Святкуем Дзень Волі як можам, як умеем - па-мышапавучы!

Ух, нешта занадта глыбока у вучобе захрас, ажне даўно нічога сюды не прыносіў.

Пачнем з класікі - з дранікаў) #дранікі

А потым можна вяртацца да мышапавукоў. Дзякуй небу, ёсць што паказаць, праца не спынялася.

Што такое стома? То калі сярод замалёвак і нататкаў самі сабою малююцца пэўныя "сігналы". Нешта няўсвядомленае намагаецца звярнуць маю ўвагу на агульны стан арганізма)

Выпадковы бульбахтоньчык спадабаўся, таму дамаляваю да паўнавартаснага мема. Прышпілю яго ў закрэп, у дадатак да тэгаў й агульнай інфармацыі.

Закрэп з тэгамі і пералікам напрамкаў дзейнасці.

#мышапавукі - для тых рэчаў, што агульныя для майго мышапавучага сусвету.

#Баўка - йзноў мышапавучы сусвет, але адносна аднаго персанажа, Баўкі. Штосьці накшталт "эх, жыццёва"-коміксаў, але, вядома, інакш.

#Баўкіна_гульня - яшчэ раз Баўка, але то навіны майго могілкавага геймдэву. У якасьці вучэбнага праекту раблю гульню. Зараз гэты тэг будзе выкарыстоўвацца найчасцей.

#дранікі - ну, тут зразумела.

#хорар_даследаванні - у мінулым я часта пісаў артыкулы аб усялякім, што датычна хорару. Кнігі, гульні, малюнкі, іншае. Можа й зара на тое знойдзецца натхненне? Трэ прапрацоўваць тэматычны кантэнт, каб атрымліваць досвед, каб зрабіць мышапавукоў сапраўды моцнымі.

Дарэчы, венерына мухалоўка не прарасла, праз тое й не публікаваў аб ёй анічога. Высветлілася, што вырошчваць іх з насення вельмі цяжка. Таму пакуль што мышыная фітахімера не мае рэферэнсаў)

Потым паспрабую шчэ раз.

"Індзі-геймдэв, або як цяжка рабіць дзённікі распрацоўкі"

#Баўкіна_гульня

Цікавую рэч я ўсвядоміў, пакуль два месяцы адсутнічаў. Выявілася, што асвятляць працэс разробкі гульні яшчэ цяжэй, чым то было з відэа-казкамі.

Цяжка знайсці што паказаць-расказаць.

Бо візуал робіцца ў апошнюю чаргу. Перш за ўсё прапрацоўваецца механіка, якая выглядае вельмі ўмоўна - ну бегаюць нейкія квадрацікі па паверхні большага квадраціка, ну што з гэтага? А рабіць адразу прыгожа - нельга, бо падчас працы некаторыя моманты могуць адваліцца. І атрымаецца, што нешта зроблена дарма.

То у вялікім геймдэве цікава сабіраць асобную тэку "Неўвашоўшае" (якая потым можа быць бонусам да калекцыйнага выдання гоці). Калі працуеш адзін - трэ свядома й пільна размяркоўваць рэсурсы:)

Таму пакуль што я ганяю квадрацікі па экране, а сюды буду закідваць эскізы-канцэпты.

Вось, напрыклад, невялічкая-сімпатычная замалёўка. Як памятаеце, у якасці гг у нас Баўка, мышапавукагрыб. Дзякуючы сваёй галаве ён выдатна ўціснуўся ў квадрат 3х3 - прыгажун:)

А цяпер пытанне - чым гэтае незразумелае намаляванае павінна быць?

#Баўкіна_гульня

Тыя, хто назірае за маёй дзейнасцю даўно, ведаюць - мне больш падабаецца дзівоснае й таямнічае, чым зразумелае й зручнае. Канешне, я не дазваляю сабе ператварыцца на элітарнага артхаўснага рэжысёра з шматлікімі ўзроўнямі сэнсу... Але:)

Вось, напрыклад, хочацца зрабіць інтэрфейс гульні ў выглядзе вока Баўкі, вакол якога мітусяць вусікі. Каб пры пераходзе з адной лакацыі на іншую была не проста загрузка, а каб вока маграла. І раблю, як бачна)

А што там па нячысцікам? Працягваем глядзець кантэпт-арты.

#Баўкіна_гульня

Ствараць нейкую сур'ёзную баявую сістэму я пакуль што не збіраюся. Таму ворагі маюць выгляд анамалій-пастак, з большага статычных. І перш за ўсё (у межах дэмкі, якае змяшчае першыя ўзроўні) буду рабіць вось гэткіх жэўжыкаў.

Што гэта за яны? А пазней падрабязней распавяду, калі мапу прадэманструю. Бо то звязана з агульнымі для мышынага сусвету рэчамі й з'явамі.

Учора нарэшце адбыўся першы стрым пана Тодзі. Цяпер ёсць у каго глядзець новыя хорары, каб азнакамляцца і адначасова маляваць)

(вось ужо крыху памаляваў, зрабіў накіды комікснага ўвасаблення Баўкі) #Баўка

Вельмі, дарэчы, чакаю новы "Сайлент Хіл" і "Амнэзію". Мо яны й не атрымаюцца гэткімі жа добрымі як папярэднія часткі, алё ўсё роўна цікава. А калі атрымаюцца дык увогуле файна.

Сённяшнія навіны то проста жах.

Вось каб што? Крыху адцягнуць непазбежнае? Зрабіць шкоду напаследак? Зруйнована й пашкоджана безліч чаго, і сэнсу ў тым няма. Гідоцце акупантскае.

Сяджу люты, і нічога не магу рабіць, толькі навіны чытаю. Халера. А потым, мусіць, буду маляваць штосьці злое.

Паўсюль якась халера, праца ў рукі не йдзе. Але ўсё яшчэ ёсць запас напрацаванага раней.

Вось, напрыклад, анімашка інтэрфейсу. Вельмі прыблізна, агульна, але мне падабаецца.

#Баўкіна_гульня

Баўка атрымае сваю прыгожую вокладку. Куды ж без яе.

#Баўка

Ёсць думка, якая мне, наспраўдзе, не падабаецца. Але яна рэгулярна патрапляе ў маю чарапную скрыню, халера.

Мо піксельарт? #Баўкіна_гульня

Не таму што "ну гэта ж, атрымліваецца, індзі-гэймдэв, а ён звычайна пікселявы", не. І не таму падабаецца гэткая рэтра-стылістыка (я ж, як то кажуць, "олд", і старыя гульні люблю).

Проста гэта добра з боку рэсурсаў. Праз абмежаваную палітру і адсутнасць звычных градыентаў усе выявы важаць вельмі мала. А гэта важна. Ды й працаваць зручна.

Але не) Зручна то зручна, але сэрцам не цягне ў гэты бок. Вось зусім чамусьці.

Што адбываецца, калі ў Магільшчыка здараецца журбота? Правільна. #дранікі