه
ينار المصيبه
⁦▪️⁩⁦▪️⁩⁦▪️⁩⁦▪️⁩⁦▪️
مشيت وروحي ملچومه وكسيره
الخدر للشام معلوم ابمسيره
چنت وي كافلي مثل الاميره
وصفيت ابفرگته وحدي واسيره

حزينه الحبيبه
ينار المصيبه
⁦▪️⁩⁦▪️⁩⁦▪️⁩⁦▪️⁩⁦▪️
حزينه الروح وشچم لوعه بيها
العقيله اتنوح ما تگطع بچيها
صدگ زينب ولا والي اليجيها
صدگ اخوتها زينب تاركيها

المصايب عجيبه
ينار المصيبه
⁦▪️⁩⁦▪️⁩⁦▪️⁩⁦▪️⁩⁦▪️
مشيت ابلا ولي ابدرب المنيه
وأحس نار ابدليلي وتسري بيه
شفت كل الحزن بالغاضريه
ولا عندي ولي وشفت الاذيه

سبيه وغريبه
ينار المصيبه
⁦▪️⁩⁦▪️⁩⁦▪️⁩⁦▪️⁩⁦▪️
غريبه وحايره بعد الاهالي
أسيره ابلا كفيل وماكو والي
بعد عباس دمعي ابخدي هالي
الغرب من بعده تحرس بيه تالي

كفيلي اشيجيبه
ينار المصيبه
⁦▪️⁩⁦▪️⁩⁦▪️⁩⁦▪️⁩⁦▪️
نسه وأطفال تدرون انسبينه
بعد حامي الخدر كلنه انولينه
تضل ابلا ولي زينب حزينه
حزينه وگلبي مايگطع ونينه

المصايب تصيبه
ينار المصيبه
⁦▪️⁩⁦▪️⁩⁦▪️⁩⁦▪️⁩⁦▪️
مصاب الطف يزيّد بيه كسري
دمعتي المن دمه عالوجنه تجري
يوج ابگلبي ضل مايطفه جمري
حزينه وكربله شيبتلي عمري

دمعتي سچيبه
ينار المصيبه
⁦▪️⁩⁦▪️⁩⁦▪️⁩⁦▪️⁩⁦▪️
تمت

ابو الحسن الوائلي
٢٠٢١/ ١٤٤٣

لسان حال السيده رقيه عند جسد ابيها الحسين
⁦▪️⁩⁦▪️⁩⁦▪️⁩⁦▪️⁩⁦▪️
بويه بويه... بويه اشوفك ساكت ومترد عليه
بويه بويه........ افتح اعيونك أنه بنتك رقيه
⁦▪️⁩⁦▪️⁩⁦▪️⁩⁦▪️⁩⁦▪️
بويه شفتك طايح ابعثراتي اجيتك
مابقت خيمه ابلهف گلبي اعتنيتك
انته مرمي اعله الثره طايح لگيتك
طفله محتاره ابلهفتي دوريتك

بويه بويه... تدري بعدك چم جرح خيّم عليه
بويه بويه........ افتح اعيونك أنه بنتك رقيه
⁦▪️⁩⁦▪️⁩⁦▪️⁩⁦▪️⁩⁦▪️
بويه بعدك چم جرح يالغالي شفنه
وانته يا بويه دوه وبلسم جرحنه
بويه محتارين واحترگت خيمنه
والشمر واصحابه بغيابك لچمنه

بويه بويه..... طفله محتاره وتزيد اللوعه بيه
بويه بويه........ افتح اعيونك أنه بنتك رقيه
⁦▪️⁩⁦▪️⁩⁦▪️⁩⁦▪️⁩⁦▪️
مـن بـعـدكـم بويه چم ظالم ولانه
والشمر بالسوط ضل يركض ورانه
حايرات ابليل نـسـوه ابـلا حمانه
بويه نار الخيمه مـن بعـدك چوانه

بويه بويه...... من لهيب النار محروگات اديه
بويه بويه........ افتح اعيونك أنه بنتك رقيه
⁦▪️⁩⁦▪️⁩⁦▪️⁩⁦▪️⁩⁦▪️
حايرات ابليل نبقه وماكو والي
والغرب شافونه من بعد الاهالي
تالي ننگاد ابحبال الـغـربـه تالي
من بعدكم بويه والمدمع يلالي

بويه بويه..... بس نساء وشفنه يابويه الاذيه
بويه بويه........ افتح اعيونك أنه بنتك رقيه
⁦▪️⁩⁦▪️⁩⁦▪️⁩⁦▪️⁩⁦▪️
عالعطش يابويه گلبي ايموت صبره
امن العطش يلهب دليلي وبيه جمره
ايگلي عطشانه النذل مـتـعـمـد أمره
تـرضـه جـاب الماي گدامي ويشمره

بويه بويه.. ما سگاني الماي ذبه اعله الوطيه
بويه بويه........ افتح اعيونك أنه بنتك رقيه
⁦▪️⁩⁦▪️⁩⁦▪️⁩⁦▪️⁩⁦▪️
يالوداعك بي جرح كسر الخواطر
بويه تعرف بالسبي لن گلبي كاسر
عيني شافت چم جرح بنهار عاشر
عظم صدرك بويه طاحنته الحوافر

بويه بويه....عظمك الغالي تسحگه الاعوجيه
بويه بويه........ افتح اعيونك أنه بنتك رقيه
⁦▪️⁩⁦▪️⁩⁦▪️⁩⁦▪️⁩⁦▪️
راح اودعك بويه ودموعي مطرها
اني طفله وروحي ما يسهل كسرها
عمتي بحباله الشمر تقبل يجرها
هيه والنسوه السبي صاير أمرها

بويه بويه....... طفله يابويه ويگودوني سبيه
بويه بويه........ افتح اعيونك أنه بنتك رقيه
⁦▪️⁩⁦▪️⁩⁦▪️⁩⁦▪️⁩⁦▪️
تمت

ابو الحسن الوائلي

٢٠٢١/ ١٤٤٣

للسيده زينب ع
‌▪️⁩‌▪️⁩‌▪️⁩‌▪️⁩‌▪️
هيبة علي الكرّار زينب أكيده
تحچي حچي الشجعان بت الصميده
الهاشميه .. بيها الحميه
‌▪️⁩‌▪️⁩‌▪️⁩‌▪️⁩‌▪️
زينب البيها بقت تدوي الشراره
ما طفت من الذبح بيها الحراره
راحت ابدرب السبي ويّه اليساره
ذلّت ابهيبة علي قصر الاماره

ابقصر الاماره اتفوت هيبة اهلها
صار القصر والجيش جوّه رجلها
هاي الوفيه .. بيها الحميه
‌▪️⁩‌▪️⁩‌▪️⁩‌▪️⁩‌▪️
راحت ابدرب السبي أول أسيره
مو ذليله من مشت راحت أميره
نزلت ابهيبة ابوها ديره ديره
ذلّت إخشوم الرجال إشگد چبيره

مهيوبه تمشي انشوف درب السبايه
راحت جبل مهيوب لابس عبايه
بت الزچيه .. بيها الحميه
‌▪️⁩‌▪️⁩‌▪️⁩‌▪️⁩‌▪️
من مشت درب السبي وغربه حدوها
لو يمر بيها الهوه يغضب اخوها
عالرمح راسه وزعل لو ينظْروها
راسه يغضب لو يشوف ايطالعوها

فوگ الرمح عباس بس عينه ليها
يغضب أذا خنّاس باوع عليها
نفسه الابيه .. بيها الحميه
‌▪️⁩‌▪️⁩‌▪️⁩‌▪️⁩‌▪️
من ابوها وامها صاير بيها مقياس
راحت ابدرب السبي بس چنها عباس
لو يحاچيها شخص من هاي الارجاس
خلّت الويّاهه يحچي ايدنّگ الراس

من حيدر الكرّار شدّت عزمها
يخجل هوه الاحزان من شيلة امها
ضلّت قويه .. بيها الحميه
‌▪️⁩‌▪️⁩‌▪️⁩‌▪️⁩‌▪️
تمشي زينب بالسبي وماكو سلامه
والمواجع ضلّن ابـ زينب علامه
راحت ابدرب السبي مثل الحمامه
اوياهه يمشن چنهن اطيور اليتامه

تمشي الطريق ابروح بت الحموله
چنها الكفيل وسار كلها بطوله
داست أميه .. بيها الحميه
‌▪️⁩‌▪️⁩‌▪️⁩‌▪️⁩‌▪️
تمشي وهموم الگلب ويّاهه تكبر
وعالصبر طول الدرب بالگوّه تضطر
جيش اميّه بالهدرب حتماّ تحيّر
هايه زينب بالدرب لو هذا حيدر

لا همها درب الشام ما هم أموره
بيها الجروح اتزيد لاكن صبوره
شافت رزيه .. بيها الحميه
‌▪️⁩‌▪️⁩‌▪️⁩‌▪️⁩‌▪️
راحت ابدرب السبي هاي الحبيبه
وبيها يزداد الصبر من المصيبه
خيّمت فوگاهه الهموم العجيبه
يا گلبها شچم جرح زينب يصيبه

بيها الجروح اتزيد هاي العظيمه
شافت جروح اهواي شافت هضيمه
شافت اذيه .. بيها الحميه
‌▪️⁩‌▪️⁩‌▪️⁩‌▪️⁩‌▪️
تمت

ابو الحسن الوائلي
٢٠٢١/ ١٤٤٣

لسان حال السيده زينب تشكي الحال الى ابي الفضل العباس
‌▪️⁩‌▪️⁩‌▪️⁩‌▪️⁩‌▪️
شفنه اشچم جرح .. من مر الصبح .. يكافل
هاي أم الخدُر ..... زينب باليسُر ..... يكافل
‌▪️⁩‌▪️⁩‌▪️⁩‌▪️⁩‌▪️
بقت زينب ... بلا والي ... وحزينه
حزن يكبر ... گلب يشتد ... ونينه
بلا كافل ... فقط نسوه ... الضعينه
السبي گرّب ... يبو الغيره ... علينه

يحدينه الشمِر .. دمعي ينحدِر .. يكافل
ويزيد الصبُر ... زينب باليسُر ... يكافل
‌▪️⁩‌▪️⁩‌▪️⁩‌▪️⁩‌▪️
أمس بيدك .... يبو فاضل ... جبتني
ابأرض جدي .. يخي انته .. اكفلتني
شفت وحدي .. يخو زينب .. عفتني
يخي ريتك .... بلا والي .... شفتني

انظُر حيرتي ... بعدك محنتي ... يكافل
بيه اشكم كسُر .. زينب باليسُر .. يكافل
‌▪️⁩‌▪️⁩‌▪️⁩‌▪️⁩‌▪️
يخي تدري ... الهضُم يصعب ... عليه
بلا خيمه .... انكشف ضلّي .... المسيه
انضرب متني .. احترگ چفّي .. واديه
عله الناگه ..... يخي اركب ..... سبيه

دمعي اعله الوجن .. ويزيد الحزن .. يكافل
چم لوعه التمُر .... زينب باليسُر .... يكافل
‌▪️⁩‌▪️⁩‌▪️⁩‌▪️⁩‌▪️
أنه اچفوفك ... يبو الغيره ... حمتني
يضي عيني ... العده بعدك ... سبتني
الغرب تقبل .... بعد عينك .... ولتني
الشمر ترضه .. ابحبل حقده .. چتفني

يا جرحي الصعُب .. زينب تنضرُب .. يكافل
يا أصعب أمُر ..... زينب باليسُر ..... يكافل
‌▪️⁩‌▪️⁩‌▪️⁩‌▪️⁩‌▪️
جرح يصعب .. يضي عيني .. ابسبينه
عگب عينك .... يخي وليه .... انولينه
ردت تسمع .... يبو الغيره .... حچينه
يبو فاضل ... صحت ريتك ... تجينه

تبقه ابلا ولي .. زينب تنولي .. يكافل
أنفاسي جمُر .. زينب باليسُر .. يكافل
‌▪️⁩‌▪️⁩‌▪️⁩‌▪️⁩‌▪️
الحزن زينب ... يبن حيدر ... لمحها
انكسر بعدك .. يبو الشيمه .. جنحها
صفه ظلمه ... عگب عينك .. صبحها
صعُب اختك ... يبو فاضل .. جرحها

هاي أم الحزن .. محتاره وتون .. يكافل
لوعات اشكثُر ... زينب باليسُر .. يكافل
‌▪️⁩‌▪️⁩‌▪️⁩‌▪️⁩‌▪️
چنت امشي .. وتضل عينك .. ورايه
يخي بعدك ... حنت گلبي ... الرزايه
العده اويانه ... وبعد ماكو ... حمايه
عگب عينك .... يگودونه .... سبايه

تقبل شيمتك .. غربه ابغيبتك .. يكافل
چبدي منفطُر .. زينب باليسُر .. يكافل
‌▪️⁩‌▪️⁩‌▪️⁩‌▪️⁩‌▪️
عله اليجري ...... أذا گتلك ...... أألمك
عله امصابي .... يبو الغيره .... اكلمك
يخي يكبر .. حزن روحي .. اعله همك
يخي أدري ..... اذا اعتب ..... أهضمك

والمدمع دمه .. اجروحي مؤلمه .. يكافل
گلبي يستعُر .... زينب باليسُر .... يكافل
‌▪️⁩‌▪️⁩‌▪️⁩‌▪️⁩‌▪️
تمت

ابو الحسن الوائلي

٢٠٢١/ ١٤٤٣

كربلائي
لسان حال السيده زينب ع
‌▪️⁩‌▪️⁩‌▪️⁩‌▪️⁩‌▪️
حزينه ويجري دمع العين
يطوّل هالگلب صبره
ابطفوف الفاجعات اتسيل
دمعتي اعله الوجن حمره
‌▪️⁩‌▪️⁩‌▪️⁩‌▪️⁩‌▪️
رحت درب السبايه ابنوح تهل الدمعه من عيني
شفت مثل الجثث بالطف اباوع طشّت اسنيني
عجيبه وما تخش البال ابو فاضل يخلّيني
على زينب ابو فاضل
بطى وما يعرف اشيجره
‌▪️⁩‌▪️⁩‌▪️⁩‌▪️⁩‌▪️
رحت مسبيه من الطف سبيه وحايره ابحالي
لا أخ لا كفل موجود وحيده ودمعتي اتلالي
الجروح ابراسي ملتمّات عله راسي الحزن هالي
مشيت وحايره ابلا راي
مشيت ابهمّي متيسره
‌▪️⁩‌▪️⁩‌▪️⁩‌▪️⁩‌▪️
عگب عباس ابو الغيره رحت درب السبي ابوحدي
سبيه وما دره ابحالي مشيت ولا ولي العندي
اديرن بالوجه لا وين الدمع من دم وسط خدي
وحيده ولا كفيل اوياي
ابروحي تكبر الكسره
‌▪️⁩‌▪️⁩‌▪️⁩‌▪️⁩‌▪️
شفت چم لوعه من الطف گلبي اويه الاخو ذبحوه
اخوي اعله الترب ميت وبخيول العوج سحگوه
انطحن كل عظمه بالعوجاء وبسيوف الحقد وذروه
منو المثلي اخوها اتشوف
ضامي ومنگطع نحره
‌▪️⁩‌▪️⁩‌▪️⁩‌▪️⁩‌▪️
اسيره والجروح اتزيد حزينه والجرح يكبر
مثل لون العبي وجهي صفه وكل رسمي اتغيّر
الگلب مثل الخيم يلهب ونيراني تضل تسعر
حيلي بهالدرب مهدوم
وتلهب بالگلب جمره
‌▪️⁩‌▪️⁩‌▪️⁩‌▪️⁩‌▪️
بالطف چم جرح چم آه شفت چم حسره چم لوعه
آهات او ونين ونوح وجروح ابگلبي مطبوعه
شفت برض الطفوف آلام ومشيت ابدربي مفجوعه
عگب كل اخوتي واهلي
سبيه وبيّه چم حسره
‌▪️⁩‌▪️⁩‌▪️⁩‌▪️⁩‌▪️

تمت

ابو الحسن الوائلي
٢٠٢١/ ١٤٤٣

استشهاد الامام السجاد ع 👇

لسان حال الامام السجاد ع عندما دنت منه الوفاة وتذكر مصاب كربلاء
⁦▪️⁩⁦▪️⁩⁦▪️⁩⁦▪️⁩⁦▪️
چم مصيبه ومعضله
عيشتني كربله
چم رزيه .. چم رزيه
⁦▪️⁩⁦▪️⁩⁦▪️⁩⁦▪️⁩⁦▪️
أنه ابن الحُسين المنخطف لوني
مصيبه اشچم مصيبه شافت اعيوني
شفت اهلي ضحايه وخابت اضنوني
وانه ابحيره وعليل وهم يگيدوني

بالطفوف اشچم جرح
گلبي للهم ينفتح
يا أذيه .. يا أذيه
⁦▪️⁩⁦▪️⁩⁦▪️⁩⁦▪️⁩⁦▪️
ابمصاب الطف احسّن گلبي يتكسّر
الصبر وي روحي يكبر والحزن يكبر
أنه حالي عليل وعالصبر أضطر
ولا مل گلبي من المدمع الاحمر

بالطفوف الفاجعه
ولله گلبي اتگطّعه
الغاضريه .. الغاضريه
⁦▪️⁩⁦▪️⁩⁦▪️⁩⁦▪️⁩⁦▪️
شفت بالطف مصايب والدمع حاير
الصدر ديوان اشوفه وضيّف الحافر
وره هذا السحگ ضل جسمه متناثر
عشت بالطف عجيبه واني ما گادر

اصبر وزاد الصبر
گلبي بالطف منكسر
لوعه بيه .. لوعه بيه
⁦▪️⁩⁦▪️⁩⁦▪️⁩⁦▪️⁩⁦▪️
ابوي الباقي ضامي وروحه مستعره
ابوي الضامي گلبه وينگطع نحره
ابوي الباقي كل اوصاله متطشره
ابوي ومنّه ما سلمت ولا ذرّه

ولله بالطف مؤلمه
ضامي ضنوة فاطمه
عالوطيه .. عالوطيه
⁦▪️⁩⁦▪️⁩⁦▪️⁩⁦▪️⁩⁦▪️
رحت درب السبايا ومنشده بالي
الطفوف وكل حزنها غيّرن حالي
أنه اتذكّر اهلي والدمع هالي
ادفنت بالغاضريه عندي كل غالي

نمشي بدروب السبي
بيد اجانب ننسبي
صعبه هيّه .. صعبه هيّه
⁦▪️⁩⁦▪️⁩⁦▪️⁩⁦▪️⁩⁦▪️
مصاب الطف چبير وطابع ابذهني
عشت كل الجروح وزيّدن حزني
انوح ابحسرتي وما ينگطع ونّي
السبي وكل المصايب ولله تلچمني

تكبر اجروح الگلب
ويلي والمدمع يصب
الهم عليه .. الهم عليه
⁦▪️⁩⁦▪️⁩⁦▪️⁩⁦▪️⁩⁦▪️
اذا شفت الاكل يبقه الدمع يجري
يجي ابّالي الحُسين وما يضل صبري
يهل دمعي اعله خدّي ويلتهب جمري
مصاب الطف چبير وزيّد ابكسري

والدي گلبه احترگ
ضامي ميّت ياخلگ
بالمنيه .. بالمنيه
⁦▪️⁩⁦▪️⁩⁦▪️⁩⁦▪️⁩⁦▪️
تمت

ابو الحسن الوائلي
٢٠٢١/ ١٤٤٣

للامام السجاد ع
⁦▪️⁩⁦▪️⁩⁦▪️⁩⁦▪️⁩⁦▪️
يالشايل مصاب الطف على ظهرك
تتنفس جمُر لا مو هوه ابصدرك
يا أبن الحميه .. برض الغاضريه
⁦▪️⁩⁦▪️⁩⁦▪️⁩⁦▪️⁩⁦▪️
يالشفت كل المصايب والمواجع والالم
من مصاب الغاضريه گلبك انصاب ابسهم
اهلك انذبحوا أمامك حيلك اهنانه انهدم
بالسبي وضيم اليساره گلبك ابهاي انلچم

يالشفت المواجع والحزن والهم
بدروب السبايه گلبك اتألم
بس روحك قويه .. برض الغاضريه
⁦▪️⁩⁦▪️⁩⁦▪️⁩⁦▪️⁩⁦▪️
دمعتك بالطف جريه سيدي ابضيم الدهر
من المصايب يا أمامي گلبك ابهاي انفطر
ياهو مثلك شاف ابيّه عالثره وعظمه انكسر
وشاف ابوه الضامي جسمه وشافه مگطوع النحر

طايح عالتراب احسينك الغالي
شفته ابلايه راسه ابدمعك الهالي
طايح عالوطيه .. برض الغاضريه
⁦▪️⁩⁦▪️⁩⁦▪️⁩⁦▪️⁩⁦▪️
بالسبي وضيم السبايه ماكو حيلك من رحت
سيدي ابدرب اليساره چم رزيه اتحمّلت
چم جرح عينك تشاهد انته چم لوعه شفت
معجزه وضلّيت عايش بالدرب لا ما متت

الله ايْساعِدك من لوعة ايامك
تمشي بهالدرب ما هادت آلامك
يالشفت الاذيه .. برض الغاضريه
⁦▪️⁩⁦▪️⁩⁦▪️⁩⁦▪️⁩⁦▪️
شافت اشچم لوعه عينك بالطفوف المؤلمه
اتحملت كل الاذيه ابروحك المو سالمه
عينك اتشوف الضحايه ودمعتك تجري دمه
وابسهام الفرگه گلبك سيدي اهواي انرمه

بالطف چم جرح مرّن عله اعيونك
من گد البچي متجرّحه اجفونك
بالدمعه الجريه .. برض الغاضريه
⁦▪️⁩⁦▪️⁩⁦▪️⁩⁦▪️⁩⁦▪️
سيدي ابدرب المنايه تمشي وايزيد الصبُر
ابگلبك من الغاضريه والحزن زاد الكسُر
والهوه متشمّه ريتك سيدي تشتم جمُر
بس جراحات ومواجع يخلص وياك العمُر

يالبيك المواجع حيره ما تنعد
ميّت من گبل موتك امامي شگد
شفت اشچم رزيه .. برض الغاضريه
⁦▪️⁩⁦▪️⁩⁦▪️⁩⁦▪️⁩⁦▪️
گلبك الشاف المواجع والحزن بي يتّضح
الله كان ابعون گلبك چم جرح شاف وجرح
تنلچم روحك اشوفك من تباوع للرمح
باب الدموع اعله خدّك من تباوع ينفتح

روحك يا امامي هوايه مفجوعه
اتشاهد راس ابوك الشاهد اللوعه
برماح العليّه .. برض الغاضريه
⁦▪️⁩⁦▪️⁩⁦▪️⁩⁦▪️⁩⁦▪️
سيدي تختم حياتك بالدموع الهامله
دمعتك من دم تلالي وفوگ خدّك سايله
تذكر إمصاب الاهالي وكل مواجع كربله
تذكر إحسين وذبحته والجروح الهائله

دمعك سيدي فوگ الوجن يصطف
من قبل الاجل تذكر جروح الطف
بالك بالمنيه .. برض الغاضريه
⁦▪️⁩⁦▪️⁩⁦▪️⁩⁦▪️⁩⁦▪️

تمت

ابو الحسن الوائلي
٢٠٢١/ ١٤٤٣

قصائد وفاة مولاتي رقيه عليها السلام 👇