Nejashi Printing Press

4.4K views09:05

ረመዷን ቁርአን በብዛት የሚነበብበት ወር ነው። ቁርአን ዝምብሎ ብዙ ለመጨረስ ብቻ በጥድፊያ ማንበብ ከቁርአን ተጠቃሚነትን ያሳጣል። በቁርኣን ተጠቃሚ ለመሆን ከሚያስችሉን መንገዶች መካከል ጥቂቶቹን እነሆ፦

1- ቁርኣንን ማንበብ ከመጀመር በፊት፡

አላህ ይህን ቁርኣን እንድንጠቀመው ልቦናችንን ይከፍትልን ዘንድ በተማጽኖ ሆነን ዱዓእ ማድረግ ያስፈልገናል። አላህ በቁርኣን እንድናስተነትንና በርሱ ልባችን እንዲነካ እንዲያግዘን ደጋግመን እንጠይቀዋለን። ይህ ዱዓእ ትልቅ ሚና ያው ሲሆን፣ ለልቦና ቁርኣንን እንዲቀበል ጥሩ መነሳሳት ይፈጥራል።

2- ቁርኣንን አብዝቶ ማንበብ፡

ከቁርኣን ጋር ረዘም ያለ ጊዜ ወስዶ ማንበብ ሌላኛው በቁርኣን እንድንጠቀም የሚያስችለን ነው። ቁርኣንን የምናነብበት ቦታ በተቻለው መጠን እርጋታ ያለበት ቦታ ቢሆን በላጭ ነው። ረብሻና ጫጫታ ካለባቸው ቦታዎች ርቆ ማንበብ ለአዕምሮ ምቹ ነው። ከመቅራታችን በፊት ደግሞ ዉዱእ ማድረግና ጥርስን መፋቅ (ሲዋክ) መርሳት የለብንም።

3- ቁርኣንን ውብት ባለው ድምፅ ማንበብ፡

ቁርኣንን አሳምሮ ማንበብ ትልቅ ድርሻ አለው። ለውስጣችን ደግሞ ስሜት ይሰጣል። ግንዛቤንና ማስተንተንን በመፍጠር ረገድ ሚናው ከፍ ያለ ነው። ይህን ጊዜ በውስጣችን ላይ ከመረዳትና በርሱ ከመገሰጽ ጋር ኢማን ይመጣል።

4- በተረጋጋና በሐዘን ስሜት ላይ ሆኖ ማንበብ፡

ቁርኣንን በምናነብበት ጊዜ ሕግጋቱን ጠብቀንና ቆም ብለን ማስተንተን ባለብን ቦታ እየቆምን፣ ማዘን ባለብን ቦታ እያዘንን መሆን አለበት። በሐዘን (ልብን በሚሰብር ቅላጼና ስሜት) ላይ ሆነን በልባችን ላይ ተጽእኖው እንዲያርፍ ማድረግ አለብን።

5- የአንቀጾችን ጥቅል ግንዛቤ መረዳት መቻል፡

የአዕምሮ ሥራ ቁርኣን ስናነብ መረዳትና መገንዘብ ነው። የእያንዳንዱ አንቀጽ ጥቅል መልዕክት ለማወቅ ከሞከርን ንባባችን እንዳይቋረጥ ይረዳዋል። ይህ ማለት እያንዳንዱን የቁርኣን አንቀጽ ቃል በቃል ትርጉማቸውን ከጀርባቸው ያዘለውን ነገር ማወቅ ማለት አይደለም። ጥቅል የአንቀጹን ትርጉም ወይም ከአንቀጹ ጋር የተያያዙ መልዕክቶችን ከተረዳን በቂ ነው። ይህን ማድረግ በመጀመራችን በአጭር ጊዜ ደረጃችን ወደ ከፍተኛው ቁርኣንን ማስተንተን እንዲሁም በርሱ ተጽዕኖ ውስጥ የምንጓዝበት መንገድና ስሜት ላይ ያደርሰናል።

6- ከቁርኣን ጋር ጥሩ ግንኙነት ለማድረግ መታገል፡

ቁርኣን ልክ አንተ ላይ እንደወረደ፣ አንተን እንደሚያናግር ሆነ በሕይወትህ ላይ ልፋትና ተግባርህ ሁሉ ከርሱ እንዲቀዳ መታገል፣ አንቀጾቹ የሚጠይቁበት ቦታ ስትደርስ እንደሚያናግርህ ማሰብ፣ ዱዓእ በሚያደርግበት ጊዜ አሚን ማለትን ያካትታል።
ውስጥህን የሚያነቁ አንቀጾችን ደጋግሞ ማንበብ፡ ልቦና ላይ ተጽእኗቸው ከፍተኛ የሆኑ አንቀጾችን ደጋግሞ ማንብብ ለልቦና ብርሃን ሲሆን በውስጥም ኢማንን ይቀሰቅሳል።

7- ከጎንህ አጫጭር የቁርኣን ትርጉም (ተፍሲር) ቢኖር መልካም ነው፡

ቁርኣንን በምናነብበት ጊዜ ትርጉሙን በቀላሉ ለማወቅ በምንቸገርበት ጊዜ የቁርኣን ትርጉሞችንና ማብራሪያዎችን ብንይዝ ይመረጣል። ነገር ግን ቁርኣንን አንብበን ከጨረስን በኋላ ወደ ትርጉም መሄዱ በላጭ ነው። ቁርኣኑ እየተነበበ ከድባቡ ሳይወጣ ቃላትን መፈለግና ወዲያው መመለስ የሚቻልበት አጋጣሚ ካለ ግን ቢደረግ ችግር የለውም።

ምንጭ ፡ ጥቂት የረመዷ ቀናት መጽሐፍ
ዐብዱረዛቅ ነጋሽ እንደተረጎመው

https://nejashibooks.com/

https://www.tiktok.com/@nejashibooks

https://t.me/Nejashipp

5.88K viewsedited 09:05