Зафарнома

УЙЧИЛИК ПАХТАКОРЛАР МАРРАДА

Уйчи туманининг лафзи ҳалол, сўзида устувор фермерлари зафар қучдилар. 15 октябрь куни  22257 тонна “оқ олтин” тайёрланиб, вилоятда учинчи бўлиб ғалаба манзилига етиб келинди.

Бу мақсад йўлида 154 та фермер хўжалиги, минглаб меҳнаткаш инсонлар бир тану бир жон бўлиб ҳаракат қилди. 2026 йил ҳосили учун 4130 гектар майдонда чигит қадаб, парваришлаш ишлари бошланди. Хитойнинг «Шинжон» технологияси ҳамда 76 схема асосида қўш қатор усулида чигит экилди.

Ҳар бир уруғда умид, ҳар бир ниҳолда ишонч, ҳар бир ғўзада эса келажак ҳосили мужассам эди. Аммо мўл ҳосилнинг ўзи кифоя эмас. Уни ўз вақтида, нобудгарчиликсиз йиғиб олиш ҳам катта масъулият талаб этади.

Шу боис пахта йиғим-теримига пухта тайёргарлик кўрилди. 17 та машина терим отряди ва 53 та қўл терим отряди шакллантирилди. Далага техника кирди, теримчилар сафи кенгайди, ҳар бир фермер ўз ҳосили учун янада масъулият билан курашди. Меҳнат ва техника, тажриба ва замонавий ёндашув бир мақсад йўлида бирлашиб, 22270 тонналик улкан хирмон яратилиши таъминланди.

Уйчи далаларидаги бу зафарнинг яна бир муҳим сабаби илғор фермерларимиздан «Замин», «Жаҳонгир Умрзоқов», «Одил оқ олтин файз» фермер хўжаликлари ҳар гектар майдондан 72-75 центнер, «Тола», «Ровот файз барака», «Муниса Зиё нур саховати» , «Сахий Баҳодир» фермер хўжаликлари 65-68 центнердан ҳосил олишга эришиб, улкан хирмон яратилишига муносиб ҳисса қўшдилар.

Энг қувонарлиси, ҳали марра ортида янги имкониятлар бор!

Туман далаларида пахта ҳосили мўл, терим жараёнлари эса давом этмоқда. Демак, эришилган натижаларни янада ошириш, янги ютуқларга эришиш учун имконият етарли. Бугунги зафар эртанги марралар учун мустаҳкам замин яратмоқда.

Уйчи пахтакорларининг бу йилги ғалабаси — фермерлар, қишлоқ хўжалиги ташкилотларининг фидойилик, ҳамжиҳатлик ва мақсад сари бирлашиб, қатъий интилишининг ёрқин намунасидир.

Уйчи пахтакорлари маррада! Бу — зафарли меҳнатнинг, бирдамликнинг ва юксак ишончнинг ғалабасидир!

Марра муборак, Уйчилик пахтакорлар! Янги зафарлар сари олға!

Sayt | Telegram | Facebook | Instagram |  YouTube